Dei Blong Karem Setifiket​—Wan Naesfala Dei

“GOD i blesem yumi tede. San i saen. Skae i blu. Gras i grin gud. Ol pijin oli stap singsing. Olgeta samting ya oli mekem we dei ya tede i naes tumas, mo bambae yumi no save sore from. Jeova i no wan God we i mekem tingting blong man i foldaon. Hem i wan God we i givim blesing.”

Hemia fastok blong Brata Samuel Herd, wan memba blong Hed Kampani blong ol Witnes blong Jeova. Hem i statem miting ya we i blong givimaot setifiket long klas namba 117 blong Wajtaoa Baebol Skul blong Gilead. Hemia long Septemba 11, 2004. Long program blong miting ya oli givim sam gudfala advaes we i kamaot long Baebol, oli tokbaot stori blong olgeta we oli joen long skul ya, mo oli tokbaot stori blong samfala misinari we oli bin mekem wok ya longtaem. Yes, hemia wan naesfala dei blong olgeta 6,974 man we oli kam wanples long Watchtower Educational Center long Patterson, New York, mo long sam haos long Brooklyn mo Wallkill. Olgeta ya oli save lesin long ol toktok ya tru long maekrofon mo vidio.

Sam Toktok We i Go Long Ol Studen Blong Leftemap Tingting Blong Olgeta

John Kikot, we hem i memba blong Branj Komiti blong Yunaeted Stet i leftemap tingting blong ol misinari ya long tok blong hem se, “Holem Glad Long Wok Blong Misinari.” Hem i talem se plante brata sista oli tingbaot ol studen blong Gilead olsem ol man mo woman we oli hapi, mo hemia samting we oli luk tu long ol studen blong klas ya. Ol advaes blong Baebol we ol studen oli kasem long kos ya i mekem olgeta oli glad bigwan, mo naoia oli naf blong halpem ol narafala blong kasem glad ya tu. ?Oli save mekem samting ya olsem wanem? Oli mekem olsem, taem oli givim taem blong olgeta long wok blong misinari. Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Taem ol niufala misinari oli folem fasin blong Jeova God, we i stap “harem gud oltaem,” mo we i stap givim trutok long ol man, bambae oli save holem glad ya we oli kasem.​—1 Timoti 1:11.

Nekiswan brata we i givim tok long program hemia David Splane, wan memba blong Hed Kampani. Tok blong hem, hemia “?Bambae Yu Yu Joengud Wetem Ol Narafala?” Yumi glad mo yumi harem gud taem i gat fasin joengud mo pis. Be blong mekem olsem, samtaem yumi mas jenisim sam samting blong ‘mekem olsem we yumi gat sem fasin we narafala i gat.’ (1 Korin 9:22; Ol Sam 133:1) Brata Splane i talem se ol studen ya bambae oli mitim mo joen wetem olkaen man long misinari wok blong olgeta. Long ol man ya i gat ol man long teritori blong olgeta, ol narafala misinari we oli wok wetem olgeta, ol brata mo sista long niufala kongregesen blong olgeta, mo ol brata long branj ofis ya we bambae i lukaot long wok blong prij mo tij long ples we oli go long hem. Taswe Brata Splane i givim sam gudfala advaes olsem wanem ol studen ya oli save traem bes blong olgeta blong holem wan gudfala fasin joen wetem ol narafala. Hem i se, i gud oli traem lanem lanwis blong kantri, traem kasem save kastom blong ol manples, no pusum nus blong olgeta long bisnes mo laef blong narafala misinari we oli laef  wetem olgeta, mo obei long ol brata we oli lukaot long wok blong olgeta.​—Hibrus 13:17.

Nekis brata hem i wan long ol tija blong Gilead skul ya, nem blong hem Lawrence Bowen. Hem i mekem tok ya “?Tingting Blong Yu i Olsem Wanem?” Hem i mekem ol studen oli tingbaot se ol man we oli stap ‘jajem man long fasin ya we oli jes lukluk nomo,’ oli no bilif se Jisas hem i Mesaea. (Jon 7:24) From we yumi, yumi ol sinman, yumi mas lukaotgud long olkaen tingting ya we oli “tingting blong man nomo,” be oli “no tingting blong God.” (Matiu 16:22, 23) Ol man we oli strong long saed blong spirit tu, oli mas stretem tingting blong olgeta oltaem. ?Wanem i mekem se wan sip bambae i kasem ples we hem i wantem go long hem, i no rek long wan ston no rif? Hemia i dipen long ol jenis we kapten i mekem long saed blong rod we sip i stap folem. Long sem fasin, sipos yumi rere blong jenisim sam fasin blong yumi, bambae yumi save kasem gudfala frut, bambae yumi no rek long saed blong spirit. Fasin blong stadi Baebol oltaem mo kasem stret mining blong hem, i save halpem yumi blong karem “tingting blong God.”

Brata Wallace Liverance, wan narafala tija blong Gilead Skul, i finisim haf ya blong program. Tok blong hem we i stanap long Aesea 55:1, 2 i karem taetel ya se “?Bambae Yu Pem Wanem?” Hem i pulum tingting blong ol studen ya blong oli “pem” paoa, pis long tingting, mo glad we i kamaot long profet tok blong God we i stret long taem blong yumi. Profet tok blong Aesea i talem se tok blong God i olsem wota, waen, mo melek. ?Olsem wanem man i save pem ol samting ya “we i no blong pem, i fri nomo”?  Brata Liverance i eksplenem se man i mekem olsem taem hem i lesingud long ol profet tok blong Baebol, mo taem hem i sakemaot ol tingting mo fasin blong wol mo i tekem ol tingting mo fasin blong God. (Aesea 55:2, 3, 6, 7) Taem ol niufala misinari ya oli mekem samting ya, oli save kasem paoa blong gohed oltaem long ples we bambae oli go wok long hem. Plante taem, ol sinman oli ting se glad i dipen long ol sas samting mo fasin blong harem gud long bodi. Brata Liverance i talem se: “Yufala i no mas pem samting ya. Yufala i no mas bilivim olkaen tingting olsem. Yufala i mas meksua se yufala i gat taem blong stadi gud long Tok blong God we i fulap long ol profet tok. Samting ya nao i save givim pis long tingting, i save givim paoa long yufala, mo i save givim glad taem yufala i mekem misinari wok blong yufala.”

Sam Gudfala Stori Mo Toktok Blong Ol Misinari

Ol studen oli joen plante long wok blong prij tu. Brata Mark Noumair, wan narafala tija long Gilead skul, i mekem tok ya “No Sem Nating Long Gud Nius Ya.” Hem i askem sam studen blong mekem ol pleplei blong soemaot sam long ol samting we i bin hapen long olgeta long wok blong prij. (Rom 1:16) Olgeta we oli lesin long tok ya oli glad blong harem olsem wanem ol studen ya we oli gat ekspiriens long wok blong prij, oli toktok wetem ol man long haos, long rod, mo long ol stoa. Ol studen we oli save lanwis blong narafala kantri, oli tekem janis blong prij long ol man we oli toktok ol lanwis ya long teritori blong kongregesen we oli stap long hem blong smoltaem ya. Sam narafala studen oli yusum gud ol buk long saed blong Baebol we ol Witnes blong Jeova oli wokem, oli mekem ol visit mo statem Baebol stadi wetem ol man. Olgeta ya oli “no sem nating” blong talemaot gud nius.

Brata William Nonkes, we i lukaot long Sevis Dipatmen, i mekem tok ya “Jeova i Givim Blesing Long Man We i Holemstrong Long Hem.” Hem i askem kwestin long samfala we oli misinari longtaem lelebet long Bukina Faso, Latvia, mo Rasia. Olgeta ya oli givim sam gudfala advaes long ol studen ya. Wan long ol brata ya we oli askem kwestin long hem i leftemap tingting blong ol studen se oli mas tingbaot ami blong Gideon we i gat 300 soldia nomo long hem. Wanwan soldia ya i gat wan wok blong mekem, mo from we evriwan i mekem gud wok blong hem, Gideon i winim faet. (Jajes 7:19-21) Long sem fasin, ol misinari we oli holemstrong long wok blong olgeta long ples we oli sanem olgeta blong wok long hem, oli kasem blesing.

Brata Samuel Roberson, wan tija long Patterson, i mekem nekiswan tok ya “Yu Mas Mekem We Yu Tu Yu Gat Sem Fasin We Ol Narafala Oli Gat.” Hem i askem kwestin long fo memba blong defdefren Branj Komiti long Senegal, Guam, Laebiria, mo Madagaska. I gat 170 misinari evriwan we oli stap mekem wok long ol fofala kantri ya. Toktok blong fofala brata ya i soemaot long ol studen, olsem wanem ol Branj Komiti oli stap halpem ol niufala misinari blong oli save lan long niufala ples we oli go long hem. Plante taem oli mas lanem kastom blong ol manples, we i narakaen olgeta long kantri blong olgeta. Eksampol, long sam kantri, ol man oli gat fasin ya we oli holholem han taem oli wokbaot tugeta, mo ol brata insaed long kongregesen oli mekem fasin ya tu, be hemia i minim nomo se oli gudfala fren. Long sam narafala ples, olsem Guam, ol man oli gat sam spesel kakae. Be plante misinari oli lan long ol fasin ya finis, mo ol niufala misinari ya tu bambae oli lan.

Brata Guy Pierce we hem i wan memba blong Hed Kampani i mekem tok ya “Stap Tru Long ‘Kingdom Blong Mesaea’ Blong Yumi.” Hem i talem long ol man we oli stap lesin se: “Jeova i wokem olgeta samting from wan risen. Hem i gat wan tingting i stap blong olgeta samting ya. Tingting we hem i gat i no jenis. Bambae i mas go kasem mak blong hem. Mo i no gat wan samting we i naf blong blokem tingting ya.” (Jenesis 1:28) Brata Pierce i leftemap tingting blong evriwan se oli mas putum olgeta oli stap daon aninit long hae rul blong God nomata wanem hadtaem we oli kasem from sin blong faswan man ya Adam. Brata Pierce i pulum olgeta man se: “Yumi stap laef long taem blong jajmen. Yumi gat smoltaem nomo i stap yet blong halpem ol gudfala man blong oli kasem trutok. Yumi mas yusumgud taem ya blong go luk ol man mo talemaot gud nius blong Kingdom long olgeta.” Olgeta we oli stanap long saed blong Kingdom blong God, oli save sua se bambae hem i givhan long olgeta.​—Ol Sam 18:25.

Ale jeaman i ridimaot halo mo sam gudfala toktok we i kamaot long ol branj ofis raon long wol. Mo hem i givim setifiket long ol studen ya wanwan. Nao wan long ol studen i ridimaot wan leta long bihaf blong olgeta studen ya, blong talemaot tangkiu blong olgeta from gudfala trening we oli kasem. Lastok ya i stretgud long naesfala dei ya we bambae i stap longtaem long memori blong olgeta we oli kam long miting ya.

[Bokis/Foto blong pija long pej 23]

KAONTEM KLAS YA

Oli kamaot long hamas kantri: 11

Oli go long hamas kantri: 22

Hamas studen: 48

Oli gat hamas yia: 34.8

Hamas yia long trutok: 18.3

Hamas yia finis oli prij fultaem: 13.4

[Tok blong pija long pej 24]

Klas Namba 117 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go raetsaed.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.