‘Dapat na Kuyogon Niato an Dios Bilang Namamahala Imbes na mga Tawo’

‘Si Jah an Nagin Sakuyang Kaligtasan’

AN BANWAAN ni Jehova napapaatubang sa pagpili. Susunodon daw ninda an mga kahagadan kan daing Dios na namamahala kan suanoy na Egipto? O kukuyogon daw ninda si Jehova Dios, babayaan an lugar na iyan nin kaoripnan, asin iistaran an Dagang Panuga?

Huling nagsayuma an mapan-angat na Faraon nin Egipto na butasan an banwaan ni Jehova, ipinadara nin Dios an Sampulong Damat sa daga. Ipinapaheling nanggad kaini an saiyang kapangyarihan! An mga dios kan mga Egipcio mayong maginibo tanganing olangon an mga kalamidad na idto.

Kan sabihan si Faraon na togotan na humale an banwaan nin Dios, ini nanuyatuya: “Siisay man si Jehova, tanganing kuyogon ko an saiyang tingog na pahaleon an Israel? Dai ko man lamang namimidbid si Jehova asin, saro pa, dai ko papahaleon an Israel.” (Exodo 5:2) Bilang resulta, nakaeksperyensia an Egipto kan mga kalamidad na ini: (1) tubig na nagin dugo, (2) mga talapang, (3) mga nuknuk, (4) mga atibangaw, (5) peste sa ataman na mga hayop, (6) mga pigsa sa tawo asin hayop, (7) graniso, (8) mga doron, (9) kadikloman, asin (10) pagkagadan kan mga panganay sa Egipto, kaiba an aking lalaki ni Faraon. Sa katapustapusi, tinogotan na ni Faraon na humale an mga Hebreo. Sinadol pa ngani nia na maghale na sinda!​—Exodo 12:​31, 32.

Mga tolong milyon katawo​—Israelitang mga lalaki, babae, asin aki saka dakulang kadaklan na manlaenlaen​—​an tolos na nagharale. (Exodo 12:​37, 38) Minsan siring, dai nahaloy linapag sinda ni Faraon kaiba an masakit daogon na hukbo kaini. An mga Israelita garo baga nalaom sa tahaw kan Dagat na Pula, kan sarong desierto na dai mapasalaan, asin kan hukbo ni Faraon. Pero, sinabihan ni Moises an banwaan: “Dai kamo matakot. Tumindog kamo nin marigon asin helingon an pagliligtas ni Jehova.”​—Exodo 14:​8-​14.

Milagrosong binanga ni Jehova an katubigan kan Dagat na Pula tanganing makadulag an Israel. Alagad kan luminapag an mga Egipcio, pinangyari nin Dios na magtingkop an tubig. ‘An mga karuwahe ni Faraon asin an saiyang mga puersa militar iinapon ni Jehova sa dagat.’ (Exodo 14:26-​28; 15:4) An pagsayumang magtaong onra ki Jehova suminagkod sa kapahapahamak na katapusan kan maabhaw na si Faraon.

Sa Dagat na Pula, si Jehova nagin “parapakiguerra na lalaking-lalaki.” (Exodo 15:3) “Naheling man kan Israel an dakulang kamot na ginamit ni Jehova tumang sa mga Egipcio,” an sabi kan ipinasabong na pagkasaysay, “asin an banwaan nagpoon na matakot ki Jehova asin magtubod ki Jehova.” (Exodo 14:31; Salmo 136:10-​15) Ipinahayag ninda an saindang odok sa pusong pagpasalamat sa Dios kan an mga lalaki makiiba ki Moises sa sarong awit nin kapangganahan asin an saiyang tugang na babae, si Miriam, nangenot sa mga babae sa pagbayle. *

Si Jehova Paraligtas Pa Man Giraray

An mga lingkod ni Jehova sa presenteng aldaw makakakua nin nakakapakosog sa pagtubod na mga leksion sa pambihirang gibong iyan nin pagliligtas nin Dios. An sarong leksion iyo na si Jehova may daing sagkod na kapangyarihan asin kaya niang biyong suportaran an saiyang banwaan. Sa saindang awit nin kapangganahan, si Moises asin an mga Israelita mapangganang nag-awit: “An saimong toong kamot, O Jehova, mapuersa sa kakayahan, an saimong toong kamot, O Jehova, kayang ronoton an kalaban.”​—Exodo 15:6.

An saro pang leksion iyo na an Makakamhan sa Gabos nagmamawot na marhay na protehiran an saiyang banwaan. An mga Israelita nag-awit: “An sakuyang kosog asin an sakuyang kapangyarihan iyo si Jah, ta sia an nagin sakuyang kaligtasan. Iyo ini an sakuyang Dios, asin papakadakulaon ko sia.” An saro pang leksion iyo na mayo nin mapangganang makakatumang sa kabotan ni Jehova Dios. Sa saindang  awit nin kapangganahan, an ilinigtas na banwaan nin Dios nag-awit: “Siisay sa mga dios an siring sa saimo, O Jehova? Siisay an siring sa saimo, na pinapatunayan an saimong sadiri na makakamhan sa kabanalan? An Saro na dapat katakotan paagi sa mga awit nin pag-omaw, an Saro na naggigibo nin mga ngangalasan.”​—Exodo 15:​2, 11.

Arog ni Faraon kan suanoy na Egipto, an mga namamahala sa kinaban ngonyan pinaglalamag an banwaan ni Jehova. An aroganteng mga namomoon tibaad ‘magtaram ngani nin mga tataramon na tumang sa Kaharohalangkawe, asin padagos na ribokon an mga banal kan Supremo.’ (Daniel 7:25; 11:36) Alagad inaasegurar ni Jehova an saiyang banwaan: “An ano man na armas na gibohon tumang sa saimo dai magkakaepekto, asin an arin man na dila na tumindog tumang sa saimo sa paghokom saimong kokondenaron. Iyo ini an rogaring na panonondon kan mga lingkod ni Jehova.”​—Isaias 54:17.

An mga paratumang sa Dios mapaprakaso, kun paanong naprakaso si Faraon asin an saiyang hukbo. An mga gibo nin pagliligtas ni Jehova, siring kan lagdoan na pagharale sa Egipto, nagpapatotoo na tama sanang kuyogon an prinsipyo na sinabi kan mga apostol ni Jesus, na nagpahayag: “Dapat na kuyogon niamo an Dios bilang namamahala imbes na mga tawo.”​—Gibo 5:29.

[Nota sa Ibaba]

[Kahon/Ritrato sa pahina 9]

ARAM DAW NINDO?

• Pinangyari ni Jehova an sarong makosog na doros na maghuyop nin magdamlag tanganing an Israel makabalyo sa Dagat na Pula sa marang daga.​—Exodo 14:​21, 22.

• Sarong agihan na an lakbang mga saro may kabangang kilometro o labi pa an kakaipuhanon tanganing makabalyo sa Dagat na Pula an minilyon na Israelita sa siring kahalipot na panahon.

[Mga Ritrato sa pahina 9]

Dai kayang paontokon kan falsong mga dios kan Egipto an Sampulong Damat gikan ki Jehova

[Credit Line]

An tolong pigurin: An retrato sa karahayan nin boot kan British Museum