‘Tudi ne bua kutumikila mêyi a Nzambi kumpala kua mêyi a bantu’

‘Yehowa udi lupandu luanyi’

BANTU ba Yehowa bavua ne bualu bua kusungula. Bavua ne bua kutumikila dîyi dia mukalenge mubi wa mu Ejipitu anyi peshi bavua ne bua kutumikila Yehowa Nzambi, kuitaba bua kumbuka muaba uvuabu ku bupika au ne kubuela mu Buloba Bulaya?

Bu muvua Palô mfumu wa mu Ejipitu wa mutu mukole ubenga bua kulekela bantu ba Yehowa, Yehowa wakatumina ditunga diende bipupu dikumi. Biakaleja bukole budi nabu Yehowa munyi? Kakuvua nzambi wa mu Ejipitu uvua ne bukole bua kubikanda nansha.

Pakambilabu Palô bua kulekela bantu ba Nzambi, wakandamuna ne kapeja ne: ‘Yehowa nnganyi? Tshiena ngitabuja dîyi diende bua kulekela bena Isalele. Meme tshiena mumanye Yehowa ne tshiena ndekela bena Isalele.’ (Ekesode 5:2) Ke malu adi alonda aa kukengesha bena Ejipitu: (1) mâyi kukudimuka mashi, (2) ndimba, (3) tumua, (4) mabubu, (5) tshipupu kukuata bimuna, (6) biuja kukuata bantu ne nyama, (7) mvula wa mabue, (8) mpasu ya mikumbi, (9) mîdima, ne (10) lufu lua muan’a bute yonso wa mu Ejipitu ne wa Palô muine. Ku ndekelu Palô kulekela bena Ebelu bua baye. Wakabasengelela mene bua bumbuke!​—Ekesode 12:31, 32, MMM.

Bantu batue ku miliyo isatu: bena Isalele balume ne bakaji ne bana ne bakuabu bantu bavule bakumbuka mu Ejipitu lukasa lukasa. (Ekesode 12:37, 38) Kadi anu bapatuka nunku, Palô kubalondakaja ne basalayi bende benza buôwa. Bena Isalele e kudimona mu njiwu mu tshipela, kumpala Mbuu Mukunze, panyima basalayi ba Palô. Ke Mose kubambila ne: ‘Kanutshinyi, imanayi, numone lupandu lua Yehowa.’​—Ekesode 14:8-14.

Yehowa wakenza tshishima, kupandulula Mbuu Mukunze bua bena Isalele kupandukabu. Kadi pakabalondakaja bena Ejipitu, Yehowa wakapingaja mâyi au. ‘Yehowa wakela makalu a Palô ne bisumbu biende bionso mu mâyi manene.’ (Ekesode 14:26-28; 15:4) Dibenga kunemeka Yehowa diakafikisha Palô muena lutambishi eu ku lufu lubi.

Yehowa wakaleja ku Mbuu Mukunze muvuaye ‘muena mvita.’ (Ekesode 15:3) Bible udi wamba ne: ‘Bena Isalele bakatangila bualu bukole buakenzela Yehowa Bena Ejipitu, ne bantu bonso bakatshina Yehowa; bakeyemena Yehowa,’ e kumuitabuja. (Ekesode 14:31; Musambu 136:10-15) Bua kuleja Nzambi dianyisha, Mose ne bantu balume kutuadija kumuimbila musambu wa ditshimuna, Miyama muanabu ne Mose pende kuditua mu maja ne bakaji nende. *

Yehowa utshidi anu Mupandishi

Basadidi ba Yehowa ba lelu badi mua kupeta dilongesha didi dikolesha ditabuja diabu ku muyuki eu wa muvuaye mupandishe bantu bende kale. Dilongesha dia kumpala: Yehowa udi ne bukole kabuyi ndekelu ne udi mua kukuatshisha bantu bende mu malu onso. Mose ne bena Isalele bakamba mu musambu wa ditshimuna au ne: ‘Yehowa, tshianza tshiebe tshia balume tshidi ne butumbi ne bukole; Yehowa, tshianza tshiebe tshia balume tshidi tshisunsula bantu badi netu lukuna.’​—Ekesode 15:6.

Dilongesha dibidi: Yehowa mmusue bikole bua kusungila bantu bende. Bena Isalele bakimba ne: ‘Yehowa udi bukole buanyi ne musambi wanyi; yeye wakulua lupandu luanyi; yeye udi Nzambi wanyi, nemmutumbishe.’ Dilongesha disatu ndiodi edi: kakuena muntu udi mua kupangisha disua dia Yehowa Nzambi bua kuenzekadi to. Bantu bavua Nzambi mupandishe  bakimba ne: ‘Nnganyi udi bu wewe Yehowa, munkatshi mua nzambi mikuabu? Nnganyi udi bu wewe, udi ne butumbi bua tshijila, udi utshinyisha bantu ne bienzedi bia butumbi, udi wenza malu a kukema?’​—Ekesode 15:2, 11.

Bamfumu ba lelu badi bakengesha Bantemu ba Yehowa anu bu muakenza Palô. Balombodi ba lutambishi badi mua ‘kudiula Nzambi Mutambe Bunene ne mêyi mabi, ne kutatshisha bansantu ba Mutambe Bunene.’ (Danyele 7:25; 11:36) Kadi Yehowa udi wambila bantu bende ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele; wewe neutuishe ludimi luonso ludibu babandisha bua kukubanda nalu mu tshilumbu. Ebu mbumpianyi bua badi bakuatshila Yehowa mudimu.’​—Yeshaya 54:17.

Anu bu muakapangila Pâlo ne basalayi bende, ke muapangila baluishi ba Nzambi kabidi. Malu akenza Yehowa bua kupandisha bantu, tshilejilu, akenzaye mu Tshimuangi tshia diumbuka dia bena Isalele mu Ejipitu adi aleja buimpe bua kulonda dîyi diakamba bapostolo ba Yezu edi: ‘Tudi ne bua kutumikila mêyi a Nzambi kumpala kua mêyi a bantu.’​—Bienzedi 5:29.

[Mêyi adi kuinshi]

[Kazubu/​Tshimfuanyi mu dibeji 9]

UVUAKU MUMANYE ANYI?

• Yehowa wakajudija tshipepele tshikole butuku bujima bua bena Isalele kusabuka Mbuu Mukunze pa buloba bûme.​—Ekesode 14:21, 22.

• Bua bena Isalele miliyo abu kusabuka Mbuu Mukunze mu mutantshi mukese wa dîba, bivua mua kubalomba bua kupanda njila wa bunene bua kilometre mujima ne tshitupa anyi kupita apa.

[Bimfuanyi mu dibeji 9]

Nzambi ya dishima ya mu Ejipitu kayakakokesha bua kukanda bipupu dikumi bia kudi Yehowa

[Mêyi a dianyisha]

Tupingu tuonso tusatu: Foto mukuata ne dianyisha dia British Museum