Udi witaba dikuatshisha dia Yehowa anyi?

‘Mukalenge udi mukuatshishi wanyi; tshiena ntshina.’​—EBELU 13:6.

1, 2. Bua tshinyi mbia mushinga bua tuetu kuitaba dikuatshisha dia Yehowa ne bulombodi buende mu nsombelu wetu?

 ELABI meji ne: udi wenda mu kajila ka pa mukuna. Kadi kuena nkayebe to, kudi mulombodi muimpe menemene udi musue kukufila. Mmuibidile ngendu ya ku mikuna bikole ne udi ne makanda a bungi kukupita. Pabi ne lutulu luonso udi wenda pabuipi nebe. Mulombodi eu udi ukumona utetuka imue misangu. Bu mudiye uditatshisha bua kupetshi njiwu, udi wolola tshianza bua kukuambuluisha paudi ufika tshitupa tshidi tshibi menemene. Neubenge dikuatshisha diende anyi? Tòo! Bualu muoyo webe udi mu njiwu.

² Bu mutudi bena Kristo, tudi ne bua kuendela mu njila udi ne ntatu. Tudi ne bua kuendela mu njila mubumbakane eu nkayetu anyi? (Matayo 7:14) Tòo, Bible udi uleja ne: Mulombodi muimpe mutambe bonso, Yehowa Nzambi, udi wanyisha bua bantu benda pamue nende. (Genese 5:24; 6:9) Yehowa utu ukuatshisha basadidi bende padibu benda anyi? Udi wamba ne: ‘Meme Yehowa Nzambi webe, nenkukuate ku tshianza tshiebe tshia balume, nkuambila ne: Kutshinyi, nenkukuatshishe.’ (Yeshaya 41:13) Anu bu mulombodi wa mu tshilejilu tshietu, ne bulenga buonso Yehowa udi wolola tshianza tshiende bua kukuatshisha aba badi bakeba kuenda nende ne kushala mulunda wabu. Bushuwa kakuena muntu wa kutudi wasua bua kubenga dikuatshisha diende!

3. Nkonko kayi ituakonkonona mu tshiena-bualu etshi?

³ Mu tshiena-bualu tshishale, tuvua bakule bua mishindu inayi ivua Yehowa muambuluishe bantu bende bikondo bia kale. Udi wambuluisha bantu bende mu mishindu ya muomumue ayi lelu’eu anyi? Mmunyi mutudi mua kushindika ne: tudi tuitaba dikuatshisha diende kayi dionso? Tutangilayi nkonko eyi. Pa nanku, tudi mua kutamba kushindika ne: Yehowa udi bushuwa Mukuatshishi wetu.​—Ebelu 13:6.

 Dikuatshisha dia banjelu

4. Bua tshinyi basadidi ba Nzambi ba lelu badi mua kuikala ne dishindika dia se: banjelu badi babakuatshisha?

⁴ Banjelu batu bakuatshisha basadidi ba Yehowa ba lelu anyi? Eyowa. Bushuwa, lelu kabena bamueneka ku mêsu bua kusungila batendeledi balelela ku njiwu to. Nansha mu bikondo bia kale, banjelu bavua bamuenekela bantu anu misangu mibala ku minu. Malu a bungi akenzabu kaavua amueneka ku mêsu a bantu to anu bu mudibi bienzeka lelu. Nansha nanku, bivua bikankamija bikole basadidi ba Nzambi pavuabu bajingulula ne: banjelu bavuaku bua kubambuluisha. (2 Bakelenge 6:14-17) Tudi petu ne malu adi atukankamija anu bu bobu lelu’eu.

5. Mmunyi mudi Bible uleja ne: banjelu badi pabu mu mudimu wa buambi lelu’eu?

⁵ Banjelu ba Yehowa badi nangananga basankidila mudimu wa pa buawu utudi tuenza. Mmudimu kayi au? Tudi tupeta diandamuna mu Buakabuluibua 14:6 udi wamba ne: ‘Ngakatangila muanjelu mukuabu upapala munkatshi mua diulu, uvua ne lumu luimpe lua tshiendelele lua kuambilaye badi bikala pa buloba, ne kudi ditunga dionso ne tshisamba tshionso ne muaku wonso ne bantu bonso.’ Kakuyi mpata, “lumu luimpe lua tshiendelele” elu ludi lupetangana ne ‘lumu luimpe lua Bukalenge.’ Yezu wakamba bua lumu luimpe elu ne: ‘Nebambile bantu bonso ba pa buloba lumu luimpe elu, neluikale tshimanyishilu ku bisamba bionso’ kumpala kua nshikidilu wa tshikondo etshi kuluaye. (Matayo 24:14) Kadi banjelu kabatu bamonangana ne bantu bua kubayisha to. Yezu wakapesha bantu mudimu eu wa mushinga. (Matayo 28:19, 20) Kabienaku bikankamija bua kumanya ne: patudi tuenza mudimu eu, banjelu bansantu ba meji ne bukole badi batuambuluisha anyi?

6, 7. (a) Ntshinyi tshidi tshileja ne: banjelu badi bafila dikuatshisha mu mudimu wa buambi? (b) Mmunyi mutudi mua kuikala ne dishindika dia se: tudi tupeta dikuatshisha dia banjelu ba Yehowa?

⁶ Kudi bijadiki bivule bidi bileja dikuatshisha dia banjelu bua mudimu wetu. Tshilejilu, misangu ya bungi tutu tumvua ne: mu mudimu wa buambi, Bantemu ba Yehowa batu bapetangana ne muntu kampanda uvua ufuma ku disambila Nzambi ukeba diambuluisha bua kumanya bulelela. Malu bu nunku atu atamba kuenzeka misangu ya bungi ne katuena mua kuamba ne: atu enzeka ku mpukapuka to. Tshipeta tshia dikuatshisha dia banjelu ntshia se: bantu ba bungi badi bafika ku dimanya mua kuenza tshidi ‘muanjelu  udi upapala mu diulu’ umanyisha: ‘Kutshina Nzambi ne kumutumbisha.’​—Buakabuluibua 14:7.

⁷ Udiku pebe ujinga kupeta dikuatshisha dia banjelu ba bukole ba Yehowa anyi? Nanku enza mudimu wa buambi muebe muonso. (1 Kolinto 15:58) Patudi tuenza ne disanka mudimu eu wa pa buawu mutupesha kudi Yehowa, tuikale bashindike ne: banjelu badi batuambuluisha.

Dikuatshisha dia mfumu wa banjelu

8. Mmuanzu kayi munene udi nawu Yezu mu diulu, ne bua tshinyi bualu ebu budi butukankamija?

⁸ Yehowa udi kabidi utupesha diambuluisha dia mushindu mukuabu dia kudi muanjelu. Buakabuluibua 10:1 udi wakula bua ‘muanjelu mukuabu wa bukole’ udi wenza buôwa ne udi ne ‘mpala bu dîba.’ Kakuyi mpata, muanjelu eu wa mu tshikena-kumona udi Yezu Kristo mutumbishibue mu bukokeshi bua mu diulu. (Buakabuluibua 1:13, 16) Yezu mmuanjelu bulelela anyi? Bidi nanku mu ngumvuilu kampanda, bualu udi muanjelu mutambe bakuabu bunene. (1 Tesalonike 4:16) Yezu mmutambe bunene wa ku bana ba Yehowa ba mu nyuma bonso. Yehowa mmumuteke ku mutu kua biluilu Biende bionso bia banjelu. Muanjelu eu mutambe bakuabu bunene udi ufila dikuatshisha dinene bushuwa. Mmu mishindu kayi?

9, 10. (a) Mmunyi mudi Yezu muikale ‘mutukuatshishi’ patudi tuenza bubi? (b) Ndikuatshisha kayi ditudi mua kupeta ku tshilejilu tshia Yezu?

⁹ Mupostolo mukulakaje Yone wakafunda ne: ‘Bienza muntu mukuabu bibi, tudi ne Muakuidi [anyi mukuatshishi] kudi Tatu, Yezu Kristo udi muakane.’ (1 Yone 2:1) Bua tshinyi Yone wakamba ne: Yezu udi ‘mukuatshishi’ wetu nangananga patudi ‘tuenza bibi’? Bualu tudi tuenza bubi dituku dionso ne bubi budi bufikisha ku lufu. (Muambi 7:20; Lomo 6:23) Kadi Yezu wakafila muoyo wende bu mulambu bua mpekatu yetu. Udi ku luseke lua Tatuetu muena luse bua kutuakuila. Yonso wa kutudi udi dijinga ne dikuatshisha edi. Mmunyi mutudi mua kuditaba? Tudi ne bua kunyingalala bua mpekatu yetu ne kukeba dilekelela ku diambuluisha dia mulambu wa Yezu. Tudi kabidi ne bua kuepuka kuenza anu mpekatu imue imue ayi.

¹⁰ Kusakidila pa muanda wa se: Yezu wakatufuila, mmutushile kabidi tshilejilu tshipuangane. (1 Petelo 2:21) Tshilejilu tshiende tshidi tshitulombola, tshituambuluisha bua kudielela mikalu mu nsombelu wetu bua kuepuka mpekatu minene ne kusankisha Yehowa Nzambi. Katuenaku ne disanka dia kuikala ne dikuatshisha dia mushindu’eu anyi? Yezu wakalaya bayidi bende ne: nebafile mukuatshishi mukuabu.

Dikuatshisha dia nyuma muimpe

11, 12. Nyuma wa Yehowa ntshinyi, mmudimu kayi udiye nawu, ne mbua tshinyi tudi nende dijinga lelu’eu?

¹¹ Yezu wakalaya ne: ‘Nendombe Tatu, yeye neanupe musambi [anyi mukuatshishi] mukuabu, ikale nenu tshiendelele, nyuma wa bulelela mene udi ba pa buloba kabayi bamanye mua kuangata.’ (Yone 14:16, 17) “Nyuma wa bulelela” eu anyi nyuma muimpe, ki mmuntu to, kadi mbukole buenzeji bua Yehowa. Mbukole budi kabuyi ne mikalu. Yehowa wakafuka nabu diulu ne buloba, kuenza nabu bishima bia dikema ne kusokolola disua diende mu bikena-kumona. Bu mudi Yehowa kayi ukuata mudimu ne nyuma wende mu mishindu eyi misunguluke lelu, abi bidi biumvuija ne: katuena nende dijinga anyi?

¹² Tòo! Mu bikondo ebi bia “malu makole,” tudi dijinga ne nyuma wa Yehowa menemene. (2 Timote 3:1) Nyuma eu udi utukolesha bua kutantamena mateta. Udi utuambuluisha bua kuikala ne ngikadilu milenga idi itusemeja pabuipi ne Yehowa ne bana betu ba balume ne bakaji ba mu nyuma. (Galatia 5:22, 23) Kadi mmunyi mutudi mua kupeta dikuatshisha edi dilenga dia kudi Yehowa?

13, 14. (a) Bua tshinyi tudi mua kuikala bashindike ne: Yehowa mmusue kupesha bantu bende nyuma wende muimpe? (b) Ntshinyi tshitudi mua kuenza tshidi mua kuleja ne: katuena tuitaba bushuwa dipa dia nyuma muimpe?

 ¹³ Tshia kumpala, tudi ne bua kulomba nyuma muimpe mu disambila. Yezu wakamba ne: ‘Nuenu bantu babi, binuamanya mua kupa bana benu bintu bimpe, Tatu wenu wa mu diulu kêna upa batu bamulomba nyuma muimpe anyi?’ (Luka 11:13) Eyowa, Yehowa n’Tatu muimpe mutambe. Bituamulombaye ne muoyo mujima ne ditabuja, kakupanga kutupesha dipa edi to. Kadi lukonko ludi ne: tutu tulomba nyuma muimpe anyi? Tudi ne tshia kulomba nyuma mu masambila etu dituku dionso.

¹⁴ Tshibidi, tudi tuitaba dipa dia nyuma muimpe patudi tuenza malu mu diumvuangana nende. Tshilejilu, fuanyikija ne: Muena Kristo kampanda udi uluangana ne meji a kutangila bindidimbi bia bantu butaka. Mmusambile bua nyuma muimpe amuambuluishe bua kukandamena tshibidilu etshi tshia bukoya. Uvua mulombe mibelu kudi bakulu bena Kristo ne bavua bamubele bua kuenza bualu bua mushinga ebu: kubenga nansha kusemena pabuipi ne bindidimbi bibi bia mushindu’eu. (Matayo 5:29) Kadi netuambe tshinyi biabengaye kutumikila mubelu wabu pa kutungunuka ne kutangila bindidimbi ebi padiye ubipeta? Udiku wenza malu adi mu diumvuangana ne disambila diende bua kupeta dikuatshisha dia nyuma muimpe anyi? Peshi udi mu njiwu ya kubungamija nyuma wa Nzambi ne kupangila mua kumupeta? (Efeso 4:30) Bulelela, buonso buetu tudi tukengela kuenza muetu muonso bua kuikala bashindike ne: tudi tutungunuka ne kupeta dikuatshisha dilenga edi dia kudi Yehowa.

Dikuatshisha dia Dîyi dia Nzambi

15. Mmunyi mutudi mua kuleja ne: katuena tuangata Bible bu mukanda wa tshianana?

¹⁵ Bible utu mpokolo wa diambuluisha bua basadidi ba Yehowa ba lulamatu kukadi nkama ne nkama ya bidimu. Katuena ne bua kuangata Mifundu Minsantu bu mukanda wa tshianana to, kadi tudi ne bua kuikala bamanye ne: Bible utu ufila dikuatshisha dia bungi. Bidi bikengela kudienzeja bua kuitaba dikuatshisha diende. Tudi ne bua kuvuija dibala dia Bible tshibidilu tshietu.

16, 17. (a) Mmunyi mudi Musambu 1:2, 3 wakula bua bipeta bimpe bia dibala mikenji ya Nzambi? (b) Mmunyi mudi Musambu 1:3 uleja ne: tudi ne bua kuenza mudimu mukole?

¹⁶ Musambu 1:2, 3 udi wamba mêyi aa bua muntu udi usankisha Nzambi: ‘Disanka diende didi mu mikenji ya Yehowa, ne mu mikenji yende mmudiye welangana meji munya ne butuku. Yeye udi bu mutshi wakukunabu ku kala kua misulu ya mâyi, udi ukuama mamuma au mu tshidimu tshiawu; dibeji diawu kadiena difubidila. Malu onso adiye wenza adi atuta diakalengele.’ Udi umona lungenyi lua mushinga mukole mu mvese eyi anyi? Mbipepele bua kubala mêyi aa ne kuamba ne: adi akula patupu bua muaba wa ditalala ne mulengele, mbuena kuamba ne: mutshi wa ku mpenga kua musulu udi ufila dileji. Bitu bisankisha bua kulalaku ka tulu mêba a mapingaja muinshi mua mutshi wa nunku, ki mmuomu anyi? Kadi musambu eu kawena utulomba bua kuela meji a kuikisha to. Udi wakula bua bualu budi bulomba kuenza mudimu mukole. Mmu mushindu kayi?

¹⁷ Tangila, mutshi eu kawena mutshi wa dileji patupu udi mumenene mu mpukapuka ku mpenga kua musulu to. Mmutshi ‘mukuna’ pa muaba musungula: ‘ku kala kua misulu ya mâyi.’ Mmunyi mudi mutshi umue mua kumenena pabuipi ne misulu ya bungi? Muaba udibu bakuna mitshi ya bimuma, muena muaba au udi mua kumbula minkoloji ya bungi bua kufikisha mâyi ku miji ya mitshi yende ya mushinga. Ee, mpindieu bidi biumvuika! Bituikale basase mu nyuma bu mutshi au, mbualu muntu kampanda mmuenze mudimu mukole bua kutuambuluisha. Tudi mu bulongolodi budi butuala mâyi a kazeze a bulelela too ne patudi, kadi tudi petu ne wetu mudimu wa kuenza. Tudi ne bua kuikala badiakaje bua kunua  mâyi aa a mushinga pa kudifila mu dielangana meji ne dienza makebulula adi akengedibua bua kubueja bulelela bua mu Dîyi dia Nzambi mu lungenyi luetu ne mu mutshima wetu. Pa kuenza nanku, tuetu petu netukuame mamuma mimpe.

18. Ntshinyi tshitudi ne bua kuenza bua kupeta mandamuna a nkonko yetu mu Bible?

¹⁸ Bible yeye mu kabadi katuyi bamubulule kêna ne dikuatshisha nansha. Peshi Bible ki mbuanga anyi tshijimba, bienze bu se: tudi mua kubuita ku mêsu, tubulula Bible pa dibeji kayi dionso, batekemene bua kupeta diandamuna dia lukonko luetu mu dibeji didi mu mêsu etu. Patudi tusua kuangata mapangadika, tudi ne bua kumbula bua kupeta “dimanya dia malu a Nzambi” bu mutudi tumbula bua kukeba tshintu tshia mushinga mukole tshijika. (Nsumuinu 2:1-5) Misangu ya bungi bitu bikengela kuenza makebulula ne tshisumi ne lubatshi bua kupeta mibelu ya mu Mukanda wa Nzambi idi yakula bua majinga masunguluke atudi nawu. Tudi ne mikanda ya bungi idi yumvuija Bible idi mua kutuambuluisha mu makebulula atudi tuenza. Patudi tumbula nayi ne ntema yonso bua kupeta bubanji bua meji a mu Dîyi dia Nzambi, tudi bushuwa tuobokela dikuatshisha dia Yehowa.

Dikuatshisha ku butuangaji bua bena Kristo netu

19. (a) Bua tshinyi tudi mua kuangata biena-bualu bia mu Tshibumba tshia Nsentedi anyi Réveillez-vous! bu dikuatshisha didi Yehowa utupesha ku butuangaji bua bena kuitabuja netu? (b) Mmunyi muvua tshiena-bualu kampanda tshia mu bibejibeji bietu tshikuambuluishe?

¹⁹ Basadidi ba Yehowa ba pa buloba batu bakuatshishangana misangu yonso. Yehowa mmushintuluke anyi? Tòo. Kakuyi mpata, yonso wa kutudi udi mua kuvuluka misangu ivuaye mupete diambuluisha divuaye nadi dijinga kudi bena kuitabuja nende mu tshikondo tshiakanyine. Tshilejilu, udiku uvuluka tshiena-bualu kampanda tshia mu Tshibumba tshia Nsentedi anyi Réveillez-vous! tshivua tshikusambe pauvua dijinga ne busambi anyi tshikuambuluishe bua kujikija lutatu kansanga peshi kutantamena diteta kampanda dia ditabuja diebe anyi? Yehowa wakakupesha dikuatshisha adi ku butuangaji bua “mupika wa lulamatu ne wa budimu” udibu bapeshe mudimu wa kufila “biakudia mu tshikondo tshiakanyine.”​—Matayo 24:45-47, NW.

20. Mmunyi mudi bakulu bena Kristo baleja ne: badi “mapa mikale bantu”?

²⁰ Kadi misangu ya bungi dikuatshisha ditudi tupeta kudi bena kuitabuja netu ditu dia buludiludi. Mukulu muena Kristo kampanda udi mua kuenza muyuki udi ulenga muoyo wetu, anyi udi mua kuenza dikumbula dia bulami didi mua kutuambuluisha mu tshikondo tshia lutatu, peshi kutupesha ne bulenga buonso mibelu idi ituambuluisha bua kujingulula ne kutshimuna butekete butudi nabu. Muanetu mukuabu muena Kristo wakaleja dianyisha diende bua diambuluisha dia mukulu kampanda wamba ne: “Mu mudimu wa buambi, wakankankamija bua kumukuatshila malu avua mu mutshima wanyi. Pabi anu butuku bua kutshia dituku adi, mvua musambile  Yehowa mmulomba bua mpete muntu umvua mua kukuatshila malu anyi. Dituku divua dilonda, ke muanetu wa balume eu kuyukila nanyi, undeja luse lua bungi. Wakangambuluisha bua meme kujingulula muvua Yehowa munkuatshishe bidimu bia bungi. Ndi ne dianyisha kudi Yehowa bua muvuaye muntumine mukulu eu.” Mu mishindu bu nunku, bakulu bena Kristo badi baleja ne: badi “mapa mikale bantu” mafila kudi Yehowa ku butuangaji bua Yezu Kristo bua kutukuatshisha bua kunanukila mu njila wa muoyo.​—Efeso 4:8, NW.

21, 22. (a) Mbipeta kayi bidi bimueneka padi bantu badi mu tshisumbu batumikila mubelu udi usanganyibua mu Filipoi 2:4? (b) Bua tshinyi nansha bienzedi bikese bia bulenga bidi ne mushinga?

²¹ Bena Kristo bonso bena lulamatu ne bakulu kabidi mbasue kutumikila dîyi edi difundisha ku nyuma dia se: ‘Muntu ne muntu katangidi malu ende nkayawu, kadi muntu ne muntu atangile kabidi malu a bakuabu.’ (Filipoi 2:4) Padi bantu badi mu tshisumbu tshia bena Kristo batumikila mubelu eu, bienzedi bia bulenga bia dikema bidi bimueneka. Tshilejilu, malu makuate buôwa akenzekela dîku kampanda diakamue. Tatu uvua muye ne muanende wa bakaji mukese ku makazen. Mu dipingana, mpukapuka ya mashinyi yakabenzekela. Muana wa bakaji eu wakafua, tatu kutapikaye bikole. Pakapatukaye mu lupitadi, wakanji kushala mulema uvua kayi mua kuenza bualu nansha bumue nkayende to. Mukajende uvua muletele bikole kayi ukumbana bua kumulama nkayende to. Nunku muanetu wa balume wa mu tshisumbu tshiabu ne mukajende bakangata bena dibaka aba bavua mu dibungama ne kuya nabu kumbelu kuabu ne kubatabalelabu mbingu ndambu.

²² Bushuwa, bienzedi bia bulenga bionso kabitu anu bua kuambuluisha badi diakabi dia mushindu’eu difikile ne bilomba kudifila kua nunku to. Tudi mua kupeta dikuatshisha anu dikese. Kadi nansha bulenga budibu batuleje buikale bukese, tudi tubuanyisha, ki mmuomu anyi? Udi uvulukaku tshikondo tshivua dîyi dilenga anyi bualu bua meji bukuenzela kudi muanetu wa balume anyi wa bakaji kampanda bukupeshe dikuatshisha diuvua nadi dijinga anyi? Misangu ya bungi, Yehowa utu ututabalela mu mishindu ya buena eyi.​—Nsumuinu 17:17; 18:24.

23. Yehowa udi umona munyi patudi tudienzeja bua kuambuluishangana?

²³ Udi musue bua Yehowa akuate nebe mudimu bua kuambuluisha bakuabu anyi? Udi pebe mua kupeta disanka edi dia pa buadi. Yehowa udi wanyisha patudi tudienzeja bua kuenza nanku. Dîyi diende didi diamba ne: ‘Udi ufuila mupele luse udi usombesha Yehowa bintu; yeye neamuenzele bimpe ku buimpe buakumuenzelaye.’ (Nsumuinu 19:17) Tudi tupeta disanka divule patudi tudifila bua bana betu ba balume ne ba bakaji. (Bienzedi 20:35) Aba badi baditola pa nkayabu ku budisuile kabena bapeta disanka dia kuambuluisha bakuabu anyi dia kupeta dikankamija to. (Nsumuinu 18:1) Nunku, tuikalayi tubuela pa tshibidilu mu bisangilu bia bena Kristo ne lulamatu luonso bua tuikale mua kukankamijangana.​—Ebelu 10:24, 25.

24. Bua tshinyi katuena ne bua kudiumvua bapangile tshintu kampanda bualu katuena tumona bishima bia dikema Yehowa bia kale?

²⁴ Ki mbualu bua musangelu bua kukonkonona mishindu idi Yehowa utukuatshisha anyi? Nansha mutudi katuyi mu tshikondo tshidi Yehowa wenza bishima bia dikema bua kukumbaja malu adiye mulongolole, katuena ne bua kudiumvua bapangile tshintu kampanda to. Bulelela, bualu budi ne mushinga mbua se: Yehowa udi utupesha dikuatshisha dionso ditudi nadi dijinga bua tuetu kushala ne lulamatu. Tuetu bananukile pamue mu ditabuja, netuikale ne muoyo bua kumona bienzedi bia dikema bia Yehowa bia butumbi bia katshia ne katshia! Tuikalayi bapangadije bua kuitaba ne kuobokela dikuatshisha dia Yehowa dia dinanga bua se: tuikale mua kuamba petu mêyi a mvese wetu wa tshidimu tshia 2005 a ne: “Dikuatshisha dianyi didi difuma kudi Yehowa.”​—Musambu 121:2.

Udi wela meji kayi?

Mmunyi mudi Yehowa ufila dikuatshisha ditudi nadi dijinga lelu:

• ku butuangaji bua banjelu?

• ku diambuluisha dia nyuma muimpe?

• ku diambuluisha dia Dîyi diende difundisha ku nyuma?

• ku butuangaji bua bena kuitabuja netu?

[Nkonko ya dilonga]

[Tshimfuanyi mu dibeji 18]

Bidi bikankamija bua kumanya se: banjelu badi batuambuluisha mu mudimu wa buambi

[Tshimfuanyi mu dibeji 21]

Yehowa udi mua kuenza mudimu ne umue wa ku bena kuitabuja netu bua kutusamba bilondeshile dijinga ditudi nadi