Ijwi lya Jehova Lili Abuumi

Twaambo Tupati-Pati Kuzwa Mubbuku lya Samuele Lyabili

SENA kulibombya kubweendelezi bwa Jehova caamba kuti katumumvwida cakulondoka? Sena muntu uutondezya bululami lyoonse ulacita zintu zibotu mumeso aa Leza? Ino mbantu bali buti Leza mwini-mwini mbabona kuti ‘mbakumoyo wakwe’? (1 Samuele 13:14) Ibbuku lyamu Bbaibbele lya Samuele Wabili lilapa bwiinguzi bukkazika moyo kumibuzyo eeyi.

Ibbuku lya Samuele Wabili lyakalembwa a Gadi alimwi a Natani, ibasinsimi bobile ibakali kumvwana kapati a Mwami Davida wa Israyeli yansiku. * Mbwaanga lyakamanizigwa kulembwa mumwaka wa 1040 B.C.E., kumamanino aabweendelezi bwa Davida bwamyaka iili 40, ibbuku eeli lyaamba kapati zya Davida alimwi acilongwe cakwe a Jehova. Makani aaya aakondelezya kapati aamba mbuli ciinga cabantu cili mumapenzi kapati mbocakaba bwami bukamantene alimwi buzwidilide mubweendelezi bwamwami singuzu. Cibalo eeci cinjila mumoyo kapati cizwide makani aatondezya kulimvwa kwabantu nkobakatondezya canguzu.

DAVIDA “WAKALI KUYA BUKOMENA LYOONSE”

(2 Samuele 1:1–10:19)

Mbwaakalimvwa Davida naakatambula mulumbe walufwu lwa Saulo alimwi a Jonatani kuyubununa mbwaakali kubabona bantu aaba alimwi a Jehova. Ku Hebroni, Davida wabikkwa kuba mwami wamusyobo wa Juda. Mwana wa Saulo wazina lya Isiboseti wapegwa bweendelezi bwamisyobo yoonse ya Israyeli yasyaala. Davida “wakali kuya bukomena lyoonse,” alimwi kwiinde myaka iisika kuciloba alimwi acisela, wabikkwa kuba mwami wa Israyeli yoonse.—2 Samuele 5:10.

Davida wazunda akubweza Jerusalemu kuzwa kubana Jebusi akuucita kuba munzi mupati wabwami bwakwe. Lweendo lwakusaanguna naasoleka kulonzya bbokesi lyacizuminano kulitola ku Jerusalemu kwacitika ntenda. Nokuba boobo, mulweendo lwabili wazwidilila aboobo Davida wazyana kutondezya kukkomana. Jehova wapangana cizuminano cabwami a Davida. Davida wabazunda basinkondonyina mbwaanga Leza wazumanana kuba anguwe.

Mibuzyo Yamu Magwalo Iingulwa:

2:18—Nkaambo nzi Joabu abanabokwabo bobile ncobakali kwiitwa kuti bana botatwe ba Zeruya, izina lyabanyina? Mu Magwalo aa Cihebrayo, milongo yamazyalani kanji-kanji yakali kwiitwa kubelesya zina lyabausyi. Mulumi wa Zeruya ambweni wakafwa kacili mwana-mwana, antela wakabonwa kuti teeleli kubikkilizyigwa mu Magwalo Aasalala. Cilakonzyeka kuti Zeruya  wakalembwa akaambo kakuti wakali mucizyi wa Davida kuzwa mwida lyomwe naa limbi. (1 Makani 2:15, 16) Kaambo komwe buyo kaambidwe kujatikizya usyi wabana bokwabo botatwe aaba kajatikizya busena nkwaakazikkilwa ku Betelehemu.—2 Samuele 2:32.

3:29—Ncinzi ncokaamba kaambo kakuti ‘muntu weenda amusako’? Bamakaintu kanji-kanji mbabakali kusuma zisani kwiinda mukubelesya ntali zyakazambaidwe kumusako. Aboobo, kaambo aaka kalakonzya kwaamba baalumi ibatakali kweelela kucita milimo mbuli yabusikalumamba pele ibakali kweelela kubeleka milimo eeyo kanji-kanji yakali kucitwa abamakaintu.

5:1, 2—Cakatola ciindi cilamfwu buti kuzwa naakajaigwa Isiboseti kuti Davida abikkwe kuba mwami mu Israyeli yoonse? Cileelela kwaamba kuti Isiboseti wakatalika bulelo bwakwe ibwakatola myaka yobile mbwaakafwida buyo Saulo, aciindi nciconya eeci Davida wakatalika bulelo bwakwe ku Hebroni. Davida wakeendelezya Juda kali ku Hebroni kwamyaka iili ciloba alimwi acisela. Lino mbwaakabikkwa buyo kuba mwami wa Israyeli yoonse, wakalongela ku Jerusalemu iwakaba munzi wakwe mupati. Aboobo, kwakainda myaka iitandila kumusanu kuzwa naakafwa Isiboseti kuti Davida abe mwami wa Israyeli yoonse.—2 Samuele 2:3, 4, 8-11; 5:4, 5.

8:2—Mbangaye bana Moabu ibakajaigwa ciindi bana Israyeli nobakalwana ambabo? Mweelwe weelede kuti wakajanwa kwiinda mukweeleka muciindi cakubala. Kulibonya kuti Davida wakalailila bana Moabu koona ansi kababambene mumulongo. Mpoonya, mulongo wabantu uulede ansi wakaweeleka kubelesya ntambo. Kulibonya kuti, bana Moabu ibainda kucisela bakajaigwa, mpoonya ibatasiki kucisela teebakajaigwa.

Ziiyo Kulindiswe:

2:1; 5:19, 23. Davida wakamulomba Jehova katanaunka kuyookkala ku Hebroni alimwi akuyoolwana basinkondonyina. Aswebo tweelede kulomba busolozi bwa Jehova katutanasala cintu citujatikizya kumuuya.

3:26-30. Ikupilusya cibi kusololela kuntenda mpati.—Ba-Roma 12:17-19.

3:31-34; 4:9-12. Davida ncikozyanyo cibotu camuntu watakayanda kupilusya cibi alimwi akubikkilila.

5:12. Katuyeeya lyoonse kuti Jehova watuyiisya munzila zyakwe akupa kuti cikonzyeke kulindiswe kuba balongwe bakwe.

6:1-7. Nokuba kuti Davida wakajisi makanze mabotu, ikusoleka kwakwe kuti alonzye Bbokesi kwiinda mukubelesya ŋola kwakali kutyola mulawo wa Leza, aboobo cakapa kuti atazwidilili. (Kulonga 25:13, 14; Myeelwe 4:15, 19; 7:7-9) Alimwi Uza ncaakacita kusoleka kujata Bbokesi citondezya kuti makanze mabotu taacinci zintu Leza nzyayanda.

6:8, 9. Mubukkale bukatazyide, Davida wakasaanguna kubijilwa, mpoonya wakayoowa—ambweni nokuba kumutongooka buya Jehova akaambo kantenda yakacitika. Tweelede kucenjela kutegwa tutamutongooki Jehova kumapenzi aaboola akaambo kakutaabikila maano malailile aakwe.

7:18, 22, 23, 26. Ikulicesya kwa Davida, ikukomba buyo Jehova alimwi akubikkila maano kukusumpula zina lya Leza, mbube swebo mbotweelede kwiiya.

8:2. Businsimi bwakaambwa myaka iili 400 musyule bwazuzikizyigwa. (Myeelwe 24:17) Ijwi lya Jehova lilasyomeka lyoonse.

9:1, 6, 7. Davida wakabamba cisyomezyo cakwe. Aswebo tweelede kukanza kuzuzikizya ncotwasyomezya.

JEHOVA WALETA MAPENZI KUMUNANIKE WAKWE

(2 Samuele 11:1–20:26)

Jehova wakaambila Davida kuti: “Langa! Ndakubusizya bubi buzwa muŋanda yako omwini. Njookunyanzya banakazi bako kumeso aako akubaabila mweenzinyoko, elyo uyoolalika banakazi bako izuba kalibala.” (2 Samuele 12:11) Nkaambo nzi kapa kuti majwi aaya aambwe? Nkaambo kakubisya kwa Davida a Bateseba. Nokuba kuti Davida iweempwa walekelelwa, takonzyi kweeleba zintu ziboola akaambo kacibi cakwe.

Cakusaanguna mwana ngwaazyala Bateseba wafwa. Mpoonya mwana wa Davida Tamara nakalindu wajatwa a Amnoni imwanaakwabo wada limbi. Abisalomu, mwanaakwabo Tamara wajaya  Amnoni kutegwa apilusye cibi. Abisalomu wazangila bausyi akulibikka kuba mwami ku Hebroni. Davida camupa kuccija kuzwa mu Jerusalemu. Abisalomu woonana abasimamambe babausyi ibali kkumi ibakasyaala munsi kuti balanganye munzi. Davida wapiluka kuyooba mwami eelyo Abisalomu naajaigwa. Ikuzanga kwamuna Benjamini wazina lya Seba kwamana naajaigwa.

Mibuzyo Yamu Magwalo Iingulwa:

14:7—Ino ncinzi ciimininwa a “mulilo wangu”? Ikuyaka kwamulilo kulabelesyegwa kwaamba lunyungu lupona.

19:29—Nkaambo nzi Davida ncaakavwiila mbuli mbwaakacita kubupanduluzi bwa Mefibosete? Naakamvwa kuli Mefibosete, Davida weelede kuti wakabona kuti wakalubizya mukuzumina majwi aa Ziba kakunyina kwaayeeyesya. (2 Samuele 16:1-4; 19:24-28) Cakutadooneka, eeci cakamunyemya Davida aboobo tanaakali kuyanda kumvwa makani aambi kujatikizya kaambo aaka.

Ziiyo Kulindiswe:

11:2-15. Makani aataindi mumbali kujatikizya kulubizya kwa Davida asinizya kaambo kakuti Ibbaibbele ndi Jwi lya Leza lyakasololelwa amuuya.

11:16-27. Twacita cibi cipati, tatweelede kusisa mbuli mbwaakacita Davida pe. Pele tweelede kwaamba cibi cesu kuli Jehova alimwi akulomba lugwasyo kubaalu mumbungano.—Tusimpi 28:13; Jakobo 5:13-16.

12:1-14. Natani wakapa cikozyanyo cibotu kubaalu babikkidwe mumbungano. Beelede kugwasya baabo ibabisya kululamika bukkale bwabo. Baalu beelede kuubeleka caluzibo kapati mulimo ooyu.

12:15-23. Ikuzizyiba kabotu zyakamucitikila kwakamugwasya Davida kubweza ntaamu yeelede naakali mumapenzi.

15:12; 16:15, 21, 23. Nocakalibonya kuti Abisalomu ulaba mwami, kulisumpula akuyandisya kuba ampuwo kwakapa sikupa lulayo musongo kapati Ahitofeli kuba sikwaaba. Ikuba abusongo kakunyina kulicesya alimwi akulibombya kulakonzya kuba kakole.

19:24, 30. Mefibosete wakalumba kapati kuluzyalo lwa Davida. Cakulisungula wakalibombya kukusala kwa Davida kujatikizya Ziba. Ikumulumba Jehova alimwi ambunga yakwe kweelede kutukulwaizya kuba bantu balibombya.

20:21, 22. Ibusongo bwamuntu omwe bulakonzya kukwabilila ntenda yatisikile bantu banji.—Mukambausi 9:14, 15.

“ATWAABWE MUMAANZA AA-JEHOVA”

(2 Samuele 21:1–24:25)

Kwaba ciyumayuma kwamyaka yotatwe akaambo kamulandu wabulowa wa Saulo naajaya bana Gibeoni. (Joshua 9:15) Kutegwa ulekelelwe mulandu wabulowa ooyu, bana Gibeoni balomba kuti bana balombe  bali ciloba ba Saulo bajaigwe. Davida wabazumizya bana Gibeoni kuti babajaye, aboobo ciyumayuma camana nokwawa mvwula mpati. Bana Filisti bone basintanze “bakajayigwa kumaanza aa-Davida abalanda bakwe.”—2 Samuele 21:22.

Davida wacita cibi cipati kwiinda mukulailila kubala bantu ikutali kwamumulawo. Weempwa alimwi akusala ‘kwaabwa mumaanza aa Jehova.’ (2 Samuele 24:14) Akaambo kaceeci, ibali 70,000 bajaigwa kucilwazi. Davida watobela malailile aa Jehova, aboobo lunyonyooko lwamana.

Mibuzyo Yamu Magwalo Iingulwa:

21:8—Mbuti mbocinga caambwa kuti mwana wa Saulo Mikala wakajisi bana bosanwe, kakuli 2 Samuele 6:23 yaamba kuti wakafwa katajisi mwana? Ikaambo kalimvwisya kapati nkakuti aaba bakali bana bamwanaakwabo Mikala wazina lya Merabu, iwakakwetwe kuli Adriyeli. Kulibonya kuti, Merabu wakafwa kacili mwana-mwana aboobo Mikala ngowakabakomezya bana.

21:9, 10—Ino Rizipa wakatola ciindi cilamfwu buti kalindilila mitunta yabana bakwe bobile alimwi abazukulu ba Saulo bosanwe ibakajaigwa abana Gibeoni? Bantu aaba ibali ciloba bakajaigwa “kumatalikilo aaciindi cakutebula”—mwezi wa Miyoba antela wa Mukubwekaangala. Mitunta yabo yakasiigwa antangalala atala amulundu. Rizipa wakali kwiilindilila mitunta iili ciloba masikati amasiku kusikila Jehova naakatondezya kuti kunyema kwakwe kwamana kwiinda mukumanisya ciyumayuma. Kunyina mvwula mpati yakali kunga ilalangilwa kacitanamana ciindi cakutebula mumwezi wa Kavwumbikaniini. Aboobo, Rizipa weelede kuti wakazumanana kalindilila mitunta kwamyezi iili musanu naa cisambomwe. Kuzwa waawo, Davida wakalailila kuti mafwuwa aabaalumi aabo azikkwe.

24:1—Nkaambo nzi kubala bantu ncocakaba cinyonyoono cipati kuli Davida? Ikubala bantu kukugama kunyina nokwakakasyidwe pe mu Mulawo. (Myeelwe 1:1-3; 26:1-4) Ibbaibbele talyaambi kaambo keni kakapa kuti Davida abale bantu. Pele ibbuku lya 1 Makani 21:1 litondezya kuti Saatani ngowakamukulwaizya kucita boobo. Kufwumbwa mbocakabede, silutwe wakwe wabasikalumamba, Joabu, wakazyiba kuti makanze aa Davida aakubala bantu akalilubide aboobo wakasoleka kumukasya kuti ataciti boobo.

Ziiyo Kulindiswe:

22:2-51. Elo kaka lwiimbo lwa Davida lulamutondezya kabotu Jehova kuti ngu Leza wakasimpe ngotweelede kusyoma cakumaninina!

23:15-17. Davida wakali kuulemeka kapati mulawo wa Leza uujatikizya buumi alimwi abulowa cakunga aciindi eeci wakakaka kucita nociba cintu cakali kulibonya buyo kuti cityola mulawo ooyo. Tweelede kuba abube buli boobo kumalailile oonse aa Leza.

24:10. Manjezeezya aa Davida akamukulwaizya kweempwa. Sena manjezeezya eesu acibeleka kabotu cakunga inga atupa kucita mbubwenya oobo?

24:14. Davida wakalizyi kabotu-kabotu kuti Jehova uli aluzyalo kapati kwiinda bantu. Sena tulijisi lusyomo luli boobo?

24:17. Davida wakalimvwa bubi kuti cinyonyoono cakwe cakaleta mapenzi kubantu boonse. Sizibi iweempwa weelede kubijilwa kujatikizya masampu ngaaletela mbungano akaambo kamicito yakwe.

Tulakonzya Kuba ‘Bantu Bakumoyo wa Leza’

Mwami wabili wa Israyeli wakaba ‘muntu wakumoyo wa Jehova.’ (1 Samuele 13:14) Davida kunyina naakazumbauzya zyeelelo zya Jehova ziluleme alimwi tanaakayanda kulicitila zintu kakunyina kusololelwa a Leza. Lyoonse Davida naakali kulubizya, wakali kucizumina cibi cakwe alulayo alimwi wakali kululamika nzila zyakwe. Davida wakali mwaalumi uululeme. Ncamaano kuba mbuli nguwe, ikapati notwalubizya.

Makani aabuumi bwa Davida atondezya kuti kulibombya kubweendelezi bwa Jehova caamba kutobela zyeelelo zyakwe kujatikizya ciluleme acilubide alimwi akusolekesya kuzitobela katuli balulami. Eeci cilakonzyeka kulindiswe. Elo kaka tulakonzya kulumba kapati kuziiyo nzyotwiiya kubbuku lya Samuele Lyabili! Masimpe, mulumbe wakasololelwa amuuya uujanika mubbuku eeli, uli abuumi alimwi anguzu.—Ba-Hebrayo 4:12.

Bupanduluzi buyungizidwe

[Cifwanikiso icili apeeji 8]

Ikuyeeya lyoonse wakamubikka kuba mwami kwakamugwasya Davida kuzumanana kulicesya

[Zifwanikiso izili apeeji 10]

“Langa! Ndakubusizya bubi buzwa muŋanda yako omwini”

Bateseba

Tamara

Amnoni