Mga Anghel—Kon Paano Sila Nagaapektar sa Aton

NAGALARAGWAY sang iya palanan-awon tuhoy sa anghelikong pamilya sang Dios, si manalagna Daniel nagsulat: “Ang mga linibo sang mga linibo [mga anghel] nagaalagad sa [Dios], kag linaksa sa mga linaksa nagatilindog sa atubangan niya.” (Daniel 7:10) Ginapakita sini nga bersikulo ang katuyuan sang Dios sa pagtuga sa mga anghel. Magaalagad sila sa iya kag handa sa pagtuman sa iya mga instruksion.

Kon kaisa, ginagamit sang Dios ang mga anghel agod himuon ang pila ka butang may kaangtanan sa mga tawo. Binagbinagon naton kon paano niya sila ginagamit sa pagpalig-on kag pag-amlig sa iya katawhan, sa pagpahayag sang mga mensahe sa mga tawo, kag sa pagpadapat sang iya paghukom sa mga malauton.

Nagapalig-on kag Nagaamlig ang mga Anghel

Sugod sang nakita sang espiritu nga mga tinuga ang pagtuga sa duta kag sa una nga mga tawo, nangin interesado gid sila sa katawhan. Nagapamulong subong personipikasyon sang kaalam, si Jesucristo, antes pa nangin tawo nagsiling: “Ang mga butang nga akon nahamut-an yara sa mga anak sang tawo.” (Hulubaton 8:31) Kag ginasugid sang Biblia sa aton nga “ang mga anghel nagahandum sa pagtan-aw” sang mga katunayan tuhoy kay Cristo kag sa palaabuton nga ginpahayag sa mga manalagna sang Dios.​—⁠1 Pedro 1:​11, 12.

Sa pagligad sang tion, nakita sang mga anghel nga ang kalabanan nga katawhan wala nagaalagad sa ila mahigugmaon nga Manunuga. Pat-od nga nagpasubo gid ini sa matutom nga mga anghel! Apang, kon ang isa ka makasasala maghinulsol kag magliso kay Jehova, “may kalipay sa mga anghel.” (Lucas 15:10) Ang mga anghel may tudok nga pag-ulikid sa kaayuhan sang mga nagaalagad sa Dios, kag pirme sila gingamit ni Jehova sa pagpalig-on kag pag-amlig sa iya matutom nga mga alagad sa duta. (Hebreo 1:14) Binagbinaga ang pila ka halimbawa.

Ginbuligan sang duha ka anghel ang matarong nga si Lot kag ang iya duha ka anak nga babayi nga makalampuwas sa kalaglagan sang malaut nga mga siudad sang Sodoma kag Gomorra paagi sa pag-upod sa ila paggua sa sina nga lugar.⁠ * (Genesis 19:​1, 15-26) Mga siglo sang ulihi, bisan pa gintagbong sa lungib sang mga leon si  manalagna Daniel, wala sia maano. Ngaa? “Ginpadala sang akon Dios ang iya anghel kag gintakop ang baba sang mga leon,” siling niya. (Daniel 6:22) Ginbuligan sang mga anghel si Jesus sa panugod sang iya ministeryo sa duta. (Marcos 1:13) Kag wala madugay antes mapatay si Jesus, nagpakita sa iya ang isa ka anghel kag “ginpabakod sia.” (Lucas 22:43) Isa gid ka pagpalig-on para kay Jesus ang bulig sining anghel sa sadtong mabudlay nga mga tion sa iya kabuhi! Ginpagua man sang isa ka anghel si apostol Pedro sa bilangguan.​—⁠Binuhatan 12:6-11.

Ginaamligan bala kita sang mga anghel karon? Kon ginasimba naton si Jehova suno sa iya Pulong, makasalig kita nga ang iya gamhanan kag di-makita nga mga anghel magaamlig sa aton. Ang Biblia nagasaad: “Ang anghel ni Jehova nagakampo sa palibot sang mga nagakahadlok sa iya, kag ginaluwas niya sila.”​—⁠Salmo 34:7.

Apang, dapat naton dumdumon nga ang panguna nga ginaalagad sang mga anghel amo ang Dios, indi ang mga tawo. (Salmo 103:​20, 21) Nagatuman sila sa sugo sang Dios, indi sa mga sugo ukon mga pangabay sang tawo. Busa, ang isa nga dapat pangayuan sing bulig amo si Jehova nga Dios, indi ang mga anghel. (Mateo 26:53) Huo, sanglit indi naton makita ang mga anghel, indi naton mapat-od kon paano sila ginagamit sang Dios sa pagbulig sa mga tawo sa nanuhaytuhay nga kahimtangan. Apang nahibaluan naton nga si Jehova ‘nagapakita sang iya kusog para sa ila nga ang tagipusuon himpit sa iya.’ (2 Cronica 16:⁠9; Salmo 91:11) Kag may pagsalig kita nga “bisan ano man nga butang ang pangayuon naton suno sa iya kabubut-on, nagapamati [ang Dios] sa aton.”​—⁠1 Juan 5:14.

Ang Kasulatan nagasugid man sa aton nga ang aton mga pangamuyo kag pagsimba dapat ipatuhoy lamang sa Dios. (Exodo 20:3-5; Salmo 5:​1, 2; Mateo 6:9) Ginapalig-on kita sang matutom nga mga anghel nga himuon ini. Halimbawa, sang buot simbahon ni apostol Juan ang isa ka anghel, ginsabdong sia sining espiritu nga tinuga nga nagasiling: “Maghalong ka! Indi paghimua ina! . . . Simbaha ang Dios.”​—⁠Bugna 19:10.

Ginadala sang mga Anghel ang Mensahe sang Dios

Ang tinaga nga “anghel” nagakahulugan sing “mensahero,” kag amo ini ang isa ka paagi nga ang mga anghel nagaalagad sa Dios​—⁠subong iya mga mensahero sa mga tawo. Halimbawa, “ginpadala sang Dios ang anghel nga si Gabriel sa isa ka siudad sang Galilea nga ginatawag Nazaret.” Ngaa? Agod pahibaluon ang dalaga nga si Maria nga bisan ulay sia, magabusong sia kag magaanak sing lalaki nga pagahingalanan nga Jesus. (Lucas 1:26-31) Ginpadala man ang anghel sa mga manugbantay sang karnero sa latagon agod pahibaluon sila nga si “Cristo nga Ginuo” nabun-ag na. (Lucas 2:8-11) Sing kaanggid, nagdala man ang mga anghel sing mga mensahe halin sa Dios para kay Abraham, Moises, Jesus, kag sa iban pa nga katawhan sa Biblia.​—⁠Genesis 18:1-5, 10; Exodo 3:​1, 2; Lucas 22:39-43.

Paano ang mga anghel nagaalagad subong mga mensahero sang Dios karon? Binagbinaga ang hilikuton nga gintagna ni Jesus nga himuon sang iya mga sumulunod antes sang katapusan sining sistema sang mga butang. Sia nagsiling: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” (Mateo 24:​3, 14) Naghinguyang ang mga Saksi ni Jehova sing kapin sa isa ka bilyon nga oras kada tuig sa pagbantala sang maayong balita sang Ginharian sang Dios. Apang nahibaluan mo bala nga ang mga anghel nagapakigbahin man sa sini nga hilikuton? Nagapatuhoy sa isa niya ka palanan-awon, si apostol Juan nagsiling: “Nakita ko ang isa pa ka anghel . . . , kag may yara sia walay  katapusan nga maayong balita nga ibantala sa mga nagapuyo sa duta, kag sa tagsa ka pungsod kag tribo kag hambal kag katawhan.” (Bugna 14:​6, 7) Ini nga teksto nagapatalupangod sang labing importante nga hilikuton nga ginahimo sang mga anghel para sa mga tawo karon.

Nakita sang mga Saksi ni Jehova ang pamatuod nga may nagatuytoy nga mga anghel samtang ginahimo nila ang pagbantala sa pamalaybalay. Masami nila masalapuan ang mga indibiduwal nga nagapangamuyo nga kuntani may magbulig sa ila nga mahangpan ang mga katuyuan sang Dios. Subong resulta sang pagtuytoy sang mga anghel kag sang panikasog sang mga Saksi, kada tuig ginatos ka libo ang nakakilala kay Jehova. Kabay nga makabenepisyo ka sa sining nagaluwas kabuhi nga hilikuton nga ginatuytuyan sang mga anghel.

Ginapadapat Sang mga Anghel ang Paghukom Sang Dios

Bisan pa wala sila gin-awtorisahan sa paghukom sa mga tawo, ang mga anghel indi mga tumalan-aw lamang. (Juan 5:22; Hebreo 12:​22, 23) Gingamit sila sang Dios sang una sa pagpanglaglag. Halimbawa, gingamit sang Dios ang mga anghel sa iya pagpakig-away sa mga Egiptohanon nga nag-ulipon anay sa mga Israelinhon. (Salmo 78:49) Kag sa isa lang ka gab-i, “ang anghel ni Jehova” nagpatay sing isa ka gatos kag kawaluan kag lima ka libo nga soldado sa kampo sang kaaway sang Dios.​—⁠2 Hari 19:35.

Sa palaabuton, ang mga anghel man gihapon ang magapadapat sang malaglagon nga paghukom sang Dios. Magakari si Jesus “kaupod sang iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios kag ang mga wala nagatuman sa maayong balita.” (2 Tesalonica 1:​7, 8) Apang, ining kalaglagan para lamang sa mga wala magpamati sa mensahe nga ginabantala karon sa bug-os nga duta upod sa panuytoy sang mga anghel. Ang mga nagapangita sa Dios kag nagatuman sa Makasulatanhon nga mga panudlo maluwas.​—⁠Sofonias 2:3.

Nagapasalamat gid kita bangod sining matutom nga mga anghel, nga padayon nga nagatuman sa mga instruksion sang Dios! Ginagamit sila ni Jehova sa pagbulig kag pag-amlig sa iya matutom nga mga alagad sa duta. Nangin labi pa nga nakapaumpaw ini sa aton bangod may makatalagam nga espiritu nga mga tinuga nga gintawag nga mga demonyo nga luyag maghalit sa aton.

Mga Demonyo​—⁠Sin-o Sila?

Sa sulod sang 15 ka siglo pagkatapos nga ginsulay ni Satanas si Eva sa Eden, natalupangdan sang mga anghel sang Dios nga nangin madinalag-on si Satanas nga Yawa sa pagpatalikod sa tanan nga mga tawo sa Dios luwas sa pila ka matutom subong nanday Abel, Enoc, kag Noe. (Genesis 3:1-7; Hebreo  11:​4, 5, 7) Nagsunod man ang iban nga mga anghel kay Satanas. Ginpatuhuyan sila sang Biblia subong mga espiritu nga di-matinumanon “sang mga adlaw ni Noe.” (1 Pedro 3:​19, 20) Paano nangin hayag ang ila pagkadimatinumanon?

Sang panahon ni Noe ang pila ka rebelyuso nga mga anghel nagbiya sang ila duog sa langitnon nga pamilya sang Dios, nagpanaug sa duta, kag nagmateryalisar sa undanon nga mga lawas. Ngaa? Nagpalambo sila sing handum agod makigsekso sa mga babayi. Nagdul-ong ini sa ila pag-anak sing mga Nefilim, nga nangin masingki nga mga higante. Dugang pa, “ang kalainan sang tawo bugana sa duta kag ang tagsa ka huyog sang mga hunahuna sang iya tagipusuon malain gid sa tanan nga tion.” Apang, wala gintugutan ni Jehova nga Dios nga magpadayon ining kalautan sang katawhan. Nagpadala sia sing tugob globo nga Anaw, nga naglaglag sa tanan nga malauton nga katawhan upod ang mga Nefilim. Ang mga nakalampuwas lamang amo ang matutom nga mga alagad sang Dios.​—⁠Genesis 6:1-7, 17; 7:23.

Wala malaglag sang Anaw ang rebelyuso nga mga anghel. Ginbiyaan nila ang ila undanon nga lawas kag nagbalik sa langit subong espiritu nga mga tinuga. Pagkatapos sini, gintawag sila nga mga demonyo. Nagdampig sila kay Satanas nga Yawa, nga gintawag nga “manuggahom sang mga demonyo.” (Mateo 12:24-27) Kaangay sang ila manuggahom, luyag sang mga demonyo nga simbahon sila sang mga tawo.

Mapintas ang mga demonyo, apang indi kita dapat mahadlok sa ila. Limitado ang ila gahom. Sang nagbalik sa langit ang rebelyuso nga mga anghel, wala sila gintugutan nga magbalik sa pamilya sang matutom nga mga anghel sang Dios. Sa baylo, gin-untat na ang pagpaiwag sa ila sang bisan ano nga espirituwal nga kasanagan gikan sa Dios kag wala na gid sing masanag nga palaabuton para sa ila. Sa pagkamatuod, ginbutang sila sa isa ka kahimtangan sang espirituwal nga kadudulman nga ginatawag nga Tartaro. (2 Pedro 2:4) Gingapos sila ni Jehova sa “gapos nga dayon,” agod nga magpabilin sila sa espirituwal nga kadudulman. Dugang pa, indi na sila makamateryalisar.​—⁠Judas 6.

Ano ang Himuon Mo?

Nagapanikasog bala gihapon ang mga demonyo nga impluwensiahan ang mga tawo? Huo, ginahimo nila ini paagi sa “mga pahito,” ukon “madaya nga mga buhat,” kaangay sang ginhimo sang ila manuggahom, si Satanas nga Yawa. (Efeso 6:​11, 12) Apang, paagi sa pag-aplikar sa laygay sang Pulong sang Dios, makatindog kita sing malig-on batok sa mga demonyo. Dugang pa, ang mga nagahigugma sa Dios ginaamligan sang gamhanan nga mga anghel.

Importante gid nga mahibaluan mo ang ginapatuman sang Kasulatan kag sundon ini! Madugangan pa ang imo nahibaluan tuhoy sa mga panudlo sang Biblia paagi sa pagkontak sa mga Saksi ni Jehova sa inyo duog ukon paagi sa pagsulat sa mga manugbalhag sini nga magasin. Malipay ang mga Saksi ni Jehova nga magtuon sa Biblia upod sa imo nga wala sing bayad kag sa tion nga kombeniente sa imo.

[Nota]

[Kahon/Retrato sa pahina 4 9]

MGA ANGHEL​—⁠KON PAANO SILA GINAORGANISAR

Gin-organisar ni Jehova ang iya daku nga pamilya sang mga anghel subong sa masunod:

Ang anghel nga may pinakadaku nga gahom kag awtoridad amo si Miguel nga arkanghel, ukon si Jesucristo. (1 Tesalonica 4:16; Judas 9) Ang mga serafin, mga kerubin, kag ang iban pa nga mga anghel sakop niya.

Ang mga serafin may mataas katama nga katungdanan sa kahimusan sang Dios. Nagapangalagad sila sa trono sang Dios. Ang ila asaynment nagalakip sa pagpahayag sang pagkabalaan sang Dios kag pagtipig sa iya katawhan nga matinlo sa espirituwal.​—⁠Isaias 6:1-3, 6, 7.

Ang mga kerubin yara sa trono sang Dios kag nagasakdag sang pagkahalangdon ni Jehova.​—⁠Salmo 80:⁠1; 99:⁠1; Ezequiel 10:​1, 2.

Ang iban nga mga anghel mga tiglawas ni Jehova, kag gintuman nila ang kabubut-on sang Dios.

[Retrato sa pahina 4]

Gintuytuyan sang mga anghel nga maluwas si Lot kag ang iya duha ka anak nga babayi

[Retrato sa pahina 5]

Sang buot simbahon ni apostol Juan ang anghel, ginsilingan sia: “Indi paghimua ina!”

[Retrato sa pahina 6]

Ginapadapat sang mga anghel ang paghukom sang Dios

[Retrato sa pahina 7]

Nagapakigbahin ka bala sa pagbantala nga ginatuytuyan sang mga anghel?