Kasi Mukuzomera Wovwiri wa Yehova?
Kasi Mukuzomera Wovwiri wa Yehova?
“Fumu [Yehova] ndi movwiri wane; kuti nditi ndopenge cara.”—ŴAHEBERE 13:6.
1, 2. Cifukwa wuli nchakuzirwa kuzomera wovwiri na ulongozgi wa Yehova?
AGHANAGHANANI kuti mukutembeya ku mapiri. Kweni muli mwekha yayi, cifukwa mulongozgi wajipeleka kuti walute namwe, ndipo ndiyo wakulongozga makora ŵanthu kuluska wose. Iye wali kuzgoŵera kwenda mu mapiri ndipo ngwankhongono kuluska imwe, kweni wakwenda pacokopacoko pafupi na imwe. Wakuwona kuti mukukhuŵara pafupipafupi. Cifukwa ca kufipira mtima umoyo winu, wakumukorani pa woko para mwafika pa malo ghakofya. Kasi mungakana wovwiri wake? Cara nadi, mungakana yayi! Umoyo winu wuli pangozi.
2 Pakuti ndise Ŵakhristu, nase tikwenda pa nthowa yakusuzga comene. Kasi tikwenera kwenda tekha pa nthowa yifinyi iyi? (Mateyu 7:14) Yayi, cifukwa Baibolo likulongora kuti Yehova Ciuta, uyo wakumanya comene kulongozga, wakuzomerezga ŵanthu kwenda nayo. (Genesis 5:24; 6:9) Kasi Yehova wakovwira ŵateŵeti ŵake para ŵakwenda? Iye wakuti: ‘Ine Yehova Ciuta wako, ndakukora pa woko lako la malyero; ndine nkhuti kwa iwe, “Ungopanga, ndine tindikovwire.”’ (Yesaya 41:13) Mwakuyana na munthu wakulongozga ŵanthu mu ciyelezgero ca mu ndime yakwamba, Yehova wakovwira na kukorana ubwezi na awo ŵakukhumba kwenda nayo. Palije uyo wangakana wovwiri wake!
3. Kasi mu nkhani iyi tidumbiskanenge mafumbo wuli?
3 Mu nkhani yajumpha, tikadumbiskana nthowa zinayi izo Yehova wakawovwiliranga ŵanthu ŵake kale. Kasi nthowa izi ndizo wakovwiliraso ŵanthu ŵake mazuŵa ghano? Kasi tingasimikizga wuli kuti tikuzomera wovwiri wose uwo wakutipa? Tiyeni tidumbiskane mafumbo agha. Para tingacita nthena, tiŵenge ŵakusimikizga nadi kuti Yehova ni Movwiri withu.—Ŵahebere 13:6.
Wovwiri wa Ŵangelo
4. Nchifukwa wuli ŵateŵeti ŵa Yehova mazuŵa ghano ŵakwenera kugomezga kuti ŵangelo ŵakuŵawovwira?
4 Kasi ŵangelo ŵakovwira ŵateŵeti ŵa Yehova mazuŵa ghano? Enya, ŵakuŵawovwira. Mbunenesko kuti mazuŵa ghano ŵangelo ŵakuwonekera pakweru yayi kuti ŵawombole ŵasopi ŵaunenesko ku ngozi. Nanga ni kale, nkhanandi yayi apo ŵangelo ŵakacitanga nthena. Vinandi ivyo ŵakacitanga, vikawonekanga yayi ku ŵanthu, nga ni umo viliri mazuŵa ghano. Ndipouli, ŵateŵeti ŵa Ciuta ŵakakhozgekanga comene para ŵamanya kuti ŵangelo mbakunozgeka kuŵawovwira. (2 Mathemba 6:14-17) Nase tikwenera kugomezga.
5. Kasi Baibolo likulongora wuli kuti ŵangelo ŵakutovwira para tikupharazga mazuŵa ghano?
5 Ŵangelo ŵa Yehova mbakunweka comene na mulimo uwo tikucita. Mulimo wuli? Zgoro tikulisanga pa Civumbuzi 14:6, apo pakuti: “Ndipo nkhawona mungelo munyake wakuwuruka mucanya mukatikati, wakuŵa na ivangeli landanda kupharazga kwa awo ŵakukhala pa caru capasi, na ku mtundu wose na fuko na lulimi na ŵanthu.” Apa “ivangeli landanda” ili ni ‘makani ghawemi gha ufumu,’ agho Yesu wakati ‘ghazamupharazgika mu vyaru vyose ghaŵe cipanikizgo ku mitundu’ pambere caru cindamare. (Mateyu 24:14) Ŵangelo ŵakupharazga mwakudunjika yayi. Yesu wakapeleka mulimo wakuzirwa uwu ku ŵanthu. (Mateyu 28:19, 20) Kasi nchakukhozga yayi kumanya kuti peneapo tikucita mulimo uwu, ŵangelo, awo ni vilengiwa vyamahara na vyankhongono ŵakutovwira?
6, 7. (a) Nchivici ico cikulongora kuti ŵangelo ŵakutovwira pa mulimo wa kupharazga? (b) Kasi tikwenera kucitaci kuti tisimikizge kuti ŵangelo ŵa Yehova ŵakutovwira?
6 Pali ukaboni unandi wakuti ŵangelo ŵakutovwira pa nchito yithu. Mwaciyelezgero, kanandi tikupulika kuti apo ŵakaŵa mu uteŵeti, Ŵakaboni ŵa Yehova ŵakakumana na munthu uyo wakaŵa kuti wamara waka kulomba kuti Ciuta wamovwire kusanga unenesko. Ivi vikucitika kanandi waka mwakuti tingayowoya kuti vikucitika mwamwaŵi yayi. Cifukwa ca wovwiri wa ŵangelo, ŵanthu ŵanandi ŵakusambira kucita ivyo ‘mungelo wakuwuruka mucanya’ wakayowoya, uyo wakacemerezga kuti: “Mopani Ciuta, ndipo mupani nchindi.”—Civumbuzi 14:7.
7 Kasi mukukhumba kuti ŵangelo ŵankhongono ŵa Yehova ŵamovwirani? Usange ni nthena, mbwenu fwiliranipo kucita vyose ivyo mungakwaniska mu uteŵeti winu. (1 Ŵakorinte 15:58) Para tikujipeleka na mtima wose pakucita mulimo wapadera uwu uwo Yehova wali kutipa, mbwenu ŵangelo ŵake ŵatovwirenge nadi kwambura kukayika.
Wovwiri wa Mungelo Mulara
8. Kasi Yesu wali na udindo ukuru wuli kucanya, ndipo cifukwa wuli ici nchakukhozga kwa ise?
8 Yehova wakutipaso wovwiri unyake wa ŵangelo. Pa Civumbuzi 10:1 pakuyowoya za “mungelo munyake wa mankharo [wankhongono]” uyo “cisko cake cikaŵa nga ndi dazi.” Mwambura kukayika, mungelo uyu ni Yesu Khristu mu ucindami wake kucanya. (Civumbuzi 1:13, 16) Kasi Yesu ni mungelo nadi? Enya, Yesu nayo ni mungelo, cifukwa wakucemeka kuti mungelo mulara. (1 Ŵatesalonika 4:16) Yesu ndiyo ngwankhongono comene kuluska ŵana wose ŵauzimu ŵa Yehova. Yehova wamwimika kuŵa mulara wa ŵangelo Ŵake wose. Pakuti ni mungelo mulara, wali na nkhongono nadi kutovwira. Mu nthowa wuli?
9, 10. (a) Kasi Yesu wakuŵa wuli movwiri withu para tananga? (b) Kasi ciyelezgero ca Yesu cikutovwira wuli?
9 Mpositole mucekuru Yohane wakalemba kuti: “Usange munthu wakwananga, tili na nkhoswe [movwiri] kwa Ŵawiske, Yesu Khristu murunji.” (1 Yohane 2:1) Nchifukwa wuli Yohane wakati Yesu ni movwiri withu comene para ‘tananga’? Cifukwa tikunanga zuŵa lililose, ndipo njombe ya kwananga ni nyifwa. (Mupharazgi 7:20; Ŵaroma 6:23) Kweni Yesu wakatifwira kupeleka umoyo wake sembe ya zakwananga zithu. Ndipo wali pafupi na Ŵadada ŵithu ŵalusungu kuŵaŵeyelera mu malo mwa ise. Waliyose wa ise wakukhumbikwira wovwiri. Kasi tingazomera wuli wovwiri uwu? Tikwenera kulapa zakwananga zithu na kulomba cigowokero kwizira mu sembe ya Yesu. Kweniso tikwenera kuleka kucitaso zakwananga izo.
10 Padera pa kutifwira, Yesu wali kutilekera ciyelezgero ciwemi comene. (1 Petros 2:21) Ivyo wakacita vikutovwira kuti tigege zakwananga zikuru na kukondweska Yehova Ciuta. Kasi ndise ŵakukondwa yayi kuŵa na wovwiri uwu? Yesu wakalayizga ŵalondezgi ŵake kuti ŵazamupokera wovwiri unyake.
Wovwiri wa Mzimu Utuŵa
11, 12. Kasi mzimu wa Yehova ni vici, ngwankhongono wuli, ndipo nchifukwa wuli tikukhumbikwira mzimu uwu lero?
11 Yesu wakalayizga kuti: ‘Ine nditi ndilombenge Ŵadada, ndipo ŵati ŵamupani msanguluski [movwiri] munyake, kuti wakhalenge namwe mazuŵa ghose swi, ndiwo mzimu wa unenesko: weneuwo caru cilije kumanya kupokelera.’ (Yohane 14:16, 17) “Mzimu wa unenesko” uwu, panji mzimu utuŵa, ni munthu yayi kweni ni nkhongono iyo Yehova wakucitira vinthu. Ni nkhongono yambura cigoti. Ni nkhongono iyo Yehova wakalengera caru na vyose ivyo vilimo, kucitira minthondwe, na kuvumbura khumbo lake kwizira mu mboniwoni. Cifukwa cakuti Yehova wali kuleka kugwiliskira nchito mzimu wake mu nthowa izi mazuŵa ghano, kasi cikung’anamura kuti ulije nchito kwa ise?
12 Cara nadi! Mu “mazuŵa gha kuumaliro” agha apo tikukhala mu “nyengo zinonono,” mzimu wa Yehova ngwakukhumbikwa comene kuluska kale. (2 Timote 3:1) Ukutikhozga kuti tizizipizge viyezgo. Ukutovwira kuti tiŵe na mikhaliro yiwemi iyo yikutisendezgera kwa Yehova ndiposo ku ŵabali na ŵadumbu ŵithu ŵauzimu. (Ŵagalatiya 5:22, 23) Ipo kasi tingacita wuli kuti tipindure na wovwiri uwemi uwu wa Yehova?
13, 14. (a) Cifukwa wuli tingaŵa ŵakusimikizga kuti Yehova ngwakukhumbisiska kupeleka mzimu utuŵa ku ŵanthu ŵake? (b) Kasi ni vici ivyo vingalongora kuti tikuzomera na mtima wose yayi cawanangwa ca mzimu utuŵa?
13 Cakwamba, tikwenera kulomba kuti Ciuta watipe mzimu utuŵa. Yesu wakati: “Usange imwe, mwa ŵaheni, mukumanya kuŵapa ŵana ŵinu vyawanangwa viwemi, asi comene kwakuluska Ŵawiskemwe ŵa kucanya ŵati ŵaŵapenge mzimu utuŵa awo ŵakuŵalomba?” (Luka 11:13) Enya, Yehova ni Dada muwemi comene ndipo palije uyo tingamuyelezgera nayo. Usange tikumulomba mzimu utuŵa na cipulikano ndiposo kufumira pasi pa mtima, mbwenu watipenge nadi cawanangwa ici. Ipo fumbo ndakuti, Kasi tikulomba kuti Ciuta watipe mzimu utuŵa? Tikwenera kupempha mzimu utuŵa para tikulomba zuŵa lililose.
14 Caciŵiri, tikuzomera cawanangwa ici para tikulondezga ulongozgi wake. Tiyelezgere kuti Mkhristu wakukhumba kuleka kuwonelera vinthu vyakuwuska khumbo la kugonana. Walomba kuti mzimu utuŵa umovwire kuleka cizgoŵi ca ukazuzi ici. Walomba ulongozgi ku ŵalara ŵa Cikhristu ndipo ŵamuphalira kuti wacitepo kanthu. Wakwenera kuleka nanga nkhuluta kufupi na vinthu vyaukazuzi ivi. (Mateyu 5:29) Wuli usange wakana ulongozgi uwu na kulutilira kuwonelera vinthu ivi para wayezgeka? Kasi wakucita mwakuyana na ivyo wakulomba kuti mzimu utuŵa umovwire? Asi ndikuti wakulengeska citima mzimu utuŵa, na kutondeka kupokera cawanangwa ici? (Ŵaefeso 4:30) Enya, waliyose wa ise wakwenera kucita cilicose ico wangafiska kuti walutilire kupokera wovwiri uwemi uwu kwa Yehova.
Wovwiri wa Mazgu gha Ciuta
15. Kasi tingalongora wuli kuti tikuwona Baibolo mwakupepuka yayi?
15 Baibolo lawovwira ŵateŵeti ŵakugomezgeka ŵa Yehova vilimika vinandi. M’malo mwa kupepuska Baibolo, tikwenera kukumbuka kuti ndakovwira comene. Tikwenera kulimbikira comene kuti tizomere wovwiri uwu. Kuŵazga Baibolo cikwenera kuŵa cimoza mwa vinthu ivyo tikucita zuŵa lililose.
16, 17. (a) Kasi lemba la Salmo 1:2, 3 likulongosora wuli vyandulo vya kuŵazga dango la Ciuta? (b) Kasi lemba la Salmo 1:3 likulongora wuli kuti likuyowoya za kufwilirapo?
16 Pakuyowoya za munthu uyo wakukondweska Ciuta, lemba la Salmo 1:2, 3 likuti: ‘Mu dango la Yehova ndimo muli cimwemwe cake; ndipo mu dango lake wakulanguruka muhanya na usiku. Tiwakhalenge nga ndi khuni lakupandika mu milonga mumphepete, ilo likupambika vipambi vyake mu nyengo yake, ndipo hamba lake nalo kuti likufota cara; cose ico iye tiwacite cisakatenge.’ Kasi mwayiwona fundo iyo yili mu lemba ili? Nchipusu kuŵazga lemba ili na kuliwona nga likuyowoya waka za khuni la mfwiri uwemi lakumera mumphepete mwa mlonga. Tulo twa muhanya tunganowa nadi pa malo agha! Kweni lemba ili likukhumba kuti tighanaghane za kupumura yayi. Likuyowoya za cinthu cinyake, kufwilirapo. Mwauli?
17 Awonani kuti khuni ili likamerapo lekha yayi pafupi na mlonga. Ni khuni la vipasi ndipo likacita ‘kupandika’ pa malo ghakusankhika, ‘mumphepete mwa milonga.’ Kasi khuni limoza lingamera wuli mumphepete mwa milonga yinandi? Mu munda wa vipasi, munthu wangajima migelo kuti walongozgere maji ku misisi ya makuni gha vipasi. Ehe, sono fundo yamanyikwa! Usange tikukura makora mwauzimu nga ni khuni ili, nchifukwa cakuti munthu munyake wakufwilirapo kutovwira. Tili mu gulu ilo likutipa maji ghawemi gha unenesko, kweni nase tikwenera kucitapo kanthu. Tikwenera kumwa maji ghakuzirwa agha, kulanguruka, na kughasanda, kuti unenesko wa Mazgu gha Ciuta unjire mu maghanoghano na mtima withu. Para ticitenge nthena, mbwenu nase tipambikenge vipambi viwemi.
18. Kasi tikwenera kucitaci kuti tisange mazgoro gha mafumbo ghithu mu Baibolo?
18 Baibolo lingatovwira yayi usange tikuliŵika waka pa shelufu kwambura kuliŵazga. Nesi kulitora na kujura waka palipose kuti tisange zgoro. Para tikupenja ulongozgi pa ico tikukhumba kucita, tikwenera kujima kuti tisange ‘mahara gha Ciuta’ nga ni umo tingacitira para tikupenja usambazi wakubisika. (Zintharika 2:1-5) Tikwenera kufwilirapo kusanda kuti tisange ulongozgi wa mu Malemba uwo ungatovwira pa ivyo tikukhumba. Tili na mabuku ghanandi agho ghangatovwira pa kusanda. Para tikugwiliskira nchito mabuku agha kuti tijime vinjeru mu Mazgu gha Ciuta, ndikuti tikupindura nadi na wovwiri wa Yehova.
Wovwiri wa Ŵasopi Ŵanyithu
19. (a) Cifukwa wuli tikwenera kuwona nkhani zinyake za mu Gongwe la Mulinda na Galamukani! kuti ni wovwiri wakufuma ku ŵasopi ŵanyithu? (b) Kasi nkhani zinyake za mu magazini ghithu zamovwirani wuli?
19 Ŵateŵeti ŵa Yehova pa caru capasi ŵakovwirana kwambira kale. Kasi Yehova wasintha? Cara nadi. Kwambura kukayika, waliyose wa ise wangakumbukira apo wakapokera wovwiri uwo wakakhumbanga kufuma ku munyake. Mwaciyelezgero, kasi mungakumbukira nkhani zinyake za mu Gongwe la Mulinda panji Galamukani! izo zikamupembuzgani apo mukakhumbanga wovwiri panji zikamovwirani kumazga suzgo, na umo mungacitira apo cipulikano cinu cikayezgekanga? Yehova ndiyo wakamupani wovwiri uwu kwizira mwa “muzga wa magomezgeko na wa vinjeru” uyo wali kupika udindo wa kupeleka ‘vyakurya pa nyengo yakwenelera.’—Mateyu 24:45-47.
20. Kasi ŵalara Ŵacikhristu ni ‘vyawanangwa mu ŵanthu’ mu nthowa wuli?
20 Kweni kanandi wovwiri uwo tikupokera kufuma ku ŵasopi ŵanyithu ukuŵa wakudunjika. Mulara mu mpingo wangayowoya nkhani iyo yingaticontha mtima, panji wangaticezgera na kutikhwimiska mu nyengo yakusuzga. Kweniso wangatovwira kuwona na kunyololera ivyo tikuleka kucita makora. Pakuwonga wovwiri uwo mulara wakamupa, mudumbu munyake wakalemba kuti: “Apo tikaŵa mu uteŵeti wa m’munda, wakaniciska kuti niyowoye ivyo vikaŵa ku mtima wane. Usiku wa mayiro ghake nkhalomba Yehova kuti wanitumire munthu uyo ningayowoya nayo vyakusingo. Kukati kwaca, mbali uyu wakayowoya nane mwalusungu comene. Wakanovwira kuwona umo Yehova wanovwilira nyengo yitali. Nkhuwonga Yehova cifukwa ca kunitumira mulara uyu.” Mu nthowa zose izi, ŵalara Ŵacikhristu ŵakulongora kuti ni ‘vyawanangwa mu ŵanthu,’ ivyo Yehova wakutipa kwizira mwa Yesu Khristu kuti watovwire kuzizipizga pa nthowa yakuya ku umoyo.—Ŵaefeso 4:8.
21, 22. (a) Kasi nchivici ico cikucitika para ŵabali na ŵadumbu mu mpingo ŵakulondezga ulongozgi uwo wuli pa Ŵafilipi 2:4? (b) Nchifukwa wuli kucitira ŵanji nanga tungaŵa tunthu tucokotucoko nkhwakukhumbikwa?
21 Padera pa ŵalara, Mkhristu waliyose wakugomezgeka wakukhumba kupulikira languro lakuti waleke ‘kupwelelera vinthu vyake pera, kweni na vya ŵanyake wuwo.’ (Ŵafilipi 2:4) Para ŵabali na ŵadumbu mu mpingo ŵakulondezga ulongozgi uwu, ico cikucitika nchakuti ŵakovwirana mu nthowa zinandi. Mwaciyelezgero, mu mbumba yinyake mukacitika masuzgo ghanandi pa nyengo yimoza. Dada wakaluta ku sitoro na mwana wake msungwana. Pakuwera ŵakacita ngozi pa galimoto. Mwana wakafwa; ndipo dada wakapwetekeka comene. Wakati wafuma waka mu cipatala, wakatondekanga kucita cilicose. Muwoli wake wakaŵa na citima comene mwakuti wakatondeka kumupwelelera payekha. Ntheura mbumba yinyake mu mpingo yikatolera mbumba ya citima iyi ku nyumba yawo na kuyipwelelera kwa masabata ghanandi.
22 Ici cikung’anamura kuti tingawovwira ŵanyithu para ŵacita ngozi pera yayi, nesi kuŵacitira vinthu vikuru pera. Nyengo zinyake ŵanyithu ŵakutovwira mu tunthu tucokotucoko. Kweni kwali ŵanyithu ŵaticitire vinthu vicoko wuli, tikuwonga nipera, asi nthe? Kasi mungakumbuka apo mazgu ghakukhozga panji cinthu cinyake ciwemi ico mbali panji mudumbu wakacita cikaŵira cakovwira pa nyengo iyo? Kanandi ndimo Yehova wakutipwelelera nthena.—Zintharika 17:17; 18:24.
23. Kasi Yehova wakuwona wuli para tikuyezgayezga kovwira ŵanyithu?
23 Kasi mungatemwa kuti Yehova wamugwiliskireni nchito pakovwira ŵanji? Mwaŵi uwu ngwakujurika kwa imwe. Nakuti Yehova wakuwonga comene para mukuyezgayezga pa nkhani iyi. Mazgu Ghake ghakuti: “Mweneuyo wakufwira lusungu mukavu wakubwereka Yehova, ndipo Iye tiwawezgere ceneico wacita.” (Zintharika 19:17) Tikuŵa na cimwemwe cikuru para tikujipeleka kovwira ŵabali na ŵadumbu ŵithu. (Milimo 20:35) Awo ŵakujipatura ŵakuŵavya cimwemwe ico tikuŵa naco para tikovwira ŵanyithu nesi kukhozgeka na wovwiri uwo tikupokera ku ŵanyithu. (Zintharika 18:1) Mwantheura, tiyeni tisangikenge pa maungano Ghacikhristu nyengo zose mwakuti tikhozganenge.—Ŵahebere 10:24, 25.
24. Cifukwa wuli nchambura kwenelera kughanaghana kuti tikunoreka cinthu cinyake cifukwa cakuti tikuleka kuwona minthondwe iyo Yehova wakacitanga kale?
24 Kasi nchakukondweska yayi kughanaghanira nthowa izo Yehova wakutovwilira? Nangauli mazuŵa ghano Yehova wakucita minthondwe yayi pakufiska khumbo lake, kweni tileke kughanaghana kuti tikunoreka cinthu cinyake. Cakuzirwa nchakuti Yehova wakutipa cilicose ico cingatovwira kuti tilutilire kuŵa ŵakugomezgeka. Ndipo usange tose tikuzizipizga mu cipulikano, mbwenu tizamuwona milimo yakuzizwiska comene iyo yindacitikepo na kale! Tiyeni tizomere na mtima wose wovwiri wacitemwa uwo Yehova wakutipa mwakuti tikolerane na mazgu gha lemba la cilimika ca 2005 agho ghakuti: “Kovwirika kwane kukufuma kwa Yehova.”—Salmo 121:2.
Kasi Mukutipo Wuli?
Kasi Yehova wakutipa wuli wovwiri uwo tikukhumba mazuŵa ghano—
• kwizira mu ŵangelo?
• kwizira mwa mzimu utuŵa?
• kwizira mu Mazgu ghake?
• kwizira mwa ŵasopi ŵanyithu?
[Mafumbo]
[Cithuzithuzi pa peji 15]
Nchakukhozga kumanya kuti ŵangelo ŵakovwira pa mulimo wa kupharazga
[Cithuzithuzi pa peji 17]
Yehova wangatuma yumoza wa ŵasopi ŵanyithu kuti watipembuzge mwakuyana na suzgo ilo tili nalo