Pe E te Taliaina le Fesoasoani a Ieova?

“O [Ieova] o loʻu fesoasoani ia, ou te lē fefe lava i se mea.”—EPERU 13:6.

1, 2. Aiseā e tāua ai le taliaina o le fesoasoani ma le taʻitaʻiga a Ieova i le olaga?

SEʻI faapea o loo e aʻea se auala i se mauga. Peitaʻi e lē na o oe, ua iai se faasinoala ua ofo atu lua te ō, ma o ia o se faasinoala sili ona lelei. E sili atu lona tomai ma lona malosi na i lo oe peitaʻi, o loo savali pea ma le onosai i ou autafa. Ua ia mātauina e te tau sulu i nisi o taimi. O lona manatu mamafa mo lou saogalemu, ua ia aapa atu ai ma fesoasoani atu iā te oe aemaise lava i vaega o le ala e lamatia ai. Po o le a e teena ea lana fesoasoani? E mautinoa e leai! Ua lamatia lou saogalemu.

² I le avea o ni Kerisiano, e iai se ala faigatā e ao ona tatou ui atu ai. Pe e te savali ea na o oe i lenā auala vaapiapi? (Mataio 7:14) E leai, ua faaalia mai e le Tusi Paia o le Faasinoala sili ua tatou maua, o Ieova le Atua, ua ia finagalo malie e savavali faatasi ma tagata. (Kenese 5:24; 6:9) Pe e fesoasoani Ieova i ana auauna a o latou savavali faatasi? O lana fetalaiga: “Auā o aʻu o Ieova lou Atua, o lē ua taofi lou lima taumatau; o lē ua fai atu iā te oe, Aua e te fefe, o aʻu, ou te fesoasoani iā te oe.” (Isaia 41:13) E pei o le faasinoala i la tatou faataʻitaʻiga, ua ofo mai ma le agalelei e Ieova lana fesoasoani ma lana faauōga i ē saʻili e savavali ma ia. E  mautinoa e leai se tasi o i tatou e teena lana fesoasoani!

3. O ā fesili o le a tatou iloiloina i lenei talanoaga?

³ I le mataupu na muamua atu, na tatou talanoaina ai auala e fā na fesoasoani ai Ieova i ona tagata i taimi anamua. Po o ia fesoasoani i ona tagata i le auala lava lenā i aso nei? E faapefea ona mautinoa tatou te taliaina lana fesoasoani? Seʻi o tatou iloiloina na fesili. O le faia faapea, e tatou te atili mautinoa ai o Ieova moni lava o lo tatou Fesoasoani.—Eperu 13:6.

O le Fesoasoani a Agelu

4. Aiseā e mautinoa ai auauna a le Atua i aso nei i le lagolagosua a agelu?

⁴ Po o fesoasoani agelu i auauna a Ieova i aso nei? Ioe, o loo latou faia faapea e ui lava, latou te lē o faaalitino mai i aso nei ina ia faasaoina tagata tapuaʻi moni mai lamatiaga. E oo foʻi i taimi o le Tusi Paia, e seāseā faalaa ane agelu i se auala faapena. O le tele o mea latou te faia e lē vaaia e tagata, e faapena foʻi i aso nei. Ae peitaʻi, e matuā faalaeiauina auauna a le Atua i lo latou iloaina e nofo sauni agelu e fesoasoani iā i latou. (2 Tupu 6:14-17) O le lagona lenā e ao ona iā i tatou.

5. Ua faaalia faapefea e le Tusi Paia o loo aofia ai agelu i le galuega talaʻi i aso nei?

⁵ E sili ona fiafia agelu a Ieova i se galuega lea o loo tatou faia. O le ā lenā galuega? E maua le tali i le Faaaliga 14:6: “Na aʻu iloa foʻi le tasi agelu ua lele i le taulotoaʻiga o le lagi, ua iā te ia le tala lelei faavavau e folafola atu i ē nonofo i le lalolagi, i atunuu uma, ma ituaiga, ma gagana eseese, ma nuu.” O lenei “tala lelei faavavau” e fesootaʻi atu i le “tala lelei o le malo,” e pei ona valoia e Iesu, “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma,” a o leʻi oo mai le iʻuga o lenei faiga o mea. (Mataio 24:14) O le mea moni, e lē o talaʻi tuusaʻo atu agelu. Na tuu atu e Iesu i tagata lenei faatonuga tāua. (Mataio 28:19, 20) E faalaeiauina le iloa a o tatou faataunuuina lenā faatonuga, ua tatou maua le fesoasoani a agelu paia, o foafoaga agaga e atamamai ma malolosi.

6, 7. (a) O le ā ua faaalia ai e lagolagoina e agelu la tatou talaʻiga? (e) E faapefea ona tatou mautinoa o le a tatou maua le lagolagosua a agelu a Ieova?

⁶ Ua iai se faamaoniga sili o le lagolagosua a agelu i la tatou galuega. O se faaaʻoaʻoga, e masani ona tatou faalogo a o faia le talaʻiga a Molimau a Ieova, e latou te feiloaʻi atu ai i se tasi e leʻi leva ona uma ona tatalo i le Atua mo se fesoasoani i le saʻilia o le upu moni. E masani ona tutupu mea faapena ma e tatou te mautinoa ai le fesoasoani a agelu. O le iʻuga o le fesoasoani a agelu, ua toʻatele tagata ua aʻoaʻoina ia faia le mea o loo faalauiloa e le  “agelu ua lele i le taulotoaʻiga o le lagi”: “Ia outou matataʻu i le Atua, ma avatu iā te ia le viiga.”—Faaaliga 14:6, 7.

⁷ Po o e naunau ia maua le lagolagosua a agelu a Ieova? Ia faia le mea silisili i lau faiva. (1 Korinito 15:58) A o tatou faatino ma le lotofiafia lenei tofiga faapitoa mai iā Ieova, e mafai ona tatou mautinoa le mauaina o le fesoasoani a ana agelu.

Fesoasoani Mai le Agelu Sili

8. O le ā le tofiga mamalu o Iesu i le lagi, ma aiseā ua faamāfanafana ai i tatou ona o lenā mea?

⁸ Ua saunia foʻi e Ieova se isi ituaiga o fesoasoani faaagelu. Ua faamatalaina e le Faaaliga 10:1 se “agelu malosi” ofoofogia o ona “fofoga foʻi e pei o le lā.” O lenei agelu i le faaaliga, ua faaataina ai Iesu Keriso i le mana faalelagi. (Faaaliga 1:13, 16) Po o Iesu ea o se agelu? Ioe, o le upu “agelu” e mafai ona faatatau foʻi iā Iesu talu ai o ia o le agelu sili. (1 Tesalonia 4:16) O Iesu e silisili i atalii agaga uma o Ieova. Ua tuu atu e Ieova iā te ia le faatonuina o Ana ʻauagelu uma. O lenei agelu sili o se puna malosi o le fesoasoani. E faapefea?

9, 10. (a) E faapefea ona auauna Iesu o se “fautua” pe a tatou agasala? (e) O le ā le fesoasoani tatou te maua i le faaaʻoaʻoga a Iesu?

⁹ Na tusi le aposetolo matua o Ioane: “Pe afai foʻi e agasala se tasi, o iā te i tatou le fautua i luma o le Tamā, o Iesu Keriso lea, o lē amiotonu.” (1 Ioane 2:1) Aiseā na manatu ai Ioane o Iesu o lo tatou “fautua” aemaise lava pe afai tatou te “agasala”? Talu ai tatou te agasala i aso uma ma e oo atu ai i le oti. (Failauga 7:20; Roma 6:23) Peitaʻi, na tuuina mai e Iesu lona soifua e fai ma togiola mo a tatou agasala. O loo iai o ia i le itu o lo tatou Tamā alofa e faatoga mo i tatou. E manaʻomia e i tatou uma lava lenā fesoasoani. E faapefea ona tatou taliaina? E tatau ona tatou salamō i a tatou agasala ma saʻili le faamagaloga e faavae i le taulaga a Iesu. E manaʻomia foʻi ona ʻalofia le toe faia o a tatou agasala.

¹⁰ E lē gata i le maliu mo i tatou, ae ua faataatia foʻi e Iesu se faaaʻoaʻoga lelei mo i tatou. (1 Peteru 2:21) O lana faaaʻoaʻoga ua taʻitaʻia ai i tatou, ma fesoasoani ina ia ʻalofia ai le faia o agasala matuiā ma faafiafia Ieova le Atua. Pe tatou te lē fiafia ea e maua lenā fesoasoani? Na folafola e Iesu i ona soo o le a saunia se isi fesoasoani.

O le Fesoasoani a le Agaga Paia

11, 12. O le ā le agaga o Ieova, o le ā le malosi o lenā agaga, ma aiseā tatou te manaʻomia ai i aso nei?

¹¹ Na folafola e Iesu: “Ou te fai atu foʻi i le Tamā, ona foaʻi mai ai lea e ia iā te outou le tasi Fesoasoani, ina ia tumau pea o ia iā te outou e faavavau; o ia o le Agaga o le upu moni, e lē mafai e le lalolagi ona talia o ia.” (Ioane 14:16, 17) O lenei “Agaga o le upu moni” po o le agaga paia, e lē o se agelu po o se tasi e pei o Ieova ae o le malosi galue o Ieova. E lē gata mai lona malosi. O le mana lea na faaaogā e Ieova i le foafoaina o le vateatea, i le faatinoina o vavega ofoofogia, ma le aumaia o faaaliga o lona finagalo. Talu ai e lē o toe faaaogāina e Ieova lona agaga i na auala faapitoa i aso nei, po o lona uiga ea la ua tatou lē manaʻomia ai le agaga paia?

¹² E leai! I nei “aso faigatā,” ua sili atu ona tatou manaʻomia le agaga o Ieova. (2 Timoteo 3:1) Ua faamalosia ai i tatou ina ia tumau i tulaga faigatā. E fesoasoani iā i tatou ia ati  aʻe uiga lelei e vavalalata atu ai iā Ieova ma o tatou uso ma tuafāfine faaleagaga. (Kalatia 5:22, 23) O lea la, e faapefea ona tatou maua aogā mai lenei fesoasoani a Ieova?

13, 14. (a) Aiseā tatou te mautinoa ai e naunau Ieova e aumaia lona agaga paia i ona tagata? (e) O ā gaoioiga e faaalia ai tatou te lē o taliaina le meaalofa o le agaga paia?

¹³ Muamua, e ao ona tatou tatalo mo le agaga paia. Na fetalai Iesu: “O outou e leaga, afai ua iloa e outou ona avatu o mea lelei mā a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ole atu ai iā te ia?” (Luka 11:13) Ioe, o Ieova o le Tamā sili ona lelei. Pe afai tatou te ole atu ma le faatuatua iā te ia mo le agaga paia, o le ia foaʻi mai iā i tatou. O le fesili la, Po ua tatou ole atu mo le agaga paia? E tatau ona talosaga atu mo le agaga paia i aso uma.

¹⁴ O le lona lua, tatou te taliaina lenā mea lelei e ala i le galue e ōgatusa ai. Ia faataʻitaʻi: Seʻi faapea o loo tauivi se Kerisiano ma se faanaunauga i le matamata i ata matagā i faiga faaleituaiga. Ua ia tatalo mo le agaga paia e fesoasoani iā te ia e teena lenei masaniga leaga. Ua ia saʻili atu i fautuaga mai toeaina Kerisiano, ma ua latou fautuaina o ia ina ia faia ni gaoioiga maumauaʻi, ma ia taumamao ese mai na mea leaga. (Mataio 5:29) Ae ā pe afai e na te lē amanaʻia a latou fautuaga ma faaauau ona matamata i na mea pe a faaosoosoina? Po o galue o ia e tusa ma ana tatalo mo le agaga paia e fesoasoani iā te ia? Po o ua faatigā o ia i le agaga o le Atua ma lē maua ai le meaalofa o le agaga paia? (Efeso 4:30) O le mea moni, e manaʻomia e i tatou uma lava ona faia le mea tatou te mafai ina ia faamautinoa ai o loo faaauau ona maua lenei fesoasoani lelei mai iā Ieova.

Fesoasoani Mai le Afioga a le Atua

15. E faapefea ona faaalia tatou te lē o manatu māmā i le Tusi Paia?

¹⁵ Ua loa ona fesoasoani le Tusi Paia i auauna faamaoni a Ieova. Na i lo le manatu māmā i le Tusi Paia, e ao ona tatou manatu o se puna malosi lea o le fesoasoani. O le taliaina o lenā fesoasoani e aofia ai taumafaiga. E manaʻomia ona avea le faitauina o le Tusi Paia o se vaega o la tatou faasologa i aso uma.

16, 17. (a) Ua faaalia faapefea e le Salamo 1:2, 3 taui o le faitauina o le tulafono a le Atua? (e) Ua faaalia faapefea e le Salamo 1:3 le tatau ona tatou galulue mamafa?

¹⁶ Ua faapea mai le Salamo 1:2, 3 e uiga i le tagata na te faafiafiaina le Atua: “A e naunau o ia i le tulafono a Ieova; e mafaufau foʻi o ia i lana tulafono i le ao atoa ma le pō. O ia foʻi e faapei o le laau ua totō i tafatafa ane o vaitafe, e fua mai ona fua i ona lava tau; e lē toʻulu foʻi ona lau; e manuia foʻi mea uma na te faia.” Po o e iloa le manatu tāua i lenei mau? E faigofie le faitau i na upu ma mafaufau i ai ua na ona faamatala mai ai o se vaaiga o se faatulagaga toʻafilemu, o se laau o loo ola i autafa o se vaitafe. Maʻeu le manaia pe a fai se mālōlōga i se vaipanoa faapena! Peitaʻi, e lē o valaaulia i tatou e le faisalamo e mafaufau e faatatau i se mālōlōga. Na i lo lea, o loo talanoa le faisalamo e uiga i le faia o galuega filigā. E faapefea ona faia?

¹⁷ Mātau, o le laau lea e lē na o se laau paolo ae o se laau e fua mai, e “totō” i se nofoaga e i “tafatafa ane o vaitafe.” E faapefea ona ola se laau i autafa o vaitafe? Atonu e eli e lē ana se togālaau ni alāvai ina ia oo atu ai le vai i lona togālaau. O, ua manino la le manatu! Pe a tatou lauolaola e pei o lea laau i se uiga faaleagaga, ua māfua lenā tulaga ona o le tele o galuega  ua faia mo i tatou. O loo tatou auaumea ma le faalapotopotoga ua aumaia vai mamā o le upu moni iā i tatou, peitaʻi e tatau foʻi ona tatou galulue. E manaʻomia ona tatou ave i fale lenei vai tāua, e ala i le manatunatu loloto i ai ma faia saʻiliʻiliga ina ia tāmau ai upu moni o le Afioga a le Atua i o tatou mafaufau ma loto. I le faia faapena, o le a maua ai foʻi e i tatou ni fua lelei.

18. O le ā e manaʻomia ina ia maua ai tali faale-Tusi Paia i a tatou fesili?

¹⁸ E lē mafai ona tatou maua aogā mai le Tusi Paia pe a tuu i luga o se fata e aunoa ma le faitauina. E lē pei foʻi o se maneta e na ona tatala lava o le Tusi Paia ma maua mea tatou te mananaʻo ai, auā tatou te lē faatalitalia o le a tatou maua tali i a tatou fesili i so o se vaega tatou te tatalaina i ai le Tusi Paia. Pe a tatou faia ni filifiliga, e manaʻomia ona tatou saʻilia le “poto i le Atua” e pei o le oloa lilo. (Faataoto 2:1-5) E manaʻomia saʻiliʻiliga filigā ina ia maua ai fautuaga a le Tusi Paia e uiga i o tatou manaʻoga. Ua iā i tatou le tele o lomiga faale-Tusi Paia e fesoasoani i la tatou saʻiliʻiliga. A o tatou suʻesuʻeina nei lomiga e matuā saʻili ai mo oloa o le poto i le Afioga a le Atua, o loo tatou faaaogāina moni la le fesoasoani a Ieova.

Fesoasoani e Ala i Uso Talitonu

19. (a) Aiseā e ono manatu ai i mataupu i Le Olomatamata ma le Ala Mai! o se fesoasoani na saunia e ala mai i le ʻauuso talitonu? (e) Na faapefea ona fesoasoani iā te oe se mataupu patino o Le Olomatamata po o le Ala Mai!?

¹⁹ E masani i auauna a Ieova ona fesoasoani le tasi i le isi. Po ua liliu ea Ieova? E leai. E lē masalomia e mafai e i tatou uma ona mafaufau i ni faaaʻoaʻoga na tatou maua ai le fesoasoani tatou te manaʻomia i le taimi talafeagai mai i o tatou uso talitonu. O se faaaʻoaʻoga, pe e te manatua se mataupu o Le Olomatamata po o le Ala Mai! na faamāfanafana ai oe ina ua e manaʻomia, ma fesoasoani e foʻia se faafitauli po o le fesagaʻi ma se luʻi o lou faatuatua? Ua aumaia e Ieova iā te oe lenā fesoasoani e ala i le “auauna faamaoni ma le mafaufau” ua tofia e saunia “mea e ʻai i ona itu aso.”—Mataio 24:45-47.

20. O ā auala ua avea ai toeaina Kerisiano o ni “mea alofa i tagata”?

²⁰ E masani lava, o le fesoasoani tatou te maua mai i uso talitonu e tuusaʻo. E faia e se toeaina Kerisiano se lauga e pāʻia ai o tatou loto, pe faia se asiasiga faaleoleo mamoe e fesoasoani iā i tatou i taimi faigatā, po o le aumaia o se fautuaga agalelei e iloa ma foʻia ai se vaivaiga. Ua tusi mai se Kerisiano lotofaafetai e faatatau i le fesoasoani na avatu iā te ia e se toeaina: “I le taimi o le talaʻiga na ia faalaeiauina aʻu ina ia faaali atu oʻu manatu. I  le pō na seʻi mavae atu, na ou tatalo ai iā Ieova mo se tasi ou te talanoa atu i ai. I le aso na sosoo ai, na talanoa mai ma le agalelei lenei uso iā te aʻu. Na ia fesoasoani iā te aʻu ina ia iloa le auala na fesoasoani mai ai Ieova mo se taimi umi. Ou te lotofaafetai iā Ieova ona o le auina mai o lenei toeaina iā te aʻu.” I na auala uma, ua faaalia ai e toeaina Kerisiano o i latou o “mea alofa i tagata” na saunia e Ieova e ala iā Iesu Keriso ina ia fesoasoani iā i tatou e tumau ai i le ala i le ola.—Efeso 4:8.

21, 22. (a) O ā iʻuga pe a faatatauina e i latou i le faapotopotoga le fautuaga i le Filipi 2:4? (e) Aiseā e tāua ai e oo lava i sina gaoioiga itiiti o le agalelei?

²¹ E lē gata i toeaina, e mananaʻo Kerisiano uma e faatatauina le faatonuga a le Tusi Paia ina ia “aua neʻi taʻitasi ma vaavaai i ana lava mea, a ia taʻitasi ma vaavaai i mea a isi.” (Filipi 2:4) Pe a faatatauina e i latou i le faapotopotoga Kerisiano lenā fautuaga, o le a iʻu i gaoioiga mataʻina o le agalelei. O se faaaʻoaʻoga, na mafatia se aiga i se faalavelave faafuaseʻi. Na ō le tamā ma lona afafine laʻitiiti i le faleoloa. Ina ua la toe foʻi i le fale, na tupu ai se faalavelave tau taavale. Na maliu ai le teineitiiti ae manuʻa tigāina le tamā. Ina ua teʻa mai i le falemaʻi, na lē atoatoa lona malosi ua lē toe mafai ona ia faia se mea. Ua matuā lotomafatia lana āva e tausia o ia. O lea na ave ai e se ulugalii o le faapotopotoga le ulugalii mafatia lenei i lo latou fale ma tausia i laʻua mo ni vaiaso.

²² O le mea moni, e lē o taimi uma e manaʻomia ai le avatuina o sea fesoasoani agalelei e pei ona sa manaʻomia i lenei tulaga faigatā na tupu. I nisi taimi, ua tatou maua sina fesoasoani itiiti. Ae peitaʻi, po o le ā lava le itiiti o le fesoasoani e tatou te talisapaia lava, a ea? Pe e mafai ona e mafaufau i taimi na avatu ai e se uso po o se tuafafine se upu agalelei po o se gaoioiga alofa ae o le fesoasoani tonu lava lenā o loo e manaʻomia? E tausia e Ieova i tatou i na auala.—Faataoto 17:17; 18:24.

23. O le ā le silasila a Ieova pe a tatou taumafai e fesoasoani le tasi i le isi?

²³ Pe e te manaʻo e faaaogā oe e Ieova o se auala e fesoasoani ai i isi? O lenā faaeaga ua avanoa mo oe ma e tāua iā Ieova au taumafaiga. Ua faapea mai lana Afioga: “O lē ua alofa i le tagata mativa, na te avatua ana mea iā Ieova; e tauia mai foʻi e ia ana mea na avatu iā te ia.” (Faataoto 19:17) O le fiafiaga sili e sau mai le faia o mea lelei mo o tatou uso ma tuafāfine. (Galuega 20:35) E lē maua e i latou e vavae ese le olioli o le foaʻi atu o lenā fesoasoani po o le fiafia i le taliaina. (Faataoto 18:1) O lea la, seʻi o tatou faamaoni e auaufaatasi i sauniga faa-Kerisiano ina ia faalaeiau ai le tasi i le isi.—Eperu 10:24, 25.

24. Aiseā e lē tatau ai ona tatou faanoanoa ona tatou te leʻi vaai i vavega ofoofogia a Ieova i aso ua mavae?

²⁴ O se fiafiaga le iloiloina o auala o loo fesoasoani mai ai Ieova iā i tatou. E ui lava tatou te leʻi ola i le taimi na faatino ai e Ieova vavega ofoofogia ina ia faataunuu ai lana fuafuaga, ae e lē tatau ai ona tatou faanoanoa. O le mea sili ona tāua ua aumaia e Ieova iā i tatou le fesoasoani talafeagai ina ia tumau ai ma le faamaoni. Afai tatou te tumau faatasi i le faatuatua, o le a tatou ola e vaai i gaoioiga sili ona ofoofogia ma mamalu i le talafaasolopito! Seʻi o tatou maumauaʻi e talia ma faaaogā atoatoa le fesoasoani agalelei a Ieova ina ia mafai ai foʻi ona tatou faapea atu: ‘O loʻu fesoasoani e mai iā Ieova lea.’—Salamo 121:2.

O le ā Sou Manatu?

Na saunia faapefea e Ieova le fesoasoani tatou te manaʻomia i aso nei—

• e ala i agelu?

• e ala i lona agaga paia?

• i lana Afioga?

• e ala i uso talitonu?

[Fesili mo le Suʻesuʻega]

[Ata i le itulau 18]

O se mea lelei le iloa o loo lagolagosua le ʻauagelu i le talaʻiga

[Ata i le itulau 21]

Atonu e faaaogā e Ieova se tasi o o tatou uso talitonu e faamāfanafana iā i tatou