“Kinahanglang Among Sugton ang Diyos Ingong Magmamando Inay ang mga Tawo”

‘Si Jah Nagsilbing Akong Kaluwasan’

ANG katawhan ni Jehova kinahanglang mopili. Ila bang sugton ang daotang magmamando sa karaang Ehipto? O ila bang sugton si Jehova nga Diyos, mobiya nianang lugara ingong ulipon, ug manimuyo sa Yutang Saad?

Tungod kay ang masukihong Paraon sa Ehipto midumili man sa pagpagawas sa katawhan ni Jehova, ang Diyos nagpahinabo ug Napulo ka Hampak nianang yutaa. Gipasundayag gayod niini ang iyang gahom! Ang mga diyos sa Ehipto walay nahimo sa pagsanta niadtong mga hampaka.

Sa dihang gisultihan si Paraon sa pagpagawas sa katawhan sa Diyos, siya mayubitong miingon: “Kinsa ba si Jehova, aron ako mamati sa iyang tingog sa pagpalakaw sa Israel? Wala gayod ako makaila kang Jehova ug, dugang pa, dili ko palakton ang Israel.” (Exodo 5:2) Tungod niana, ang Ehipto nakaagom niining mga hampaka: (1) ang tubig nahimong dugo, (2) mga baki, (3) tagnok, (4) bangaw, (5) kamatay sa mga mananap, (6) hubag sa tawo ug sa mga mananap, (7) ulan nga yelo, (8) dulon, (9) kangitngit, ug (10) ang pagkamatay sa mga panganay sa mga Ehiptohanon, lakip na ang anak lalaki ni Paraon. Sa kataposan, gipagawas ni Paraon ang mga Hebreohanon. Iya pa ganing giawhag sila sa pagbiya!—Exodo 12:31, 32.

Duolag tulo ka milyong tawo—Israelinhong mga lalaki, babaye, ug mga bata maingon man ang dakong nagkasagol nga panon sa katawhan—ang nagdali sa pagbiya. (Exodo 12:37, 38) Apan, sa wala madugay, gigukod sila ni Paraon uban sa iyang makalilisang nga kasundalohan. Ang mga Israelinhon morag natanggong taliwala sa Pulang Dagat, sa peligrosong desyerto, ug sa kasundalohan ni Paraon. Bisan pa niana, giingnan ni Moses ang katawhan: “Ayaw kamo kahadlok. Barog nga malig-on ug tan-awa ang kaluwasan ni Jehova.”—Exodo 14:8-14.

Milagrosong gipikas ni Jehova ang Pulang Dagat aron makaikyas ang mga Israelinhon. Apan sa dihang migukod ang mga Ehiptohanon, gipabalik sa Diyos ang dagat. “Ang mga karo ni Paraon ug ang iyang mga kasundalohan gitambog [ni Jehova] sa dagat.” (Exodo 14:26-28; 15:4) Ang pagdumili sa pagpasidungog kang Jehova misangpot sa kalaglagan sa mapahitas-ong si Paraon.

Didto sa Pulang Dagat, si Jehova nahisama gayod sa usa ka “kusganong lalaki sa panggubatan.” (Exodo 15:3) “Nakita usab sa Israel ang dakong kamot nga gipalihok ni Jehova batok sa mga Ehiptohanon,” nag-ingon ang inspiradong asoy, “ug ang katawhan nangahadlok kang Jehova ug nagbutang ug pagtuo kang Jehova.” (Exodo 14:31; Salmo 136:10-15) Sila nagpahayag sa ilang kinasingkasing nga pagpasalamat sa Diyos samtang miduyog ang kalalakin-an kang Moises sa pag-awit sa kadaogan ug ang iyang igsoon nga si Miriam maoy nanguna sa kababayen-an sa pagsayaw. a

Si Jehova Usa Gihapon ka Manluluwas

Ang mga alagad ni Jehova karon adunay makapalig-on-sa-pagtuong leksiyon nga makat-onan gikan sa maong talagsaong kaluwasan nga gihimo sa Diyos. Ang unang leksiyon mao nga si Jehova adunay way-kinutobang gahom ug bug-os nga makapaluyo sa iyang katawhan. Sa ilang awit sa kadaogan, si Moises ug ang mga Israelinhon madaogong miawit: “Ang imong tuong kamot, Oh Jehova, nagpamatuod nga gamhanan sa katakos, ang imong tuong kamot, Oh Jehova, makagupok ug kaaway.”—Exodo 15:6.

Ang ikaduhang leksiyon mao nga ang Labing Gamhanan hugot nga nagtinguha sa pagpanalipod sa iyang katawhan. Ang mga Israelinhon miawit: “Akong kusog ug akong gahom si Jah, sanglit siya nagsilbing akong kaluwasan. Kini ang akong Diyos, ug ako magadayeg kaniya.” Ang laing leksiyon nga atong makat-onan mao nga walay molampos sa pagsupak sa kabubut-on ni Jehova nga Diyos. Sa ilang awit sa  kadaogan, ang naluwas nga katawhan sa Diyos miawit: “Kinsa taliwala sa mga diyos ang sama kanimo, Oh Jehova? Kinsa ang sama kanimo, nga nagpamatuod nga mahimayaon sa pagkabalaan? Ang Usa nga pagakahadlokan uban ang mga awit sa pagdayeg, ang Usa nga nagabuhat ug mga kahibulongan.”—Exodo 15:2, 11.

Sama kang Paraon sa karaang Ehipto, ang mga magmamando sa kalibotan karon naglutos sa katawhan ni Jehova. Ang magarbohong mga lider lagmit “mosulti bisan sa mga pulong nga batok sa Labing Hataas, ug . . . magpadayon sa pagpanghasi sa mga balaan sa Supremong Usa.” (Daniel 7:25; 11:36) Apan gipasaligan ni Jehova ang iyang katawhan: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova.”—Isaias 54:17.

Ang mga kaaway sa Diyos dili makadaog, sama kang Paraon ug sa iyang kasundalohan. Ang mga buhat sa pagluwas ni Jehova, sama sa Pagpanggula gikan sa Ehipto, nagpamatuod nga husto ang pagsunod sa prinsipyo nga gisulti sa mga apostoles ni Jesus, nga miingon: “Kinahanglang among sugton ang Diyos ingong magmamando inay ang mga tawo.”—Buhat 5:29.

[Footnote]

[Kahon/Hulagway sa panid 9]

NAHIBALO KA BA?

• Gipahuros ni Jehova ang kusog nga hangin sa tibuok gabii aron ang Israel makatabok sa Pulang Dagat sa mamala nga yuta.—Exodo 14:21, 22.

• Gikinahanglan ang usa ka tunel nga may gilapdong usa ka kilometro ug tunga o kapin pa aron makatabok ang milyonmilyong mga Israelinhon sa Pulang Dagat sulod sa mubong panahon.

[Mga hulagway sa panid 9]

Ang mini nga mga diyos sa Ehipto wala makapugong sa Napulo ka Hampak nga gipahamtang ni Jehova

[Credit Line]

All three figurines: Photograph taken by courtesy of the British Museum