Kasin Aawaten Mo so Tulong nen Jehova?

“Say Katawan sikato so mananulong ko; agak naani ontakot.”​—HEBREOS 13:6.

1, 2. Akin ya importante ya awaten tayo so tulong tan panangigiya nen Jehova ed bilay tayo?

 IPASEN pa a manaakar ka ed sakey a basbas ed palandey. Balet, agmo bukbukor lapud walay sakey a giya ya angiba ed sika, tan sikato so sankamaongan a giya. Sikato so mas eksperiensyado tan mapaot nen say sika, balet sikato so maan-anos a mibabansag ed sika. Naiimano to a sagpaminsan kan napatakba. Lapud mapaga ed pankaabigan mo, inyawat to so lima to pian tulongan to ka ed sakey a delikadon dadalanan. Kasin ipulisay mo so tulong to? Siempre andi! Napepeligro so kaligenan mo.

² Bilang Kristiano, walaan itayo na mairap a basbas a totontonen. Nepeg kasin manbukbukor itayon manakar ed satan a makisir a dalan? (Mateo 7:14) Andi, ipapabitar na Biblia a say sankaabigan lan Giya a naromog tayo et si Jehova a Dios, a mangiyaabuloy ed totoo a manakar a kaiba to. (Genesis 5:24; 6:9) Kasin tutulongan nen Jehova iray lingkor to legan na pankukurang da? Inkuan to: “Siak, si Jehova a Dios mo, a mangitagey na kawanan a limam, a kuan ko ed sika, Agka antakot: tulongan ta ka naani.” (Isaias 41:13) Singa say giya ed ilustrasyon tayo, si Jehova so mapangasin manginanatnat ed tulong tan pikakaaro to ed saramay manggugunaet a manakar a kaiba to. Maseguron anggapo ed sikatayo so malabay a mangipulisay ed tulong to!

3. Antoran tepet so konsideraen tayo diad sayan diskusyon?

³ Diad inmunan artikulo, siningbat tayo so  apatiran paraan na impanulong nen Jehova ed totoo to nensaman. Kasin tutulongan to so totoo to natan ed ontan met iran paraan? Tan panon tayon makaseguro ya aawaten tayo so antokaman ed satan a tulong? Konsideraen tayo pa iratan a tepet. Diad panggawa ed satan et lalo itayon makapanmatalek a si Jehova so petepeteg a Mananulong tayo.​—Hebreos 13:6.

Tulong na Anghel

4. Akin a makapanmatalek iray lingkor na Dios natan ed pananulong na saray anghel?

⁴ Kasin tutulongan na saray anghel iray lingkor nen Jehova natan? On, ontutulong ira. Tua, natan et agla ra manpapanengneng ta pian iliktar iray tuan managdayew manlapud kapeligroan. Anggan diad panaon na Biblia, saray anghel so mataltalag ya onsalet ed ontan a paraan. Maslak ed ginawa ra et ag-anengneng na too, a singa met natan. Anggaman kuan, saray lingkor na Dios so napapabiskeg sano namoria ra a saray anghel so akaparaan ya ontulong ed sikara. (2 Arari 6:14-17) Walaan itayo na maabig a rason pian ontan met so nalikna tayo.

5. Panon ya impabitar na Biblia a saray anghel so walaan na betang ed panagpulong a kimey natan?

⁵ Saray anghel nen Jehova so nagkalautlan interesado ed nikaduman kimey a mangilalanor ed sikatayo. Anton kimey itan? Naromog tayo so ebat diad Apocalipsis 14:6: “Anengneng ko so sananey ya anghel a mantektekkiab dia ed pegley na tawen, a wala ed sikato so andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” Sayan “andi-angga a maabig a balita” so malinew a nisiglaot ed “ebanghelyo na panarian,” ya unong ed impasakbay nen Jesus et “nipulong naani ed sankamundoan ya onkanan pamintuaan ed saray amin a nasyones” sakbay a mangangga iyan sistema na bengabengatla. (Mateo 24:14) Siempre, saray anghel so agdirektan manpupulong, satan ya importantin kimey so inter nen Jesus ed saray totoo. (Mateo 28:19, 20) Agta makapaseseg a naamtaan a legan tayon susumpalen itan a kimey a niganggan ed sikatayo et tutulongan itayo met na saray masanton anghel, a makabat tan makapanyari iran espiritun pinalsa?

6, 7. (a) Anto so mangipabitar a saray anghel so manusuporta ed panagpulong a kimey tayo? (b) Panon tayon naseguro a naawat tayo so pananulong na saray anghel nen Jehova?

⁶ Dakel so ebidensya a susuportaan na anghel so kimey tayo. Alimbawa, mabetbet tayon narengelan a diad ministeryo na saray Tasi nen Jehova et naroromog da so sakey a toon agano ni labat a nampikasi ed Dios pian natulongan a makaromog ed katuaan. Saratan ya eksperiensya so mabetbet ya ipapasen a nibanbana labat. Lapud ontan a panulong na saray anghel, ondarakel so totoon makakaaral a manumpal ed inyabawag na “anghel a mantektekkiab dia ed pegley na tawen,” salanti, “Takotan yo so Dios, tan iter yo ed sikato so gloria.”​—Apocalipsis 14:7.

⁷ Kasin pampipirawatan yo so tulong na makapanyari iran anghel nen Jehova? Gawaen yo sirin so anggaay nayarian yo diad ministeryo yo. (1 Corinto  15:58) Diad bulos-linawan panusumpal tayo ed sayan nikaduman asainmin a manlalapud si Jehova, nailaloan tayo so pananulong na saray anghel to.

Tulong a Manlalapud Pangulo na Saray Anghel

8. Anto so atagey a posisyon nen Jesus diad tawen, tan akin a makapangiter itan ed sikatayo na panamaseguro?

⁸ Itatarya met nen Jehova ed sikatayo so sananey nin nengneng na pananulong na anghel. Dedeskribien na Apocalipsis 10:1 so makapakelkelaw ya “anghel a mabiskeg” a “say lupa to [et] singa say banwa.” Sayan anghel ya anengneng ed pasingawey so mapatnag a mangililitrato ed say niglorian Jesu-Kristo a walad mangatatawen a pakayari. (Apocalipsis 1:13, 16) Kasin si Jesus et peteg a sakey ya anghel? Diad sakey a pantalos et on lapud sikato so arkanghel. (1 Tesalonica 4:16) Anto so arkanghel? Satan a salita so mankabaliksay “manunan anghel,” odino “pangulon anghel.” Si Jesus so sankabiskegan ed amin ya espiritun ananak nen Jehova. Sikato so tinuro nen Jehova a mangimando ed amin ya anghelikon armada to. Sayan arkanghel et talagan mabiskeg a lapuan na tulong. Diad antoran paraan?

9, 10. (a) Panon ya onkanan mananulong si Jesus sano mankasalanan itayo? (b) Anton tulong so naromog tayo ed alimbawa nen Jesus?

⁹ Oniay insulat na masiken lan apostol Juan: “No wala so toon mankasalanan, wala so apireng tayo ya onarap ed Ama, si Jesu-Kristo a matunong.” (1 Juan 2:1) Akin ya insuheri nen Juan a si Jesus so “apireng” odino mananulong tayo nagkalautla sano “mankasalanan” itayo? Bueno, inagew-agew itayon mankakasalanan, tan say kasalanan et mangitonton ed ipapatey. (Eclesiastes 7:20; Roma 6:23) Balet, inter nen Jesus so bilay to bilang bagat nisesengeg ed saray kasalanan tayo. Tan sikato so walad dikingan na mapangasin Ama tayo pian mikasi parad sikatayo. Kada sakey ed sikatayo so mankaukolan na ontan a tulong. Panon tayo itan ya awaten? Nakaukolan tayon pagbabawian iray kasalanan tayo tan kerewen so panamerdona base ed bagat nen Jesus. Nakaukolan tayo met a paliisan so pangulit ed saray kasalanan tayo.

¹⁰ Nilikud ni ed impatey to nisengeg ed sikatayo, angipatnag si Jesus na naspot ya alimbawa ya aligen tayo. (1 Pedro 2:21) Say alimbawa to so mangigiya ed sikatayo, ya ontulong a mangipetek ed kurang tayo ta pian napaliisan tayo so seryoson kasalanan tan napaliket tayo si Jehova a Dios. Agta panliketan tayo so pakawalaan na ontan a tulong? Insipan nen Jesus ed saray patumbok to a wala ni so sananey a nitaryan tulong.

Say Tulong na Masanton Espiritu

11, 12. Anto so espiritu nen Jehova, panon itan kabiskeg, tan akin a nakaukolan tayo itan natan?

¹¹ Oniay insipan nen Jesus: “Mikasi ak ed Ama, et ikdan to kayo na sananey a managligliwa [“mananulong,” NW], pian manayam ed sikayo lawas, salanti say espiritu na katuaan, a sikatoy agnayarian ya awaten na mundo.” (Juan 14:16, 17) Sayan “espiritu na katuaan,” odino masanton espiritu, et aliwan sakey a persona noagta sakey a puersa​—say mismon aktibon puersa nen Jehova. Satan so makapanyari tan andian na limitasyon. Satan so puersa ya inusar nen Jehova diad impamalsa to ed uniberso, diad impanggawa to na makapakelaw iran milagro, tan diad impangipuyan to na linawa to panamegley na saray pasingawey. Lapud agla uusaren nen Jehova so espiritu to ed ontan iran espisipikon paraan natan, kabaliksan kasi na satan ya agtayo la nakaukolan itan?

¹² Andin balot! Diad sarayan ‘maatap a panaon a mairap a pidenengan,’ mas nakaukolan tayo so espiritu nen Jehova. (2 Timoteo 3:1) Sikatayo so pabiskegen na satan a mansungdo ed saray subok. Ontulong itan ed sikatayo a mamayubo ed alay  abig iran kalidad a mamapaapit ed sikatayo ed si Jehova tan ed espiritual ya agagi tayo. (Galacia 5:22, 23) Panon itayo sirin a nagunggonaan ed sayan alay abig a tulong manlapud si Jehova?

13, 14. (a) Akin a makaseguro itayo a si Jehova so mabulos a mangiiter na masanton espiritu ed totoo to? (b) Diad anton nengneng na gawa a nayarin nipatnag tayo so agpangawat ed langkap a masanton espiritu?

¹³ Unona, nakaukolan tayon kerewen so masanton espiritu panamegley na pikakasi. Inkuan nen Jesus: “No sikayo sirin, anta mauges kayo, amta yo so mangiter na saray maong a panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato?” (Lucas 11:13) On, si Jehova so sankaabigan ya Ama. No masimoon itayon onkerew ed sikato na masanton espiritu tekep na pananisia, seguradon iter to ed sikatayo itan a langkap. Say tepet sirin et, Kasin kekerewen tayo itan? Walaan itayo na maabig a rason pian kerewen itan ya inagew-agew diad saray pikakasi tayo.

¹⁴ Komadua, naawat tayo itan a langkap diad ikiwas tayo unong ed satan. Bilang ilustrasyon: Ipasen pa a say sakey a Kristiano et mibabarangkaan ed tendensian onnengneng ed pornograpiya. Sikato so nampikasi, a kinmerew na masanton espiritu pian naresistian to itan a marutak ya agamil. Sikatoy kinmerew na simbawa ed saray Kristianon mamatatken, tan sikato so binilin da a manggawa na mapekder a desisyon, ya ompaliis tan agni ingen onaasingger ed saratan a mabanday a materyal. (Mateo 5:29) Panon to no imbaliwala to iratan a simbawa tan intultuloy ton nengnengen iratan sanen sikatoy natutukso? Kasin pansasagpotan to so mitunosan ed pikakasi to a sikatoy tulongan na masanton espiritu? Odino sikato la ingen so napepeligro a mamaermen ed espiritu na Dios, a sengegan lay pakabalang to ed satan a langkap? (Efeso 4:30) On, amin tayo so nakaukolan a mansagpot a maong pian naseguro tayo a mantultuloy tayon naawat iyan alay abig a tulong manlapud si Jehova.

Tulong Manlapud Salitay Dios

15. Panon tayon nipatnag ya agtayo ibabaliwala so Biblia?

¹⁵ Say Biblia so ontutulong ed saray matoor a lingkor nen Jehova diad loob la na dakel a siglo. Balet, imbes ya ibaliwala so Masanton Kasulatan, nakaukolan itayon sinononot ed no panon kabiskeg itan a lapuan na tulong. Say pangawat ed satan a tulong et mankaukolan na sagpot. Nakaukolan a gawaen tayon kabiangan na regular a rotina tayo so panagbasa na Biblia.

16, 17. (a) Panon a dedeskribien na Salmo 1:2, 3 iray gunggona diad pambasa ed ganggan na Dios? (b) Panon a dedeskribien na Salmo 1:3 so impasyan kimey?

¹⁶ Onia so ibabaga na Salmo 1:2, 3 nipaakar ed maridios a too: “Say gayaga to wala ed ganggan nen Jehova; tan diad ganggan to mandalepdep ed agew tan labi. Et sikato mipara ed sakey a kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga; tan antokaman a gawaen to ombuna.” Kasin natetebek yo so sankaimportantian a punto na saratan a bersikulo? Mainomay a basaen iratan a salita tan isipen ya idedeskribe labat na saratan so marendeen a kipapasen​—sakey a masalompapak a kiew ya akatanem ed gilig na ilog. Agaylan abig so pampainawa ed ontan a lugar sano kaagwan! Balet say punto na sayan salmo et aliwan nipaakar ed panagpainawa. Ililitrato na satan so bengatlan midumaan a tuloy, a mangisusuheri na impasyan kimey. Panon ya ontan?

¹⁷ Imanoen pa a say kiew ditan et aliwa lambengat a masalompapak a kiew a nibanbanan tinmubo ed gilig na ilog. Satan so manbubungan kiew, a ginagalan ‘intanem’ ed pinilin lugar​—“ed abay na saray ag-agus na danum.” Panon ya ontubo so sakey a kiew ed gilig na saray ag-agus na danum? Bueno, diad taneman na manbubungan kakiewan, say akanggawa so nayarin manggaway banawang pian naparanuman iray lamot na mabunan kakiewan to. Natan, malinlinew la so punto! Diad espiritual a pantalos, ombubuna itayo a singa satan  a kiew lapud walay makulin tinmulong ed sikatayo. Sikatayo so akilimog ed sakey ya organisasyon a mangitatarok na malinew a danudanum na katuaan ed sikatayo, balet nepeg tayon gawaen so nabebetangan tayo. Nakaukolan a sepsepen tayon tampol iyan mablin danum, diad pandalepdep tan pansukimat ta pian nipasepsep iray katuaan na Salitay Dios ed nonot tan puso tayo. Diad ontan a paraan et sikatayo met so mamawala na maong a bunga.

18. Anto so nakaukolan ta pian naromog tayo iray ebat na Biblia ed saray tepet tayo?

¹⁸ Ag-itayo nagunggonaan ed Biblia no akasinop labat itan ed istante. Aliwa met itan a galing odino anting-anting​—a no ilikdem tayo labat lay mata tayo et ombukay la so Biblia ed inerman a pahina, insan nailaloan tayon nanengneng la so ebat ed saray tepet tayo diad pahinan nibukay ed arap tayo. Sano nipaarap itayo ed panagdesisyon, nakaukolan a kotkoten tayo so “pikakabat ed Dios” a singa niyamot a kayamanan. (Uliran 2:1-5) Say maseet tan maalwar a panagsukimat so mabetbet a nakaukolan ta pian naromog tayo so Makasulatan a simbawa a mitukoyan ed saray espisipikon pankaukolan tayo. Walaan itayo na dakel a publikasyon a nibase ed Biblia ya ontulong ed sikatayo ed pansusukimat tayo. Legan tayon uusaren iratan pian magunaet a kotkoten iray kayamanan na kakabatan na Salitay Dios, peteg ya aanamoten tayo so tulong nen Jehova.

Tulong Panamegley na Saray Kapananisiaan

19. (a) Akin a nayarin moriaen iray artikulo ed Say Panag-Bantayan tan Awake! bilang tulong ya intarya panamegley na saray kapananisiaan? (b) Panon kayon atulongan na sakey ya artikulo ed sakey ed saray dyurnal tayo?

¹⁹ Saray lingkor nen Jehova so lawas panlalapuan na tulong ed balang sakey. Kasin anguman la si Jehova ed sayan aspekto? Andin balot. Maseguron nanonotan na balang sakey ed sikatayo iray kipapasen ya eksakton naawat tayo so nakaukolan tayon tulong diad dugan panaon manlapud saray kapananisiaan tayo. Singa bilang, nanonotan yo kasi so arum ya artikulo ed Say Panag-Bantayan odino Awake! ya akaligliwa ed sikayo sanen kinaukolan yo itan odino akatulong ed sikayon manresolbe ed sakey a problema odino sanen nipaarap kayo ed sakey ya angat ed pananisia yo? Satan a tulong so inter nen Jehova ed sikayo panamegley na “matoor tan makabat ya aripen” ya aturon mangitarya na “tagano ed panaon a kinepeg to.”​—Mateo 24:45-47.

20. Diad antoran paraan a pinaneknekan na saray Kristianon mamatatken so pagmaliw a ‘langkap a totoo’?

²⁰ Balet, mabetbet a mas direkta so tulong a naaawat tayo manlapud saray kapanisiaan. Sakey a Kristianon matatken so angiter na paliwawa ya amakiwas ed sikatayo, odino nanggawa na panagpastol a kimey ya akatulong ed sikatayon talonaan so sakey a mairap a subok, odino sikato so mapangasin animbawa ed sikatayo pian namoria tan natalonaan so sakey a kaleteyan. Oniay insulat na sakey a misalsalamat a Kristiano nipaakar ed intulong ed sikato na sakey a matatken: “Diad lawak na serbisyo, pinaseseg to ak a mangibesngaw ed saray  walad kanonotan ko. Diad samay labi antis na saman, impikasik la ed si Jehova a wala komon so nakatongtong ko. Diad kaimbuasan, sayan agi so akitongtong ed siak ed maabagey a paraan. Tinulongan to ak a makamoria a si Jehova so abayag lan ontutulong ed siak. Misalsalamat ak ed si Jehova diad impangibaki to ed sayan matatken.” Diad ontan iran paraan, ipapatnag na saray Kristianon mamatatken a sikara so ‘langkap a totoo,’ ya inter nen Jehova diad panamegley nen Jesu-Kristo pian natulongan itayon mansungdo ed dalan ya ompugta’d bilay.​—Efeso 4:8.

21, 22. (a) Antoray resulta sano walaray kakongregasyonan a mangiyaaplika ed simbawan naromog ed Filipos 2:4? (b) Akin ya importante so anggan saray angkelag labat a gawa na panangasi?

²¹ Nilikud ed saray mamatatken, kada matoor a Kristiano so malabay a mangiyaplika ed apuyanan a ganggan ya ‘agnengnengen na balang sakey iray pamaakaran ton dili, noag balang sakey et nengnengen to met iray pamaakaran na arum.’ (Filipos 2:4) Sano satan a simbawa et iyaplika na saramay walad Kristianon kongregasyon, manresulta itan ed makapasagyat iran gawa na panangasi. Alimbawa, sinagmak na sakey a pamilya so biglaan tan amayamay a trahedya. Say ama so angitagar ed manmarmarikit to pian onla iran mansaliw. Sanen pasempet la ra, sikara so naaksidente ed luganan. Inatey so anak tan say ama so graben arisgo. Kapaway to ed ospital, sikato so abaldado kanian agla anggan makakurang. Say akulaw to so maer-ermen lapud bukbukor toy mangokomponi ed sikato. Kanian, sayan maneermen a sanasawa so tinulongan na sakey a sanasawa ed kongregasyon, ya inawit da ra ed abung da tan inasikaso da ra ed loob na pigaran simba.

²² Siempre, aliwan amin a gawa na panangasi so mangilalanor ed trahedya tan personal a panagsakripisyo. Arum a tulong a naaawat tayo et diad memelag a paraan. Balet anggan panon kamelag itan a gawa na panangasi, agta aapresyaen tayo itan? Wala kasi so nanonotan yon panaon a walay mapangasin imbaga odino intulong na sakey ya agi ya eksakton kakkaukolan yo? Si Jehova so mabetbet a mangiyaansakit ed sikatayo ed ontan iran paraan.​—Uliran 17:17; 18:24.

23. Panon so panmoria nen Jehova sano mantutulongan itayo ed balang sakey?

²³ Labay yo kasi so pausar ed si Jehova pian ontulong ed arum? Satan so pribilehyo ya akalukas ed sikayo. Diad tua, aapresyaen nen Jehova itan a sagpot yo. Oniay ibabaga na Salita to: “Say walaan na panangasi ed duka pautangen to si Jehova, et say maong a gawa to ipawil to ed sikato a bayaran.” (Uliran 19:17) Makalikna itayo na baleg a gayaga sano usaren tayo so inkasikatayo ya ontulong ed saray agagi tayo. (Gawa 20:35) Say gayagan nalikna ed itulong tan say panamaseseg a nagamoran sano naawat itan so agnaeksperiensya na saramay sigagagalan mangiyaarawi ed inkasikara. (Uliran 18:1) Kanian, matoor itayon onatendi ed saray Kristianon pantitipon ta pian makapanpapasesegan itayo.​—Hebreos 10:24, 25.

24. Akin ya agtayo nepeg ya isipen a walaray asaew tayo lapud agtayo naimatonan iray makapakelkelaw a milagro nen Jehova nensaman?

²⁴ Agta makapaliket no umamengen iray paraan na panutulong nen Jehova ed sikatayo? Anggaman ag-itayo nambilay ed panaon sanen ginawa nen Jehova iray makapakelkelaw a milagro pian sumpalen iray gagala to, agtayo nepeg ya isipen a walaray asaew tayo. Say importante et itatarya nen Jehova ed sikatayo so amin a tulong a nakaukolan tayo ta pian makapanmatoor itayo. Tan no sankakaiba itayon mansungdo ed pananisia, nanengneng tayo so makapakelkelaw tan maglorian tuloy iran gawa nen Jehova ed amin ya awaran! Determinado tayo komon a mangawat tan sigpot a manganamot ed maaron pananulong nen Jehova ta pian nipatnag tayo so pipakna tayo ed saray salita na teksto tayo ed taon 2005: ‘Say tulong ko et manlalapu ed si Jehova.’​—Salmo 121:2.

Anto so Nikuan Yo?

Panon ya itatarya nen Jehova so tulong a nakaukolan tayo natan​—

• diad panamegley na saray anghel?

• diad panamegley na masanton espiritu to?

• diad panamegley na apuyanan a Salita to?

• diad panamegley na saray kapananisiaan?

[Tepetepet Parad Panagaral]

[Litrato ed pahina 18]

Makapaseseg a naamtaan a saray anghel so manusuporta ed panagpulong a kimey

[Litrato ed pahina 21]

Nayarin usaren nen Jehova so sakey ed saray kapananisiaan tayo pian nitarya so ligliwa a nakaukolan tayo