Indi Paghatagi sing Lugar ang Yawa

“Indi paghatagi sing kahigayunan ang Yawa.”​—⁠EFESO 4:​27, Maayong Balita nga Biblia.

1. Ngaa ginduhaduhaan sang madamo ang pagluntad sang Yawa?

SA SULOD sang mga siglo, madamo ang nagahunahuna nga ang Yawa isa ka tinuga nga may sungay, napanaptan sing pula nga may mga tiil kaangay sang sapat kag may daku nga tinidor nga ginagamit niya sa pagtagbong sa malaut nga mga tawo sa kalayuhon nga impierno. Ini nga ideya wala ginasuportahan sang Biblia. Apang, wala sing duhaduha nga ining sayop nga mga ideya nangin rason kon ngaa ginduhaduhaan sang minilyon ang pagluntad sang Yawa ukon ginhunahuna nila nga ining termino naaplikar lamang sa prinsipio sang kalainan.

2. Ano ang mga katunayan sa Kasulatan tuhoy sa Yawa?

² Ang Biblia nagahatag sing ebidensia sang mga nakasaksi kag maathag nga pamatuod nga nagaluntad ang Yawa. Nakita sia ni Jesucristo sa langitnon nga duog sang mga espiritu kag nakigsugilanon sa iya sa duta. (Job 1:⁠6; Mateo 4:​4-​11) Bisan pa wala ginhatag sang Kasulatan ang orihinal nga ngalan sining espiritu nga tinuga, ginatawag sia sini nga Yawa (buot silingon “Manugpasipala”) bangod ginpasipalahan niya ang Dios. Gintawag man sia nga Satanas (buot silingon “Manugpamatok”), bangod ginapamatukan niya si Jehova. Si Satanas nga Yawa ginpatuhuyan subong “ang orihinal nga man-ug,” ayhan bangod gingamit niya ang man-ug sa paglimbong kay Eva. (Bugna 12:⁠9; 1 Timoteo 2:14) Nakilal-an man sia subong ang “isa nga malauton.”​—⁠Mateo 6:13.⁠ *

3. Ano nga pamangkot ang pagabinagbinagon naton?

³ Subong mga alagad ni Jehova, indi naton luyag mangin kaangay ni Satanas, ang panguna nga kaaway sang lamang matuod nga Dios. Busa dapat naton iaplikar ang laygay ni Pablo: “Indi paghatagi sing kahigayunan ang Yawa.” (Efeso 4:​27, Maayong Balita nga Biblia) Nian, ano ang pila ka mga kinaiya ni Satanas nga indi naton dapat ilugon?

Indi Pag-iluga ang Dakung Mapasipalahon

4. Paano ginpasipalahan sang “isa nga malauton” ang Dios?

⁴ Ang “isa nga malauton” dapat lamang tawgon nga Yawa bangod mapasipalahon sia. Ang pasipala isa ka butig, malaut, kag makapanubo nga pinamulong batok sa isa. Ginsugo sang Dios si Adan: “Tuhoy sa kahoy sa pagkilala sang maayo kag malain indi ka magkaon gikan sini, kay sa adlaw nga magkaon ka gikan sini mapatay ka nga totoo.” (Genesis 2:17) Nahibal-an ini ni Eva, apang paagi sa isa ka man-ug, ginsilingan sia sang Yawa: “Indi gid kamo mapatay. Kay nakahibalo ang Dios nga sa adlaw nga magkaon kamo gikan sini magamuklat ang inyo mga mata kag mangin kaangay kamo sang Dios, nga nakahibalo sang maayo kag malain.” (Genesis 3:​4, 5) Isa ini ka malaut nga pasipala batok kay Jehova nga Dios!

5. Ngaa dapat manabat si Diotrefes sa iya ginhimo?

⁵ Ang mga Israelinhon ginsugo: “Indi ka magpakadto-pakari sa imo katawhan agod magpasipala.” (Levitico 19:16) Si apostol Juan nagsiling tuhoy sa mga mapasipalahon sang iya adlaw: “May ginsulat ako sa kongregasyon, apang si Diotrefes, nga luyag  magpulupangulo sa ila, wala nagatahod kag wala nagapamati sa amon. Amo nga kon magkari ako, dumdumon ko ang iya mga buhat nga padayon niya nga ginahimo, nga nagawakal sing malain nga mga pulong tuhoy sa amon.” (3 Juan 9, 10) Ginpasipalahan ni Diotrefes si Juan amo nga dapat lamang sia manabat sa iya ginhimo. May matutom bala nga Cristiano nga luyag mangin kaangay ni Diotrefes kag mag-ilog kay Satanas, ang dakung mapasipalahon?

6, 7. Ngaa dapat naton likawan ang pagpasipala sa iban?

⁶ Ang mga alagad ni Jehova masami ginapasipalahan kag ginaatake sang sayop nga mga panumbungon. “Pirme nagatindog ang puno nga mga saserdote kag ang mga escriba kag maakigon nga nagasumbong [kay Jesus].” (Lucas 23:10) Si Pablo sayop nga ginsumbong sang Mataas nga Saserdote nga si Ananias kag sang iban pa. (Binuhatan 24:​1-8) Ginpatuhuyan sang Biblia si Satanas subong “ang manugsumbong sang aton mga kauturan, nga nagasumbong sa ila sa atubangan sang aton Dios sa adlaw kag gab-i.” (Bugna 12:10) Ang mga kauturan nga butig nga ginsumbong amo ang hinaplas nga mga Cristiano sa duta sa sining katapusan nga mga adlaw.

⁷ Wala sing Cristiano ang dapat magpasipala sa kay bisan sin-o ukon maghimo sing sayop nga mga panumbungon. Apang, mahimo ini matabo kon magsaksi kita batok sa isa bisan pa wala naton nahibaluan ang bug-os nga katunayan. Sa idalom sang Mosaikong Kasuguan, ang hungod nga pagtestigo sing sayop mahimo magaresulta sa kamatayon sang saksi. (Exodo 20:16; Deuteronomio 19:15-​19) Dugang pa, nalakip sa makangilil-ad nga mga butang para kay Jehova ang “butigon nga saksi nga nagasugid sing kabutigan.” (Hulubaton 6:16-19) Busa, indi gid naton dapat ilugon ang panguna nga mapasipalahon kag sayop nga manunumbong.

Isikway ang mga Dalanon sang Orihinal nga Manugpatay

8. Sa anong paagi ang Yawa isa ka ‘manugpatay sing tawo sang nagsugod sia sa iya kalautan’?

⁸ Ang Yawa isa ka manugpatay. “Manugpatay sia sing tawo sang nagsugod sia sa iya kalautan,” siling ni Jesus. (Juan 8:44) Sugod sang iya una nga buhat sa pagpatalikod kay Adan kag Eva sa Dios, si Satanas nangin manugpatay. Sia ang nangin kabangdanan sang kamatayon sang una nga mag-asawa kag sang ila mga anak. (Roma 5:12) Talupangda nga ining buhat mapabangod lamang sa isa ka persona, indi sa prinsipio lamang sang kalainan.

9. Subong sang ginapakita sang 1 Juan 3:​15, paano kita mangin mga manugpatay?

⁹ “Dili ka magpatay,” siling sang isa sa Napulo ka Sugo nga ginhatag sa Israel. (Deuteronomio 5:17) Ginapatuhuyan ang mga Cristiano, si apostol Pedro nagsulat: “Indi mag-antos ang bisan sin-o sa inyo subong isa nga nakapatay.” (1 Pedro 4:15) Busa, subong mga alagad ni Jehova, indi naton luyag magpatay. Apang, makasala kita sa Dios kon dumtan naton ang isa ka masigkatumuluo kag handumon nga kuntani mapatay na lang sia. “Ang tagsatagsa nga nagadumot sang iya utod manugpatay sing tawo,” sulat ni apostol Juan, “walay manugpatay sing tawo ang may kabuhi nga walay katapusan nga nagapabilin sa iya.” (1 Juan 3:15) Ang mga Israelinhon ginsugo: “Dili mo pagdumtan ang imo utod sa imo tagipusuon.” (Levitico 19:17) Kabay nga solbaron gilayon naton ang bisan ano nga problema nga mag-utwas sa ulot naton kag sang isa ka masigkatumuluo, agod nga indi maguba sang manugpatay nga si Satanas ang aton Cristianong paghiusa.​​—⁠Lucas 17:​3, 4.

Magtindog Sing Malig-on Batok sa Panguna nga Butigon

10, 11. Ano ang himuon naton agod makatindog kita sing malig-on batok sa panguna nga butigon nga si Satanas?

¹⁰ Ang Yawa butigon. “Kon magpamulong sia sing kabutigan,” siling ni Jesus, “nagapamulong sia suno sa iya kinaugali, bangod butigon sia kag amay sang kabutigan.” (Juan 8:44) Nagbinutig si Satanas kay Eva, samtang si Jesus naman nagkari sa kalibutan agod magpanaksi sa kamatuoran. (Juan 18:37) Kon luyag naton magtindog sing malig-on batok sa Yawa subong mga sumulunod ni Cristo, indi kita dapat magbutig ukon maglimbong. Dapat “magpamulong [kita] sing kamatuoran.” (Zacarias 8:16; Efeso 4:25) Ang maminatud-on lamang niya nga mga Saksi ang ginapakamaayo ni “Jehova nga Dios sang kamatuoran.” Ang mga malauton wala sing kinamatarong nga irepresentar sia.​—⁠Salmo 31:⁠5; 50:16; Isaias 43:10.

¹¹ Kon ginapakabahandi naton ang aton espirituwal nga kahilwayan gikan sa kabutigan ni Satanas, dapat kita manguyapot sa Cristianismo, “ang  dalanon sang kamatuoran.” (2 Pedro 2:⁠2; Juan 8:32) Ang bug-os nga Cristianong panudlo amo ang ginahuman sang “kamatuoran sang maayong balita.” (Galacia 2:​5, 14) Ang aton kaluwasan nagadepende sa aton ‘paglakat sa kamatuoran’​—⁠sa pagtuman sini kag sa pagtindog sing malig-on batok sa “amay sang kabutigan.”​—⁠3 Juan 3, 4, 8.

Pamatuki ang Panguna nga Apostata

12, 13. Paano naton dapat pakig-angutan ang mga apostata?

¹² Ang espiritu nga tinuga nga nangin Yawa yara anay sa kamatuoran. Apang “wala sia magpabilin nga malig-on sa kamatuoran,” siling ni Jesus, “bangod ang kamatuoran wala sa iya.” (Juan 8:44) Ining panguna nga apostata walay untat nga nagpamatok sa “Dios sang kamatuoran.” Ang pila ka Cristiano sang unang-siglo nahulog sa “siod sang Yawa,” ayhan nabiktima niya sila bangod napatalang sila kag naglisa sa kamatuoran. Amo kon ngaa ginpalig-on ni Pablo ang iya masigkamanugpangabudlay nga si Timoteo nga tudluan sila nga may kalulo agod nga makapanumbalik sila sa espirituwal kag makapanginpadlos sa siod ni Satanas. (2 Timoteo 2:23-26) Sa pagkamatuod, mas maayo nga manguyapot sing hugot sa kamatuoran kag indi gid magpasiod sa apostata nga mga pagtamod.

¹³ Bangod namati sila sa Yawa kag wala ginsikway ang iya mga kabutigan, nangin apostata ang una nga mag-asawa. Ti, dapat bala kita magpamati sa mga apostata, magbasa sang ila mga literatura, ukon mag-usisa sang ila mga Web site sa Internet? Kon ginahigugma naton ang Dios kag ang kamatuoran, indi naton ini dapat himuon. Indi naton dapat pagtugutan ang mga apostata nga magsulod sa aton mga balay ukon tamyawon pa gani sila, kay ina nga mga buhat magahimo sa aton nga ‘umalambit sang ila mga buhat nga malaut.’ (2 Juan 9-11) Kabay nga indi kita magpadala sa paglimbong sang Yawa paagi sa pagbiya sa Cristianong “banas sang kamatuoran” agod magsunod sa butig nga mga manunudlo nga “nagapasulod sing malaglagon nga mga ideolohiya” kag nagatinguha sa ‘paghingalit sa aton paagi sa matahom nga mga dinalan.’​​—⁠2 Pedro 2:​1-3, Byington.

14, 15. Ano nga paandam ang ginhatag ni Pablo sa mga gulang sa Efeso kag sa iya masigkamanugpangabudlay nga si Timoteo?

¹⁴ Ginsilingan ni Pablo ang Cristianong mga gulang sa Efeso: “Tatapa ninyo ang inyo kaugalingon kag ang bug-os nga panong, nga sa ila gintangdo kamo sang balaan nga espiritu nga mga manugtatap, agod bantayan ang kongregasyon sang Dios, nga ginbakal niya sang dugo sang iya kaugalingon nga Anak. Nahibaluan ko nga kon makahalin na ako magasulod ang mapiguson nga mga lobo sa tunga ninyo kag indi pakig-angutan ang panong sing mapinalanggaon, kag gikan sa inyo mismo magabangon ang mga tawo kag magapamulong sing tiko nga mga butang agod ipahilayo ang mga disipulo sunod sa ila.” (Binuhatan 20:28-30) Sang ulihi, nagua ining mga apostata kag ‘nagpamulong sing tiko nga mga butang.’

¹⁵ Sang mga 65 C.⁠E., ginpalig-on sang apostol si Timoteo nga ‘gamiton sing matadlong ang pulong sang kamatuoran.’ “Apang,” sulat ni Pablo, “likawi ang walay pulos nga mga panghambal nga nagatamay sa kon ano ang balaan; kay magalala pa gid ang ila pagkadidiosnon, kag ang ila pulong magaab-ab subong sang kalamayo. Lakip sa ila amo si Himeneo kag si Fileto. Ini nga mga lalaki naglisa sa kamatuoran, nga nagasiling nga ang pagkabanhaw natabo na; kag ginapaluya nila ang pagtuo sang iban.” Nagsugod na ang apostasya! “Walay  sapayan,” dugang ni Pablo, “ang malig-on nga sadsaran sang Dios nagatindog sa gihapon.” (2 Timoteo 2:15-19)

16. Walay sapayan sang mga pahito sang panguna nga apostata, ngaa nakaunong kita sa Dios kag sa iya Pulong?

¹⁶ Masami ginagamit ni Satanas ang mga apostata agod dagtaan ang matuod nga pagsimba​—⁠apang wala sia nagamadinalag-on. Sang mga tuig 1868, ginsugdan ni Charles Taze Russell ang mahalungon nga pag-usisa sa madugay na nga ginabaton nga mga doktrina sang mga relihion sang Cristiandad kag nasapwan niya ang sayop nga mga interpretasyon sa Kasulatan. Si Russell kag ang pila ka tawo nga nagapangita sang kamatuoran nagporma sing isa ka grupo sang pagtuon sa Biblia sa Pittsburgh, Pennsylvania, E.⁠U.⁠A. Sa halos 140 ka tuig sugod sadto, ang mga alagad ni Jehova nag-uswag sa ihibalo kag sa gugma sa Dios kag sa iya Pulong. Walay sapayan sang mga pahito sang panguna nga apostata, ang pagkamabinantayon sa espirituwal sang matutom kag mainandamon nga ulipon nga klase nakabulig sa sining matuod nga mga Cristiano nga makapabilin nga mainunungon kay Jehova kag sa iya Pulong.​—⁠Mateo 24:45.

Indi Gid Magpaimpluwensia sa Manuggahom Sang Kalibutan

17-19. Ano ang kalibutan nga yara sa idalom sang gahom sang Yawa, kag ngaa indi naton ini dapat higugmaon?

¹⁷ Ang isa pa ka paagi sang pagtinguha ni Satanas nga siuron kita amo ang pagsulay sa aton nga higugmaon ining kalibutan​—⁠ang di-matarong nga katilingban sang mga tawo nga napahilayo sa Dios. Gintawag ni Jesus ang Yawa subong “ang manuggahom sang kalibutan” kag nagsiling: “Wala sia sing gahom sa akon.” (Juan 14:30) Kabay nga indi gid kita magpaimpluwensia kay Satanas! Sa pagkamatuod, nahibaluan naton, nga “ang bug-os nga kalibutan yara sa gahom [sinang] isa nga malauton.” (1 Juan 5:19) Amo kon ngaa sarang matanyag sang Yawa kay Jesus “ang tanan nga ginharian sa kalibutan” paagi sa isa lamang ka buhat sang pagsimba​—⁠butang nga malig-on gid nga ginsikway sang Anak sang Dios. (Mateo 4:8-10) Ang kalibutan nga ginagamhan ni Satanas nagadumot sa mga sumulunod ni Cristo. (Juan 15:18-21) Indi katingalahan kon ngaa ginapaandam kita ni apostol Juan nga indi paghigugmaon ang kalibutan!

¹⁸ Si Juan nagsulat: “Indi ninyo paghigugmaa ang kalibutan ukon ang mga butang sa kalibutan. Kon ang bisan sin-o nagahigugma sang kalibutan, ang gugma sa Amay wala sa iya; bangod ang tanan nga butang sa kalibutan​—⁠ang kailigbon sang unod  kag ang kailigbon sang mga mata kag ang pagpadayawdayaw sang palangabuhian sang isa​—⁠wala maghalin sa Amay, kundi naghalin sa kalibutan. Dugang pa, ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:15-17) Indi naton dapat paghigugmaon ang kalibutan, kay ang paagi sini sang pagkabuhi makagalanyat sa makasasala nga unod kag kabaliskaran gid sa mga talaksan ni Jehova nga Dios.

¹⁹ Ano abi kon ang gugma sa sining kalibutan nagaluntad sa aton tagipusuon? Nian, dapat kita mangayo sing bulig sa Dios paagi sa pangamuyo agod malandas ining gugma kag ang undanon nga mga handum nga upod sini. (Galacia 5:​16-​21) Pat-od nga panikasugan gid naton nga huptan ang aton kaugalingon nga “walay higko gikan sa kalibutan” kon ginadumdom naton nga ang “malaut nga mga puersa nga espiritu” amo ang di-kitaon nga “mga manuggahom sang kalibutan” nga nagagahom sa di-matarong nga katilingban sang mga tawo.​—⁠Santiago 1:27; Efeso 6:​11, 12; 2 Corinto 4:4.

20. Ngaa masiling naton nga “indi [kita] bahin sang kalibutan”?

²⁰ Tuhoy sa iya mga disipulo, si Jesus nagsiling: “Indi sila bahin sang kalibutan, subong nga ako indi bahin sang kalibutan.” (Juan 17:16) Ginapanikasugan gid sang hinaplas nga mga Cristiano kag sang ila dedikado nga mga kaupod nga magpabilin nga matinlo sa moral kag espirituwal kag napain sa sining kalibutan. (Juan 15:19; 17:​14; Santiago 4:4) Ining di-matarong nga kalibutan nagadumot sa aton bangod napain kita sa sini kag ‘mga manugbantala kita sang pagkamatarong.’ (2 Pedro 2:5) Matuod, nagakabuhi kita sa tunga sang tawhanon nga katilingban, nga nagalakip sang mga makihilawason, makihilahion, manugkilkil, sumilimba sang idolo, makawat, butigon, kag mga palahubog. (1 Corinto 5:​9-​11; 6:​9-​11; Bugna 21:8) Apang wala naton ginahaklo “ang espiritu sang kalibutan,” bangod indi kita kontrolado sining makasasala nga puersa.​—⁠1 Corinto 2:12.

Indi Paghatagi sing Lugar ang Yawa

21, 22. Paano mo maaplikar ang laygay ni Pablo nga narekord sa Efeso 4:​26, 27?

²¹ Sa baylo nga magpakontrol sa “espiritu sang kalibutan,” nagapatuytoy kita sa espiritu sang Dios, nga nagapatubas sa aton sing mga kinaiya subong sang gugma kag pagpugong sa kaugalingon. (Galacia 5:​22, 23) Ginabuligan kita sini nga mabatuan ang mga pagsalakay sang Yawa sa aton pagtuo. Luyag niya nga “magpanginit [kita] nga magadul-ong lamang sa paghimo sing malaut,” apang ang espiritu sang Dios nagabulig sa aton nga ‘malikawan ang kaakig kag bayaan ang kasingkal.’ (Salmo 37:8) Matuod, kon kaisa may rason kita para maakig, apang si Pablo nagalaygay sa aton: “Magpangakig, apang indi magpakasala; indi pagpatunuri sing adlaw ang inyo kaakig, ni maghatag sing lugar sa Yawa.”​—⁠Efeso 4:​26, 27.

²² Ang aton kaakig mahimo magresulta sa sala kon magpabilin kita nga akig. Magahatag ini sa Yawa sing kahigayunan nga dabukan ang pagsinuay sa kongregasyon ukon buyukon kita sa paghimo sing malain nga mga buhat. Sa amo, kinahanglan solbaron naton sa gilayon sa diosnon nga paagi ang aton mga di-paghangpanay sa iban. (Levitico 19:​17, 18; Mateo 5:​23, 24; 18:​15, 16) Busa, magpatuytoy sa espiritu sang Dios, magpakita sing pagpugong sa kaugalingon kag indi pagtugutan bisan ang may rason nga kaakig nga maglala tubtob sa punto nga magresulta ini sa kaawayon, pagtimalos, kag dumot.

23. Ano nga mga pamangkot ang aton pagabinagbinagon sa masunod nga artikulo?

²³ Nabinagbinag naton ang pila ka kinaiya sang Yawa nga indi naton dapat ilugon. Apang ang iban nga mga bumalasa mahimo mamangkot: Dapat bala kahadlukan si Satanas? Ngaa ginagatungan niya ang paghingabot sa mga Cristiano? Kag paano naton malikawan nga madaug sang Yawa?

[Nota]

Ano ang Imo Sabat?

• Ngaa indi gid naton dapat pagpasipalahan ang bisan sin-o?

• Bilang pagtuman sang 1 Juan 3:​15, paano naton malikawan nga mangin mga manugpatay?

• Paano naton dapat tamdon ang mga apostata, kag ngaa?

• Ngaa indi naton dapat paghigugmaon ang kalibutan?

[Mga Pamangkot sa Pagtinuon]

[Retrato sa pahina 23]

Indi gid naton pagtugutan ang Yawa nga gub-on ang aton Cristianong paghiusa

[Retrato sa pahina 24]

Ngaa ginalaygayan kita ni Juan nga indi paghigugmaon ang kalibutan?