Mme Angel—Nte Utom Mmọ Ẹtụkde Nnyịn

PRỌFET Daniel eketịn̄ ntem ke n̄kukụt oro enye okokụtde aban̄a mme angel oro ẹnamde ubon Abasi: “[Mme angel] tọsịn tọsịn ke itie tọsịn ẹnam n̄kpọ ẹnọ [Abasi]; tọsịn duop ke itie tọsịn duop ẹnyụn̄ ẹda enye ke iso.” (Daniel 7:10) Ufan̄ikọ emi etịn̄ ntak emi Abasi okobotde mme angel. Ẹkebot mmọ man ẹnam n̄kpọ ẹnọ Abasi kpukpru ini.

Ndusụk ini, Abasi esidọn̄ mme angel emi utom ọnọ mme owo. Nnyịn iyeneme nte enye esidade mme angel emi ọsọn̄ọ ikọt esie idem, ada mmọ ekpeme ikọt esie, ada otobo mme owo etop, onyụn̄ ada mmọ osobo mme idiọkowo.

Mme Angel Ẹsọn̄ọ Ikọt Abasi Idem Ẹnyụn̄ Ẹkpeme Mmọ

Mme edibotn̄kpọ eke spirit emi ẹnen̄ede ẹnyene udọn̄ ke idem owo toto ke usen oro mmọ ẹkekụtde nte ẹbotde isọn̄ ye akpa owo iba oro. Jesus Christ, emi ẹkotde Ọniọn̄, ọkọdọhọ mbemiso edide owo ete: “Idatesịt mi odu ke otu nditọ owo.” (Mme N̄ke 8:31) Bible asian nnyịn n̄ko ke “ọdọn̄ mme angel ndinyụn̄ọ nse mme n̄kpọ emi” ẹban̄ade Christ ye ini iso oro ẹkeyararede ẹnọ mme prọfet Abasi.—1 Peter 1:11, 12.

Nte ini akakade, mme angel ẹma ẹkụt ke ekese owo ikokponoke edima Andibot mmọ. Enyene ndidi emi akabiak mme anam-akpanikọ angel didie ntem! Edi “idatesịt [esidu] ke otu mme angel” ke ini anamidiọk kiet akabarede esịt afiak etiene Jehovah. (Luke 15:10) Mme angel ẹnen̄ede ẹnyene udọn̄ ke idem mbon oro ẹnamde n̄kpọ Abasi, ndien Jehovah esida mmọ ndien ndien ọsọn̄ọ mme anam-akpanikọ asan̄autom esie ke isọn̄ idem, onyụn̄ ekpeme mmọ. (Mme Hebrew 1:14) Yak inọ fi uwụtn̄kpọ ifan̄.

Angel iba ẹma ẹmụm Lot ye nditọiban esie ubọk ẹwọrọ ke obukpo obio Sodom ye Gomorrah, ndien emi ama anam mmọ ẹbọhọ nsobo obio oro. * (Genesis 19:1, 15-26) Ke ediwak isua ke ukperedem, okposụkedi ẹketopde prọfet Daniel ẹsịn ke obube mme lion, n̄kpọ ikanamke enye. Ntak-a? Daniel ọkọdọhọ ete: “Abasi mi ọmọdọn̄ mme angel esie ẹdikịbi mme lion inua.”  (Daniel 6:22) Mme angel ẹma ẹnọ Jesus ibetedem ke ini enye ọkọtọn̄ọde utom ukwọrọikọ esie mi ke isọn̄. (Mark 1:13) Ndien esisịt ini mbemiso Jesus akakpade, angel ama ọbiọn̄ọde enye ke iso “edisọn̄ọ enye idem.” (Luke 22:43) Ọkọdọn̄ Jesus esịt didie ntem angel ndikọsọn̄ọ enye idem ke ini enye ekenen̄erede odu ke nnanenyịn! Angel ama onyụn̄ osio apostle Peter ke ufọk-n̄kpọkọbi.—Utom 12:6-11.

Ndi mme angel ẹsikpeme nnyịn mfịn? Edieke ituakde ibuot inọ Jehovah nte Ikọ esie etemede, ẹn̄wọn̄ọ ẹnọ nnyịn ke mme okopodudu angel esie oro enyịn mîkwe ẹyekpeme nnyịn. Bible ọn̄wọn̄ọ ete: “Angel Jehovah ana akan mmọ eke ẹbakde enye okụk, onyụn̄ anyan̄a mmọ.”—Psalm 34:7.

Nte ededi, nnyịn inyene ndifiọk ke ata utom mme angel edi ndisan̄a utom nnọ Abasi, idịghe ndisan̄a utom nnọ mme owo. (Psalm 103:20, 21) Ntre, mmọ ẹsisan̄a utom ẹnọ Abasi, isisan̄ake inọ owo. Mmọdo, Jehovah Abasi edi nnennen owo oro ikpokotde iyom un̄wam, idịghe mme angel. (Matthew 26:53) Nte ededi, sia nnyịn mîkwe mme angel, nnyịn ikemeke ndifiọk adan̄a nte Abasi esidade mmọ an̄wam mme owo. Edi nnyịn imọfiọk ke Jehovah ‘esisọn̄ọ omụm mmọ eke ofụri esịt mmọ odude ye enye akama.’ (2 Chronicles 16:9; Psalm 91:11) Ndien nnyịn imonyụn̄ inen̄ede ifiọk ke “se ededi oro nnyịn iben̄ede ekekem ye uduak esie, enye ọbiọn̄ utọn̄ ke eben̄e nnyịn.”—1 John 5:14.

N̄wed Abasi asian nnyịn n̄ko ke nnyịn ikpenyene ndibọn̄ akam nnyụn̄ ntuak ibuot nnọ Abasi ikpọn̄-ikpọn̄. (Exodus 20:3-5; Psalm 5:1, 2; Matthew 6:9) Mme angel oro ẹnamde akpanikọ ẹsịn udọn̄ ẹnọ nnyịn ẹte inam oro. Ke uwụtn̄kpọ, ke ini apostle John okoyomde ndituak ibuot nnọ angel, angel oro ama asua ọnọ enye ete: “Kpeme idemfo! Kûnam oro! . . . Tuak ibuot nọ Abasi.”—Ediyarade 19:10.

Mme Angel Ẹtobo Etop Abasi

Ikọ Hebrew ye Greek oro ẹkabarede “angel” ọwọrọ “asan̄autom,” ndien usụn̄ efen oro mme angel ẹnamde n̄kpọ Abasi edi oro—oro edi ndida etop Abasi n̄kotobo mme owo. Ke uwụtn̄kpọ, Abasi ama “osio angel Gabriel ọdọn̄ aka ke obio Galilee emi ekerede Nazareth.” Man akanam nso? Man akasian n̄wan kiet emi ekerede Mary ke okposụkedi emi enye mîfiọkke erenowo, ke enye oyoyomo onyụn̄ aman eyeneren oro edikerede Jesus. (Luke 1:26-31) Ẹma ẹnyụn̄ ẹsio angel ọkọtọt mme ekpemerọn̄ oro ẹkekpemede mme erọn̄ mmọ ke an̄wa ke “Christ Ọbọn̄” amana. (Luke 2:8-11) Kpasụk ntre, mme angel ẹma ẹtobo Abraham, Moses, Jesus, ye mbon eken ke Bible, etop Abasi.—Genesis 18:1-5, 10; Exodus 3:1, 2; Luke 22:39-43.

Didie ke mme angel ẹsan̄a utom ẹnọ Abasi mfịn? Kere ban̄a utom oro Jesus ọkọdọhọde ke mme anditiene imọ ẹyenam mbemiso editịm n̄kpọ emi esịmde utịt. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matthew 24:3, 14) Mme Ntiense Jehovah ẹsikwọrọ eti mbụk Obio Ubọn̄ Abasi ediwak biliọn hour kpukpru isua. Edi ndi afo ama ọfiọk ke mme angel ẹtiene ẹbuana ke utom emi? Apostle John ama etịn̄ n̄kukụt oro enye okokụtde, ete: “Ndien n̄kụt angel efen . . . , enye onyụn̄ enyene nsinsi eti mbụk ete itan̄a nte  etop idatesịt inọ mbon emi ẹdụn̄de ke isọn̄, ye kpukpru idụt ye esien ye usem ye obio.” (Ediyarade 14:6, 7) Itie N̄wed Abasi emi owụt akpan utom oro mme angel ẹnamde ke ufọn mme owo mfịn.

Mme Ntiense Jehovah ẹsikụt uyarade oro owụtde ke mme angel ẹda mmimọ usụn̄ nte mmimọ ikwọrọde ikọ ke ufọk ke ufọk. Mmọ ẹsiwak ndisobo ye mme owo oro ẹkesụk ẹbọn̄de akam ẹyom owo edin̄wam mmimọ ifiọk mme uduak Abasi. Un̄wam mme angel ye nsịnifịk Mme Ntiense emi ẹnam ediwak tọsịn owo ẹsidi ẹdifiọk Jehovah kpukpru isua. Afo akpakam etiene ọbọ ufọn oto utom unyan̄a uwem oro mme angel ẹdade usụn̄ mi.

Mme Angel Ẹsobo Mbon Oro Abasi Obiomde Ikpe

Okposụkedi Abasi mînọhọ mme angel odudu ndibiere ikpe nnọ owo, mmọ ẹnyene ubọk ke ubiereikpe Abasi. (John 5:22; Mme Hebrew 12:22, 23) Abasi ama esida mmọ osobo mbon oro enye obiomde ikpe ke eset. Ke uwụtn̄kpọ, Abasi akada ‘mme angel emi ẹdade ke ibuot esie’ an̄wana ye mbon Egypt eset, emi mîkayakke nditọ Israel ẹwọrọ ke ufụn. (Psalm 78:49, NW) Ndien okoneyo kiet kpọt ke “angel Jehovah” ọkọwọrọ okowot tọsịn owo ke itie ikie ye anan̄-ye-ition ke nnaekọn̄ mme asua ikọt Abasi.—2 Ndidem 19:35.

Ke ini iso, mme angel ẹyedisobo mbon oro Abasi obiomde ikpe. Jesus ayasan̄a ye “mme okopodudu angel esie ke ikan̄ eke asakde, nte enye adade usiene ọsọk mmọ eke mîfiọkke Abasi ye mmọ eke mîsụkke ibuot inọ eti mbụk.” (2 Thessalonica 1:7, 8) Nte ededi, n̄kukụre mbon oro ẹdisobode ẹdidi mbon oro mîmaha ndikop etop oro ẹkwọrọde mfịn ke ofụri isọn̄, kpa etop oro mme angel ẹdade usụn̄. N̄kpọ idinamke mbon oro ẹyomde Abasi ẹnyụn̄ ẹdude uwem ẹkekem ye se N̄wed Abasi ekpepde.—Zephaniah 2:3.

Nnyịn ikpowụt esịtekọm didie ntem inọ mme anam-akpanikọ angel emi ẹnamde uduak Abasi kpukpru ini mi! Jehovah esida mmọ an̄wam onyụn̄ ekpeme mme anam-akpanikọ asan̄autom esie ke isọn̄. Emi ekpenyene ndinen̄ede ndọn̄ nnyịn esịt koro ata ndiọi edibotn̄kpọ eke spirit oro ẹkotde mme demon ẹdu, oro ẹyomde ndinam nnyịn ibak.

Mmanie Ẹdi Mme Demon?

Ke ufan̄ isua 1,500 tọn̄ọ Satan akabian̄a Eve ke Eden, mme angel oro ẹnamde ubon Abasi ke heaven ẹma ẹkụt nte Satan kpa Devil ọwọn̄ọrede kpukpru owo ke isọn̄ ọkpọn̄ Abasi, ke mîbọhọke ibat ibat owo nte Abel,  Enoch, ye Noah. (Genesis 3:1-7; Mme Hebrew 11:4, 5, 7) Ndusụk angel emi ẹma ẹkam ẹtiene Satan. Bible ọdọhọ ke mmọ ẹdi mme spirit oro ẹkesọn̄de ibuot “ke eyo Noah.” (1 Peter 3:19, 20) Edi nso ikowụt ke mmọ ẹsọn̄ ibuot?

Mme angel oro owo mîfiọkke ibat ẹma ẹkpọn̄ ubon mmọ ke heaven ke eyo Noah, ẹdi isọn̄, ẹdimen idem owo ẹsịne. Ntak-a? Mmọ ẹkeyom ndinyene ebuana idan̄ ye iban. Emi ama anam mmọ ẹbon nditọ oro ẹkekotde mme Nephilim, emi ẹkedide ikpọ mbon afai. Akan oro, “idiọk-n̄kpọ owo [ama okpon] ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.” Nte ededi, Jehovah Abasi ikayakke mme owo ẹka iso ẹdu ke isọn̄ ẹnam idiọk. Enye ama ada Ukwọ ofụri ererimbot osobo kpukpru mme anamidiọk ye mme Nephilim oro. Mme anam-akpanikọ asan̄autom Abasi kpọt ke ẹkenyan̄a.—Genesis 6:1-7, 17; 7:23.

Mme ọsọn̄ibuot angel oro ikakpan̄ake ke nsobo Ukwọ oro. Mmọ ẹma ẹsion̄o idem oro mmọ ẹkemende ẹsịne, ẹduọn̄ọ, ẹnyụn̄ ẹfiak ẹkabade ẹdi spirit, ẹfiak ẹnyọn̄ọ heaven. Ekem, ẹkedikot mmọ mme demon. Mmọ ẹkeda ye Satan kpa Devil, emi ẹkotde “andikara mme demon.” (Matthew 12:24-27) Mme demon emi ẹnen̄ede ẹyom mme owo ẹkpono mmimọ ukem nte andikara mmọ oyomde.

Mme demon ẹdiọk etieti, edi nnyịn ikpabakke mmọ. Odudu mmọ enyene adan̄a. Ke ini mme ọsọn̄ibuot angel emi ẹkefiakde ẹnyọn̄ọ heaven, owo ikayakke mmọ ẹfiak ẹkebuaha ye ubon Abasi eke heaven oro mme anam-akpanikọ angel ẹnamde. Utu ke oro, ẹma ẹsio mmọ ẹfep ke otu mbon oro Abasi ọnọde un̄wana eke spirit, ndien n̄kukụre se ibetde mmọ edi nsobo. Ke nditịm ntịn̄, ẹkọbi mmọ ẹtem ke ndamban̄a ekịm eke spirit oro ẹkotde Tartarus. (2 Peter 2:4) Jehovah ọkọbi mmọ “ke nsinsi n̄kpọkọbi,” oro ọwọrọde ke mmọ ẹdu ke makmak ekịm eke spirit. Akan oro, mmọ ikemeke aba ndimen idem owo nsịne.—Jude 6.

Nso ke Afo Akpanam?

Ndi mme demon ke ẹkakara mme owo? Ih, mmọ ẹnam ntre ke ‘n̄kari n̄kari usụn̄’ kpa nte andikara mmọ, Satan kpa Devil, esinamde. (Ephesus 6:11, 12) Nte ededi, edieke idade item Ikọ Abasi isịn ke edinam, nnyịn imekeme ndisọn̄ọ nda mbiọn̄ọ mme demon. Akan oro, mme okopodudu angel Abasi ẹkpeme mbon oro ẹmade Abasi.

Edi akpan n̄kpọ didie ntem afo ndikpep se Abasi oyomde nte ẹwụtde ke N̄wed Abasi, nnyụn̄ ndu uwem n̄kekem ye se ekpepde! Edieke oyomde ndifiọk mme n̄kpọ efen oro Bible ekpepde, nyene nneme ye Mme Ntiense Jehovah ke mbọhọ mbufo mîdịghe wet mme andisio magazine emi. Mme Ntiense Jehovah ẹyekop inemesịt ndikpep Bible ke mfọn ye afo ke ini ekededi oro ọfọnde ye afo.

[Ikọ idakisọn̄]

[Ekebe ke page 6]

NTE ẸBAHAREDE MME ANGEL KE OTU KE OTU

Jehovah abaharede akpakịp udịm ubon esie oro mme angel ẹnamde ntem:

Angel oro enyenede odudu akan edi Michael, kpa etubom mme angel, emi edide Jesus Christ. (1 Thessalonica 4:16; Jude 9) Mme seraph, mme cherub m̀mê cherubim, ye mme angel eken ẹdu ke idak esie.

Abasi ọnọ mme seraph ata edikon̄ itie. Mmọ ẹdi mme adaidaha ke ebekpo Abasi. Utom mmọ esịne nditan̄a ke Abasi edi edisana nnyụn̄ nnam ikọt Abasi ẹsana ke n̄kan̄ eke spirit.—Isaiah 6:1-3, 6, 7.

Ẹwak ndisiak mme cherub m̀mê cherubim ke ini ẹtịn̄de n̄kpọ ẹban̄a ebekpo Abasi, mmọ ẹnyụn̄ ẹnọ enye ubọn̄.—Psalm 80:1; 99:1; Ezekiel 10:1, 2.

Mme angel eken ẹdi mme isụn̄utom Jehovah, mmọ ẹnyụn̄ ẹnam uduak esie.

[Ndise ke page 4]

Mme angel ẹma ẹmụm Lot ye nditọiban esie ubọk ẹka ebiet ubọhọ

[Ndise ke page 5]

Ke ini apostle John okoyomde ndituak ibuot nnọ angel, angel oro ama ọdọhọ enye ete: “Kûnam oro!”

[Ndise ke page 6]

Mme angel ẹsisobo mbon oro Abasi obiomde ikpe

[Ndise ke page 7]

Ndi afo ke ọbọ ufọn oto utom ukwọrọikọ oro mme angel ẹdade usụn̄?