Au Uianga a te Aronga Tatau

Te tou maira ainei te aue a Setephano ia Angaanga 7:59 e kia tukuia te au pure kia Iesu?

Te karanga ra a Angaanga 7:59 e: “Kua peî iora ratou ia Setephano ki te toka, te pure ua ra aia, te na ko ra, E te Atu, e Iesu e, ka rave mai koe i toku vaerua.” Kua oronga mai taua au tuatua ra i te au uianga i roto i te manako o etai ra, i te mea e te karanga ra te Pipiria e ko Iehova “tei akarongo i te pure ra.” (Salamo 65:2) I pure tikai ana ainei a Setephano kia Iesu? Te akaari maira ainei teia e e aiteite rai a Iesu mei ia Iehova?

Te karanga ra te King James Version ia Setephano e te “kapiki ra i te Atua.” No reira, ma te marama, kua taopenga rai te manganui tei taeria ia e te tangata tuatua Pipiria ko Matthew Henry, tei karanga e: “Te pure ra a Setephano i konei kia Karaiti, e kia pera katoa rai tatou.” Inara, kua tarevake taua manako anga. No teaa ra?

Te akono maira te Barnes’ Notes on the New Testament i teia akatikaanga tika tikai: “Kare te tuatua Atua i roto oki i te tataanga mua, e kare e tau i reira kia tukunaia ki roto i te urianga. Kare oki te reira i roto i te [au tataanga] taito me kore te au urianga.” Akapeea roa ai te tuatua “Atua” i tauruia ai i roto i te reira irava? Kua karanga tetai tangata apiipii ko Abiel Abbot Livermore i teia “ei atianga ia no te akonoanga tu papaki tai a te aronga uri reo.” No reira te maataanga o te au urianga o teia tuatau nei, kua akakore i teia taikuanga pikikaa tikai ki te Atua.

Noatu rai, e manganui te au urianga te karanga ra e kua “pure” a Setephano kia Iesu. E te akaari maira te tuatua i raro ake i roto i te New World Translation e ko te tuatua “pati akatenga” ka rauka katoa i te aiteia ei “tautopa; pure.” Kare ainei e te akaari maira e ko Iesu te Atua Mana Katoatoa? Kare. Te akamarama maira te Vine’s Expository Dictionary of Old and New Testament Words e i roto i teia atianga, te tuatua Ereni mua, e·pi·ka·leʹo, te aiteanga: “Kia kapiki, kia tautopa, . . . kia pati akatenga atu ki tetai mana tutara.” Kua taangaanga katoa a Paulo i teia tuatua rai i te akakiteanga aia: “Ei ia Kaisara au.” (Angaanga 25:11) Kua tau, i reira, te karanga ra The New English Bible e kua “kapiki” atu a Setephano kia Iesu.

Eaa ra tei akakeu ia Setephano kia pati akatenga atu? Tei tau kia Angaanga 7:55, 56, ia Setephano, ‘kua ki akera aia i te vaerua tapu, akara tamou tikai atura ki runga i te rangi, e kite atura i te kakā o te Atua, e ia Iesu i te tu anga i te rima katau o te Atua ra.’ Tei matauia, kua oronga a Setephano i tana au patianga kia Iehova na roto i te ingoa o Iesu. Inara i te kiteanga ia Iesu tei akatu akaouia i roto i te orama, i te akaraanga kua manako ngoie ua a Setephano i te pati tika atu kiaia, i te na ko anga: “E te Atu, e Iesu e, ka rave mai koe i toku vaerua.” Kua kite oki a Setephano e kua orongaia kia Iesu te mana i te akatu akaou i tei mate ra. (Ioane 5:27-29) Kua pati i reira aia kia Iesu kia paruru i tona vaerua, me kore te mana oraanga, e tae ua atu ki te tuatau e ka akatu a Iesu iaia ki te oraanga mate kore i te rangi ra.

Kua akanoo ainei ta Setephano tuatua poto ua anga i tetai akaraanga no te pure anga kia Iesu? Kare roa. Te mea mua, kua akataka meitaki tikai a Setephano ia Iesu mei ia Iehova, no te mea te karanga ra te tataanga e kua kite atu aia ia Iesu i te “tu anga i te rima katau o te Atua ra.” Pera katoa, e au turanga tuke ake rai teia. Ko tetai atianga akaou mai ua o taua tuatua tei tuatuaia kia Iesu koia oki ko tera a te apotetoro ko Ioane, tei tuatua tika atu rai kia Iesu i te kiteanga aia Iaia i roto i te orama.​—Apokalupo 22:16, 20.

Noatu e te oronga meitaki ra te au Kerititiano i ta ratou au pure katoatoa ki te Atua ko Iehova, tei ia ratou katoa te akarongo ngaueue kore e ko Iesu “te tuakaouanga, e te ora.” (Ioane 11:25) Mei te reira katoa ia Setephano, no reira ko te irinaki i roto i te tu kite o Iesu i te akatuanga i tana au pipi mei te mate ra ka rauka katoa i te tauturu e te akaora ia tatou i te au tuatau no te timataanga.