¿K-kʼamik wa u yáantaj Jéeoba?
¿K-kʼamik wa u yáantaj Jéeoba?
«Yuumtsil máax áantiken; maʼ tin chʼaʼik sajakil.» (TIʼ HEBREOB 13:6.)
1, 2. ¿Baʼaxten jach kʼaʼanan ka k-kʼam u yáantaj yéetel u nuʼuktaj Jéeoba?
KOʼONEʼEX tuklikeʼ táan k-xíimbal tiʼ upʼéel tʼoʼol bej tu kaʼanlil upʼéel nojoch puʼuk. Baʼaleʼ, maʼ t-juunal táan k-biniʼ, tiaʼan t-éetel le máax maas jach u kʼaj óol le bejoʼ, letiʼ aʼal jeʼel u láakʼintkoʼoneʼ. Kex maas jach u kʼaj óol le bej yéetel maas yaan u muukʼ tiʼ toʼoneʼ, maʼ tu pʼatkoʼon, ku páaʼtkoʼon. Maʼ u kʼáat ka úuchuktoʼon mix baʼaliʼ, yéetel tumen tsʼoʼok k-yáax lúubuleʼ ku tichʼiktoʼon u kʼab utiaʼal u yáantkoʼon k-máans u chan tʼoʼol tuʼux séeb jeʼel u yúuchultoʼon loobeʼ. ¿Jeʼel wa k-aʼalik maʼ k-kʼáat ka u yáantoʼoneʼ? Maʼatan, tumen maʼ k-kʼáat ka úuchuktoʼon loobiʼ.
2 Le bej xan k-bisikoʼ talam u xíimbaltaʼal. Baʼaleʼ, ¿t-juunal wa unaj k-xíimbaltik? (San Mateo 7:14.) Maʼ. Le Bibliaoʼ kiaʼalikeʼ Jéeoba Dios, le máax maas u kʼaj óol le bejaʼ, ku chaʼik k-xíimbal tu yéetel (Génesis 5:24; 6:9). ¿Ku yáantik wa Jéeoba máaxoʼob ku xíimbal tu yéetel? Letiʼeʼ ku yaʼalik: «[Teen Jéeobaeʼ] tsʼoʼok in machikech ta kʼab; teneʼ tin waʼalaj tiʼ teech: Maʼ a sajaktal, teen áantikech» (Isaías 41:13). Jeʼex le máak jach u kʼaj óol le bej t-aʼalaj tu káajbaloʼ, Jéeobaeʼ ku tsʼáaik u yáantaj yéetel ku amigotik le máaxoʼob u kʼáatoʼob xíimbal tu yéeteloʼ. ¿Máasaʼ mix máak tiʼ toʼon jeʼel u yaʼalik maʼ u kʼáat ka áantaʼak tumen letiʼeʼ?
3. ¿Baʼax kʼáatchiʼiloʼob ken k-núuk teʼ xookaʼ?
3 Teʼ xook máanikoʼ t-ilaj kampʼéel bix u yáantik Jéeoba u kaajal úuchi. ¿Láayliʼ wa xan bey u beetik bejlaʼeʼ? ¿Bix jeʼel k-ilik wa táan k-kʼamik le bix u yáantkoʼonoʼ? Koʼoneʼex núukik le kʼáatchiʼobaʼ, beyoʼ yaan k-maas kʼub óoltik u yáantaj Jéeoba (Tiʼ Hebreob 13:6).
U yáantaj le angeloʼoboʼ
4. ¿Bix k-ojéeltik táan k-áantaʼal tumen le angeloʼoboʼ?
4 Bejlaʼaʼ xaneʼ, ¿láayliʼ wa k-áantaʼal tumen le angeloʼoboʼ? Láayliʼeʼ, baʼaleʼ maʼ tu chíikbeskubaʼob utiaʼal u salvarkoʼonoʼob tiʼ wa baʼax loobil. Mix tak úuchil suuk u beetkoʼob beyoʼ. Óoliʼ tuláakal u téenel ka tu tsʼáajoʼob áantajeʼ, maʼ ilaʼaboʼobiʼ jeʼex maʼ tu yilaʼaloʼob bejlaʼoʼ. Baʼaleʼ, máaxoʼob meyajtik Dios úuchileʼ líikʼ u yóoloʼob tumen u yojloʼob táan u yáantaʼaloʼob tumen le angeloʼoboʼ (2 Reyes 6:14-17). Toʼon xaneʼ jeʼel u páajtal k-uʼuyikba beyoʼ.
5. Le Bibliaoʼ, ¿bix yeʼesik táan k-áantaʼal tumen le angeloʼob teʼ kʼaʼaytajoʼ?
5 Le angeloʼoboʼ jach u kʼáat u yáantoʼonoʼob tiʼ upʼéel meyaj tsʼaʼantoʼon k-beete. ¿Máakalmáak le meyajaʼ? Letiʼe meyaj kiaʼalik Apocalipsis 14:6: «Tin wilaj [...] uláakʼ ángel táan u xikʼnal chúumuk le kaʼanoʼ [yéetel] yaan [...] maʼalob péektsil [...] u tseʼekt tiʼ le máaxoʼob kajaʼanoʼob luʼumoʼ, tiʼ tuláakal múuchʼ kaajoʼob, jejeláas tʼaanoʼob, chʼiʼibaloʼob yéetel kaajoʼob». Le maʼalob péektsilaʼ yaan yil yéetel u maʼalob péektsilil le Reino tiaʼalaj Jesús «bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob» táanil tiʼ u xuʼulsaʼal le kʼasaʼan yóokʼol kaabaʼ (San Mateo 24:14). Jeʼex k-ojliloʼ, le angeloʼoboʼ maʼ tu yéemloʼob u bisoʼob le maʼalob péektsil tiʼ le máakoʼoboʼ; Jesuseʼ tiʼ wíinikoʼob tu pʼataj le meyajaʼ (San Mateo 28:19, 20). Baʼaleʼ, ¿maʼ wa tu líiʼsik k-óol ojéeltik ken jóoʼkoʼon kʼaʼaytajeʼ táan k-áantaʼal tumen le angeloʼob jach yaan u páajtaliloʼoboʼ?
6, 7. 1) ¿Baʼax eʼesik táan k-áantaʼal tumen le angeloʼob teʼ kʼaʼaytajoʼ? 2) ¿Baʼax unaj k-beetik utiaʼal k-kʼamik u yáantajoʼob?
6 Jach yaʼab baʼaxoʼob eʼesik táan k-áantaʼal tumen le angeloʼob teʼ meyajaʼ. Suuk k-uʼuyik u tsikbaltaʼal tumen k-sukuʼunoʼobeʼ, teʼ kʼaʼaytajoʼ tʼaanajoʼob yéetel utúul máak táan kaʼach u kʼáatik tiʼ Dios ka áantaʼak u kaxt u jaajil. Jach yaʼab u téenel ku yúuchul beyaʼ, le oʼolal ku yilaʼal yaan máax biskoʼon tu yiknaloʼob. Yoʼolal le áantaj ku tsʼáaik le angeloʼoboʼ, táan u maas yaʼabtal máaxoʼob beetik le baʼax ku yaʼalik le ángel ku xikʼnal tu chúumuk le kaʼanoʼ: «Chʼaʼex sajakil tiʼ Jajal Dios yéetel nojbeʼenkúunteʼex u kaabaʼ» (Apocalipsis 14:7).
7 ¿K-kʼáat wa ka áantaʼakoʼon tumen le angeloʼob jach yaan u páajtaliloʼobaʼ? Wa beyoʼ, koʼoneʼex tsʼáaik k-óol teʼ kʼaʼaytajoʼ (1 tiʼ Corintoiloʼob 15:58). Wa tu jaajil k-óol beetik le meyaj tsʼaʼantoʼon tumen Diosaʼ, jeʼel u páajtal k-kʼub óoltik yaan k-áantaʼal tumen le angeloʼoboʼ.
U yáantaj le arcangeloʼ
8. ¿Bukaʼaj páajtalil yaan tiʼ Jesús teʼ kaʼanoʼ, yéetel baʼaxten ku líiʼsik k-óol lelaʼ?
8 Jéeoba xaneʼ ku yáantkoʼon yéetel utúul ángel jelaʼan tiʼ u maasil. Apocalipsis 10:1 ku tʼaan tiʼ utúul «muʼukʼaʼan ángel», «u táan yicheʼ ku léembal bey kʼiineʼ». Le angelaʼ k-Yuum Jesucristo nojbeʼenkúuntaʼan yéetel páajtalil teʼ kaʼanoʼ (Apocalipsis 1:13, 16). Baʼaleʼ, ¿Jesuseʼ utúul ángel wa? Letiʼ, tumen letiʼeʼ arcángel, wa u nojchil le angeloʼoboʼ (1 tiʼ Tesalonicailoʼob 4:16). Jach beyoʼ, letiʼ u maas nojchil ichil tuláakal le angeloʼoboʼ yéetel letiʼ laaj nuʼuktik le millonesi angeloʼob yaan tiʼ Jéeobaoʼ, le oʼolaleʼ jach nojoch áantaj jeʼel u tsʼáaiktoʼoneʼ. ¿Bix u yáantkoʼon?
9, 10. 1) ¿Bix u yáantkoʼon Jesús ken siʼipilchajkoʼon? 2) ¿Bix u yáantkoʼon le bix kuxlajikoʼ?
9 Le apóstol Juanoʼ, tu tsʼíibtaj: «Wa yaan máax ku kʼebanchajaleʼ, yantoʼon juntúul máax ku tʼaan t-oʼolal tu táan le taataoʼ, lelaʼ Jesucristo» (1 San Juan 2:1). Juaneʼ, ¿baʼaxten tu yaʼalaj, wa k-kʼebanchajleʼ, Jesuseʼ «ku tʼaan t-oʼolal tu táan le taataoʼ»? Tumen tuláakloʼon sáamsamal k-siʼipilchajal, yéetel k-ojel le kʼebanoʼ ku taasik le kíimiloʼ (Eclesiastés 7:20; Tiʼ Romailoʼob 6:23). Baʼaleʼ, Jesuseʼ tu wekaj u kʼiʼikʼel utiaʼal u saʼasaʼal k-siʼipil yéetel táan u tʼaan t-oʼolal tu táan le k-Taata yaan teʼ kaʼan jach nojoch u chʼaʼaj óotsililoʼ. U jaajileʼ, tiʼ tuláakloʼon kʼaʼabéet ka tʼaanak t-oʼolal. ¿Bix k-eʼesik kʼamik u yáantaj? Ken yaachajak k-óol ken kʼebanchajkoʼon, ken k-kʼáat óolt ka saʼasaʼak k-siʼipil tu kʼaabaʼ yéetel ken k-il maʼ k-kaʼa lúubul tiʼ le kʼebanoʼ.
10 Jesuseʼ maʼ chéen kíim t-oʼolaliʼ, tu yeʼesaj xan bix kʼaʼabéet k-kuxtal (1 San Pedro 2:21). Le bix kuxlajikoʼ tu yeʼesaj bix kʼaʼabéet k-xíimbal utiaʼal maʼ k-lúubul tiʼ kʼeban yéetel utiaʼal k-kiʼimakkúuntik u yóol Jéeoba. ¿Máasaʼ kiʼimak k-óol ikil k-áantaʼal tumen Jesús? Letiʼ xaneʼ tu yaʼalaj yaan u tsʼaʼabal upʼéel baʼal jach yaan u yáantkoʼon.
U yáantaj le kiliʼich muukʼoʼ
11, 12. ¿Baʼax «u Pixanil le jaajoʼ», bukaʼaj u páajtalil, yéetel baʼaxten kʼaʼabéettoʼon?
11 Jesuseʼ tiaʼalaj: «Yaan in kʼáat óoltik tiʼ le Taataoʼ ka u túuxt [...] uláakʼ máax áantikeʼex yéetel u tsʼáaik a wóoleʼex, utiaʼal ka yanak mantatsʼ ta wéeteleʼex: u Pixanil le jaajoʼ» (San Juan 14:16, 17). «U Pixanil le jaajoʼ» maʼ utúul máakiʼ, u muukʼil u meyaj Jéeoba. Yéetel le jach nojoch muukʼaʼ, Dioseʼ tu beetaj tuláakal baʼal, tu beetaj jakʼ óolal baʼaloʼob yéetel tu beetaj u náaytaʼal baʼax ken u beete. Bejlaʼeʼ tsʼoʼok maʼ tu beetik baʼaloʼob beyaʼ. ¿U kʼáat wa túun u yaʼal maʼ kʼaʼabéettoʼon u kiliʼich muukʼiʼ?
12 Maʼatech. Teʼ «talam kʼiinoʼob[aʼ]» maas jach kʼaʼabéetoʼon (2 tiʼ Timoteo 3:1). Ku tsʼáaiktoʼon u muukʼil utiaʼal k-aktáantik le talamiloʼoboʼ yéetel ku yáantkoʼon k-eʼes le jatsʼuts modos ku maas natsʼkoʼon tiʼ Dios yéetel tiʼ k-sukuʼunoʼoboʼ (Tiʼ Galaciailoʼob 5:22, 23). ¿Bix jeʼel k-jóoʼsik utsil tiʼ le jach nojoch áantajaʼ?
13, 14. 1) ¿Bix k-ojéeltik Jéeobaeʼ ku tsʼáaik u kiliʼich muukʼ tiʼ u kaajal? 2) ¿Bix jeʼel k-eʼesik maʼ táan k-kʼamik u yáantaj le kiliʼich muukʼoʼ?
13 Yáaxeʼ kʼaʼabéet k-kʼáatik. Jesuseʼ tiaʼalaj: «Wa teʼex, kex kʼaakʼas máakeʼex, a wojel a tsʼaʼex maʼalob baʼaloʼob tiʼ a paalaleʼexeʼ, jach tu jaajil a Taataʼex yaan teʼ j-kaʼanoʼ bíin u tsʼáa le Kiliʼich Pixan tiʼ le máaxoʼob kʼáatik tiʼeʼ» (San Lucas 11:13). Minaʼan uláakʼ maas utsul taatatsil tiʼ Jéeoba. Wa k-kʼáat óoltik ka u tsʼáatoʼon u kiliʼich muukʼeʼ, maʼ tu yaʼalik maʼ u tsʼáaiktoʼon. Baʼaleʼ, ¿k-kʼáatik wa ka u tsʼáatoʼon? Maʼalob ka k-kʼáat sáamsamal.
14 U kaʼapʼéeleʼ, kʼaʼabéet kʼamik u yáantaj le kiliʼich muukʼoʼ; utiaʼal lelaʼ kʼaʼabéet k-chʼaʼik u nuʼuktikoʼon. Koʼoneʼex tuklikeʼ utúul sukuʼuneʼ ku taaktal u yilik chaknuulil (pornografía) yéetel tsʼoʼok u kʼáatik tiʼ Jéeoba ka tsʼaʼabak u muukʼil tiʼ utiaʼal maʼ u taaktal yilik le kʼaakʼas baʼalaʼ. Tsʼoʼok xan u kʼáatik áantaj tiʼe nuxiboʼoboʼ; letiʼob túuneʼ tsʼoʼok u yaʼalkoʼob tiʼeʼ mix tak u náatsʼal tiʼ baʼax jeʼel u beetik u tsʼíiboltik yilkeʼ (San Mateo 5:29). Baʼaleʼ ¿kux túun wa maʼ tu beetik le baʼax aʼalaʼabtiʼoʼ? ¿Táan wa u yeʼesik u kʼáat ka muʼukʼankúunsaʼak tumen le kiliʼich muukʼoʼ? ¿Máasaʼ maʼ? Baʼaxeʼ, táan u tsʼáaikuba tu contra u nuʼuktaj yéetel jeʼel u xuʼulul u yáantaʼaleʼ (Tiʼ Efesoiloʼob 4:30.) Tuláakloʼon kʼaʼabéet k-beetik tuláakal le ku páajtal utiaʼal maʼ u jáawal k-kʼamik le nojoch áantaj ku tsʼáaiktoʼon Jéeobaaʼ.
U yáantaj u Tʼaan Dios
15. ¿Bix jeʼel k-eʼesik maʼ t-ilik le Biblia chéen bey jeʼel baʼalak libroileʼ?
15 Úuchil tak bejlaʼeʼ, le Bibliaoʼ tsʼoʼok u yáantik le máaxoʼob meyajtik Jéeobaoʼ. Maʼ unaj k-ilik chéen bey jeʼel baʼalak libroileʼ, kʼaʼabéet k-ilik bey upʼéel baʼal jach yaan u muukʼ utiaʼal u yáantkoʼoneʼ. Baʼaleʼ, kʼaʼabéet k-kaxtik u yáantaj. Kʼaʼabéet u suuktal k-xokik sáamsamal.
16, 17. 1) Le Salmo 1:2, 3, ¿bix u yeʼesik ku taasik utsil u xokaʼal u ley Dios? 2) Le Salmo 1:3, ¿baʼaxten k-aʼalik táan u tʼaan tiʼ meyaj?
16 Le Salmo 1:2, 3 kiaʼalik yoʼolal máax meyajtik Dios: «Baʼaleʼ u yaabilajeʼ tiʼ u tsʼaamaj tiʼ u [ley] Yuumtsileʼ, ku tsʼáaik xan [tu] tuukul bul kʼiin, yéetel bul áakʼab. Le máax beetik beyoʼ, u kuxtaleʼ bey junkúul cheʼ pakʼaʼan tu jáal tuʼux ku yáalkab jaʼ ku tsʼáaik u yich tu kʼiinil, maʼatech xan [u] kʼankʼantal u leʼob. ¡Tuláakal baʼax ku beetikeʼ ku jóokʼol utsil tiʼ!».¿Baʼax u kʼáat u yeʼes le tʼaanoʼobaʼ? Ken k-xokeʼ, séeb u taal t-tuukul upʼéel baʼal jach jatsʼuts: u kúul cheʼ ku tsʼáaik boʼoy tiaʼan tu jáal upʼéel rioeʼ. ¡Jach u kúuchil utiaʼal u jeʼelskuba máak ken tsʼoʼokok upʼéel janal! Baʼaleʼ le salmoaʼ maʼ u kʼáat yaʼal ka jeʼelkoʼoniʼ, táan u tʼaan tiʼ meyaj. ¿Baʼaxten k-aʼalik lelaʼ?
17 Teʼelaʼ maʼ táan u tʼaan tiʼ u kúul cheʼ chéen bey jóokʼik tu jáal upʼéel rioeʼ, táan u tʼaan tiʼ u kúul cheʼ «pakʼaʼan tu jáal tuʼux ku yáalkab jaʼ». Tiʼ upʼéel parcelaeʼ, maʼ xaneʼ u yuumileʼ ku potik u beeliloʼob tuʼux kun áalkab le jaʼ utiaʼal u jóoyabtik le cheʼob u pakʼmoʼ. ¡Aj, beoraaʼ tsʼoʼok k-naʼatik! Wa k-ichankil jeʼex le cheʼaʼ, lelaʼ ku béeytal yoʼolal tuláakal le meyaj ku beetaʼal t-oʼolaloʼ. Tiaʼanoʼon ich upʼéel kaajal ku beetik u kʼuchul tak t-iknal le maʼalob kaʼansaj ku keʼetel yéetel le jaʼoʼ. Baʼaleʼ yaan xan baʼax kʼaʼabéet k-beetik. Jeʼex u moots le cheʼoʼ, toʼon xaneʼ kʼaʼabéet k-tsʼuʼutsʼik le maʼalob jaʼaʼ. ¿Bix jeʼel k-beetikeʼ? Utiaʼal lelaʼ kʼaʼabéet k-xakʼalxoktik le Bibliaoʼ, yéetel k-tuklik baʼax ku kaʼansiktoʼon, utiaʼal ka kʼuchuk tak t-puksiʼikʼal. Beyoʼ yaan k-tsʼáaik yaʼab ich.
18. ¿Baʼax unaj k-beetik utiaʼal k-kaxtik teʼ Biblia u núukil k-kʼáat chiʼob?
18 Maʼ t-jóoʼsik utsil tiʼ le Biblia wa chéen k-líiʼsmajoʼ. Mix xan unaj k-ilik jeʼex le máakoʼob ku mutsʼik u yichoʼob, tsʼoʼoleʼ ku jeʼekʼabtikoʼob jeʼel tuʼuxak utiaʼal u kaxtik u núukil u kʼáatchiʼobeʼ. Ken k-chʼaʼatukult k-beetik wa baʼaxeʼ, kʼaʼabéet jach k-ilik kaxtik teʼ Biblia baʼax u kʼáat Dios ka k-beetoʼ, jeʼel bix u kaxtaʼal taakʼin taʼakaʼaneʼ (Proverbios 2:1-5). Yaʼab u téeneleʼ kʼaʼabéet jach k-xakʼalxoktik le Biblia utiaʼal k-kaxtik baʼax nuʼuktajil ku tsʼáaik utiaʼal le talamil k-máanskoʼ. Yantoʼon yaʼab jóoʼsaʼaniloʼob jeʼel u yáantkoʼoneʼ. Wa ku meyajtoʼon utiaʼal k-kaxtik le maʼalob kaʼansajoʼob yaan teʼ Biblia ku keʼetloʼob yéetel oro bey xan yéetel plataeʼ, yaan k-jóoʼsik utsil tiʼ le áantaj ku tsʼáaiktoʼon Diosoʼ.
U yáantaj k-sukuʼunoʼob
19. 1) Le baʼax k-xokik teʼ revistaʼoboʼ, ¿baʼaxten unaj k-ilik bey upʼéel áantaj ku tsʼaʼabaltoʼon tumen k-sukuʼunoʼobeʼ? 2) Bix tsʼoʼok u yáantkech le baʼax ka xokik teʼ revistaʼoboʼ.
19 Jéeobaeʼ tsʼoʼok xan u péeksik le wíinikoʼob meyajtikoʼ utiaʼal ka u tsʼaʼob áantaj tiʼ u yéet sukuʼuniloʼob. ¿Láayliʼ wa bey u beetik bejlaʼeʼ? Láayliʼeʼ. Maʼ xaaneʼ, tuláakloʼon kʼajaʼantoʼon bix úuchik k-áantaʼal tumen k-sukuʼunoʼob tu yorai jach kʼaʼabéettoʼon. Maʼ xaneʼ, kʼajaʼantoʼon upʼéel u xookil U Pʼíich Tulumil Kanan wa ¡Despertad! tu líiʼsaj k-óol, tu yáantoʼon k-utskíint upʼéel talamil wa tu tsʼáajtoʼon u muukʼil utiaʼal u chúukpajal k-óol tu táan upʼéel muʼyaj. Le áantajaʼ, Dios beet u tsʼaʼabaltoʼon tumen le «palitsil chúukpajaʼan u yóol yéetel yaan u naʼat[oʼ]»; le palitsilaʼ tsʼaʼan utiaʼal «u tsʼáa [le] janal» jach «tu yorailoʼ» (San Mateo 24:45-47).
20. Le nuxiboʼoboʼ, ¿bix u yeʼeskoʼob beyoʼob «siibaloʼob[eʼ]»?
20 Baʼaleʼ le áantajaʼ maases letiʼe sukuʼunoʼob tsʼáaiktoʼonoʼ. Maʼ xaaneʼ utúul nuxibeʼ ku máansik upʼéel tseʼek ku líiʼsik k-óol, ku xíimbaltkoʼon utiaʼal u tsʼáaiktoʼon u muukʼil utiaʼal u chúukpajal k-óol aktáant upʼéel talamil wa utiaʼal u yaʼaliktoʼon baʼax unaj k-beetik utiaʼal k-pʼatik upʼéel baʼax maʼ maʼalob táan k-beetkiʼ. Utúul kiikeʼ, tumen jach kiʼimak u yóol yoʼolal le áantaj tsʼaʼab tiʼ tumen utúul nuxiboʼ, tiaʼalaj: «Le táan k-kʼaʼaytajoʼ tu beetajten kʼáatchiʼob yéetel tu chaʼaj in tsikbaltik baʼax kin wuʼuyik. U áakʼabil táanil tiʼ le kʼiin jeʼeloʼ tin kʼáataj tiʼ Jéeoba ka u túuxten utúul máax tiʼ in tsikbaltik baʼax kin wuʼuyik, jach tuláakʼ kʼiin túunoʼ le sukuʼunaʼ jach tu líiʼsaj in wóol. Tu beetaj in wilkeʼ, Jéeobaeʼ jach úuch joʼopʼok u yáantken. Jach kin tsʼáaik nib óolal tiʼ Jéeoba úuchik u túuxtik le sukuʼun áantkenaʼ». Le nuxiboʼoboʼ ken u tsʼaʼob áantajeʼ táan u yeʼeskoʼob bey «siibaloʼob» tsʼaʼan tumen Jéeoba yéetel Cristo utiaʼal u yáantkoʼonoʼob k-xíimbalt u bejil le kuxtaloʼ (Tiʼ Efesoiloʼob 4:8).
21, 22. 1) Wa k-beetik baʼax kiaʼalik Tiʼ Filiposiloʼob 2:4, ¿baʼax ken k-il eʼesik? 2) ¿Baʼaxten maʼalob ka k-eʼes utsil kex maʼ nojoch baʼax ka k-beetiʼ?
21 Kex wa maʼ nuxibeʼ, utúul cristianoeʼ maʼ unaj u kaxtik «chéen le baʼaloʼob utiaʼal u yutsil tu juunaloʼ, baʼaleʼ [...] u yutsil xan le uláakʼoʼoboʼ» (Tiʼ Filiposiloʼob 2:4). Wa tuláakloʼon k-beetkeʼex beyaʼ, yaan k-ilik eʼesik utsil tiʼ k-éet sukuʼunoʼob. Upʼéel familiaeʼ máan tiʼ upʼéel nojoch yajil. Le taatatsil yéetel u ijaoʼ úuch loob tiʼob yéetel u cocheʼob táan u suutbaloʼob tiʼ u maanoʼob; le ijatsiloʼ kíimi yéetel le taatatsiloʼ jach úuch loob tiʼ. Ka jóokʼ teʼ ospitaloʼ, jach yaj yanik kachi, istikiaj tak u péek. Tumen jach lubaʼan u yóol u yataneʼ, maʼ páajchaj u kanáantaʼaliʼ. Baʼaleʼ utúul sukuʼun yéetel u yataneʼ tu kʼamoʼob le sukuʼunoʼob tu yotochoʼobaʼ, ka tu kanáantoʼob yaʼab semanaʼob.
22 Baʼaleʼ, le utsiloʼ maʼ chéen ku yeʼesaʼal ken úuchuk nojoch looboʼobiʼ yéetel yaan oraeʼ maʼ yaʼab baʼax kʼaʼabéet utiaʼal u yeʼesaʼaliʼ. Yaan kʼiineʼ maʼ sen nojoch baʼal ku beetaʼal t-oʼolaliʼ baʼaleʼ, ¿máasaʼ jach k-tsʼáaik nib óolal tu yoʼolal? ¿Ku taal wa t-tuukul bix líiʼsaʼabik k-óol yoʼolal baʼax aʼalaʼabtoʼon wa yoʼolal baʼax tu beetaj k-sukuʼunoʼob t-oʼolal jach tu yorai kʼaʼabéettoʼon? Lelaʼ upʼéel bix u yáantkoʼon Jéeoba (Proverbios 17:17; 18:24).
23. ¿Bix u yilik Jéeoba le baʼaxoʼob k-beetik utiaʼal k-paklan áantikbaʼexoʼ?
23 ¿K-kʼáat wa ka meyajnakoʼon tiʼ Jéeoba utiaʼal u tsʼáaik áantaj tiʼ u maasil? Tuláakloʼon jeʼel u páajtal k-áantajeʼ. Yéetel Jéeobaeʼ jach nojoch baʼal u yilik k-áantik u maasil. U Tʼaaneʼ kiaʼalik: «Tsʼáa majnil tiʼ óotsileʼ, tiʼ Yuumtsil ku tsʼaʼabal. Yuumtsil xan bíin u boʼote» (Proverbios 19:17). K-xupikba yoʼolal k-sukuʼunoʼobeʼ jach ku taasik kiʼimak óolal (Beetaʼanoʼob 20:35). Wa k-náachkuntikba tiʼ letiʼobeʼ maʼ ken k-kʼam le kiʼimak óolal ku taal tiʼ u meyajtaʼal u maasiloʼ mix ken k-kʼam le kiʼimak óolal ku taal tiʼ u líiʼsaʼal u yóol máakoʼ (Proverbios 18:1, NM). Le oʼolaleʼ, maʼ u jáawal k-muchʼikbaʼex utiaʼal k-paklan líiʼsik óoleʼex (Tiʼ Hebreob 10:24, 25).
24. Kex Jéeoba maʼ tu beetik jakʼ óolal baʼaloʼob bejlaʼeʼ, ¿baʼaxten maʼ kʼaʼabéet k-tuklik u pʼatmoʼoniʼ?
24 Jach kiʼimak k-óol ikil k-áantaʼal tumen Jéeoba. Kex bejlaʼa maʼ tu beetik jakʼ óolal baʼaloʼob utiaʼal u kanáantkoʼoneʼ, baʼaleʼ maʼ u kʼáat yaʼal wa u pʼatmoʼoniʼ. Kex maʼ tu beetik jakʼ óolal baʼaloʼobeʼ, táan u yáantkoʼon utiaʼal u chúukpajal k-óol. Wa ku chúukpajal k-óol meyajteʼ yaan k-ilik jakʼ óolal baʼaloʼob maas nojochtak tiʼ le tsʼoʼok u beetkoʼ. Koʼoneʼex túun kʼamik yéetel koʼoneʼex ilik jóoʼsik utsil tiʼ tuláakal le áantaj ku tsʼáaiktoʼon Diosoʼ, beyoʼ yaan k-aʼalik jeʼex le teksto utiaʼal u jaʼabil 2005: «In wáantajeʼ tiʼ Jéeoba u taal» (Salmo 121:2, NM).
¿Bix jeʼel a núukikeʼ?
Bejlaʼeʼ, ¿bix u yáantkoʼon Jéeoba yéetel...
• ... u angeloʼob?
• ... u kiliʼich muukʼ?
• ... le Bibliaoʼ?
• ... le máaxoʼob meyajtikoʼ?
[U kʼáatchiʼiloʼob le xookoʼ]