Letšatši la go Aloga—Letšatši le Lebotse

“RE ŠEGOFADITŠWE ka letšatši le lebotse. Letšatši le a phadima. Leratadima ke le letala. Bjang ke bjo botala. Dinonyana di a opela. Letšatši ke le lebotse, re ka se nyame. Jehofa ga se Modimo yo a nyamišago batho. Ke Modimo wa ditšhegofatšo.”

Ka mantšu ao, Ngwanabo rena Samuel Herd, yo e lego setho sa Sehlopha se Bušago o ile a thoma lenaneo la go aloga ga sehlopha sa bo-117 sa Sekolo sa Beibele sa Watchtower sa Gilead. E be e le ka September 11, 2004. Lenaneo le lebotse le be le akaretša keletšo e kgothatšago yeo e theilwego Beibeleng gotee le diphihlelo tša ge barutwana ba be ba sa le sekolong gaešita le diphihlelo tša baromiwa ba bangwe. Ee, e be e le letšatši le lebotse go bohle ba 6 974 bao ba bego ba le gona kua Lefelong la tša Thuto la Watchtower kua Patterson, New York, le meagong ya kua Brooklyn le Wallkill, yeo e bego e kgokagantšwe ka mogala le bidio.

Mantšu a Kgothatšago go Barutwana

John Kikot, yo e lego setho sa Komiti ya Lekala ya United States, o ile a bolela mantšu a kgothatšago sehlogong se se rego: “Dula o Thabile Bjalo ka Moromiwa.” O ile a bolela gore barutwana ba Gilead ba tsebja ka lethabo la bona, go etša ge go be go bonagala nakong ye ya go aloga. Thuto e tšwago Mangwalong nakong ya sekolo e ile ya thabiša barutwana, gomme ga bjale ba be ba kgona go thuša ba bangwe gore ba be le lethabo le swanago. Bjang? Ka go ikgafa bodireding bja bona e le baromiwa. Jesu o itše: “Lešexo la monei le phala la monewa.” (Ditiro 20:35) Ge ba dutše ba ekiša Jehofa Modimo, yo e lego “Modimo yo a thabilego” yo a neago ka seatla se se bulegilego, yo a neago ba bangwe therešo, baromiwa ba ba bafsa ba tla kgona go dula ba thabile.—1 Timotheo 1:11, NW.

Yo a ilego a latela lenaneong e be e le setho se sengwe sa Sehlopha se Bušago, David Splane, yo sehlogo sa gagwe se bego se re: “Le tla Phedišana Bjang le ba Bangwe?” Ga go pelaelo gore ke mo gobotse le mo go kgahlišago go dula ka kwano, gaešita le ge se se ka nyaka gore le ‘be tšohle go bohle.’ (1 Ba-Korinthe 9:22; Psalme 133:1) Ngwanabo Rena Splane o boletše gore barutwana bao ba alogago ba be ba tla kopana le batho ba bangwe ba bantši modirong wa boromiwa—batho tšhemong, baromiwa-gotee le bona, bana babo rena le dikgaetšedi phuthegong e mpsha yeo ba kopanelago go yona le bao ba lego ofising ya lekala ba ba laolago modiro wa go bolela le wa go ruta. O ile a ba nea ditšhišinyo tše šomago mabapi le kamoo ba ka dirago gore ditswalano e be tše di kgahlišago ka mo go kgonegago, ka gore: Tsebang leleme la lefelong leo, kwešišang metlwae ya lefelong leo, hlomphang go ba noši ga baromiwa-gotee le lena, gomme le kwe bao ba etelelago pele.—Ba-Hebere 13:17.

Polelong e latetšego, mohlahli wa Gilead e lego Ngwanabo rena Lawrence Bowen o ile a botšiša gore: “O Nagana Bjang?” O ile a gopotša barutwana gore bao ba bego ba ‘ahlola ka go lebelela  sefahlego’ ga se ba ka ba amogela Jesu e le Mesia. (Johane 7:24, bapiša le PK.) Bjalo ka batho ba ba sa phethagalago, ka moka ga rena re swanetše go itiša malebana le go “eleletša tša batho” go e na le gore re “eleletše tša Modimo.” (Mateo 16:22, 23) Gaešita le batho ba sekametšego dilong tša moya ba swanetše go tšwela pele ba fetoša tsela yeo ba naganago ka yona. Go swana le sekepe lewatleng, diphetogo tše di dirwago gona bjale di ka feleletša ka go fihlelela pakane goba ka go robegelwa ke sekepe sa moya. Go tšwela pele re ithuta Beibele ka mo go tseneletšego go re thuša gore re “eleletše tša Modimo.”

Wallace Liverance, yo e lego mohlahli yo mongwe wa Sekolo sa Gilead o ile a phetha karolo ye ya lenaneo. Sehlogo sa gagwe se se rego: “O tla Reka’ng?” se be se theilwe go Jesaya 55:1. O ile a kgothaletša barutwana go “rêka” boitapološo, lethabo le dijo tšeo di tšwago molaetšeng wa Modimo wa boporofeta bakeng sa mehla ya rena. Boporofeta bja Jesaya bo ile bja swantšha lentšu la Modimo le meetse, beine le mafsi. Le ka rekwa bjang “xò se thšêlêtê, xò se sa xo rêka ka sôna”? Ngwanabo Rena Liverance o hlalositše gore ke ka go ela hloko boporofeta bja Beibele le go fetoša dikgopolo le ditsela tše e sego tša moya gomme ra bea tša Modimo legatong la tšona. (Jesaya 55:2, 3, 6, 7) Ka go dira se, baromiwa ba bafsa ba ka matlafala dikabelong tša bona tša dinageng dišele. Batho ba ba sa phethagalago gantši ba nagana  gore lethabo le ithekgile ka go phegelela bophelo bja boiketlo bja dilo tše di bonagalago. Seboledi se kgothaleditše gore: “O se ke wa dumelelana le seo. O se ke wa dumelelana le kgopolo yeo. Kgonthišetša gore o ipha nako bakeng sa thuto e nago le morero ya Lentšu la Modimo la boporofeta. Le ka go lapološa, la go matlafatša gomme la go tlišetša lethabo kabelong ya gago ya boromiwa.”

Diphihlelo le Dipoledišano tše di Thabišago tša Barutwana

Barutwana ba be ba tšea karolo ka mehla modirong wa boboledi. Polelong ya Mark Noumair, yo e lego mohlahli yo mongwe wa Gilead, go ile gwa ba le ba mmalwa sehlopheng bao ba ilego ba diragatša diphihlelo tšeo di ilego tša gatelela sehlogo se se rego: “Go se be le Dihlong ka Ditaba tše Dibotse.” (Ba-Roma 1:16, NW) Batheetši ba ile ba thabela go kwa kamoo badiredi ba ba ba nago le phihlelo ba ilego ba nea bohlatse ka gona ka ntlo le ntlo, setarateng le mabenkeleng a magolo. Barutwana bao ba bego ba tseba maleme a mangwe ba ile ba gata mogato wa pele wa go fihlelela batho bao ba bolelago maleme ao tšhemong ya phuthego yeo ba lego go yona. Ba bangwe ba ile ba diriša gabotse dikgatišo tše di theilwego Beibeleng tše di gatišwago ke Dihlatse tša Jehofa, ba di diriša ge ba dira maeto a go boela le ge ba thoma dithuto tša magae tša Beibele. Ba be “ba se na dihlong” ka go bolela ditaba tše dibotse.

Ngwanabo Rena William Nonkes yo a abetšwego Lefapheng la Tirelo, o ile a swara dipoledišano le baromiwa ba ba nago le phihlelo ba tšwago Burkina Faso, Latvia le Russia. Ba ile ba nea keletšo e šomago ye e theilwego sehlogong se se rego: “Jehofa ka Lerato o Putsa Bao ba Botegago.” Yo mongwe wa bana babo rena yo go ilego gwa boledišanwa le yena o ile a kgothaletša barutwana go gopola bahlabani ba Gideoni ba 300. Mohlabani yo mongwe le yo mongwe o be a e-na le kabelo yeo e bego e tlaleletša katlegong ya ntwa ya Gideoni. (Baahlodi 7:19-21) Ka mo go swanago, baromiwa bao ba dulago dikabelong tša bona ba a putswa.

Sehlogo se se rego: “E-Bang Dilo Tšohle go Bohle” se ile sa gatelelwa dipoledišanong tše di ilego tša swarwa ke Samuel Roberson, yo e lego mohlahli kua Patterson. O ile a boledišana le ditho tše nne tša Komiti ya Lekala tše tšwago Senegal, Guam, Liberia le Madagascar. Palo-moka ya baromiwa ba 170 ba hlankela dinageng tše. Ditlhalosong, barutwana bao ba bego ba aloga ba ile ba kwa kamoo Dikomiti tša Makala di thušago baromiwa go tlwaelana le dikabelo tša bona. Seo gantši se bolela go ithuta metlwae yeo e ka bonagalago e sa tlwaelega go ya ka ditekanyetšo tša ka Bodikela. Ka mohlala, go tlwaelegile kudu dinageng tše dingwe go bona banna, go akaretša bao ba lego ka phuthegong ya Bokriste, ba swarane ka matsogo bjalo ka bagwera ba sepela gotee. Mafelong a mangwe ao a hlokometšwego ke lekala la Guam, go jewa dijo tše di sa tlwaelegago. Eupša ba bangwe ba ile ba tlwaela, gomme baromiwa ba bafsa le bona ba ka tlwaela.

Guy Pierce yo e lego setho sa Sehlopha se Bušago, o ile a ahla-ahla sehlogo se se rego: “Dula o Botegela ‘Mmušô wa Mong wa Rena.’” O ile a gopotša batheetši gore: Jehofa o hlodile ka morero. O be a e-na le morero ka tlholo ya gagwe. Morero wa gagwe ka lefase ga se wa fetoga. O batamela phethagalo ya ona ka mo go sa thibelegego. O ka se fetošwe ke selo.” (Genesi 1:28) Ngwanabo Rena Pierce o ile a kgothaletša bohle go ikokobeletša bolaodi bja Modimo ka potego e sa kwanantšhego go sa šetšwe mathata ao a tšweletšego ka baka la sebe sa motho wa pele e lego Adama. Ngwanabo Rena Pierce o ba kgothaditše ka gore: “Re phela nakong ya kahlolo. Re šaletšwe ke nako e nyenyane ya go fihlelela ba dipelo tše di botegago go ba thuša go tseba therešo. Dirišang nako ye gabotse bakeng sa go fihlelela ba bangwe ka ditaba tše dibotse tša Mmušo.” Bao ka potego e sa kwanantšhego ba thekgago Mmušo wa Modimo ba ka kgonthišega gore Modimo o tla ba thuša.—Psalme 18:25.

Karolong ya go phetha, modula-setulo o ile a bala ditumedišo le ditakaletšo tše dibotse go tšwa makaleng a lefase ka moka. Ke moka o ile a nea barutwana ba ba alogago di-diploma, bao yo mongwe wa bona a ilego a bala lengwalo le le tšwago go sehlopha sa barutwana la go bontšha tebogo ya bona e tšwago pelong ka tlwaetšo ye ba e hweditšego. E be e le phetho e swanetšego letšatšing le lebotse kudu leo bohle ba ba bego ba le gona ba tla tšeago nako e telele ba le gopola.

[Caption on page 23]

DIPALO-PALO TŠA SEHLOPHA

Palo ya dinaga tše di emetšwego: 11

Palo ya dinaga tšeo ba abetšwego go tšona: 22

Palo ya barutwana: 48

Palo-gare ya nywaga: 34.8

Palo-gare ya nywaga therešong: 18.3

Palo-gare ya nywaga bodireding bja nako e tletšego: 13.4

[Caption on page 24]

Sehlopha se se Alogago sa bo-117 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga go le letshadi go ya go le letona mothalading o mongwe le o mongwe.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.