Na O Amogela Thušo Ya Jehofa?
Na O Amogela Thušo Ya Jehofa?
“Morêna ké Molwedi [“Mothuši,” NW] wa-ka: xa ke boife selô.”—BA-HEBERE 13:6.
1, 2. Ke ka baka la’ng e le gabohlokwa gore re amogele thušo ya Jehofa le tlhahlo ya gagwe bophelong?
AKANYA o sepela tsejaneng ya maoto thabeng. Lega go le bjalo, ga o noši ka gobane mohlahli o ithapetše go sepela le wena, gomme ke mohlahli yo kaone-kaone yo o ka mo hwetšago. O na le phihlelo e kgolo kudu le matla a mantši go go feta, eupša o sepela le wena a sa fele pelo. O lemoga gore o kgopša nako le nako. Ka ge a tshwenyegile ka tšhireletšego ya gago, o go swara ka seatla gore a go thuše go feta lefelong le itšego le kotsi. Na o be o ka gana thušo ya gagwe? O be o ka se dire bjalo le gatee! Bophelo bja gago bo kotsing.
2 Re le Bakriste, re sepela tseleng e thata kudu. Na re swanetše go sepela tseleng yeo e pitlaganego re le noši? (Mateo 7:14) Aowa, Beibele e bontšha gore Jehofa Modimo e lego Mohlahli yo kaone-kaone yo re ka mo hwetšago, o dumelela batho gore ba sepele le yena. (Genesi 5:24; 6:9) Na Jehofa o thuša bahlanka ba gagwe ge ba dutše ba sepela? O re: “Nna Morêna ké Modimo w’axo; ke Xo swere ka seatla sa-ka sa le letona, ’me ke bolêla naxô ke re: Se boifê, ké Nna ke Xo phološaxo [“thušago,” NW]!” (Jesaya 41:13) Go etša mohlahli wa papišong ya rena, Jehofa ka botho o swara bao ba nyakago go sepela le yena ka seatla gomme o aga segwera le bona. Ka kgonthe ga go le o tee wa rena yo a nyakago go gana thušo ya gagwe!
3. Re tla ahla-ahla dipotšišo dife sehlogong se?
3 Sehlogong se se fetilego, re ahla-ahlile ditsela tše nne tšeo ka tšona Jehofa a ilego a thuša batho ba gagwe ba mehleng ya bogologolo. Na o thuša batho ba gagwe ka ditsela tše di swanago lehono? Le gona, re ka kgonthišetša bjang gore re amogela thušo le ge e le efe e bjalo? Anke re ahla-ahleng dipotšišo tšeo. Ka go dira bjalo, re ka ba le kholofelo e oketšegilego ya gore Jehofa ruri ke Mothuši wa rena.—Ba-Hebere 13:6.
Thušo ka Barongwa
4. Ke ka baka la’ng bahlanka ba Modimo lehono ba ka kgolwa gore barongwa ba a ba thekga?
4 Na barongwa ba thuša bahlanka ba Jehofa ba mehleng yeno? Ee, ba a ba thuša. Ke therešo gore lehono ga ba iponagatše e le gore ba phološe barapedi ba therešo kotsing. Gaešita le mehleng ya Beibele, e be e le ka sewelo barongwa ba bego ba tsena ditaba gare ka mokgwa woo. Dilo tše dintši tšeo ba bego ba di dira di be di sa bonwe ke batho, go etša lehono. Lega go le bjalo, bahlanka ba Modimo bao ba ilego ba lemoga gore barongwa ba be ba ba thekga ba ile ba hwetša tsebo e bjalo e le e kgothatšago kudu. (2 Dikxoši 6:14-17) Re na le lebaka le le kwagalago la go ikwa ka mo go swanago.
5. Beibele e bontšha bjang gore barongwa ba tšea karolo modirong wa boboledi lehono?
5 Barongwa ba Jehofa ba kgahlegela kudu modiro o kgethegilego wo re o dirago. Ke modiro ofe woo? Re ka hwetša karabo go Kutollo 14:6 e rego: “Ka bôna Morongwa e mongwê à fofa xare xa lexodimo à swere Ebangedi ya neng le neng ya xo tsebišwa ba ba axilexo lefaseng, dithšaba tšohle le meloko yohle, le maleme ohle le merafô yohle.” Go molaleng gore ‘Ebangedi ye ya neng le neng’ e tswalana le ‘ditaba tše dibotse tša mmušo,’ tšeo Jesu a ilego a bolela ka tšona e sa le pele gore “di tla bolelwa lefaseng ka moka leo go agilwego go lona gore e be bohlatse go ditšhaba ka moka” pele ga bofelo bja tshepedišo ye ya dilo. (Mateo 24:14, NW) Ke therešo gore barongwa ga ba dire modiro wa boboledi ka go lebanya. Jesu o neile batho modiro wo wa bohlokwa. (Mateo 28:19, 20) Na ga se mo go kgothatšago go tseba gore re phetha modiro woo e bile re na le thušo e tšwago go barongwa ba bakgethwa bao e lego dibopiwa tša moya tše bohlale le tše matla?
6, 7. (a) Ke’ng se se bontšhago gore barongwa ba thekga modiro wa rena wa boboledi? (b) Re ka kgonthišega bjang gore re amogela thušo ya barongwa ba Jehofa?
6 Go na le bohlatse bjo bontši bja gore re thekgwa ke barongwa modirong wa rena. Ka mohlala, gantši re kwa gore Dihlatse tša Jehofa ge di le bodireding bja tšona di ile tša gahlana le motho yo a bego a sa tšwa go rapelela thušo go Modimo ya gore a hwetše therešo. Diphihlelo tše bjalo di direga gantši kudu moo e lego gore re ka se bolele gore di fo itiragalela. Ka baka la thušo e bjalo ya barongwa, batho ba bantši ka mo go oketšegago ba ithuta go dira seo ‘morongwa e a fofago gare ga legodimo’ a se tsebaditšego ge a re: “Boifang Modimo Le rêtê Yêna.”—Kutollo 14:7.
7 Na o hlologetšwe go thekgwa ke barongwa ba Jehofa ba matla? Gona dira mo gontši ka mo o ka kgonago bodireding bja gago. (1 Ba-Korinthe 15:58) Ge re dutše re ithapela go phetha kabelo ye e kgethegilego e tšwago go Jehofa, re ka kgonthišega ka thušo ya barongwa ba gagwe.
Thušo ka Molaodi wa Barongwa
8. Jesu o boemong bofe bjo bo phagamego legodimong, gomme ke ka baka la’ng seo e le se se kgothatšago go rena?
8 Le gona, Jehofa o re nea thušo ya mohuta o mongwe ka barongwa. Kutollo 10:1 e hlalosa ka ‘morongwa yo matla’ a magolo yoo ‘sefahlogo sa gagwe se swanago le letšatši.’ Go molaleng gore morongwa yo yo a bonwego ponong o swantšhetša Jesu Kriste yo a tagafaditšwego yo a neilwego matla legodimong. (Kutollo 1:13, 16) Na Jesu ruri ke morongwa? Ee, go bjalo ka gobane ke yena morongwa yo mogolo. (1 Ba-Thesalonika 4:16) Jesu ke yo matla kudu go feta bana ba Jehofa ka moka ba moya. Jehofa o mmeile gore e be molaodi wa madira a Gagwe ka moka a barongwa. Morongwa yo yo mogolo e tloga e le mothopo o matla kudu wa thušo. Ka ditsela dife?
9, 10. (a) Ke ka tsela efe Jesu a šomago e le “mothuši” wa rena ge re dira dibe? (b) Ke thušo efe yeo re ka e hwetšago mohlaleng wa Jesu?
9 Moapostola Johane yo a tšofetšego o ngwadile gore: “Xe xo ka ba le e a diraxo dibe, xôna re na le Morapeledi [“Mothuši,” NW] xo Tata wešo, Jesu Kriste Yêna Moloki.” (1 Johane 2:1) Ke ka baka la’ng Johane a ile a bolela gore Jesu ke “mothuši” wa rena kudu-kudu ge re ‘dira dibe’? Ge e le gabotse, re dira dibe letšatši le letšatši, gomme sebe se lebiša lehung. (Mmoledi 7:20; Ba-Roma 6:23) Lega go le bjalo, Jesu o gafile bophelo bja gagwe e le sehlabelo sa dibe tša rena. Le gona, o na le Tatago rena yo a nago le kgaugelo e le gore a re kgopelele tshwarelo. Yo mongwe le yo mongwe wa rena o nyaka thušo e bjalo. Re ka e amogela bjang? Re swanetše gore re itsholele dibe tša rena gomme re kgopele tshwarelo motheong wa sehlabelo sa Jesu. Le gona re swanetše gore re pheme go boeletša dibe tša rena.
10 Go oketša tabeng ya gore o re hwetše, Jesu o re beetše mohlala o phethagetšego. (1 Petro 2:21) Mohlala wa gagwe o a re hlahla, o re thuša go lokiša ditsela tša rena e le gore re ka phema go dira dibe tše dikgolo gomme ra thabiša Jehofa Modimo. Na ga re thabele thušo e bjalo? Jesu o holofeditše balatedi ba gagwe gore ba be ba tla newa mothuši yo mongwe.
Thušo ka Moya o Mokgethwa
11, 12. Moya wa Jehofa ke’ng, o matla gakaaka’ng, gomme ke ka baka la’ng re o nyaka lehono?
11 Jesu o holofeditše gore: “Ke tlo kxopêla Tate, a tlo Le nea Molwedi [“Mothuši,” NW] e mongwê, xore a tlê a dulê le lena xo iša xo sa felexo. Ké Môya wa therešô, wo lefase le sa kxonexo xo o amoxêla.” (Johane 14:16, 17) ‘Moya wo wa therešo,’ goba moya o mokgethwa, ga se motho eupša ke matla—matla a Jehofa a šomago. Ke o matla ka mo go sa lekanywego. Ke matla ao Jehofa a a dirišitšego go bopa legohle, go dira mehlolo e makatšago le go utolla thato ya gagwe ka dipono. Ka ge Jehofa lehono a se sa diriša moya wa gagwe ka ditsela tšeo tše di kgethegilego, na seo se bolela gore ga re o nyake?
12 Ga go bjalo le gatee! ‘Dinakong tše tša mathata,’ re nyaka moya wa Jehofa go feta le ge e le neng pele. (2 Timotheo 3:1) O a re matlafatša gore re kgone go kgotlelela mathata. O re thuša gore re hlagolele dika tše di kgahlišago tšeo di re batametšago kgaufsi le Jehofa gotee le bana babo rena le dikgaetšedi ba moya. (Ba-Galatia 5:22, 23) Ka gona, re ka holwa bjang ke thušo ye e kgahlišago e tšwago go Jehofa?
13, 14. (a) Ke ka baka la’ng re ka kgonthišega gore Jehofa o ikemišeditše go nea batho ba gagwe moya o mokgethwa? (b) Ke ka go dira tiro efe moo re ka bontšhago gore ge e le gabotse ga re amogele mpho ya moya o mokgethwa?
13 Sa pele, re swanetše go rapelela moya o mokgethwa. Jesu o itše: “Xe ešita lena Le lexo ba babe, Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo ó ba nea Môya o mokxêthwa.” (Luka 11:13) Ee, Jehofa ke Tate yo kaone-kaone yo o ka naganago ka yena. Ge e ba ka tumelo re mo kgopela moya o mokgethwa go tšwa pelong, ka kgonthe a ka se ke a re tima mpho ye. Ka gona, potšišo ke gore, Na re a o kgopela? Re na le lebaka le le kwagalago la go o kgopela dithapelong tša rena tša letšatši le letšatši.
14 Sa bobedi, re amogela mpho yeo ka go dira dilo ka go dumelelana le yona. Ka mohlala: Anke re re Mokriste o lwantšhana le tshekamelo ya go bogela diswantšho tše di kgothaletšago bootswa. O rapeletše moya o mokgethwa gore o mo thuše go lwa le mokgwa wo o šilafetšego. O kgopetše keletšo go bagolo ba Bakriste, gomme ba mo eleditše gore a gate mogato o tiilego wa gore a se sa hlwa a batamela diswantšho tše bjalo tše di gobogilego. (Mateo 5:29) Go thwe’ng ge e ba a hlokomologa keletšo ya bona gomme a ipea kotsing ya go lekwa gape? Na o dira dilo ka go dumelelana le thapelo ya gagwe ya go kgopela moya o mokgethwa gore o mo thuše? Goba ge e le gabotse, na o kotsing ya go nyamiša moya wa Modimo le go lahlegelwa ke mpho ye? (Ba-Efeso 4:30) Ke therešo gore ka moka ga rena re nyaka go dira sohle seo re ka se kgonago e le go kgonthišetša gore re tšwela pele re amogela thušo ye e kgahlišago e tšwago go Jehofa.
Thušo ka Lentšu la Modimo
15. Re ka bontšha bjang gore ga re nyatše Beibele?
15 Ka nywaga-kgolo e mentši, Beibele e be e dutše e le mothopo wa thušo go bahlanka ba Jehofa ba botegago. Lega go le bjalo, go e na le go nyatša Mangwalo a Makgethwa, re swanetše go dula re gopola gore ke ona mothopo o matla kudu wa thušo. Go amogela thušo yeo go nyaka boiteko. Re swanetše go dira gore go bala Beibele e be mokgwa wa rena wa ka mehla.
16, 17. (a) Psalme 1:2, 3 e hlalosa bjang meputso ya go bala molao wa Modimo? (b) Psalme 1:3 e bontšha bjang gore re swanetše go šoma ka thata?
16 Psalme 1:2, 3 e bolela ka motho yo a boifago Modimo gore: “Sa xaxwe ya ba xo thabêla molaô wa Morêna, molaô woo a o akanya mosexare le bošexo, A swana le sehlare-se-šingwa-nokeng ya meetse [“dinokeng tša meetse,” NW], sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.” Na o kwešiša ntlha ya ditemana tšeo? Go bonolo go bala mantšu ao ke moka wa phetha ka gore a fo hlalosa ka boemo bjo bobotse bja khutšo—sehlare sa moriti seo se golago kgaufsi le noka. E be e ka ba mo go thabišago gakaakang go robala lefelong le le bjalo thapama! Eupša psalme ye ga e re gokeletše gore re nagane ka go khutša. Eupša ka mo go fapanego, e bontšha gore re swanetše go šoma ka thata. Bjang?
17 Ela hloko gore sehlare se go bolelwago ka sona mo ga e fo ba sehlare sa moriti seo ka phošo se golago kgaufsi le noka. Ke sehlare sa go enywa dienywa, seo se ‘bjetšwego’ ka morero lefelong le le kgethilwego—“dinokeng tša meetse.” Sehlare se tee se ka gola bjang kgaufsi le dinoka tše dintši? Ge e le gabotse, mong wa tšhemo ya dihlare tša dienywa a ka epa mekero yeo e tlišago meetse medung ya dihlare tša gagwe tša bohlokwa. A o bone-ge, ga bjale ntlha e tloga e le molaleng! Ge e ba ka kgopolo ya moya re gola go etša sehlare se, ke ka gobane go na le yo a dirilego mošomo o montši gore a re thuše. Re gwerane le mokgatlo wo o re tlišetšago meetse a therešo, eupša re swanetše go phetha karolo ya rena. Re swanetše go ikemišetša go monya meetse a a bohlokwa, ka go naganišiša le go dira nyakišišo ge go nyakega e le gore re tsenye ditherešo tša Lentšu la Modimo ka menaganong le ka dipelong tša rena. Ka tsela yeo, le rena re tla tšweletša dienywa tše dibotse.
18. Go nyakega’ng gore re hwetše dikarabo tša dipotšišo tša rena ka Beibeleng?
18 Beibele ga e re hole ka selo ge e ba e dutše rakeng e sa bulwe. Le gona ga se pheko—mo e lego gore re be re ka tswalela mahlo gomme ra dumelela gore Beibele ya rena e ipulegele, ke moka ra holofela gore karabo ya potšišo ya rena e tla fo tšwelela pele ga rena. Ge re lebeletšane le go dira diphetho, re swanetše go nyaka ‘tsebo ya Modimo’ go etša lehumo le le fihlilwego. (Diema 2:1-5) Gantši re swanetše go nyakišiša ka mafolofolo le ka kelohloko e le gore re hwetše keletšo ya Mangwalo yeo e ahla-ahlago dinyakwa tša rena tše di kgethegilego. Re na le dikgatišo tše dintši tše di theilwego Beibeleng tšeo di ka re thušago ge re dira nyakišišo. Ge re dutše re di diriša bakeng sa go nyakišiša bohlale bjo bohlokwa bjo bo lego ka Lentšung la Modimo ka mafolofolo, ka kgonthe re tla ba re diriša thušo ya Jehofa.
Thušo ka Badumedi-gotee
19. (a) Ke ka baka la’ng dihlogo tšeo di lego ka go Morokami le Phafoga! di ka lebelelwa e le thušo yeo e newago ka badumedi-gotee le rena? (b) O kile wa thušwa bjang ke sehlogo se itšego se se lego ka gare ga o mongwe wa dimakasine tša rena?
19 Batho bao e lego bahlanka ba Jehofa gantši e be e dutše e le mothopo wa thušo seng sa bona. Na Jehofa o fetogile? Le gatee. Ga go pelaelo gore ka moka ga rena re ka nagana ka ditiragalo tšeo go tšona re ilego ra amogela thušo yeo re e nyakago ka nako e swanetšego e e-tšwa go badumedi-gotee le rena. Ka mohlala, na o ka gopola ka sehlogo se sengwe sa Morokami goba Phafoga! seo se ilego sa go homotša ge o be o nyaka khomotšo goba sa go thuša go rarolla bothata goba go lebeletšana le selo seo se bego se hlohla tumelo ya gago? Jehofa o go tlišeditše thušo yeo ka “molaki e a bôtêxaxo yo bohlale” yo a neilwego kabelo ya go aba “dijô ka lebaka la xôna.”—Mateo 24:45-47.
20. Ke ka ditsela dife bagolo ba Bakriste ba ipontšhago e le “dimpho tšeo e lego banna”?
20 Lega go le bjalo, gantši thušo yeo re e hwetšago ka badumedi-gotee le rena ke e lebanyago kudu. Mogolo wa Mokriste a ka nea polelo yeo e kgomago dipelo tša rena; goba a dira leeto la bodiši leo le re thušago go lebeletšana ka katlego le nako ya mathata goba a re nea keletšo e botho yeo e re thušago go lemoga bofokodi bja rena le go bo fenya. Mokriste yo mongwe yo a tletšego tebogo o ngwadile mabapi le thušo yeo mogolo a mo neilego yona, gore: “Ge re be re le tirelong ya tšhemo, o ile a nkgothaletša gore ke ntšhe sa mafahleng. Bošegong bja pele ga moo, ke be ke ile ka rapela Jehofa ke mo kgopela gore a nee motho yo nka bolelago le yena. Letšatšing leo le le latetšego, ngwanabo rena yo o ile a bolela le nna ka mokgwa o bontšhago kwelobohloko. O ile a nthuša go bona kamoo Jehofa a bego a dutše a nthuša ka gona ka nywaga e mentši. Ke leboga Jehofa ge a ile a nthomela mogolo yo.” Ka ditsela tše bjalo ka moka, bagolo ba Bakriste ba ipontšha e le “dimpho tšeo e lego banna” tšeo re di neilwego ke Jehofa ka Jesu Kriste gore di re thuše go kgotlelela tseleng ya bophelo.—Ba-Efeso 4:8, NW.
21, 22. (a) Mafelelo e ba afe ge bao ba lego ka phuthegong ba diriša keletšo yeo e hwetšwago go Ba-Filipi 2:4? (b) Ke ka baka la’ng gaešita le ditiro tše dinyenyane tša botho e le tša bohlokwa?
21 Ka ntle le bagolo, mokriste yo mongwe le yo mongwe yo a botegago o nyaka go phetha taelo e buduletšwego ya gore “a se kê a šetša tša xo ikhola [eupša] a šetšê tša xo hola ba bangwê.” (Ba-Filipi 2:4) Ge bao ba lego ka phuthegong ya Bokriste ba diriša keletšo yeo, se se feleletša ka ditiro tše di kgahlišago tša botho. Ka mohlala, lapa le lengwe le ile la tlaišwa ke masetlapelo a mantši ao a bego a sa letelwa. Tate o be a tšere morwedi wa gagwe yo monyenyane a ile le yena lebenkeleng. Ge ba le tseleng ya go boela gae, ba ile ba hlagelwa ke kotsi ya koloi. Morwedi o ile a hwa; tate a gobala o šoro. Ka morago ga go lokollwa sepetlele, mathomong o be a golofetše kudu moo e lego gore o be a sa kgone go itirela selo. Mosadi wa gagwe o be a gateletšegile kudu maikwelong moo a bego a sa kgone go mo hlokomela a nnoši. Ka gona, banyalani ba bangwe phuthegong ba ile ba tšea banyalani ba bao ba lego manyaming ba ba iša legaeng la bona gomme ba ba hlokomela ka dibeke tše mmalwa.
22 Ke therešo gore ga se ditiro ka moka tše botho tšeo di akaretšago masetlapelo a bjalo le boithapo bjo bo bjalo. Thušo e nngwe yeo re e hwetšago ke e nyenyane kudu. Eupša go sa šetšwe gore tiro ya botho ke e nyenyane gakaakang, re a e leboga, na ga go bjalo? Na o ka nagana ka dinako tšeo lentšu le botho goba tiro ya go naganela ya ngwanabo rena goba kgaetšedi e ilego ya go nea thušo yeo o bego o tloga o e nyaka? Jehofa gantši o re hlokomela ka ditsela tše bjalo.—Diema 17:17; 18:24.
23. Jehofa o re lebelela bjang ge re leka go thušana seng sa rena?
23 Na o tla rata gore Jehofa a go diriše bakeng sa go thuša ba bangwe? Tokelo yeo e go bulegetše. Ge e le gabotse Jehofa o tšeela godimo boiteko bjo bo bjalo bjo o bo dirago. Lentšu la gagwe le re: “Thlalla-badiidi ó adima Morêna; ’me Yêna ó tlo mmušetša tše a di neilexo bála.” (Diema 19:17) Lethabo le legolo le tlišwa ke go thuša bana babo rena le dikgaetšedi. (Ditiro 20:35) Lethabo leo le tlišwago ke go nea thušo e bjalo goba kgothatšo yeo e tlišwago ke go e amogela ga e tlele bao ba ipeago lekatana ka boomo. (Diema 18:1) Ka gona, anke re be ba botegago tabeng ya go ba gotee dibokeng tša Bokriste e le gore re kgone go kgothatšana.—Ba-Hebere 10:24, 25.
24. Ke ka baka la’ng re sa swanela go ikwa re tingwa selo se sengwe ka gobane re sa bone mehlolo ya Jehofa e makatšago ya nakong e fetilego?
24 Na ga se mo go thabišago go nagana ka ditsela tšeo ka tšona Jehofa a re thušago? Gaešita le ge re sa phele mehleng yeo go yona Jehofa a bego a dira mehlolo e makatšago e le go phetha merero ya gagwe, ga se ra swanela go ikwa re tingwa se sengwe. Sa bohlokwa e le ka kgonthe ke gore ka moka ga rena Jehofa o re nea thušo e le gore re dule re botega. Le gona ge e ba re kgotlelela re le gotee tumelong, re tla phela gore re bone ditiro tša Jehofa tše di makatšago kudu le tša letago historing ka moka! Anke re ikemišetšeng go amogela le go diriša ka mo go feletšego thušo ya Jehofa e lerato e le go bontšha gore re dumelelana le mantšu a temana ya rena ya ngwaga wa 2005 a rego: “Thušo ya-ka e tšwa go Jehofa.”—Psalme 121:2, NW.
[Dipotšišo tša Thuto]
[Caption on page 18]
Ke mo go kgothatšago go tseba gore barongwa ba thekga modiro wa boboledi
[Caption on page 21]
Jehofa a ka diriša yo mongwe wa badumedi-gotee le rena go re tlišetša khomotšo yeo re e nyakago
O Nagana’ng?
Ke bjang Jehofa a re neago thušo ye re e nyakago lehono—
• ka barongwa?
• ka moya wa gagwe o mokgethwa?
• ka Lentšu la gagwe le le buduletšwego?
• ka badumedi-gotee?