Dia di Graduacion—Un Bunita Dia

“NOS a ser bendiciona cu un bunita dia. Solo ta briya y shelo ta blou. Yerbanan ta berde. Parhanan ta canta. Tur cos ta prepara pa un bunita dia, y nos no ta bai keda desilusiona. Yehova no ta un Dios di desilusion. E ta un Dios di bendicion.”

Cu e comentarionan ei Ruman Samuel Herd, miembro di e Cuerpo Gobernante di Testigonan di Yehova, a cuminsa e programa di graduacion di e di 117 klas di e Scol Biblico di Galad di Watchtower. Tawata 11 di september 2004. E programa excelente a inclui conseho biblico edificante y tambe experencianan local y algun experencia di diferente ruman den e trabou di misionero. Si, tawata un bunita dia pa tur e 6.974 personanan cu a asisti na e Centro Educacional di Watchtower na Patterson, New York, y na e complehonan na Brooklyn y Wallkill, cu por a sigui e programa via medionan audiovisual.

Palabranan di Animacion pa e Studiantenan

John Kikot, kende ta miembro di e Comite di Sucursal di Merca, a ofrece palabranan di animacion riba e tema “Mantene Bo Goso Como Misionero.” El a mustra cu studiantenan di Galad ta conoci pa nan goso, manera a ser comproba na e graduacion aki. E instruccion cu e studiantenan a haya for di e Scritura den e scol a duna nan hopi goso, y awor nan ta bon prepara pa yuda otronan haya e mesun goso. Con asina? Door di duna di nan mes den nan sirbishi como misionero. Hesus a bisa: “Ta mas bendiciona pa duna cu pa ricibi.” (Echonan 20:35) Segun cu e misioneronan nobo ta imita Yehova Dios, e generoso “Dios felis”, kende ta haci e berdad disponibel pa otro hende, nan lo por mantene nan mes goso.—1 Timoteo 1:11, NW.

Despues a sigui un otro miembro di e Cuerpo Gobernante, David Splane, kende su tema tawata “Ki Relacion Lo Bo Tin cu Otro Hende?” Sin duda ta bon y agradabel pa biba den unidad, aunke esaki por nifica cu bo tin cu bira “tur cos pa tur hende.” (1 Corintionan 9:22; Salmo 133:1) Ruman Splane a menciona cu e studiantenan cu a gradua lo haya nan ta trata cu hopi otro hende den nan trabou como misionero—hende den teritorio, otro misioneronan, rumannan den nan congregacion nobo y e rumannan na e sucursal cu ta dirigiendo e trabou di predica y di siña. El a duna sugerencia practico riba con pa haci nan trato cu otro hende mas agradabel posibel: Siña conoce e idioma local, ser dispuesto pa adapta na custumbernan local, respeta e  privasidad di otro misioneronan y ser obediente na esnan cu ta hiba delantera.—Hebreonan 13:17.

Siguientemente, un di e instructornan di Galad, Lawrence Bowen, a puntra, “Manera Ken Bo Ta Pensa?” El a recorda e studiantenan cu e hendenan cu a “husga segun aparencia” no a acepta Hesus como Mesias. (Huan 7:24) Como personanan imperfecto, nos tur mester tene cuidou pa nos no pensa manera hende ta pensa sino pa nos tin ‘e pensamentonan di Dios.’ (Mateo 16:22, 23) Asta hende spiritual mester sigui ahusta nan manera di pensa. Mescos cu den caso di un barco riba lama, e ahustenan cu nos ta haci awor por nifica e diferencia entre alcansa e meta y sufri naufragio spiritual. Un estudio continuo di Bijbel den su contexto ta yuda nos pensa manera Dios.

Wallace Liverance, un otro instructor di Scol di Galad, a conclui e parti aki di e programa. Su tema tawata basa riba Isaias 55:1, “Kico Lo Bo Cumpra?” El a anima e studiantenan pa “cumpra” e refrescamento, e goso y e nutricion cu ta bini di e mensahe profetico di Dios pa nos tempo. E profecia di Isaias a compara Dios su palabra cu awa, biña y lechi. Con bo por cumpr’e “sin placa y sin prijs”? Ruman Liverance a splica cu esei ta door di presta  atencion na profecia di Bijbel y elimina pensamento- y camindanan no spiritual y pone na luga di eseinan e pensamento- y camindanan di Dios. (Isaias 55:2, 3, 6, 7) Esaki di mes por sostene e misioneronan nobo den nan asignacionnan den estranheria. Hopi bes hende imperfecto ta pensa cu felicidad ta depende di comodidad material. E orado a urgi: “No cumpra esei. No kere esei. Haci sigur di aparta tempo pa bo studia e Palabra profetico di Dios cabalmente. Esei por refresca bo, fortalece bo y duna bo goso den bo asignacion como misionero.”

Experencia- y Entrevistanan Deleitabel

E studiantenan a participa regularmente den e actividad di predica. Bou di direccion di Mark Noumair, un otro instructor di Galad, varios studiante di e klas a demostra experencianan cu a resalta e tema “No Tene Berguensa di e Evangelio.” (Romanonan 1:16) Esnan presente a gosa di tende con e ministernan versa aki a duna testimonio di cas pa cas, riba caya y den centronan comercial. E studiantenan cu ta domina mas idioma a tuma e iniciativa den e teritorio di nan congregacion pa alcansa hende cu ta papia otro lenga. Otronan a haci bon uzo di e publicacionnan basa riba Bijbel cu Testigonan di Yehova ta produci na momento cu nan tawata haci rebishita y cuminsa estudio di Bijbel. Nan “no [tawatin] berguensa” di predica e bon nobo.

Ruman William Nonkes, di e Departamento di Sirbishi, a entrevista misioneronan di hopi experencia di Burkina Faso, Latvia y Rusia. Nan a duna conseho practico riba e tema “Yehova Amorosamente Ta Recompensa Hende Fiel.” Un di e rumannan entrevista a anima e studiantenan pa corda riba Gideon su ehersito di 300 solda. Cada solda a haya un asignacion cu a contribui na e exito di e campaña di Gideon. (Huesnan 7:19-21) Mescos tambe, e misioneronan cu ta keda den nan asignacion ta haya nan recompensa.

E entrevistanan cu Samuel Roberson, instructor na Patterson, a tene despues a resalta e tema “Bira Tur Cos pa Tur Tipo di Hende.” El a entrevista cuater miembro di Comite di Sucursal; un di Senegal, un di Guam, un di Liberia y un di Madagascar. Un total di 170 misionero ta sirbiendo den e paisnan aki. For di e comentarionan e studiantenan cu a gradua a haya sa con Comitenan di Sucursal ta yuda misioneronan nobo adapta nan na nan ambiente nobo. Hopi bes esei ta nifica siña custumbernan cu por parce straño pa normanan di Occidente. Por ehempel, den algun pais ta masha comun pa mira hende homber, incluso ruman homber di e congregacion cristian, tene man como amigo ora nan ta cana cu otro. Na algun luga bou di e sucursal di Guam, nan ta come cumindanan straño. Pero otro hende a adapta nan mes, y e misioneronan nobo tambe por.

Guy Pierce, miembro di e Cuerpo Gobernante, a desaroya e tema “Keda Leal na ‘e Reino di Nos Señor.’” El a recorda esnan presente: “Yehova a crea cosnan cu un proposito. E tawatin algo na mente pa su creacion. Su proposito pa e planeta aki no a cambia. No tin nada cu por cambia esei of strob’e di wordo realisa.” (Genesis 1:28) Ruman Pierce a anima tur esnan presente pa somete nan mes lealmente na e soberania di Dios apesar di e dificultadnan cu a surgi pa motibo di e pica di e prome homber Adam. “Nos ta bibando den e ora di huicio. No a sobra mucho tempo mas pa alcansa hende di curason honrado pa yuda nan conoce e berdad. Probecha bon di e tempo pa alcansa otro hende cu e bon nobo di Reino”, Ruman Pierce a urgi. Hende cu ta apoya e Reino di Dios lealmente por conta cu su respaldo.—Salmo 18:25, NW.

Na conclusion, e presidente a lesa saludo- y expresionnan di bon deseo for di sucursalnan rond mundo. Despues el a entrega e studiantenan cu a gradua nan diploma. Un di e graduadonan a lesa un carta di e klas cu a expresa nan gradicimento di curason pa e entrenamento cu nan a ricibi. Esaki tawata un conclusion apropiado pa un bunita dia cu tur persona cu a asisti lo keda corda pa hopi tempo.

[Cuadro na pagina 23]

ESTADISTICANAN DI E KLAS

Cantidad di pais representa: 11

Cantidad di pais na cua a asigna nan: 22

Cantidad di studiante: 48

Edad promedio: 34,8

Promedio di aña den e berdad: 18,3

Promedio di aña den sirbishi di tempo completo: 13,4

[Plachi na pagina 24]

E di 117 Klas di Graduadonan di e Scol Biblico di Galad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.