Ŋwɛibɔfoi Bɔ ni Amɛnáa Wɔnɔ Hewalɛ Amɛhaa

BENI gbalɔ Daniel wieɔ ninaa ko ní ena ni kɔɔ Nyɔŋmɔ weku ni ji ŋwɛibɔfoi lɛ ahe lɛ, eŋma akɛ: “Mɛi [ŋwɛibɔfoi] akpei akpe lɛ sɔmɔɔ [Nyɔŋmɔ] lɛ, ni mɛi akpei nyɔŋma nyɔŋma toi akpei nyɔŋma damɔɔ ehiɛ.” (Daniel 7:10) Ŋmalɛ kuku nɛɛ haa aleɔ nɔ hewɔ ni Nyɔŋmɔ bɔ ŋwɛibɔfoi lɛ. Ebɔ amɛ koni amɛsɔmɔ lɛ, ni amɛfee klalo akɛ amɛaatsu efamɔi ahe nii.

Nyɔŋmɔ tsɔɔ ŋwɛibɔfoi anɔ etsuɔ nibii komɛi ahe nii ehaa adesai. Wɔbaasusu bɔ ni ekɛ ŋwɛibɔfoi tsuɔ nii kɛwoɔ ewebii ahewalɛ ni ebuɔ amɛhe, bɔ ni etsɔɔ amɛnɔ ekɛ shɛɛ saji yahaa gbɔmɛi, kɛ bɔ ni ekɛ amɛ tsuɔ nii hu kɛkojoɔ mɛi fɔji lɛ ahe.

Ŋwɛibɔfoi Woɔ Mɔ Hewalɛ ni Amɛbuɔ Mɔ He Hu

Beni abɔ shikpɔŋ lɛ kɛ klɛŋklɛŋ adesai lɛ, mumɔŋ bɔɔ nii lɛ na, ni kɛjɛ no sɛɛ kɛbaa nɛɛ amɛjie miishɛɛ kpo waa yɛ adesai ahe. Beni Yesu Kristo ebatsɔko adesa, ní no mli lɛ akɛ nilee feɔ ehe mfoniri lɛ, ekɛɛ akɛ: “Mináa gbɔmɛi abii lɛ ahe miishɛɛ.” (Abɛi 8:31) Ni Biblia lɛ haa wɔleɔ akɛ ‘ŋwɛibɔfoi tete shweɔ akɛ amɛaale’ anɔkwalei ni kɔɔ Kristo kɛ wɔsɛɛ be he ní ajie kpo atsɔɔ Nyɔŋmɔ gbalɔi lɛ.—1 Petro 1:11, 12.

Beni be shwieɔ mli lɛ, ŋwɛibɔfoi lɛ yɔse akɛ adesai babaoo sɔmɔɔɔ amɛ-Bɔlɔ ni yɔɔ suɔmɔ lɛ. Kwɛ bɔ ni enɛ baadɔ ŋwɛibɔfoi ni yeɔ anɔkwa lɛ aha! Nɔ ni tamɔɔɔ nakai lɛ, kɛ́ eshafeelɔ kome tsake etsui ni eku esɛɛ kɛba Yehowa ŋɔɔ lɛ, ‘Nyɔŋmɔ bɔfoi lɛ amii shɛɔ amɛhe.’ (Luka 15:10) Ŋwɛibɔfoi susuɔ Nyɔŋmɔ sɔɔlɔi lɛ ahilɛ-kɛhamɔ he waa, ni Yehowa etee nɔ ekɛ amɛ etsu nii kɛwaje etsuji anɔkwafoi ni yɔɔ shikpɔŋ lɛ nɔ lɛ, ni ekɛbu amɛhe hu. (Hebribii 1:14) Susumɔ enɛ he nɔkwɛmɔnii komɛi ahe okwɛ.

Ŋwɛibɔfoi enyɔ komɛi bu Lot ni ji jalɔ lɛ kɛ ebiyei enyɔ lɛ ahe kɛshi Sodom kɛ Gomora, ni amɛtsɔ nakai feemɔ nɔ amɛye amɛbua amɛ ni amɛje hiɛkpatamɔ ni akɛba nakai maji fɔji lɛ anɔ lɛ mli. * (1 Mose 19:1, 15-26) Afii ohai komɛi  asɛɛ lɛ, ashɛ gbalɔ Daniel afɔ̃ jatai abu mli, shi amɛyeee lɛ awui ko. Mɛni hewɔ? Beni etsɔɔ nɔ ni ha eba lɛ nakai lɛ mli lɛ, ejaje akɛ: ‘Mi-Nyɔŋmɔ lɛ tsu ebɔfo, ni ebaŋamɔ jatai lɛ anaabui.’ (Daniel 6:22) Beni Yesu je esɔɔmɔ nitsumɔ lɛ shishi yɛ shikpɔŋ lɛ nɔ lɛ, ŋwɛibɔfoi ye bua lɛ. (Marko 1:13) Beni eshwɛ fioo ni abaagbe Yesu lɛ, ŋwɛibɔfo ko bajie ehe kpo etsɔɔ lɛ ni ‘ewo lɛ hewalɛ.’ (Luka 22:43) Akɛni no beaŋ lɛ, Yesu yɛ shihilɛ ko ni yɔɔ hiɛdɔɔ waa mli hewɔ lɛ, kwɛ bɔ ni hewalɛ ni ŋwɛibɔfo lɛ wo lɛ lɛ baawaje lɛ aha! Ŋwɛibɔfo ko hu yajie bɔfo Petro kɛjɛ tsuŋwoo mli.—Bɔfoi lɛ Asaji 12:6-11.

Ani Ŋwɛibɔfoi buɔ wɔhe ŋmɛnɛ? Kɛ wɔjáa Yehowa yɛ e-Wiemɔ lɛ naa lɛ, no lɛ wɔbaanyɛ wɔná nɔmimaa akɛ ebɔfoi hewalɔi ni anaaa amɛ lɛ baabu wɔhe. Biblia lɛ maa nɔ mi ehaa wɔ akɛ: “Yehowa bɔfo lɛ bɔɔ ŋsara yɛ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ.”—Lala 34:8.

Shi kɛlɛ, esa akɛ wɔyɔse akɛ ŋwɛibɔfoi lɛ anitsumɔ titri ji ni amɛsɔmɔ Nyɔŋmɔ, shi jeee adesai. (Lala 103:20, 21) Nyɔŋmɔ gbɛtsɔɔmɔi ahe nii amɛtsuɔ, shi jeee adesai afamɔi loo amɛ nibimɔi. No hewɔ lɛ, Yehowa Nyɔŋmɔ ji mɔ ni esa akɛ wɔbi edɛŋ yelikɛbuamɔ, shi jeee ŋwɛibɔfoi lɛ. (Mateo 26:53) Yɛ anɔkwale mli lɛ, akɛni wɔnaaa ŋwɛibɔfoi lɛ hewɔ lɛ, wɔnyɛŋ wɔtsɔɔ nibii srɔtoi fɛɛ ni Nyɔŋmɔ tsɔɔ amɛnɔ eyeɔ ebuaa adesai lɛ mli. Shi wɔle akɛ Yehowa “jieɔ ehewalɛ kpo ehaa mɛi ni amɛtsui hi kɛwula shi yɛ egbɛfaŋ lɛ.” (2 Kronika 16:9; Lala 91:11) Ni wɔyɛ nɔmimaa akɛ “nɔ fɛɛ nɔ ni wɔɔba yɛ esuɔmɔ naa lɛ, [Nyɔŋmɔ] eboɔ wɔ toi.”—1 Yohane 5:14.

Ŋmalɛi lɛ kɛɔ wɔ akɛ, esa akɛ wɔsɔle wɔha Nyɔŋmɔ kometoo, ni wɔjá lɛ pɛ. (2 Mose 20:3-5; Lala 5:2, 3; Mateo 6:9) Ŋwɛibɔfoi ni yeɔ anɔkwa lɛ woɔ wɔ hewalɛ koni wɔfee nakai. Ákɛ nɔkwɛmɔnɔ lɛ, beni bɔfo Yohane ka koni ejá ŋwɛibɔfo ko lɛ, nakai ŋwɛibɔfo lɛ kã ehiɛ akɛ: “Kaakwɛ ni ofee! . . . Nyɔŋmɔ moŋ ojá!”—Kpojiemɔ 19:10.

Ŋwɛibɔfoi Kɛ Nyɔŋmɔ Shɛɛ Saji Haa

Wiemɔ ni ji “bɔfo” lɛ shishi ji “tsulɔ,” ni no hewɔ lɛ ŋwɛibɔfoi lɛ sɔmɔɔ Nyɔŋmɔ hu ákɛ etsuji ní etsuɔ amɛ adesai aŋɔɔ. Ákɛ nɔkwɛmɔnɔ lɛ, “Nyɔŋmɔ tsu bɔfo Gabriel kɛtee Galilea maŋ ko ni atsɛ́ɔ lɛ Nazaret lɛ mli.” Mɛni eyafee? Atsu lɛ koni eyaha Maria ale akɛ, eyɛ mli akɛ eji oblayoo fro moŋ, shi ebaaná musu, ni ebaafɔ́ binuu, ni ebaawo lɛ gbɛi akɛ Yesu. (Luka 1:26-31) Atsu ŋwɛibɔfo ko hu ni eyatswa tookwɛlɔi komɛi ni yɔɔ ŋã nɔ lɛ adafi akɛ afɔ́ “Kristo, Nuŋtsɔ lɛ.” (Luka 2:8-11) Nakai nɔŋŋ ŋwɛibɔfoi kɛ Nyɔŋmɔ shɛɛ saji yaha Abraham, Mose, Yesu, kɛ mɛi krokomɛi ni atsĩ amɛtã yɛ Biblia lɛ mli lɛ.—1 Mose 18:1-5, 10; 2 Mose 3:1, 2; Luka 22:39-43.

Mɛɛ gbɛ nɔ ŋwɛibɔfoi sɔmɔɔ ákɛ Nyɔŋmɔ tsuji ŋmɛnɛ? Susumɔ nii ni Yesu gba efɔ̃ shi akɛ esɛɛnyiɛlɔi lɛ baatsu dani nibii agbɛjianɔtoo nɛɛ naagbee lɛ aba lɛ he okwɛ. Ekɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ jeŋ nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:3, 14) Daa afi lɛ, Yehowa Odasefoi kɛ ŋmɛlɛtswai ni fa fe akpekpei toi akpe shiɛɔ Nyɔŋmɔ Maŋtsɛyeli lɛ he sanekpakpa lɛ amɛtsɔɔ. Shi, ani ole akɛ ŋwɛibɔfoi hu náa nitsumɔ nɛɛ mli gbɛfaŋnɔ? Beni bɔfo Yohane wieɔ ninaa ko ní ená lɛ he lɛ, ekɛɛ akɛ: “Mina bɔfo kroko . . . , ni ehiɛ naanɔ sanekpakpa  ni eyaajaje etsɔɔ mɛi ni yɔɔ shikpɔŋ lɛ nɔ kɛ jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ.” (Kpojiemɔ 14:6, 7) Ŋmalɛ nɛɛ gbalaa jwɛŋmɔ kɛyaa nɔ̃ titri ni ŋwɛibɔfoi tsuɔ kɛyeɔ buaa adesai ŋmɛnɛ lɛ nɔ.

Shihilɛi komɛi ni Yehowa Odasefoi kɛkpeɔ yɛ amɛshia kɛ shia shiɛmɔ nitsumɔ lɛ mli lɛ haa amɛnaa akɛ ŋwɛibɔfoi kudɔɔ nakai nitsumɔ lɛ. Bei pii lɛ, amɛkɛ aŋkroaŋkroi komɛi ni miisɔle koni mɔ ko abaye abua amɛ ni amɛnyɛ amɛnu Nyɔŋmɔ yiŋtoi lɛ ashishi kpeɔ. Akɛni ŋwɛibɔfoi kudɔɔ shiɛmɔ nitsumɔ lɛ, ni Odasefoi lɛ hu kɛ mɔdɛŋbɔɔ woɔ mli hewɔ lɛ, daa afi lɛ, mɛi akpei ohai abɔ basɔmɔɔ Yehowa. Eba akɛ oooná yiwalaheremɔ nitsumɔ ni ŋwɛibɔfoi kudɔɔ nɛɛ he sɛɛ.

Ŋwɛibɔfoi Tsuɔ Nyɔŋmɔ Kojomɔ He Nii

Eyɛ mli akɛ ahako ŋwɛibɔfoi hegbɛ akɛ amɛkojo adesai moŋ, shi no hu etsɔɔɔ akɛ amɛnáaa gbɛfaŋnɔ ko kwraa yɛ adesai akojo mli. (Yohane 5:22; Hebribii 12:22, 23) Yɛ blema lɛ, Nyɔŋmɔ kɛ amɛ tsu nii kɛkpata mɛi ni ebu amɛ fɔ lɛ ahiɛ. Ákɛ nɔkwɛmɔnɔ lɛ, Nyɔŋmɔ tsɔ ŋwɛibɔfoi anɔ ewu eshi blema Mizraimbii ní ye Israelbii lɛ anyɔŋ lɛ. (Lala 78:49) Ni yɛ gbɛkɛ kome pɛ mli lɛ, “Yehowa bɔfo” yakpata Nyɔŋmɔ webii lɛ ahenyɛlɔi asraafoi akpei oha kɛ nyɔŋmai kpaanyɔ kɛ enumɔ ni amɛbɔ ŋsara lɛ ahiɛ.—2 Maŋtsɛmɛi 19:35.

Ni wɔsɛɛ hu lɛ, ŋwɛibɔfoi baatsu Nyɔŋmɔ fɔbuu kojomɔ he nii. Yesu baaba “kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo . . . sanekpakpa lɛ toi lɛ anɔ lɛ.” (2 Tesalonikabii 1:7, 8) Mɛi ahiɛ ni abaakpata lɛ ji mɛi ni booo shɛɛ sane ni ŋwɛibɔfoi yeɔ buaa kɛshiɛɔ yɛ jeŋ fɛɛ ŋmɛnɛ lɛ toi lɛ. Akpataŋ mɛi ni taoɔ Nyɔŋmɔ sɛɛgbɛ, ní kɛ tsɔɔmɔi ni yɔɔ Ŋmalɛi lɛ amli lɛ tsuɔ nii lɛ ahiɛ.—Zefania 2:3.

Kwɛ bɔ ni wɔdaa shi yɛ ŋwɛibɔfoi ni yeɔ anɔkwa, ní tsuɔ Nyɔŋmɔ famɔi ahe nii daa lɛ ahe wɔhaa! Yehowa kɛ amɛ tsuɔ nii kɛyeɔ buaa enɔkwa tsuji ni yɔɔ shikpɔŋ nɔ lɛ, ni ekɛbuɔ amɛhe hu. Sane nɛɛ ji miishɛjemɔ nɔ̃ kɛha wɔ ejaakɛ mumɔŋ bɔɔ nii komɛi yɛ ni miisumɔ ni amɛye wɔ awui, ni atsɛ́ɔ amɛ daimonioi, ni amɛhe yɛ oshara.

Namɛi ji Daimonioi Lɛ?

Beni Satan elaka Hawa yɛ Eden afii ohai komɛi asɛɛ lɛ, Nyɔŋmɔ weku ni ji ŋwɛibɔfoi lɛ na akɛ mɛi pɛ ni hi shi yɛ nakai beaŋ ni Satan Abonsam nyɛɛɛ atsi amɛ jɛkɛ Nyɔŋmɔ he ji anɔkwafoi fioo komɛi  tamɔ Habel, Henok kɛ Noa. (1 Mose 3:1-7; Hebribii 11:4, 5, 7) Ŋwɛibɔfoi lɛ ekomɛi yanyiɛ Satan sɛɛ. Biblia lɛ wieɔ amɛhe akɛ mumɔŋ bɔɔ nii toigbolɔi ni hi shi “yɛ Noa gbii lɛ amli.” (1 Petro 3:19, 20) Te fee tɛŋŋ eje kpo faŋŋ akɛ amɛji toigbolɔi?

Yɛ Noa gbii lɛ amli lɛ, ŋwɛibɔfoi toigbolɔi komɛi ni atsɔɔɔ amɛyifalɛ ŋmɛɛ hegbɛ ni amɛyɔɔ yɛ Nyɔŋmɔ weku ni yɔɔ ŋwɛi lɛ he, ni amɛba shikpɔŋ lɛ nɔ, ni amɛbatsɔmɔ amɛhe gbɔmɛi. Mɛni hewɔ amɛfee nakai? Amɛná akɔnɔ akɛ amɛkɛ yei aná bɔlɛ. Enɛ ha amɛfɔ́ bii ní amɛbatsɔmɔ oblaŋi ni yitseiaŋ wala, ni abale amɛ akɛ Nefilim. Kɛfata he lɛ, “gbɔmɛi anɔfɔŋfeemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ.” Shi kɛlɛ, Yehowa Nyɔŋmɔ eŋmɛɛɛ gbɛ ni adesai ajeŋba aya nɔ akpɔtɔ. Ekɛ Nu Afua ba jeŋ muu lɛ fɛɛ, ni etsɔ no nɔ ekpata mɛi fɔji lɛ kɛ Nefilim lɛ fɛɛ ahiɛ. Adesai pɛ ni abáa amɛwala yi ji Nyɔŋmɔ tsuji anɔkwafoi lɛ.—1 Mose 6:1-7, 17; 7:23.

Bɔfoi atuatselɔi lɛ gboiii yɛ Nu Afua lɛ mli. Amɛtsake amɛheloo gbɔmɔtsei lɛ ni amɛku amɛsɛɛ kɛtee mumɔi ashihilɛhe lɛ ákɛ mumɔŋ bɔɔ nii. Kɛjɛ no sɛɛ nɛɛ, abale amɛ akɛ daimonioi. Amɛfiɔ Satan Abonsam, mɔ ni atsɛ́ɔ lɛ “daimonioi alumɔ lɛ” sɛɛ. (Mateo 12:24-27) Taakɛ amɛ-lumɔ lɛ ji lɛ, daimonioi sumɔɔ koni gbɔmɛi adesai ajá amɛ.

Daimonioi ahe yɛ oshara, shi esaaa akɛ wɔsheɔ amɛ gbeyei. Hewalɛ ni amɛyɔɔ lɛ shɛɛɛ he ko. Beni ŋwɛibɔfoi atuatselɔi lɛ ku amɛsɛɛ kɛtee ŋwɛi lɛ, Nyɔŋmɔ hereee amɛ ewooo eweku ni ji bɔfoi anɔkwafoi lɛ mli dɔŋŋ. Yɛ no najiaŋ lɛ, Nyɔŋmɔ haaa amɛná ehe saji ahe shishinumɔ dɔŋŋ, ni hiɛnɔkamɔ ko bɛ kɛha amɛ wɔsɛɛ. Yɛ anɔkwale mli lɛ, akɛ amɛ ewo mumɔŋ duŋ shihilɛ ko ni atsɛ́ɔ lɛ Tartarus mli. (2 Petro 2:4) Yehowa kɛ “naanɔ kpãai efimɔ” amɛ, no hewɔ lɛ, amɛyɛ mumɔŋ duŋ mli. Kɛfata he lɛ, amɛnyɛɛɛ amɛtsake amɛhe ni amɛtsɔmɔ gbɔmɛi dɔŋŋ.—Yuda 6.

Mɛni Esa akɛ Ofee?

Ani daimonioi kã he amɛnáa adesai anɔ hewalɛ? Hɛɛ, amɛfeɔ nakai kɛtsɔ “ŋaatsɔɔi” ni tamɔ nɔ ni amɛ-lumɔ Satan Abonsam kɛtsuɔ nii lɛ nɔŋŋ ni amɛ hu amɛkɛtsuɔ nii lɛ nɔ. (Efesobii 6:11, 12) Shi kɛlɛ, kɛ wɔkɛ ŋaa ni Nyɔŋmɔ Wiemɔ lɛ woɔ lɛ tsu nii lɛ, wɔbaanyɛ wɔwu wɔshi daimonioi lɛ. Kɛfata he lɛ, ŋwɛibɔfoi ni yɔɔ hewalɛ buɔ mɛi ni sumɔɔ Nyɔŋmɔ lɛ ahe.

Kwɛ bɔ ni ehe hiaa akɛ oookase Nyɔŋmɔ taomɔ nii ni yɔɔ Ŋmalɛi lɛ amli lɛ, ní okɛ nɔ ni okaseɔ lɛ atsu nii! Obaanyɛ okase Biblia tsɔɔmɔi ahe nii babaoo kɛtsɔ Yehowa Odasefoi ni yɔɔ he ni oyɔɔ lɛ ní okɛ amɛ aaagba sane lɛ nɔ, aloo obaanyɛ oŋma mɛi ni fee wolo tɛtrɛɛ nɛɛ kɛha yelikɛbuamɔ. Yehowa Odasefoi yɛ he miishɛɛ akɛ amɛ kɛ bo baakase Biblia lɛ yɛ be ni hi kɛha bo mli ní aheee bo nɔ ko.

[Shishigbɛ niŋmaa]

[Akrabatsa ni yɔɔ baafa 6]

BƆ NI ATO ŊWƐIBƆFOI LƐ AHE GBƐJIANƆ AHA

Bɔ ni Yehowa eto eweku ni da ni ji ŋwɛibɔfoi lɛ ahe gbɛjianɔ eha nɛ: Bɔfoi lɛ ateŋ mɔ ni yɔɔ hewalɛ kɛ hegbɛ fe fɛɛ ji bɔfonukpa Mikael loo Yesu Kristo. (1 Tesalonikabii 4:16; Yuda 9) Ŋwɛibɔfoi ni ji serafim, kerubim kɛ ŋwɛibɔfoi krokomɛi lɛ fɛɛ yɛ eshishi.

Serafim lɛ hiɛ gbɛhe ko ni nɔ kwɔ yɛ Nyɔŋmɔ gbɛjianɔtoo lɛ mli. Amɛsɔmɔɔ yɛ Nyɔŋmɔ maŋtsɛsɛi lɛ he. Amɛnitsumɔ lɛ ekomɛi ji ní amɛjaje krɔŋkrɔŋ ni Nyɔŋmɔ yɔɔ lɛ amɛtsɔɔ, koni amɛkwɛ hu ni ewebii lɛ ahe atse yɛ mumɔ gbɛfaŋ.—Yesaia 6:1-3, 6, 7.

Kerubim lɛ hu yɛ Nyɔŋmɔ maŋtsɛsɛi lɛ he, ni amɛwóɔ Yehowa agbojee lɛ nɔ gojoo.—Lala 80:2; 99:1; Ezekiel 10:1, 2.

Ŋwɛibɔfoi krokomɛi ni eshwɛ lɛ tsuɔ nii ákɛ Yehowa najiaŋdamɔlɔi, ni amɛfeɔ esuɔmɔnaa nii.

[Mfoniri ni yɔɔ baafa 4]

Ŋwɛibɔfoi bu Lot kɛ ebiyei lɛ ahe kɛtee he ni yɔɔ shweshweeshwe

[Mfoniri ni yɔɔ baafa 5]

Beni bɔfo Yohane ka ni ejá ŋwɛibɔfo lɛ, ŋwɛibɔfo lɛ kɛɛ lɛ akɛ: “Kaakwɛ ni ofee!”

[Mfoniri ni yɔɔ baafa 6]

Ŋwɛibɔfoi tsuɔ Nyɔŋmɔ kojomɔ he nii

[Mfoniri ni yɔɔ baafa 7]

Ani ooná shiɛmɔ nitsumɔ ni ŋwɛibɔfoi kudɔɔ lɛ he sɛɛ?