သင်တန်းဆင်းပွဲ—လှပသောနေ့တစ်နေ့
သင်တန်းဆင်းပွဲ—လှပသောနေ့တစ်နေ့
“လှပသည့်နေ့တစ်နေ့ဖြင့် ကျွန်ုပ်တို့ ကောင်းချီးခံစားခဲ့ရကြပြီ။ ကောင်းကင်ပြာပြာတွင် နေမင်းကြီးက ထွန်းလင်းတောက်ပနေ၏။ မြက်ပင်များက စိမ်းလန်းနေကာ ကျေးငှက်သာရကာများက တေးသီကျူးနေကြ၏။ လှပသောနေ့တစ်နေ့အတွက် ဤအခင်းအကျင်းများ ကျွန်ုပ်တို့၌ရှိနေရာ ကျွန်ုပ်တို့ စိတ်ပျက်ရမည်မဟုတ်ချေ။ ယေဟောဝါသည် စိတ်ပျက်စေသည့် ဘုရားသခင်မဟုတ်ချေ။ ကိုယ်တော်သည် ကောင်းချီးများပေးသနားသည့် ဘုရားသခင်ဖြစ်ပေသည်။”
ယေဟောဝါသက်သေများ၏ အုပ်ချုပ်ရေးအဖွဲ့ဝင်တစ်ဦးဖြစ်သူ ညီအစ်ကို ဆမ်မြူအယ်လ် ဟာ့ဒ်သည် ဂိလဒ်ကင်းမျှော်စင် ကျမ်းစာကျောင်း၏ ၁၁၇ ကြိမ်မြောက် သင်တန်းဆင်းပွဲအစီအစဉ်ကို ထိုမှတ်ချက်များဖြင့် စတင်လိုက်လေသည်။ ယင်းသင်တန်းဆင်းပွဲသည် ၂၀၀၄၊ စက်တင်ဘာ ၁၁ ရက်နေ့တွင်ဖြစ်သည်။ အဆိုပါနှစ်သက်ဖွယ်ကောင်းသည့် အစီအစဉ်တွင် တည်ဆောက်မှုပေးသော ကျမ်းစာအခြေပြု သွန်သင်ချက်အပြင် သင်တန်းတွင်းတွေ့ ကြုံမှုများနှင့် ခရစ်ယာန်သာသနာပြုလယ်ကွင်းမှ တွေ့ ကြုံမှုများ ပါဝင်ခဲ့၏။ နယူးယောက်မြို့၊ ပက်တာစင်ရှိ ကင်းမျှော်စင်ပညာပေးဌာနနှင့် အသံနှင့်ဗီဒီယိုဖြင့် ချိတ်ဆက်ထားသည့် ဘရွတ်ကလင်နှင့်ဝေါလ်ကီးရှိ အဆောက်အဦများတွင် တက်ရောက်သူပေါင်း ၆,၉၇၄ ဦးအတွက် ယင်းသည် အမှန်ပင်လှပသည့်နေ့တစ်နေ့ ဖြစ်ခဲ့လေသည်။
ကျောင်းသားများအတွက် အားပေးစကား
အမေရိကန်ပြည်ထောင်စု ဌာနခွဲကော်မတီဝင်တစ်ဦးဖြစ်သူ ဂျော်န် ကီကော့တ်သည် “ခရစ်ယာန်သာသနာပြု ထိန်းသိမ်းထားလေ ရွှင်လန်းမှု” ဟူသော အဓိကအကြောင်းဖြင့် အားပေးစကား ပြောကြားခဲ့သည်။ ဂိလဒ်ကျောင်းသားများသည် ဤကျောင်းဆင်းပွဲ၌ တွေ့နေရသကဲ့သို့ ရွှင်လန်းနေသူများအဖြစ် လူသိများကြသည်ဟု သူက ထောက်ပြခဲ့သည်။ သင်တန်းကာလအတွင်း ကျမ်းစာလမ်းညွှန်ချက်က ဤကျောင်းသားများကို ရွှင်လန်းစေခဲ့ပြီး ယခု သူတို့သည် အလားတူရွှင်လန်းမှုမျိုးကို အခြားသူများလည်း ခံစားရရန် ကူညီပေးနိုင်သည့်အနေအထားတွင် ရှိနေကြသည်။ မည်သို့အားဖြင့်နည်း။ ခရစ်ယာန်သာသနာပြုများအဖြစ် ဓမ္မအမှုတွင် မိမိတို့ကိုယ်ကို ပေးဆက်ခြင်းအားဖြင့်ဖြစ်သည်။ ယေရှုက ‘ခံယူခြင်းအရာထက် ပေးကမ်းခြင်းအရာသည် ပို၍ပျော်ရွှင်မှုရှိသည်’ ဟု မိန့်ဆိုခဲ့၏။ (တမန်တော် ၂၀:၃၅၊ သမ္မာ) ခရစ်ယာန်သာသနာပြုအသစ်များသည် အခြားသူများကို အမှန်တရားရရှိစေသည့် ရက်ရော၍ ‘ပျော်ရွှင်သောဘုရားသခင်’ ဖြစ်တော်မူသော ယေဟောဝါဘုရားသခင်ကို တုပကြသည်နှင့်အမျှ မိမိတို့၏ရွှင်လန်းမှုကို ထိန်းသိမ်းထားနိုင်ကြပါလိမ့်မည်။—၁ တိမောသေ ၁:၁၁။
အစီအစဉ်၏ နောက်အပိုင်းကို အုပ်ချုပ်ရေးအဖွဲ့ဝင်နောက်တစ်ဦးဖြစ်သူ ဒေးဗစ် စပလန် က “သင်တို့ မည်သို့စခန်းသွားမည်နည်း” ဟူသည့်အဓိကအကြောင်းဖြင့် ဟောပြောခဲ့သည်။ ဤအဓိကအကြောင်းက “ခပ်သိမ်းသောသူတို့၌ ခပ်သိမ်းသောအရာ” ဖြစ်လာဖို့ တောင်းဆိုသော်လည်း အတူတကွ စည်းလုံးစွာ နေထိုင်ခြင်းက ကောင်းမြတ်၍ တင့်တယ်လှသည်မှာ သေချာပါသည်။ (၁ ကောရိန္သု ၉:၂၂; ဆာလံ ၁၃၃:၁) ကျောင်းဆင်းများသည် ခရစ်ယာန်သာသနာပြုလုပ်ငန်းတွင် အခြားသူများစွာ—ရပ်ကွက်မှ လူများ၊ ခရစ်ယာန်သာသနာပြုချင်းများ၊ မိမိတို့၏အသင်းတော်အသစ်ရှိ ညီအစ်ကိုညီအစ်မများ၊ ဟောပြောခြင်းနှင့် သွန်သင်ခြင်းလုပ်ငန်းကို လမ်းညွှန်ပေးသည့် ဌာနခွဲရုံးရှိသူများ—နှင့် အပြန်အလှန်ဆက်ဆံရမည်ဖြစ်ကြောင်း ညီအစ်ကို စပလန်က မှာကြားခဲ့သည်။ လူမှုဆက်ဆံရေးများကို အတတ်နိုင်ဆုံး နှစ်လို့ဖွယ်ဖြစ်အောင် မည်သို့ပြုလုပ်ရမည်နှင့်ပတ်သက်၍ လက်တွေ့ကျအကြံပြုချက်များ ပေးခဲ့လေသည်– ဒေသခံဘာသာစကားကို အတတ်သင်ပါ၊ ဒေသထုံးစံများနှင့် အကင်းပါးပါး အလိုက်သင့်နေပါ၊ ခရစ်ယာန်သာသနာပြုချင်းများ၏ အေးအေးဆေးဆေးနေလိုမှုကို လေးစားပါ၊ ဦးဆောင်နေသူတို့ကို နာခံမှုပြပါ။—ဟေဗြဲ ၁၃:၁၇။
နောက်ဟောပြောသူဖြစ်သည့် ဂိလဒ်သင်တန်းပို့ချသူ လောရဲန့်စ် ဘိုဝင်န်က “သင် မည်သို့ထင်သနည်း” ဟူ၍ မေးမြန်းခဲ့သည်။ ‘အပြင်လက္ခဏာအတိုင်း စီရင်’ ခဲ့သူတို့သည် ယေရှုကို မေရှိယအဖြစ် လက်မခံခဲ့ကြကြောင်း ကျောင်းဆင်းများကို သူသတိပေးခဲ့သည်။ (ယောဟန် ၇:၂၄၊ သမ္မာ) မစုံလင်သည့်လူသားများအနေနှင့် အားလုံးသည် “ဘုရားသခင်၏အတွေးအခေါ်များ” ကိုမစဉ်းစားဘဲ “လူတို့၏ အတွေးအခေါ်များအား စဉ်းစားခြင်း” ကို သတိပြုရှောင်ရှားဖို့ လိုအပ်ပေသည်။ (မဿဲ ၁၆:၂၂၊ ၂၃၊ ကဘ) ဝိညာဉ်ရေးစိတ်ဓာတ်ရှိသူတို့ပင် မိမိတို့၏အတွေးအခေါ်ကို ဆက်၍ပြုပြင်ပြောင်းလဲရမည်။ အဏ္ဏဝါခရီးနှင်နေသည့် သင်္ဘောတစ်စီးကဲ့သို့ ယခု အလိုက်သင့်နေထိုင်တတ်မှုများသည် ပန်းတိုင်သို့ရောက်မည်လော၊ ဝိညာဉ်ရေးသင်္ဘောပျက်မည်လောဆိုသည်ကို အဆုံးအဖြတ်ပေးနိုင်ပါသည်။ ကျမ်းစာပါ အထက်အောက်စကားစပ်ကို အဆက်မပြတ်လေ့လာခြင်းက “ဘုရားသခင်၏အတွေးအခေါ်များ” ကို စဉ်းစားတတ်စေသည်။
ဂိလဒ်ကျောင်းသင်တန်းပို့ချသူ နောက်တစ်ဦးဖြစ်သည့် ဝေါလ်လေးစ် လစ်ဗာရန်စ်က အစီအစဉ်၏ ဤအပိုင်းကို နိဂုံးချုပ်ခဲ့သည်။ “အဘယ်အရာကို သင်ဝယ်ယူမည်နည်း” ဟူသည့် သူ၏အဓိကအကြောင်းသည် ဟေရှာယ ၅၅:၁ ကိုအခြေပြုထားပါသည်။ ကျွန်ုပ်တို့ခေတ်အတွက် ဘုရားသခင်၏ ပရောဖက်ပြုချက်ဆိုင်ရာ သတင်းစကားမှလာသည့် လန်းဆန်းမှု၊ ရွှင်လန်းမှုနှင့် အာဟာရတို့ကို “ဝယ်” ယူရန် ကျောင်းဆင်းများကို သူအားပေးခဲ့၏။ ဟေရှာယပရောဖက်ပြုချက်က ဤဘုရားသခင့်စကားတော်ကို ရေ၊ စပျစ်ရည်နှင့် နို့တို့ဖြင့် တင်စားခိုင်းနှိုင်းခဲ့သည်။ ယင်းကို “ငွေမပါဘဲ၊ အဖိုးကိုမပေးဘဲ” မည်သို့ဝယ်ယူနိုင်မည်နည်း။ ကျမ်းစာပရောဖက်ပြုချက်ကို အာရုံစိုက်ခြင်းနှင့် ဝိညာဉ်ရေးမဆန်သည့် အတွေးအခေါ်များနှင့် နည်းလမ်းများကို ဘုရားသခင်၏အတွေးအခေါ်များနှင့် နည်းလမ်းများဖြင့် ဖလှယ်လိုက်ခြင်းအားဖြင့် ယင်းကို ဝယ်ယူနိုင်ကြောင်း ညီအစ်ကို လစ်ဗာရန်စ်က ရှင်းပြခဲ့သည်။ (ဟေရှာယ ၅၅:၂၊ ၃၊ ၆၊ ၇) ယင်းသို့လုပ်ဆောင်ခြင်းဖြင့် ခရစ်ယာန်သာသနာပြုအသစ်များသည် မိမိတို့၏တိုင်းတစ်ပါးတာဝန်များတွင် ဆက်မြဲနိုင်ကြမည်။ စည်းစိမ်ဥစ္စာ ကြိုးစားရှာယူထားမှ ပျော်ရွှင်မည်ဟု မစုံလင်သည့်လူသားများ ယူဆလေ့ရှိ၏။ “ယင်းကို မဝယ်ကြနှင့်” ဟု ဟောပြောသူက တိုက်တွန်းခဲ့သည်။ “ယင်းအတွေးအခေါ်ကို မဝယ်ပါနှင့်။ ဘုရားသခင့် ပရောဖက်ပြုချက်ဆိုင်ရာစကားတော်ကို အဓိပ္ပာယ်ရှိရှိ လေ့လာဖို့ အချိန်သတ်မှတ်ထားပါ။ ယင်းက သင့်ကို လန်းဆန်းမှုပေးနိုင်သည်၊ အားဖြည့်ပေးပြီး သင်၏ခရစ်ယာန်သာသနာပြုတာဝန်တွင် ရွှင်လန်းမှုပေးနိုင်သည်။”
နှစ်လို့ဖွယ်ကောင်းသည့် ကျောင်းသားအတွေ့အကြုံများနှင့် လူတွေ့မေးမြန်းခန်းများ
ကျောင်းသားများသည် ဟောပြောခြင်းလုပ်ငန်းတွင် မှန်မှန်ပါဝင်ခဲ့ကြ၏။ သင်တန်းဆင်းများ ပြန်လည်ပြောပြကြသည့် တွေ့ ကြုံမှုများမှအချို့ကို ဂိလဒ်သင်တန်းပို့ချသူ နောက်တစ်ဦးဖြစ်သော မာ့ခ် နူမဲရ် ဦးစီးသည့် ဆွေးနွေးခန်းတွင် ပြန်သရုပ်ပြခဲ့ရာ “သတင်းကောင်းကြောင့် ရှက်ကြောက်ခြင်းမရှိ” ဟူသည့်အဓိကအကြောင်းကို ပေါ်လွင်စေခဲ့သည်။ (ရောမ ၁:၁၆) အဆိုပါအတွေ့အကြုံရှိ ဓမ္မအမှုဆောင်များသည် တစ်အိမ်မှတစ်အိမ်တွင်၊ လမ်းပေါ်တွင်နှင့် ကုန်တိုက်များတွင် မည်သို့သက်သေခံခဲ့ကြပုံကို နားထောင်ရကြ၍ ပရိသတ်နှစ်ခြိုက်ခဲ့သည်။ အခြားသောဘာသာစကားကို ပြောတတ်ကြသည့် ကျောင်းသားများကလည်း ထိုဘာသာစကားပြောသူတို့ထံ ရောက်ရှိရန် မိမိတို့အသင်းတော်၏ရပ်ကွက်တွင် အစပြုလုပ်ဆောင်ခဲ့ကြ၏။ အခြားသူတို့ကမူ ယေဟောဝါသက်သေများထုတ်ဝေသည့် ကျမ်းစာအခြေပြုစာပေများကို ပြန်လည်ပတ်မှုများတွင်လည်းကောင်း၊ အိမ်တွင်းကျမ်းစာသင်အံမှုများကို အစပြုရာတွင်လည်းကောင်း ကောင်းစွာအသုံးပြုခဲ့ကြသည်။ သူတို့သည် သတင်းကောင်းဟောပြောရန် “ရှက်ကြောက်ခြင်းမရှိ” ခဲ့ကြချေ။
လုပ်ငန်းတော်ဌာနတွင် တာဝန်ကျသည့် ညီအစ်ကို ဝီလျံ နွံကီစ်က ဘာကီနာဖာဆို၊ လတ်ဗီးယားနှင့် ရုရှားနိုင်ငံမှ အတွေ့အကြုံရှိ ခရစ်ယာန်သာသနာပြုများကို လူတွေ့မေးမြန်းခဲ့၏။ ၎င်းတို့သည် “တည်ကြည်သူတို့ကို ယေဟောဝါရှင် မေတ္တာဖြင့် ဆုချ” ဟူသည့် အဓိကအကြောင်းအပေါ် အခြေပြု၍ လက်တွေ့ကျအကြံဉာဏ်များ ဝေမျှပေးခဲ့ကြသည်။ လူတွေ့မေးမြန်းခံရသည့် ညီအစ်ကိုများအနက် တစ်ဦးက စစ်သား ၃၀၀ ရှိ ဂိဒေါင်၏စစ်တပ်ကို သတိရကြရန် ကျောင်းဆင်းများကို အားပေးခဲ့သည်။ စစ်သားတစ်ဦးစီသည် ဂိဒေါင်၏စစ်ဆင်ရေး အောင်မြင်စေရန် အကူအညီပေးရသည့် တာဝန်တစ်ခုစီ ရရှိထားကြသည်။ (တရားသူကြီး ၇:၁၉-၂၁) အလားတူ၊ မိမိတို့၏တာဝန်များတွင် ဆက်ရှိနေကြသည့် ခရစ်ယာန်သာသနာပြုများလည်း ဆုချခံရကြ၏။
ပက်တာစင်၌ သင်တန်းပို့ချသူတစ်ဦးဖြစ်သည့် ဆမ်မြူအယ်လ် ရော်ဘာစဲန်က “ခပ်သိမ်းသောသူတို့အတွက် ခပ်သိမ်းသောအရာဖြစ်လော့” ဟူသည့်အဓိကအကြောင်းကို လူတွေ့မေးမြန်းခန်းများဖြင့် ပေါ်လွင်စေခဲ့၏။ စီနီဂဲလ်၊ ဂူအမ်၊ လိုင်ဘေးရီးယားနှင့် မာဒါဂတ်စကာနိုင်ငံတို့မှ ဌာနခွဲကော်မတီဝင်လေးဦးကို သူ တွေ့ဆုံမေးမြန်းခဲ့သည်။ ဤနိုင်ငံများတွင် ခရစ်ယာန်သာသနာပြု စုစုပေါင်း ၁၇၀ အမှုဆောင်နေကြ၏။ သင်တန်းဆင်းကျောင်းသားများသည် ဌာနခွဲကော်မတီက ခရစ်ယာန်သာသနာပြုအသစ်များကို သူတို့၏တာဝန်များနှင့် လိုက်လျောညီထွေနေတတ်ရန် မည်သို့ကူညီပေးကြောင်း မှတ်ချက်များမှ သိရှိခဲ့ရလေသည်။ ယင်းက အနောက်တိုင်းစံနှုန်းများအရ တစ်မူထူးခြားပုံပေါက်မည့် ထုံးစံများကို သင်ယူရန်လိုသည်ဟူသည့် သဘောဖြစ်သည်။ ဥပမာ၊ နိုင်ငံတချို့တွင် ခရစ်ယာန်အသင်းတော်ရှိသူတို့အပါအဝင် အမျိုးသားများသည် အတူတူ လမ်းလျှောက်နေစဉ် မိတ်ဆွေများအဖြစ် လက်တွဲသွားကြခြင်းမှာ တွေ့နေကျအရာဖြစ်သည်။ ဂူအမ်ဌာနခွဲအောက်ရှိ ဒေသတချို့တွင် တစ်မူထူးခြားသည့် အစားအသောက်များကို တည်ခင်းဧည့်ခံတတ်ကြ၏။ သို့သော် အခြားသူတို့သည် အလိုက်သင့်နေတတ်ခဲ့ကြရာ ခရစ်ယာန်သာသနာပြုအသစ်များလည်း အလိုက်သင့်နေနိုင်ကြပါသည်။
အုပ်ချုပ်ရေးအဖွဲ့ဝင်တစ်ဦးဖြစ်သူ ဂိုင် ပီယပ်စ်က “‘ကျွန်ုပ်တို့အရှင်သခင်၏ နိုင်ငံတော်’ ကို ဆက်၍တည်ကြည်ကြလော့” ဟူသည့်အကြောင်းကို ဟောပြောသွားခဲ့၏။ ပရိသတ်ကို သူဤသို့နှိုးဆော်ပေးခဲ့လေသည်– “ယေဟောဝါသည် ရည်ရွယ်ချက်ဖြင့် ဖန်ဆင်းခဲ့သည်။ မိမိ၏ဖန်ဆင်းရာအတွက် ရည်ရွယ်ချက်တစ်စုံတစ်ရာ ကိုယ်တော်၌ရှိထားသည်။ ဤကမ္ဘာမြေအတွက် ကိုယ်တော်၏ရည်ရွယ်ချက်မှာ ပြောင်းလဲမသွားခဲ့ချေ။ ၎င်း၏ရည်ရွယ်ချက်သည် ပြည့်စုံခြင်းဆီသို့ တစ်ဟုန်ထိုး ဦးတည်ရွေ့လျားလျက်ရှိ၏။ မည်သည့်အရာကမျှ ယင်းကို မပြောင်းလဲနိုင်ပေ။” (ကမ္ဘာဦး ၁:၂၈) ပထမလူသားအာဒံ၏အပြစ်ကြောင့် အခက်အခဲများ ပေါ်ပေါက်ခဲ့ရလင့်ကစား ဘုရားသခင်၏အကြွင်းမဲ့ပိုင်သအုပ်စိုးမှုကို တည်ကြည်စွာ လက်အောက်ခံကြဖို့ ညီအစ်ကို ပီယပ်စ်က အားလုံးကို အားပေးသွားခဲ့သည်။ “ကျွန်ုပ်တို့သည် တရားစီရင်ရာအချိန်နာရီအတွင်းတွင် အသက်ရှင်နေကြသည်။ စိတ်နှလုံးရိုးဖြောင့်သူများ အမှန်တရားသိရှိရန် သူတို့ထံရောက်ရှိဖို့ ကျွန်ုပ်တို့၌ အချိန်အနည်းငယ်သာ ကျန်ရှိတော့သည်။ အခြားသူများထံ ဘုရားသခင့်နိုင်ငံတော်သတင်းကောင်းရောက်ရှိဖို့ အချိန်ကို အကျိုးရှိရှိအသုံးပြုကြပါ” ဟု ညီအစ်ကို ပီယပ်စ်က တိုက်တွန်းသွားခဲ့သည်။ ဘုရားသခင့်နိုင်ငံတော်ကို တည်ကြည်စွာ ထောက်မကူညီပေးနေသူတို့သည် ကိုယ်တော်၏ကျောထောက်နောက်ခံပြုမှုရမည်ကို ယုံကြည်အားထားနိုင်ကြပါသည်။—ဆာလံ ၁၈:၂၅။
နိဂုံးပိုင်းတွင် သဘာပတိသည် ကမ္ဘာတစ်ဝန်းရှိ ဌာနခွဲရုံးများမှ ပေးပို့သော နှုတ်ခွန်းဆက်စကားများကို ဖတ်ကြားသည်။ ထို့နောက် ကျောင်းဆင်းများအား ဒီပလိုမာပေးအပ်ပြီး ကျောင်းဆင်းတစ်ဦးက အတန်းကိုယ်စား ရရှိခဲ့သည့် လေ့ကျင့်မှုအတွက် အလွန်ကျေးဇူးတင်ကြောင်း ဖော်ပြသည့်စာကို ဖတ်ပြ၏။ ယင်းသည် တက်ရောက်သူအားလုံး အမှတ်တရဖြစ်နေကြမည့် အလှပဆုံး နေ့တစ်နေ့နှင့် လိုက်ဖက်လှသည့် နိဂုံးဖြစ်ပေသည်။
[စာမျက်နှာ ၂၃ ပါ လေးထောင့်ကွက်]
သင်တန်းဆိုင်ရာအချက်အလက်များ
ကိုယ်စားပြုနိုင်ငံအရေအတွက်– ၁၁
တာဝန်ပေးအပ်ခံရသည့် နိုင်ငံအရေအတွက်– ၂၂
ကျောင်းသား/သူအရေအတွက်– ၄၈
ပျမ်းမျှအသက်– ၃၄.၈
ပျမ်းမျှအမှန်တရားသက်တမ်း– ၁၈.၃
ပျမ်းမျှအချိန်ပြည့်အမှုဆောင်သက်တမ်း– ၁၃.၄
[စာမျက်နှာ ၂၄ ပါ ရုပ်ပုံ]
ဂိလဒ်ကင်းမျှော်စင်ကျမ်းစာကျောင်း၏ ၁၁၇ ကြိမ်မြောက်သင်တန်း
အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.