Dipotšišo tše Tšwago go Babadi

Na mantšu a Stefano ao a lego go Ditiro 7:59 a bontšha gore dithapelo di swanetše go lebišwa go Jesu?

Ditiro 7:59 e re: “Xe ba thuma Stefano ka mafsika, yêna Stefano a rapêla [“dira boipiletšo,” NW] a re: Morêna Jesu! Amoxêla môya wa-ka.” Mantšu ao a rotošitše dipotšišo menaganong ya batho ba bangwe, ka ge Beibele e bolela gore Jehofa ke “Mokwi wa dithapêlô.” (Psalme 65:2) Na Stefano ruri o ile a rapela Jesu? Na se se be se tla bontšha gore Jesu o lekana le Jehofa?

King James Version e bolela gore Stefano o be a “dira kgopelo go Modimo.” Ka gona, ke mo go kwagalago gore ba bantši ba fihlelela phetho yeo e fihleletšwego ke mohlalosi wa Beibele e lego Matthew Henry, yo a itšego: “Stefano mo o rapela Kriste gomme le rena re swanetše go dira bjalo.” Lega go le bjalo, kgopolo yeo e fošagetše. Ka baka la’ng?

Barnes’ Notes on the New Testament e dumela ka go lebanya gore: “Lentšu Modimo ga le gona ka mangwalong a mathomo, gomme le be le sa swanela go tšwelela mangwalong a fetoletšwego. Gape ga le gona ka [mangwalong a seatla] goba diphetolelong tša bogologolo.” Go tlile bjang gore lentšu “Modimo” le tsenywe temaneng yeo? Seithuti Abiel Abbot Livermore se biditše se gore ke “mohlala wa tshekamelo ya bafetoledi ya go nyaka go latela thuto e fapanego ya bodumedi.” Ka gona, diphetolelo tše dintši tša mehleng yeno, di ntšha karolo ye e fošagetšego yeo e bolelago ka Modimo.

Lega go le bjalo, diphetolelo tše dintši di bolela gore Stefano o ile “a rapela” Jesu. Le gona mongwalo wa tlase wa New World Translation o bontšha gore polelwana “go dira boipiletšo” gape e ka bolela gore “go dira kgopelo; go rapela.” Na seo se be se ka se bontšhe gore Jesu ke Modimo Ra-matla-ohle? Aowa. Vine’s Expository Dictionary of Old and New Testament Words e hlalosa gore boemong bjo, lentšu la mathomo la Segerika e lego e·pi·ka·leʹo le bolela gore: “Go kgopela, go lopa; . . . go ipiletša go yo a lego matleng a go buša.” Paulo o ile a diriša lentšu le le swanago ge a be a bolela gore: “Ke ipiletša go Kesara!” (Ditiro 25:11, NW) Ka gona, The New English Bible e bolela ka mo go swanetšego gore Stefano o ile a “dira kgopelo” go Jesu.

Ke’ng se se ilego sa tutueletša Stefano gore a dire boipiletšo bjo bo bjalo? Go ya ka Ditiro 7:55, 56 Stefano o ile a “tlala Môya-mokxêthwa, a lelalêla lexodimong, a bôna letaxô la Modimo; a bôna Jesu à eme ka letsoxong le letona la Modimo.” Gantši Stefano o be a lebiša dikgopelo tša gagwe go Jehofa ka leina la Jesu. Eupša ge Stefano a bona Jesu yo a tsošitšwego ponong, go molaleng gore o ile a ikwa a lokologile go ipiletša go yena ka go lebanya, ka gore: “Morêna Jesu! Amoxêla môya wa-ka.” Stefano o be a tseba gore Jesu o neilwe matla a go tsoša bahu. (Johane 5:27-29) Ka go rialo o ile a kgopela Jesu gore a šireletše moya wa gagwe, goba matla a gagwe a bophelo, go ba go fihla letšatšing leo Jesu a bego a tla mo tsošetša bophelong bja go se hwe legodimong.

Na mantšu a Stefano a makopana a bea mohlala wa gore go rapelwe Jesu? Le gatee. Lebaka le lengwe ke gore Stefano o be a tloga a kgona go hlaola Jesu go Jehofa, ka gobane pego ye e bolela gore o ile a bona Jesu “à eme ka letsoxong le letona la Modimo.” Le gona, maemo a e be e se a tlwaelegilego. Boemo bjo bongwe bjo botee bjoo go bjona mantšu a bjalo a ilego a lebišwa go Jesu ke bja moapostola Johane, yo le yena a ilego a bolela le Jesu ka go lebanya ge a be a Mmona ponong.—Kutollo 22:16, 20.

Gaešita le ge Bakriste lehono ba lebiša dithapelo tša bona ka moka ka mo go swanetšego go Jehofa Modimo, le bona ba na le tumelo e tiilego ya gore Jesu ke “tsoxô le bophelô.” (Johane 11:25) Ka gona, go etša ge go ile gwa ba bjalo ka Stefano, go dumela bokgoning bja Jesu bja go tsoša balatedi ba gagwe bahung go ka re thuša le go re matlafatša dinakong tša diteko.