Dai Pagtawan nin Lugar an Diablo

“Dai tawan nin oportunidad an Diablo.”​—EFESO 4:​27, Byington.

1. Taano ta dakol an nagdududa sa pag-eksister kan Diablo?

SA LAOG nin dakol na siglo, iniimahinar kan dakol na tawo an Diablo bilang may sungay, baak an bitis na linalang na nakasulot nin pula asin naggagamit nin pantalsok tanganing iapon an maraot na mga tawo sa nagkakalayong impierno. Dai sinusuportaran kan Biblia an ideyang iyan. Minsan siring, daing duda na an siring na salang mga pakasabot nagpangyari sa minilyon na pagdudahan an pag-eksister kan Diablo o isipon na an termino aplikado sana sa prinsipyo nin karatan.

2. Ano an nagkapirang impormasyon sa Kasuratan manongod sa Diablo?

² An Biblia nagtatao nin ebidensia kan nakaheling mismo asin nin malinaw na patotoo na nag-eeksister an Diablo. Naheling sia ni Jesu-Cristo sa langitnon na rona nin mga espiritu asin nakipag-olay sa saiya digdi sa daga. (Job 1:6; Mateo 4:​4-​11) Minsan ngani dai ihinahayag kan Kasuratan an orihinal na ngaran kan espiritung linalang na ini, inaapod sia kaiyan na Diablo (na nangangahulogan “Parabalobagi”) huling binalobagi nia an Dios. Inaapod man siang Satanas (na nangangahulogan “Paratumang”), huli ta tinutumang nia si Jehova. Si Satanas na Diablo inaapod na “enot na halas,” na minalataw na huli ta naggamit sia nin halas tanganing dayaon si Eva. (Kapahayagan 12:9; 1 Timoteo 2:14) Midbid man sia bilang an “maraot.”​—Mateo 6:13. *

3. Anong hapot an pag-oolayan niato?

³ Bilang mga lingkod ni Jehova, habo nanggad niato na magin kapareho ni Satanas, an pangenot na kaiwal kan solamenteng tunay na Dios. Kun siring, dapat na maghimate kita sa konseho ni apostol Pablo: “Dai tawan nin oportunidad an Diablo.” (Efeso 4:​27, Byington) Kun siring, ano an nagkapira sa mga karakteristiko ni Satanas na dai niato dapat arogon?

Dai Pag-arogon an Dakulang Parabalobagi

4. Paano binalobagi kan “maraot” na iyan an Dios?

⁴ An “maraot” na iyan angay na apodon na Diablo, huling sia sarong parabalobagi. An pagbalobagi iyo an putik, maraot an intension, asin mapagpakaraot na tataramon manongod sa sarong tawo. An Dios nagboot ki Adan: “Kun dapit sa kahoy kan pakamidbid sa marahay asin maraot dai ka magkakan dian, huli ta sa aldaw na kumakan ka dian ika siertong magagadan.” (Genesis 2:17) Aram ini ni Eva, alagad paagi sa sarong halas, sinabihan sia kan Diablo: “Dai nanggad kamo magagadan. Huli ta naaaraman nin Dios na sa mismong aldaw na kamo kumakan kaiyan mabubuklat an saindong mga mata asin kamo magigin arog nin Dios, na nakakamidbid kan marahay asin maraot.” (Genesis 3:​4, 5) Maraot an intension na pagbalobagi idto tumang ki Jehova Dios!

5. Taano ta dapat na papanimbagon si Diotrefes sa pambabalobagi?

⁵ Pinagbotan an mga Israelita: “Dai ka maglibot sa saimong banwaan para sa pambabalobagi.” (Levitico 19:16) May sinabi si apostol Juan may labot sa  sarong parabalobagi kan saiyang kaaldawan: “May isinurat ako sa kongregasyon, alagad si Diotrefes, na gustong magkamit kan enot na lugar sa tahaw ninda, dai nag-aako nin ano man hale sa samo na may paggalang. Kaya, pagdatong ko, gigirumdomon ko an saiyang mga gibo na padagos niang ginigibo, na nagtatabil dapit sa samo sa maraot na mga tataramon.” (3 Juan 9, 10) Binabalobagi kaidto ni Diotrefes si Juan asin dapat siang papanimbagon huli kaiyan. Siisay na maimbod na Kristiano an magmamawot na magin arog ni Diotrefes asin arogon si Satanas, an dakulang parabalobagi?

6, 7. Taano ta mamawoton niatong likayan na mambalobagi sa siisay man?

⁶ An mapagbalobaging mga tataramon asin falsong mga akusasyon parateng isinasahot sa mga lingkod ni Jehova. “An mga poon na saserdote asin an mga eskriba padagos na nagtitindog asin makosog na inaakusaran [si Jesus].” (Lucas 23:10) Putik na sinahotan si Pablo kan Halangkaw na Saserdoteng si Ananias asin kan iba pa. (Gibo 24:​1-8) Asin an Biblia nagtataram manongod ki Satanas bilang “an parasumbong sa satong mga tugang, na nagsusumbong sa sainda aldaw asin banggi sa atubangan kan satong Dios.” (Kapahayagan 12:10) An mga tugang na idto na putik na sinahotan iyo an linahidan na mga Kristiano digdi sa daga sa huring mga aldaw na ini.

⁷ Mayong Kristiano an magmamawot na mambalobagi sa siisay man o gumibo nin falsong mga akusasyon. Pero, puedeng mangyari iyan kun mayo kita kan gabos na impormasyon bago magtao nin patotoo tumang sa sarong tawo. Sa Ley ni Moises, an tuyong pagsaksi nin putik puedeng magresulta nin kagadanan para sa nagsasahot. (Exodo 20:16; Deuteronomio 19:15-​19) Dugang pa, kaiba sa mga bagay na makauuyam nin makuri ki Jehova “an putikon na saksi na nagtataram nin mga kaputikan.” (Talinhaga 6:16-19) Kun siring, daing duwa-duwa na gusto niatong likayan an pag-arog sa pangenot na parabalobagi asin putik na parasahot.

Rayoan an mga Dalan kan Orihinal na Paragadan

8. Sa anong paagi na an Diablo “sarong paragadan kan sia pumoon”?

⁸ An Diablo sarong paragadan. “An sarong iyan sarong paragadan kan sia pumoon,” an sabi ni Jesus. (Juan 8:44) Poon sa enot niang gibo nin pagpatalikod ki Adan asin Eva sa Dios, si Satanas paragadan na. Sia an nagpangyari kan kagadanan kan enot na mag-agom asin kan mga gikan ninda. (Roma 5:12) Maririsa na an aksion na ini ikakaatribwir sana sa sarong persona, bakong sa prinsipyo sana nin karatan.

9. Siring kan ipinaparisa sa 1 Juan 3:​15, paano kita puedeng magin mga paragadan?

⁹ “Dai ka mangadan,” an sinasabi kan saro sa Sampulong Togon na itinao sa Israel. (Deuteronomio 5:17) Kinakaolay an mga Kristiano, si apostol Pedro nagsurat: “Mayo logod nin siisay man sa saindo na magdusa bilang paragadan.” (1 Pedro 4:15) Kaya bilang mga lingkod ni Jehova, dai kita magadan nin tawo. Pero, magkakasala kita sa atubangan nin Dios kun ikinakaongis niato an sarong kapwa Kristiano asin minamawot na sia magadan. “An lambang naoongis sa saiyang tugang paragadan,” an isinurat ni apostol Juan, “asin kamo nakakaaram na mayo nin paragadan na igwa pa dian sa saiya nin buhay na daing katapusan.” (1 Juan 3:15) Pinagbotan an mga Israelita: “Dai ka maongis sa saimong tugang sa saimong puso.” (Levitico 19:17) Magin listo logod kita na resolberan an ano man na problema na minalataw sa pag-oltanan niato asin nin sarong kapagtubod, tanganing dai maraot kan paragadan na si Satanas an satong Kristianong pagkasararo.​—Lucas 17:​3, 4.

Manindogan nin Marigon Tumang sa Pangenot na Putikon

10, 11. Ano an dapat niatong gibohon tanganing makapanindogan nin marigon tumang sa pangenot na putikon, si Satanas?

¹⁰ An Diablo sarong putikon. “Kun sia nagtataram nin putik,” an sabi ni Jesus, “sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.” (Juan 8:44) Si Satanas nagputik ki Eva, mantang si Jesus napadigdi sa kinaban tanganing magpatotoo sa katotoohan. (Juan 18:37) Kun kita maninindogan nin marigon tumang sa Diablo bilang mga parasunod ni Cristo, dai kita magamit nin mga kaputikan asin panloloko. Dapat na “magtaram [kita] nin katotoohan.” (Zacarias 8:​16; Efeso 4:25) An binebendisyonan sana ni “Jehova na Dios nin katotoohan” iyo an saiyang sadiosan na mga Saksi. An mga maraot mayo nin deretso na irepresentar sia.​—Salmo 31:5; 50:16; Isaias 43:10.

 ¹¹ Kun pinakamamahal niato an satong espirituwal na pagkatalingkas sa satanikong mga kaputikan, pangangaptan niato an Kristianismo, “an dalan kan katotoohan.” (2 Pedro 2:2; Juan 8:32) An enterong kabilogan kan Kristianong mga katokdoan iyo “an katotoohan kan maogmang bareta.” (Galacia 2:​5, 14) An mismong kaligtasan niato nakadepende sa satong ‘paglakaw sa katotoohan’​—na sinususog iyan asin naninindogan nin marigon tumang sa “ama kan kaputikan.”​—3 Juan 3, 4, 8.

Labanan an Pangenot na Apostata

12, 13. Paano niato maninigong trataron an mga apostata?

¹² An espiritung linalang na nagin Diablo dating nasa katotoohan. Alagad “dai sia nagdanay sa katotoohan,” an sabi ni Jesus, “huli ta mayo sa saiya an katotoohan.” (Juan 8:44) Ipinagpadagos kan pangenot na apostatang ini an daing ontok na paglaban sa “Dios nin katotoohan.” An nagkapirang Kristiano kan enot na siglo nahulog sa “siod kan Diablo,” na minalataw na nagin saiyang mga biktima huli ta sinda ikinalagalag asin suminuhay sa katotoohan. Kaya sinadol ni Pablo an saiyang kapwa trabahador na si Timoteo na tokdoan sinda na may kahoyoan tanganing tibaad maomayan sinda sa espirituwal asin makabutas sa siod ni Satanas. (2 Timoteo 2:​23-​26) Siempre, mas marahay nanggad na mangapot nin marigon sa katotoohan asin nungkang magpasiod sa apostatang mga punto de vista.

¹³ Huli sa paghinanyog sa Diablo asin dai pagsayuma sa kaputikan kaini, nag-apostata an enot na mag-agom. Kaya, kun siring, maninigo daw kitang maghinanyog sa mga apostata, magbasa kan saindang mga literatura, o magsiyasat sa saindang mga Web site sa Internet? Kun namomotan niato an Dios asin an katotoohan, dai niato iyan gigibohon. Dai niato maninigong togotan an mga apostata na lumaog sa satong harong o dawa taratarahon sinda, huling an paggibo kaiyan mapangyari sa sato na ‘nakikikabtang sa saindang maraot na mga gibo.’ (2 Juan 9-​11) Nungka logod kitang padara sa mga pakana kan Diablo paagi sa pagbaya sa Kristianong “dalan nin katotoohan” tanganing sumunod sa falsong mga paratokdo na naghihingoang “iintrodusir an kapahapahamak na mga ideolohiya” asin nagmamaigot na ‘aprobetsaran kita paagi sa marahay an pagkapaliwanag na mga tataramon.’​—2 Pedro 2:​1-3, Byington.

14, 15. Anong patanid an itinao ni Pablo sa kamagurangan sa Efeso asin sa saiyang kapwa trabahador na si Timoteo?

¹⁴ Sinabihan ni Pablo an Kristianong kamagurangan sa Efeso: “Magtao kamo nin atension sa saindong sadiri asin sa bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki. Aram ko na pakahale ko an mapan-aping mga lobo malaog dian sa tahaw nindo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.” (Gibo 20:28-30) Pag-abot nin panahon, talagang naglataw an siring na mga apostata asin ‘nagtaram nin biribid na mga bagay.’

¹⁵ Kan mga 65 C.E., an apostol nagsadol ki Timoteo na ‘gamiton an tataramon kan katotoohan sa tamang paagi.’ “Alagad,” an surat ni Pablo, “isikwal mo an daing datang mga tataramon na naglalapas sa banal; huli ta iyan mapasiring sa orog pang karatan, asin an saindang tataramon makakalakop na siring sa gangrena. Kabilang sa sainda si Himeneo asin si Fileto. An mga tawo mismong ini  nagsuhay sa katotoohan, na nagsasabing nangyari na an pagkabuhay liwat; asin linalaglag ninda an pagtubod nin nagkapira.” Nagpoon na an apostasiya! “Sa ibong kan gabos na iyan,” an idinugang ni Pablo, “an masarig na pasisikadan nin Dios nagdadanay.”​—2 Timoteo 2:15-19.

16. Sa ibong kan mga pakana kan pangenot na apostata, taano ta nagdanay kitang maimbod sa Dios asin sa saiyang Tataramon?

¹⁶ Parateng ginagamit ni Satanas an mga apostata sa paghihingoang raoton an tunay na pagsamba​—alagad daing nangyari. Kan mga taon nin 1868, pinonan ni Charles Taze Russell an maingat na pagsiyasat sa haloy nang inaako na mga doktrina kan mga iglesia nin Kakristianohan asin nanompongan nia an mga misinterpretasyon kan Kasuratan. Si Russell asin an pirang iba pang naghahanap nin katotoohan inorganisar an sarong klase sa pag-adal sa Biblia sa Pittsburgh, Pennsylvania, E.U.A. Sa laog nin haros 140 taon poon kaidto, an mga lingkod ni Jehova nag-oswag sa kaaraman asin pagkamoot sa Dios asin sa saiyang Tataramon. Sa ibong kan mga pakana kan pangenot na apostata, an espirituwal na pagkapuka kan grupong maimbod asin mapagmansay na oripon nakatabang sa tunay na mga Kristianong ini na magdanay na maimbod ki Jehova asin sa saiyang Tataramon.​—Mateo 24:45.

Nungka Kamong Magpakontrol sa Namamahala kan Kinaban

17-19. Ano an kinaban na namumugtak sa kapangyarihan kan Diablo, asin taano ta dai niato maninigong mamotan iyan?

¹⁷ An saro pang paagi na hinihingoa ni Satanas na siodon kita iyo an pagtentar sa sato na mamoot sa kinaban na ini​—an bakong matanos na sosyedad nin tawo na siblag sa Dios. Inapod ni Jesus an Diablo na “namamahala sa kinaban” asin nagsabi: “Mayo siang kapangyarihan sa sako.” (Juan 14:30) Nungka logod na makontrol kita ni Satanas! Siempre, narerealisar niato na “an bilog na kinaban namumugtak sa kapangyarihan kan maraot” na iyan. (1 Juan 5:19) Kaya ikakatao kan Diablo ki Jesus “an gabos na kahadean kan kinaban” para sa sarong apostatang akto nin pagsamba​—bagay na marigon na sinayumahan kan Aki nin Dios. (Mateo 4:​8-​10) An kinaban na pinapamahalaan ni Satanas naoongis sa mga parasunod ni Cristo. (Juan 15:18-21) Bakong makangangalas na si apostol Juan nagpatanid sa sato na dai mamoot sa kinaban!

¹⁸ Si Juan nagsurat: “Dai kamo mamoot sa kinaban o sa mga bagay kan kinaban. Kun an siisay  man namomoot sa kinaban, an pagkamoot kan Ama mayo sa saiya; huli ta an gabos na nasa kinaban​—an mawot kan laman asin an mawot kan mga mata asin an pagpaabaw-abaw kan kaya sa buhay​— bakong gikan sa Ama, kundi gikan sa kinaban. Apuera kaini, an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:15-17) Dai kita dapat mamoot sa kinaban, huling an paagi nin pamumuhay kaiyan nakakaakit sa makasalan na laman asin biyong kontra sa mga pamantayan ni Jehova Dios.

¹⁹ Paano kun an pagkamoot sa kinaban na ini nasa satong puso? Kun siring mamibi kita para sa tabang nin Dios na haleon an pagkamoot na ini asin an makalaman na mga mawot na konektado dian. (Galacia 5:16-21) Sierto na pagmamaigotan niato na papagdanayon an satong sadiri na “daing digta kan kinaban” kun gigirumdomon niato na an “maraot na mga puersang espiritu” iyo an dai naheheling na “mga namamahala sa kinaban” sa bakong matanos na sosyedad nin tawo.​—Santiago 1:​27; Efeso 6:​11, 12; 2 Corinto 4:4.

20. Taano ta masasabi na kita “bakong kabtang kan kinaban”?

²⁰ Mapadapit sa saiyang mga disipulo, si Jesus nagsabi: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) An linahidan na mga Kristiano asin an saindang nagdusay na kairiba nagmamaigot na magdanay na malinig sa moral asin espirituwal, siblag sa kinaban na ini. (Juan 15:19; 17:​14; Santiago 4:4) An bakong matanos na kinaban na ini naoongis sa sato huli ta kita nagdadanay na siblag digdi asin mga “parahulit [kita] nin katanosan.” (2 Pedro 2:5) Totoo, nabubuhay kita sa tahaw kan sosyedad nin tawo, na kaiba an mga parapakisaro, parasambay, parakikil, parasamba sa idolo, parahabon, putikon, asin paraburat. (1 Corinto 5:​9-​11; 6:​9-​11; Kapahayagan 21:8) Alagad dai niato hinahangos an “espiritu kan kinaban,” huling bako kitang kontrolado kan makasalan na nagpapahirong puersa na ini.​—1 Corinto 2:12.

Dai Pagtawan nin Lugar an Diablo

21, 22. Paano nindo ikakaaplikar an konseho ni Pablo na nakarekord sa Efeso 4:​26, 27?

²¹ Imbes na mapahiro kan “espiritu kan kinaban,” ginigiyahan kita kan espiritu nin Dios, na nagpapaluwas sa sato nin mga kualidad na siring kan pagkamoot asin pagpopogol sa sadiri. (Galacia 5:​22, 23) Nagtatabang ini sa sato na paglabanan an mga pananalakay kan Diablo sa satong pagtubod. Gusto nia kitang “mag-init tangani sanang makagibo nin maraot,” alagad tinatabangan kita kan espiritu nin Dios na ‘pabayaan an kaanggotan asin bayaan an kabangisan.’ (Salmo 37:8) Totoo, kun beses tibaad may katanosan kita na maanggot, alagad sinasadol kita ni Pablo: “Maanggot kamo nin grabe, pero dai kamo magkasala; dai nindo pagpasolnopon an saldang na kamo may kaanggotan, ni tawan man nin lugar an Diablo.”​—Efeso 4:​26, 27.

²² An satong kaanggotan puedeng magresulta sa kasalan kun magdadanay kitang may kaanggotan. An pagkaigwa niato nin arog kaining kaisipan matao nin oportunidad sa Diablo na palakopon an dai pagkaoroyon sa kongregasyon o sutsutan kita na gumibo nin maraot na mga gibo. Huli kaini, kaipuhan na husayon tolos niato sa diosnon na paagi an mga dai pagkaintindihan. (Levitico 19:​17, 18; Mateo 5:​23, 24; 18:​15, 16) Kun siring, magpagiya kita sa espiritu nin Dios, na nagpopogol sa sadiri asin nungkang tinotogotan dawa an may katanosan na pagkaanggot na sumagkod sa makuring karaotan nin boot, maraot na intension, asin pagkaongis.

23. Anong mga hapot an satong totokaron sa masunod na artikulo?

²³ Tinokar niato an nagkapirang karakteristiko kan Diablo na dai niato maninigong arogon. Alagad tibaad isip-isipon nin nagkapirang parabasa: Maninigo daw kitang matakot ki Satanas? Taano ta sinusutsutan nia an paglamag sa mga Kristiano? Asin paano niato malilikayan na masaroan kan Diablo?

[Nota sa ibaba]

Ano an Simbag Nindo?

• Taano ta maninigo na nungka kitang mambalobagi sa siisay man?

• Bilang pagsunod sa 1 Juan 3:​15, paano niato malilikayan na magin mga paragadan?

• Ano an maninigong magin pagheling niato sa mga apostata, asin taano?

• Taano ta dai kita maninigong mamoot sa kinaban?

[Mga Hapot Para sa Pag-adal]

[Ritrato sa pahina 23]

Nungka niatong totogotan an Diablo na raoton an satong Kristianong pagkasararo

[Mga Ritrato sa pahina 24]

Taano ta sinadol kita ni Juan na dai mamoot sa kinaban?