Wha Kuvẹ Kẹ Ẹdhọ Họ

“Wha kuvẹ kẹ Ẹdhọ họ.”—AHWO ẸFẸSỌS 4:27, Byington.

1. Fikieme ahwo buobu a ro wo avro sọ Ẹdhọ ọ ginẹ rrọ hayo ọ rrọ họ?

 EVAỌ ikpe buobu, evaọ abọjọ akpọ na ahwo buobu a roro nọ Ẹdhọ o wo izei, avọ ekotho-awọ nọ e bẹre, o te je ku ewu ọwawae họ jẹ be rehọ efọko othethei nọ o wo egha esa duwu ahwo omuomu fihọ ebrerae-ehẹle. Ebaibol na e rọwo kugbe eriwo yena ha. Avro ọ riẹ hẹ, oghẹrẹ eriwo ọthọthọ itieye e lẹliẹ ima ahwo buobu wo avro no sọ Ẹdhọ ọ ginẹ rrọ hayo lẹliẹ ae bi roro nọ Ẹdhọ yọ odẹ gheghe nọ a ro se oware uyoma.

2. Eware jọ vẹ Ikereakere na e ta kpahe Ẹdhọ?

² Ebaibol na e kẹ imuẹro nọ a rehọ ẹro ruẹ gbe isẹi ivevẹ nọ i dhesẹ nọ Ẹdhọ ọ ginẹ rrọ. Jesu Kristi ọ ruẹ Ẹdhọ okenọ ọ jọ usu emama ẹzi nọ e rrọ obọ odhiwu, o te je lele iei ta ẹme okenọ ọ jọ otọakpọ. (Job 1:6; Matiu 4:4-11) Dede nọ Ikereakere na i dhesẹ odẹ nọ a jẹ hai sei vẹre he, a se rie Ẹdhọ (onọ otofa riẹ evaọ ẹvẹrẹ Griki ọsosuọ na o rrọ “Ohwo-Ọtaraha”) keme ọ ta Ọghẹnẹ raha. A re je sei Setan (onọ otofa riẹ evaọ ẹvẹrẹ Griki ọsosuọ na o rrọ “Ohwo-Ọwọsuọ”), keme ọ wọso Jihova. A se Setan Ẹdhọ “oriọvọ anwae na,” ẹsejọhọ fikinọ ọ rehọ oriọvọ viẹ Ivi họ. (Eviavia 12:9; 1 Timoti 2:14) A tẹ jẹ riẹe wọhọ “oyoma na.”—1 Jọn 5:19. *

3. Onọ vẹ ma be te ta ẹme kpahe na?

³ Wọhọ idibo Jihova, ma gwọlọ rehọ edhere ọvuọvo tho Setan vievie he ọnọ ọ rrọ ọwegrẹ ologbo Ọghẹnẹ uzẹme na. Fikiere, ma re ru lele ohrẹ Pọl ukọ na hrọ, ọnọ ọ ta nọ: “Wha kẹ Ẹdhọ uvẹ hẹ.” (Ahwo Ẹfẹsọs 4:27, Byington) Iruemu Setan jọ vẹ ma rẹ raro kele vievie he?

Whọ Raro Kele Ohwo-Ọtaraha Ologbo na Ha

4. Oghẹrẹ vẹ “oyoma na” ọ rọ ta Ọghẹnẹ raha?

⁴ “Oyoma na,” Ẹdhọ, o gine fo ọnọ a re se ohwo-ọtaraha. Ọtaraha yọ ẹme ọrue, ẹme izue, nọ a rẹ rọ raha omọfa. Ọghẹnẹ o juzi kẹ Adamu nọ: “Whọ rẹ re ure ẹriẹ ewoma gbe eyoma na ha, keme eva ẹdẹ nọ whọ re riẹ, who re ti whuẹ.” (Emuhọ 2:17) Ivi ọ riẹ onana, rekọ Ẹdhọ ọ tẹ rehọ ẹkwoma oriọvọ ta kẹe nọ: “Wha re ti whuẹ hẹ. Keme Ọghẹnẹ ọ riẹ nọ, ẹdẹ nọ wha re riẹ, ibiaro rai i re ti rovie, wha vẹ te jọ wọhọ Ọghẹnẹ, nọ ọ rẹ riẹ uwoma gbe uyoma.” (Emuhọ 3:4, 5) Oyena o jọ ọtaraha ologbo wọso Jihova Ọghẹnẹ!

5. Fikieme u je fo nọ a rẹ nọ Diọtẹfis unu kpahe uruemu ọtaraha riẹ?

⁵ A juzi kẹ emọ Izrẹl nọ: “Whọ nya kpemu kparo evaọ udevie imoni ra wọhọ ọzewae he,” hayo, ọnọ ọ rẹ ta ahwo raha. (Iruo-Izerẹ 19:16) Jọn ukọ na o kere kpahe ohwo ọtaraha jọ evaọ oke riẹ nọ: “Me kere oware jọ se [ukoko] na vẹre i no; rekọ Diọtẹfis, ọnọ ọ rẹ guọlọ rọ oma riẹ dhe aro na, o vuhu ogaga mẹ hẹ. Re otẹrọnọ mẹ nyaze, mẹ rẹ te fere eware nọ o bi ru via, avọ eme iyoma nọ ọ be ta kpahe omẹ.” (3 Jọn 9, 10) Diọtẹfis ọ jẹ ta Jọn raha yọ u fo nọ a rẹ nọe unu kpahe oyena. Oleleikristi omarokpotọ vẹ ọ rẹ gwọlọ jọ wọhọ Diọtẹfis, jẹ raro kele Setan ohwo-ọtaraha ologbo na?

6, 7. Fikieme ma gbẹ rọ ta uvumọ ohwo raha ha?

⁶ Ẹsibuobu a rẹ ta idibo Jihova raha jẹ wọ eku họ ai uzou. ‘Ilori izerẹ gbe otu ikere-obe na a te thihigba, be bọwo Jesu ota.’ (Luk 23:10) Ananias Ozerẹ Okpehru na gbe amọfa a bọwo Pọl ota ekueku. (Iruẹru 24:1-8) Ebaibol na e ta kpahe Ẹdhọ wọhọ “oguiguẹgu  imoni mai . . . ọnọ o [bi] gu ai kẹ Ọghẹnẹ mai tuvo taso.” (Eviavia 12:10) Ileleikristi nọ a wholo nọ e rrọ otọakpọ evaọ edẹ urere nana họ inievo nọ ọ be bọwo ota ekueku na.

⁷ U fo re Oleleikristi ọvuọvo ọ ta ohwo raha hayo wọ eku fihọ ohwo jọ uzou hu. Ghele na, oyena o rẹ sae via nọ ma gbẹ riẹ uzẹme orọ oware nọ o via kpobi re ma te se osẹi kpe ohwo jọ họ. Evaọ otọ Uzi Mosis na, ohwo ọ rẹ sai si uwhu kpe omariẹ nọ ọ tẹ rehọ aro kekeke se osẹi ọruẹ kpahe ọrivẹ riẹ. (Ọnyano 20:16; Iziewariẹ 19:15-19) Ofariẹ, eware nọ e rẹ tọtọ Jihova oma e kẹre te “ose-isẹi erue nọ ọ rẹ ta erue.” (Itẹ 6:16-19) Uzẹme, ma rẹ daoma whaha aro nọ ma re ro kele ohwo-ọtaraha gbe ọterue ọsosuọ na.

Whaha Idhere Ojihẹ Ọsosuọ Na

8. Edhere vẹ Ẹdhọ ọ rọ rrọ ‘ojihẹ no emuhọ ze’?

⁸ Ẹdhọ yọ ojihẹ. Jesu ọ ta nọ: “Nọ emuhọ ze ọrọ ojihẹ.” (Jọn 8:44) Muhọ no owojẹ umuomu ọsosuọ riẹ ze nọ o ro ru Adamu avọ Ivi ghẹmeeyo kẹ Ọghẹnẹ oye Setan ọ rọ rrọ ojihẹ. Ọ wha uwhu se ọzae gbe aye ọsosuọ na avọ emọ rai. (Ahwo Rom 5:12) Muẹrohọ inọ ohwo dẹẹ ọ rẹ sai ru eware itienana, orọnikọ ogaga eyoma jọ gheghe he.

9. Wọhọ epanọ a dhesẹ i rie eva 1 Jọn 3:15 na, ẹvẹ ma sae rọ jọ ojihẹ?

⁹ Ovo jọ evaọ usu Izi Ikpe nọ a kẹ emọ Izrẹl o ta nọ: “Who kpe ohwo ho.” (Iziewariẹ 5:17) Pita ukọ na o kere se Ileleikristi nọ: ‘Ajọ whai ohwo ọvo ọ ruẹ uye wọhọ ojihẹ hẹ.’ (1 Pita 4:15) Fikiere, wọhọ idibo Jihova, ma re kpe ohwo ho. Dede na, ma rẹ reabe ohwo-okpe eva obọ Ọghẹnẹ otẹrọnọ ma mukpahe ibe Oleleikristi te epanọ ma re ro rẹrọ nọ uwhu u kpei. Jọn ukọ na o kere nọ: “Kohwo kohwo nọ o mukpahe omoni riẹ họ ojihẹ, wha riẹ nọ ojihẹ ọvuọvo o re wo uzuazọ ebẹdẹ bẹdẹ eva riẹ hẹ.” (1 Jọn 3:15) A juzi kẹ emọ Izrẹl nọ: “Whọ jọ evaọ eva ra mu kpahọ oniọvo ra ha.” (Iruo-Izerẹ 19:17) Jọ ma ku ẹbẹbẹ kpobi nọ ma wo kugbe ibe Oleleikristi mai họ vẹrẹ vẹrẹ re Setan ojihẹ na ọ se okugbe Ileleikristi mai ba ẹraha.—Luk 17:3, 4.

Mugba kẹ Ọtọrue Ologbo Na

10, 11. Eme ma re ru hrọ re ma ruẹsi dikihẹ ga wọso Setan, ọsẹ ọrue na?

¹⁰ Ẹdhọ yọ ọtọrue. Jesu ọ ta nọ: “Nọ ọ ta erue, ọ ta erọ obọ riẹ, keme ọ ye họ ọterue gbe ọsẹ riẹ.” (Jọn 8:44) Setan o gu ọrue kẹ Ivi, rekọ Jesu ọ ziọ akpọ na re o se isẹi kẹ uzẹme na. (Jọn 18:37) Re ma sai mugba kẹ Ẹdhọ wọhọ enọ i bi lele Jesu, ma rẹ se ọrue-oguo gbe eviẹhọ. O gba omai họ nọ ma rẹ “ta uzẹme.” (Zekaraya 8:16; Ahwo Ẹfẹsọs 4:25) Isẹri riẹ nọ e rẹ ta uzẹme ọvo eye Jihova, “Ọghẹnẹ ọtẹruo” na ọ rẹ ghale. Irumuomu na a wo udu ovuovo nọ a rẹ rọ jọ ahwo ẹro riẹ hẹ.—Olezi 31:5; 50:16; Aizaya 43:10.

¹¹ Ma te rri ufuoma abọ-ẹzi mai ghaghae, nọ ma gbẹ rọ rrọ otọ erue Setan he, ma re tilẹmu Egagọ-Ileleikristi, “edhere uzẹme” na. (2 Pita 2:2; Jọn 8:32) Ekru iwuhrẹ Ileleikristi na kpobi i ru “uzẹme usiuwoma na.” (Ahwo Galesha 2:5, 14) Esiwo mai ọ roma hwa ‘elele uzẹme na’—uzẹme na nọ ma rẹ rria lele, ma ve je dikihẹ ga wọso ‘ọsẹ ọrue na.’—3 Jọn 3, 4, 8.

Mugba kẹ Ohwo Ọsosuọ nọ O No Abọ Ọghẹnẹ

12, 13. Didi owọ ma rẹ jẹ kpahe otu nọ o kie no ẹrọwọ na no?

¹² Omama ẹzi nọ o zihe ruọ Ẹdhọ na ọ jọ evaọ uzẹme na vẹre. Rekọ Jesu ọ ta nọ ọ gbẹ “rọ evaọ uzẹme he, epanọ uzẹme ovo orọ eva riẹ hẹ.” (Jọn 8:44) Omama ẹzi ọsosuọ nana nọ o no abọ Ọghẹnẹ na ọ ruabọhọ edhere nọ ọ wọso “Ọghẹnẹ ọtẹruo” na. Ileleikristi ikpe-udhusoi ọsosuọ jọ a kie ruọ “ifi ukumuomu na,” ẹsejọhọ ẹkwoma esu nọ o su rai thọ no edhere uzẹme na. Fikiere Pọl ọ ta udu họ ibe oruiruo riẹ Timoti awọ inọ ọ rehọ omarokpotọ wuhrẹ ai re a ruẹsi dhidharovi evaọ abọ-ẹzi jẹ vabọ no agbefẹ Setan. (2 Timoti 2:23-26) Uzẹme, u woma gaga re  ohwo o dikihẹ ga evaọ uzẹme na re iroro nọ e wọso erọ Ọghẹnẹ e siọ ohwo ba emu wọhọ agbefẹ.

¹³ Fikinọ a gaviezọ kẹ Ẹdhọ yọ a se erue riẹ hẹ, ọzae gbe aye ọsosuọ na a te kie no abọ Ọghẹnẹ. Nọ o rrọ ere na, kọ u fo re ma gaviezọ kẹ eme otu nọ o kie no ẹrọwọ na no, se ebe nọ a kere, hayo kiẹ evie-evuẹ rai evaọ Itanẹte? Otẹrọnọ ma you Ọghẹnẹ je you uzẹme na, ma ti ru ere he. Wha jọ ma kuvẹ re otu nọ o kie no ẹrọwọ na no a ruọ iwou mai hi hayo tube yere ai dede he keme owojẹ utioye na u re ru nọ ma je ti ‘lele ai gbẹ ghale iruo umuomu rai.’ (2 Jọn 9-11) Wha jọ ma kie kẹ eghẹ Ẹdhọ vievie he re ma no “edhere uzẹme” na nyai lele otu-iwuhrẹ erue nọ e rẹ gwọlọ rehọ ‘eme erue viẹ omai họ.’—2 Pita 2:1-3.

14, 15. Unuovẹvẹ vẹ Pọl ọ kẹ Timoti ibe oruiruo riẹ gbe ekpako ukoko nọ e jọ obọ Ẹfẹsọs?

¹⁴ Pọl ọ ta kẹ ekpako Ileleikristi nọ e jọ obọ Ẹfẹsọs nọ: “Wha yọrọ oma rai jegbe uthuru na kpobi, e nọ Ẹzi Ẹri ọ jẹ rọ owhai mu enọ iwuzou, re wha kuọ ukoko Ọghẹnẹ ọnọ ọ rọ azẹ ọghaghae ọmọ riẹ rọ dẹ. Mẹ riẹ no nọ mẹ te nya vrẹ no na, erao ijihẹ imuomu e rẹte ruọ udevie rai, enọ uthuru o rẹte zeziaro ho; ahwo a reti no evie rai tovrẹ rẹme eware nọ e rẹ liẹliẹ ahwo yoma, nọ a reti si ilele lele oma rai.” (Iruẹru 20:28-30) Nwane wọhọ epanọ ọ ta na, ikọ itieye na e ginẹ roma via, je wuhrẹ “eware nọ e rẹ liẹliẹ ahwo yoma.”

¹⁵ Evaọ oware wọhọ 65 C.E., ukọ na ọ ta udu họ Timoti awọ inọ ọ “yọrọ ẹme uzẹme na ziezi.” Pọl o kere nọ: “Si oma no ogbẹta . . . keme u re ti ru ahwo nọ a jẹ te kare erọ Ọghẹnẹ viere. Jegbe ẹmeunu rai ọ vẹ te [vaha] ruaro wọhọ ola-ikpo. Himẹnayọs avọ Filẹtus yọ ahwo jọ eva ogbotu ọyena, enọ i kiukeku uzẹme na, enọ eta nọ ẹkparomatha ọrọ kẹ okenọ ukpemu ovo. A tẹ be rehọ oyena raha ẹrọwọ otu jọ.” Ẹsiọ-ẹrọwọ ọna o muhọ no na! Pọl o fibae nọ ghelọ oyena, “otọhotọ ogaga Ọghẹnẹ u gbe dikihẹ.”—2 Timoti 2:15-19.

16. Ghelọ eghẹ ohwo ọsosuọ nọ o no edhere Ọghẹnẹ na, fikieme ma gbẹ sae rọ dadamu abọ Ọghẹnẹ avọ Ẹme riẹ, Ebaibol na?

¹⁶ Ẹsibuobu Setan ọ daoma no rehọ ẹkwoma ahwo nọ a siọ ẹrọwọ na no gwọlọ ro gbe egagọ uzẹme ku—rekọ ọ be sai fi kparobọ họ. Eva ole ukpe 1868, Charles Taze Russell ọ tẹ roma totọ mu iwuhrẹ nọ ichọche Kristẹndọm a kru gaga evaọ ikpe buobu no họ ẹkiẹ jẹ ruẹ nọ a be fotọ Ikereakere na thọ. Russell avọ umutho amọfa jọ nọ a be gwọlọ otoriẹ uzẹme na a tẹ to eklase uwuhrẹ Ebaibol họ evaọ Pittsburgh, Pennsylvania, U.S.A. Evaọ oware wọhọ ikpe 140 nọ e ruemu no anwọ oke yena ze na, idibo Jihova a rro haro no evaọ eriariẹ Ọghẹnẹ gbe uyoyou nọ a wo kẹ Ọghẹnẹ gbe Ẹme riẹ, Ebaibol na. Ghelọ eghẹ ohwo ọsosuọ nọ o no edhere Ọghẹnẹ na, aro ọjajavi ọrọ utu ọrigbo nọ o wo ẹrọwọ avọ areghẹ na u bi fi obọ họ kẹ Ileleikristi uzẹme nana dadamu abọ Jihova gbe Ẹme riẹ.—Matiu 24:45.

Whọ Kuvẹ re Osu Akpọ na Ọ Kpọ Owhẹ Vievie He

17-19. Eme họ akpọ nọ ọ rrọ obọ ogaga Ẹdhọ na, kọ fikieme ma gbe wo uyoyou kẹ akpọ yena ha?

¹⁷ Edhere ọfa jọ nọ Setan ọ be gwọlọ ro si omai ruọ agbefẹ riẹ họ, o bi ru re ma you akpọ nana—edhere uzuazọ ahwo-akpọ erahaizi nọ a riẹ Ọghẹnẹ hẹ. Jesu o se Ẹdhọ “okpohwo akpọ ọnana,” ọ tẹ jẹ ta nọ: “O wo ogaga vi omẹ hẹ.” (Jọn 14:30) Ma kẹ Setan uvẹ re ọ rehọ ogaga riẹ kpọ omai vievie he! Dede na ma riẹ nọ “akpọ na ọsoso ọ rọ obọ ogaga oyoma [yena].” (1 Jọn 5:19) Oyejabọ nọ Ẹdhọ ọ sai ro dhesẹ “ivie akpọ kpobi” kẹ Jesu inọ ọ rẹ te rehọ ai kẹe nọ Jesu o te guzou kpotọ kẹe, oka egagọ nọ u dhesẹ nọ ọ se Ọghẹnẹ. Jesu ọ se onana ababọ ẹme na nọ o roro isiava. (Matiu 4:8-10) Akpọ nọ Setan o bi su na o mukpahe enọ i bi lele Kristi. (Jọn 15:18-21) Agbẹta nọ Jọn ukọ na ọ rọ vẹvẹ omai unu nọ ma you akpọ na ha na!

 ¹⁸ Jọn o kere nọ: “Wha you akpọ na hayo eware nọ e rọ eva akpọ na ha. Re ohwo jọ o te you akpọ na, uyoyou Ọsẹ na o riẹ eva ha. Keme eware kpobi nọ e rọ eva akpọ na, urusio uwo, gbe urusio ibiaro gbe eheri uzuazọ, o rọ orọ Ọsẹ na ha rekọ yọ o rọ akpọ na. Akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.” (1 Jọn 2:15-17) Ma re you akpọ na vievie he, keme edhere uzuazọ uyero riẹ o rrọ kẹ isiuru ugboma sebaẹgba na yọ o wọso itee Jihova Ọghẹnẹ.

¹⁹ Kọ eme ma re ru otẹrọnọ ma jọ udu mai wo uyoyou kẹ akpọ na? Otẹrọ ere, ma rẹ lẹ kẹ Ọghẹnẹ re o fi obọ họ kẹ omai whaha uyoyou nana gbe isiuru abọ-iwo nọ i re lele iei. (Ahwo Galesha 5:16-21) Avro ọ riẹ hẹ, ma te daoma yeri uzuazọ nọ o “kare epe eva akpọ na” nọ ma tẹ be kareghẹhọ ẹsikpobi inọ “izi iyoma” nọ a rẹ ruẹ hẹ họ ‘isu akpọ’ na nọ e be kpọ ahwo akpọ nọ ọ riẹ Ọghẹnẹ hẹ na.—Jemis 1:27; Ahwo Ẹfẹsọs 6:11, 12; 2 Ahwo Kọrint 4:4.

20. Ẹvẹ a sae rọ ta nọ ma “rọ e rọ akpọ na ha”?

²⁰ Jesu ọ ta kpahe ilele riẹ nọ: “A rọ e rọ akpọ na ha, wọhọ epanọ mẹ rọ ọ rọ akpọ na ha.” (Jọn 17:16) Ileleikristi nọ a wholo na avọ egbẹnyusu rai a be daoma yeri uzuazọ ofuafo evaọ abọ-ẹzi gbe abọ-iwo, hẹriẹ oma no akpọ nana. (Jọn 15:19; 17:14; Jemis 4:4) Akpọ omuomu nana o mukpahe omai fikinọ ma si oma noi jẹ rrọ ‘ewhovuẹ ẹrẹreokie.’ (2 Pita 2:5) Uzẹme, ma rrọ udevie okegbe ahwo akpọ nọ igberedia, ibruẹnwae, otu ofruriọ, egedhọ, iji, eterue, gbe egbidi e be rria. (1 Ahwo Kọrint 5:9-11; 6:9-11; Eviavia 21:8) Rekọ ma bi se “ẹzi akpọ na” rehọ họ, keme orọnọ ogaga uzioraha akpọ nọ ọ riẹ Ọghẹnẹ hẹ na oye o be kpọ omai hi.—1 Ahwo Kọrint 2:12.

Whọ Kuvẹ kẹ Ẹdhọ Họ

21, 22. Ẹvẹ whọ sai ro fi ohrẹ Pọl nọ o rrọ Ahwo Ẹfẹsọs 4:26, 27 na họ iruo?

²¹ Viukpọ “ẹzi akpọ na,” ẹzi Ọghẹnẹ ọ be kpọ omai, onọ u bi fi obọ họ kẹ omai dhesẹ iruemu-aghae wọhọ uyoyou gbe oma-oyọrọ. (Ahwo Galesha 5:22, 23) Enana i re fi obọ họ kẹ omai dikihẹ ga kẹ ohọre Ẹdhọ nọ ọ be rọ so ẹrọwọ mai. Ọ gwọlọ nọ ma ‘mu okpofu nọ o rẹ wha umuomu tha’ rekọ ẹzi Ọghẹnẹ o re fi obọ họ kẹ omai ‘whaha ofuomuo, siọ evedha ba.’ (Olezi 37:8) Uzẹme, ẹsejọ a rẹ sai gine ru omai te epanọ ma rẹ rọ dheva, rekọ Pọl ọ hrẹ omai nọ: “Wha dhaeva raha uzi hi, wha jọ ọre o kiedi ofu rai họ họ: wha kẹ ukumuomu oria gbe he.”—Ahwo Ẹfẹsọs 4:26, 27.

²² Evedha mai e rẹ sai su kpohọ uzioraha otẹrọnọ ma gbe si ofu no eva ha. Nọ ma te wo oghẹrẹ ofu otiọnana, o rẹ kẹ Ẹdhọ uvẹ nọ ọ rẹ rọ wha omohẹriẹ haro evaọ ukoko na hayo lẹliẹ omai ru eware iyoma. Fikiere, u fo re ma ku ẹwhọ nọ ma wo kugbe amọfa họ vẹrẹ vẹrẹ evaọ edhere nọ Ọghẹnẹ ọ gwọlọ. (Iruo-Izerẹ 19:17, 18; Matiu 5:23, 24; 18:15, 16) Fikiere, joma kuvẹ re ẹzi Ọghẹnẹ ọ kpọ omai, re ma hai dhesẹ oma-oriẹsuo. A tẹ maki ru omai te evedha dede, ajọ ma kuvẹ vievie he re u su kpohọ okpofu nọ o rẹ wha egrẹ gbe omukpahọ ze.

23. Enọ vẹ ma te ta ẹme kpahe evaọ uzoẹme nọ o rrọ aro na?

²³ Ma ta ẹme kpahe iruemu Ẹdhọ jọ nọ ma rẹ raro kele he no. Rekọ o rẹ sai gbe ahwo jọ unu inọ: Kọ u fo re ma dhozọ Setan? Fikieme ọ jẹ be rehọ ukpokpoma te Ileleikristi? Kọ eme ma rẹ sai ru nọ obọ Ẹdhọ u gbe ro te omai hi?

[Oruvẹ-obotọ]

Eme Họ Uyo Ra?

• Fikieme ma gbẹ rọ ta uvumọ ohwo raha ha?

• Evaọ erulele 1 Jọn 3:15, eme ma rẹ whaha re ma siọ ojihẹ ba ẹjọ?

• Ubiẹro vẹ ma re ro rri ahwo nọ a kie no ẹrọwọ na no, kọ fikieme?

• Fikieme ma gbe ro you akpọ na ha?

[Enọ Uwuhrẹ]