No Givim Janis Long Setan

“Yufala i mas no givim janis long Setan.”​—EFESAS 4:27.

1. ?From wanem plante man oli no ting se Setan i stap?

 LONGTAEM finis i kam, plante man oli gat wan narakaen tingting long saed blong Setan. Oli ting se hem i gat tu hon, leg blong hem daon i olsem leg blong buluk, hem i werem red klos, mo hem i holem wan bigfala fok we hem i yusum blong sakem ol rabis man oli go long helfaea. Ol tingting ya oli no stanap long Baebol. Be ol rong tingting olsem oli mekem se plante milian man oli no ting se Setan i stap, mo plante narafala oli ting se Setan i wan saen nomo we i minim ol samting nogud.

2. ?Baebol i talem wanem samting long saed blong Setan?

² Baebol i talemaot klia se Setan i stap, mo i tokbaot wan man we i bin luk Setan. Jisas Kraes i bin luk hem long heven, mo taem Jisas i stap long wol hem i toktok wetem Setan. (Job 1:6; Matiu 4:​4-11) Baebol i no talem faswan nem blong enjel ya. Be Baebol i yusum wan nem long olfala lanwis blong tokbaot hem, mo nem ya Devel (we i minim “Man blong giaman blong spolem narafala”). Hemia from we enjel ya i giaman blong spolem nem blong God. Mo tu, hem i gat wan narafala nem, hemia Setan (we i minim “Man we i agensem man”), from we enjel ya i girap agensem Jeova. Baebol i kolem Setan “snek ya blong bifo,” ating from we hem i yusum wan snek blong trikim Iv. (Revelesen 12:9; 1 Timoti 2:14) Mo tu, Baebol i kolem hem “man ya we i rabis.”​—Matiu 6:​13, NW. *

3. ?Bambae yumi faenem ansa long wanem kwestin?

³ Yumi ol man blong Jeova, yumi no wantem nating blong tekem fasin blong Setan, bigfala enemi blong trufala God ya Jeova. Taswe, yumi mas lesingud long advaes ya blong aposol Pol se: “Yufala i mas no givim janis long Setan.” (Efesas 4:27) Oraet, ?wanem sam fasin blong Setan we yumi no mas folem?

No Folem Fasin Blong Bigfala Man Ya Blong Giaman

4. ?Olsem wanem “man ya we i rabis” i giaman blong spolem nem blong God?

⁴ “Man ya we i rabis” i stap giaman blong spolem narafala. Wan man we i gat fasin olsem i stap talemaot ol tok we i no tru blong daonem narafala, from we hem i wantem nomo blong spolem narafala ya. God i talem long Adam se: “Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:17) Iv tu i save long ol tok ya. Be Setan i yusum wan snek blong talem sam defren tok long Iv. Setan i talem se: “No, hemia i no tru ya. Yutufala i no save ded. [God] i talem olsem from we i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.” (Jenesis 3:​4, 5) !Hemia nao ol giaman tok blong spolem Jeova God!

5. ?From wanem kongregesen i mas stretem Diotrefes taem hem i talem ol giaman toktok blong spolem Jon?

⁵ God i talem long ol man Isrel se: “Yufala i no mas go giagiaman olbaot long baksaed blong man.” (Levitikas 19:16) Aposol Jon i tokbaot wan man blong giaman long taem blong hem i se: “Mi mi raetem wan sotfala leta i go finis long ol Kristin man long ples blong yu. Be Diotrefes, hem i laekem tumas blong i lida blong olgeta, nao hem i no save lesin long tok blong mifala. Oraet, taem mi mi kam, bambae mi  talemaot long ol man blong [kongregesen] ol fasin we hem i stap mekem, mo bambae mi talemaot ol giaman toktok we hem i stap talem blong spolem mifala.” (3 Jon 9, 10) Diotrefes i giagiaman olbaot long saed blong Jon, taswe kongregesen i mas stretem hem. Tru ya, ol Kristin we oli gat fasin blong stap tru oli no mas kam olsem Diotrefes we i folem fasin blong Setan, bigfala Man ya blong giaman blong spolem narafala.

6, 7. ?From wanem yumi mas stap longwe long fasin blong giaman blong spolem narafala?

⁶ Plante man oli talem ol giaman toktok blong spolem ol man blong Jeova. Long saed blong Jisas, “ol jif pris, wetem ol tija blong Loa oli stanap, mo oli stap tok strong, oli talemaot ol poen agens long [hem].” (Luk 23:10) Hae Pris Ananaeas wetem sam narafala oli talem ol giaman tok agens long Pol. (Ol Wok 24:​1-8) Mo Baebol i talem tu se ‘long dei mo long naet, Setan i talemaot ol poen agens long ol brata blong yumi long fes blong God.’ (Revelesen 12:10) Ol brata ya we Setan i agensem, hemia ol Kristin we tabu spirit i makemaot olgeta mo we oli stap laef yet long wol ya long ol las dei ya.

⁷ Wan Kristin i no mas giaman blong spolem narafala no giaman blong talemaot poen agens long narafala. Be samting ya i save hapen sipos yumi no gat olgeta save long saed blong wan bisnes nao yumi witnes blong talemaot we narafala man i mekem i no stret. Loa blong Moses i talem se man we i giaman blong talemaot poen agens long narafala, hem i save kasem panis blong ded. (Eksodas 20:16; Dutronome 19:​15-19) Wan samting we Jeova i no laekem nating, hemia “fasin blong giaman insaed long kot.” (Ol Proveb 6:​16-19) From samting ya, yumi mas stap longwe long fasin blong bigfala Man ya we i stap giaman blong spolem narafala mo blong talemaot poen agens long narafala.

No Folem Fasin Blong Faswan Man Blong Kilim Man

8. ?Olsem wanem Setan i ‘man blong kilim man, stat bifo olgeta’?

⁸ Devel Setan i wan man blong kilim man i ded. Jisas i talem se: “Fasin blong hem we i stat bifo olgeta, hem i man blong kilim man.” (Jon 8:44) Setan i wan man blong kilim man, stat long faswan samting we hem i mekem blong pulum Adam mo Iv blong agensem God. Hem i mekem se faswan man mo woman ya wetem ol pikinini blong tufala, oli kasem ded. (Rom 5:12) Makemgud se blong mekem samting ya, Setan i mas wan man, from we sipos hem i wan saen nomo blong ol samting nogud, hem i no save kilim man i ded.

9. ?Folem tok blong 1 Jon 3:​15, olsem wanem yumi save kam man blong kilim man?

⁹ Wan long ol Tenkomanmen we God i givim long Isrel i talem se: “Yufala i no mas kilim man i ded.” (Dutronome 5:17) Mo aposol Pita i raetem leta i go long ol Kristin, i se: “Man we i kilim man, . . . hem bambae i kasem panis. Be i no stret sipos wan long yufala i kasem panis from ol fasin olsem.” (1 Pita 4:15) Taswe yumi ol man blong Jeova, yumi no save kilim narafala i ded. Be sipos yumi no laekem nating wan Kristin brata no sista mo yumi wantem se hem i ded, fasin ya tu i save mekem se yumi gat fol long fes blong God. Aposol Jon i raetem tok ya se: “Man we i no laekem Kristin brata no sista blong hem, i stap agensem hem, hem i man blong kilim man i ded. Mo yufala i save finis, se ol man olsem, oli no gat laef ya we i no save finis.” (1 Jon 3:15) God i talem long ol man Isrel se: “Sipos wan long yufala i kros long narafala man, hem i no mas holem kros blong hem longtaem, we i no fogivim man ya nating.” (Levitikas 19:17) Yumi mas kwik blong stretem enikaen trabol we yumi gat wetem wan Kristin brata no sista. Olsem nao, Setan we i man blong kilim man, i no save spolem fasin joengud we yumi ol Kristin yumi gat.​—Luk 17:​3, 4.

Stanap Strong Agens Long Bigfala Man Blong Giaman

10, 11. ?Yumi mas mekem wanem blong stanap strong agensem bigfala man ya blong giaman, Setan?

¹⁰ Setan i wan man blong giaman. Jisas i talem se: “Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.” (Jon 8:44) Setan i giaman long Iv. Be Jisas i defren olgeta. Hem i kam long wol ya blong talemaot trutok. (Jon 18:37) Sipos yumi folem Kraes mo stanap strong agens long Setan, yumi no save giaman mo mekem ol fasin blong trikim narafala. Yumi mas “talem trutok long ol narafala man.” (Sekaraea 8:16; Efesas 4:25) ‘God ya blong trutok, Jeova’ i blesem nomo ol Witnes blong hem we oli tok tru oltaem. Ol rabis man oli no gat raet blong karem nem blong hem.​—Ol Sam 31:​5, NW; 50:16; Aesea 43:10.

¹¹ Sipos yumi tinghae long trutok blong Baebol we i mekem yumi fri long ol giaman tok blong Setan, bambae yumi holemtaet trufala Kristin skul we hem i “Rod blong Trutok.” (2 Pita 2:2; Jon 8:32) Olgeta Kristin tijing oli stap insaed long “trutok blong gud nius.” (Galesia 2:​5, 14) Sipos yumi wantem we God i sevem  yumi, yumi mas “folem ol tok we i tru.” Hemia i min se yumi mas holemtaet trutok ya mo stanap strong agens long ‘man ya we i stamba blong ol giaman toktok.’​—3 Jon 3, 4, 8.

No Folem Fasin Blong Bigfala Man Blong Apostasi

12, 13. ?Wanem fasin we yumi mas mekem long ol man blong apostasi?

¹² Enjel ya we i kam Setan, hem i stap long trutok fastaem. Be Jisas i talem se: “Neva hem i stap wetem olgeta we oli tok tru, from we i no gat trutok nating long hem.” (Jon 8:44) Setan, bigfala man blong apostasi, * i girap agensem ‘God ya blong trutok,’ mo hem i gohed long rod ya kam kasem tede. Sam Kristin long faswan handred yia oli foldaon long “trap blong Setan.” I luk olsem we Setan i winim olgeta taem oli lego trutok mo oli folem rod we i krangke. Taswe Pol i talem long Timoti we i stap wok wetem hem, se hem i mas stretem olgeta long fasin we i kwaet nomo, blong oli save kam strong bakegen long saed blong spirit mo ronwe long trap blong Setan. (2 Timoti 2:​23-26) Be i moagud yet sipos yumi holemtrong oltaem long trutok we yumi neva letem tingting blong apostasi i pulum yumi blong foldaon long trap ya.

¹³ Faswan man mo woman, tufala i no sakemaot ol giaman tok blong Setan be tufala i lesin long hem. Long rod ya tufala i kam man blong apostasi. ?From samting ya, yu ting se i stret blong lesin long ol man blong apostasi, ridim ol buk blong olgeta, no luk long Web saet blong olgeta long Intenet? Sipos yumi lavem God ya blong trutok, yumi no save mekem olsem. Yumi no save letem wan man blong apostasi i kam long haos blong yumi mo yumi no save talem halo long hem, from we ol fasin ya oli mekem we yumi “joen long hem long ol rabis wok blong hem.” (2 Jon 9-11) Yumi neva mas letem Setan i trikim yumi blong lego Kristin “Rod blong Trutok” mo folem ol tija we oli ‘tekem ol giaman toktok i kam insaed, we i save spolem bilif blong yumi,’ mo we “oli winim plante mane long ol giaman toktok blong olgeta.”​—2 Pita 2:​1-3.

14, 15. ?Pol i givim wanem woning long ol elda long Efesas mo long Timoti?

¹⁴ Pol i talem long ol elda long Kristin kongregesen long Efesas se: “Yufala i mas lukaot gud long yufala, mo long ol man ya we Tabu Spirit i putum olgeta oli stap finis long han blong yufala. Yufala i mas lukaot long ol man blong jos blong God, olsem we man blong lukaot long sipsip i stap lukaot long ol sipsip blong hem. Yufala i mas mekem olsem, from we God i pemaot ol man ya finis long blad blong Pikinini blong hem. Mi mi save finis, se bambae, taem mi mi aot long yufala, olgeta ya we oli olsem wael dog, bambae oli kam long yufala, mo bambae oli ronem yufala ol man blong Jisas, olsem we yufala i sipsip nomo. Yes, i gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.” (Ol Wok 20:​28-30) Sloslo samfala oli kam ol man blong apostasi we oli ‘girap mo giaman nomo blong lidim ol man blong Jisas oli go krangke.’

¹⁵ Raonabaot long yia 65 K.T., aposol Pol i talem long Timoti se hem i mas “tijim ol man long trutok blong God long fasin we i stret gud.” Long leta we Pol i raetem, hem i talem se: “Bambae yu no go joen long ol toktok blong olgeta ya we oli stap tok nogud long God, oli stap toktok krangke nomo. Ol toktok olsem i stap pulum ol man oli go longwe nomo long God. Toktok blong ol man olsem i olsem wan soa long leg blong man, we i no save kam gud bakegen, oltaem i stap kam bigwan moa, i stap spolem leg blong man. Tok blong tufala man ya Haemenaeas mo Faelitas i olsem. Tufala ya i lusum rod blong trutok finis. Nao tufala i stap spolem fasin blong bilif blong sam Kristin  man, from we tufala i stap talem se, ‘God i mekem yumi laef bakegen finis. Bambae i no save mekem bakegen.’ ” !Saye, fasin blong apostasi i stat finis! Pol i gohed moa i se: “Be strongfala fandesen blong bilif we God i putum finis, hem i no muf.”​—2 Timoti 2:​15-19.

16. ?Nating se bigfala Man blong apostasi i gat plante trik, from wanem yumi holemstrong long Jeova mo Tok blong hem?

¹⁶ Plante taem Setan i yusum ol man blong apostasi blong traem spolem trufala wosip. Be hem i no win. Samwe long yia 1868, Charles Taze Russell i stat blong stadi dip long ol tijing we ol jos blong Krisendom * oli bin bilif long olgeta longtaem finis i kam. Hem i faenem “plante tijing we oli no laenap wetem Baebol.” Ale Russell mo sam narafala man we oli stap lukaot trutok, oli mekem wan klas blong stadi long Baebol, long Pittsburgh, Pennsylvania, Yunaeted Stet. Kam kasem naoia klosap 140 yia i pas finis, mo long ol yia ya ol man blong Jeova oli bin kasem moa save long Baebol, mo oli lavem moa God mo Tok blong hem. Nating se bigfala Man blong apostasi i gat plante trik, be slef we i stret mo waes we i wekapgud long saed blong spirit, i givhan long ol trufala Kristin ya blong oli holemstrong long Jeova mo Tok blong hem.​—Matiu 24:​45, NW.

Neva Letem Rula Blong Wol i Kam Bos Blong Yu

17-19. ?Wol ya we i stap aninit long paoa blong Setan, hem i wanem? ?From wanem yumi no mas laekem wol ya?

¹⁷ Wan narafala rod we Setan i stap yusum blong mekem yumi foldaon long trap blong hem, se hem i pulum yumi blong lavem wol​—hemia i minim ol man nogud we oli stap longwe long God. Jisas i talem se Setan i “masta blong wol ya,” mo hem i talem tu se: “Hem i no gat paoa blong mekem wan samting long mi.” (Jon 14:30) !Setan i neva mas gat paoa long yumi tu! Yumi save se “ful wol i stap aninit long paoa blong hemia we i rabis nomo.” (1 Jon 5:​19, NW ) From samting ya, Setan i talem long Jisas se bambae hem i givim “olgeta kantri blong wol ya” long hem sipos Jisas i mekem wan samting blong wosipim hem, hemia i min se sipos Jisas i mekem wan fasin blong apostasi. Be Pikinini blong God i soemaot klia mo strong se hem i no wantem samting ya. (Matiu 4:​8-10) Wol ya we Setan i rula blong hem, i no laekem nating ol man blong Kraes. (Jon 15:​18-21) !Yumi luksave klia from wanem aposol Jon i givim woning ya se yumi no mas laekem wol!

¹⁸ Long leta blong Jon, hem i raetem se: “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi. Ol fasin ya we i stap long wol oli olsem. Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ya, oli no kamaot long Papa blong yumi, oli stap kamaot long wol ya nomo. Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:​15-17) Yumi no mas laekem wol ya. Ol fasin blong hem oli laenap wetem ol samting we tingting blong ol sinman i wantem, be oli agensem fulwan ol stret rul blong Jeova God.

¹⁹ Be maet long hat blong yumi, yumi laekem sam fasin blong wol. ?Sipos i olsem, yumi mas mekem wanem? Yumi mas prea mo askem long God blong i halpem yumi blong sakemaot lav ya blong wol wetem tingting ya se yumi wantem ol fasin blong wol. (Galesia 5:​16-21) Oltaem yumi mas tingbaot se “ol rabis spirit” we yumi no save luk olgeta, oli “ol rula blong wol ya” we oli lidim ol man blong wol tede blong mekem ol fasin nogud. Sipos yumi holem tingting ya, bambae yumi traehad blong ‘stap klin oltaem we ol rabis fasin blong wol i no spolem yumi.’​—Jemes 1:27; Efesas 6:​11, 12, NW; 2 Korin 4:4.

20. ?From wanem yumi save talem se yumi “no man blong wol ya”?

²⁰ Jisas i talem se: “Mi mi no man blong wol ya, mo long sem fasin, [ol disaepol blong mi] tu oli no man blong wol ya.” (Jon 17:16) Ol Kristin we tabu spirit i makemaot olgeta mo ol fren blong olgeta we oli givim laef blong olgeta i go long Jeova finis, oli traehad blong stap longwe long ol fasin blong wol, mo blong stap klin long laef blong olgeta mo long saed blong spirit. (Jon 15:19; 17:14; Jemes 4:4) Ol man blong wol ya we oli mekem ol nogud fasin, oli no laekem yumi nating, from we yumi stap longwe long ol fasin blong wol ya mo from we yumi ‘ol prija we yumi stap talemaot stret fasin.’ (2 Pita 2:5) I tru, yumi mas laef long medel blong ol man blong wol we oli slip olbaot, oli stilim man no woman blong narafala, oli trikim narafala blong stilim mane, oli prea long ol narafala god, oli stil, oli giaman, mo oli dring we oli lusum hed. (1 Korin 5:​9-11; 6:​9-11; Revelesen 21:8) Be ‘spirit blong wol ya’ i no gat paoa long yumi. Yumi no letem nogud spirit ya i pusum yumi blong mekem ol fasin blong wol.​—1 Korin 2:12.

 No Givim Janis Long Setan

21, 22. ?Olsem wanem yu save folem advaes blong Pol long Efesas 4:​26, 27?

²¹ Yumi no letem ‘spirit blong wol ya’ i pusum yumi. Be yumi letem spirit blong God i lidim yumi, mo from samting ya, yumi save wokem ol fasin olsem lav mo bos long tingting. (Galesia 5:​22, 23) Ol gudfala fasin ya oli givhan long yumi blong blokem ol samting we Setan i mekem blong spolem bilif blong yumi. Setan i wantem se yumi ‘kam kros mo mekem trabol,’ be spirit blong God i save givhan long yumi blong ‘no faerap mo no wari.’ (Ol Sam 37:8) I tru, sam samting we oli hapen, i stret nomo we yumi kam kros from. Be Pol i givim advaes ya se: “ ‘Sipos yufala i kros, yufala i no letem we kros ya i lidim yufala, blong yufala i mekem sin.’ Mo yufala i no stap kros, gogo kasem san i godaon. Yufala i mas no givim janis long Setan.”​—Efesas 4:​26, 27.

²² Sipos yumi stap kros longtaem, kros ya i save lidim yumi blong mekem sin. Taem yumi stap kros olsem, yumi givim janis long Setan blong mekem kongregesen i seraot no blong pulum yumi blong mekem fasin nogud. Taswe, yumi mas kwik blong stretem eni trabol we yumi gat wetem narafala, mo yumi mas mekem long gudfala fasin we God i glad long hem. (Levitikas 19:​17, 18; Matiu 5:​23, 24; 18:​15, 16) Yumi mas letem spirit blong God i lidim yumi. Olsem nao, yumi save bos long tingting blong yumi, mo neva bambae yumi letem kros i stap longtaem we i save mekem tingting blong yumi i kam konkon, mo we i save pulum yumi blong no laekem narafala mo agensem hem.

23. ?Long nekis stadi, bambae yumi tokbaot wanem?

²³ Yumi tokbaot finis sam fasin blong Setan we yumi no mas folem. Be samfala we oli ridim ol save ya, maet oli askem se: ?Yumi mas fraet long Setan no nogat? ?From wanem Setan i pusum sam man blong mekem i nogud long ol Kristin? ?Olsem wanem yumi save blokem Setan blong i no winim yumi?

[Ol Futnot]

?Wanem Ansa Blong Yu?

• ?From wanem yumi neva mas giaman blong spolem nem blong narafala?

• ?Folem ol tok long 1 Jon 3:​15, olsem wanem blong no kam wan man blong kilim man?

• ?Wanem tingting we yumi mas gat long ol man blong apostasi? ?From wanem?

• ?From wanem yumi no mas laekem wol ya?

[Kwestin]

[Tok blong pija long pej 9]

Bambae yumi neva letem Setan i spolem fasin joengud blong yumi ol Kristin