Tereniia Kia Akakite Ua Atu

“E ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.”​—ANGAANGA 1:8.

1, 2. Eaa ta Petero angaanga, e naai i oronga atu i te reira kiaia?

“IA IESU no Nazareta . . . kua ikuiku maira aia ia matou e tuatua aere matou ki te tangata, e akakite ua atu oki e, koia tei akonoia e te Atua ei Akava i tei ora e i tei mate ra oki.” (Angaanga 10:38, 42) Ma taua au tuatua ra, kua akamarama te apotetoro ko Petero kia Korenelio e tona ngutuare tangata i te angaanga tei rauka mai iaia kia riro mai ei tangata tutu evangeria.

² I naea a Iesu i oronga ai i taua angaanga ra? Penei ake, te manako ra a Petero i ta Iesu akatuakaouia i tuatua ana i mua ua ake ka kake atu ei aia ki te rangi. I taua atianga, kua akakite a Iesu ki tana au pipi tiratiratu: “E ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” (Angaanga 1:8) Inara, no etai tuatau i mua ake i te reira, kua kite ke ana a Petero ei au pipi na Iesu e, ka tuatua atu aia ki tetai ke no runga i tona akarongo i roto ia Iesu.

E Toru Mataiti no te Tereni Anga

3. Eaa te temeio ta Iesu i rave, e eaa te patianga tana i oronga kia Petero raua ko Anederea?

³ I nga mea marama i muri ake i tona papetito angaia i te 29 T.N., kua tutu aere atu a Iesu i te ngai te angaanga ra a Petero raua ko tona taeake ko Anederea ei nga tangata ravakai i runga i te Tai o Galilea. Kua angaanga raua i taua po katoa ra inara kare i puapingaia. Noatu rai, kua akakite a Iesu kia  ratou: “O atu ki te moana, tuku atu ei i ta kotou kupenga i tetai aronga ika.” I to ratou rave anga i ta Iesu i akakite atu, “kua pini rava akera ia ratou te ika e manganui; e motu atura ta ratou kupenga.” Te kite anga i te temeio ra, kua mataku a Petero, inara kua akamaru atu a Iesu iaia, i te na ko anga e: “Eiaa e mataku; mei teianei atu, e tangata taau e rauka.”​—Luka 5:4-10.

4. (a) Akapeea a Iesu i te teateamamao anga i tana au pipi kia akakite ua atu? (e) Akapeea me akaaiteia atu te angaanga orometua a te au pipi a Iesu ki tana uaorai?

⁴ I reira rai, kua akaruke atu a Petero raua ko Anederea​—pera katoa a Iakobo raua ko Ioane, te nga tamariki a Zebedaio​—i to ratou pai e kua aru atu ia Iesu. Vaitata e toru mataiti, kua aru ratou ia Iesu i runga i tana au tere tutu anga e kua rauka mai te tereni anga ei aronga tutu evangeria. (Mataio 10:7; Mareko 1:16, 18, 20, 38; Luka 4:43; 10:9) I te openga o taua tuatau, ia Nisana 14, 33 T.N., kua akakite a Iesu kia ratou: “Ko te akarongo mai iaku ra, ka rave katoa aia i teianei au angaanga taku e rave nei: e maata ua atu rai tana e rave i teia.” (Ioane 14:12) Ka akakite ua atu ta Iesu au pipi mei ta Iesu i rave ana inara na roto i tetai tuanga maata roa atu. Kua kite viviki mai oki ratou, e ko ratou e te au pipi katoatoa o te tuatau ki mua ka akakite ua atu ki te “pa enua katoa,” e tae ua atu “ki te openga o teianei ao.”​—Mataio 28:19, 20.

5. Na roto i teea au tu e puapingaia ai tatou mei te tereni anga ta Iesu i oronga ana ki tana au pipi?

⁵ Te noo nei tatou i “te openga o teianei ao.” (Mataio 24:3) Mei taua au pipi mua rai, kare e rauka ia tatou i te aru atu ia Iesu e te akara anga iaia i te tutu aere anga ki te tangata. Noatu rai, ka puapingaia tatou mei tana tereni anga na te tatau anga i roto i te Pipiria e akapeea aia i te tutu aere anga e eaa te au ikuikuanga tana i oronga ki tana au pipi. (Luka 10:1-11) Inara, ka uriuri teia atikara i tetai apinga puapinga ke roa atu ta Iesu i akaari ki tana au pipi​—te tu manako tika ki te angaanga tutu anga.

Manako Anga i te Tangata

6, 7. Eaa te tu no Iesu tei akariro i tana angaanga orometua ei meitaki tikai, e akapeea ra tatou me aru iaia i roto i teia tu nei?

⁶ Eaa ra a Iesu i oronga ai i taua akakite anga meitaki tikai? Okotai oki tumu no tona inangaro oonu e i te manako anga i te tangata. Kua akakite te tata taramo e ka “akaperepere [a Iesu] i tei apikepike ra e tei putaua.” (Salamo 72:13) Kua akatupu tikai aia i taua totou. Te karanga ra te Pipiria no runga i tetai atianga: “E kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) Kua kite katoa rai te aronga rave maata i te ara i tona manako e kua akapiri vaitata atu kiaia.​—Mataio 9:9-13; Luka 7:36-38; 19:1-10.

⁷ Ko tatou i teia tuatau nei ka meitaki tikai me akaari tatou i taua manako anga no te tangata. I mua ake ka piri atu ei ki roto i te angaanga orometua, eaa ka kore ei e rave i tetai manga tuatau i te akamanako e eaa ta te tangata e inangaro maata maira no te akakiteanga taau ka oronga atu kia ratou? E akamanako ana i to ratou au manamanata na te Patireia anake ra e akakore atu. Kia manako papu tikai i te katoatoa, i te mea e kare koe e kite e koai ma te ka ariu mai ki te karere. Ko tetai tangata taau ka aravei atu penei i pure ana no tetai tangata mei ia koe rai kia aere mai e kia tauturu mai iaia!

Akakeuia e te Aroa

8. I te aruanga ia Iesu, eaa te akakeu ra i tana au pipi kia tutu aere i te tuatua meitaki?

⁸ Te tuatua meitaki ta Iesu i akakite ra no runga te reira i te akatupuanga i to Iehova anoano, te akatapuanga i Tona ingoa, e te akatikaanga i Tona tu ngateitei​—te au maroanga puapinga maata ta te au tangata ka aro atu. (Mataio 6:9, 10) No tona aroa i tona Metua, kua akakeuia a Iesu kia tamou i tona tu tiratiratu e tae ua atu ki te openga e kia akakite ua atu no runga i te Patireia, te ka pau mai i taua au maroanga. (Ioane 14:31) No te mea e te aite ra te akakeuanga a te au pipi a Iesu o teia tuatau nei, te maroiroi ra ratou ia ratou e piri atura ki roto i te angaanga orometua. Te karanga ra te apotetoro ko Ioane e: “Teia oki te inangaro i te Atua, ko te akono i tana au akauenga,” kapiti anga i te akauenga kia tutu aere i te tuatua meitaki e kia akariro i te tangata ei pipi.​—1 Ioane 5:3; Mataio 28:19, 20.

9, 10. I te pae mai i te aroa i te Atua, eaa ua atu tetai aroa te akakeu ra ia tatou kia akakite ua atu?

⁹ Kua akakite a Iesu ki tana au pipi e: “Kua anoano kotou iaku ra, ka akono i taku ra au akauenga.  Tei iaia taku au akauenga, e kua akono aia i te reira ra, koia tei anoano mai iaku.” (Ioane 14:15, 21) No reira, na te aroa ia Iesu e akakeu ia tatou kia akakite i te tuatua mou e kia akono i tetai au mea ta Iesu i akaue mai. I tetai atianga i tona mama anga mai, kua raurau atu a Iesu ia Petero: “Ka angai i taku au punua mamoe. . . . Ka tiaki i taku au mamoe. . . . Ka angai i taku au mamoe.” Eaa te ka akakeu ia Petero kia rave i te reira? Kua akakite mai a Iesu i te pau anga i te ui akaou anga aia kia Petero e: “Te anoano na koe iaku? . . . Te anoano na koe iaku? . . . Te anoano na koe iaku?” Ae, no to Petero aroa no Iesu, tona anoano nona ra, i akakeu iaia kia akakite ua atu, kia kimi i ta Iesu “au mamoe,” e i muri maira kia riro mai ei tiaki no ratou i te pae vaerua.​—Ioane 21:15-17.

¹⁰ I teia tuatau, kare tatou i kite tikai ana ia Iesu mei ia Petero ra. Noatu rai, e marama anga oonu to tatou e eaa ta Iesu i rave no tatou. Te akakeuia nei to tatou au ngakau e te aroa maata tei taki atu iaia kia “akakoromaki i taua mate ra.” (Ebera 2:9; Ioane 15:13) Te manako ra tatou mei ta Paulo i manako ana i tana tata anga e: “Te riro nei oki matou i te aroa o te Mesia ra . . . E i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia.” (2 Korinetia 5:14, 15) Te akaari ra tatou e te akono pakari tikai ra tatou i to Iesu aroa no tatou e te aroa atura tatou iaia na te akono pakari tikai anga i te akauenga kia akakite ua atu. (1 Ioane 2:3-5) Auraka rava tatou e inangaro i te akono i tetai akara anga tuke ua no te angaanga tutu anga, e te manako ra tatou i to Iesu atinga ei mea noa ua.​—Ebera 10:29.

Akono Anga i te Manako Tika

11, 12. No teea akakoroanga i aere mai ei a Iesu ki te ao, e akapeea aia i te akono anga i tona manako ra?

¹¹ Ia Iesu i mua ia Ponotio Pilato, kua na ko atura aia: “I anau mai ei au nei, i aere mai ei au ki te ao nei, e akakite i te tuatua-mou. No te tuatua-mou aia ra, ka akarongo mai ïa i toku reo.” (Ioane 18:37) Kare a Iesu i akatika ana i tetai apinga kia tamanamanata mai iaia mei te akakite anga atu i te tuatua mou. To te Atua anoano ia nona ra.

¹² Kua timata tikai a Satani ia Iesu no runga i teia. I muri ua ake i te papetitoia anga a Iesu, ta Satani i oronga atu na te akariro anga iaia ei tangata maata i te ao, te oronga anga kiaia “te au basileia katoa o te ao nei, e to ratou kakā.” (Mataio 4:8, 9) I muri mai, kua inangaro te ngati Iuda i te akariro iaia ei ariki. (Ioane 6:15) Penei te manako ra etai pae e te au akameitakianga te ka rauka mai i te ariki anga a Iesu i taua au mea ra, penei ua ake te manako anga e ei ariki tangata ra, penei e maata atu ta Iesu ka rauka i te rave ei meitaki no te au tangata. Inara, kua kopae a Iesu, i taua tu manako anga. Tona manako maata tei runga i te akakite anga i te tuatua mou.

13, 14. (a) Eaa te mea kare i rauka ana i te tamanamanata ia Iesu mei tana angaanga puapinga ra? (e) Noatu e e putaua a Iesu i te pae materia, eaa tana i akatupu?

¹³ Kapiti atu, kare a Iesu i tamanamanataia ana e tetai aruaru anga i te au apinganui. Tei tupu mai, kare aia i akono ana i tetai oraanga apinganui. Kare oki ona uaorai kainga. I tetai atianga, kua tuatua aia: “E ana to te suoli, e toanga to te manu o te reva, kareka te Tamaiti a te tangata, kare ona urunga upoko.” (Mataio 8:20) Te mate anga a Iesu, ko tana apinga puapinga anake ra tei akakiteia mai ko te kakau ta te au vaeau Roma i tua kerero ra. (Ioane 19:23, 24) Inara, e puapinga kore ua ainei to Iesu oraanga? Kare rava!

¹⁴ E maata atu ta Iesu i akatupu i ta tetai ua atu tangata apinganui ra i akatupu ana. Kua tuatua a Paulo: “Kua kite oki kotou i te aroa ua o to tatou Atu ra o Iesu Mesia, e e apinga maata tona, no kotou ra, riro mai nei aia ei apinga kore, kia maata to kotou apinga i taua apinga kore nona ra.” (2 Korinetia 8:9; Philipi 2:5-8) Noatu e e putaua i te pae materia, na Iesu i akatuera i te ngutupa no te aronga akaaka tataki tai kia rekareka i te ora mutu kore ma te apa kore. Mei teaa to tatou mareka anga iaia! E mei teaa to tatou rekareka i te tutaki tei rauka iaia no tona akono anga i te manako  na te raveanga i to te Atua ra anoano!​—Salamo 40:8; Angaanga 2:32, 33, 36.

15. Eaa te mea puapinga maata atu i te apinganui?

¹⁵ Te au Kerititiano o teia tuatau tei tauta i te aru ia Iesu te kopae katoa ra kia kore e tamanamanataia mai e te aruaru anga i te apinganui. (1 Timoteo 6:9, 10) Te ariki ra ratou e ka rauka i te au apinganui i te akariro i te oraanga kia tau ua, inara kua kite ratou e kare a te apinganui e apinga e oronga mai no to ratou oraanga mutu kore no te tuatau ki mua. Me mate tetai Kerititiano, kare e puapinga tana apinganui kiaia mei to Iesu kakau rai kiaia ra i tona mate anga. (Koheleta 2:10, 11, 17-19; 7:12) Me mate tetai Kerititiano, te apinga puapinga maata anake ra nana ra tona pirianga ma Iehova raua ko Iesu Karaiti.​—Mataio 6:19-21; Luka 16:9.

Kare i Akaparuparuia e te Patoianga

16. Akapeea a Iesu i te aro anga atu i te patoianga?

¹⁶ Kare te patoianga i akatupu ana kia ruti ia Iesu tona manako anga no te akakite anga i te tuatua mou. Kare i akamareka kore ana iaia i te kite katoa anga e ka ope tana angaanga orometua i te enua nei na roto i tetai mate akaatinga anga. Ko Iesu, te karanga ra a Paulo: “No te rekareka tei tukuia ki mua iaia ra kua akakoromaki aia i te rakau tamamae anga, te akakoreanga i te akama, e kua noo ki raro i te tua katau o te terono o te Atua.” (Ebera 12:2, NW) Ka akara ana e kua ‘akakore a Iesu i te akama.’ Kare aia i manamanata ana e eaa ta te au enemi e manako maira nona. Tei runga tona manako i te rave anga i to te Atua anoano.

17. Eaa tei apiiia mai kia tatou no to Iesu tamou marie anga?

¹⁷ Te akono anga i te apiianga no to Iesu tamou marie anga, kua akamaroiroi a Paulo i te au Kerititiano e: “E akamanako matariki oki iaia ko tei tamou marie i te au tuatua akakino a te aronga rave ara i akakore ra i te meitaki no ratou uaorai, kia kore kotou e akaroiroi e ka akaparuparu ei i to kotou meta.” (Ebera 12:3, NW) E tika, e mea roiroi te aro anga atu i te patoianga me kore i te aviriia anga mei tera ra ki tera ra. E mea roiroi te kopae ua atu anga i te au akavare anga a teianei ao, penei ei mea reka kore no te kopu tangata tei akamaroiroi mai ia tatou e “kia akapuapinga oki” ia tatou uaorai. Inara, mei ia Iesu rai te akara ra tatou kia Iehova no te turu anga, ia tatou e tauta pakari ra i te tuku i te Patireia ko te mea mua ia i roto i to tatou oraanga.​—Mataio 6:33; Roma 15:13; 1 Korinetia 2:4.

18. Eaa te apiianga memeitaki ta tatou i apiiia mai mei te au tuatua a Iesu kia Petero?

¹⁸ Te kopae anga a Iesu kia kore e tamanamanataia mai kua akaariia mai i te akamata anga aia i te akakite ki tana au pipi no tona matenga te aere maira. Kua akamaroiroi a Petero ia Iesu e “auraka takiri ïa” kiaia uaorai e kua akapapu atura kiaia e “eiaa koe e peraia mai.” Kare a Iesu i akarongo atu ana ki tetai apinga te ka akaparuparu i tona manako i te rave anga i to Iehova anoano. Kua anga maira aia i tona tua kia Petero e kua tuatua maira: “Ka aere ke atu koe, e Satani, ki muri iaku, e maitu koe naku; kare koe i tau i ta  te Atua ra, ko ta te tangata ra taau i tau.” (Mataio 16:21-23) Kia tauta ua rai tatou i te kopae i te au manako o te tangata. Kareka ra, kia arataki uaia rai tatou e te au manako o te Atua.

Apai Anga Mai i te Au Akameitakianga Tika Tikai

19. Noatu e tangata rave temeio aia, eaa te tuanga puapinga maata no ta Iesu angaanga orometua?

¹⁹ Kua rave a Iesu i te au temeio e manganui ei akaari anga e koia te Mesia. Kua akatu katoaia mai aia mei te mate. Kua akakeu taua au angaanga i te tangata, inara kare a Iesu i aere ua mai ki te enua nei kia rave i tetai angaanga tauturu tangata. Kua aere mai aia i te akakite i te tuatua mou. Kua kite aia e ko tetai ua atu au akameitakianga i te pae materia tana ka oronga mai e tuatau poto uaia. E te aronga katoa tei akatuakaouia ka mate akaou. Na te akakite anake anga i te tuatua mou e rauka ai iaia i te tauturu i etai pae kia rauka te ora mutu kore.​—Luka 18:28-30.

20, 21. Akapeea te au Kerititiano mou i te akono anga i te parani i roto i te tumu anga no te au angaanga meitaki?

²⁰ I teia tuatau, kua tauta etai papaki i te aru i te au angaanga meitaki a Iesu na te patu anga i te au are maki me kore te rave anga i tetai au angaanga i roto i te aronga putaua o teianei ao. I etai au turanga, ka rave ratou i teia ma te tutaki anga maata kia ratou uaorai, e te akameitakiia nei to ratou tu ngakau tae; inara ko tetai ua atu tauturu anga ta ratou ka oronga mai e tuatau poto uaia. Na te Patireia anake ra e apai mai i te tauturu anga tinamou. No reira, te tamanako pakari ra te Au Kite o Iehova, mei ta Iesu i rave, na te akakite anga i te tuatua mou no runga i taua Patireia ra.

²¹ E tikai, te rave ra te au Kerititiano mou i te au angaanga meitaki. Kua tata a Paulo e: “Me e tuatau tau to tatou no te reira, kia rave tatou i tei meitaki ra ki te katoatoa, inara ki te aronga tikai tei piri mai kia tatou i te akarongo.” (Galatia 6:10, NW) I te au tuatau tumatetenga me kare me te anoano maata ra tetai tangata, kare tatou e tapupu i te ‘rave i tei meitaki ra’ ki to tatou au tangata tupu me kore ki to tatou au taeake Kerititiano. Noatu rai, ka tamou tatou i to tatou manako ki te ngai tau no te reira​—ki te akakite anga i te tuatua mou.

Apiiia mei ta Iesu Akaraanga

22. Eaa te au Kerititiano ka tutu aere ei ki to ratou au tangata tupu?

²² Kua tata a Paulo e: “E ae oki toku kia kore au e tutu i te evangelia!” (1 Korinetia 9:16) Kare ona tuke anga no runga i te tuatua meitaki no te mea te tutu aere anga i te reira e ora ia nona uaorai e no te aronga te akarongo maira kiaia. (1 Timoteo 4:16) Te akamanako ra rai tatou i ta tatou angaanga orometua ma taua tu rai. Te inangaro ra tatou i te tauturu i to tatou au tangata tupu. Te  inangaro ra tatou i te akaari i to tatou aroa kia Iehova. Te inangaro ra tatou i te akapapu i to tatou aroa no Iesu e to tatou ariki rekareka anga i tona aroa maata no tatou. No reira, ka tutu aere tatou i te tuatua meitaki e i reira te akono anga e ‘kare ma te akono i te anoano o te tangata, ma te akono ra i te inangaro o te Atua.’​—1 Petero 4:1, 2.

23, 24. (a) Eaa te apiianga tei apiiia mai kia tatou mei te temeio o te ika ra? (e) Koai ma i teia tuatau te oronga ra i te akakite ua atu?

²³ Mei ia Iesu rai, kare e ruti ia tatou to tatou manako anga me aviri mai tetai papaki ia tatou me kore te kopae riri mai anga i ta tatou karere. Kua apiiia mai kia tatou tetai apiianga mei te temeio ta Iesu i rave i te kapiki anga aia ia Petero raua ko Anederea kia aru iaia. Kua kite tatou e me akarongo tatou kia Iesu, ei tuatua akatutu anga, te tuku anga i ta tatou kupenga i roto i te au vai akara anga apinga kore ra, penei ka akatupu mai ta tatou ravakai anga i te au tupu anga. E manganui te aronga ravakai Kerititiano kua rauka mai tetai opu anga memeitaki i muri ake i te au mataiti no te angaanga anga i roto i te au vai akara anga apinga kore ra. Kua rauka i tetai papaki i te neke atu ki te ngai te puapinga maata ra te ravakai anga e kua rauka mai tetai opu anga memeitaki i reira. Noatu e eaa ta tatou ka rave, kare tatou e akamutu i te tuku ua atu i ta tatou au kupenga. Kua kite oki tatou e kare ake rai a Iesu i akakite mai e kua oti te angaanga tutu anga i roto i tetai tuanga o te enua nei.​—Mataio 24:14.

²⁴ Tere atu e ono mirioni te Au Kite o Iehova te angaanga maroiroi ra i teianei i roto i te 230 enua e ara atu. Ka akaari mai te itiu o Peperuare 1, 2005, o Te Punanga Tiaki i te ripoti mataiti o teianei ao no ta ratou angaanga i te mataiti tavini anga 2004. Ka akaari mai taua ripoti i ta Iehova akameitaki anga maata i runga i te angaanga tutu anga. I roto i te tuatau e vai nei no teia akatereanga o te au mea nei, kia rave ua atu tatou i te akono i ta Paulo au tuatua akakeu anga i te ngakau e: “E akakite ua koe i te tuatua; kia tamou marie rai.” (2 Timoteo 4:2) Kia rave ua atu tatou i te oronga i te akakite ua atu e tae ua atu i te akakite mai anga a Iehova e kua oti te angaanga.

Akamata anga i teia mataiti, kare te Ripoti Tavini Anga Mataiti na te Au Kite o Iehova i te Ao Katoa e tukunaia mai i roto i te itiu o Tianuare 1 o Te Punanga Tiaki. Ka neneiia te reira i roto i te itiu o Peperuare 1.

Ka Rauka Ainei ia Koe te Pau?

• Akapeea tatou e puapingaia ai mei te tereni anga ta Iesu i oronga ki tana au pipi?

• Eaa ra to Iesu manako no te au tangata tana i tutu aere atu?

• Eaa te akakeu ra ia tatou kia akakite ua atu?

• I roto i teea au mataara ka rauka ia tatou i te tamou i to tatou manako i te rave anga i to te Atua ra anoano, mei ta Iesu i rave ra?

[Au Uianga Apii]

[Tutu i te kapi 15]

Ka meitaki tikai tatou i roto i ta tatou angaanga orometua me akaari tatou i taua manako ra no te au tangata mei ta Iesu i rave ra

[Tutu i te kapi 16, 17]

Kua aere mai a Iesu ki te enua nei kia akakite i te tuatua mou

[Au Tutu i te kapi 17]

Te tamou meitaki ra te Au Kite o Iehova na te akakite ua atu anga