“Ko te Atua Ta Matou e Akarongo e Tikaʼi Auraka te Tangata”

‘Ko Iehova Toku Akaora’

TE ARO atura to Iehova iti tangata i tetai ikianga. Ka aru ainei ratou i te au maro anga a te tutara kino o Aiphiti taito ra? Me ka akarongo ainei ratou i te Atua ko Iehova, kia akaruke i tera ngai tuikaa ra, e kia noo ki roto i te Enua Taputouia?

No te mea kare a Pharao marokiakia o Aiphiti i akatika ana kia tuku i to Iehova iti tangata kia aere, kua tuku atu te Atua i te Au Mate Ngauru ki runga i te enua. Mei teaa atura teia i te akaarianga i tona mana! Kare e rauka i tetai au atua o Aiphiti i te rave i tetai apinga i te tapu i taua au kino ra.

I te akakiteia atu anga kia Pharao kia tuku i to te Atua iti tangata kia aere, kua aviri atu aia: “Koai a Iehova, ka akarongo atu ei au i tona reo, ka tuku atu ei ia Iseraela? Kare au i kite ia Iehova, kare oki au e tuku ia Iseraela.” (Exodo 5:2) Tei tupu, kua kite mai a Aiphiti i teia au kino ra: (1) kua tauiia te vai ei toto, (2) rana, (3) namu, (4) rango, (5) mate maata ki runga i te au manu, (6) ee ki runga i te tangata e te manu, (7) ua toka, (8) tapaki, (9) poiri, e (10) te mate ki te tama mua o Aiphiti ra, kapiti mai te tamaiti a Pharao. Taopenga ra, kua tuku a Pharao i te au Epera kia aere. Kua raurau katoa aia ia ratou kia aere!​—Exodo 12:31, 32.

Mei tetai toru mirioni tangata​—au tane, au vaine, e te au tamariki Iseraela e pera katoa te tangata ke ke katoa e manganui​—tei akaruke viviki atu. (Exodo 12:37, 38) Kare i roa ana, ra, te arumaki ra a Pharao ia ratou ma tona pupu vaeau matakuia. I te akaraanga kua piritia te ngati Iseraela i rotopu i te Tai Muramura, e tetai metepara akaaroa kore, e te pupu vaeau o Pharao. Inara, kua akakite atu a Mose ki te iti tangata: “Auraka kotou e mataku; e noo ua, e akara i te ora a Iehova, i tana e rave no kotou i teianei rā.”​—Exodo 14:8-14.

Ma te temeio kua vai a Iehova i te au vai o te Tai Muramura kia rauka ia Iseraela i te oro. Inara i te aru atu anga te au Aiphiti, kua akakeu te Atua i te au vai kia oki akaou. “Te au kariota o Pharao e tona ra nuku, kua uriia e [Iehova] ki raro i te tai.” (Exodo 14:26-28; 15:4) Te kopae anga i te akangateitei ia Iehova kua taki atu ki te taopenga anga tumatetenga o Pharao ngakau parau.

I te Tai Muramura, kua riro mai Iehova ei “toā i te tamaki.” (Exodo 15:3) “Kite akera to Iseraela i te mana maata o Iehova i te rave anga i to Aiphiti ra,” te karanga ra te tataanga akauruia e, “mataku iora te au tangata ia Iehova, e kua akarongo ia Iehova.” (Exodo 14:31; Salamo 136:10-15) Kua akaari ratou i to ratou rekareka ngakau tae ki te Atua i te kapiti atu anga te au tane kia Mose i roto i tetai imene autu e kua taki atu tona tuaine, ko Miriama, i te au vaine i roto i tetai ura. *

Te Akaora ra Rai a Iehova

Te au tavini o Iehova i teia tuatau nei ka kite mai i te au apiianga te akaketaketa ra i te akarongo mei te angaanga maata tikai no te akaoraanga mei to te Atua mana. Tetai apiianga koia oki e ope kore te mana o Iehova e ka rauka i te turuturu tikai i tona iti tangata. I roto i ta ratou imene autu, kua imene upokotu a Mose e te au Iseraela: “Kua kakā, e Iehova, to rima katau i te mana; na to rima katau, e Iehova, i akaparuparu i te enemi.”​—Exodo 15:6.

Tetai apiianga akaou mai koia oki e te inangaro oonu ra te Mana Katoatoa i te paruru i tona iti tangata. Kua imene te au Iseraela: “Ko Iehova toku maroiroi, e toku peʼe anga, e kua riro aia ei ora noku: koia toku Atua, e koia taku e akapaapaa.”  Tetai akaou mai apiianga koia oki kare e rauka i tetai tangata i te patoi autu atu i te anoano o te Atua ko Iehova. I roto i ta ratou imene upokotu, kua imene te iti tangata akaoraia e te Atua ra: “Koai to te au atua e arite kia koe, e Iehova? koai tei arite kia koe, ko tei kakā i te tapu ra, e te mataku roaia kia akameitakiia ra, e te rave i te mea taka ke ra?”​—Exodo 15:2, 11.

Mei ia Pharao o Aiphiti taito ra, ka takinga kino te au tutara o teia tuatau i to Iehova iti tangata. Penei te au tutara marokiakia ka ‘tuatua i te tuatua akakino ki Tei Teitei ra, e . . . tamanamanata oki i te aronga tapu no Tei Teitei ra.’ (Daniela 7:25; 11:36) Inara kua akapapu Iehova i tona iti tangata: “Te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu. Ko te tuanga teia o te au tavini o Iehova.”​—Isaia 54:17.

Ka poka te aronga patoi i te Atua, mei ia Pharao e tona pupu vaeau rai i te poka anga. Te au angaanga akaora a Iehova, mei te Exodo anga mei Aiphiti ra, e akakite maira e e tika rai kia aruia te kaveinga akakiteia e te au apotetoro a Iesu, tei karanga e: “Ko te Atua ta matou e akarongo e tikaʼi auraka te tangata.”​—Angaanga 5:29.

[Tataanga Rikiriki i Raro]

[Pia/Tutu i te kapi 9]

KUA KITE ANA AINEI KOE?

• Kua akatupu a Iehova i tetai matangi ririnui kia pupui i te roa anga po kia rauka ia Iseraela i te tikoti atu i te Tai Muramura na runga i te one maro.​—Exodo 14:21, 22.

• Tetai ara mataara mei tetai 1.5 kiro mita te atea me kore e maata atu te umuumuia ra no te au mirioni ua atu au Iseraela i te aere atu na roto i te Tai Muramura i roto i tetai tuatau poto ua.

[Au Tutu i te kapi 9]

Kare i rauka ana te au atua pikikaa o Aiphiti ra i te tapu i te Au Mate Ngauru mei Iehova ra

[Akameitakianga]

All three figurines: Photograph taken by courtesy of the British Museum