Jehova Ṭanpuina I Pawm Em?
Jehova Ṭanpuina I Pawm Em?
“Lalpa chu mi ṭanpuitu a ni, ka hlau lo vang.”—HEBRAI 13:6.
1, 2. Engvângin nge nunah hian Jehova ṭanpuina leh kaihhruaina pawm chu thil pawimawh tak a nih?
TLANGA lâwn chho angin han inngai ta la. Mahse, nangmah chauh i ni lo, hruaitu pakhat kalpui tûr chein a inpe a, ani chu hruaitu a zawnga ṭha ber a ni. I aiin thiltawn leh chakna a nei a; mahse, dawhthei takin i kiangah a kal tlat a ni. Kawng lakah i tlu palh ṭhîn tih a hria a. I himna a ngaihtuah avângin, hlauhawm zual bik laiah chuan ṭanpui tûr chein a kut a pe ṭhîn che a ni. Chu a ṭanpuina che chu i hnial ang em? Hnial teh suh e! Dinhmun hlauhawmah i awm si a.
2 Kristian kan nih angin, kawng harsa tak zawh tûr kan nei a. Chu kawng bumboh tak chu keimahni chauhvin kan zawh dâwn em ni? (Matthaia 7:14) Dâwn lo ve, Bible chuan Hruaitu hmuh theih azawnga ṭha bêr, Pathian Jehova’n mihringte chu amah nêna kal dun, a nih loh leh lên dun chu a phal tih a târ lang. (Genesis 5:24; 6:9) Kawnga an kal laiin Jehova chuan a chhiahhlawhte chu a ṭanpui em? Ani chuan: “Kei LALPA in Pathian hian, ‘Hlau suh u, ka ṭanpui dâwn a che u’ tiin in kut dinglam chu ka chelh dâwn si a,” tiin a sawi. (Isaia 41:13) Kan tehkhin thua hruaitu ang maiin, Jehova chuan amah nêna kal dun dân zawngtute hnênah chuan a ṭanpuina leh a ṭhian nih theihna chu ngilnei takin a pe a ni. A ṭanpuina hi tumahin hnial kan duh lo chiang ngei ang!
3. He sawihonaah hian eng zawhnate nge kan ngaihtuah dâwn?
3 Thuziak hmasaah khân, Jehova’n hmân laia a mite a ṭanpui dân kawng lite kan sawiho tawh a. Tûn laiah khatiang tho khân a mite a ṭanpui em le? Chutiang ṭanpuina engpawh chu dawng ngei tûrin eng nge kan tih theih? Hêng zawhnate hi i lo ngaihtuah ang u. Chutianga kan tih chuan, Jehova hi min Ṭanpuitu a ni tih kan ring nghet zual sauh thei ang.—Hebrai 13:6.
Vântirhkohte Hmanga Ṭanpuina
4. Tûn laia Pathian chhiahhlawhte’n engvângin nge vântirhkohte ṭanpuina an rin tlat theih?
4 Tûn laia Jehova chhiahhlawhte hi vântirhkohte’n an ṭanpui em? Aw, ṭanpui e. Tûn laiah hlauhawm laka betu dikte chhan chhuak tûrin hmuh theihin an inlâr lo ngei mai a. Bible hun laiah pawh, chutiang kawng chuan vântirhkohte chu an inrawlh khât hle a ni. Tûn lai ang bawk hian, an thiltih tam berte chu mihring mita hmuh theih a ni lo. Nimahsela, vântirhkohte chu anmahni ṭanpui tûrin an awm tih hretu Pathian chhiahhlawhte chuan, chu hriatna chu an thlamuanpui hle. (2 Lalte 6:14-17) Chutianga inhriatna neih nachhan tûr ṭha tak chu kan nei a ni.
5. Engtin nge Bible-in vântirhkohte chu tun lai thu hrilh rawngbâwlnaah an inrawlh tih a târ lan?
5 Kan hnathawh danglam bîk tak chu Jehova vântirhkohte chuan an ngaihsak bîk hle a. Chu chu eng hna nge ni? Thu Puan 14:6-ah a chhânna kan hmu thei a ni: “Leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra chatuana chanchin ṭha nei vântirhkoh dang vânlaizâwla thlâwk ka hmu a,” tihah hian. He “chatuana chanchin ṭha” hi Isua’n khawvêl tâwpna a thlen hmaa “hnam zawng zawng hriattîrna tûrin khawvêl zawng zawngah hrilhin a awm ang” tia a sawi lâwk “ram chanchin ṭha” nên a inzawm chiang hle a ni. (Matthaia 24:14) Vântirhkohte chuan anmahniin thu an hril lo ngei mai a. Isua’n he hna thawh tûr pawimawh tak hi mihringte hnênah a pe a ni. (Matthaia 28:19, 20) Chu hna thawh tûr chu kan thawh laiin vântirhkoh thianghlim, thil siam fing leh thiltithei takte ṭanpuina kan dawng tih hriat chu a thlamuanthlâk hle a ni lâwm ni?
6, 7. (a) Vântirhkohte’n kan thu hrilhnaah min ṭanpui tih engin nge lantîr? (b) Engtin nge Jehova vântirhkohte ṭanpuina dawn ngei chu kan inbeisei theih ang?
6 Kan hnathawh hi vântirhkohte’n an ṭanpui ngei tih finfiahna tam tak a awm a ni. Entîr nân, Jehova Thuhretute chuan an thu hrilh rawngbâwlnaah thutak hmu chhuak tûra Pathian ṭanpuina dîla ṭawngṭai zo hlimte an tawn thu kan hre fo va. Chûng thiltawnte chu lo innang fuh palh mai mai anga sawi atân chuan a zîng lutuk deuh hret a ni. Chutiang vântirhkoh ṭanpuina zârah, mi tam takte chuan ‘vântirhkoh vanlaizâwla thlâwk’ hian: “Pathian chu hlau ula, chawimawi rawh u,” a tih anga tih ve dân an zir a ni.—Thu Puan 14:7.
7 Jehova vântirhkoh thiltithei takte ṭanpuina dawn chu i châk em? Chuti a nih chuan, i rawngbâwlnaah theihtâwp chhuah rawh. (1 Korinth 15:58) Jehova hna min pêk danglam tak hi ṭhahnemngai taka kan thawh hian, a vântirhkohte ṭanpuina dawn ngei kan inbeisei tlat thei a ni.
Vântirhkohte Hotupa Ber Ṭanpuina
8. Isua’n eng dinhmun sâng tak nge vânah a luah a, chu chu engvangin nge kan tân a thlamuanthlâk?
8 Jehova chuan vântirhkohte ṭanpuina chi dang min pe bawk a. Thu Puan 10:1 chuan “vântirhkoh chak” hlauhawm tak, a “hmai chu nî ang” mai chungchâng a sawi a. He inlârnaa vântirhkoh hian chawimawina dawng Isua Krista, a van lam thiltihtheihna nei chu a entîr a ni. (Thu Puan 1:13, 14) Isua chu vântirhkoh a ni tak zet em? A ni a tih theih ang, Isua chu vântirhkoh chungnung ber a nih avângin. (1 Thessalonika 4:16) Isua chu Jehova thlarau lam fa zawng zawngte zînga thiltithei ber a ni. Jehova chuan A vântirhkoh sipai zawng zawngte chunga thu neituah a dah a. Vântirhkoh chungnung ber a nih avângin, ani hi ṭanpuina thiltithei tak lo chhuahna hnâr a ni. Eng kawngin nge?
9, 10. (a) Thil kan tihsual hunah engtin nge Isua chu min “ṭanpuitu” a nih? (b) Isua entîrnaah hian eng ṭanpuina nge kan hmuh theih?
9 Tirhkoh upa tawh tak Johana chuan: “Tupawhin thil a tihsual chuan Pa hnêna mi sawipuitu [“ṭanpuitu,” NW], Isua Krista mi fel chu kan nei e,” tiin a ziak a. (1 Johana 2:1) Engvângin nge Johana’n Isua chu ‘thil kan tihsuala’ min “sawipuitu” anga a sawi? Aw le, nî tinin thil kan tisual a, sual chuan thihnaah min thlen a ni. (Thuhriltu 7:20; Rom 6:23) Amaherawhchu, Isua chuan kan sualte tlan nân a nun a pe tawh a. Tin, kan Pa zahngaithei tak sîrah chuan kan tâna thupha chawi tûrin a awm a ni. Kan vaiin chutiang ṭanpuina chu kan mamawh ṭheuh va. Chu chu engtin nge kan dawn theih ang? Kan sualte simin, Isua tlanna zârah kan sualte tân ngaihdamna kan dîl a ngai a. Kan thil sual tihte kan tih leh loh a ngai bawk.
10 Kan tâna a thih mai bâkah, Isua chuan kan tân entawn tûr ṭha famkim a siam bawk a. (1 Petera 2:21) A entîrna siam chuan min kaihruai a, sual khûnkhân takte kan pumpelh theih nân leh Pathian Jehova tihlâwm theih nâna kan nun kawng sial thei tûrin min ṭanpui a ni. Chutiang ṭanpuina kan dawn avângin kan lâwm hle a ni lâwm ni? Isua chuan a hnungzuitute hnênah ṭanpuina dang pêk pawh a tiam bawk.
Thlarau Thianghlim Ṭanpuina
11, 12. Eng nge Jehova thlarau chu ni a, eng angin nge thil a tihtheih a, engvângin nge tûn laiah kan mamawh?
11 Isua chuan: “Pa ka dîl ang a, ani chuan thlamuantu dang a pe ang che u, chatuana in hnêna awm tûrin, chu chu thlarau dik tak a ni; khawvêlin chu mi chu a nei thei lo,” tiin a tiam a ni. (Johana 14:16, 17) He “thlarau dik,” a nih loh leh thlarau thianghlim hi, mihring a ni lo va; chakna—Jehova chakna chevêl reng hi a ni. A thiltihtheihna chuan tiam chin a nei lo. Chu chu Jehova’n lei leh vân a siam nân te, thilmak ropui tak tih nân te, leh inlârna hmanga a duhzâwng puan chhuah nân tea a hman chakna chu a ni. Jehova’n tûn laiah a thlarau chu chutiang kawng zâwnga a hman tawh loh avângin chu chu kan mamawh lo tihna em ni?
12 Hnai lo ve! He “hun khirh takte” kârah hian tûn hma zawng aiin Jehova thlarau chu kan mamawh zual a ni. (2 Timothea 3:1) Fiahna hnuaiah chhel tûrin min tichak a. Mize duhawm tak, Jehova leh kan thlarau lam unaute min hnaih lehzualtîr theitute nei chho tûrin min ṭanpui a ni. (Galatia 5:22, 23) A nih leh, engtin nge he Jehova ṭanpuina mak ropui tak hi kan hlâwkpui theih ang?
13, 14. (a) Jehova chuan a thlarau thianghlim chu a mite hnênah phal takin a pe tih engvângin nge kan rin tlat theih? (b) Eng thiltih hmangin nge thlarau thianghlim thilthlâwnpêk kan pawm tak tak lo tih kan lantîr mai theih?
13 A hmasain, thlarau thianghlim dîlin kan ṭawngṭai a ngai a ni. Isua chuan: “Nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!,” a ti. (Luka 11:13) Ni e, Jehova chu Pa ṭha ber mai a ni a. Rinna nêna tih tak zeta thlarau thianghlim kan dîl chuan, chu chu a thlâwnin min pe ngei ngei ang. Zawhna lo awm ta chu, Kan dîl em?, tih hi a ni. Nî tina kan ṭawngṭainaah chu chu kan dîl tûr a ni.
14 Pahnihnaah chuan, chu mi mila thiltihna hmangin chu thilthlâwnpêk chu kan dawng a ni. Entîr nân: Kristian tuemaw chuan saruak lem en châkna nasa tak lo do ta ang sela. He thil chîn bawlhhlawh pumpelh tûr hian thlarau thianghlim ṭanpuina dîlin a ṭawngṭai a ni. Kristian upate hnênah thurâwn a la a, anni chuan chêt la vat tûr leh chutiang lam thilte a hnaih pawha hnaih hlek lo tûrin thu an râwn a ni. (Matthaia 5:29) An thurâwn ngaihthahin, thlêmna nasa zâwk lamah lût ta se engtin nge ni ang le? Thlarau thianghlim ṭanpuina dîla a ṭawngtaina milin hma a la em? Nge, Pathian thlarau thianghlim tihlungngaih leh chu thilthlâwnpêk chân hlauhawmah a awm zâwk? (Ephesi 4:30) Dik takin, kan vai hian Jehova hnên aṭanga he ṭanpuina mak tak dawng chhunzawm zêl tûrin kan tihtheih apiang tih a ngai a ni.
Pathian Thu Aṭanga Ṭanpuina
15. Bible hi lehkhabu satliah ang maiin kan thlîr lo tih engtin nge kan lantîr theih?
15 Bible hi kum zabi tam tak chhûng Jehova chhiahhlawh rinawmte ṭanpuitu ber a lo ni tawh a. Bible hi lehkhabu satliah ang maia thlîr ai chuan, min ṭanpui theitu thil tithei tak a ni tih kan hre tlat tûr a ni. Chu ṭanpuina dawng tûr chuan ṭan lâk a ngai a. Bible chhiar chu nî tina kan thiltih tûrte zîngah kan telh a ngai a ni.
16, 17. (a) Engtin nge Pathian dân chhiarna lâwmman chu Sâm 1:2, 3-in a sawi? (b) Sâm 1:3-nain engtin nge kan thawh rim a ngai tih a târ lan?
16 Sâm 1:2, 3 chuan Pathian tilâwm mi chungchâng a sawi a: “A lâwmna chu LALPA dânah a ni . . . a; a dân thu chu achhûn azânin a ngaihtuah ṭhîn. Ani chu tuiluang kianga thing phun, a huntêa rah ṭhîn, a hnah pawh uai ngai lo ang hi a ni a; a thiltih apiang chu a hmuingîl zêl ang,” tiin. He thua a pawimawh lai tak hi i hmu em? Hêng thute hi han chhiar a, dinhmun râl muang tak—lui bula thing ding chungchâng sawifiahna mai nia ngaih dân siam chu a awl hle a. Chutiang hmuna han chhûn mut zawk chu a va han nuam dâwn êm! Amaherawhchu, he fakna hla hian chawlh hahdamna lampang ngaihtuah tûrin min sâwm lo. Thil inkalh tak, thawh rimna lam min sawihmuh zâwk a ni. Engtin nge?
17 Heta thing hi thing hlim nei lui bula amaha lo ṭo palh mai a ni lo va. Thing rah nei mi, a hmun tûr tak—“tuiluang” kianga ‘phun’ luih a ni. Thei huanah chuan, a neitu chuan a thing hlu tak zungte chu tuia a châwm theih nân tuiluan kawrte ṭha takin a lai mai thei a. Kha le, tûnah a pawimawh lai kan thleng ta! Thlarau lamah chu thing anga kan duah a nih chuan, kan tâna tuemawin a thawh rim vâng a ni a. Kan tâna thutak tui thianghlim min petu inawpna pâwl pakhat kan bêl a; mahse, kan tih tûr chu kan tih ve a ngai a ni. Pathian Thu thutak chu kan rilru leh thinlunga thun tûr chuan, he tui hlu tak dawng thei leh hîp thei tûr dinhmuna kan indah a, rilrua chhût ngunna leh zir bingna kan neih a ngai a ni. Chutiang chuan, keini pawhin rah ṭha tak kan chhuah thei ang.
18. Kan zawhnate chungchânga Bible chhânna hmu tûrin eng nge ngai?
18 Bible chu keu lohva chhuara dah mai mai a nih chuan kan hlâwkpui lo vang a. Maimit chhîng chunga duhna lai lai han keuva kan zawhna neihte chhânna a lo lan mai beisei theih, ai nei anga ngaih chi a ni hek lo. Thu tlûkna siam tûr kan hmachhawn hian, ro phûm rûk ang maia “Pathian hriatna” chu kan laih a ngai a ni. (Thufingte 2:1-5) Pathian Lehkha Thuin kan mamawhte chungchâng a sawina hmuh nân taima tak leh fîmkhur taka zir bingna neih a ngai fo ṭhîn. Kan zir bingna min ṭanpui tûrin Bible ṭanchhan thu leh hla chhuah tam tak kan nei ṭeuh a ni. Hêngte hi Pathian Thu-a finna ro phûm rûk laih chhuah nâna phûr taka kan hman hian, Jehova ṭanpuina kan hlâwkpui tak zet a ni ang.
Rinpuite Hmanga Ṭanpuina
19. (a) Engvângin nge Vênnainsâng leh Awake! magazine-a thuziakte hi kan rinpuite hmanga ṭanpuina pêk angin kan thlîr ang? (b) Kan chanchinbute zînga a engemaw bera thuziak hian engtin nge a ṭanpui tawh che?
19 Jehova chhiahhlawh mihringte chu inṭanpui tawnna hnâr an ni reng ṭhîn a. He mi kawngah hian Jehova chu a inthlâk danglam em le? Inthlâk danglam lo ve. Ṭanpuina kan mamawh lai taka kan rinpuite hnên aṭanga kan dawn dân kan ngaihtuah chhuak ṭheuh thei ngei ang le. Entîr nân, i mamawh huna thlamuanna emaw, harsatna chingfel tûra ṭanpuina emaw, i rinna chona hmachhawn tûr emawa ṭanpuina i mamawh laiin Vênnainsâng emaw, Awake! emawa thuziak ṭhenkhatin a thlamuan lai che i hre chhuak thei em? Jehova chuan ‘a hun apianga chaw chan tûr’ pe tûra a ruat “bawi rinawm, fing tak” hmangin, chu ṭanpuina chu a pe che a ni.—Matthaia 24:45-47.
20. Eng kawngtein nge Kristian upate chuan ‘mihringte hnêna thilpêk’ an nih zia lantîr an tum?
20 Mahse, rinpuite hnên aṭanga ṭanpuina kan dawn hi a tlang zâwk ṭhîn a. Kristian upa thusawi rilru khawih tak emaw, a berâm tlawhnain hun khirh laiin min ṭanpui emaw, zilhna ngilnei tak min pêkin kan chak lohna hmu tûr leh hneh tûrin min ṭanpui emaw pawh a ni thei. Lâwm nachâng hria Kristian pakhat chuan upain ṭanpuina a pêk chungchângah heti hian a ziak a ni: “Thlawhhma rawngbâwlnaah, ka ngaihtuahna sawi tûrin min fuih a. Chu mi hma zânah chuan, Jehova hnênah ka biak theih tûr tuemaw dîlin ka ṭawngṭai a ni. A tûkah chuan, he unaupa hian lainatna nên min rawn be ta a. Kum tam tak chhûng Jehova’n min ṭanpui dân hmu thiam tûrin min ṭanpui a. He upa ka hnêna a rawn tirh avâng hian Jehova chungah ka lâwm hle,” tiin. Chûng kawng zawng zawngah chuan, Kristian upate chuan Jehova’n nunna kawnga chhel tûra min ṭanpuitu tûr atâna Isua Krista kaltlanga min pêk ‘mihringte hnêna thilpêk’ an nihzia an lantîr a ni.—Ephesi 4:8.
21, 22. (a) Philippi 2:4-a zilhna thu kan hmuhte kohhrana mite’n an nunpui hunah eng nge a rah chhuah ṭhin? (b) Ngilneihna thiltih tê tham tak pawh engvângin nge a pawimawh êm êm?
21 Upate bâkah, Kristian rinawm zawng zawngte chuan he thupêk “mahni ta ta mai en lovin, mi dang ta pawh en ṭheuh zâwk rawh u,” tih hi nunpui an duh ṭheuh a ni. (Philippi 2:4) Kristian kohhrana mite’n chu thurâwn chu an nunpui hunah chuan, ngilneihna duhawm tak a rah chhuak a ni. Entîr nân, chhûngkaw pakhat chuan chhiatna arualin thâwk leh khatah an tâwk thut mai a. Pa ber chuan a fanu naupang chu dâwrah a hruai a. Haw kawngah chuan, motor chêtsualna an tâwk hlauh mai a. A fanu chu a thi a; a pa pawh chu a hliam nasa hle a. Damdawi in aṭanga a chhuah chuan, mahni pawh in singsa thei lo khawpin a awm a ni. A nupui chuan a rilru a hrehawm êm avângin amah chauhvin a pasal chu a enkawl hlei thei lo va. Chuvângin, kohhrana nupa tuak khat chuan chu lusûn nupa chu an inah an hruaia, chawlhkâr tam tak chhûng an awmpui a ni.
22 Ngilneihna thiltih zawng zawngah hian chutiang chhiat tawhna leh mi mal inpumpêknate chu a tel vek kher lo ngei mai a. Ṭanpuina dang kan dawnte hi chu thil tê tham deuhahte a ni. Mahsela, ngilneihna chu eng anga tê tham pawh nise, kan ngaihlu a ni lâwm ni? Unaute ṭawngkam chhuak ngilnei tak emaw, an ngaihsakna thiltih emawin i mamawh tak ṭanpuina a pêk lai che i ngaihtuah chhuak thei em? Jehova chuan hêng kawngte hmang hian min ngaihsak ṭhîn a ni.—Thufingte 17:17; 18:24.
23. Inṭanpui tawn tûra ṭan kan lâk hian, chu chu Jehova chuan engtin nge a thlîr?
23 Jehova’n mi dangte ṭanpuina hmanrua atâna a hman che i duh em? Chu chanvo duhawm tak chu i tân neih theih a ni. A nihna takah chuan, chutianga ṭan i lâkna chu Jehova chuan a hlut a. A Thu chuan: “Mi rethei khawngaih chuan LALPA a pûktîr a ni, a thiltih ṭhat chu a rûl ang,” tiin a sawi. (Thufingte 19:17) Kan unaute tâna inpêkna aṭangin hlimna nasa tak kan dawng a ni. (Tirhkohte 20:17) Chutiang ṭanpuina pêk emaw, dawn emaw chu mahni duhrêng vânga inkulh hrangte chuan an dawng thei lo. (Thufingte 18:1) Chuvângin, kan intihchak tawn theih nân rinawm takin Kristian inkhâwmnaahte i kalkhâwm ziah ṭhîn ang u.—Hebrai 10:24, 25.
24. Hun kal tawha Jehova thilmak ropui tak tihte hmu lo mah ila, engvângin nge chân nei nia kan inhriat loh?
24 Jehova min ṭanpui dân kawngte ngaihtuah hi a hlimawm hle a ni lâwm ni? Jehova’n a thiltum tihpuitlin nâna thilmak ropui tak a tih hunah nung lo mah ila, chân nei nia inhriat nachhan tûr kan nei lo. A pawimawh ber chu rinawm reng tûra kan mamawh ṭanpuina Jehova’n min pêk reng hi a ni. Rinnaa kan chhel tlân chuan, Jehova thilmak tih ropui ber leh mak ber chu kan hmu dâwn a ni! Jehova hmangaih ṭanpuina chu pawm leh theihtâwpa hman ṭangkai chu i tum tlat ang u, kum 2005 kumchâng: “Mi ṭanpuina chu Jehova hnêna mi a ni,” tih thu hi kan sawi ve theih nân.—Sâm 121:2, NW. (w04 12/15)
Eng Nge I Ngaih Dân?
Tûn laia kan mamawh ṭanpuina chu Jehova’n engtin nge—
• vântirhkohte hmangin min pêk?
• a thlarau thianghlim hmangin min pêk?
• a thâwk khum Thu hmangin min pêk?
• rinpuite hmangin min pêk?
[Zirlai Atâna Zawhnate]
[Phêk 13-naa milem]
Vântirhkohte’n thu hrilhna hna an ṭanpui tih hriat hi a thlamuanthlâk
[Phêk 16-naa milem]
Jehova chuan kan rinpui pakhat chu kan mamawh thlamuanna min pe tûrin a hmang thei