Tikusambizgika Kuti Tipharazge Mwakukwana
Tikusambizgika Kuti Tipharazge Mwakukwana
“Muti muŵenge ŵapanikizgi ŵane na mu Yerusalemu na mu Yudeya, na mu Samariya, na ku vigoti vya caru wuwo.”—MILIMO 1:8.
1, 2. Kasi Petrosi wakapika nchito wuli, ndipo ninjani wakamupa?
“YESU wa ku Nazarete . . . wakatilangulira kupharazga ku ŵanthu, na kupanikizga kuti Mweneuyo ndiyo ngwakwimikika na Ciuta kuŵa mweruzgi wa ŵamoyo na ŵakufwa.” (Milimo 10:38, 42) Apa mpositole Petrosi wakaphaliranga Korneliyo na mbumba yake za nchito iyo wakapika ya kupharazga.
2 Kasi Yesu wakamupa pawuli nchito yira? Petrosi wakwenera kuti wakaghanaghananga ivyo Yesu wakayowa wakati wawuka, nyengo yicoko waka pambere wandakwere kucanya. Pa nyengo yira, Yesu wakaphalira ŵasambiri ŵake ŵakugomezgeka kuti: “Muti muŵenge ŵapanikizgi ŵane na mu Yerusalemu na mu Yudeya, na mu Samariya, na ku vigoti vya caru wuwo.” (Milimo 1:8) Kweni pambere ivi vindacitike, Petrosi wakamanyanga kale kuti pakuŵa musambiri wa Yesu, wakwenera kuphalirako ŵanji cipulikano cake mwa Yesu.
Ŵakasambizgika Vilimika Vitatu
3. Kasi Yesu wakacita munthondwe wuli, ndipo wakaŵaphalira vici Petrosi na Andireya?
3 Myezi yikati yalutapo kufuma apo wakabapatizikira mu 29 C.E., Yesu wakapharazganga ku Nyanja ya Galileya uko Petrosi na munung’una wake Andireya ŵakaloŵanga somba. Iwo ŵakatokatoka usiku wose kweni ŵakakorapo kanthu cara. Kweni Yesu wakaŵaphalira kuti: ‘Kankhirani ku luji, ndipo muponye mikwawu yinu.’ Ŵakati ŵacita ivyo Yesu wakayowoya, “ŵakazinga [ŵakakora] somba zinandi comene. Ndipo mikwawu yawo yikaparukanga.” Pakuwona munthondwe uwu, Petrosi wakatenthema, kweni Yesu wakamukhwimiska, wakati: “Ungopanga; kufuma kuno ku lero uti uŵenge wakukora ŵanthu.”—Luka 5:4-10.
4. (a) Kasi Yesu wakawovwira wuli ŵasambiri ŵake kunozgekera kupharazga? (b) Kasi uteŵeti wa ŵasambiri ŵa Yesu ukupambana wuli na uwo mweneco wakacita?
4 Nyengo yeneyiyo, Petrosi na Andireya, kweniso Yakobe na Yohane ŵana ŵa Zebediya ŵakaleka mawato ghawo na kulondezga Yesu. Ŵakenda na Yesu pafupifupi vilimika vitatu apo wakapharazganga ndipo nawo ŵakasambizgika kupharazga. (Mateyu 10:7; Marko 1:16, 18, 20, 38; Luka 4:43; 10:9) Paumaliro, pa Nisan 14, 33 C.E., Yesu wakaŵaphalira kuti: “Uyo wakupulikana na ine, milimo iyo nkhucita ine, nayo wati wayicitenge; ndipo wati wacitenge milimo yikuru yakuluska iyi.” (Yohane 14:12) Ŵasambiri ŵa Yesu ŵakenera kupharazga mwakukwana nga ndiyo kweni kuluska iyo. Ŵakamanya kuti iwo na ŵasambiri ŵanyawo awo ŵaŵengeko ŵakenera kupharazga ku “mitundu yose,” mupaka “ku umaliro wa mgonezi.”—Mateyu 28:19, 20.
5. Kasi tingapindura wuli na umo Yesu wakasambizgira ŵalondezgi ŵake?
5 Tikukhala ku “umaliro wa mgonezi.” (Mateyu 24:3) Ise tingalongozgana nayo yayi Yesu nesi kumuwona kuti wakupharazgira ŵanthu, nga umo vikaŵira na ŵasambiri ŵakwambilira. Ndipouli, tingapindura na ivyo wakasambizga para tikuŵazga mu Baibolo umo wakapharazgiranga na ivyo wakaphaliranga ŵalondezgi ŵake. (Luka 10:1-11) Kweniso, mu nkhani yino tidumbiskanenge cinthu cinyake cakuzirwa comene ico Yesu wakalongora ŵasambiri ŵake, kutemwa nchito ya kupharazga.
Kughanaghanira Ŵanthu
6, 7. Nchivici cikamovwira Yesu kuti wayowoye mazgu ghakucontha, ndipo ise tingamuyezga wuli pa nkhani iyi?
6 Cifukwa wuli Yesu wakayowoya mazgu ghakucontha mtima nthena? Cifukwa cimoza nchakuti wakatemwanga na kughanaghanira comene ŵanthu. Wamasalmo wakayowoyerathu kuti Yesu ‘wazamufwira lusungu ŵakutemphentha na ŵakavu.’ (Salmo 72:13) Yesu wakafiska nadi ucimi uwu. Baibolo likuyowoya za cakucitika cimoza, likuti: “Wakati wawona mizinda, wakayilengera citima, cifukwa ŵakakweŵeka na kuparanyika nga ndi mberere zambura mliska.” (Mateyu 9:36) Nanga ŵangaŵa ŵakwananga ŵakamumanya kuti ni muwemi ndipo ŵakizanga kwa iyo.—Mateyu 9:9-13; Luka 7:36-38; 19:1-10.
7 Nase lero tingasambizga makora usange tikughanaghanira ŵanthu. Pambere tindalute mu uteŵeti, talekeraci kuti tighanaghanirepo umo uthenga uwo tayegha ukukhumbikwira ku ŵanthu? Ghanaghanirani masuzgo ghawo gheneagho ni Ufumu pera uzamumazga. Pharazgirani waliyose pakuti mukumanya yayi uyo wangapokera uthenga. Mwamanya wuli panji munthu uyo mukulutako walombanga kuti munthu munyake nga ndimwe walute kukamovwira!
Cikamutumanga Nchitemwa
8. Mwakuyana na Yesu, nchivici cikuŵatuma ŵalondezgi ŵake kupharazga makani ghawemi?
8 Yesu wakapharazganga makani ghawemi gha kufiskika kwa khumbo la Yehova, kutuŵiskika kwa zina Lake, na kuthuwuskika kwa muwuso wake, nkhani zakuzirwa comene ku ŵanthu. (Mateyu 6:9, 10) Pakuti wakatemwanga Awiske, Yesu wakagomezgeka mupaka kuumaliro ndipo wakapharazga Ufumu mwakukwana, pakuti ndiwo uzamumazga nkhani izi. (Yohane 14:31) Pakuti nawo ŵakutemwa Ciuta, ŵalondezgi ŵa Yesu lero ŵakulimbikira comene para ŵali mu uteŵeti. Mpositole Yohane wakati: “Kumutemwa Ciuta ncheneici, cakuti tisungilire malango ghake,” kusazgapo dango la kupharazga na kusambizga makani ghawemi.—1 Yohane 5:3; Mateyu 28:19, 20.
9, 10. Padera pa kutemwa Ciuta, nchivici cinyake ico cikutituma kuti tipharazgenge mwakukwana?
9 Yesu wakaphalira ŵalondezgi ŵake kuti: “Usange mukunditemwa, mwamkusungilira malango ghane. Uyo wali na malango ghane, ndipo wakughasungilira, ndiyo wakunditemwa.” (Yohane 14:15, 21) Ntheura, kutemwa Yesu kukwenera kutituma kuti tipanikizgire unenesko na kupulikira vinyake vyose ivyo Yesu wakalangura. Pa nyengo yinyake Yesu wakati wawuka ku ŵakufwa na kuwonekera ku ŵasambiri ŵake, wakaŵeyelera Petrosi kuti: “Leranga twana mberere twane. . . Liskanga mberere zane. . . . Leranga mberere zane.” Kasi nchivici cikenera kumutuma Petrosi kuti wacite ivi? Yesu wakazunura ico cikenera kumovwira apo wakafumba Petrosi kanandi waka kuti: “Kasi iwe ukunditemwa? . . . Kasi ukunditemwa? . . . Kasi ukunditemweska?” Inya, cifukwa ca kutemwa Yesu, Petrosi wakenera kupharazga mwakukwana, kusanga na kuliska “mberere” za Yesu.—Yohane 21:15-17.
10 Ise lero kuti tikwendezgana na Yesu nga ni Petrosi yayi. Kweni tikumanya kuzirwa kwa ivyo Yesu wakaticitira. Citemwa cikuru ico cikamutuma kuti “wacetere nyifwa munthu yose,” cikuticontha comene mu mitima yithu. (Ŵahebere 2:9; Yohane 15:13) Nase tikuyana waka na Paulosi uyo wakati: “Kutemwa kwa Khristu kukutipemberezga . . . Wakaŵafwira wose mwakuti awo mbamoyo, ŵaleke kujikhalira ŵekha, kweni mweneuyo wakaŵafwira.” (2 Ŵakorinte 5:14, 15) Para tikulimbikira kupharazga ndikuti tikulongora kuti tikucindika Yesu cifukwa ca citemwa cake, kweniso kuti nase tikumutemwa. (1 Yohane 2:3-5) Tikukhumba cara kuyitolera maseŵera nchito ya kupharazga, nga ni para sembe ya Yesu nja wakawaka.—Ŵahebere 10:29.
Kuŵika Mtima pa Cinthu Cimoza
11, 12. Kasi Yesu wakapukwa vici pano pasi, ndipo wakaŵika wuli mtima pa cinthu cimoza?
11 Apo Yesu wakaŵa panthazi pa Pontiyo Pilato wakati: ‘Ceneici ndico nkhababikira, ndipo ndico nkhizira mu caru, mwakuti ndipanikizgire unenesko.’ (Yohane 18:37) Yesu wakakhumba cara kuti kanthu kanyake kamutimbanizge pa kupanikizgira unenesko. Ciuta ndiyo wakamutuma kuti wacite ici.
12 Satana wakamuyezga Yesu pa nkhani yeneiyi. Nyengo yicoko waka wakati wabapatizika, Satana wakati wangamukwezga Yesu kuŵa munthu wakumanyikwa mu caru, kumupa “maufumu ghose gha pano pasi na ucindami wawo.” (Mateyu 4:8, 9) Nyengo yikati yalutapo, Ŵayuda ŵakakhumbanga kumukora ufumu. (Yohane 6:15) Ŵanyake ŵangaghanaghana kuti Yesu wazomerenge kuŵa fumu, mphanyi vinthu vikuŵendera makora ŵanthu, nakuti mphanyi waŵacitira vinthu viwemi vinandi. Kweni maghanoghano agha ndigho Yesu wakakana. Iyo mtima wake ukaŵa pa kupanikizgira unenesko.
13, 14. (a) Nchivici cikatondeka kumupatuska Yesu pa nchito yake? (b) Nangauli Yesu wakaŵa mukavu, kasi wakacitaci?
13 Kweniso, Yesu wakasuŵilira kupenja usambazi yayi. Pa cifukwa ici, wakaŵa musambazi cara. Nyumba nayo wakaŵavya. Lekani nyengo yinyake wakati: “Ŵakambwe ŵali na micembo, na viyuni vya mu dera vili na vivwimbo; kweni Mwana wa munthu walive pakugoneka mutu wake.” (Mateyu 8:20) Yesu wakati wafwa, cinthu cakuzirwa ico Baibolo likuzunura kuti wakaŵa naco ni munjilira pera uwo ŵankhondo ŵa ku Roma ŵakacitirapo mphenduzgo. (Yohane 19:23, 24) Ipo kasi umoyo wa Yesu ukaŵa wa wakawaka? Cara nadi!
14 Yesu wakacita vikuru comene kuluska ivyo ŵa cileraŵalanda ŵanyake ŵangacita. Paulosi wakati: “Mukumanya ucizi wa Fumu yithu Yesu Khristu, kuti, nanga wakaŵa musambazi, ndipouli cifukwa ca imwe wakazgoka mukavu, mwakuti imwe musambazgikire mu ukavu wake.” (2 Ŵakorinte 8:9; Ŵafilipi 2:5-8) Nangauli wakaŵa mukavu, kweni Yesu wakajura nthowa kuti ŵanthu ŵakujiyuyura ŵazakasange umoyo wamuyirayira mu urunji. Lekani tikumuwonga comene! Ndipo tikusekelera comene na njombe iyo wali kupokera cifukwa cakuti wakaŵika mtima pa kucita khumbo la Ciuta!—Salmo 40:8; Milimo 2:32, 33, 36.
15. Kasi cakuzirwa comene kuluska usambazi nchivici?
15 Lero, Ŵakhristu awo ŵakulimbikira kulondezga Yesu nawo ŵakukana kusuŵilira kupenja usambazi. (1 Timote 6:9, 10) Ŵakumanya kuti munthu wangakhala makora para ni musambazi, kweni usambazi ukupeleka umoyo wamuyirayira yayi. Para Mkhristu wafwa, usambazi wose ukuŵa wambura nchito nga umo ukaŵira munjilira wa Yesu wakati wafwa. (Mupharazgi 2:10, 11, 17-19; 7:12) Cinthu cakuzirwa ico cikupona para Mkhristu wafwa ni ubwezi wake na Yehova kweniso Yesu Khristu.—Mateyu 6:19-21; Luka 16:9.
Wakasunkhunyika Cara Para Wakasuskikanga
16. Kasi Yesu wakacita wuli apo wakasuskikanga?
16 Yesu wakaleka cara kupanikizgira unenesko apo wakasuskikanga. Nangauli wakamanyanga kuti paumaliro wa uteŵeti wake pa caru capasi wazamukomeka, wakagongowa yayi. Pakuyowoya vya Yesu, Paulosi wakati: “Cifukwa ca cimwemwe ico cikaŵikika panthazi zake, wakazizipizga [“khuni lakusuzgikirapo,” NW], wakelura soni, ndipo wali kukhala ku malyero gha cizumbe ca Ciuta.” (Ŵahebere 12:2) Wonani kuti Yesu “wakelura soni.” Wakapwelerako yayi na ivyo ŵalwani ŵake ŵakamughanaghaniranga. Mtima wake ukaŵa pa kucita khumbo la Ciuta.
17. Kasi tingasambirapo vici pa kuzizipizga kwa Yesu?
17 Pakutolera kuzizipizga kwa Yesu, Paulosi wakuciska Ŵakhristu kuti: “Ghanaghanani na mweneuyo wakazizipizga para ŵakwananga ŵakapindananga [nayo] . . . , mwakuti muleke kuŵa ŵakutomboroka, panji ŵakuwa nkhumbi mu mizimu yinu.” (Ŵahebere 12:3) Mbunenesko, cingaŵa cakuvuska kususkika na kunyozeka zuŵa na zuŵa. Vingalema kukana makhumbiro gha caru, ndipo nyengo zinyake ŵabali ŵithu awo ŵakukhumba kuti “tijipangire mbiri” ŵangatikwiyira. Kweni nga ni Yesu, tikulaŵiska kwa Yehova kuti watovwire uku tikudangizga Ufumu mu umoyo withu.—Mateyu 6:33; Ŵaroma 15:13; 1 Ŵakorinte 2:4.
18. Kasi tingasambirapo vici pa ivyo Yesu wakaphalira Petrosi?
18 Yesu wakalongora kuti wakakhumba cara kutimbanizgika apo wakamba kuphalira ŵasambiri ŵake za nyifwa yake. Petrosi wakamucenya Yesu kuti ‘kuŵe kutali na iyo’ na kumupanikizgira kuti ‘ivyo [wakayowoyanga] vingamuwira cara.’ Yesu wakakana kupulikira cilicose ico mphanyi cikamugulura nkhongono kuti waleke kucita khumbo la Yehova. Wakang’anamukira kwa Petrosi na kuti: “Luta ku nyuma zane, Satana: ndiwe cakundikhuŵazga: cifukwa kuti ukupwelera vya Ciuta cara, kweni vya ŵanthu.” (Mateyu 16:21-23) Nase tiŵikepo mtima kukana maghanoghano gha ŵanthu. Kweni tilongozgeke na maghanoghano gha Ciuta.
Wizenge na Vitumbiko Vyambura Kumara
19. Nangauli wakacitanga vya minthondwe, kasi cakuzirwa comene cikaŵa civici mu uteŵeti wa Yesu?
19 Yesu wakacitanga minthondwe kulongora kuti wakaŵa Mesiya. Wakawuskanga na ŵakufwa wuwo. Ŵanthu ŵanandi ŵakakopeka na milimo iyi, kweni Yesu wakiza pa caru capasi kuzakacizga waka ŵanthu yayi. Wakapukwa kuzakapanikizgira unenesko. Wakamanya kuti vinthu ivyo wakacitiranga ŵanthu vikaŵa vya kanyengo. Cifukwa nanga ni awo ŵakawuskika ŵakafwaso. Kweni unenesko uwovwirenge ŵanthu kusanga umoyo wamuyirayira.—Luka 18:28-30.
20, 21. Kasi Ŵakhristu ŵakucita wuli pa nkhani ya kucita milimo yiwemi?
20 Lero ŵanthu ŵakujura vipatala panji kovwira ŵakavu mu nthowa zinyake pakuyezga milimo yiwemi iyo Yesu wakacitanga. Nyengo zinyake ŵakujikomora kuti ŵawovwire ŵakavu, ndipo ŵakuwongeka comene; kweni wovwiri wose uwo ŵangapeleka ngwa kanyengo waka. Ni Ufumu pera uwo uzamupumuzga ŵanthu muyirayira. Lekani Ŵakaboni ŵa Yehova ŵakuŵika mtima pa kupanikizgira unenesko wakukhwaskana na Ufumu uwu, umo Yesu wakacitiranga.
21 Kweniso, Ŵakhristu ŵaunenesko ŵakucita milimo yiwemi. Paulosi wakalemba kuti: “Ipo ntheura nga ndi umo tiliri na mwaŵi, tiŵacitirenge wose uwemi, comenecomene awo mba mbumba ya cipulikano.” (Ŵagalatiya 6:10) Tikuzerezga yayi ‘kucitira uwemi’ ŵazengezgani ŵithu panji Ŵakhristu ŵanyithu, para masoka ghaŵawira panji para ŵazingiziwa. Kweni comene mtima withu wuli pa kupanikizgira unenesko.
Sambirani kwa Yesu
22. Cifukwa wuli Ŵakhristu ŵakupharazgira ŵazengezgani ŵawo?
22 Paulosi wakalemba kuti: “Soka kwa ine usange nkhuleka kupharazga ivangeli!” (1 Ŵakorinte 9:16) Iyo wakaŵa mukata yayi pa kupharazga makani ghawemi pakumanya kuti ndipo pakagona umoyo wake na wa awo ŵakamupulikanga. (1 Timote 4:16) Ndimo nase tikuwonera uteŵeti withu. Tikukhumba kuwovwira ŵazengezgani ŵithu na kulongora kuti tikutemwa Yehova. Tikukhumba kulongora kuti tikutemwa Yesu na kumuwonga cifukwa ca citemwa cake cikuru. Lekani tikupharazga makani ghawemi, ntheura kuti ‘tikukhaliraso mu makhumbiro gha ŵanthu cara, kweni mu khumbo la Ciuta.’—1 Petros 4:1, 2.
23, 24. (a) Kasi munthondwe wa Yesu wa kukora somba ukutisambizgaci? (b) Kasi mbanjani lero awo ŵakupharazga mwakukwana?
23 Nga ni Yesu, para ŵanthu ŵakutinyoza panji kukana uthenga withu, tikusunkhunyika cara. Munthondwe uwo Yesu wakacita para wakacemanga Petrosi na Andireya kuti ŵamulondezge ukutisambizga kanthu kanyake. Tikumanya kuti usange tikupulikira Yesu na kuponya mikwawu yithu nanga ni apo tikuwona kuti tingaphulapo kanthu cara, tingatumbikika. Ŵakhristu ŵanandi vyaŵendera makora ŵati ŵatokatoka vilimika vinandi mu vigaŵa ivyo ŵanthu mbanonono. Ŵanyake ŵasamukira uko ulovi ukwenda makora ndipo vyaŵendera. Tilekenge cara kuponya mikwawu yithu. Tikumanya kuti mupaka sono Yesu wacali wandayowoye kuti nchito ya kupharazga yakwana ku cigaŵa cinyake pa caru capasi.—Mateyu 24:14.
24 Ŵakaboni ŵa Yehova ŵakujumpha mamiliyoni ghankhondi na limoza ŵakutangwanika mu vyaru vyakujumpha 230. Mu Gongwe la Mulinda la Febuluwale 1, 2005, muzamuŵa lipoti la pa caru cose la cilimika ca uteŵeti ca 2004. Lipoti ili lizamulongora umo Yehova watumbikira nchito ya kupharazga. Uku tikulindilira kuti mgonezi uwu umare, tiyeni tisunge pa mtima mazgu gha Paulosi ghakuti: “Pharazga mazgu; uŵe mucanya.” (2 Timote 4:2) Ipo tilutilire kupharazga mwakukwana mupaka Yehova wazakati mbwenu nchito yamara.
Kwamba cilimika cino, Lipoti la Uteŵeti la Ŵakaboni ŵa Yehova lizamuŵaso mu Gongwe la Mulinda la Janyuwale 1 yayi. Lizamuŵa mu kope la Febuluwale 1.
Kasi Mungazgora?
• Kasi tingapindura wuli na umo Yesu wakasambizgira ŵasambiri ŵake?
• Kasi Yesu wakaŵawonanga wuli ŵanthu awo wakaŵapharazgiranga?
• Nchivici cikutituma kuti tipharazgenge mwakukwana?
• Kasi tingalimbikira wuli kucita khumbo la Ciuta, nga ni Yesu?
[Mafumbo]
[Cithuzithuzi pa peji 25]
Cikuru ico Yesu wakizira pa caru capasi ni nchito ya kupanikizgira unenesko
[Vithuzithuzi pa peji 26]
Ŵakaboni ŵa Yehova ŵakulimbikira kupharazga mwakukwana