!Blokem Setan, Nao Hem Bambae i Ronwe!

“Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.”​—JEMES 4:7.

1, 2. (a) ?Ol tok long Aesea japta 14 i soemaot wanem fasin blong Setan? (b) ?Wanem ol kwestin we bambae yumi tokbaot?

 SETAN i flas bitim mak, i winim olgeta narafala rabis man. God i pulum profet Aesea blong raetem sam tok we i soemaot flas fasin blong Setan. Bitim wan handred yia bifo we Babilonia i kam kantri we i rulum wol, Aesea i talemaot tok we ol man blong Jeova oli talem long “king blong kantri ya Babilonia,” se: “Yu yu stap mekem tingting blong yu i strong blong klaem i go antap blong go long heven. Yu stap tingbaot blong stanemap bigfala jea blong yu antap long ol sta ya we oli antap olgeta [hemia ol king long laen blong Deved]. Oltaem, tingting blong yu i strong, se yu wantem go sidaon long bigfala jea blong yu . . . yu wantem kam sem mak wetem God ya we i hae we i hae.” (Aesea 14:​3, 4, 12-15; Namba 24:17) ‘King blong Babilonia’ i flas olsem Setan, “rabis god blong wol ya.” (2 Korin 4:4) Mo flas fasin blong Setan bambae i lidim hem i go long ded,  olsem we kantri blong Babilonia i finis long fasin we i mekem bigfala sem long hem.

² Be Setan i stap raonabaot long yumi yet. Taswe, ating yu yu stap askem ol kwestin olsemia: ?Yumi mas fraet long Setan? ?From wanem hem i pusum samfala blong mekem nogud long ol Kristin? ?Olsem wanem yumi save blokem Setan blong hem i no winim yumi?

?Yumi Mas Fraet Long Setan?

3, 4. ?From wanem ol Kristin we tabu spirit i makemaot olgeta mo ol fren blong olgeta oli no fraet long Setan?

³ Ol Kristin we tabu spirit i makemaot olgeta, oli kasem paoa taem oli ridim ol tok ya blong Jisas Kraes: “I nogud yufala i stap fraet long ol samting we bambae i kam long yufala. Setan bambae i putum sam long grup blong yufala i go long kalabus blong traem yufala. Nao bambae yufala i gat trabol ten dei. Be yufala i mas stanap strong gogo yufala i ded, nao bambae mi givim niufala laef long yufala, blong ona long yufala, olsem praes we oli givim long man we i win long resis.” (Revelesen 2:10) Ol tabu Kristin ya mo ol fren blong olgeta we oli gat hop blong laef long wol ya, oli no fraet long Setan. Hemia i no min se oli bon wetem wan spesel fasin we oli no save fraet long wan samting, nogat. Olgeta ya oli no fraet long Setan from we oli onagud mo fraet long God, mo oli ‘faenem sefples long hem olsem we ol pikinini blong faol oli faenem sefples aninit long wing blong mama blong olgeta.’​—Ol Sam 34:9; 36:7.

⁴ Ol faswan disaepol blong Jisas Kraes oli no gat fasin blong fraet. Taswe oli holem strong bilif go kasem ded, nating se ol man oli mekem nogud long olgeta. Oli no fraet long samting we Setan i save mekem long olgeta, from we oli save se Jeova i no save lego ol man we oli stap tru long hem. Tede tu, ol tabu Kristin mo ol fren blong olgeta we oli yusum laef blong olgeta long wok blong Jeova, oli gat strong tingting se bambae oli no save lego God, nating se ol man oli agensem olgeta mo mekem nogud long olgeta. Be aposol Pol i soemaot se Setan i gat paoa blong kilim man i ded. ?Olsem wanem? ?Yumi mas fraet long samting ya?

5. ?Hibrus 2:​14, 15 i givhan long yumi blong kasem save long wanem samting?

⁵ Pol i talem se Jisas i kamdaon long wol, i kam man “blong bambae i save ded, nao ded blong hem bambae i save brekem paoa blong Setan, we i holem paoa blong ded. From we ol man oli fraet long ded, Setan i stap holemtaet olgeta oltaem long laef blong olgeta, olsem we oli slef nomo. Be Jisas i ded blong i tekemaot ol man ya oli no moa slef, oli fri.” (Hibrus 2:​14, 15) Setan, we i “holem paoa blong ded,” i kam bos long Judas Iskariot, mo biaen, hem i pulum sam lida blong ol man Isrel wetem sam man Rom blong oli kilim Jisas i ded. (Luk 22:3; Jon 13:​26, 27) Be taem Jisas i ded olsem wan sakrefaes, hem i mekem se ol sinman oli save kam fri long paoa blong Setan, mo tu, hem i givim janis long yumi blong kasem laef we i no save finis.​—Jon 3:16.

6, 7. ?Olsem wanem Setan i holem paoa blong ded?

⁶ ?Olsem wanem Setan i holem paoa blong ded? Stat long taem we Setan i kam nogud, ol giaman tok blong hem mo ol samting we hem i mekem blong lidim ol man, i givim ded nomo long olgeta. Yumi kasem ded from we Adam i mekem sin, nao hem i pasem sin mo ded i go long olgeta pikinini blong hem. (Rom 5:12) Ol man blong Setan long wol ya, olgeta tu oli mekem i nogud long ol man blong Jeova. Oli kilim samfala i ded, olsem oli bin mekem long Jisas Kraes.

⁷ Be yumi no mas ting se Setan i save kilim i ded eniman we hem i wantem kilim, nogat. God i stap lukaotgud long ol man blong Hem, mo neva bambae hem i letem Setan i kilimaot olgeta man blong mekem trufala wosip long wol. (Rom 14:8) I tru, Jeova i save letem ol man oli mekem nogud long ol man blong hem, mo i save letem sam long olgeta oli ded tu from ol trabol we Setan i mekem long olgeta. Be Baebol i talemaot wan nambawan hop blong ol man ya we God i raetem nem blong olgeta long “buk  blong rimemba,” se oli save laef bakegen long ded. !Setan i no naf blong blokem laef bakegen!​—Malakae 3:​16, NW; Jon 5:​28, 29; Ol Wok 24:15.

?From Wanem Setan i Mekem Nogud Long Yumi?

8. ?From wanem Setan i mekem nogud long ol man blong God?

⁸ I gat wan stamba risen from wanem Setan i mekem nogud long ol man we oli holemstrong long God. Hem i wantem brekem bilif blong yumi. Setan i wantem spolem gudfala fasin fren we yumi gat wetem Papa blong yumi long heven. Yumi no sapraes long samting ya. Jeova i talem finis long garen blong Iden se “woman” mo “snek” bambae tufala i no laeklaekem tufala, mo ‘ol pikinini blong woman’ mo ‘ol pikinini blong snek’ bambae oli stap badfren long olgeta. (Jenesis 3:​14, 15) Baebol i talem se Setan nao i “snek ya blong bifo,” mo se hem i kros tumas from we hem i gat smol taem nomo blong hem i stap. (Revelesen 12:​9, 12) ‘Ol pikinini blong woman’ mo ‘ol pikinini blong snek’ oli gohed yet blong no laeklaekem olgeta, taswe ol man blong Jeova oli save se oli mas kasem trabol. (2 Timoti 3:12) ?Yu yu save bigfala risen from wanem Setan i stap agensem yumi?

9, 10. ?Setan i stanemap wanem bigfala kwestin, mo olsem wanem fasin blong ol man i joen wetem kwestin ya?

⁹ Setan i stanemap wan bigfala kwestin long saed blong rul blong heven mo wol. Mo hem i stanemap wan narafala kwestin bakegen we i joen wetem rul ya, se ?bambae i gat man we i save stap tru olwe long God ya we i wokem olgeta man, no nogat? Setan i mekem trabol long gudfala man ya Job tu. ?From wanem? Hem i wantem se Job i lego Jeova. Woman blong Job mo trifala fren blong Job we ‘oli mekem hem i harem nogud nomo,’ oli givhan long Setan blong spolem Job. Buk blong Job i talem ol tok we Setan i sakem long God, se i no gat wan man we bambae i stap tru long God sipos God i letem Setan i traem olgeta. Be Job i pruvum se Setan i wan man blong giaman. Hem i holemstrong long God. (Job 1:8–2:9; 16:2; 27:5; 31:6) Setan i stap mekem i nogud long ol Witnes blong Jeova tede tu from we hem i wantem pulum olgeta blong oli lego Jeova. Sipos hem i save mekem olsem, tok we hem i sakem long Jeova bambae i tru.

¹⁰ Save ya se Setan i stap mekem nogud long yumi from we hem i wantem tumas we yumi lego God, i save givhan long yumi blong stanap strong mo no fraet. (Dutronome 31:6) God blong yumi i King blong heven mo wol, mo hem bambae i givhan long yumi blong holemstrong long hem. I gud yumi traehad oltaem blong holemstrong long Jeova mo mekem hem i glad. Olsem nao, bambae yumi givhan long hem blong ansabak long Setan, bigfala Man blong jikim God.​—Ol Proveb 27:11.

“Yu Sevem Mifala Long Man Ya We i Rabis”

11. ?Yumi minim wanem taem yumi prea long God se, “Plis yu no traem mifala”?

¹¹ I no isi blong holemstrong long God. Blong mekem olsem, yumi mas prea oltaem wetem fulhat blong yumi. Ol tok long Lodsprea oli givhan bigwan long yumi. Long wan haf blong prea ya, Jisas i talem se: “Plis yu no traem mifala, mo yu sevem mifala long man ya we i rabis.” (Matiu 6:​13, NW ) Jeova i no save  pulum yumi blong mekem sin. (Jemes 1:13) Long sam ples, Baebol i talem se Jeova i mekem wan samting, no i wokem rod blong wan samting i kamaot. Be mining blong tok ya se Jeova i letem samting ya i hapen nomo. (Rut 1:​20, 21) Taswe, taem yumi prea olsem Jisas i talem, yumi stap askem long Jeova blong hem i no lego yumi blong yumi save foldaon long ol traem blong Setan. Mo bambae hem i no lego yumi, from we Baebol i promes se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.”​—1 Korin 10:13.

12. ?From wanem yumi mas prea se, “Yu sevem mifala long man ya we i rabis”?

¹² Long Lodsprea Jisas i tokbaot ol traem, nao biaen hem i talem se: “Yu sevem mifala long man ya we i rabis.” Sam Baebol oli talem se: “Yu sevem mifala long ol samting nogud” (King James Version; Revised Standard Version) no “Yu protektem mifala long ol nogud samting.” (Contemporary English Version) Long Baebol, tok ya ‘sevem’ i stret moa long ol man, mo Gospel blong Matiu i tokbaot Setan olsem wan man, “man ya blong traem man.” (Matiu 4:​3, 11) Taswe i impoten blong prea long God blong i sevem yumi long “man ya we i rabis,” Setan, we hem nao i stap traehad blong lidim yumi blong mekem sin agens long God. (1 Tesalonaeka 3:5) Taem yumi prea se, “Yu sevem mifala long man ya we i rabis,” yumi stap askem Papa blong yumi long heven blong i lidim yumi mo halpem yumi blong blokem Setan, blong hem i no save winim yumi.

No Letem Setan i Winim Yumi

13, 14. ?From wanem kongregesen long Korin i mas jenisim fasin we hem i mekem long wan man we i bin mekem rabis fasin?

¹³ Taem Pol i talem long ol Kristin long Korin se oli mas fofogivim olgeta, hem i raetem se: “Ol man we yufala i fogivim olgeta, mi tu mi fogivim olgeta. Sipos man ya i mekem sam samting we mi mi mas fogivim hem from, be mi fogivim hem finis long fes blong Kraes, blong givhan long yufala. Yumi savegud ol plan blong Setan, mo mi no wantem we hem bambae i winim yumi long bisnes ya.” (2 Korin 2:​10, 11) Setan i save winim yumi long plante rod. ?From wanem Pol i raetem ol tok ya?

¹⁴ Bifo finis, Pol i stretem ol Kristin long Korin from we oli letem wan man we i mekem rabis fasin long saed blong seks, i stap insaed long kongregesen. Ating samting ya i mekem Setan i glad tumas, from we ol Kristin oli spolem gudnem blong kongregesen taem oli letem wan man i stap we fasin blong hem i nogud tumas. “Ol hiten man mo ol man olbaot, be oli no save mekem fasin ya.” Ale, kongregesen i lesin long advaes blong Pol mo oli putumaot man ya. (1 Korin 5:​1-5, 11-13) Biaen, man ya i tanem tingting blong hem from sin we hem i bin mekem. Nao sipos kongregesen blong Korin i no fogivim man ya mo tekembak hem, Setan bambae i winim olgeta long wan narafala rod. ?Wanem rod? Bambae oli gat fasin olsem Setan, we i strong tumas mo i no gat sore. Sipos man ya we i tanem tingting blong hem i ‘harem nogud tumas, nao tingting blong hem i foldaon olgeta’ mo i lego wosip blong Jeova olgeta, kongregesen ya, antap moa ol elda, bambae oli gat fol long fes blong Jeova God we i gat bigfala sore. (2 Korin 2:7; Jemes 2:13; 3:1) Yes, ol trufala Kristin oli no mas folem fasin blong Setan blong mekem i strong tumas long narafala mo blong no soem sore.

Klos Blong Faet We God i Givim Blong Protektem Yumi

15. ?Wanem faet we yumi stap mekem? ?Blong win long faet ya, yumi mas mekem wanem?

¹⁵ Blong mekem se Setan i no winim yumi, yumi mas faet agensem ol rabis spirit we oli gat bigfala paoa. Blong win long wan faet olsem, yumi mas werem ol klos ‘blong faet we God i givim long yumi blong blokem ol ara’ blong Setan. (Efesas 6:​11-18) Wan long ol klos ya, hemia stret fasin, we i olsem “klos blong faet we oli wokem long aean” blong blokem jes. (Efesas 6:14) Sol we i king blong Isrel bifo, hem i no obei long God, mo from samting ya God i no moa givim tabu spirit long hem. (1 Samuel 15:​22, 23) Be sipos yumi holem stret fasin mo putum olgeta klos blong faet long saed blong spirit, bambae hem i givim tabu spirit long yumi, mo bambae hem i protektem yumi long Setan mo ol rabis enjel blong hem.​—Ol Proveb 18:10.

16. ?Yumi mas mekem wanem blong gohed blong blokem paoa blong ol rabis spirit?

¹⁶ Blong gohed blong blokem paoa blong ol rabis spirit, wan samting we yumi mas mekem se, yumi mas ridim Tok blong God oltaem mo stadi long hem, mo yumi mas yusumgud ol buk blong “slef we i stret moa waes.” (Luk 12:​42, NW ) Olsem nao, bambae yumi stap fulumap tingting blong yumi wetem ol gudfala save long saed blong spirit. Pol i talem se  yumi mas mekem olsemia, i se: “Ol brata mo sista. . . . I gat ol gudfala fasin i stap we oli stret gud, mo we i stret nomo blong yumi presem ol man we oli mekem ol fasin ya. Mo yufala i mas putum tingting blong yufala i stap strong long ol fasin olsem. Ol fasin ya oli tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ya.”​—Filipae 4:8.

17. ?Wanem i save givhan long yumi blong gat gudhan blong talemaot gud nius?

¹⁷ Jeova i mekem se yumi ‘rere oltaem blong talemaot gud nius blong pis, olsem but blong yumi blong wokbaot.’ (Efesas 6:15) Taem yumi joen long olgeta Kristin miting, samting ya i rerem yumi blong talemaot gud nius blong Kingdom blong God. !Yumi kasem bigfala glad taem yumi halpem ol narafala blong kasem save long trutok blong God, mo kamfri long ol samting we i holem olgeta oli kalabus long saed blong spirit! (Jon 8:32) Yumi nidim ‘tok blong God we i olsem naef blong faet we tabu spirit i givim finis long yumi,’ blong yumi save blokem ol giaman tijing mo “brekemdaon ol strong ples blong haed blong Setan.” (Efesas 6:17; 2 Korin 10:​4, 5) Taem yumi gat gudhan blong yusum Tok blong God, Baebol, yumi save tijimgud ol man long trutok, mo yumi save blokemgud yumi blong yumi no foldaon long ol trik blong Setan.

18. ?Olsem wanem yumi save ‘stanap strong taem Setan i stap wokem ol giaman trik blong hem’?

¹⁸ Taem Pol i tokbaot ol klos blong faet long saed blong spirit, hem i se: “Yufala i mas joen long Masta blong yumi, blong kasem paoa. Hem i gat olgeta paoa, mo yufala i mas kam strong long paoa blong hem. Yufala i mas kasem paoa blong God, we i olsem olgeta samting blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong.” (Efesas 6:​10, 11) Grik tok we oli tanem i kam “stanap strong,” oli yusum blong tokbaot wan soldia we i no kam slak blong faet. Yumi tu, yumi no kam slak blong faet long saed blong spirit, nating se Setan i stap yusum plante giaman trik blong traem spolem fasin joengud blong yumi, mo blong agensem ol tijing blong yumi, mo blong brekem strong bilif we yumi gat long God. !Kam kasem naoia, Setan i no win​—mo bambae hem i neva save win! *

Blokem Setan, Nao Hem Bambae i Ronwe

19. ?Wanem wan rod blong agensem Setan?

¹⁹ Yumi save win long faet blong yumi long saed blong spirit agens long Setan mo ol rabis enjel blong hem. Yumi no nidim blong fraet long Setan. Disaepol Jemes i raetem se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.” (Jemes 4:7) Wan rod blong agensem Setan mo ol rabis enjel we oli wok wetem hem, i blong stap longwe long wok blong ol kleva, majik, mo ol man we oli mekem ol fasin ya. Baebol i soemaot klia se ol man blong Jeova oli no mas traem putum mining long ol smosmol saen we oli luk, oli no mas lukluk ol sta blong traem faenemaot fiuja, oli no mas go luk wan kleva, mo oli no mas joen long enikaen wok blong ol rabis spirit. Sipos yumi stap bisi long ol Kristin wok mo yumi stap strong long bilif, yumi no nidim blong fraet se wan man bambae i posenem yumi.​—Namba 23:23; Dutronome 18:​10-12; Aesea 47:​12-15; Ol Wok 19:​18-20.

20. ?Yumi mas mekem wanem blong blokem Setan?

²⁰ Yumi “blokem Setan” taem yumi folemgud ol rul mo trutok blong Baebol, mo taem yumi agensem hem strong. Setan, hem i rabis god blong wol ya, taswe ol fasin blong wol oli laenap wetem fasin blong hem. (2 Korin 4:4) From samting ya, yumi mas sakemaot ol fasin blong wol, olsem flas tingting, fasin blong tingbaot yumi nomo, slip olbaot, faet, mo fasin blong ronem mane. Yumi save se taem Setan i traem Jisas long draeples nao Jisas i yusum ol tok blong Baebol blong agensem hem, hem i ronwe long Jisas. (Matiu 4:​4, 7, 10, 11) Yumi tu, yumi save winim Setan mo bambae hem i ‘ronwe long yumi’ sipos yumi putum yumi i stap daon aninit long han blong Jeova fulwan, mo sipos yumi dipen long hem tru long prea. (Efesas 6:18) !Taem Jeova God mo Pikinini blong hem i givhan long yumi, olgeta man​—mo Setan tu—​oli no save spolem yumi blong olwe!​—Ol Sam 91:​9-11.

[Futnot]

?Wanem Ansa Blong Yu?

• ?Yumi mas fraet long Setan?

• ?From wanem Setan i pusum samfala blong mekem i nogud long ol Kristin?

• ?From wanem yumi mas prea blong God i sevem yumi long “man ya we i rabis”?

• ?Olsem wanem yumi save win long faet we yumi stap mekem long saed blong spirit?

[Kwestin]

[Tok blong pija long pej 12]

Ol faswan man blong Kraes oli no fraet, oli holemstrong long God go kasem ded

[Tok blong pija long pej 13]

Setan i no save blokem Jeova blong i no givim laef bakegen long olgeta we Hem i stap tingbaot olgeta