No Duna Diabel Oportunidad

“No duna Diabel ni un chens!”—EFESIONAN 4:27, BPK.

1. Dicon hopi hende a cuestiona e existencia di Diabel?

PA SIGLONAN, hopi hende a imagina nan mes cu Diabel ta un criatura cu cacho, cu pata manera di cabrito, bisti na cora y cu e ta uza un forki grandi pa tira malbadonan den candela di fierno. Bijbel no ta siña esei. Sinembargo, tal ideanan robes sin duda a pone miyones di hende cuestiona e existencia di Diabel of a pone nan pensa cu e palabra ta referi solamente na un concepto di maldad.

2. Menciona algun cos cu Bijbel ta bisa tocante Diabel.

² Bijbel ta duna prueba di testigo ocular y testimonio bon cla cu Diabel ta existi. Hesucristo a mir’e den e region celestial y a papia cu ne riba tera. (Job 1:6; Mateo 4:4-11) Aunke e Scritura no ta revela e nomber original di e criatura spiritual aki, e ta yam’e Diabel (cu ta nifica “Calumniado”) pasobra el a calumnia Dios. Tambe e ta ser yama Satanas (cu ta nifica “Resistido”), como cu e ta resisti Yehova. Bijbel ta referi na Satanas e Diabel como “e colebra di antiguedad”, aparentemente pasobra el a uza un colebra pa gaña Eva. (Revelacion 12:9; 1 Timoteo 2:14) E ta conoci tambe como “e malbado.”—Mateo 6:13. *

3. Ki pregunta nos lo bai considera?

³ Siendo cu Satanas ta e enemigo principal di e unico Dios berdadero, nos como sirbido di Yehova no kier parce Satanas den nada. Pues anto nos mester haci caso di e conseho aki di apostel Pablo: “No duna Diabel ni un chens!” (Efesionan 4:27, BPK) Pero kico spesificamente ta algun caracteristica di Satanas cu nos no mester imita?

No Imita e Gran Calumniado

4. Con “e malbado” a calumnia Dios?

⁴ “E malbado” ta merece di ser yama Diabel, pasobra e ta un calumniado. Calumnia ta un declaracion falso, malicioso y difamatorio tocante un persona. Dios a ordena Adam: “Di e palo di conocemento di bon y malo lo bo no come, pasobra e dia cu bo come di dje, lo bo muri sigur.” (Genesis 2:17) Eva a wordo informa di esaki, pero Diabel a bis’e mediante un colebra: “Siguramente boso lo no muri! Pasobra Dios sa cu e dia cu boso come di dje, boso wowo lo habri y boso lo ta manera Dios, conociendo bon y malo.” (Genesis 3:4, 5) Esei tawata ke se yama un calumnia malicioso contra Yehova Dios!

5. Dicon Diotrefes a merece di ser castiga pa calumnia?

⁵ E Israelitanan a haya e mandamento: “No cana calumnia meimei di bo pueblo.” (Levitico 19:16) Apostel Huan a declara tocante un  calumniado cu tawatin den su tempo: “Mi a skirbi algo na e iglesia; ma Diotrefes, kende ta gusta di ta e prome den nan, no ta acepta loke nos bisa. Pa e motibo aki, si mi bin, lo mi hala atencion riba su echonan cu e ta haci, acusando nos inhustamente cu palabranan malicioso.” (3 Huan 9, 10) Diotrefes a calumnia Huan y a merece di ser castiga pa esei. Ta cua cristian leal lo kier ta manera Diotrefes y imita Satanas, e gran calumniado?

6, 7. Dicon nos kier evita di calumnia cualkier persona?

⁶ Hopi biaha hende ta lansa declaracionnan calumnioso y acusacionnan falso contra sirbidonan di Yehova. “E sacerdotenan principal y escribanan tawata para einan y tawata acusa [Hesus] fuertemente.” (Lucas 23:10) Pablo a ser acusa falsamente door di Sumo Sacerdote Ananias y otronan. (Echonan 24:1-8) Y Bijbel ta papia di Satanas como “e acusado di nos rumannan, cu ta acusa nan di dia y anochi dilanti di nos Dios.” (Revelacion 12:10) E rumannan ei cu ta ser acusa falsamente ta e cristiannan ungi cu tin riba tera awe den e ultimo dianan.

⁷ Ningun cristian lo kier calumnia un hende ni haci acusacionnan falso. Sinembargo, esei lo por sosode si nos duna testimonio contra un persona sin cu nos tin tur informacion. Bou di e Lei di Moises, duna testimonio falso deliberadamente, lo por a resulta den morto di esun cu haci esei. (Exodo 20:16; Deuteronomio 19:15-19) Ademas, entre e cosnan cu Yehova ta odia nos ta haya “un testigo falso cu ta papia mentira.” (Proverbionan 6:16-19) Pesei definitivamente nos kier evita di imita Satanas, esun principal den lanta calumnia y acusacionnan falso.

Keda Leu for di e Manera di Actua di e Prome Matado

8. Den ki manera Diabel tawata “un matado for di principio”?

⁸ Diabel ta un matado. Hesus a bisa: “E tawata un matado for di principio.” (Huan 8:44) Satanas su prome accion di kita Adam cu Eva for di Dios, a hacie un matado. El a trece morto riba e prome pareha y riba nan desendientenan. (Romanonan 5:12) Tuma nota cu e accion aki por ser atribui solamente na un persona, no na simplemente un concepto di maldad.

9. Manera 1 Huan 3:15 a indica, con nos por bira un matado?

⁹ Un di e Dies Mandamentonan duna na Israel ta bisa: “No mata.” (Deuteronomio 5:17) Papiando cu hende cristian, apostel Pedro a skirbi: “No laga ningun di boso sufri como matado.” (1 Pedro 4:15) Pues como sirbidonan di Yehova nos lo no comete asesinato. Sinembargo, nos lo por carga culpa dilanti di Dios si nos ta odia un ruman cristian y ta desea pa e muri. Apostel Huan a skirbi: “Ken cu odia su ruman ta un matado [of, “asesino”, BPK]; y boso sa cu ningun matado no tin bida eterno ta permanece den dje.” (1 Huan 3:15) E Israelitanan a haya e mandamento: “No odia bo ruman den bo curason.” (Levitico 19:17) Laga nos ta lihe pa resolve cualkier problema cu surgi entre nos y un compañero cristian, ya asina e matado Satanas no ta destrui nos union cristian.—Lucas 17:3, 4.

Para Firme Contra e Gañado di Marca Mayor

10, 11. Kico nos tin cu haci pa nos por para firme contra e gañado di marca mayor, Satanas?

¹⁰ Diabel ta un gañado. Hesus a bisa: “Ki ora cu e papia un mentira, e ta papia for di su mes naturalesa, pasobra e ta un gañado y e tata di mentira.” (Huan 8:44) Satanas a gaña Eva, pero Hesus a bin na mundo pa duna testimonio di e berdad. (Huan 18:37) Si nos kier para firme contra Diabel como siguidonan di Cristo, nos no por uza mentira y engaño. Nos mester “papia berdad.” (Zacarias 8:16; Efesionan 4:25) Yehova e “Dios di berdad” ta bendiciona solamente su Testigonan cu ta papia berdad. E malbadonan no tin derecho di represent’e.—Salmo 31:5, BPK; 50:16; Isaias 43:10.

 ¹¹ Si nos ta aprecia e echo cu nos ta liber di mentiranan satanico debi na nos conocemento di berdad biblico, nos lo tene duro na cristianismo, cu ta “e caminda di berdad.” (2 Pedro 2:2; Huan 8:32) E siñansanan cristian den nan totalidad ta forma “e berdad di e evangelio.” (Galationan 2:5, 14) Nos salbacion ta depende di si nos “ta canando den berdad”, door di pega na e berdad y para firme contra “e tata di mentira.”—3 Huan 3, 4, 8.

Resisti e Apostata Principal

12, 13. Con nos mester trata apostatanan?

¹² E criatura spiritual cu a bira Diabel tawata un tempo den e berdad. Pero manera Hesus a bisa, e ‘no a para den e berdad, pasobra no tin berdad den dje.’ (Huan 8:44) Implacablemente e apostata principal aki a sigui e rumbo di resisti e “Dios di berdad.” Algun cristian di prome siglo a cai den “e trampa di Diabel.” Aparentemente nan a bira su victima door cu nan a ser engaña y a desvia for di e berdad. Pesei Pablo a urgi su colaborado Timoteo pa corigi nan cu suavidad di manera cu nan lo por a recupera spiritualmente y libra nan mes for di e trampa di Satanas. (2 Timoteo 2:23-26) Claro cu ta mucho mas mihor pa pega firmemente na e berdad y nunca ser engaña door di puntonan di bista apostata.

¹³ E prome pareha a bira apostata pasobra nan a scucha Diabel y no a rechasa su mentiranan. Pues, acaso nos tin cu scucha apostatanan, lesa nan literatura of wak nan website riba Internet? Si nos ta stima Dios y e berdad, nos lo no haci esei. Nos no mester permiti apostatanan den nos cas y ni sikiera cuminda nan, pasobra tal accion lo laga nos ‘participa den nan obranan malo.’ (2 Huan 9-12) Laga nos no cai nunca pa Diabel su trampanan door di bandona e “caminda di berdad” cristian pa sigui tras di maestronan falso cu ta trata na ‘infiltra siñansanan cu ta destrui bida di hende’ y ta purba ‘chica nos uzando argumentonan falso.’—2 Pedro 2:1-3, BPK.

14, 15. Ki spiertamento Pablo a duna ancianonan di Efeso y su colaborado Timoteo?

¹⁴ Pablo a bisa ancianonan cristian di Efeso: “Percura pa boso mes y pa henter e tou, meimei di cual spirito santo a pone boso como wardado, pa pastorea e iglesia di Dios . . . Mi sa cu despues cu mi bai, lobo brabo lo drenta meimei di boso, cu lo no tin misericordia di e tou; y for di meimei di boso mes lo lanta hombernan cu ta papia cosnan perverso, pa desvia e disipelnan y haci nan bai nan tras.” (Echonan 20:28-30) Cu tempo, e apostatanan ei a lanta y a “papia cosnan perverso.”

¹⁵ Rond di aña 65 di nos era, e apostel a urgi Timoteo pa maneha “e palabra di berdad na un manera corecto.” Anto Pablo a sigui bisa: “Ma evita papiamento mundano y vano, pasobra esaki lo hiba na mas impiedad, y nan palabranan lo plama manera gangrena. Entre nan Himeneo y Fileto, hombernan cu a desvia for di e berdad, bisando cu resureccion a tuma luga caba, y asina nan ta trastorna fe di algun hende.” Apostasia a cuminsa! Pero  Pablo a agrega: “Sinembargo, e fundeshi firme di Dios ta para.”—2 Timoteo 2:15-19.

16. Dicon nos a keda leal na Dios y na su Palabra apesar di e trikinan di e apostata principal?

¹⁶ Hopi biaha Satanas ta uza e apostatanan den un intento pa corumpi adoracion berdadero, pero sin exito. Rond di aña 1868, Charles Taze Russell a cuminsa un examinacion cuidadoso di e doctrinanan cu cristiandad tawatin y cu hende a acepta pa hopi tempo, y el a descubri mal interpretacionnan di e Scritura. Russell y algun otro buscado di e berdad a forma un grupo di estudio di Bijbel na Pittsburgh (Pennsylvania, Merca). Durante e casi 140 añanan cu a pasa for di e tempo ei, e sirbidonan di Yehova a crece den conocemento y amor pa Dios y pa su Palabra. E vigilancia spiritual di e esclabo fiel y prudente a yuda e cristiannan berdadero aki keda leal na Yehova y na su Palabra, apesar di e trikinan di e apostata principal.—Mateo 24:45.

Nunca Laga e Gobernado di e Mundo Tin Poder Riba Bo

17-19. Cua ta e mundo cu ta bou di control di Diabel, y dicon nos no mester stim’e?

¹⁷ Un otro manera cu Satanas ta purba coi nos den trampa ta door di tenta nos pa stima e mundo aki, esta, e sosiedad humano inhusto aleha for di Dios. Hesus a yama Diabel e “gobernado di e mundo” y a bisa: “E no tin poder riba mi.” (Huan 14:30, BPK) Ohala cu nunca Satanas haya poder riba nos! Claro cu nos ta realisa cu “henter mundo ta bou di control di e malbado [ei].” (1 Huan 5:19) Ta pesei Diabel por a ofrece Hesus “tur e reinonan di mundo” a cambio di un acto di adoracion. Pero e Yiu di Dios a rechasa e acto di apostasia ei redondamente. (Mateo 4:8-10) E mundo cu Satanas ta goberna ta odia e siguidonan di Cristo. (Huan 15:18-21) Pesei no ta straño cu apostel Huan a spierta nos pa no stima mundo!

¹⁸ Huan a skirbi: “No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje. Pasobra tur loke cu tin den mundo, e deseo di carni y e deseo di wowo y e orguyo di bida, no  ta bin di e Tata, sino di e mundo. Y e mundo ta pasa bai y su deseonan tambe, ma esun cu haci e boluntad di Dios ta permanece pa semper.” (1 Huan 2:15-17) Nos no mester stima mundo, pasobra su estilo di bida ta loke e carni pecaminoso ta gusta pero e ta completamente contrario na e normanan di Yehova Dios.

¹⁹ Pero kico si den nos curason nos tin amor pa mundo? E ora ei laga nos pidi Dios su yudansa pa medio di oracion pa vence e amor aki y e deseonan carnal conecta cu ne. (Galationan 5:16-21) Un cos cu sigur lo pone nos haci esfuerso pa mantene nos mes “liber di mancha di mundo” ta si nos corda cu “forsanan spiritual di maldad” ta e ‘gobernantenan mundial’ invisibel di e sosiedad humano inhusto aki.—Santiago 1:27; Efesionan 6:11, 12; 2 Corintionan 4:4.

20. Dicon por ser bisa cu nos ‘no ta parti di mundo’?

²⁰ Hesus a bisa relaciona cu su disipelnan: ‘Nan no ta parti di mundo, mescos cu ami no ta parti di mundo.’ (Huan 17:16) Cristiannan ungi y nan compañeronan dedica ta haci esfuerso pa keda limpi den sentido moral y spiritual, separa for di e mundo aki. (Huan 15:19; 17:14; Santiago 4:4) E mundo inhusto aki ta odia nos pasobra nos ta keda separa for di dje y nos ta ‘predicadonan di husticia.’ (2 Pedro 2:5) Ta berdad cu nos ta biba meimei di e sosiedad humano cu ta consisti di fornicado, adultero, estafado, adorado di diosnan falso, ladron, gañado y burache. (1 Corintionan 5:9-11; 6:9-11; Revelacion 21:8) Pero nos no ta absorba “e spirito di mundo”, pasobra nos no ta ser motiva pa e forsa pecaminoso aki.—1 Corintionan 2:12.

No Duna Diabel Oportunidad

21, 22. Con bo por aplica e conseho di Pablo cu ta para skirbi na Efesionan 4:26 y 27?

²¹ En bes di ser motiva pa “e spirito di mundo”, nos ta ser guia pa e spirito di Dios, y e spirito ei ta produci den nos cualidadnan manera amor y dominio propio. (Galationan 5:22, 23) E cualidadnan aki ta yuda nos resisti Diabel su atakenan contra nos fe. E kier pa nos ‘cunsumi y haci maldad’, pero e spirito di Dios ta yuda nos “stop di rabia y laga furia para.” (Salmo 37:8) Ta berdad cu tin biaha nos tin un motibo aceptabel pa rabia, pero Pablo ta conseha nos: “Rabia, ma no haci pica; no laga solo baha riba boso rabia, y no duna Diabel oportunidad.”—Efesionan 4:26, 27.

²² Nos rabia por resulta den pica si nos keda rabia. Si nos keda den e estado mental ei nos lo duna Diabel chens pa fomenta desacuerdo den e congregacion of instiga nos pa participa den actonan di maldad. Pues, nos mester resolve desacuerdonan cu otro rapidamente y den un manera cu ta aceptabel pa Dios. (Levitico 19:17, 18; Mateo 5:23, 24; 18:15, 16) Pesei, nos mester laga Dios su spirito guia nos, eherciendo dominio propio y nunca laga ni sikiera rabia hustifica para bira amargura, malicia y odio.

23. Ki preguntanan nos lo considera den e siguiente articulo?

²³ Nos a trata cierto caracteristicanan di Diabel cu nos no mester imita. Pero algun lector kisas ta puntra nan mes: Nos mester tin miedo di Satanas? Dicon e ta fomenta persecucion di e cristiannan? Y con nos por evita cu Diabel ta tuma bentaha riba nos?

[Nota]

Kico Ta Bo Contesta?

• Dicon nunca nos no mester calumnia un persona?

• Di acuerdo cu 1 Huan 3:15, con nos por evita di ta un matado?

• Con nos mester mira apostatanan, y dicon?

• Dicon nos no mester stima mundo?

[Preguntanan di Estudio]

[Plachi na pagina 23]

Nunca nos lo duna Diabel oportunidad pa destrui nos union cristian

[Plachi na pagina 24]

Pakico Huan a urgi nos pa no stima mundo?