“Nnyịn Inyene Ndikop Uyo Abasi nte Andikara Utu ke Uyo Owo”

‘Jehovah Edi Edinyan̄a Mi’

IKỌT Jehovah ẹkenyene ndinam ubiere. Ndi mmọ ẹdikop uyo idiọk andikara Egypt eset, mîdịghe ndi mmọ ẹdikop uyo Jehovah Abasi, ẹwọrọ ke itie ufụn, ẹnyụn̄ ẹkeda Isọn̄ Un̄wọn̄ọ ẹnyene?

Abasi ama ọnọ Egypt Ufen Duop sia ọsọn̄ibuot Pharaoh mîkenyịmeke ndisana ikọt Jehovah nyak. Emi ama owụt ke Abasi enen̄ede enyene odudu. Mme abasi Egypt ikekemeke nditre ufen emi.

Ke ini ẹkedọhọde Pharaoh ayak ikọt Abasi ẹnyọn̄ọ, enye ama asak ete: “Jehovah edi anie, eke n̄kopde uyo esie, nnyụn̄ nyak Israel ẹka? Mfiọkke Jehovah, ndinyụn̄ nyakke Israel ẹka.” (Exodus 5:2) Ke ntak oro, Egypt ama ọbọ ufen emi: (1) mmọn̄ ama akabade iyịp, (2) ikwọt ẹma ẹfụk isọn̄ Egypt, (3) idan̄ ẹma ẹyọhọ ofụri isọn̄ Egypt, (4) nduyịp ẹma ẹyọhọ ufọk nditọ Egypt, (5) ata idiọk udọn̄ọ ama owot mme ufene, (6) oyo ama efịt owo ye unam, (7) edịmitiat ama edep, (8) n̄kukun̄kpọyọriyọ ẹma ẹyọhọ ofụri isọn̄ Egypt, (9) ekịm ama ofụk isọn̄ Egypt, ndien nte ọyọhọ ufen (10) kpukpru akpan ke Egypt, esịnede akpan Pharaoh, ẹma ẹkpan̄a. Ke akpatre, Pharaoh ama ayak nditọ Israel ẹnyọn̄ọ. Enye akakam akpakpak mmọ ẹnyọn̄ọ!—Exodus 12:31, 32.

N̄kpọ nte owo miliọn ita—irenowo, iban, ye nditọwọn̄ Israel, ọkọrọ ye mbuaha udịmowo eken—ẹma ẹsọsọp ẹwọrọ ke Egypt. (Exodus 12:37, 38) Nte ededi, ikebịghike Pharaoh ama ada enyene-ndịk udịmekọn̄ esie ebịne mmọ. Eketie nte Ididuot Inyan̄, akwa desat, ye udịmekọn̄ Pharaoh ẹkụk nditọ Israel ẹsịn. Edi, Moses ama ọdọhọ mmọ ete: “Mbufo ẹkûfehe ndịk, ẹtuak ẹda, ẹnyụn̄ ẹkụt edinyan̄a Jehovah.”—Exodus 14:8-14.

Jehovah ama abahade Ididuot Inyan̄ ke utịbe utịbe usụn̄ man nditọ Israel ẹsan̄a ẹbe. Edi ke ini udịmekọn̄ Egypt ẹkebede ẹdụk, Abasi ama anam mmọn̄ ọtọ ofụk mmọ. “Enye [ama emen] mme chariot Pharaoh ye mme udịm esie ọduọk ke inyan̄.” (Exodus 14:26-28; 15:4) Eseri iseri Pharaoh ama akpa ke ntak emi mîkokponoke Jehovah.

Jehovah ama owụt ke Ididuot Inyan̄ ke imọ idi “owo ekọn̄.” (Exodus 15:3) Bible ọdọhọ ete: “Israel ẹnyụn̄ ẹkụt ọkpọsọn̄ ubọk oro Jehovah adade anam nditọ Egypt: kpukpru owo ẹnyụn̄ ẹbak Jehovah, ẹnyụn̄ ẹnịm uyo Jehovah.” (Exodus 14:31; Psalm 136:10-15) Iren Israel ẹma ẹtiene Moses ẹkwọ ikwọ edikan ẹnen̄ede ẹkọm Abasi, ke ini Miriam eyeneka Moses akadade iban usụn̄ ke unek. *

Jehovah Osụk Edi Andinyan̄a

N̄wọrọnda usụn̄ oro Jehovah akanyan̄ade nditọ Israel ekpep mme asan̄autom esie eke eyomfịn ata eti n̄kpọ oro ọsọn̄ọde mbuọtidem mmọ. N̄kpọ kiet oro enye ekpepde nnyịn edi ke odudu Jehovah inyeneke adan̄a, ndien ke enye ekeme ndinen̄ede n̄n̄wam ikọt esie. Moses ye nditọ Israel eken ẹma ẹkwọ ikwọ edikan idara idara ẹte: “Ubọk nnasia fo, O Jehovah omokpon ke odudu: ubọk nnasia fo, O Jehovah, amanuak mme asua fo mbai-mbai.”—Exodus 15:6.

N̄kpọ efen oro ikpepde edi ke enen̄ede ọdọn̄ Ata Ọkpọsọn̄ ndikpeme ikọt esie. Nditọ Israel ẹkekwọ ẹte: “Jehovah edi odudu mi ye ikwọ, omonyụn̄ edi edinyan̄a mi: enye edi Abasi mi, ndien nyokpono enye.” N̄kpọ efen oro  ikpepde edi ke owo baba kiet ikemeke ndibiọn̄ọ uduak Jehovah Abasi. Ikọt esie oro ẹkenyan̄ade ẹma ẹkwọ idara idara ẹte: “Anie, ke otu mme abasi ebiet fi O Jehovah? Anie ebiet fi, emi okponde ubọn̄ ke edisana ido, emi ẹten̄ede ke itoro, anamde mme utịbe n̄kpọ?”—Exodus 15:2, 11.

Mme andikara ererimbot mfịn ẹkọbọ ikọt Jehovah nte Pharaoh Egypt eset ọkọkọbọde. Mme eseri iseri andikara ẹkeme ‘nditịn̄ mban̄a Ata Edikon̄; ẹnyụn̄ ẹsobo edisana ikọt Ata Edikon̄.’ (Daniel 7:25; 11:36) Edi Jehovah ọn̄wọn̄ọ ọnọ ikọt esie ete: “Baba n̄kpọ ekọn̄ kiet eke ẹbotde ẹban̄a fi idikwe unen; afo oyonyụn̄ anam ikọ etịp kpukpru edeme eke ẹdahade ẹda ẹnam ikọ ye afo. Jehovah ọdọhọ ete, Emi edi udeme ikọt Jehovah.”—Isaiah 54:17.

Mbon oro ẹbiọn̄ọde Abasi idikwe unen kpa nte Pharaoh ye udịmekọn̄ esie mîkekwe unen. Usụn̄ oro Jehovah esinyan̄ade ikọt esie, utọ nte ndikanyan̄a mmọ nsio ke Egypt, owụt ke enen ndinam se mme apostle Jesus ẹkedọhọde: “Nnyịn inyene ndikop uyo Abasi nte andikara utu ke uyo owo.”—Utom 5:29.

[Ikọ idakisọn̄]

[Ekebe/Ndise ke page 9]

NDI AMA ỌFIỌK EMI?

• Jehovah akanam ofụm ikọtabak efịme ofụri okoneyo abahade Ididuot Inyan̄ man nditọ Israel ẹkpekeme ndisan̄a ke edisat isọn̄ mbe.—Exodus 14:21, 22.

• Afua oro ekenyenede ndikem n̄kpọ nte nditọ Israel miliọn ita ndisan̄a mbe ke Ididuot Inyan̄ ke utọ esisịt ini oro ekenyene ndin̄wan̄a n̄kpọ nte kilomita kiet ye ubak.

[Mme ndise ke page 9]

Mme nsunsu abasi Egypt ikekemeke nditre Ufen Duop oro Jehovah akamiade Egypt

[Ebiet Ẹdade N̄kpọ Ẹto]

Mbiet mbita: Foto emi Itie Ubon N̄kpọeset Britain ọnọde unyịme ẹsio