ယေဟောဝါ၏ကူညီမစမှုကို သင်ခံယူသလော
ယေဟောဝါ၏ကူညီမစမှုကို သင်ခံယူသလော
‘ယေဟောဝါသည် ငါ့ကိုမစတော်မူသည်ဖြစ်၍ ငါမကြောက်။’—ဟေဗြဲ ၁၃:၆၊ ကဘ။
၁၊ ၂။ ကျွန်ုပ်တို့၏ဘဝတွင် ယေဟောဝါ၏ကူညီမစမှုနှင့် လမ်းညွှန်မှုကို ခံယူခြင်းသည် အဘယ်ကြောင့် အရေးကြီးသနည်း။
သင်သည် တောင်ပေါ် ခြေလျင်ခရီးနှင်နေသည်ဟု စိတ်ကူးကြည့်လိုက်ပါ။ သို့သော် သင်တစ်ဦးတည်းမဟုတ်၊ သင်နှင့်အတူ လမ်းပြတစ်ဦးလိုက်ပါလာပြီး သူသည် ထိုနေရာတွင် အကောင်းဆုံးလမ်းပြဖြစ်၏။ သူသည် သင့်ထက် အတွေ့အကြုံများပြီး သက်လုံပိုကောင်းသော်လည်း သင်၏အနားတွင် စိတ်ရှည်စွာ အတူလျှောက်ပေးနေသည်။ မကြာခဏ သင်လဲကျတတ်သည်ကို သူသတိပြုမိ၏။ သူသည် သင်,ဘေးကင်းစေရန် အထူးသဖြင့် အန္တရာယ်ရှိသောနေရာကို ဖြတ်ကျော်နိုင်ရန် သူ၏လက်ကို ကမ်းပေးသည်။ သူ၏ကူညီမှုကို သင်ငြင်းမည်လော။ လုံးဝငြင်းမည်မဟုတ်! သင့်တွင် ဘေးအန္တရာယ်ရှိနေသောကြောင့်ဖြစ်၏။
၂ ခရစ်ယာန်များအနေနှင့် ကျွန်ုပ်တို့သည် ခက်ခဲကျပ်တည်းသောလမ်းတွင် လျှောက်လှမ်းနေကြရသည်။ ကျဉ်းမြောင်းသောထိုလမ်းတွင် ကျွန်ုပ်တို့တစ်ယောက်တည်း လျှောက်လှမ်းရမည်လော။ (မဿဲ ၇:၁၄) မဟုတ်ပါ၊ ကျွန်ုပ်တို့တွေ့ဖူးသမျှတွင် အကောင်းဆုံးလမ်းပြရှင် ယေဟောဝါဘုရားသခင်သည် မိမိနှင့်အတူ လူသားများကို လျှောက်ခွင့်ပြုထားကြောင်း သမ္မာကျမ်းစာက ဖော်ပြ၏။ (ကမ္ဘာဦး ၅:၂၄; ၆:၉) ယေဟောဝါသည် မိမိ၏ကျေးကျွန်များ လျှောက်လှမ်းနေစဉ် ကူညီမစပေးသလော။ ကိုယ်တော်က ဤသို့မိန့်ဆိုသည်– ‘သင်၏ဘုရားသခင် ယေဟောဝါက မစိုးရိမ်နှင့်။ ငါမစမည်ဟု သင့်အားဆိုလျက် သင်၏လက်ယာလက်ကို ကိုင်မည်။’ (ဟေရှာယ ၄၁:၁၃၊ ကဘ) အထက်ပါဥပမာမှ လမ်းပြသူကဲ့သို့ပင် ယေဟောဝါသည် မိမိနှင့်လျှောက်လှမ်းလိုသူများအား ကြင်နာစွာ ကူညီမစပြီး ခင်မင်ရင်းနှီးခွင့်ပြုထားသည်။ ကိုယ်တော်၏ကူညီမစမှုကို အဘယ်သူမျှ ငြင်းလိုမည်မဟုတ်!
၃။ ဤဆွေးနွေးမှုတွင် အဘယ်မေးခွန်းများကို သုံးသပ်ကြမည်နည်း။
၃ ယေဟောဝါသည် ရှေးခေတ် မိမိ၏လူမျိုးတော်အား ကူညီမစခဲ့သည့် နည်းလေးနည်းကို ရှေ့ဆောင်းပါးတွင် ဆွေးနွေးခဲ့ကြပြီ။ ယနေ့ ကိုယ်တော်၏လူမျိုးတော်ကို ထိုနည်းအတိုင်း ကူညီမစသလော။ ထိုသို့သောကူညီမစမှုမျိုးကို ကျွန်ုပ်တို့ခံယူကြောင်း မည်သို့သေချာစေနိုင်သနည်း။ ထိုမေးခွန်းများကို သုံးသပ်ကြည့်ကြစို့။ ထိုသို့သုံးသပ်ခြင်းဖြင့် ယေဟောဝါသည် အမှန်ပင် ကျွန်ုပ်တို့၏ကူညီမစရှင်ဖြစ်ကြောင်း ပို၍ယုံကြည်စိတ်ချလာနိုင်သည်။—ဟေဗြဲ ၁၃:၆။
ကောင်းကင်တမန်များ၏ကူညီမစမှု
၄။ ယနေ့ ဘုရားသခင့်ကျေးကျွန်များသည် ကောင်းကင်တမန်များ ကူညီမစပေးမည်ကို အဘယ်ကြောင့် ယုံကြည်စိတ်ချနိုင်သနည်း။
၄ ကောင်းကင်တမန်များသည် ယေဟောဝါ၏မျက်မှောက်ခေတ် ကျေးကျွန်များကို ကူညီမစကြသလော။ ကူညီမစကြပါသည်။ အမှန်ဆိုရလျှင် ယနေ့ သူတို့သည် စစ်မှန်သောဝတ်ပြုသူများအား ဘေးအန္တရာယ်မှ ကယ်တင်ရန် ကိုယ်ယောင်ထင်ရှားပြကြမည်မဟုတ်ချေ။ ကျမ်းစာခေတ်ကပင် ကောင်းကင်တမန်များသည် ထိုသို့ထင်ရှားပြခြင်း အလွန်နည်းပါးလှသည်။ သူတို့ကူညီမစပေးခဲ့ကြရာ အများစုသည် ယနေ့ကဲ့သို့ပင် လူ့မျက်စိဖြင့် မမြင်ခဲ့ရချေ။ မည်သို့ပင်ဖြစ်ပါစေ၊ မိမိတို့ကို ကောင်းကင်တမန်များ ကူညီမစကြောင်း သိရှိလာကြသော ဘုရားသခင့်ကျေးကျွန်များသည် အလွန်အားတက်လာကြ၏။ (၄ ဓမ္မရာဇဝင် ၆:၁၄-၁၇) ကျွန်ုပ်တို့သည် ထိုနည်းတူခံစားကြရန် အကြောင်းကောင်းရှိသည်။
၅။ ယနေ့ ကောင်းကင်တမန်များသည် ဟောပြောခြင်းလုပ်ငန်းတွင် ပါဝင်နေကြကြောင်း သမ္မာကျမ်းစာက မည်သို့ဖော်ပြသနည်း။
၅ ယေဟောဝါ၏ကောင်းကင်တမန်များသည် အထူးသဖြင့် ကျွန်ုပ်တို့လုပ်ဆောင်နေကြသည့် အထူးလုပ်ငန်းကို စိတ်ဝင်စားကြ၏။ ထိုလုပ်ငန်းကား အဘယ်နည်း။ ဗျာ. ၁၄:၆၊ ၇ တွင်ဤသို့အဖြေပေးထားသည်ကို ကျွန်ုပ်တို့တွေ့ရှိနိုင်သည်– “မြေကြီးပေါ်မှာနေသောသူတည်းဟူသော အသီးအသီးဘာသာစကားကိုပြောသော လူအမျိုးအနွယ်ခပ်သိမ်းတို့အား ထာဝရဧဝံဂေလိတရားကိုဟောရသော ကောင်းကင်တမန်တစ်ပါး . . . ကောင်းကင်အလယ်၌ ပျံဝဲလျက်ရှိသည်ကို ငါမြင်၏။” ယေရှုကြိုဟောထားသည့်အတိုင်း ဤအစီအစဉ်စနစ်အဆုံးမတိုင်မီ ‘လူမျိုးအပေါင်းတို့အား သက်သေဖြစ်မည်အကြောင်း လောကနိုင်ငံအရပ်ရပ်ရှိသမျှတို့၌ ဟောရ’ မည့် ‘ဘုရားသခင့်နိုင်ငံတော်နှင့်ယှဉ်သော ဧဝံဂေလိတရား’ နှင့် ဤ “ထာဝရဧဝံဂေလိတရား” ဆက်စပ်နေသည်မှာ ထင်ရှား၏။ (မဿဲ ၂၄:၁၄) အမှန်ဆိုသော် ကောင်းကင်တမန်များသည် တိုက်ရိုက်မဟောပြောကြချေ။ ဤအရေးပါသောတာဝန်ကို လူသားများအား ယေရှုအပ်နှင်းခဲ့သည်။ (မဿဲ ၂၈:၁၉၊ ၂၀) ထိုတာဝန်ကို ကျွန်ုပ်တို့လုပ်ဆောင်သည့်အခါ ဉာဏ်ပညာရှိပြီး တန်ခိုးကြီးသော ဝိညာဉ်သားများဖြစ်ကြသည့် သန့်ရှင်းသောကောင်းကင်တမန်များမှ ကူညီမစမှုရရှိနေကြောင်း သိရှိရခြင်းသည် အားရှိစရာမဟုတ်ပေလော။
၆၊ ၇။ (က) ကောင်းကင်တမန်များသည် ကျွန်ုပ်တို့၏ဟောပြောခြင်းလုပ်ငန်းကို ကူညီပေးနေကြောင်း အဘယ်အရာက ဖော်ပြသနည်း။ (ခ) ကျွန်ုပ်တို့သည် ယေဟောဝါ၏ကောင်းကင်တမန်များ၏ကူညီမှုကို ရရှိရန် မည်သို့သေချာစေနိုင်သနည်း။
၆ ကျွန်ုပ်တို့၏လုပ်ငန်းတော်ကို ကောင်းကင်တမန်များ ကူညီပေးသည့် အရေးပါသောအထောက်အထား ရှိပါသည်။ ဥပမာ၊ ယေဟောဝါသက်သေများသည် အမှုဆောင်ထွက်နေစဉ် အမှန်တရားကို ရှာတွေ့ရန် ကူညီမစပေးပါဟု မကြာသေးမီက ဘုရားသခင်ထံ ဆုတောင်းခဲ့သူတစ်ဦးနှင့် တွေ့ဆုံကြကြောင်း ကျွန်ုပ်တို့ မကြာခဏ ကြားရလေ့ရှိသည်။ ဤသို့သောတွေ့ကြုံမှုများသည် တိုက်ဆိုင်မှုများသာဖြစ်သည်ဟု သဘောထားတတ်ကြပေမည်။ ကောင်းကင်တမန်များ၏ ဤသို့ကူညီမစမှုကြောင့် “ဘုရားသခင်ကို ကြောက်ရွံ့၍ ချီးမွမ်းကြလော့” ဟူ၍ ‘ကောင်းကင်အလယ်၌ ပျံဝဲလျက်ရှိသော ကောင်းကင်တမန်’ ၏ကြေညာချက်အတိုင်း လုပ်ဆောင်ရန် သင်ယူလာကြသူ များသည်ထက်များလာပြီ။—ဗျာ. ၁၄:၇။
၇ ယေဟောဝါ၏တန်ခိုးကြီးကောင်းကင်တမန်များ၏ ကူညီမစမှုကို သင်ရလိုပါသလော။ သို့ဖြစ်လျှင် သင်၏ခရစ်ယာန်ဓမ္မအမှုတွင် အစွမ်းကုန်လုပ်ဆောင်ပါ။ (၁ ကောရိန္သု ၁၅:၅၈) ယေဟောဝါပေးတော်မူသော ဤအထူးတာဝန်ကို စေတနာနှင့်ရက်ရက်ရောရော လုပ်ဆောင်သည့်အခါ ကောင်းကင်တမန်များ၏ ကူညီမစမှုကို ကျွန်ုပ်တို့ရရှိနိုင်ကြသည်။
ကောင်းကင်တမန်မှူးမှ ကူညီမစမှု
၈။ ယေရှုသည် ကောင်းကင်တွင် အဘယ်ကြီးမြင့်သောရာထူး ရရှိထားသနည်း၊ ၎င်းသည် ကျွန်ုပ်တို့အတွက် အဘယ်ကြောင့် အားရှိစရာဖြစ်သနည်း။
၈ ယေဟောဝါသည် ကောင်းကင်တမန်၏ကူညီမစမှု နောက်တစ်မျိုးကိုလည်း ပေးသနားထားသည်။ “မျက်နှာသည် နေကဲ့သို့” ရှိသော ထူးခြားသည့် “ခွန်အားကြီးသောကောင်းကင်တမန်” တစ်ပါးအကြောင်းကို ဗျာ. ၁၀:၁ တွင်ဖော်ပြထားသည်။ စိတ်အာရုံမှ ဤကောင်းကင်တမန်သည် ကောင်းကင်တန်ခိုးတော်ဖြင့် ဘုန်းပွင့်သောယေရှုခရစ်ကို ပုံတင်ပြကြောင်း ထင်ရှား၏။ (ဗျာ. ၁:၁၃၊ ၁၆) ယေရှုသည် အမှန်ပင် ကောင်းကင်တမန်တစ်ပါးလော။ ဟုတ်သည်ဟု ဆို၍ရသည်၊ အကြောင်းမှာ ကိုယ်တော်သည် ကောင်းကင်တမန်မင်းဖြစ်၍တည်း။ (၁ သက်သာလောနိတ် ၄:၁၆) ကောင်းကင်တမန်မင်းဟူသည် အဘယ်နည်း။ ၎င်းစကားလုံးသည် “ကောင်းကင်တမန်အဓိပတိ၊” သို့မဟုတ် “ကောင်းကင်တမန်မှူး” ဟုအဓိပ္ပာယ်ရသည်။ ယေရှုသည် ယေဟောဝါ၏ဝိညာဉ်သားရှိသမျှတွင် တန်ခိုးအကြီးမားဆုံးဖြစ်သည်။ ယေဟောဝါသည် ယေရှုကို မိမိ၏ကောင်းကင်ဗိုလ်ခြေမှူးအဖြစ် အပ်နှင်းထားသည်။ ဤကောင်းကင်တမန်မင်းသည် အမှန်ပင် တန်ခိုးကြီးသော ကူညီမစမှုရင်းမြစ်ဖြစ်သည်။ မည်သည့်နည်းများအားဖြင့်နည်း။
၉၊ ၁၀။ (က) ယေရှုသည် ကျွန်ုပ်တို့ အပြစ်ပြုမိသည့်အခါ ကျွန်ုပ်တို့၏ “ကူညီမစသူ” အဖြစ် မည်သို့ဆောင်ရွက်ပေးသနည်း။ (ခ) ယေရှု၏ပုံသက်သေတွင် အဘယ်ကူညီမစမှုကို တွေ့ရှိနိုင်သနည်း။
၉ သက်ကြီးရွယ်အို တမန်တော်ယောဟန်က ဤသို့ရေးသားခဲ့သည်– “တစ်စုံတစ်ယောက်သောသူသည် [အပြစ်]ကိုပြုမိလျှင် ဖြောင့်မတ်တော်မူသောအရှင် ယေရှုခရစ်တည်းဟူသော ငါတို့အမှုဆောင်သခင် [“ကူညီမစသူ၊” ကဘ] သည်ခမည်းတော်ထံ၌ ရှိတော်မူ၏။” (၁ ယောဟန် ၂:၁) အထူးသဖြင့် ကျွန်ုပ်တို့ ‘အပြစ်ပြုမိ’ သည့်အခါ ယေရှုသည် ကျွန်ုပ်တို့၏ “ကူညီမစသူ” ဖြစ်သည်ဟု အဘယ်ကြောင့် ယောဟန်ဆိုရသနည်း။ ကျွန်ုပ်တို့သည် နေ့စဉ်နှင့်အမျှ အပြစ်ပြုလုပ်နေပြီး ၎င်းအပြစ်သည် သေခြင်းကိုဖြစ်စေ၏။ (ဒေ. ၇:၂၀; ရောမ ၆:၂၃) သို့သော် ယေရှုသည် ကျွန်ုပ်တို့၏အပြစ်များအတွက် ကိုယ်တော်၏အသက်ကို ရွေးနုတ်ဖိုးအဖြစ် စွန့်ခဲ့သည်။ ကိုယ်တော်သည် ကြင်နာသော ခမည်းတော်၏အနားတွင် ကျွန်ုပ်တို့ကိုယ်စား တောင်းပန်ပေးလျက်ရှိသည်။ ကျွန်ုပ်တို့တစ်ဦးစီသည် ဤသို့သောကူညီမစမှု လိုအပ်၏။ ကျွန်ုပ်တို့သည် ယင်းကို မည်သို့ခံယူနိုင်သနည်း။ ကျွန်ုပ်တို့အပြစ်များမှ နောင်တယူပြီး ယေရှု၏ရွေးနုတ်ဖိုးကိုအခြေခံ၍ ခွင့်လွှတ်မှုတောင်းဆိုဖို့လိုသည်။ ထပ်တူအပြစ်မျိုးကို ထပ်မံမပြုမိရန်လည်းလိုသည်။
၁၀ ယေရှုသည် ကျွန်ုပ်တို့အကျိုးအတွက် အသက်ပေးသည့်အပြင် အပြစ်ဆိုဖွယ်မရှိ ကောင်းမွန်သော ပုံသက်သေကိုလည်း ချမှတ်ပေးခဲ့သည်။ (၁ ပေတရု ၂:၂၁) ကိုယ်တော်၏ပုံသက်သေက ကျွန်ုပ်တို့ကို လမ်းညွှန်ပေးသည်၊ ကြီးလေးသောအပြစ်ကို မပြုလုပ်မိဘဲ ယေဟောဝါဘုရားသခင်၏စိတ်တော်နှင့်တွေ့စေနိုင်ရန် ကျွန်ုပ်တို့၏လမ်းစဉ်ကို ပုံစံချစေ၏။ ကျွန်ုပ်တို့သည် ဤသို့သောကူညီမစမှုကို ရရှိသည့်အတွက် ဝမ်းမြောက်ကြသည်မဟုတ်လော။ ကူညီမစမှုနောက်တစ်မျိုး ပေးသနားဦးမည်ဟု မိမိ၏နောက်လိုက်များအား ယေရှု ကတိပြုခဲ့သည်။
သန့်ရှင်းသောဝိညာဉ်တော်၏ ကူညီမစမှု
၁၁၊ ၁၂။ ယေဟောဝါ၏ဝိညာဉ်တော်ဟူသည် အဘယ်နည်း၊ ယင်းသည် မည်မျှတန်ခိုးကြီးသနည်း၊ ယနေ့ ကျွန်ုပ်တို့သည် ယင်းကို အဘယ်ကြောင့် လိုအပ်ကြသနည်း။
၁၁ ယေရှုက “ငါသည် ခမည်းတော်ကိုတောင်း၍ ခမည်းတော်သည် လောက,ကမရရှိနိုင်သော အမှန်တရား၏ဝိညာဉ်တော်တည်းဟူသော အခြားသောကူညီမစသူကို သင်တို့နှင့်အတူ အစဉ်မပြတ်တည်နေစေခြင်းငှာ သင်တို့အား ပေးတော်မူမည်” ဟုကတိပြုခဲ့သည်။ (ယောဟန် ၁၄:၁၆၊ ၁၇၊ ကဘ) ဤ “အမှန်တရား၏ဝိညာဉ်တော်၊” သို့မဟုတ် သန့်ရှင်းသောဝိညာဉ်တော်သည် ပုဂ္ဂိုလ်တစ်ဦးမဟုတ်ဘဲ ယေဟောဝါ၏လှုပ်ရှားသောစွမ်းအားဖြစ်သည်။ ယင်းစွမ်းအားသည် အတိုင်းအဆမရှိကြီးမား၏။ ယေဟောဝါသည် စကြဝဠာဖန်ဆင်းခြင်း၊ ရင်သပ်ရှုမောလောက်သည့် အံ့ဖွယ်အရာများပြသခြင်းနှင့် မိမိ၏အလိုတော်ကို စိတ်အာရုံဖြင့် ဖော်ပြခြင်းတို့တွင် ထိုစွမ်းအားကို အသုံးပြုတော်မူ၏။ ယနေ့ ယေဟောဝါသည် အဆိုပါနည်းများဖြင့် မိမိ၏ဝိညာဉ်တော်ကို အသုံးမပြုသောကြောင့် ယင်းကို ကျွန်ုပ်တို့ မလိုအပ်တော့ဟု ဆိုလိုပါသလော။
၁၂ မဆိုလိုပါ! ဤ “ခဲယဉ်းသောကာလ” တွင် ကျွန်ုပ်တို့သည် ယေဟောဝါ၏ဝိညာဉ်တော်ကို ယခင်ကထက် ပို၍လိုအပ်၏။ (၂ တိမောသေ ၃:၁) ဝိညာဉ်တော်သည် စမ်းသပ်မှုများကို ကျွန်ုပ်တို့ ခံရပ်နိုင်ရန် ခွန်အားပေးသည်။ ယေဟောဝါနှင့်လည်းကောင်း၊ ကျွန်ုပ်တို့၏ဝိညာဉ်ရေးညီအစ်ကို၊ ညီအစ်မများနှင့်လည်းကောင်း သာ၍နီးကပ်စေသည့် အရည်အသွေးကောင်းများကို ပျိုးထောင်စေသည်။ (ဂလာတိ ၅:၂၂၊ ၂၃) သို့ဖြစ်၍ ကျွန်ုပ်တို့သည် ယေဟောဝါထံက အဆိုပါအံ့ဖွယ်ကူညီမစမှုမှ မည်သို့အကျိုးရယူနိုင်သနည်း။
၁၃၊ ၁၄။ (က) ယေဟောဝါသည် သန့်ရှင်းသောဝိညာဉ်တော်ကို မိမိလူမျိုးတော်အား တလိုတလားပေးလိုကြောင်း အဘယ်ကြောင့် စိတ်ချနိုင်သနည်း။ (ခ) ကျွန်ုပ်တို့သည် သန့်ရှင်းသောဝိညာဉ်တော် ဆုကျေးဇူးကို အမှန်တကယ် မခံယူကြောင်း အဘယ်လုပ်ရပ်က ဖော်ပြနိုင်သနည်း။
၁၃ ပထမဦးစွာ၊ သန့်ရှင်းသောဝိညာဉ်တော်ရရှိရန် ဆုတောင်းဖို့လို၏။ ယေရှုက “သင်တို့သည် အဆိုးဖြစ်လျက်ပင် ကိုယ်သားတို့အား ကောင်းသောအရာကိုပေးတတ်လျှင် ထိုမျှမက ကောင်းကင်ဘုံ၌ရှိတော်မူသော သင်တို့အဘသည် ဆုတောင်းသောသူတို့အား သန့်ရှင်းသောဝိညာဉ်တော်ကို သာ၍ပေးတော်မူမည်မဟုတ်လော” ဟုမိန့်ဆို၏။ (လုကာ ၁၁:၁၃) မှန်ပါသည်၊ အကောင်းဆုံးဖခင်တစ်ဦးကို တွေးယူကြည့်လျှင် ယေဟောဝါသာလျှင် ဖြစ်သည်။ ကျွန်ုပ်တို့သည် သန့်ရှင်းသောဝိညာဉ်တော်ကို ယုံကြည်ခြင်းဖြင့် စိတ်ရင်းမှန်နှင့်တောင်းလျှင် ကိုယ်တော်သည် ဤဆုကျေးဇူးကို မပေးဘဲနေမည်မဟုတ်ကြောင်း စိတ်ချနိုင်သည်။ သို့ဖြစ်လျှင် မေးစရာမှာ ဝိညာဉ်တော်ရရှိရန် ကျွန်ုပ်တို့ တောင်းနေသလော။ ကျွန်ုပ်တို့၏နေ့စဉ်ဆုတောင်းချက်များတွင် ယင်းကိုထည့်တောင်းသင့်သည်။
၁၄ ဒုတိယ၊ ကျွန်ုပ်တို့သည် ထိုဝိညာဉ်တော်ဆုကျေးဇူးကိုခံယူပြီး ယင်းနှင့်အညီ လုပ်ဆောင်ကြသည်။ ဥပမာ၊ ခရစ်ယာန်တစ်ဦးသည် အညှီအဟောက်ရုပ်ပုံစာပေတို့ကို ကြည့်လိုစိတ်နှင့် ကြိုးစားတွန်းလှန်နေရသည်ဆိုပါစို့။ သူသည် ဤအကျင့်ဆိုးကို တွန်းလှန်နိုင်ရန် သန့်ရှင်းသောဝိညာဉ်တော်ပေးပါဟု ဆုတောင်းပြီး ခရစ်ယာန်အကြီးအကဲများထံမှ အကြံဉာဏ်တောင်းဆိုခဲ့သည်။ ဤသို့ညစ်ညမ်းသောအရာအနားသို့ မသွားရန် ပြတ်ပြတ်သားသား ဆုံးဖြတ်လုပ်ဆောင်ဖို့ သူ့ကို အကြံပေးခဲ့သည်။ (မဿဲ ၅:၂၉) သူသည် အကြီးအကဲများ၏အကြံပေးချက်ကို လျစ်လျူရှုပြီး ထပ်မံသွေးဆောင်ခံနေလျှင်ကော အသို့နည်း။ မိမိကိုကူညီပေးရန် သန့်ရှင်းသောဝိညာဉ်တော်ပေးပါဟု သူ၏ဆုတောင်းချက်နှင့်အညီ လုပ်ဆောင်နေခြင်းလော။ သို့မဟုတ် သူသည် ဘုရားသခင်၏ဝိညာဉ်တော်ကို စိတ်နာစေပြီး ဤဆုကျေးဇူး ဆုံးရှုံးစေရန် ဖန်တီးနေခြင်းလော။ (ဧဖက် ၄:၃၀) အမှန်စင်စစ်၊ ကျွန်ုပ်တို့အားလုံးသည် ယေဟောဝါထံမှ အဆိုပါအံ့ချီးဖွယ်ကူညီမစမှုကို ဆက်ရရှိကြောင်း သေချာစေရန် ကျွန်ုပ်တို့ဘက်မှ အတတ်နိုင်ဆုံး အဘက်ဘက်မှ ကြိုးစားလုပ်ဆောင်ဖို့လိုသည်။
ဘုရားသခင့်စကားတော်မှ ကူညီမစမှု
၁၅။ သမ္မာကျမ်းစာကို အလေးထားကြောင်း မည်သို့ပြသနိုင်သနည်း။
၁၅ သမ္မာကျမ်းစာသည် ရာစုနှစ်ချီပြီး ယေဟောဝါ၏သစ္စာရှိကျေးကျွန်များကို ကူညီမစလာခဲ့သည်။ သို့သော် သမ္မာကျမ်းစာကို အလေးမထားဘဲနေမည့်အစား တန်ခိုးပါသောကူညီမစမှု၏ရင်းမြစ်ဖြစ်ကြောင်း စိတ်ထဲစွဲမှတ်ထားဖို့လိုသည်။ အဆိုပါကူညီမစမှုကို ခံယူရာတွင် ကြိုးစားအားထုတ်ရမည်။ ပုံမှန်လုပ်ရိုးလုပ်စဉ်အဖြစ် ကျမ်းစာဖတ်ဖို့လိုသည်။
၁၆၊ ၁၇။ (က) ဘုရားသခင့်ပညတ်တရား ဖတ်ရှုခြင်းအကျိုးကျေးဇူးများကို ဆာလံ ၁:၂၊ ၃ ကမည်သို့ဖော်ပြသနည်း။ (ခ) ဆာလံ ၁:၃ တွင် ဝီရိယစိုက်ထုတ်၍ ကြိုးစားလုပ်ဆောင်ရမည့်ပုံကို မည်သို့သရုပ်ဖော်ထားသနည်း။
၁၆ ဘုရားသခင့်စိတ်တော်နှင့်တွေ့သူအကြောင်းကို ဆာလံ ၁:၂၊ ၃ [ကဘ] ကဤသို့ဆိုသည်– ‘ယေဟောဝါ၏တရားတော်၌ မွေ့လျော်၍ ထိုတရားတော်ကို နေ့ညမပြတ် ဖတ်ရွတ်ဆင်ခြင်သူသည် ပျော်ရွှင်၏။ အကြောင်းမူကား ထိုသူသည် ရေချောင်းများနားမှာစိုက်ထား၍ အချိန်တန်လျှင် အသီးကိုသီးလျက် အရွက်မညှိုးနွမ်းတတ်သော အပင်နှင့်တူ၏။ ပြုလေသမျှတို့၌ အောင်လိမ့်သတည်း။’ ၎င်းကျမ်းပိုဒ်၏ဆိုလိုချက်ကို သင်သိသလော။ အဆိုပါစကားများကို ဖတ်ပြီး ယင်းတို့သည် မြစ်အနားမှာပေါက်နေသော အရိပ်ရအပင်တစ်ပင်၏ ငြိမ်သက်သာယာသောရှုခင်းကို ဖော်ပြနေခြင်းဖြစ်သည်ဟု အလွယ်တကူ ကောက်ချက်ချပေမည်။ ဤနေရာမျိုးတွင် နေ့လယ်နေ့ခင်း တစ်မှေးအိပ်စက်လိုက်ရလျှင် ကြည်နူးလန်းဆန်းလိုက်မည်ဖြစ်ခြင်း! သို့သော် ဤဆာလံဆရာသည် ကျွန်ုပ်တို့ကို အနားယူခြင်းအကြောင်း စဉ်းစားခိုင်းနေခြင်းမဟုတ်ချေ။ ယင်းနှင့်ခြားနားစွာ ဤရှုခင်းသည် ဝီရိယစိုက်ထုတ်၍ ကြိုးစားလုပ်ဆောင်မှုကို ပုံဖော်ပြနေခြင်းဖြစ်သည်။ မည်သို့အားဖြင့်နည်း။
၁၇ ဤတွင်ဖော်ပြထားသော အပင်သည် မြစ်နံဘေးတွင် အလိုအလျောက်ပေါက်နေသော အရိပ်ရအပင်မဟုတ်ကြောင်း သတိပြုပါ။ ရွေးချယ်ထားသောနေရာ “ရေချောင်းများနား” တွင် တမင်ရည်ရွယ်၍ “စိုက်” ထားသော သစ်သီးပင်ဖြစ်၏။ အပင်တစ်ပင်ကို တစ်ခုမကသောရေချောင်းနားတွင် မည်သို့စိုက်ပျိုးနိုင်သနည်း။ သစ်သီးခြံတစ်ခြံတွင် ပိုင်ရှင်ဖြစ်သူသည် ၎င်း၏အဖိုးတန်သီးပင်များ၏အမြစ်ကို ရေရောက်ရန် ရေမြောင်းများ တူးပေးထားမည်။ ယခုမှ ဆိုလိုချက်ကို နားလည်ပြီ! ဝိညာဉ်ရေးသဘောအရ ထိုအပင်ကဲ့သို့ ကျွန်ုပ်တို့သည် ကြီးထွားရှင်သန်နေလျှင် ယင်းသည် ကျွန်ုပ်တို့အကျိုးအတွက်များစွာလုပ်ဆောင်ပေးထားသောကြောင့်ဖြစ်သည်။ စင်ကြယ်သောအမှန်တရားရေ တိုက်ကျွေးနေသော အဖွဲ့အစည်းတစ်ခုနှင့် ကျွန်ုပ်တို့ပူးပေါင်းနေသော်လည်း ကျွန်ုပ်တို့သည် မိမိတို့အပိုင်းမှ လုပ်ဆောင်ရမည်ဖြစ်သည်။ ကျွန်ုပ်တို့စိတ်နှလုံးတွင် ဘုရားသခင့်စကားတော်အမှန်တရား ရောက်ရှိနိုင်ရန် တွေးတောဆင်ခြင်၍ သုတေသနပြုကာ ဤတန်ဖိုးရှိရေမှ ကျွန်ုပ်တို့ကိုယ်တိုင် အကျိုးကျေးဇူးရရှိရန် ကြိုးစားအားထုတ်ဖို့လိုသည်။ ထိုနည်းဖြင့် ကျွန်ုပ်တို့သည်လည်း အသီးကောင်းများ သီးပွင့်နိုင်လိမ့်မည်။
၁၈။ ကျွန်ုပ်တို့၏မေးခွန်းများအတွက် ကျမ်းစာအဖြေများ ရှာတွေ့နိုင်ရန် အဘယ်အရာလိုသနည်း။
၁၈ သမ္မာကျမ်းစာကို စင်ပေါ်တင်ထားရုံမျှဖြင့် အကျိုးရှိမည်မဟုတ်ပေ။ သမ္မာကျမ်းစာသည် မျက်စိမှိတ်ပြီး ကြုံရာစာမျက်နှာကို ဖွင့်လိုက်သည်နှင့် ကျွန်ုပ်တို့သိလိုသောအဖြေပေးမည့် စာမျက်နှာ ပေါ်လာမည်ဟု ယူဆနိုင်သော အဆောင်လက်ဖွဲ့မဟုတ်ပေ။ ဆုံးဖြတ်ချက်များ ချရသည့်အချိန်တွင် ဝှက်ထားသော ဘဏ္ဍာကဲ့သို့ ‘ဘုရားသခင့်အသိပညာ’ ကိုတူးယူဖို့လို၏။ (သု. ၂:၁-၅) ကျွန်ုပ်တို့၏အထူးလိုအပ်ချက်များနှင့် တိုက်ရိုက်သက်ဆိုင်သည့် ကျမ်းစာသွန်သင်ချက်တွေ့ရှိနိုင်ရန် ကြိမ်ဖန်များစွာ ဝီရိယစိုက်ထုတ်၍ ဂရုတစိုက် သုတေသနပြုဖို့လိုသည်။ သုတေသနပြုနိုင်ရန် ကျမ်းစာအခြေပြုစာပေများစွာ ကျွန်ုပ်တို့တွင်ရှိပါသည်။ ယင်းတို့ကို အသုံးပြု၍ သမ္မာကျမ်းစာရှိ ဉာဏ်ပညာကျောက်မျက်များကို ထက်သန်စွာတူးယူသည့်အခါ ကျွန်ုပ်တို့သည် ယေဟောဝါ၏ကူညီမစမှုကို အမှန်တကယ် အသုံးပြုနေကြခြင်းဖြစ်သည်။
ယုံကြည်သူချင်းများမှ ကူညီမစမှု
၁၉။ (က) ကင်းမျှော်စင် နှင့် နိုးလော့! ဆောင်းပါးများကို ယုံကြည်သူချင်းများအားဖြင့် ပေးသနားသော ကူညီမစမှုအဖြစ် အဘယ်ကြောင့် ရှုမြင်အပ်သနည်း။ (ခ) ကျွန်ုပ်တို့၏ဂျာနယ်တစ်စောင်မှ အထူးဆောင်းပါးတစ်ခုသည် သင့်အား မည်သို့ကူညီမစခဲ့သနည်း။
၁၉ ယေဟောဝါ၏လူ့ကျေးကျွန်များသည် တစ်ဦးကိုတစ်ဦး ရိုင်းပင်းကူညီမှု၏ရင်းမြစ်များ အမြဲဖြစ်ကြ၏။ ယင်းနှင့်စပ်လျဉ်း၍ ယေဟောဝါ ပြောင်းလဲခဲ့ပြီလော။ လုံးဝမပြောင်းလဲပါ။ ကျွန်ုပ်တို့လိုအပ်သည့်ကူညီမစမှုကို ယုံကြည်သူချင်းများမှ အချိန်ကိုက်ရရှိခဲ့ရာများကို ကျွန်ုပ်တို့တစ်ဦးချင်း စဉ်းစားဆင်ခြင်ကြည့်နိုင်သည်။ ဥပမာ၊ သင်လိုအပ်သည့်အချိန်တွင် နှစ်သိမ့်ပေးသော၊ ပြဿနာတစ်ခုကို ဖြေရှင်းရန် သို့မဟုတ် သင်၏ယုံကြည်ခြင်းစိန်ခေါ်ချက်ကို ရင်ဆိုင်ရန် ကူညီပေးသော ကင်းမျှော်စင် သို့မဟုတ် နိုးလော့! တို့ပါ ဆောင်းပါးတချို့ကို ပြန်မှတ်မိနိုင်ပါသလော။ ယေဟောဝါသည် ‘အချိန်တန်အစာ’ ပြင်ဆင်ပေးရန် ခန့်အပ်ထားသော ‘သစ္စာနှင့်သတိပညာရှိကျေးကျွန်’ အားဖြင့် သင့်ကို ကူညီမစပေးခဲ့သည်။—မဿဲ ၂၄:၄၅-၄၇။
၂၀။ ခရစ်ယာန်အကြီးအကဲများသည် ‘လူ့အသွင်ဆုလာဘ်များ’ ဖြစ်ကြောင်း အဘယ်နည်းများဖြင့် သက်သေပြကြသနည်း။
၂၀ သို့သော် တစ်ခါတစ်ရံ ယုံကြည်သူချင်းများမှ ပို၍တိုက်ရိုက်ကျသော ကူညီမစမှုရရှိတတ်သည်။ ခရစ်ယာန်အကြီးအကဲတစ်ဦးသည် ကျွန်ုပ်တို့နှလုံးထိမိသည့် ဟောပြောချက်ကိုပေးခြင်း သို့မဟုတ် အခက်အခဲတွေ့ချိန်တစ်လျှောက် သိုးထိန်းလည်ပတ်မှုဖြင့် ကူညီခြင်း သို့မဟုတ် မိမိတို့၏အားနည်းချက်ကို တွေ့မြင်ပြီး ယင်းကို ကျော်လွှားအောင်မြင်ရန် ကြင်နာစွာ သွန်သင်ပေးခြင်းမျိုးရှိသည်။ ကျေးဇူးတင်သော ခရစ်ယာန်ညီအစ်မတစ်ဦးသည် အကြီးအကဲတစ်ဦး၏ကူညီမှုနှင့်စပ်လျဉ်း၍ ဤသို့စာရေးသည်– “လယ်ကွင်းလုပ်ငန်းမှာ သူဟာ အချိန်ယူပြီး ကျွန်မရဲ့ခံစားချက်တွေကို ဖော်ထုတ်တယ်။ ဒီမတိုင်ခင်ညမှာ ကျွန်မ ရင်ဖွင့်ပြောနိုင်မယ့်သူကို ရှာပေးပါလို့ ယေဟောဝါဆီ ဆုတောင်းခဲ့တယ်။ နောက်တစ်နေ့မှာ ဒီညီအစ်ကိုက စာနာမှုနဲ့ ကျွန်မကို စကားလာပြောတယ်။ ယေဟောဝါဟာ ကျွန်မကို နှစ်ရှည်လများ ဘယ်လိုကူညီမစခဲ့သလဲဆိုတာ မြင်လာအောင်ပြောပြတယ်။ ဒီအကြီးအကဲကို ကျွန်မဆီ ပို့ပေးတဲ့အတွက် ယေဟောဝါကို ကျေးဇူးတင်တယ်။” ခရစ်ယာန်အကြီးအကဲများသည် ထိုသို့သောနည်းများဖြင့် အသက်လမ်းပေါ်တွင် ကျွန်ုပ်တို့ ခံရပ်နိုင်ရန် ခရစ်တော်အားဖြင့် ယေဟောဝါ ပေးသနားထားသော ‘လူ့အသွင်ဆုလာဘ်များ’ ဖြစ်ကြောင်း ဖော်ပြကြသည်။—ဧဖက် ၄:၈။
၂၁၊ ၂၂။ (က) အသင်းတော်သားများသည် ဖိလိပ္ပိ ၂:၄ တွင်တွေ့ရသည့် ဆုံးမစကားကို လိုက်လျှောက်သည့်အခါ အဘယ်အကျိုးဖြစ်ထွန်းသနည်း။ (ခ) အသေးအဖွဲလုပ်ရပ်များသည်ပင် အဘယ်ကြောင့် အရေးပါအရာရောက်သနည်း။
၂၁ အကြီးအကဲများအပြင် တည်ကြည်သောခရစ်ယာန်အားလုံးသည် “ကိုယ်အမှုအရာကိုသာ မရှုမမှတ်ဘဲ၊ သူ့အမှုအရာကို အချင်းချင်းရှုမှတ်ကြလော့” ဟူသော မှုတ်သွင်းခံမိန့်မှာချက်ကို လိုက်လျှောက်လိုကြသည်။ (ဖိလိပ္ပိ ၂:၄) ခရစ်ယာန်အသင်းတော်သားများသည် ထိုဆုံးမစကားကို လိုက်လျှောက်ကြသည့်အခါ နှစ်လိုဖွယ်ကြင်နာမှုလုပ်ရပ်များ ပေါ်ထွက်လာ၏။ ဥပမာ၊ မိသားစုတစ်စုသည် ရုတ်တရက် ဝမ်းနည်းကြေကွဲဖွယ်အဖြစ်ဆိုးကို စုပုံခံစားခဲ့ရလေသည်။ ဖခင်သည် သူ၏သမီးငယ်ကို စတိုးဆိုင်သို့ခေါ်သွားသည်။ အိမ်အပြန်တွင် သူတို့ ကားတိုက်ခံရသည်။ သမီးငယ်မှာ သေဆုံးသွားပြီး ဖခင်မှာ အကြီးအကျယ်ဒဏ်ရာရရှိခဲ့သည်။ ဖခင်သည် ဆေးရုံမှဆင်းသောအခါ အစပိုင်း၌ မိမိဘာသာ ဘာမျှမလုပ်နိုင်သည့်အထိ မသန်မစွမ်းဘဝရောက်သွားသည်။ သူ၏ဇနီးသည်လည်း တစ်ယောက်တည်း သူ့ကို ကြည့်ရှုစောင့်ရှောက်ရသည့်အတွက် အလွန်ပင် စိတ်အနှောင့်အယှက်ဖြစ်လာခဲ့သည်။ ထို့ကြောင့် အသင်းတော်မှ ဇနီးမောင်နှံတစ်စုံသည် ဝမ်းနည်းကြေကွဲနေသည့် ဤဇနီးမောင်နှံကို မိမိတို့အိမ်သို့ခေါ်သွားပြီး ရက်သတ္တပတ်အတော်ကြာကြာ ကြည့်ရှုပြုစုပေးခဲ့ကြသည်။
၂၂ ကြင်နာမှုလုပ်ရပ်အားလုံးသည် ဤသို့သောကြေကွဲဖွယ်အဖြစ်ဆိုး၊ ကိုယ်ကျိုးစွန့်မှုတို့နှင့်သာ ပတ်သက်သည်မဟုတ်။ ကျွန်ုပ်တို့ရရှိသည့် ကူညီမစမှုအချို့သည် သေးငယ်သောအရာဖြစ်သည်။ သို့သော် မည်မျှပင်သေးငယ်သော ကြင်နာမှုဖြစ်ပါစေ၊ ယင်းကို ကျွန်ုပ်တို့ တန်ဖိုးထားလေးမြတ်ကြသည်မဟုတ်လော။ သင်အကူအညီလိုအပ်နေချိန်တွင် ညီအစ်ကို၊ ညီအစ်မတစ်ဦးက ကြင်နာသောစကားတစ်ခွန်းပြောသည့် သို့မဟုတ် စာနာသောလုပ်ရပ်တစ်ခု လုပ်ပေးခဲ့သည့်အချိန်အခါများကို သင်စဉ်းစားကြည့်နိုင်သလော။ ယေဟောဝါသည် ကျွန်ုပ်တို့ကို ဤသို့သောနည်းများဖြင့် ကြည့်ရှုစောင့်ရှောက်တတ်၏။—သု. ၁၇:၁၇; ၁၈:၂၄။
၂၃။ ကျွန်ုပ်တို့အချင်းချင်း ကြိုးစား၍ ကူညီမစသည့်အခါ ယေဟောဝါသည် ယင်းကို မည်သို့ရှုမြင်သနည်း။
၂၃ သင်သည် သူတစ်ပါးကို ကူညီပေးသူအဖြစ် ယေဟောဝါ၏အသုံးတော်ခံ ဖြစ်လိုသလော။ သင့်အတွက် ထိုအခွင့်အရေးတံခါး ပွင့်နေပါသည်။ သင့်ဘက်မှ ဤသို့ကြိုးစားလုပ်ဆောင်ခြင်းကို ယေဟောဝါ အမှန်ပင် တန်ဖိုးထားတော်မူသည်။ ကိုယ်တော်၏စကားတော်က ဤသို့ဆိုသည်– ‘ဆင်းရဲသားကို သနားသောသူသည် ယေဟောဝါအား ချေးငှားသောသူဖြစ်၍ သူပြုသောအမှု၏အကျိုးကို ဆပ်ပေးတော်မူလိမ့်မည်။‘ (သု. ၁၉:၁၇၊ ကဘ) ကျွန်ုပ်တို့၏ညီအစ်ကို၊ ညီအစ်မများအတွက် မိမိကိုယ်ကို ပေးဆက်ခြင်းမှ အကြီးအကျယ်ရွှင်လန်းမှုရရှိသည်။ (တမန်တော် ၂၀:၃၅) မိမိဘာသာ တစ်သီးပုဂ္ဂလနေသူများသည် ဤသို့ကူညီပေးရခြင်း၏ရွှင်လန်းမှု သို့မဟုတ် ကူညီမှုရရှိခြင်း၏ စိတ်အားတက်ကြွမှုတို့ကို ခံစားရမည်မဟုတ်ချေ။ (သု. ၁၈:၁) ထို့ကြောင့် ကျွန်ုပ်တို့အချင်းချင်း အားပေးတည်ဆောက်နိုင်ရန် ခရစ်ယာန်အစည်းအဝေးများကို မပျက်မကွက်၊ မှန်မှန်တက်ရောက်ကြပါစို့။—ဟေဗြဲ ၁၀:၂၄၊ ၂၅။
၂၄။ အတိတ်က ယေဟောဝါပြုလုပ်ခဲ့သည့် ရင်သပ်ရှုမောလောက်သည့် အံ့ဖွယ်အမှုများကို မတွေ့ခဲ့ရ၍ နစ်နာဆုံးရှုံးသည်ဟု အဘယ်ကြောင့် မခံစားသင့်သနည်း။
၂၄ ကျွန်ုပ်တို့ကို ယေဟောဝါ ကူညီမစပေးသည့် နည်းများကို စဉ်းစားဆင်ခြင်ခြင်းသည် အားရပျော်ရွှင်ဖွယ်ကောင်းသည်မဟုတ်လော။ ယေဟောဝါသည် မိမိ၏ရည်ရွယ်တော်မူချက်များကို ပြီးမြောက်စေရန် ရင်သပ်ရှုမောလောက်သည့်အံ့ဖွယ်အမှုများ လုပ်ဆောင်ခဲ့သည့်အချိန်တွင် ကျွန်ုပ်တို့ အသက်မရှင်ကြသော်လည်း နစ်နာဆုံးရှုံးသည်ဟု ခံစားစရာမလိုပါ။ အမှန်တကယ်အရေးကြီးသောအရာမှာ ဆက်၍တည်ကြည်သွားနိုင်ရန် ကျွန်ုပ်တို့လိုအပ်သည့် ကူညီမစမှုမှန်သမျှကို ယေဟောဝါပေးသနားခြင်းဖြစ်သည်။ ကျွန်ုပ်တို့သည် ယုံကြည်ခြင်းတွင် ခံနိုင်ရည်ရှိမည်ဆိုလျှင် လူ့သမိုင်းတစ်လျှောက်တွင် ယေဟောဝါ၏အကြီးကျယ်ဆုံးသော အံ့ဖွယ်အမှုများနှင့် ဘုန်းအသရေရှိလုပ်ရပ်များကို အသက်ရှင်လျက် တွေ့မြင်ရပါလိမ့်မည်! ‘ကူညီမစမှုကို ယေဟောဝါထံတော်မှ ငါရ၏’ ဟူသော ၂၀၀၅ နှစ်ချုပ်ကျမ်းချက်ပါ စကားများအတိုင်း ကျွန်ုပ်တို့လည်း ပြောဆိုနိုင်ရန် ယေဟောဝါ၏မေတ္တာပါကူညီမစမှုကို ခံယူပြီး အပြည့်အဝအသုံးပြုရန် သန္နိဋ္ဌာန်ချကြပါစို့။—ဆာလံ ၁၂၁:၂၊ ကဘ။
သင်မည်သို့ထင်သနည်း
ယနေ့ ယေဟောဝါသည် ကျွန်ုပ်တို့လိုအပ်သော ကူညီမစမှုကို
• ကောင်းကင်တမန်များအားဖြင့်
• ကိုယ်တော်၏သန့်ရှင်းသောဝိညာဉ်တော်အားဖြင့်
• ကိုယ်တော်၏မှုတ်သွင်းခံစကားတော်အားဖြင့်
• ယုံကြည်သူချင်းများအားဖြင့် မည်သို့ပေးသနားသနည်း။
[လေ့လာရန်မေးခွန်းများ]
[စာမျက်နှာ ၁၈ ပါ ရုပ်ပုံ]
ကောင်းကင်တမန်များသည် ဟောပြောခြင်းလုပ်ငန်းကို ကူညီပေးနေသည်ဟု သိရှိရခြင်းသည် အားရှိစရာဖြစ်
[စာမျက်နှာ ၂၁ ပါ ရုပ်ပုံ]
ယေဟောဝါသည် ကျွန်ုပ်တို့လိုအပ်သည့် နှစ်သိမ့်မှုရရှိရန် ယုံကြည်သူချင်းတစ်ဦးကို အသုံးပြုနိုင်