“Masapul nga Agtulnogkami iti Dios kas Agturay Imbes a Kadagiti Tattao”

‘Agserbi ni Jah iti Pannakaisalakanko’

MASAPUL nga agpili ti ili ni Jehova. Pagtulnoganda kadi dagiti bilin ti nadangkes nga agturay iti nagkauna nga Egipto? Wenno agtulnogda ken ni Jehova a Dios, panawanda ti lugar a nakaadipenanda, ket tagikuaenda ti Naikari a Daga?

Gapu ta ti nasubeg a Faraon iti Egipto nagkedked a mangwayawaya iti ili ni Jehova, impalak-am ti Dios ti Sangapulo a Saplit iti dayta a daga. Anian a panangipakita iti pannakabalinna! Dagiti didiosen dagiti Egipcio awan ti naaramidanda a nanglapped kadagita a saplit.

Idi naibaga kenkuana a wayawayaanna ti ili ti Dios, nanglais a kinunana: “Siasino ni Jehova, tapno pagtulnogak ti timekna a palubosak ti Israel? Diak a pulos am-ammo ni Jehova ken, maysa pay, saankonto a palubosan ti Israel.” (Exodo 5:2) Kas resultana, linak-am ti Egipto dagitoy a saplit: (1) panagbalin a dara ti danum, (2) tukak, (3) sepsep, (4) bingraw, (5) angol kadagiti dinguen, (6) busbusali iti tao ken animal, (7) uraro, (8) dudon, (9) kinasipnget, ken (10) ipapatay dagiti inauna nga annak dagiti Egipcio, agraman ti anak ni Faraon. Kamaudiananna, timmulok ni Faraon a mangwayawaya kadagiti Hebreo. Dinagdagna pay ketdi ida a pumanaw!​—Exodo 12:31, 32.

Dagus a pimmanaw ti agarup tallo a milion a tattao​—Israelita a lallaki, babbai, ubbing ken dagiti nakadakdakkel a naglalaok a bunggoy. (Exodo 12:37, 38) Ngem di nagbayag, kinamat ida ti nabileg a buyot ni Faraon. Arigna a napupok dagiti Israelita iti nagbaetan ti Nalabaga a Baybay, napeggad a desierto, ken kadagiti puersa ni Faraon. Kaskasdi, kinuna ni Moises kadagiti tattao: “Dikay agbuteng. Agtakderkayo a sititibker ket kitaenyo ti panangisalakan ni Jehova.”​—Exodo 14:8-14.

Simimilagro a binisngay ni Jehova ti danum ti Nalabaga a Baybay tapno makalibas ti Israel. Ngem idi simmurot dagiti Egipcio, pinagtipon manen ti Dios dagiti dandanum. “Dagiti karuahe ni Faraon ken dagiti puersa militarna intapuak [ni Jehova] iti baybay.” (Exodo 14:26-28; 15:4) Makadidigra ti nagbanagan ti natangsit a ni Faraon gapu iti panagkedkedna a mangpadayaw ken ni Jehova.

Iti Nalabaga a Baybay, impakita ni Jehova nga isu ket “malalaki a mannakigubat.” (Exodo 15:3) “Nakita met ti Israel ti naindaklan nga ima a pinagtignay ni Jehova maibusor kadagiti Egipcio,” kuna ti naipaltiing a salaysay, “ket nangrugi dagiti umili nga agbuteng ken Jehova ken maaddaan iti pammati ken Jehova.” (Exodo 14:31; Salmo 136:10-15) Inyebkasda ti naimpusuan a panagyamanda iti Dios bayat a dagiti lallaki dinanggayanda ni Moises iti kanta ti panagbiktoria ket indauluan ni kabsatna a Miriam ti panagsala dagiti babbai. a

Itultuloy ni Jehova ti Mangisalakan

No kadagiti moderno-aldaw nga ad-adipen ni Jehova, adda dagiti makapabileg a leksion a masursuroda iti dayta a nakaskasdaaw a panangispal ti Dios. Ti maysa a leksion ket awan ti limitasion ti pannakabalin ni Jehova ken naan-anay a matulonganna ti ilina. Iti samiweng ti panagbiktoriada, inkanta ni Moises ken dagiti Israelita: “Ti makannawan nga imam, O Jehova, pampaneknekanna a nabileg ti kabaelanna, ti makannawan nga imam, O Jehova, mabalinna a buraken ti kabusor.”​—Exodo 15:6.

Ti sabali pay a leksion ket ti Mannakabalin-amin tarigagayanna unay a salakniban ti ilina. Inkanta dagiti Israelita: “Ti pigsak ken pannakabalinko isu ni Jah, yantangay isu agserbi iti pannakaisalakanko. Daytoy ti Diosko, ket idaydayawkonto.” Ti sabali pay a leksion ket awan ti sibaballigi a makalapped iti pagayatan ni Jehova a Dios. Iti samiweng ti panagballigida, inkanta ti naispal nga ili  ti Dios: “Siasino kadagiti didios ti kas kenka, O Jehova? Siasino ti kas kenka, a pampaneknekam a mannakabalinka iti kinasanto? Daydiay mapagbutngan buyogen ti kankanta a pangidaydayaw, Daydiay agar-aramid kadagiti pagsidsiddaawan.”​—Exodo 15:2, 11.

Kas ken ni Faraon iti nagkauna nga Egipto, dagiti agdama nga agturay iti lubong idadanesda ti ili ni Jehova. Dagiti natangsit a lider mabalin nga ‘agsaoda iti mismo a sasao maibusor iti Kangatuan, ket agtultuloy a riribukenda dagiti mismo a sasanto Daydiay Katan-okan.’ (Daniel 7:25; 11:36) Ngem ipanamnama ni Jehova iti ilina: “Aniaman nga igam a mabukelto maibusor kenka saanto nga agballigi, ket aniaman a dila a tumakderto a bumusor kenka iti panangukom kondenaremto. Daytoy ti pagtatawidan a sanikua dagiti adipen ni Jehova.”​—Isaias 54:17.

Mapaay dagiti bumusbusor iti Dios, no kasano a napaay ni Faraon ken ti buyotna. Dagiti panangispal ni Jehova, kas iti panangipanawna iti Israel manipud Egipto, paneknekanda nga umiso ti panangannurot iti prinsipio a dinakamat dagiti apostol ni Jesus: “Masapul nga agtulnogkami iti Dios kas agturay imbes a kadagiti tattao.”​—Aramid 5:29.

[Footnote]

[Kahon/Ladawan iti panid 9]

AMMOYO KADI?

• Nagpatnag a pinagangin ni Jehova iti napigsa tapno mabisngay ti Nalabaga a Baybay ket makaballasiw ti Israel iti namaga a daga.​—Exodo 14:21, 22.

• Kasapulan ti maysa ket kagudua a kilometro wenno nalawlawa pay a dalan tapno ti minilion nga Israelita maballasiwda ti Nalabaga a Baybay iti kasta kabiit.

[Dagiti Ladawan iti panid 9]

Dagiti didiosen ti Egipto saanda a napasardeng dagiti Sangapulo a Saplit nga impalak-am ni Jehova

[Credit Line]

Tallo a pigurin: Naretrato babaen ti pammalubos ti British Museum