Ubushiku bwa Kupwisha Isukulu—Ubushiku Ubwaweme nga Nshi

“LELO nabuca bwino sana. Akasuba nakabalika. Umuulu naucelebuka. Icani nacifunda bwino. Ne fyuni fileimba inyimbo. Twalaipakisha buno bushiku busuma nga nshi pali cino cifulo cayemba, kabili ifintu fyalaba fye bwino. Pantu Yehova te Lesa uulekelesha abantu bakwe. Lelo ni Lesa uupaala abantu bakwe.”

Munyinefwe Samuel Herd, uwaba mwi Bumba Litungulula ilya Nte sha kwa Yehova, e walandile aya mashiwi ilyo aiswilile programu wa bushiku bwa kupwisha isukulu ilyalenga 117 ilya Watchtower Bible School of Gilead. Ici cacitike pa September 11, 2004. Muli uyu programu wawama mwali ukufunda kusuma ukwa mu Baibolo pamo ne fya kukumanya fya basambi ne fya bamunyinefwe ababomba bumishonari pa nshita ntali. Ca cine, bulya bwali bushiku busuma kuli bonse abasangilweko abali 6,974. Uyu programu abelele ku Patterson pa Watchtower Educational Center, mu New York. Na bekala ku Brooklyn na ku Wallkill, na bo balitambileko ulya programu pa TV.

Amashiwi ya Kukoselesha Abasambi

BaJohn Kikot, ababa muli Komiti wa Musambo uwa mu United States balandile amashiwi ya kukoselesha mu lyashi bapeele ilyaletila “Twalilileni Ukusekelela Muli Bumishonari.” Balandile ukuti abasambi be sukulu lya Gileadi baishibikwa ukuti bantu aba nsansa, nga fintu cali pali bulya bwine bushiku ubwa kupwisha isukulu. Amasambililo ayashimpilwe pa Malembo pa lwa mibombele ayo bafundilwe ilyo bali mu sukulu yalengele abasambi ukusekelela, kabili bali-iteyenye ukwafwa bambi na bo ukulasekelela. Bushe bali no kulacita shani ifyo? Ni pa kuipeelesha muli bumishonari bwabo. Yesu atile: “Mwaba insansa ishingi mu kupeela ukucila ishaba mu kupokelela.” (Imilimo 20:35) Ilyo balepashanya bukapekape bwa kwa Yehova, “Lesa wa nsansa,” uupeela bambi icine, bamishonari bapya bakatwalilila ukulasekelela.—1 Timote 1:11.

Umbi uwakonkelepo ni Munyinefwe David Splane uwa mwi Bumba Litungulula, kabili alandile ilyashi lyaleti: “Bushe Mukalabomba Shani na Bantu Mukasanga?” Tatuletwishika ukuti caliwama kabili ca nsansa ukwikala pamo mu kwikatana, nangu ici nalimo kuti cakabila ukuba “fyonse ku ba misango yonse.” (1 Abena Korinti 9:22; Amalumbo 133:1) Munyinefwe Splane alandile ukuti abasambi abapwishishe isukulu bakalabombela pamo na bantu balekanalekana mu mulimo wabo—e kutila abantu ba mu fifulo bakalashimikilamo, bamishonari banabo, bamunyina ne nkashi mu filonganino bakabamo, e lyo na ba pa maofeshi ya misambo abatungulula umulimo wa kushimikila no kusambilisha. Kabili alandile na pa nshila shisuma ishingabomba bwino pa kumfwana na bantu balekanalekana mu nshila yawamisha, ilyo atile: Mukasambilile ululimi balanda, mukaleitemenwa ukukonka intambi shabo ishisuma, mwikalapumfyanya bamishonari banenu, kabili mukaleumfwila abakalamutungulula.—AbaHebere 13:17.

Abakonkelepo ni baLawrence Bowen bakafundisha ba mwi  sukulu lya Gileadi kabili balandile ilyashi lyaleti: “Bushe Mutontonkanya Ifya kwa Lesa?” Bacinkwileko abasambi ukuti ‘abapingula abantu ukulingana ne fyo balemoneka’ tabasumina ukuti Yesu e Mesia. (Yohane 7:24) Apo bonse tatwapwililika tulingile ukuibaka ku ‘kutontonkanya ifya bantu,’ ukucila ‘ukulatontonkanya ifya kwa Lesa.’ (Mateo 16:22, 23) Nangu fye bantu bapoosa amano ku fya ku mupashi bafwile ukutwalilila ukwalula amatontonkanyo yabo. Nge ngalaba iili pali bemba, ukwalula amatontonkanyo nomba kuti kwalenga mwafishapo ubuyo bwenu nelyo ukubunsha bumupashi bwenu. Ukulabelenga Baibolo yonse kuti kwatwafwa ‘ukulatontonkanya ifya kwa Lesa.’

Munyinefwe Wallace Liverance, kafundisha na umbi mwi Sukulu lya Gileadi, e wasondwelele uyu programu. Umutwe wa lyashi lyakwe wafumine pali Esaya 55:1, kabili waleti “Finshi Mukashita?” Munyinefwe Liverance akoseleshe abasambi ‘ukushita’ ifya kulya ne fya kunwa, no kusekelela ifyaba mu bukombe bwa kusesema ubwa kwa Lesa ku ba muno nshiku. Ukusesema kwa kwa Esaya kwalingenye icebo ca kwa Lesa ku menshi, ku mwangashi, na ku mukaka. Bushe kuti cashitwa shani ‘apabula silfere kabili apabula umutengo’? Munyinefwe Liverance alondolwele ati kupitila mu kupoosa amano ku kusesema kwa mu Baibolo, ukuleka amatontonkanyo ne nshila shabipa, no kuba na matontonkanyo ya kwa Lesa  no kulaenda mu nshila shakwe. (Esaya 55:2, 3, 6, 7) Nga balecita ifi, bamishonari bapya kuti bakoshiwa ilyo balebombela mu fyalo fimbi. Ilingi line abantu bashapwililika bamona kwati insansa shibako nga ca kuti umo abombesha no kulaikala imikalile ya bwanalale. Kalanda abakonkomeshe ati: “Imwe mwikashite fyo. Mwikasumina ukucite ca musango yo. Mukapoose amano ku kubelenga no kumfwikisha Icebo ca kusesema ica kwa Lesa. Icebo ca kwa Lesa kuti camwikusha, ukumukosha, no kumulenga ukusekelela ilyo mulebomba umulimo wenu uwa bumishonari.”

Ukwipusha Abasambi no Kumfwa Ifya Kukumanya Fyabo Ifisuma

Abasambi baleya lyonse mu kushimikila. Munyinefwe Mark Noumair, kafundisha na umbi mwi Sukulu lya Gileadi, e walanshenye na basambi bamo aba mwi kalasi, kabili abasambi abengi balicitile ne filangililo ukubomfya ifya kukumanya fyabo ifyalekomaila pa mutwe waleti “Abashaba na Nsoni ku Mbila Nsuma.” (Abena Roma 1:16) Abali mwi bumba balitemenwe nga nshi ukukutika ku fyo aba bakasabankanya babelesha baleshimikila abantu ku ng’anda ne ng’anda, mu misebo, na mu matuuka. Abasambi bambi abaishibe ukulanda indimi shimbi balibombeshe ukushimikila ku bantu balelanda shilya ndimi abali mu fifulo baleshimikilamo. Bambi babomfeshe bwino impapulo shilanda pali Baibolo ishasabankanishiwa ne Nte sha kwa Yehova mu kucita ifipempu fya kubwelelamo na pa kutendeka amasambililo ya Baibolo aya pa ng’anda. Cine cine, ‘tabali na nsoni’ sha kushimikila abantu imbila nsuma.

Munyinefwe William Nonkes, uwasontwa ukubombela ku Dipatimenti wa Mulimo, alanshenye na bamishonari babelesha ababombela ku Burkina Faso, ku Latvia, na ku Russia. Aba bamishonari balandile ifyebo fya kupanda amano mwi lyashi lyakwete umutwe waleti “Yehova Alalambula Aba Cishinka Kuli Wene.” Mishonari umo akoseleshe abasambi ukulaibukisha abashilika 300 abali na Gideone. Umushilika umo na umo alibombele umulimo uwalengele ukuti Gideone acimfye. (Abapingushi 7:19-21) Cimo cine e cicitika na kuli bamishonari abatwalilila ukubomba umulimo wabo. Na bo bene balalambulwa.

Munyinefwe Samuel Roberson, kafundisha wa pa Patterson, e walandile ilyashi lya kulanshanya ilyakonkelepo ilyaleti “Beni Fyonse ku Bantu ba Misango Yonse.” Alanshenye na Bamunyinefwe bane ababa muli Bakomiti ba Misambo aba ku Senegal, Guam, Liberia, na Madagascar. Bamishonari 170 e babombela muli ifi fyalo fine. Abasambi bapwile isukulu balisambilileko kuli aba Bamunyinefwe ilyo balondolwele ifyo Bakomiti ba Misambo bafwa bamishonari abapya ukwishiba apa kutendekela ukubomba umulimo wabo. Ilingi line ici cisanshamo ukusambilila intambi isho abena Bulaya na bena Amerika bengamona ukuti tashalinga. Ku ca kumwenako, mu fyalo fimo caliseeka ukumona bacibusa abaume beka beka, kumo fye na baba mu filonganino fya Bwina Kristu, ukwikatana ilyo bale-enda. Mu fifulo fimo ifitungululwa no musambo wa ku Guam, balapekanya ifya kulya ifyo aba mu fyalo ifingi bashilya. Na lyo line, bamo balibelesha ukukonke intambi sha musango yu, kanshi na bamishonari abapya na bo bene kuti babelesha.

BaGuy Pierce, ababa mwi Bumba Litungulula balandile pa mutwe waleti “Twalilileni Ukuba Aba Cishinka ‘ku Bufumu bwa kwa Shikulwifwe.’” Bacinkwileko abalekutika ukuti: “Kwaliba umulandu Yehova abumbile ifintu. Alishibe ico abumbile ifintu fyonse. Ukufwaya kwakwe kwi sonde lino takwayaluka. Kulaya kulefishiwapo ukwabulo kupumfyanishiwa. Takuli nangu cimo icingalesha ici ukucitika.” (Ukutendeka 1:28) Munyinefwe Pierce akoseleshe bonse ukuinashisha kuli bumulopwe bwa kwa Lesa te mulandu na mafya yabako pa mulandu wa lubembu lwa muntu wa kubalilapo, Adamu. Munyinefwe Pierce akonkomeshe ukuti: “Tuleikala mu nshita ya bupingushi. Tukwete fye inshita inono iyo tulingile ukwafwa abantu ba mitima yalungama ukwishiba icine. Bomfyeni bwino iyi nshita ku kubila imbila nsuma ya Bufumu kuli bambi.” Bonse abatungilila Ubufumu bwa kwa Lesa muli bucishinka kuti bashintilila pa kwafwa Kwakwe.—Amalumbo 18:25.

Mu fyebo fya kulekelesha ceyamani abelengele amakalata ya mitende na mashiwi ya kukoselesha abasambi ayafumine mu misambo yalekanalekana. Lyena apeele badiploma ku basambi bapwile isukulu, kabili umo pa basambi abelengele kalata balembele umo batashishe sana pa masambililo basambilile. Mwandini filya fyebo fyalilingile ukuba insondwelelo ya ulya programu uwawama nga nshi uo bonse abaliko bakalaibukisha!

[Akabokoshi pe bula 23]

UKULONGANIKA IFIPENDO FYA BALI MU KALASI

Bafumine mu fyalo: 11

Bakayabombela mu fyalo: 22

Abasambi bonse pamo bali: 48

Imyaka ya kufyalwa nga kwakanya pali umo: 34.8

Imyaka baba mu cine nga kwakanya pali umo: 18.3

Imyaka babomba mu mulimo wa nshita yonse nga

kwakanya pali umo: 13.4

[Icikope pe bula 24]

Ikalasi Lyalenga 117 Lyapwisha Isukulu lya Baibolo Ilya Gileadi Ilya Watchtower

Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.