Bo Ta Acepta Yehova Su Yudansa?

‘Yehova ta mi yudado, lo mi no tin miedo.’—HEBREONAN 13:6.

1, 2. Pakico ta importante pa nos acepta Yehova su yudansa y guia den bida?

IMAGINA cu bo ta subiendo un sero. Pero bo no ta bo so pasobra un guia a ofrece su mes pa compaña bo, y e ta e miho guia cu bo por a haya. Aunke e tin mucho mas experencia y resistencia cu bo, toch e ta cana cu pasenshi banda di bo. E ta ripara cu de bes en cuando bo ta trompica. Pa motibo cu e ta precupa cu bo siguridad, e ta saca man pa yuda bo pasa over di un parti hopi peligroso. Lo bo nenga su yudansa? Claro cu no! Bo siguridad ta den wega.

² Como cristian, nos tin un caminda dificil pa cana. Nos tin cu cana riba e caminda smal ei nos so? (Mateo 7:14) No, Bijbel ta mustra cu e miho Guia cu nos por haya, Yehova Dios, ta permiti hende cana cu ne. (Genesis 5:24; 6:9) Yehova ta yuda su sirbidonan segun cu nan ta cana? E ta bisa: “Ami ta SEÑOR bo Dios, kende ta sostene bo man drechi, kende ta bisa bo: ‘No tene miedo, lo mi yuda bo.’” (Isaias 41:13) Mescos cu e guia den nos ilustracion, bondadosamente Yehova ta extende su man y su amistad na ken cu ta haci esfuerso pa cana cu ne. Claro cu ni un di nos lo kier rechasa su yudansa!

3. Ki preguntanan nos lo contesta durante e estudio aki?

 ³ Den e articulo anterior, nos a analisa cuater manera den cua Yehova a yuda su pueblo den tempo antiguo. E ta yuda su pueblo den e mesun maneranan awe? Y con nos por haci sigur cu nos ta acepta tur e yudansa ei? Laga nos contesta e preguntanan ei, y asina nos por haya mas confiansa cu Yehova en berdad ta nos Ayudante.—Hebreonan 13:6.

Yudansa di Angelnan

4. Pakico Dios su sirbidonan djawe por ta sigur cu e angelnan ta cla pa yuda nan?

⁴ Angelnan ta yuda Yehova su sirbidonan djawe? Sigur cu si. Ta berdad cu awe nan no ta aparece visiblemente pa libra adoradonan berdadero for di peliger. Den tempo di Bijbel tampoco angelnan no a interveni masha den e forma ei. Mayoria cos cu nan a haci tawata invisibel pa wowo humano, mescos cu ta e caso awe. No obstante, e solo echo cu e sirbidonan di Dios tawata sa cu e angelnan tawata cla pa yuda nan, a anima nan bastante. (2 Reinan 6:14-17) Nos tin bon motibo pa sinti mescos.

5. Con Bijbel ta mustra cu e angelnan ta envolvi den e obra di predica di nos tempo?

⁵ Yehova su angelnan ta particularmente interesa den un trabou special cu tin di aber cu nos. Ki trabou esei ta? Nos por haya e contesta na Revelacion 14:6: “Mi a mira un otro angel ta bula meimei di shelo, kende tawatin un evangelio eterno pa predica na esnan cu ta biba riba tera, y na tur nacion y tribu y lenga y pueblo.” Obviamente, e “evangelio eterno” aki ta liga cu e ‘evangelio di e reino’, cu, manera Hesus a profetisa, “lo wordo predica den henter mundo como un testimonio na tur nacion” prome cu e fin di e mundo aki yega. (Mateo 24:14) Claro cu no ta e angelnan mes ta predica. Ta hende Hesus a duna e encargo importante aki. (Mateo 28:19, 20) No ta un animacion pa sa cu segun cu nos ta cumpli cu e encargo ei, nos tin yudansa di e angelnan santo, esta, criaturanan spiritual sabi y poderoso?

6, 7. (a) Kico ta indica cu e angelnan ta apoyando nos trabou di predica? (b) Con nos por haci sigur cu nos ta ricibi e apoyo di Yehova su angelnan?

⁶ Tin bastante evidencia cu angelnan ta apoya nos den nos trabou. Por ehempel, hopi bes nos ta tende cu Testigonan di Yehova a topa un persona den sirbishi cu net a caba di pidi Dios pa yud’e haya e berdad. E experencianan ei ta sosode demasiado biaha pa descarta nan como simpel coinsidencia. Como resultado di tal yudansa di angel, mas y mas hende ta siñando pa haci manera e “angel [cu] ta bula meimei di shelo” a proclama: “Teme Dios y dun’e gloria.”—Revelacion 14:7.

⁷ Bo ta anhela pa e angelnan poderoso di  Yehova apoya bo? Si ta asina, haci bo maximo esfuerso den sirbishi. (1 Corintionan 15:58) Segun cu nos ta duna di nos mes libremente den e asignacion special aki di Yehova, nos por conta riba e yudansa di su angelnan.

Yudansa di e Cabesante di Tur Angel

8. Ki posicion eleva Hesus ta ocupa den shelo, y pakico esei ta un gran animacion pa nos?

⁸ Tambe Yehova ta duna nos un otro tipo di yudansa di angel. Revelacion 10:1 ta describi un “angel fuerte” y asombroso kende “su cara tawata manera solo.” E angel aki cu Huan a mira den vision evidentemente ta representa Hesucristo glorifica den poder celestial. (Revelacion 1:13, 16) Hesus ta realmente un angel? Den un sentido, si, pasobra e ta un arcangel. (1 Tesalonicensenan 4:16) Kico ta un arcangel? E palabra ei ta nifica “angel principal”, of “angel cabesante.” Di tur yiu spiritual di Yehova, Hesus ta esun di mas poderoso. Yehova a dun’e autoridad riba henter Su ehersito di angel. E arcangel aki en berdad ta un fuente poderoso di yudansa. Den ki manera?

9, 10. (a) Con Hesus ta sirbi como nos “ayudante” ora nos haci pica? (b) Ki yudansa nos por haya den e ehempel di Hesus?

⁹ E biehito apostel Huan a skirbi: “Si un hende haci pica, nos tin un abogado [“ayudante”, NW] serca e Tata, Hesucristo, e husto.” (1 Huan 2:1) Pakico Huan a indica cu Hesus ta nos “ayudante” specialmente ora nos “haci pica”? Wel, nos ta peca tur dia, y pica ta hiba na morto. (Eclesiastes 7:20; Romanonan 6:23) Sinembargo, Hesus a entrega su bida como un sacrificio pa nos picanan. Y e ta na lado di nos Tata misericordioso pa boga na nos fabor. Cada un di nos mester di e yudansa ei. Con nos por acept’e? Nos tin cu arepenti di nos picanan y busca pordon riba base di Hesus su sacrificio. Tambe nos tin cu evita di comete e mesun picanan cada bes.

¹⁰ Ademas di a muri pa nos, Hesus a pone e ehempel perfecto pa nos. (1 Pedro 2:21) Su ehempel ta guia nos, ta yuda nos fiha nos rumbo den bida pa asina nos evita di haci pica serio, y pa nos por agrada Yehova Dios. Nos no ta contento cu e yudansa ei? Hesus a priminti su siguidonan cu nan lo a haya un ayudante mas.

Yudansa di Spirito Santo

11, 12. Kico Yehova su spirito ta, con poderoso e ta, y pakico nos tin mester di dje awe?

¹¹ Hesus a priminti: “Lo mi pidi e Tata y lo e duna boso un otro ayudante pa keda cu boso pa semper, e spirito di e berdad, cu e mundo no por ricibi.” (Huan 14:16, 17, NW) E “spirito di e berdad”, of spirito santo, no ta un persona sino un forsa—Yehova su propio forsa activo. E ta sumamente poderoso. E ta e forsa cu Yehova a uza pa crea universo, efectua milagernan espectacular y revela su boluntad pa medio di vision. E echo cu Yehova no ta uzando su spirito den e maneranan spesifico ei awe ta nifica cu nos no tin mester di dje?

¹² Al contrario! Den e “temponan trabahoso” aki, nos tin mester di Yehova su spirito mas cu nunca. (2 Timoteo 3:1) E ta fortalece nos pa wanta bou di prueba. E ta yuda nos cultiva bunita cualidadnan cu ta hala nos mas serca Yehova y serca nos rumannan spiritual. (Galationan 5:22, 23) Con anto nos por beneficia di e yudansa maraviyoso aki di Yehova?

13, 14. (a) Pakico nos por ta sigur cu Yehova ta suministra su spirito santo di buena gana na su sirbidonan? (b) Cu ki tipo di accion nos ta mustra cu nos realmente no ta aceptando e regalo di spirito santo?

 ¹³ Na prome luga, nos tin cu pidi den oracion pa spirito santo. Hesus a bisa: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!” (Lucas 11:13) Si, Yehova ta e miho Tata cu nos por imagina. Si nos ta sinsero y nos pidie cu fe pa su spirito santo, nos por conta cu lo e duna nos e regalo aki. E ora ei, e pregunta ta: Nos ta pidi p’e? Nos tin bon motibo pa inclui e peticion ei tur dia den nos oracionnan.

¹⁴ Na di dos luga, nos ta acepta e regalo ei door di traha na harmonia cu ne. Laga nos ilustra esaki: Supone cu un cristian ta lucha contra e tendencia di wak pornografia. El a pidi Dios spirito santo pa yud’e resisti e custumber degenera aki. El a busca conseho di ancianonan cristian, y nan a sugirie pa e tuma accion decisivo, por ehempel, pa no pasa mes banda di e material degradante ei. (Mateo 5:29) Kico lo pasa si e ignora nan conseho y expone su mes na mas tentacion? E ta obrando na harmonia cu su oracion pa spirito santo yud’e? Of, mas bien, e ta coriendo e riesgo di haci e spirito di Dios tristo y keda sin haya e regalo aki? (Efesionan 4:30) Realmente, nos tur mester haci tur loke ta na nos alcanse pa haci sigur cu nos ta sigui ricibi e yudansa maraviyoso aki di Yehova.

Yudansa di e Palabra di Dios

15. Con nos por mustra cu nos no ta mira Bijbel como djis un buki gewoon?

¹⁵ Pa hopi siglo caba Bijbel ta un fuente di yudansa pa Yehova su fiel sirbidonan. Pero, en bes di mira e Santo Scritura como djis un buki gewoon, nos tin cu corda cu e ta un fuente poderoso di yudansa. Pa nos haya e yudansa ei nos tin cu haci esfuerso. Nos tin cu siña lesa Bijbel regularmente.

16, 17. (a) Con Salmo 1:2 y 3 ta describi e recompensanan di lesa e lei di Dios? (b) Con Salmo 1:3 ta pinta un cuadro di trabou duro?

¹⁶ Salmo 1:2 y 3 ta bisa di e hende cu ta agrada Dios: “Su delicia ta den e lei di SEÑOR, y den su lei e ta medita di dia y anochi. Y e lo ta manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.” Bo a capta e punto importante den e pasashi ei? Ta facil pa lesa e palabranan ei y conclui cu nan ta djis pinta un esena bunita di un ambiente pacifico, esta, un palo cu ta duna sombra y cu ta crece banda di un riu. Esta dushi ta pa tira un cabes merdia bou di un palo asina! Pero e salmo aki no ta invitando nos pa pensa riba sosiego. E ta pinta un cuadro basta distinto, uno cu ta duna idea di trabou duro. Con asina?

¹⁷ Ripara cu e palo aki no ta djis un palo di sombra cu pa casualidad ta crece banda di un riu. E ta un palo cu ta duna fruta, “planta” a proposito na un luga ideal, esta, “canto di coridanan di awa.” Con un palo por crece banda di mas cu un corida? Wel, den un hofi di palo di fruta, kisas e doño ta coba canalnan pa awa core yega na e raiznan di su palonan di balor. Aha, awor e punto ta sali na cla! Si den un sentido spiritual nos ta bona manera e palo ei, ta pasobra un otro hende a traha duro pa yuda nos. Nos ta asocia cu un organisacion cu ta percura pa e awa puro di e berdad yega te serca nos, pero ta nos  tin cu haci nos parti. Nos tur tin cu probecha awor pa chupa e awa precioso aki door di medita y haci e investigacionnan necesario pa inculca e berdadnan di e Palabra di Dios den nos mente y curason. Den e manera ei, nos tambe lo duna bon fruta.

18. Kico nos tin cu haci pa haya contestanan biblico riba nos preguntanan?

¹⁸ Bijbel lo no yuda nos cu nada si e para coi stof riba reki. Tampoco e no ta un talisman, como si fuera nos por sera nos wowo, habri Bijbel na un pagina y spera di haya e contesta riba nos pregunta net riba e pagina ei. Ora nos tin cu tuma decision, nos tin cu coba busca e “conocemento di Dios”, como si fuera buscando un tesoro scondi. (Proverbionan 2:1-5) Hopi bes investigacion diligente y cuidadoso ta necesario pa por haya conseho biblico net riba nos necesidadnan spesifico. Nos tin hopi publicacion basa riba Bijbel cu por yuda nos den nos investigacion. Segun cu nos ta coba den esakinan buscando ansiosamente e hoyanan di sabiduria den e Palabra di Dios, nos ta echt beneficia di e yudansa cu Yehova ta duna nos.

Yudansa pa Medio di Rumannan den Fe

19. (a) Pakico nos por mira e articulonan den E Toren di Vigilancia y Spierta! como yudansa cu nos ta ricibi pa medio di nos rumannan den fe? (b) Con un cierto articulo den un di nos revistanan a yuda bo?

¹⁹ Semper Yehova su sirbidonan humano tawata un fuente di yudansa pa otro. Yehova a cambia? Di ningun manera. Sin duda cada un di nos por corda ocasionnan den cua nos a ricibi net e yudansa y net na e momento cu nos tawatin mester di dje for di nos rumannan den fe. Por ehempel, bo por corda un articulo den E Toren di Vigilancia of Spierta! cu a consola bo ora bo tawatin mester di esei of cu a yuda bo resolve un problema of enfrenta un prueba di fe? Yehova ta esun cu a yuda bo pa medio di “e esclabo fiel y prudente” cu a haya e encargo di percura “cuminda na su debido tempo.”—Mateo 24:45-47.

20. Den ki maneranan ancianonan cristian ta demostra cu nan ta “donnan den hende”?

²⁰ Pero hopi bes e yudansa cu nos ta ricibi di nos rumannan den fe ta mas direct. Un anciano cristian ta duna un discurso cu ta conmove nos, of e ta haci nos un bishita di pastoreo cu ta yuda nos pasa door di un ke otro dificultad, of e ta duna nos un conseho bondadoso cu ta yuda nos mira y vence un debilidad. Un cristian gradicido a skirbi relaciona cu e yudansa cu un anciano a dun’e: “Durante sirbishi, el a tuma tempo pa anima mi pa mi expresa mi mes. E anochi anterior, mi a pidi Yehova duna mi un hende cu mi por  papia cu ne. E siguiente dia e ruman aki a papia cu mi na un manera compasivo. El a yuda mi mira con Yehova ta yudando mi pa hopi aña caba. Mi ta gradici Yehova pa a manda e anciano aki pa mi.” Den tur e maneranan ei, ancianonan cristian ta mustra cu nan ta “donnan den hende” cu Yehova a percura pa medio di Hesucristo pa yuda nos persevera riba e caminda cu ta hiba na bida.—Efesionan 4:8, NW.

21, 22. (a) Ora e rumannan di congregacion aplica e conseho di Filipensenan 2:4, den kico esei ta resulta? (b) Pakico asta e gestonan chikito di bondad ta importante?

²¹ Ademas di e ancianonan, tur cristian fiel kier aplica e mandamento inspira pa “no busca [su] interes personal so, ma busca tambe interes di otronan.” (Filipensenan 2:4) Ora e rumannan den e congregacion cristian aplica e conseho ei, e ta resulta den bunita gestonan di bondad. Por ehempel, diripiente un famia a haya su mes den un gran tragedia. E tata a bai cumpra cos cu su yiu mohe. Riba caminda pa cas, nan a haya nan den un accidente di auto. E yiu mohe a fayece y e tata a keda gravemente herida. Ora el a sali for di hospital, na principio e tawata asina incapasita cu e no por a haci nada pa su mes. Su esposa tawata emocionalmente mucho kibra pa e so cuid’e. Pues un famia den e congregacion a tuma e pareha desconsola aki den nan cas y a percura pa nan pa varios siman.

²² Claro cu no ta ora di tragedia so por haci acto di bondad y sacrificio personal. Hopi bes nos ta ricibi yudansa cu cosnan chikito. Pero sin importa con chikito e bondad ta, nos ta apreci’e, no ta berdad? Bo por corda un ocasion cu un palabra of gesto di bondad di un ruman a duna bo net e yudansa cu bo tawatin mester? Hopi bes Yehova ta percura pa nos den e maneranan ei.—Proverbionan 17:17; 18:24.

23. Con Yehova ta considera e esfuerso cu nos ta haci pa yuda otro?

²³ Bo kier pa Yehova uza bo como un medio pa yuda otro hende? Bo tin e oportunidad unico ei. De echo, Yehova ta aprecia e esfuerso ei di bo parti. Su Palabra ta bisa: “Esun cu tene misericordia di un hende pober ta fia SEÑOR, y e lo pag’e bek pa su bon obra.” (Proverbionan 19:17) Ora nos ta duna di nos mes na nos rumannan, esei ta resulta den un goso grandi. (Echonan 20:35) Hende cu ta isola nan mes deliberadamente no por experencia e goso di duna e yudansa ei ni e animacion di por ricibie. (Proverbionan 18:1) Pesei, laga nos semper asisti fielmente na reunionnan cristian pa asina nos por anima otro.—Hebreonan 10:24, 25.

24. Pakico nos no tin nodi sinti nos menos privilegia djis pasobra nos no a mira Yehova su milagernan espectacular di pasado?

²⁴ No ta un placer pa contempla e maneranan den cua Yehova ta yuda nos? Aunke nos no ta biba den un tempo cu Yehova ta efectuando milagernan espectacular pa cumpli cu su propositonan, nos no tin nodi sinti nos menos privilegia. Loke ta conta realmente ta cu Yehova ta duna nos tur e yudansa cu nos tin mester pa keda fiel. Y si nos persevera hunto den fe, nos lo biba pa mira Yehova su actonan di mas espectacular y mas glorioso den henter historia! Laga nos keda determina pa acepta y probecha plenamente di Yehova su yudansa amoroso pa nos tambe por ripiti e palabranan di nos texto pa aña 2005: ‘Mi yudansa ta bin for di Yehova.’—Salmo 121:2.

Kico Bo Ta Pensa?

Con Yehova ta duna e yudansa cu nos tin mester awe:

• pa medio di e angelnan?

• pa medio di su spirito santo?

• cu su Palabra inspira?

• pa medio di nos rumannan den fe?

[Preguntanan di Estudio]

[Plachi na pagina 18]

Ta un animacion pa sa cu e angelnan ta apoyando e trabou di predica

[Plachi na pagina 21]

Yehova por uza un di nos rumannan den fe pa duna nos e consuelo cu nos tin mester