Ra bas-y weer n kõ a Sʋɩtãan ye

“Bɩ y ra kõ Sʋɩtãanã weer ye.”—EFƐƐZ RÃMBA 4:27.

1. Bõe yĩng tɩ neb wʋsg yam yood ne a Sʋɩtãan belmã?

HAL sẽn kaoose, neb wʋsg tagsdame t’a Sʋɩtãan tara yɩɩl la na-bendo, n yer fu-miuugu, la a tar bãn-yɩɩbr n kõsd nin-wẽnsã n ningd bugmẽ. Biiblã yaool n pa yet woto ye. La sãmbg sẽn ka be, yaa tags-kãensã sẽn pa sɩdã n kɩt tɩ neb wʋsg yam yood a Sʋɩtãan sã n sɩd beeme, bɩ b tagsdẽ t’a yaa wẽng ning sẽn be ninsaal sũurẽ wã bala.

2. Bõe la Biiblã zĩis kẽer yet a Sʋɩtãan zugu?

² Biiblã tara kibay sẽn wilgd neb sẽn maan kaset vẽeneg tɩ Sʋɩtãanã sɩd beeme. A Zezi Kirist yã-a-la saasẽ, la a sẽn wa n be tẽng zugã me a goma ne-a. (Zoob 1:6; Matɩe 4:4-11) Baa ne Biiblã sẽn pa wilgd malɛg-kãngã yʋʋr sẽn da yaa a soab sɩngrẽ wã, a boond-a lame tɩ Diaable (sẽn dat n yeel tɩ tẽn-kãn-ned bɩ munaafɩɩka), a sẽn kãneg Wẽnnaamã yĩnga. B boond-a lame me tɩ Sʋɩtãana (sẽn dat n yeel tɩ Kɩɩsda), a sẽn kɩɩs a Zeova wã yĩnga. B leb n boonda a Sʋɩtãan tɩ “wag-kʋdr,” a sẽn tũnug ne waaf n belg a Hawa wã yĩnga. (Wilgri 12:9; 1 Tɩmote 2:14) La b leb n mi n boond-a lame tɩ “wẽng soaba.”—Matɩe 6:13. *

3. Sok-bʋg la d na n bao n leoke?

³ Tõnd sẽn yaa a Zeova sõgen dãmbã, d pa segd abada n wõneg a Sʋɩtãan sẽn yaa sɩd Wẽnnaamã bɛ wã ye. Rẽ n so tɩ d segd n tũ tʋm-tʋmd a Poll saglgã. A yeelame tɩ d “ra kõ Sʋɩtãanã weer ye.” (Efɛɛz rãmba 4:27) La Sʋɩtãanã zug-bʋs la d pa segd n talle?

D ra rɩk a Sʋɩtãan tẽn-kãnebã togs-n-taar ye

4. Wãn to la “wẽng soabã” kãneg Wẽnnaam?

⁴ Zemsame tɩ b bool “wẽng soabã” tɩ Diaable, bala a yaa tẽn-kãn-neda. Tẽn-kãneb yaa f sẽn na n yag ned ziri, bɩ f sẽn na n dõd neda. Wẽnnaam ra yeela a Ãdem woto: “Ra sak n yãk sõama ne wẽng bãngr tɩɩga biis n dɩ ye. Tɩ bõe, fo sã n dɩ a biisa daare, fo sɩd na n kiime.” (Sɩngre 2:17) A Hawa me ra mii Wẽnnaam sẽn yeelã, la Sʋɩtãanã tũnuga ne waaf n yeel-a yaa: “Yãmb ka na n ki ye. Tɩ bõe, Wẽnnaam miimi tɩ daar ninga yãmb sẽn na n yãk a biisã n dɩ, yãmb nina na n pukame tɩ yãmb lebg wa Wẽnnaam n mi sõama ne wẽng n bake.” (Sɩngre 3:4, 5) A Sʋɩtãan sẽn yeel woto wã a sɩd rõda Wẽnnaam a Zeova!

5. Bõe yĩng t’a Diotrɛf ra zems ne bʋʋd a tẽn-kãnebã yĩnga?

⁵ Wẽnnaam da yeela Israɛll nebã woto: “Ra kãneg f taab ye.” (Maankʋʋre 19:16) Tʋm-tʋmd a Zã goma tẽn-kãn-ned a ye sẽn  da be yẽ wakatẽ wã yelle, n gʋls woto: “Mam gʋlsa koɛɛg bilfu n tʋm a Zezi tẽedbã, la a Diotrɛf sẽn nong n yɩ bãmb taoor soaba ka reegd tõnd ye. Yaa woto yĩnga mam sã n wa, mam na tẽeg bũmb nins yẽ sẽn maanã la a gom-yaalsã fãa yẽ sẽn gomd tõndã.” (3 Zã 9, 10) A Diotrɛf da rõta a Zã, la ra zemsame tɩ b bʋ-a rẽ yĩnga. Kiris-ned baa a ye pa rat n yɩ wa a Diotrɛfe, bɩ a yɩ wa a Sʋɩtãan sẽn yaa tẽn-kãn-nebã naabã ye.

6, 7. Bõe yĩng tɩ d pa segd n kãneg ned baa a ye?

⁶ B nong n dõta a Zeova sõgen dãmbã. Biiblã yetame tɩ “maan-kʋʋdba kãsem dãmba ne gʋlsdba yalsa be n dõd [a Zezi] ne b pãng tɛka.” (Luk 23:10) Maan-kʋʋdb kãsem a Ananias la neb a taab me rõda a Polle. (Tʋʋma 24:1-8) Sẽn na n paase, Biiblã gomda a Sʋɩtãan yell n yetẽ t’a yaa “tõnd ba-biisa rõata sẽn da rõt bãmb tõnd Wẽnnaam taoor wĩntoog ne yʋngã.” (Wilgri 12:10) Ba-biis nins a Sʋɩtãan sẽn dõta yaa kiris-neb nins sẽn paam vʋʋsem sõng zaeeb n ket n be tẽng zugã.

⁷ Kiris-ned baa a ye pa rat n kãneg a to bɩ n dõd a to ye. La tõe n yɩɩ woto, d sã n dogl ned yell n yaool n pa rɩ moor n tɩge. A Moiiz Tõogã tũub wakate, f sã n da saag n maan kaset ziri, b ra tõe n kʋ-f lame. (Yikri 20:16; Tõodo 19:15-19) Sẽn paase, kaset ziri bee yɛl nins a Zeova sẽn kisã sʋka. (Yelbũna 6:16-19) Rẽnd yaa vẽeneg tɩ d pa rat n tol n yɩ wa a Sʋɩtãan sẽn yaa rõatbã la tẽn-kãn-nebã naabã ye.

D ra maan wa pipi nin-kʋʋdã ye

8. Bõe yĩng tɩ d tõe n yeel t’a Sʋɩtãan “yaa nin-kʋʋd hal sɩngrẽ”?

⁸ A Sʋɩtãan yaa nin-kʋʋda. A Zezi yeelame t’a “yaa nin-kʋʋd hal sɩngrẽ.” (Zã 8:44) A Sʋɩtãan nin-kʋʋrã sɩnga a sẽn wa n kɩt t’a Ãdem ne a Hawa kɩɩs Wẽnnaamã. A kɩtame tɩ pipi rao wã ne a pagã ki, tɩ b kambã la b yagensã me kiidẽ. (Rom dãmba 5:12) D neeme tɩ wẽngã sẽn be ned sũurẽ pa tõe n tʋm woto ye, la yaa ned bal n tõe n maan rẽ.

9. Wala b sẽn wilg 1 Zã 3:15 pʋgẽ wã, wãn to la d tõe n wa lebg nin-kʋʋdba?

⁹ Tõod piigã b sẽn kõ Israɛll nebã pʋgẽ, tõog a ye yeelame tɩ: “Da kʋ ned ye.” (Tõodo 5:17) Tʋm-tʋmd a Pɩɛɛr gʋlsa kiris-nebã n yeel-b woto: “Bɩ yãmb ned baa a yembre da paam namsgo yẽ sẽn yaa nin-kʋʋd . . . yĩng ye.” (1 Pɩɛɛr 4:15) Dẽnd d sẽn yaa a Zeova sõgen dãmbã yĩnga, d pa na n kʋ ned ye. La d sã n kis d kiris-nin-taag n dat a kũum, d tara taal Wẽnnaam taoore. Tʋm-tʋmd a Zã yeelame tɩ “ned ninga fãa sẽn kis a ba-biiga, a yaa nin-kʋʋda, la yãmb miimi tɩ nin-kʋʋd ka tar vɩɩm sẽn-ka-sɛt ye.” (1 Zã 3:15) B ra kõo Israɛll nebã no-kãngã: “Bɩ f ra kisg f ba-biig f sũur pʋgẽ ye.” (Maankʋʋre 19:17) Bɩ d yɩ tao-tao n maneg mo-yõsr fãa sẽn be tõnd ne d tẽed-n-taag sʋka, tɩ nin-kʋʋd a Sʋɩtãan da wa sãam d zems-n-taarã ye.—Luk 17:3, 4.

D zãgs n da maan wa ziri-n-be-naabã ye

10, 11. Bõe la d segd n maan sẽn na yɩl n kɩɩs ziri-n-be-naab a Sʋɩtãana?

¹⁰ Sʋɩtãanã yaa ziri-n-be-neda. A Zezi yeelame tɩ Sʋɩtãanã ‘sã n yagd ziri, yẽ gomda a meng sũur pʋgẽ dẽnda, tɩ bõe, yẽ yaa ziri yagda, la ziri ba.’ (Zã 8:44) A Sʋɩtãan yaga a Hawa ziri, la a Zezi yẽ waa tẽng zug n na n kɩs sɩdã kaseto. (Zã 18:37) Tõnd sẽn yaa a Zezi karen-biisã, d sã n dat n kɩɩs a Sʋɩtãana, d pa segd n yag ziri la d maan zãmb ye. D segd n togsda sɩda. (Zakari 8:16; Efɛɛz rãmba 4:25) A Zeova sẽn yaa “Wẽnnaam sẽn so sɩda” ningda a sõgen dãmb nins sẽn togsd sɩdã bal barka. Nin-wẽnsã pa tar sor n na n gom a yʋʋr yĩng ye.—Yɩɩl Sõamyã 31:6; 50:16; Ezai 43:10.

¹¹ Biiblã bãngr fãaga tõnd ne a Sʋɩtãan ziri-n-beedã. Tõnd sã n nand bõn-kãngã, d  na n kell n gãda Kirist tũudmã sẽn yaa “sɩd sorã” kãn-kãe. (2 Pɩɛɛr 2:2; Zã 8:32) “Koe-nooga sẽn yaa sɩda” yaa zãmsg ning fãa kiris-nebã sẽn paamdã. (Galat dãmba 2:5, 14) Tõnd sã n dat n sɩd paam fãagre, d segd n kell n ‘kẽna sɩdã pʋgẽ’ la d kɩɩs “ziri ba” wã.—3 Zã 3, 4, 8.

D zãgs sɩdã kɩɩsdbã naabã

12, 13. Manesem bʋg la d segd n tall ne sɩdã kɩɩsdba?

¹² Malɛk ning sẽn lebg a Sʋɩtãanã da bee sɩda pʋgẽ. La a Zezi yeelame t’a ‘ka pa sɩda pʋgẽ, sɩda sẽn ka be yẽ pʋgẽ wã yĩnga.’ (Zã 8:44) Sɩdã kɩɩsd na-kãngã kell n kɩɩsa “Wẽnnaam sẽn so sɩdã” n ka bas ye. Pipi kiris-neb kẽer lʋɩɩ a Sʋɩtãan bẽdgã pʋgẽ, n bas t’a belg-b tɩ b bas sɩdã. Rẽ n so t’a Poll sagl a Tɩmote t’a zãms nin-kãens ne sũ-bʋgsem sẽn na yɩl tɩ b tẽebã leb n yɩ sõma, la b tõog n fãag b mens ne a Sʋɩtãan bẽdgã. (2 Tɩmote 2:23-26) Yaa vẽeneg tɩ sẽn yaa sõma yaa d sẽn na n kell n gãd sɩdã la d ra bas tɩ sɩdã kɩɩsdb zãmsg belg-d ye.

¹³ A Ãdem ne a Hawa sẽn kelg a Sʋɩtãan ziri wã yĩnga, b lebga sɩdã kɩɩsdba. Rẽ yĩnga tõnd segd n kelga sɩda kɩɩsdb bɩ d karem b sɛbã, ka rẽ bɩ n ges b sẽn yet bũmb ning ẽntɛrnɛtã pʋgẽ bɩ? Tõnd sã n nong Wẽnnaam la d nong sɩdã, d pa na n maan woto ye. D pa na n sak tɩ sɩda kɩɩsdb wa tõnd zakẽ wã, bɩ n pʋʋs-b meng ye, bala d sã n maan woto, d ‘lagemda ne bãmb b tʋʋm-wẽnsã pʋgẽ.’ (2 Zã 9-11) Bɩ d ra tol n bas t’a Sʋɩtãan belg-d tɩ d bas “sɩd sorã” n pʋg zãmb karen-saam dãmbã sẽn baood n na n ‘zãms zãmsg sẽn na n sãam tõndã’, la b gom ‘sɩlem goam n belg tõnd n paam yõodã’ ye.—2 Pɩɛɛr 2:1-3.

14, 15. A Poll keooga Efɛɛz kãsem dãmbã la a tʋmd-n-taag a Tɩmote ne bõe?

¹⁴ A Poll yeela Efɛɛz kiris-neb kãsem dãmbã woto: “Bɩ y gũus y mens ne piis nins fãa Sɩɩg Sõng sẽn kõ yãmbã, la bɩ y rɩlg [Wẽnnaam] tẽedba bãmb sẽn da ne bãmb menga [Biribl] zɩɩmã. Mam miimi tɩ mam loogr poorẽ kata sẽn yaa wẽns na n kẽe yãmb sʋka n sãam piisã. La neb na n yika yãmb sʋk n zãms neba sẽn ka sɩda n belg karen-biisa tɩ b tũ bãmba.” (Tʋʋma 20:28-30) Sɩdã kɩɩsdb kãens ra na n wa yikame n “zãms neba sẽn ka sɩda.”

¹⁵ Yʋʋmd 65 a Zezi rogmã poore, tʋm-tʋmd a Poll sagla a tʋm-n-taag a Tɩmote t’a ‘togs sɩd koɛɛga tɩrga.’ La a paasame t’a “lak ne goam sẽn yaa wẽnse la vɩɩdo, tɩ bõe, neb nins sẽn gomd woto wã paasda Wẽnnaam kɩɩsg bala. Bãmb goama rɩta wa solenkẽ-kʋdgo. La a Hymene ne a Filɛt bee bãmb sʋka. Bãmb basa sɩda n yetẽ tɩ kũum vʋʋgr loogame. La woto bãmb sãamda kẽer tẽebo.” Sɩdã kɩɩsg sɩnga ne woto. La a Poll wilgame tɩ “baoosgo, Wẽnnaam yẽbgr yalsda kãn-kãe.”—2 Tɩmote 2:15-19.

16. Baa ne sɩdã kɩɩsdb naabã sɩlmã, bõe yĩng tɩ tõnd ket n sakd Wẽnnaam la a Gomdã?

 ¹⁶ A Sʋɩtãan nong n tũnugda ne sɩda kɩɩsdb sẽn na yɩl n sãam sɩd balengã, la a zɩ n tõog ye. Yʋʋmd 1868 wã, a Sarl Taaz Risɛll maaga a yĩng n vaees kiris-neb ne yʋʋr tũudmã egiliiz rãmbã sẽn tẽed bũmb ninsã. La a yãame tɩ b wilga Biiblã zĩis kẽer võor tɩ pa zems ye. A Risɛll la neb bilf sẽn da baood sɩdã naaga taab n na n zãms Biiblã Pitsbɛrg, Pɛnsilvani sẽn be Etazini wã. Rẽ tɛka, sẽn na maan yʋʋm 140 masã, a Zeova sõgen dãmbã paama bãngr n paase, la b nong Wẽnnaam la a Gomdã n yɩɩd pĩnda. Baa ne sɩdã kɩɩsdb naab sẽn maand sɩlem nins fãa, tʋm-tʋmd sẽn tũud sɩd la sẽn tar yamã sẽn gũusdã yĩng sõnga sɩd kiris-neb kãensã tɩ b kell n sak a Zeova la a Gomdã.—Matɩe 24:45.

Ra tol-y n bas-y tɩ dũni kãngã naabã tõog-y ye

17-19. Yaa dũni bʋg n be a Sʋɩtãan nugẽ, la bõe yĩng tɩ d pa segd n nong-a?

¹⁷ Manesem a to a Sʋɩtãan sẽn tũnugd ne n bẽt tõndo, yaa a sẽn belgd tõnd n dat tɩ d nong dũni kãngã sẽn pid ne neb sẽn pa maand Wẽnnaam daabã. A Zezi boola Sʋɩtãanã tɩ “dũniyã naaba”, la a paas t’a Sʋɩtãan pa tar tõog yẽ zug ye. (Zã 14:30) D ra tol n bas t’a Sʋɩtãan tall tõog d zug ye. D mii vẽeneg tɩ “dũniyã fãa bee wẽng soab [kãnga] nugẽ.” (1 Zã 5:19) Yaa rẽ yĩng la Sʋɩtãanã sẽn tõog n yeel a Zezi t’a wõgemd n pʋʋs yẽ n kɩɩs Wẽnnaam vugr bal t’a kõ-a “dũniyã soolem fãa” wã. La Wẽnnaam Biigã kell n zãgsa fasɩ. (Matɩe 4:8-10) A Sʋɩtãan dũniyã kisa a Zezi karen-biisã. (Zã 15:18-21) Ka zaalem yĩng la tʋm-tʋmd a Zã sẽn keoogd-d tɩ d ra nong dũniyã ye.

¹⁸ A Zã gʋlsa woto: “Bɩ y ra nong dũniyã walla bũmb nins sẽn be dũniyã pʋgẽ wã me ye. Ned sã n nong dũniyã, Ba nonglem ka be a pʋgẽ ye. Tɩ bõe, bũmb nins fãa sẽn be dũniyã n yaa yĩng ratem wẽnga la nin datem wẽnga ne tɩtaamã ka yit tõnd Ba nengẽ ye. Bãmb yaa dũniyã rẽnda. Dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.” (1 Zã 2:15-17) D pa segd n nong dũniyã ye, bala a nebã vɩɩmã manesem wilgdame tɩ b baood n na n pidsa yĩnga ratem wẽnse, la rẽ kɩɩsda Wẽnnaam a Zeova noyã sẽn yaa tɩrsã.

¹⁹ La sã n mik tɩ tõnd nonga dũniyã? Sã n yaa woto bɩ d pʋʋs Wẽnnaam n bõos-a t’a sõng-d tɩ d ra le nong dũni wã la yĩngã ratem wẽnsã ye. (Galat dãmba 5:16-21) Tõnd sã n kell n ning d yamẽ tɩ yaa malɛg-wẽnsã n so dũni wẽng kãngã, sãmbg ka be tɩ d na n modgame n kell n “gũus ne dũni wẽngã” ye.—Zak 1:27; Efɛɛz rãmba 6:11, 12; 2 Korẽnt dãmba 4:4.

20. Bõe yĩng tɩ d tõe n yeel tɩ tõnd “ka dũniyã rẽndã”?

²⁰ A Zezi goma a karen-biisã yell woto: “Bãmb ka dũniyã rẽnd wa mam sẽn ka dũniyã rẽndã.” (Zã 17:16) Kiris-neb nins sẽn paam vʋʋsem sõng zaeebã la b tũud-n-taasã modgdame n na n kell n tall manesem la tẽeb sẽn yaa sõma, n lakd b mens ne dũni kãngã. (Zã 15:19; 17:14; Zak 4:4) Dũni kãngã kisa tõndo, bala tõnd laka d mens ne-a, la d leb n yaa ‘tɩrlem koe-moondba.’ (2 Pɩɛɛr 2:5) Tõnd vɩɩ dũni neb wʋsg sẽn yaa yoaadba, fãadba, bõn-naands pʋʋsdba, wagda, ziri-n-be-neb la rã-yũudb sʋka. (1 Korẽnt dãmba 5:9-11; 6:9-11; Wilgri 21:8) La tõnd pa basd tɩ dũni kãngã yamã kẽ-d ye, bala yel-wẽnã pa so tõnd ye.—1 Korẽnt dãmba 2:12.

D ra kõ a Sʋɩtãan weer ye

21, 22. Wãn to la d tõe n tũ a Poll saglgã sẽn be Efɛɛz rãmb 4:26, 27 pʋgẽ wã?

²¹ Tõnd pa basd tɩ dũniyã yam kẽ-d ye.  La d basdame tɩ Wẽnnaam vʋʋsem sõngã sõng-d tɩ d tõog n tall zʋg-sõma wala nonglem la yõk-m-menga. (Galat dãmba 5:22, 23) Zʋg-kãensã na n sõnga tõnd tɩ d yals kãn-kãe t’a Sʋɩtãan da tõog n sãam d tẽebã ye. A ratame tɩ tõnd yikd d sũur n maand sẽn yaa wẽng bala, la Wẽnnaam vʋʋsem sõngã sõngd-d lame tɩ d ‘sik d sũur la d bas sũ-yikri.’ (Yɩɩl Sõamyã 37:8) Tõe tɩ wakat ninga d bee bʋʋm n na n yik d sũuri. La a Poll sagenda tõnd woto: “Yãmb sũyã sã n yiki, bɩ y ra maan yel-wẽna ye, la y ra sak tɩ wĩndg lʋɩ tɩ yãmb sũyã ket n ka sig ye. La bɩ y ra kõ Sʋɩtãanã weer ye.”—Efɛɛz rãmba 4:26, 27.

²² Tõnd sũ-yikrã tõe n lebga yel-wẽnde, d sã n kell n tall sũ-kẽka, bala na n kɩtame tɩ tõnd kõ a Sʋɩtãan weer t’a wa ne zũnd-zãnd tigingã pʋgẽ, ka rẽ bɩ a tus-d tɩ d wa maan tʋʋm wẽnse. Rẽ n so tɩ d segd n welg mo-yõsã tao-tao wa Wẽnnaam sẽn datã. (Maankʋʋre 19:17, 18; Matɩe 5:23, 24; 18:15, 16) Woto wã yĩnga, bɩ d bas tɩ Wẽnnaam vʋʋsem sõngã sõng-d tɩ d tall yõk-m-menga. La baa d sã n be bʋʋm n na n yik d sũuri, bɩ d ra tol n bas tɩ rẽ wa kɩt tɩ d tall sũ-kẽka, wẽnem la kisgr ye.

23. Sogs-bʋs la d na n leok sõsg ning sẽn pʋgda pʋgẽ?

²³ Sõs-kãngã pʋgẽ, d yãa a Sʋɩtãan zʋg kẽer d sẽn pa segd n talle. La tõe tɩ neb kẽer sok b mens woto: Rẽ yĩnga d segd n zoea rabeem a Sʋɩtãan yĩng bɩ? Bõe yĩng t’a kɩtdẽ tɩ b namsd kiris-nebã? La wãn to la d na n maan t’a Sʋɩtãan da tõog-do?

[Tẽngr note]

Y na n leokame tɩ bõe?

• Bõe yĩng tɩ d pa segd n dõd ned abada?

• Wala 1 Zã 3:15 sẽn wilgã, bõe la d tõe n maan n da yɩ nin-kʋʋda?

• Bõe la d segd n tags sɩdã kɩɩsdb zugu, la bõe yĩnga?

• Bõe yĩng tɩ d pa segd n nong dũniyã?

[Zãmsgã sogsgã]

[Foto, seb-neng a 5]

D pa na n toll n bas t’a Sʋɩtãan sãam tõnd ne d kiris-nin-taasã zems-n-taarã ye

[Foto rãmba, seb-neng a 7]

Bõe yĩng t’a Zã sagl tõnd tɩ d ra nong dũniyã?