No gi didibri okasi
No gi didibri okasi
„No gi Didibri okasi.”—EFEISESMA 4:27.
1. Fu san ede furu sma no e bribi taki Didibri de trutru?
HONDROHONDRO yari kaba, furu sma e denki taki Didibri na wan sma di abi futu leki di fu wan bokoboko, di e weri redi krosi, èn di abi wan bigi forku na ini en anu di a e gebroiki fu trowe ogri libisma na ini wan faya hel. Bijbel no e horibaka gi a denki dati. Ma a no de fu taki dati den sortu fowtu denki disi meki taki furu sma bigin tweifri efu Didibri de trutru, noso den bigin denki taki Didibri na soso na ogri di de na ini sma.
2. San na wan tu sani di Bijbel e fruteri wi fu Didibri?
2 Bijbel e taki fu sma di si Didibri èn a e gi krin buweisi taki a de trutru. Yesus Krestes si en na ini hemel èn a ben taki nanga en di a ben de na grontapu (Yob 1:6; Mateyus 4:4-11). Den Buku fu Bijbel no e taki fa a yeye disi ben nen fosi, ma a e kari en Didibri (san wani taki „Ogri-ati Leiman”), fu di a fruteri ogri-ati lei fu Gado. Bijbel e kari en sosrefi Satan (san wani taki „Gensman”), fu di a e gens Yehovah. Bijbel e taki dati Satan Didibri na „a fosi sneki” fu di soleki fa a sori, a ben gebroiki wan sneki fu kori Eva (Openbaring 12:9; 1 Timoteyus 2:14). Sma sabi en tu leki „na ogriwan”.—Mateyus 6:13. *
3. Sortu aksi wi sa go luku now?
3 Na nowan fasi, wi leki futuboi fu Yehovah wani de leki Satan, a moro bigi feanti fu a wan-enkri tru Gado. Fu dati ede, wi musu gi yesi na a rai fu na apostel Paulus, di ben taki: „No gi Didibri okasi” (Efeisesma 4:27). We, san na wan tu fasi fu Satan di wi no musu teki abra?
No teki na eksempre fu a bigi ogri-ati leiman
4. Fa „na ogriwan” fruteri ogri-ati lei fu Gado?
4 A nen Didibri fiti „na ogriwan” disi, fu di a de wan ogri-ati leiman. Ogri-ati lei, na lei di sma e fruteri fu gi wan trawan porinen, èn fu broko den saka. Gado ben gi Adam a komando: „Fu a bon fu sabi bun nanga ogri, fu dati yu no musu nyan, bika na a dei di yu sa nyan fu dati, yu o dede fu tru” (Genesis 2:17). Eva ben kon sabi a komando disi, ma Didibri ben taigi en nanga yepi fu wan sneki: „Un no sa dede kwetikweti. Bika Gado sabi taki na a dei di unu e nyan fu en, un ai sa kon opo trutru èn dan unu sa de leki Gado, fu di unu sa sabi bun nanga ogri” (Genesis 3:4, 5). Dati ben de trutru wan ogri-ati lei di Satan fruteri fu Yehovah Gado!
5. Fu san ede Diotrefes ben musu gi frantwortu fu den ogri-ati lei di a ben e fruteri?
5 Den Israelsma ben kisi a komando disi: „Yu no musu waka lontu fu panya ogri-ati lei na mindri yu pipel” (Lefitikus 19:16). Na apostel Yohanes ben taki fu wan ogri-ati leiman na ini a ten fu en: „Mi ben skrifi wan tu sani gi a gemeente, ma Diotrefes di lobi fu teki a fosi presi na den mindri, no e teki noti fu wi nanga lespeki. Dati meki te mi kon, mi sa taki fu den sani di a e tan du, namku taki a e waka e taki wan lo ogri fu wi” (3 Yohanes 9, 10). Diotrefes ben e taki ogri-ati lei fu Yohanes, èn fu dati ede a ben fiti taki a gi frantwortu fu dati. Nowan loyaal Kresten ben o wani de leki Diotrefes èn waka baka na eksempre fu Satan, a bigi ogri-ati leiman!
6, 7. Fu san ede wi wani luku bun fu no fruteri ogri-ati lei fu trawan?
6 Furu tron, sma e fruteri ogri-ati lei nanga leitori fu den futuboi fu Yehovah. „Ibri leisi baka den edeman fu den priester nanga den leriman fu Wet ben e opo tanapu èn nanga atibron den ben taki wan lo ogri fu Yesus” (Lukas 23:10). A granpriester Ananias èn trawan sosrefi, ben e taki ogri fu Paulus (Tori fu den Apostel 24:1-8). Èn Bijbel e taki dati Satan na „a sma di e taki ogri fu wi brada . . . , èn di e taki lei fu den na fesi wi Gado dei nanga neti” (Openbaring 12:10). Den brada fu suma Satan e taki ogri, na den salfu Kresten di de na grontapu na ini a ten disi.
7 Nowan Kresten ben o wani fruteri ogri-ati lei fu wan trawan, noso taki ogri fu trawan. Ma toku wi ben kan gi wan falsi kotoigi fu wan sma, efu wi no sabi fa wan tori waka trutru. A Wet fu Moses ben taki dati a sma di ben e gi wan falsi kotoigi fu wan trawan fu espresi, ben musu kisi dedestrafu (Exodus 20:16; Deuteronomium 19:15-19). Boiti dati, wan fu den sani di Yehovah e tegu gi, na „wan falsi kotoigi di e taki leitori” (Odo 6:16-19). Fu dati ede, wi no wani de leki a moro bigi leiman di e taki ogri fu trawan.
No teki den fasi fu a fosi kiriman
8. Fa Didibri ben de ’wan kiriman di a bigin waka en eigi pasi’?
8 Didibri na wan kiriman. Yesus ben taki: „Di a bigin waka en eigi pasi, a ben de wan kiriman” (Yohanes 8:44). Sensi na a bigin di Satan kori Adam nanga Eva fu drai baka gi Gado, a ben de wan kiriman. A ben tyari dede kon gi den fosi tu libisma èn gi den bakapikin fu den (Romesma 5:12). Memre taki, fu kan du den sani disi, Didibri musu de wan trutru sma. A no kan de na ogri na ini wan sma nomo.
9. Fa wi kan tron kiriman, soleki fa 1 Yohanes 3:15 e sori?
9 Wan fu den Tin Komando di den Israelsma ben kisi ben taki: „Yu no musu kiri sma” (Deuteronomium 5:17). Na apostel Petrus ben taigi Kresten: „No meki nowan fu unu pina fu di a de wan kiriman” (1 Petrus 4:15). Sobun, wi leki futuboi fu Yehovah no sa kiri sma. Ma toku, efu wi ben o abi bita-ati gi wan tra Kresten èn efu wi ben o winsi taki a dede, dan na ini Gado ai wi sondu kaba. Na apostel Yohanes ben skrifi: „Ibri sma di e teige en brada, na wan kiriman. Unu sabi taki nowan kiriman abi têgo libi na ini en” (1 Yohanes 3:15). Den Israelsma ben kisi a komando disi: „Unu no musu abi bita-ati gi un brada na ini un ati” (Lefitikus 19:17). Efu wi abi wan problema nanga wan tra bribiman, dan meki wi lusu a problema esi-esi, so taki a kiriman Satan no pori a wánfasi di wi abi leki Kresten.—Lukas 17:3, 4.
Kakafutu gi a moro bigi leiman
10, 11. San wi musu du efu wi wani kakafutu gi a moro bigi leiman, Satan?
10 Didibri na wan leiman. Yesus ben taki: „Te a e taki lei, dan a e taki soleki fa ensrefi de, fu di a de wan leiman èn a tata fu ala lei” (Yohanes 8:44). Satan ben lei gi Eva, ma Yesus ben kon na grontapu fu kotoigi fu a waarheid (Yohanes 18:37). Efu wi leki bakaman fu Krestes wani kakafutu gi Didibri, dan wi no kan lei gi trawan, èn wi no kan kori trawan. Wi musu „taki san tru” (Sakaria 8:16; Efeisesma 4:25). „Yehovah, a Gado fu waarheid” e blesi soso den Kotoigi fu en di e taki waarheid. Den ogriwan no abi a reti fu de kotoigi fu en.—Psalm 31:5; 50:16; Yesaya 43:10.
11 Efu wi e warderi en trutru taki wi de fri fu den lei fu Satan, dan a no de fu taki dati wi sa hori steifi na a tru Kresten bribi, fu di dati na „a waarheid” (2 Petrus 2:2; Yohanes 8:32). Ala den Kresten leri abi fu du nanga „a waarheid fu a bun nyunsu” (Galasiasma 2:5, 14). Wi sa kisi frulusu soso te wi e „waka na ini a waarheid”. Disi wani taki dati wi musu hori wisrefi na a waarheid èn taki wi musu kakafutu gi „a tata fu ala lei”.—3 Yohanes 3, 4, 8.
Kakafutu gi a fosi sma di fadon komoto na bribi
12, 13. Fa wi musu handri nanga sma di fadon komoto na bribi?
12 Na engel di kon tron Didibri bakaten, ben de na ini a waarheid fosi. Ma „a no ben tanapu kánkan na ini a waarheid”, na so Yesus ben taki, „fu di a waarheid no de na ini en” (Yohanes 8:44). A fosi sma disi di fadon komoto na bribi, bigin feti teige „a Gado fu waarheid”, èn a no tapu fu du dati. Wan tu Kresten na ini a fosi yarihondro, ben fadon na ini „a trapu di Didibri ben seti gi den”, fu di a ben kori den fu gowe libi a waarheid. Sobun, Paulus ben gi Timoteyus di ben wroko makandra nanga en, deki-ati fu gi den Kresten rai na wan safri-ati fasi, so taki den ben kan kon tranga baka na yeye fasi èn kon fri fu a trapu fu Satan (2 Timoteyus 2:23-26). A no de fu taki, dati a moro bun fu hori steifi na a waarheid, èn fu no meki sma di fadon komoto na bribi, kori yu nanga den falsi leri fu den.
13 Den fosi tu libisma ben fadon komoto na bribi fu di den ben arki Didibri, èn fu di den no ben kakafutu gi den lei fu en. We dan, yu denki taki a de wan koni sani fu arki sma di fadon komoto na bribi, fu leisi den buku fu den, noso fu go luku sani fu den na tapu Internet? Efu wi lobi Gado èn a waarheid sosrefi, dan wi no sa du dati. Wi no musu meki sma di fadon komoto na bribi, kon na ini wi oso, èn wi no musu gi den odi srefi. Bika te wi ben o du dati, dan wi ben o tron sma di ’e horibaka gi den ogri sani di den e du’ (2 Yohanes 9-11). Meki a de so, taki noiti Didibri e kori wi fu gowe libi „a waarheid”, èn fu waka baka falsi leriman di e suku fu „kon nanga falsi leri di e tyari pori kon” èn di e pruberi fu ’kori wi nanga falsi tori fu man kisi wini gi densrefi’.—2 Petrus 2:1-3.
14, 15. Sortu warskow Paulus ben gi den owruman na ini Efeise èn na Timoteyus di ben e wroko makandra nanga en?
14 Paulus ben taigi den Kresten owruman na ini Efeise: „Un luku unsrefi bun, èn sosrefi ala den skapu, bika santa yeye poti unu leki opziener fu luku a gemeente fu Gado di a bai nanga a brudu fu en eigi Manpikin. Mi sabi taki te mi gowe, dan ogri busidagu sa kon na un mindri èn den no sa handri na wan switi fasi nanga den skapu; sma sa opo na un mindri, èn den sa taki kruktu sani fu hari den disipel kon na den baka” (Tori fu den Apostel 20:28-30). Bakaten, den ben fadon komoto na bribi trutru, èn den ben e „taki kruktu sani”.
15 Na ini a pisi ten fu 65 G.T., na apostel Paulus ben gi Timoteyus a rai fu „gebroiki a wortu fu waarheid na wan reti fasi”. A ben skrifi moro fara: „Ma yu musu wai pasi gi soso sani di sma e taki di e pori santa sani; bika den sma dati o kon ogri moro nanga moro, èn den sani di den e taki sa panya leki wan takru soro di e nyan a meti fu a skin. Himeneyus nanga Fileitus na tu fu den sma disi. Den srefi man disi gowe libi a waarheid, fu di den e taki dati na opobaka pasa kaba; den e meki sosrefi taki son sma lasi bribi.” Na a ten dati, sma bigin fadon komoto na bribi! Paulus ben taki tu: „Toku a steifi fondamenti di Gado poti no e seki.”—2 Timoteyus 2:15-19.
16. Fu san ede wi ben man tan loyaal na Gado èn na a Wortu fu en, aladi Satan, a fosi sma di fadon komoto na bribi, e suku fu kori wi?
16 Furu tron, Satan gebroiki sma di fadon komoto na bribi fu suku fu pori a tru anbegi, ma den no ben abi bun bakapisi. Na ini a pisi ten fu 1868, Charles Taze Russell bigin ondrosuku den leri fu den kerki fu Krestenhèit di sma ben e bribi langa ten kaba, èn a ben kon si difrenti Bijbel tori di sma ben e fruklari na wan fowtu fasi. Russell nanga wan tu tra sma di ben e suku fu kon sabi a waarheid, ben seti wan grupu fu studeri Bijbel na ini Pittsburgh, Pennsylvania, na ini Amerkankondre. Sowan 140 yari sensi a ten dati, futuboi fu Yehovah kon kisi moro sabi èn moro lobi gi Gado, èn gi a Wortu fu en. Aladi Satan, a fosi sma di fadon komoto na bribi, e suku fu kori wi, toku a faya di a getrow èn koni srafu abi gi afersi fu Gado, yepi den tru Kresten disi fu tan loyaal na Yehovah èn na a Wortu fu en.—Mateyus 24:45.
Noiti no meki a tiriman fu grontapu abi krakti na yu tapu
17-19. San na a grontapu di de na ini a makti fu Didibri, èn fu san ede wi no musu lobi en?
17 Ete wan fasi fa Satan e suku fu abi krakti na wi tapu, na fu kori wi fu lobi grontapu, sobun, fu lobi na onregtfardiki libisma famiri di no sabi Gado. Yesus ben kari Didibri „a tiriman fu grontapu”, èn a ben taki: „A no abi makti na mi tapu” (Yohanes 14:30). Noiti wi musu gi pasi taki Satan abi krakti na wi tapu! A no de fu taki dati wi sabi dati „heri grontapu de na ini a makti fu na ogriwan” disi (1 Yohanes 5:19). Dati meki Didibri ben kan pristeri Yesus „ala den kownukondre fu grontapu”, efu Yesus ben o du wan sani di ben o sori taki a no ben e gi yesi na Gado. A no de fu taki dati a Manpikin fu Gado ben weigri krinkrin fu du dati (Mateyus 4:8-10). A grontapu di de na ini a makti fu Satan, abi bita-ati gi den bakaman fu Krestes (Yohanes 15:18-21). Dati meki a no e fruwondru taki na apostel Yohanes ben warskow wi fu no lobi grontapu!
18 Yohanes ben skrifi: „No lobi grontapu nanga den sani fu grontapu. Efu wan sma lobi grontapu, dan a lobi fu a Tata no de na ini en. Bika ala den sani di de fu grontapu, namku a lostu fu a skin, a lostu fu den ai, èn a prodo di wan sma e prodo nanga den gudu di a abi, no e kon fu a Tata, ma den sani disi e kon fu grontapu. Boiti dati, grontapu e pasa gowe nanga den lostu fu en, ma a sma di e du a wani fu Gado sa tan fu têgo” (1 Yohanes 2:15-17). Wi no musu lobi grontapu, fu di sma na ini grontapu e du san a sondu skin wani, èn a no e kruderi nanga den markitiki fu Yehovah Gado kwetikweti.
19 San wi musu du efu na ini wi ati, wi lobi a grontapu disi? Meki wi begi Gado fu yepi wi so taki wi kan puru a lobi disi, èn den lostu fu a skin (Galasiasma 5:16-21). Fu tru, efu wi e hori na prakseri taki „ogri yeye” na den „tiriman” fu na ogri libisma libimakandra, dan wi sa meki tranga muiti fu ’no meki grontapu flaka wi’.—Yakobus 1:27; Efeisesma 6:11, 12; 2 Korentesma 4:4.
20. Fu san ede wi kan taki dati wi „no de wan pisi fu grontapu”?
20 Disi na san Yesus ben taki fu den disipel fu en: „Den no de wan pisi fu grontapu, neleki fa mi no de wan pisi fu grontapu” (Yohanes 17:16). Salfu Kresten èn den wan di e horibaka gi den fayafaya, e pruberi fu tyari densrefi na wan krin fasi, èn den wani de krin na yeye fasi. Den no wani de wan pisi fu a grontapu disi (Yohanes 15:19; 17:14; Yakobus 4:4). Na ogri grontapu disi e tegu gi wi fu di wi no de wan pisi fu en, èn fu di wi na „preikiman fu regtfardikifasi” (2 Petrus 2:5). A tru taki wi e libi na mindri sma di e du hurudu, sutadu, di e bedrigi trawan, di e anbegi kruktugado, di e fufuru, di e lei, èn di e dringi sopi te fu drungu (1 Korentesma 5:9-11; 6:9-11; Openbaring 21:8). Ma wi no e teki „a yeye fu grontapu” abra, bika wi no e meki sondu firi tiri a fasi fa wi e handri.—1 Korentesma 2:12.
No gi Didibri nowan okasi
21, 22. Fa yu kan gebroiki a rai di Paulus e gi na ini Efeisesma 4:26, 27?
21 Na presi fu meki „a yeye fu grontapu” tiri wi, wi e meki a yeye fu Gado tiri wi. A yeye disi e meki wi kisi fasi soleki lobi, èn a e gi wi a krakti fu dwengi wisrefi (Galasiasma 5:22, 23). Den fasi disi e yepi wi fu kakafutu gi Didibri te a wani pori wi bribi. A wani taki wi „kon kisi na angri fu du soso ogri”, ma a yeye fu Gado e yepi wi fu ’libi atibron na wan sei èn fu no kisi bigi atibron’ (Psalm 37:8). A tru taki son leisi wi abi leti fu atibron, ma Paulus e gi wi a rai: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi.”—Efeisesma 4:26, 27.
22 Efu wi e tan nanga atibron, dan wi kan go du sondu. Te wi e tan nanga atibron, dan wi e gi Didibri na okasi fu meki trobi kon na ini a gemeente, noso a kan kori wi fu du ogri sani. Dati meki te wi abi trobi nanga trawan, wi musu de esi fu lusu a trobi na wan fasi di Gado feni bun (Lefitikus 19:17, 18; Mateyus 5:23, 24; 18:15, 16). Sobun, meki a de so taki wi e meki a yeye fu Gado tiri wi. Meki a de so fu dati ede taki wi e meki a yeye fu Gado tiri wi. Meki wi dwengi wisrefi, so taki awinsi wi abi leti fu atibron, taki toku wi no gi pasi taki a tron bita-ati, noso taki wi bigin du ogri sani. Noiti wi musu gi pasi taki wi e bigin tegu gi trawan.
23. Sortu aksi wi sa go luku na ini na artikel di e kon?
23 Na ini na artikel disi, wi taki fu wan tu fasi fu Satan di wi no musu teki abra. Ma son leisiman kan aksi densrefi: Wi musu frede Satan? Fu san ede a e meki sma frufolgu Kresten? Èn fa wi kan sorgu taki Didibri no wini wi?
[Futuwortu]
^ paragraaf 2 Luku den artikel „Didibri de trutru?”, na ini A Waktitoren fu 15 november 2005.
San na yu piki?
• Fu san ede wi no musu fruteri ogri-ati lei fu trawan noiti?
• Fa wi kan sorgu taki wi no tron kiriman, soleki fa 1 Yohanes 3:15 e taki?
• Fa wi musu denki fu sma di fadon komoto na bribi, èn fu san ede?
• Fu san ede wi no musu lobi grontapu?
[Aksi fu a tori disi]
[Prenki na tapu bladzijde 23]
Noiti wi sa gi pasi taki Didibri pori a wánfasi di wi abi leki Kresten
[Prenki na tapu bladzijde 24]
Fu san ede Yohanes gi wi a rai fu no lobi grontapu?