„Fu di Gado na wi tiriman, meki wi musu gi yesi na en na presi fu libisma”

’Yah na mi frulusuman’

A PIPEL fu Yehovah ben musu teki wan bosroiti. Den ben o gi yesi na a ogri-ati tiriman fu owruten Egepte? Noso den ben o gi yesi na Yehovah Gado? Den ben o gowe libi a presi pe den ben de na ini katibo fu go libi na ini a Pramisi Kondre?

Fu di a tranga-ede Farao fu Egepte no ben wani lusu a pipel fu Yehovah, meki Gado seni tin plaag na ini a kondre. Disi ben sori en makti trutru! Den gado fu Egepte no ben man du noti fu meki den sani dati no pasa nanga den.

Di Farao yere taki a ben musu lusu a pipel fu Gado, dan na wan heimemre fasi a ben taki: „Suma na Yehovah taki mi ben musu arki en sten fu seni Israel gowe? Mi no sabi Yehovah kwetikweti, èn boiti dati, mi no sa seni Israel gowe” (Exodus 5:2). Leki bakapisi fu dati, Egepte kisi fu du nanga den rampu disi: (1) watra kon tron brudu, (2) todo ben lai na ini a kondre, (3) mampira ben beti sma, (4) freifrei ben de na ala sei, (5) den meti fu den Egeptesma kisi pestsiki, (6) libisma nanga meti kisi sweri, (7) pisipisi ijs fadon komoto fu hemel, (8) sprenka ben nyanyan ala sani, (9) a ben dungru pikapika na ini a kondre, èn (10) ala den fosi gebore sma fu Egepte dede, sosrefi a manpikin fu Farao. Te fu kaba, Farao seni den Hebrewsma gowe. A ben dwengi den sosrefi fu gowe!—Exodus 12:31, 32.

Sowan dri milyun sma, mansma, umasma nanga pikin fu Israel èn sosrefi wan bigi grupu trakondre sma, gowe libi Egepte gawgaw (Exodus 12:37, 38). Ma no langa baka dati, Farao go na den baka nanga a bigi legre fu en. A ben gersi leki den Israelsma no ben man go no wan sei, bika na wan sei a Redi Se ben de, na wan tra sei wan drei sabana pe kefar de, èn na wan tra sei a legre fu Farao. Ma Moses ben taigi a pipel: „No frede. Tanapu kánkan èn si a frulusu fu Yehovah, di a sa gi unu tide.”—Exodus 14:8-14.

Na wan wondru fasi, Yehovah prati a watra fu a Redi Se, so taki den Israelsma ben kan lowe gowe. Ma di den Egeptesma go na baka den Israelsma, dan Gado meki a watra fadon na tapu den. ’Yehovah trowe den wagi fu Farao nanga en srudati legre go na ini se’ (Exodus 14:26-28; 15:4). Fu di a heimemre Farao ben weigri fu prèise Yehovah, meki a kisi so wan takru kaba.

Na a Redi Se, Yehovah ben sori taki en na „wan mansma fu orloku” (Exodus 15:3). A tori di skrifi nanga yepi fu a yeye fu Gado e taki: „Israel ben kisi na okasi tu fu si a tranga anu di Yehovah gebroiki teige den Egeptesma; èn a pipel ben bigin frede Yehovah èn den ben bigin poti bribi na ini Yehovah” (Exodus 14:31; Psalm 136:10-15). Den sma ben taki Gado tangi nanga den heri ati èn nanga furu prisiri den mansma bigin singi wan singi makandra nanga Moses; èn en sisa, Miryam, ben dansi makandra nanga den umasma. *

Yehovah na wan Frulusuman ete

Den disiten futuboi fu Yehovah kan tranga a bribi fu den te den e ondrosuku a moi fasi fa Gado frulusu den Israelsma. Wán sani di wi e leri, na taki Yehovah abi krakti pasa marki èn a kan yepi en pipel dorodoro. Na ini a singi fu den, Moses nanga den Israelsma ben singi nanga furu prisiri: „Yu reti-anu, o Yehovah, e sori fu de tranga na ini san a man du. Yu reti-anu, o Yehovah, kan masi wan feanti.”—Exodus 15:6.

Wan tra sani di wi e leri, na taki na Almaktiwan wani kibri a pipel fu en trutru. Den Israelsma ben singi: „Mi krakti nanga mi makti na Yah, fu di na en frulusu mi. En na mi Gado, èn mi sa prèise en.” Wan tra sani di wi e leri, na taki nowan sma kan tapu Yehovah Gado fu du san a abi  na prakseri. Na ini a fektori singi, a pipel di Gado frulusu, ben singi: „Suma na mindri den gado de leki yu, o Yehovah? Suma de leki yu, di makti èn di santa srefisrefi? A Sma di musu kisi frede nanga prèisesingi, a Sma di e du sani di e meki sma fruwondru.”—Exodus 15: 2, 11.

Neleki a Farao fu owruten Egepte, na so den tiriman na ini a ten disi e frufolgu a pipel fu Yehovah. Na wan heimemre fasi den edeman kan ’taki wortu srefi teige a Moro Heiwan, èn den sa trobi srefi den santawan fu a Moro Heiwan doronomo’ (Danièl 7:25; 11:36). Ma Yehovah e gi a pipel fu en a dyaranti: „Nowan fetisani di den sa meki teige yu sa abi bun bakapisi, èn iniwan tongo di sa opo teige yu na ini a krutu, yu sa krutu. Disi na a famirigudu fu den futuboi fu Yehovah.”—Yesaya 54:17.

Sma di e gens Gado no sa wini, neleki fa Farao nanga en legre no ben wini. A fasi fa Yehovah e frulusu sma, neleki fa a ben frulusu den Israelsma komoto fu Egepte, e sori taki a bun fu libi akruderi a gronprakseri di den apostel fu Yesus ben taki: „Fu di Gado na wi tiriman, meki wi musu gi yesi na en na presi fu libisma.”—Tori fu den Apostel 5:29.

[Futuwortu]

[Faki na tapu bladzijde 9]

YU BEN SABI DISI?

• Yehovah ben meki wan tranga winti wai heri neti, so taki Israel ben kan pasa a Redi Se na tapu drei gron.—Exodus 14:21, 22.

• Wan pasi di bradi pasa wán nanga afu kilometer ben de fanowdu fu meki den milyunmilyun Israelsma pasa a Redi Se na ini so wan syatu ten.

[Prenki na tapu bladzijde 9]

Den falsi gado fu den Egeptesma no ben man du noti fu tapu den tin plaag fu Yehovah

[Sma di abi a reti fu den prenki]

All three figurines: Photograph taken by courtesy of the British Museum