Mga Manulonda—Kon sa Unsang Paagi Kita Apektado Nila

NGA gibatbat ang panan-awon nga iyang nakita nga naglangkit sa pamilya sa mga manulonda sa Diyos, ang manalagnang si Daniel misulat: “Dihay kaliboan ka libo [nga mga manulonda] nga nag-alagad [sa Diyos], ug napulo ka libo ka napulo ka libo nga nagbarog diha sa iyang atubangan.” (Daniel 7:10) Kining bersikuloha nagbutyag sa katuyoan sa Diyos sa paglalang ug mga manulonda. Sila magaalagad kaniya ug andam sa pagtuman sa iyang mga instruksiyon.

Ang Diyos mogamit ug mga manulonda sa pagbuhat sa pipila ka buluhatong may kalabotan sa mga tawo. Atong hisgotan kon sa unsang paagi iyang gamiton sila sa pagpalig-on ug pagpanalipod sa iyang katawhan, sa pagpahayag ug mga mensahe ngadto sa mga tawo, ug sa pagpatuman sa iyang paghukom diha sa mga daotan.

Mga Manulonda Magpalig-on ug Manalipod

Sukad gayod nga ang espiritung mga linalang nakakita sa paglalang sa yuta ug sa unang mga tawo, sila nagpakitag dulot nga interes sa mga tawo. Sa pagpahayag ingong kaalam nga gipersonipikar, si Jesu-Kristo, sa wala pa siya maglungtad ingong tawo, miingon: “Ang mga butang nga akong gikahinangpan maoy uban sa mga anak sa mga tawo.” (Proverbio 8:31) Ug ang Bibliya nagpahibalo kanato nga “ang mga manulonda nangandoy sa pagsud-ong” sa mga panghitabo bahin kang Kristo ug sa umaabot nga gikapadayag ngadto sa mga manalagna sa Diyos.—1 Pedro 1:11, 12.

Sa paglabay sa panahon, nakita sa mga manulonda nga ang kinabag-an sa katawhan wala mag-alagad sa ilang mahigugmaong Maglalalang. Seguradong kadto nakapasubo kaayo sa matinumanong mga manulonda! Sa laing bahin, sa dihang ang usa ka makasasala maghinulsol ug mobalik sa pagsimba kang Jehova, “may kalipay taliwala sa mga manulonda.” (Lucas 15:10) Ang mga manulonda adunay dulot nga kabalaka sa kaayohan niadtong nag-alagad sa Diyos, ug si Jehova subsob nga naggamit kanila sa pagpalig-on ug pagpanalipod sa iyang matinumanong mga alagad sa yuta. (Hebreohanon 1:14) Tagda ang pipila ka pananglitan.

Duha ka manulonda mitabang sa matarong nga si Lot ug sa iyang mga anak nga babaye aron maluwas sa pagkalaglag sa daotang mga siyudad sa Sodoma ug Gomora pinaagi sa pagkuyog kanila sa  paggawas niadtong dapita. a (Genesis 19:1, 15-26) Kasiglohan sa ulahi, bisag ang manalagnang si Daniel gitambog ngadto sa langob sa mga leyon, siya wala maunsa. Ngano? “Ang akong Diyos nagpadala sa iyang manulonda ug nagtak-om sa baba sa mga leyon,” siya mipahayag. (Daniel 6:22) Ang mga manulonda mitabang kang Jesus sa sinugdanan sa iyang ministeryo sa yuta. (Marcos 1:13) Ug sa dayon nang mamatay si Jesus, usa ka manulonda ang mipakita kaniya ug “nagpalig-on kaniya.” (Lucas 22:43) Nakapadasig gayod kang Jesus ang pagtabang sa manulonda niadtong lisod nga yugto sa iyang kinabuhi! Ug usa usab ka manulonda ang nagpagawas kang apostol Pedro gikan sa bilanggoan.—Buhat 12:6-11.

Ang mga manulonda manalipod ba kanato karon? Kon simbahon nato si Jehova sumala sa iyang Pulong, gipasaligan kita nga ang iyang gamhanan, dili-makita nga mga manulonda manalipod kanato. Ang Bibliya nagsaad: “Ang manulonda ni Jehova nagkampo libot niadtong nangahadlok kaniya, ug siya nagluwas kanila.”—Salmo 34:7.

Bisan pa niana, pagailhon nato nga ang mga manulonda sa panguna magabuhat sa buluhaton sa Diyos, dili ang sa mga tawo. (Salmo 103:20, 21) Mosanong sila ngadto sa pagtultol sa Diyos, dili sa mga awhag o mga hangyo sa tawo. Busa, ang angayng sangpiton alang sa tabang mao si Jehova nga Diyos, dili ang mga manulonda. (Mateo 26:53) Hinuon, sanglit dili nato makita ang mga manulonda, dili kita makatino kon asa kutob gamiton sila sa Diyos diha sa pagtabang sa mga tawo sa nagkalainlaing mga butang. Apan nahibalo kita nga si Jehova ‘magpakita sa iyang kusog alang niadtong kansang kasingkasing maoy bug-os alang kaniya.’ (2 Cronicas 16:9; Salmo 91:11) Ug gipasaligan kita nga “bisan unsay atong pangayoon sumala sa iyang kabubut-on, siya magpatalinghog kanato.”—1 Juan 5:14.

Ang Kasulatan nagtug-an usab kanato nga ang atong mga pag-ampo ug pagsimba angayng itumong lamang sa Diyos. (Exodo 20:3-5; Salmo 5:1, 2; Mateo 6:9) Ang matinumanong mga manulonda nagdasig kanato sa paghimo niana. Pananglitan, sa dihang gisulayan ni apostol Juan ang pagsimba sa usa ka manulonda, ang maong espiritung linalang nagbadlong kaniya, nga miingon: “Pagbantay! Ayaw kanag buhata! . . . Simbaha ang Diyos.”—Pinadayag 19:10.

Mga Manulonda Magpahayag sa mga Mensahe sa Diyos

Ang pulong “manulonda” nagkahulogang “mensahero,” ug kana maoy laing paagi nga ang mga manulonda nag-alagad sa Diyos—ingong iyang mga mensahero ngadto sa mga tawo. Pananglitan, “ang manulonda nga si Gabriel gipadala gikan sa Diyos ngadto sa usa ka siyudad sa Galilea nga ginganlag Nasaret.” Ngano? Aron pahibaloon ang usa ka batan-ong babaye nga ginganlag Maria nga bisag siya usa ka ulay, siya manamkon ug manganak sa usa ka anak lalaki nga nganlang Jesus. (Lucas 1:26-31) Usa usab ka manulonda ang gipadala ngadto sa mga magbalantay diha sa kapatagan aron pahibaloon sila nga “ang Kristo nga Ginoo” natawo. (Lucas 2:8-11) Sa susamang paagi, ang mga manulonda nagpahayag ug mga mensahe gikan sa Diyos ngadto kang Abraham, Moises, Jesus, ug uban pa nga gihisgotan sa Bibliya.—Genesis 18:1-5, 10; Exodo 3:1, 2; Lucas 22:39-43.

Sa unsang paagi ang mga manulonda nag-alagad ingong mga mensahero sa Diyos karon? Tagda ang buluhaton nga gitagna ni Jesus nga pagabuhaton sa iyang mga sumusunod una pa sa kataposan niining sistema sa mga butang. Matod niya: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:3, 14) Kada tuig, ang mga Saksi ni Jehova nagagugol ug kapin sa  usa ka bilyong oras sa pagwali sa maayong balita sa Gingharian sa Diyos. Apan nahibalo ka ba nga ang mga manulonda nalangkit usab sa maong buluhaton? Si apostol Juan naghisgot sa usa ka panan-awon nga iyang nakita, nga miingon: “Nakita ko ang laing manulonda . . . , ug siya adunay walay kataposang maayong balita nga ipahayag ingong makapalipay nga balita ngadto sa nanagpuyo sa yuta, ug ngadto sa matag nasod ug tribo ug pinulongan ug katawhan.” (Pinadayag 14:6, 7) Kining maong teksto nagpasiugda sa kinalabwang buluhaton sa mga manulonda alang sa mga tawo karon.

Nakita sa mga Saksi ni Jehova ang ebidensiya sa pagtultol sa manulonda samtang sila nagabuhat sa ilang pagwali diha sa balaybalay. Subsob silang makahibalag ug mga tawo nga bag-o pang nag-ampo nga aduna untay motabang kanila sa pagsabot sa mga katuyoan sa Diyos. Ingong resulta sa paggiya sa mga manulonda ug sa kalihokan sa mga Saksi, kada tuig ginatos ka libong mga tawo ang nakaila kang Jehova. Hinaot makabenepisyo ka gikan sa maong nagaluwas-ug-kinabuhi nga buluhaton nga gihimo ubos sa pagtultol sa mga manulonda.

Mga Manulonda Magpatuman sa Paghukom sa Diyos

Bisag sila wala awtorisahi sa paghukom sa mga tawo, ang mga manulonda dili lamang mga tumatan-aw. (Juan 5:22; Hebreohanon 12:22, 23) Kay nagsilbing mga tiglaglag, sila nagpatuman sa mga paghukom sa Diyos sa nangaging panahon. Pananglitan, migamit ang Diyos ug mga manulonda sa iyang pagpakig-away batok sa karaang mga Ehiptohanon, kinsa nagbihag sa mga Israelinhon. (Salmo 78:49) Ug sa usa lang ka gabii “ang manulonda ni Jehova” mipatay sa usa ka gatos ug kawaloag-lima ka libo ka sundalo sa kampo sa usa ka kaaway sa katawhan sa Diyos.—2 Hari 19:35.

Sa umaabot usab, ipatuman sa mga manulonda ang dili-paborableng paghukom sa Diyos. Si Jesus moabot “uban sa iyang gamhanang mga manulonda sa nagdilaab nga kalayo, sa dihang siya manimalos kanilang wala makaila sa Diyos ug kanilang wala magsunod sa maayong balita.” (2 Tesalonica 1:7, 8) Hinuon, ang maong kalaglagan ipahamtang lamang niadtong dili modawat sa mensahe nga karon ginawali sa tibuok yuta uban sa tabang sa mga manulonda. Kadtong nangita sa Diyos ug nagsunod sa Kasulatanhong mga pagtulon-an dili pagalaglagon.—Sofonias 2:3.

Pagkamapasalamaton gayod nato tungod sa matinumanong mga manulonda, kinsa kanunayng nagatuman sa mga instruksiyon sa Diyos! Si Jehova nagagamit kanila sa pagtabang ug pagpanalipod sa iyang maunongong mga alagad sa yuta. Makapahupay gayod kini kanato tungod kay adunay makuyawng espiritung mga linalang nga gitawag ug mga demonyo nga buot modaot kanato.

Mga Demonyo—Kinsa Sila?

Sulod sa 15 ka siglo human sa paglimbong ni Satanas kang Eva didto sa Eden, nakita sa pamilya sa mga  manulonda sa Diyos nga si Satanas nga Yawa milampos sa pagpatalikod gikan sa Diyos sa tanang tawo gawas sa pipila ra ka matinumanon, sama kang Abel, Enoc, ug Noe. (Genesis 3:1-7; Hebreohanon 11:4, 5, 7) Ang pipila sa mga manulonda misugod usab sa pagsunod kang Satanas. Ang Bibliya nagtawag kanila nga mga espiritu nga wala magmasinugtanon “sa mga adlaw ni Noe.” (1 Pedro 3:19, 20) Sa unsang paagi nadayag ang ilang pagkadili-masinugtanon?

Sa panahon ni Noe ang wala-matino nga gidaghanon sa rebelyosong mga manulonda mibiya sa ilang dapit sa langitnong pamilya sa Diyos, nanaog nganhi sa yuta, ug nagsul-ob ug unodnong mga lawas. Ngano? Nakaugmad sila ug tinguha nga makighilawas sa mga babaye. Kadto misangpot sa ilang pagpanganak ug mga anak nga gitawag ug mga Nepilim, kinsa nahimong mapintasong mga higante. Dugang pa, “ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon.” Bisan pa niadto, wala itugot ni Jehova nga Diyos nga magpadayon ang maong kahiwian sa tawo. Iyang gipahinabo ang usa ka Lunop, nga nagbanlas sa tanang daotang tawo uban ang mga Nepilim. Ang naluwas lamang nga mga tawo mao ang matinumanong mga alagad sa Diyos.—Genesis 6:1-7, 17; 7:23.

Ang rebelyosong mga manulonda nakalingkawas sa kalaglagan sa panahon sa Lunop. Ilang gibiyaan ang ilang unodnong mga lawas ug sila namalik ngadto sa dapit sa mga espiritu ingong espiritung mga linalang. Human niadto, sila ginganlan nga mga demonyo. Sila midapig kang Satanas nga Yawa, kinsa gitawag “ang magmamando sa mga demonyo.” (Mateo 12:24-27) Sama sa ilang magmamando, ang mga demonyo nangandoy nga simbahon sa mga tawo.

Ang mga demonyo makuyaw, apan dili kita angayng mahadlok kanila. Limitado ang ilang gahom. Sa dihang ang dili-masinugtanong mga manulonda namalik sa langit, wala na sila tugoti nga masakop sa pamilya sa Diyos sa matinumanong mga manulonda. Sa kapulihay, gibulag sila gikan sa bisan unsang espirituwal nga kalamdagan gikan sa Diyos, nga adunay mangiob lamang nga palaaboton. Sa pagkatinuod, sila gibutang sa kahimtang sa espirituwal nga kangitngitan nga nailhang Tartaro. (2 Pedro 2:4) Gigapos sila ni Jehova sa “walay-kataposang mga gapos,” mao nga sila anaa sa espirituwal nga kangitngitan. Dugang pa, sila dili na karon makasul-ob ug unodnong mga lawas.—Judas 6.

Unsay Angay Nimong Buhaton?

Ang mga demonyo ba makaimpluwensiya gihapon sa mga tawo? Oo, ginahimo nila kana pinaagi sa paggamit ug “mga malipatlipatong kaugdahan,” sama nianang gigamit sa ilang magmamando, si Satanas nga Yawa. (Efeso 6:11, 12) Hinuon, pinaagi sa pagpadapat sa tambag sa Pulong sa Diyos, kita makabarog nga malig-on batok sa mga demonyo. Dugang pa, kadtong nahigugma sa Diyos nailalom sa panalipod sa gamhanang mga manulonda.

Pagkahinungdanon nga ikaw makakat-on sa mga kinahanglanon sa Diyos nga gipaila diha sa Kasulatan ug ipadapat ang imong nakat-onan! Makakat-on kag dugang bahin sa mga pagtulon-an sa Bibliya pinaagi sa pagpakigkita sa mga Saksi ni Jehova diha sa inyong dapit o pinaagi sa pagsulat sa mga magpapatik niining magasina. Ang mga Saksi ni Jehova malipay nga magtuon sa Bibliya uban nimo nga walay bayad ug sa panahon nga kombenyente kanimo.

[Footnote]

[Kahon sa panid 6]

MGA MANULONDA—KON SA UNSANG PAAGI GIORGANISAR SILA

Giorganisar ni Jehova ang iyang dako kaayong pamilya sa mga manulonda sumala sa mosunod:

Ang manulonda nga kinalabwan ug gahom ug awtoridad mao si Miguel nga arkanghel, o si Jesu-Kristo. (1 Tesalonica 4:16; Judas 9) Ang mga serapin, mga kerubin, ug ubang mga manulonda nailalom kaniya.

Taas kaayog posisyon ang mga serapin diha sa kahikayan sa Diyos. Sila nagsilbing mga alagad diha sa trono sa Diyos. Ang ilang tinudlong buluhaton naglakip sa pagpahayag sa pagkabalaan sa Diyos ug paghupot sa iyang katawhan nga hinlo sa espirituwal.—Isaias 6:1-3, 6, 7.

Ang mga kerubin nalangkit sa trono sa Diyos ug nagatuboy sa kahalangdon ni Jehova.—Salmo 80:1; 99:1; Ezequiel 10:1, 2.

Ang ubang mga manulonda maoy mga hawas ni Jehova, ug sila nagatuman sa iyang kabubut-on.

[Hulagway sa panid 4]

Gikuyogan ug mga manulonda si Lot ug iyang mga anak nga babaye paingon sa luwas nga dapit

[Hulagway sa panid 5]

Sa dihang misulay si apostol Juan sa pagsimba sa manulonda, siya gisultihan: “Ayaw kanag buhata!”

[Hulagway sa panid 6]

Ang mga manulonda magpatuman sa paghukom sa Diyos

[Hulagway sa panid 7]

Nakabenepisyo ka ba sa pagwali nga gihimo ubos sa pagtultol sa mga manulonda?