Diaavulu inissaqarteqinasiuk

„Diaavulu periarfisseqinasiuk.“ — EFESOSIMIUT 4:27, Byington.

1. Sooq inuppassuit Diaavuloqarnera qularaat?

UKIUT hundredelikkuutaat ingerlaneranni inuppassuit Diaavulu kinaassusilittut aappaluttunik atisaqartutut kukiffalittut nassulittullu ajassaataasarsuit pingasorallit atorlugit inunnik ajortunik anniarfimmut ikumasumut pisitsisartutut takorloortarsimavaat. Paasinnittaaseq tamanna Biibilimi ajoqersuutigineqanngilaq, taamaakkaluartorli qularnanngitsumik inuit millionilikkuutaat Diaavuloqarneranik qularnerannut imaluunniit atip taassuma ajussutsimut assersuutaannaaneranik isumaqarfiginninnerannut pissutaasimavoq.

2. Biibilimi Diaavulu qanoq oqaluttuarineqarpa?

² Takunnittuusimasut oqaluttuaannik uppernarsaatinillu erseqqissunik Diaavuloqarneranut takussutissanik Biibilimiittoqarpoq. Jiisusi Kristusip qilammi anersaat silarsuaanni taanna takuaa, nunarsuarmiikkallaramilu oqaluffigaa. (Jobi 1:6; Matthæusi 4:4-11) Biibilimi eqqaaneqanngilaq pinngortitaq anersaajusoq taanna qanoq ateqaqqaarsimanersoq, aammali Diaavulumik (grækerit oqaasiannit ’eqqunngitsumik unnerluussisumik, mamarliisumik’ isumalimmit naggueqartumik) taaneqartarpoq Guuti eqqunngitsumik unnerluutigisimammagu. Aamma Saatanimik (’akerlilersuisumik’ isumaqartumik) taaneqartarpoq Jehova akerlilersormagu. Saatani Diaavulu ’pulateriaarsutoqqatut’ eqqaaneqarpoq, qularnanngitsumik Eva pulateriaarsuk atorlugu nakutimmagu. (Saqqummersitat 12:9; 1 Timotheusi 2:14) Aammattaaq ’ajortumik’ taaneqartarpoq. — Matthæusi 6:13. *

3. Maanna apeqqut suna misissussavarput?

³ Jehovamut kiffaagatta Saatani, Guutimut ilumoortutuamut akeraanerpaaq, assigerusunngivipparput. Taamaattumik apustili Paulusip siunnersuutaa una malittariaqarparput: „Diaavulu periarfisseqinasiuk.“ (Efesosimiut 4:27, Byington) Saatanip ilaagassarinngisavut suut pissuserai?

Mamarliisorsuaq ilaaqinagu

4. ’Ajortup’ qanoq Guuti mamarlersimavaa?

⁴ ’Ajortoq’ Diaavulumik taaneqartariaqarpoq, mamarliisuugami. Mamarliineq tassaavoq allat pillugit salluliuutaasunik, ajortunik nikanarsaataasunillu oqaaseqarneq. Guutip Adami ima peqquaa: „Orpik ajunngitsumillu ajortumillu ilisimalersitsisoq neriffigissanngilat, neriffigigaluarukkumi toqussaatit!“ (1 Mosesi 2:17) Evap tamanna nalunngilaa, pulateriaarsulli aqqutigalugu Diaavulup ima oqarfigaa: „Naamik, toqussanngivippusi! Guutilli nalunngilaa neriffigigaluarussiuk isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ (1 Mosesi 3:4, 5) Tamanna Jehova Guutimik ajortorujussuarmik mamarliineruvoq!

5. Sooq Diotrefesi mamarliinerminut akisussaatinneqartariaqarpa?

⁵ Israelikkut ima peqquneqarput: ’Mamarliisutut angalassanngilatit innuttavit akornanni.’  (3 Mosesi 19:16, 1900/1961) Apustili Johannesi inuk mamarliisoq pillugu ima allappoq: „Ilagiinnut allagaqarpunga, Diotrefesillu taakkunani tamatigut salliujumasartup akuersaanngilaatigut. Taamaattumik tikiukkuma eqqaasikkumaarpara qanoq iliornerinik, tassa mamarlerluta ajortumik oqallisigisarsimammatigut.“ (3 Johannesi 9, 10) Diotrefesip Johannesi mamarlertarpaa tamatumunngalu akisussaatinneqartariaqarluni. Kristumiup ilumoortup kia Saatani mamarliisorsuaq ilaarlugu Diotrefesi assigerusussinnaanerpaa?

6, 7. Sooq allanik mamarleerusunngilagut?

⁶ Jehovap kiffai mamarlerneqakulasarlutillu eqqunngitsumik unnerluutigineqakulasarput. „Palasiunerit allakkanillu ilisimasut [Jiisusi] sakkortuumik unnerluutigaat.“ (Lukasi 23:10) Palasiunerup Ananiap allallu Paulusi eqqunngitsumik unnerluutigaat. (Apustilit Suliaat 24:1-8) Biibilimilu Saatani ’qatanngutitta unnerluutiginnittaattut ullukkut unnuakkullu taakkuninnga Guutimut unnerluutiginnittartutut’ eqqaaneqarpoq. (Saqqummersitat 12:10) Qatanngutit eqqunngitsumik unnerluutigineqartut taakku tassaapput kristumiut tanitat ulluni kingullerni makkunani nunarsuarmiittut.

⁷ Kristumiu kinaluunniit allanik mamarleerusunnanilu eqqunngitsumik unnerluutiginnerusunngilaq. Taamaaliortoorsinnaavugulli allat oqaaseqarfigigutsigik pissutsit atugaat ilisimalluarnagit. Mosesip inatsisaasa atuunnerata nalaani piaaraluni sallulluni nalunaajaaneq toqumut pillagassanngortinneqarnermik kinguneqarsinnaavoq. (2 Mosesi 20:16; 5 Mosesi 19:15-19) Aammattaaq „sallulluni nalunaajaasoq“ Jehovap qinngarsugaraa. (Ussatit 6:16-19) Saatani Diaavulu, eqqunngitsumik unnerluutiginnittoq mamarliisorlu annerpaaq, ilaarusunngilluinnarparput.

Toqutsisoq siullerpaaq ilaaqinagu

8. Diaavulu qanoq ililluni ’pileqqaarneranniit toqutsisuua’?

⁸ Diaavulu toqutsisuuvoq. „Taanna pileqqaarneranniit toqutsisuuvoq,“ Jiisusi oqarpoq. (Johannesi 8:44) Saatani Adamimik Evamillu Guutimut tunussititsinerminiilli toqutsisuuvoq. Taamaalilluni inuit marluk siulliit taakkualu kinguaavi tamaasa toqusussaanngortippai. (Romamiut 5:12) Maluginiarnarpoq iliuutsip tamatuma kinaassusilimmit taamaallaat iliuuserineqarsinnaanera ajussutsimillu kinaassuseqanngitsumit iliuuserineqarsinnaannginnera.

9. Johannesip allagai siulliit 3:15 naapertorlugu qanoq toqutsisunngorsinnaavugut?

⁹ Inatsisit Qulit Israelikkunnut tunniunneqartut ilaat imaappoq: „Inuassanngilatit.“ (5 Mosesi 5:17) Apustili Petrusip kristumiut ima allaffigai: „Arlarsi kinaluunniit toqutsisutut . . . naalliunngikkili.“ (1 Petrusi 4:15) Jehovamut kiffaagatta soorunami toqutsinialissanngilagut. Uppeqatittali ilaat uumigigutsigu toqunissaalu kissaatigalugu, Guutip isaani pisuussuteqassaagut. Apustili Johannesi ima allappoq: „Kinaluunniit qatanngumminik uumiginnittoq toqutsisuuvoq, nalunngilarsilu toqutsisimasoq kinaluunniit inuunermik naassaanngitsumik immini pigisaqanngitsoq.“ (1 Johannesi 3:15) Israelikkut ima peqquneqarput: „Qatanngutit uumissussanngilat uummatikkut.“ (3 Mosesi 19:17) Uagut uppeqatittalu akornanni ajornartorsiuteqaleraangat aaqqinniapallattartigu, toqutsisup Saatanip kristumiutut ataasiussuserput aserorniassanngimmagu. — Lukasi 17:3, 4.

Sallutoorsuaq qanorluunniit iliussagaluarpat aalajaattuarit

10, 11. Sallutoorsuaq Saatani qanorluunniit iliussagaluarpat aalajaattuarumalluta qanoq iliortariaqarpugut?

¹⁰ Diaavulu sallutuujuvoq. „Sallugaangami imminerminit oqaluttarpoq, sallutuujugami sallumullu ataataagami,“ Jiisusi oqarpoq. (Johannesi 8:44) Saatanip Eva salluliorfigaa, Jiisusili silarsuarmut pivoq sallusuissut nalunaajaassutigissallugu. (Johannesi 18:37) Kristusimut ajoqersugaasutut Diaavulu qanorluunniit iliussagaluarpat aalajaassagutta, salluliornialernatalu peqquserlunnialissanngilagut. ’Immitsinnut ilumoortumik oqaluffigisariaqarpugut.’ (Zakaria 8:16; Efesosimiut 4:25) ’Jehovap, sallusuissutip Guutiata’, taamaallaat nalunaajaasuni salluneq ajortut pilluaqqusarpai. Guutiitsut taassumunnga sinniisuunissaq pisinnaatitaaffiginngilaat. — Tussiaat 31:6, NV; 50:16; Esaja 43:10.

¹¹ Saatanip salluliuutaanit tammartitaasimanermit anersaakkut kiffaanngissuseqalersimanerput pingaartikkutsigu, kristumiussuseq „sallusuissummut  aqqutaasoq“ aalajangiutissavarput. (2 Petrusi 2:2; Johannesi 8:32) Kristumiut ajoqersuutaat tamarmik katillutik tassaapput „iivangkiiliup [nutaarsiassap nuannersup, NV] ilumoorsusia“. (Galatiamiut 2:5, 14) ’Sallusuissummi inuunerput’ — tassa sallusuissummik aalajangiussinerput ’sallumullu ataataasoq’ qanorluunniit iliussagaluarpat aalajaattuarnerput — annaanneqarnissatsinnut aalajangiisuuvoq. — 3 Johannesi 3, 4, 8.

Tunussinermik aallarniisoq akioruk

12, 13. Tunussisut qanoq periaaseqarfigissavavut?

¹² Pinngortitaq anersaajusoq Diaavulunngortoq aallaqqaammut sallusuissummiikkaluarpoq. Kisianni ’sallusuissut aalajangiutinngilaa ilumigut sallusuissuteqannginnami,’ Jiisusi oqarpoq. (Johannesi 8:44, 1900/1961) Diaavulup tunussinermik aallarniisup „sallusuissutip Guutia“ akerlilersortuaannarpaa. Ukiuni hundredelinni siullerni kristumiut ilaat ’Diaavulup nigaliaanut’ napitissimapput tammartitaagunaramik sallusuissummillu nigorsimagunaramik. Taamaattumik Paulusip suleqatini Timotheusi kajumissaarpaa taakku saamasumik periaaseqarluni ajoqersoqqullugit, anersaakkut peqqisseqqiniassammata Saatanillu nigaliaanit aniguiniassammata. (2 Timotheusi 2:23-26) Soorunami sallusuissutip aalajangiusimajuarnera tunussisullu isumaannit napitinneqanngilluinnarnissaq pitsaanerungaassaaq.

¹³ Inuit marluk siulliit tunussisunngorput Diaavulu tusarnaaramikku taassumalu salluliuutai itigartinnginnamikkit. Tamanna qanoq ilinniutigisinnaavarput? Tunussisut tusarnaassavavut, taakkua allaaserisaat atuassavavut, internetimiluunniit nittartagaat misissussavavut? Guuti asagutsigu sallusuissullu nuannarigutsigu taamaaliornavianngilagut. Tunussisut angerlarsimaffitsinnut isertissanngilavut ilassissanagilluunniit, taamaalioruttami ’suliaanni ajortuni immitsinnik peqataatissagatta’. (2 Johannesi 9-11) Diaavulup peqquserlunneranut nakkaannanngisaannarta ajoqersuinerluttullu ’ajoqersuinerluutinik aserornartunik anngiortumik eqqussiniartut’ ’salluliuutinillu oqaluffigaluta uagutsinnik iluaqutissarsiffiginninniartut’ malikkumanagit „sallusuissummut aqqutaasoq“ kristumiut ingerlavigisaat qimanngisaannaartigu. — 2 Petrusi 2:1-3.

14, 15. Paulusip utoqqaanertat Efesosimeersut suleqatinilu Timotheusi qanoq mianersoqquai?

¹⁴ Paulusip utoqqaanertat kristumiut Efesosimeersut ima oqarfigai: „Immissinnut misissugariniaritsi savaatittaarlu tamaasa misissugaralugit; Anersaammi Illernartup taakkununnga nakkutilliisunngortippaasi Guutip ilagiissai nammineq aamminik pissarsiai paareqqullugit. Nalunngilara peerukkuma amaqqut qaasuttut ilissinnut tikiukkumaartut savaatinillu asattuussissanngitsut. Allaammi ilissi akornassinnit saqqummersoqarumaarpoq angutinik ilumoortuunngitsumik oqaluttunik ajoqersukkat imminnut malinnaatikkumallugit.“ (Apustilit Suliaat 20:28-30) Piffissap ingerlanerani ilumut tunussisunik „ilumoortuunngitsumik oqaluttunik“ saqqummersoqarpoq.

¹⁵ Ukiup 65-ip missaani apustili Paulusip Timotheusi kajumissaarpaa ’oqaatsimik sallusuissutaasumik eqqortumik atueqqullugu’ (NV). Nangillunilu ima allappoq: „Nigorsimaniakkit iluaatsunik isumaqanngitsunillu oqaluttartut, [tunussisut] taakkua iluaassusiat ingasatsikkiartuinnassammat ajoqersuutaallu kræftitut siaruaakkiartorumaarluni. Taama ittunut ilaapput Hymenæusi Filetusilu. Taakkua sallusuissummik tunussillutik toqusunit makiffissaq pereernerarpaat, taamalu  amerlasuut uppernerat aseroriartortillugu.“ Tunussinersuaq aallartereersimavoq! Paulusi ima nangippoq: „Taamaakkaluartorli Guutip tunngaviliussaa aalajaappoq.“ — 2 Timotheusi 2:15-19.

16. Sooq Guutimik taassumalu oqaasianik ilumoorfiginnittuarpugut naak tunussinermik aallarniisumit saassunneqartaraluarluta?

¹⁶ Pallorfiginninneq ilumoortoq ajortunngortinniarlugu Saatanip tunussisut atukulasarpai, iluatsitsinnanili. 1868-ip missaani Charles Taze Russellip kristumiuuneraqatigiit ilagiivisa ajoqersuutaat pigiliulluarneqarsimasut misissoqqissaaleramigit, paasivaa Biibilimik nassuiaatit ilaat eqqunngitsuusut. Russellip inuillu allat ikittut sallusuissummik ujarlersut Amerikami Pittsburghimi Pennsylvaniamiittumi Biibilimik atuaqqissaaqatigiit pilersissimavaat. Taamanerniilli ukiut 140-ngajaat ingerlaneranni Jehovap kiffaasa Guutimik taassumalu oqaasianik ilisimasaqarnerujartuinnarlutik asanninnerujartuinnarput. Kiffaqatigiit ilumoortut silatuullu anersaakkut eqiinganerat iluaqutigalugu kristumiut ilumoortut taakku Jehovamik taassumalu oqaasianik ilumoorfiginnittuarsinnaasimapput naak tunussinermik aallarniisumit saassunneqartaraluarlutik. — Matthæusi 24:45.

Silarsuup matuma naalagaanut tigutinngisaannarit

17-19.  Silarsuaq ajortup pissaaneqarfigisaa suugami, aamma sooq asassanngilarput?

¹⁷ Saatanip aamma allamik nakutinniarsaraatigut, tassa silarsuarmut matumunnga — inuiannut naapertuilluanngitsunut Guutimik ilisimasaqanngitsunut — asanninnermik. Jiisusip Diaavulu ’silarsuup naalagaanik’ taavaa imalu oqarluni: „Taassuma uanga tigunngilaannga.“ (Johannesi 14:30, NV) Qanortoq Saatanip aamma uagut tigunngissaannarlisigut! Soorunami nalunngilarput „silarsuaq tamaat ajortup pissaaneqarfigigaa“. (1 Johannesi 5:19, NV) Taamaattuminguna Diaavulup Jiisusi ’silarsuarmi naalagaaffinnik tamanik’ neqeroorfigisinnaagaa ataasiaannarluni pallorfigippani — neqeroorut Guutip ernerata itigartilluinnagaa. (Matthæusi 4:8-10) Silarsuup Saatanip naalagaaffigisaata Kristusip ajoqersugai uumigai. (Johannesi 15:18-21) Tupinnanngilaq apustili Johannesip silarsuaq asaqqunagu mianersoqqummatigut!

¹⁸ Johannesi ima allappoq: „Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa;  silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput. Silarsuarlu piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Johannesi 2:15-17) Silarsuaq asassanngilarput, tamatumanimi inooriaasiusoq uinimmut ajortiliusumut kajungernartuummat Jehova Guutillu najoqqutassiaanut akerliulluinnarmat.

¹⁹ Taavami silarsuaq manna asaqqajaasarutsigu? Taamaappat Guuti qinnuigisariaqarparput asanninnerup tamatuma uingullu pilerissusiisa tamatumunnga tunngassut ajugaaffiginissaannut ikioqqulluta. (Galatiamiut 5:16-21) Eqqaamajuarutsigu ’ajussutsip anersaavi pissaasut’ inuiannut naapertuilluanngitsunut ’silarsuarmi naalagaasut’ takussaanngitsut, qularnanngivissumik ’silarsuarmit mingutsinneqatsaliniarluta’ sapinngisatsinnik iliortassaagut. — Jaaku 1:27; Efesosimiut 6:11, 12; 2 Korinthimiut 4:4.

20. Sooq oqartoqarsinnaava ’silarsuarmut ilaanngitsugut’?

²⁰ Ajoqersukkani pillugit Jiisusi ima oqarpoq: „Silarsuarmut ilaanngillat, soorlu uanga silarsuarmut ilaanngitsunga.“ (Johannesi 17:16, NV) Kristumiut tanitat taakkualu suleqataasa tunniulluinnarsimasut ileqqussatigut anersaakkullu minguittuarniarsaripput, silarsuarmit matumannga avissaaqqajuarniarsaralutik. (Johannesi 15:19; 17:14; Jaaku 4:4) Silarsuup naapertuilluanngitsup matuma uumigaatigut imminit avissaaqqajuarniaratta aamma ’iluarnermik nalunaariartortitaagatta’. (2 Petrusi 2:5) Inuiaat kinguaassiuutitigut inuunerluttunik, allasiortunik, piiaasunik, guutipilussiortunik, tillittunik, sallutuunik imerajuttunillu ilallit akornanni inuugaluarpugut. (1 Korinthimiut 5:9-11; 6:9-11; Saqqummersitat 21:8) Kisianni „silarsuup anersaava“ najuussunngilarput, ajortuliornermummi kajumississummit tamatumannga siulersortinngilagut. — 1 Korinthimiut 2:12.

Diaavulu inissaqarteqinasiuk

21, 22. Paulusip siunnersuutaa Efesosimiut 4:26, 27-mi allassimasoq qanoq malissinnaavarput?

²¹ ’Silarsuup anersaavanit’ pinnata, Guutip anersaavanit siulersorneqartarpugut, taannalu iluaqutigalugu pissutsit soorlu asanninneq imminullu naalakkersorsinnaaneq ineriartortittarpavut. (Galatiamiut 5:22, 23) Pissutsit tamakku iluaqutigaavut Diaavulup uppernitsinnut saassussinerisa akiornissaannut. Taassuma ’narrutsannissarput ajunaarutaaginnartussaq’ kissaatigaa, Guutilli anersaava ’kamannaveersaarnissamut uumitsattarunnaarnissamullu’ iluaqutigaarput. (Tussiaat 37:8) Ilaannikkut kamannissatsinnut pissutissaqarluarsinnaagaluarpugut, Paulusilli ima siunnersorpaatigut: „Kamassimariannguaritsi, kisiannili ajortuliornasi. Seqineq tarrisinnaveersiuk narrutsassimanissinni. Diaavululu inissaqarteqinasiuk.“ — Efesosimiut 4:26, 27.

²² Kamannerput ajortuliornermik kinguneqarsinnaavoq narrutsassimajuarutta. Taamaakkutta Diaavulu ilagiinni eqqissiviilliortitsinissamut imaluunniit uagutsinnik eqqunngitsuliortitsinissamut periarfissinneqassaaq. Taamaattumik isumaqatigiinngissutit Guutip najoqqutassiaanut naapertuuttumik aaqqipallanniartariaqarpavut. (3 Mosesi 19:17, 18; Matthæusi 5:23, 24; 18:15, 16) Aap, Guutip anersaavanit siulersortittariaqarpugut, imminut naalakkersortariaqarpugut, kamannerlu — allaat pissutissaqarluaraluartoq — ilumikkersimanermik, ajussutsimik uumissuinermillu kinguneqartinngisaannartariaqarparput.

23. Allaaserisami tulliuttumi apeqqutit suut sammissavavut?

²³ Allaaserisami matumani Diaavulup pissusiisa ilaat ilaagassarinngisavut sammivavut. Allaaserisamilli atuartut ilaat immaqa ima eqqarsarput: Saatanip ersiginissaanut pissutissaqarpugut? Sooq kristumiunik malersuisitsisarpa? Aamma qanoq ililluta Diaavulumit nakutinneqarnaveersaarsinnaavugut?

[Quppernerup ataani ilanngussaq]

Uteqqiineq

• Sooq allanik mamarliinngisaannartariaqarpugut?

• Toqutsisunngorumanata Johannesip allagai siulliit 3:15 naapertorlugu qanoq iliortariaqarpugut?

• Tunussisut qanoq isigisariaqarpavut, aamma sooq?

• Sooq silarsuaq asassanngilarput?

[Atuaqqissaarnermi apeqqutit]

[Qupp. 24-mi assiliartaq]

Diaavulup kristumiutut ataasiussutsitsinnik aseruinissaa akuerinngisaannassavarput

[Qupp. 25-mi assiliartat]

Sooq Johannesi allappa silarsuaq asassanngikkipput?