“Re Swanetše Go Kwa Modimo E Le Mmuši Go E Na Le Batho”

‘Jah ke Monamoledi Wa-ka’

BATHO ba Jehofa ba be ba swanetše go kgetha. Na ba be ba tla dumelelana le ditaelo tša kgoši ya Egipita ya bogologolo yeo e sa boifego Modimo? Goba na ba be ba tla kwa Jehofa Modimo, ba tloge nageng yeo ya bokgoba gomme ba hudugele Nageng ya Kholofetšo?

Modimo o ile a romela Dikotlo tše Lesome nageng, ka ge Farao wa mereba a ganne go lokolla batho ba Gagwe. Seo e ile ya ba pontšho e kgolo gakaakang ya matla a gagwe! Medingwana ya Egipita e be e paletšwe ke go thibela dikotlo tšeo.

Ge Farao a be a botšwa gore a tlogele batho ba Modimo gore ba sepele, o ile a araba ka lenyatšo gore: “[Jehofa, NW] ké mang yo nkaxo kwa lentšu la xaxwe, ka lesa ba-Isiraele ba sepela? Nna [Jehofa, NW] xa ke mo tsebe; le xôna nka se kê ka lesa ba-Isiraele ba sepela.” (Ekisodo 5:2) Ka baka leo, Egipita e ile ya otlwa ka ditsela tše di latelago: (1) meetse a ile a fetoga madi, (2) digwagwa, (3) menang, (4) diboba, (5) go hwa ga diphoofolo, (6) batho le diphoofolo ba tšwa dišo, (7) sefako, (8) ditšie, (9) lefsifsi le (10) go hwa ga maitšibolo a Egipita, go akaretšwa le morwa wa Farao. Mafelelong, Farao o ile a dumelela ba-Hebere go sepela. O ile a ba a ba kgopela gore ba sepele!—Ekisodo 12:31, 32.

Batho ba e ka bago ba dimilione tše tharo—banna, basadi le bana ba ba-Isiraele, gotee le lešaba la mahlakanasela—ba ile ba tloga ka ntle le go dika-dika. (Ekisodo 12:37, 38) Lega go le bjalo, Farao o ile a ba šala morago ka ntle le go senya nako a e-na le madira a gagwe a matla. Go be go bonala eka ba-Isiraele ba kgakgetšwe gare ga Lewatle le Lehwibidu, lešoka leo le boifišago le madira a Farao. Lega go le bjalo, Moše o ile a botša setšhaba gore: “Se boifeng! Emang, gomme le tlo bona phološo ya Jehofa.”—Ekisodo 14:8-14, PK.

Jehofa o ile a aroganya meetse a Lewatle le Lehwibidu ka mohlolo gore ba-Isiraele ba phonyokge. Eupša ge ba-Egipita ba ba latela, Modimo o ile a dira gore meetse a ba khupetše. “Makoloi a Farao, le dirá tša xaxwe, [Jehofa a] di wetša lewatleng.” (Ekisodo 14:26-28; 15:4) Go gana go hlompha Jehofa go lebišitše Farao wa go ikgogomoša pheletšong e kwešago bohloko.

Lewatleng le Lehwibidu, Jehofa o ipontšhitše e le “Moxale dintweng.” (Ekisodo 15:3) Pego yeo e buduletšwego e re: “Ké mo Ba-Isiraele ba bonexo tše seatla se sexolo sa Modimo se di dirilexo Ba-Egipita; xomme sethšaba sa boifa Morêna, sa dumêla Morêna [Jehofa].” (Ekisodo 14:31; Psalme 136:10-15) Ba ile ba leboga Modimo go tšwa pelong ge banna ba dutše ba tlatša Moše kopelong ya phenyo gomme kgaetšedi ya gagwe Miryama a eteletše basadi pele ge ba bina. *

Jehofa e sa le Mophološi

Bahlanka ba Jehofa ba mehleng yeno ba ka ithuta thuto e matlafatšago tumelo modirong o kgahlišago wa Modimo wa go phološa. E nngwe ya dithuto ke gore Jehofa o na le matla a sa lekanyetšwago le gona a ka thekga bahlanka ba gagwe ka botlalo. Košeng ya bona ya phenyo, Moše le ba-Isiraele ba be ba gobela ba re: “Morêna [Jehofa], letsôxô la xaxo le taxa ka matla a lôna; Morêna, letsôxô la xaxo le rôba manaba.”—Ekisodo 15:6.

Thuto e nngwe ke gore yo Matla ohle o fišegela go šireletša batho ba gagwe. Ba-Isiraele ba opetše ka gore: “Matla a-ka, koša ya-ka, ké [Jah, NW] Morêna Monamodi wa-ka. Modimo wa-ka ké Yêna; a nke ke mo rêtê.” Go sa le bjalo, thuto e nngwe gape ke gore ga go na yo a ka atlegago go thibela thato ya Jehofa Modimo.  Košeng ya phenyo, batho bao ba bego ba phološitšwe ba Modimo ba opetše ka gore: “[Jehofa] Morêna, mo xo medimo mo-etša-Wêna ké mang? Mo-etša-Wêna Mo-ithlama ka bokxêthwa? Wa xo rêtwa ka di-thšoša-batho, Mo-dira-matete.”—Ekisodo 15:2, 11.

Go swana le Farao wa Egipita ya bogologolo, babuši ba lehono ba lefase ba tlaiša batho ba Jehofa. Baetapele ba nago le makoko ba ka ‘bolela mantšu a go tsogela Yo-godimo-dimo matla le go tlaiša bakgethwa ba Yo-godimo-dimo.’ (Daniele 7:25 bapiša le PK; 11:36.) Eupša Jehofa o kgonthišetša batho ba gagwe ka gore: “Marumô ka moka a rulêlwaxo xo lwa naxô’, a ka se kxône selo. Maleme ka moka a a Xo pharaxo O tlo a fenya thsekong, ké byôna bohwa bya balata ba Morêna.—Jesaya 54:17.

Baganetši ba Modimo ba tlo palelwa, bjalo ka ge Farao le madira a gagwe ba paletšwe. Ditiro tša Jehofa tša go phološa, tše bjalo ka Khudugo ya ba-Isiraele Egipita, di hlatsela gore re swanetše go latela molao wa motheo o boletšwego ke baapostola ba Jesu, bao ba ilego ba tsebatša gore: “Re swanetše go kwa Modimo e le mmuši go e na le batho.”—Ditiro 5:29, NW.

[Mongwalo wa ka tlase]

[Lepokisi/Diswantšho go letlakala 9]

NA O BE O TSEBA?

• Jehofa o ile a dira gore phefo e matla e tšutle bošego ka moka e le gore ba-Isiraele ba ka feta mmung o omilego ge ba phatša Lewatle le Lehwibidu.—Ekisodo 14:21, 22.

• Go ka ba go ile gwa nyakega tsela ya bophara bja khilomithara e tee le seripa goba go feta moo e le gore ba-Isiraele ba dimilione ba ka phatša Lewatle le Lehwibidu ka nako yeo e nyenyane.

[Diswantšho go letlakala 9]

Medingwana ya maaka ya ba-Egipita e ile ya palelwa ke go thibela Dikotlo tše Lesome tšeo di tšwago go Jehofa

[Mothopo]

All three figurines: Photograph taken by courtesy of the British Museum