Busorenyo ni Satanas, ket Pagtalawannakayo!

“Agpasakupkayo iti Dios; ngem busorenyo ti Diablo, ket isu agtalawto kadakayo.”​—SANTIAGO 4:7.

1, 2. (a) Ania a kababalin ti Diablo ti nailadawan iti sasao a nailanad iti Isaias kapitulo 14? (b) Ania a salsaludsod ti usigentayo?

 TI Diablo ti kadadaksan a pagarigan ti kinapalangguad. Nailadawan ti kinatangsitna babaen ti sasao nga inlanad ni Isaias, maysa a propeta ti Dios. Nasurok a maysa a siglo sakbay a nagbalin ti Babilonia a kangrunaan a pannakabalin iti lubong, ti ili ti Dios ket nailadawan a mangibagbaga iti kastoy maibusor “iti ari ti Babilonia”: “Kinunam iti pusom, ‘Iti langlangit agpangatoakto. Iti ngatuen dagiti bituen ti Dios [dagiti ari a kaputotan ni David] ingatokto ti tronok . . . Pagbalinekto ti bagik a kaarngi ti Kangatuan.’” (Isaias 14:3, 4, 12-15; Numeros 24:17) Ti kinatangsit ‘ti ari ti Babilonia’ ket umasping iti kababalin ni Satanas, “ti dios daytoy a sistema ti bambanag.” (2 Corinto 4:4) Ngem agpatingganto iti didigra ti kinapalangguad ni Satanas, kas iti nakababain a panagpatingga ti dinastia ti Babilonia.

² Ngem gapu ta adda pay laeng ti Diablo, mabalin a pakaseknantayo pay latta dagiti saludsod a kas kadagitoy: Rumbeng kadi a pagbutngantayo ni Satanas? Apay nga isungsungsongna ti panangidadanes kadagiti Kristiano? Ania ti aramidentayo tapno dinatay magundawayan ti Diablo?

Rumbeng Kadi a Pagbutngantayo ti Diablo?

3, 4. Apay a dagiti matalek a napulotan a Kristiano ken dagiti kakaduada dida pagbutngan ti Diablo?

³ Makapabileg unay kadagiti napulotan a Kristiano dagitoy a sasao ni Jesu-Kristo: “Dika pagamkan ti bambanag a dandanimon sagabaen. Adtoy! Ti Diablo agtultuloyto a mangipisok iti sumagmamano kadakayo iti pagbaludan tapno naan-anay a masubokkayo, ken tapno maaddaankayo iti rigat iti sangapulo nga aldaw. Paneknekam ta bagim a matalek uray agingga ken patay, ket itedkonto kenka ti korona ti biag.” (Apocalipsis 2:10) Dagiti napulotan ken dagiti addaan iti naindagaan a namnama a kakaduada dida pagbutngan ti Diablo. Ngem saan a naikasigudan dayta a kinaturedda. Imbes ketdi, maigapu dayta iti nadayaw a panagbutengda iti Dios ken pinagbalinda a ‘kamangda ti salinong dagiti payakna.’―Salmo 34:9; 36:7.

⁴ Dagiti maingel a nagkauna nga adalan ni Jesu-Kristo nagtalinaedda a matalek agingga ken patay iti laksid dagiti sinagabada. Dida nagbuteng iti aniaman a kabaelan nga aramiden ni Satanas a Diablo yantangay ammoda a saan a pulos a baybay-an ni Jehova dagidiay nasungdo Kenkuana. Umasping iti dayta, iti laksid ti agdama a nakaro a pannakaidadanes, dagiti napulotan a Kristiano ken dagiti dedikado a kakaduada determinadoda  nga agtalinaed a natarnaw iti Dios. Kaskasdi, impasimudaag ni apostol Pablo a kabaelan ti Diablo ti mangpapatay. Saan kadi a nakaam-amak dayta?

5. Ania ti maadaltayo iti Hebreo 2:14, 15?

⁵ Kinuna ni Pablo a naglasag ni Jesus tapno “babaen ti ipapatayna pukawenna daydiay addaan iti pannakabalin a mangyeg iti ipapatay, awan sabali, ti Diablo; ken tapno luk-atanna amin dagidiay a gapu iti buteng iti ipapatay naipasakupda iti pannakaadipen iti intero a panagbiagda.” (Hebreo 2:14, 15) Gapu ta ni Satanas “daydiay addaan iti pannakabalin a mangyeg iti ipapatay,” inimpluensiaanna ni Judas Iscariote ken inusarna dagiti Judio a papanguluen ken dagiti Romano tapno papatayenda ni Jesus. (Lucas 22:3; Juan 13:26, 27) Ngem babaen ti sakripisio nga ipapatay ni Jesus, winayawayaanna ti managbasol a sangatauan manipud iti pannakabalin ni Satanas ket pinagbalinna a posible kadatayo ti biag nga agnanayon.―Juan 3:16.

6, 7. Kasano kabileg ti pannakabalin ni Satanas a mangyeg iti ipapatay?

⁶ Kasano kabileg ti pannakabalin ti Diablo a mangyeg iti ipapatay? Bueno, sipud idi rinugian ni Satanas ti kinadakesna, immapay ti ipapatay kadagiti tattao. Gapu ngamin iti kinaulbod ken impluensia ni Satanas, nagbasol ni Adan ket impatawidna kadagiti tattao ti basol ken ipapatay. (Roma 5:12) Kanayonanna, dagiti adipen ni Satanas ditoy daga idaddadanesda dagiti agdaydayaw ken ni Jehova, no dadduma agingga ken patay, kas inaramidda idi ken ni Jesu-Kristo.

⁷ Ngem ditay koma pampanunoten a kabaelan ti Diablo a papatayen ti asino lattan a kayatna a papatayen. Ti Dios salaknibanna dagidiay agdaydayaw Kenkuana ken dina ipalubos a talipuposen ni Satanas ti amin a pudno nga agdaydayaw kenkuana ditoy daga. (Roma 14:8) Pudno, ipalubos ni Jehova nga umapay ti pannakaidadanes kadagiti amin nga adipenna, ken ipalubosna a matay ti dadduma kadatayo kas resulta ti panangraut ti Diablo. Kaskasdi, inkari ti Kasuratan ti nagsayaat a namnama a panagungar agpaay kadagidiay adda iti “libro a pakalaglagipan” ti Dios―ket di pulos malapdan ti Diablo dayta a panangisubli iti biag!―Malakias 3:16; Juan 5:28, 29; Aramid 24:15.

Apay nga Idadanesnatayo ni Satanas?

8. Apay nga idadanes ti Diablo dagiti adipen ti Dios?

⁸ No nasungdo nga adipennatayo ti Dios, idadanesnatayo ti Diablo. Kayatna nga ikompromisotayo ti pammatitayo. Nagsayaat ti relasiontayo iti nailangitan nga Amatayo, ket kayat ni Satanas a dadaelen dayta. Saantay a pakasdaawan dayta. Idiay Eden, impakpakauna ni Jehova a mapasamak ti panagbinnusor iti nagbaetan ti simboliko a “babai” ti Dios ken ti “serpiente,” agraman iti nagbaetan dagiti ‘bin-ida.’ (Genesis 3:14, 15) Ti Biblia tukoyenna ti Diablo kas “ti kadaanan a serpiente,” ken ipalgakna nga ababan ti tiempo daytoy a kabusor isu a kasta unay  ti pungtotna. (Apocalipsis 12:9, 12) Bayat nga agtultuloy ti panagbinnusor ti dua a ‘bin-i,’ manamnama dagidiay simamatalek nga agserserbi ken ni Jehova a makapasarda iti pannakaidadanes. (2 Timoteo 3:12) Ammoyo met laeng kadi ti pudno a ramut ti kasta a sataniko a panangidadanes?

9, 10. Ania nga isyu ti pinataud ti Diablo, ken kasano nga apektaranna ti kondukta dagiti tattao?

⁹ Pinataud ti Diablo ti isyu maipapan iti sapasap a kinasoberano. Mainaig iti dayta, kinuestionna ti kinatarnaw dagiti tattao iti Namarsua kadakuada. Indadanes ni Satanas ti nalinteg a ni Job. Apay? Tapno dadaelenna ti kinatarnaw ni Job iti Dios. Ti asawa ni Job ken ti tallo a ‘makariribuk a manangliwliwana’ nagpausarda iti panggep ti Diablo iti daydi a gundaway. Kas nailanad iti libro a Job, ti Diablo kinaritna ti Dios, a kunkunana nga awan ti tao nga agtalinaed a matalek Kenkuana no mapalubosan ni Satanas a mangsubok iti dayta a tao. Ngem sinalimetmetan ni Job ti kinatarnawna, iti kasta pinaneknekanna nga ulbod ni Satanas. (Job 1:8–2:9; 16:2; 27:5; 31:6) Iti kaaldawantayo, ti Diablo idaddadanesna dagiti Saksi ni Jehova tapno madadaelna ti kinatarnawda ken mapaneknekanna a pudno ti karitna.

¹⁰ Gapu ta ammotayo dayta, makatulong ketdi dayta a pannakaammo tapno agbalintayo a maingel ken natibker. (Deuteronomio 31:6) Ti Diostayo isu ti Sapasap a Soberano, ket tulongannatayo a mangtaginayon iti kinatarnawtayo. Kanayon koma nga ikagumaantayo a paragsaken ti puso ni Jehova babaen ti panagtalinaedtayo a natarnaw, tapno masungbatanna daydiay kadaksan a manangrurod, ni Satanas a Diablo.―Proverbio 27:11.

“Ispalennakami iti Daydiay Nadangkes”

11. Ania ti kayat a sawen ti kararag a, “Saannakami nga iyeg iti pannakasulisog”?

¹¹ Saan a nalaka ti panangsalimetmet iti kinatarnaw; agkasapulan dayta iti napasnek a panagkararag. Gapuna, makatulong dagiti sasao a linaon ti modelo a kararag. Kinuna ni Jesus: “Saannakami nga iyeg iti pannakasulisog, no di ket ispalennakami iti daydiay nadangkes.” (Mateo 6:13) Ni Jehova dinatay sulisogen nga agbasol. (Santiago 1:13) No dadduma, ibaga ti Kasuratan a ti Dios ti mangar-aramid wenno makinggapuanan kadagiti bambanag, ngem ti kinaagpaysuanna, ipalpalubosna laeng dagita. (Ruth 1:20, 21) Isu a no ikararagtayo a ti Dios dinatay iyeg iti pannakasulisog, kidkiddawentayo ken ni Jehova a dina ipalubos a tumuloktayo iti sulisog. Ken talaga nga ipangagnatayo ti Dios, gapu ta ipanamnama kadatayo ti Kasuratan: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.”​—1 Corinto 10:13.

12. Apay nga ikararagtayo, “Ispalennakami iti daydiay nadangkes”?

¹² Kalpasan a dinakamat ni Jesus iti modelo a kararag ti maipapan iti pannulisog, maitutop a kinunana: “Ispalennakami iti daydiay nadangkes.” Kuna ti dadduma a patarus ti Biblia: “Isalakannakami iti dakes” (Ti Biblia, Philippine Bible Society) wenno “Ilisinakami ketdi iti Managdakdakes.” (Naimbag a Damag Biblia) Ngem iti Kasuratan, ti ebkas nga ‘ispalen’ ket kangrunaanna a nausar mainaig kadagiti tattao, ken ti Ebanghelio ni Mateo tukoyenna ti Diablo kas “ti Mannulisog,” maysa a persona. (Mateo 4:3, 11) Gapuna, napateg nga ikararagtayo a maispaltayo manipud iti “daydiay nadangkes,” ni Satanas a Diablo. Sulisogennatayo ngamin nga agbasol iti Dios. (1 Tesalonica 3:5) No ikararagtayo nga, “Ispalennakami iti daydiay nadangkes,” kidkiddawentayo nga iwanwan ken tulongannatayo ti nailangitan nga Amatayo tapno dinatay magundawayan ti Diablo.

 Dikay Agpagundaway iti Diablo

13, 14. Apay a masapul a balbaliwan dagiti taga-Corinto ti wagas ti panangtratoda iti maysa a kakongregasionda a natnag iti imoralidad?

¹³ Idi indagadag ni Pablo kadagiti Kristiano idiay Corinto nga agbalinda koma a manangpakawan, insuratna: “Ti aniaman a siaasi a pangpakawananyo iti asinoman, aramidek met. Iti kinapudnona, no maipapan kaniak, aniaman ti siaasi a pinakawanko, no siaasi a pinakawanko ti aniaman, maigapu dayta kadakayo iti imatang ni Kristo; tapno saannatayo a magundawayan ni Satanas, ta saantayo nga ignorante kadagiti gakatna.” (2 Corinto 2:10, 11) Apay a kasta ti imbaga ni Pablo, idinto ta mabalinnatayo met a gundawayan ti Diablo iti nadumaduma a pamay-an?

¹⁴ Ni Pablo tinubngarna dagiti taga-Corinto gapu ta impalubosda ti maysa nga imoral a tao nga agtalinaed iti kongregasion. Sigurado a naragsakan iti dayta ni Satanas, yantangay naumsi ti kongregasion gapu iti panangpanuynoyda ‘iti kasta a pannakiabig nga awan uray iti tengnga dagiti nasion.’ Idi agangay, nailaksid dayta a nakabasol. (1 Corinto 5:1-5, 11-13) Kalpasanna, nagbabawi dayta a tao. No dagiti taga-Corinto dida pakawanen ken isubli dayta a tao, mabalin a gundawayan ida ti Diablo iti sabali a pamay-an. Kasano? Posible nga agbalinda a naulpit ken awanan iti asi, kas ken ni Satanas. No dayta nga agbabbabawi a tao ket “alimonen ti nalabes unay a panaglidayna” ken naan-anay nga isardengnan ti agserbi iti Dios gapu iti kasta a pannakatrato, dagiti panglakayen ti nangnangruna a manungsungbat iti dayta iti saklang ti naasi a Dios, ni Jehova. (2 Corinto 2:7; Santiago 2:13; 3:1) Siempre, awan ti pudno a Kristiano a mayat a mangtulad ken ni Satanas babaen ti panagbalin a nagubsang, naulpit, ken awanan iti asi.

Salakniban ti Kabal Manipud iti Dios

15. Ania a gubat ti pakipasetantayo, ken kasanotayo nga agballigi iti dayta?

¹⁵ Tapno maispaltayo manipud iti Diablo, nasken a makipasettayo iti naespirituan a gubat maibusor kadagiti dakes nga espiritu a puersa. Makapagballigitayo no isuottayo ti “naan-anay a kabal manipud iti Dios.” (Efeso 6:11-18) Dayta a kabal iramanna “ti kabal ti barukong nga isu ti kinalinteg.” (Efeso 6:14) Ni Ari Saul iti nagkauna nga Israel sinalungasingna ti Dios ket napukawna ti nasantuan nga espiritu. (1 Samuel 15:22, 23) Ngem no salimetmetantayo ti kinalinteg ken isuottayo ti naan-anay a naespirituan a kabal, matagiragsaktayo ti nasantuan nga espirituna ken ti kasapulantayo a pannalaknibna maibusor ken ni Satanas ken kadagiti dakes nga anghelna, dagiti sairo.​—Proverbio 18:10.

16. Kasano nga agtultuloy a masalaknibantayo manipud kadagiti dakes nga espiritu a puersa?

¹⁶ Tapno agtultuloy a masalaknibantayo manipud kadagiti nadangkes nga espiritu a puersa, masapul met a regular a basaen ken adalentayo ti Sao ti Dios, nga usarentayo a naimbag dagiti publikasion a maipapaay babaen “ti matalek a mayordomo.” (Lucas 12:42) Iti kasta, mapunno ti isiptayo kadagiti makapasalun-at a naespirituan a bambanag, ket maitunos dayta iti balakad ni Pablo: “Kakabsat, aniaman a bambanag a napudno, aniaman a bambanag a serioso a pakaseknan, aniaman a bambanag a nalinteg, aniaman a bambanag a nadalus, aniaman a bambanag a maay-ayat, aniaman a bambanag a naimbag ti pakasarsaritaanda, aniaman ti adda a kinasingpet ken aniaman ti adda a banag a nadayaw, itultuloyyo nga utoben dagitoy a banag.”​—Filipos 4:8.

17. Ania ti tumulong kadatayo nga agbalin nga epektibo a manangiwaragawag iti naimbag a damag?

 ¹⁷ Tulongannatayo ni Jehova tapno ‘masapatosan dagiti sakatayo iti alikamen ti naimbag a damag ti kappia.’ (Efeso 6:15) Ti regular a pannakipaset kadagiti Nakristianuan a gimong kabalannatayo a mangiwaragawag iti naimbag a damag ti Pagarian ti Dios. Anian a rag-otayo a tumulong kadagiti sabsabali a mangammo iti kinapudno maipapan iti Dios ken mangtagiragsak iti naespirituan a wayawaya! (Juan 8:32) Napateg ‘ti kampilan ti espiritu, ti sao ti Dios’ tapno masalaknibantayo manipud kadagiti ulbod a sursuro ken tapno ‘mabalintuagtayo dagiti natibker ti pannakasarikedkedna a bambanag.’ (Efeso 6:17; 2 Corinto 10:4, 5) Ti nasigo a panangusar iti naisurat a Sao ti Dios, ti Biblia, tulongannatayo a mangisuro iti kinapudno kadagiti sabsabali ken salaknibannatayo manipud kadagiti panangallilaw ti Diablo.

18. Kasano a ‘makapagtakdertayo a sititibker maibusor kadagiti pangallilaw ti Diablo’?

¹⁸ Kastoy ti panglukat a sasao ti palawag ni Pablo maipapan iti naespirituan a kabaltayo: “Itultuloyyo a gun-oden ti pannakabalin iti Apo ken iti kinabileg ti pigsana. Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan ti Diablo.” (Efeso 6:10, 11) Ti Griego a sao a naipatarus kas “agtakder a sititibker” tukoyenna ti soldado a sitatakder iti lugarna. Agtalinaedtayo a natibker iti naespirituan a pannakigubattayo, uray pay no nadumaduma dagiti taktika ni Satanas a mangsinga iti panagkaykaysatayo, mangmulit kadagiti sursurotayo, wenno mangdadael iti kinatarnawtayo iti Dios. Ngem kaanoman, saan a pulos nga agballigi dagiti panangraut ti Diablo! a

Busorenyo ti Diablo, ket Pagtalawannakayo

19. Ania ti maysa a pamay-an a masarangettayo ti Diablo?

¹⁹ Makapagballigitayo iti naespirituan a pannakigubattayo iti Diablo ken kadagiti pasurotna a dakes nga espiritu a puersa. Awan ti rason a pagbutngantayo ni Satanas, gapu ta insurat ni adalan a Santiago: “Agpasakupkayo iti Dios; ngem busorenyo ti Diablo, ket isu agtalawto kadakayo.” (Santiago 4:7) Ti maysa a pamay-an tapno masarangettayo ni Satanas ken dagiti kakaduana a dakes nga espiritu isu ti ditay pannakipaset iti aniaman nga okulto wenno inaanito nga aramid. Nalawag ti kuna ti Kasuratan a dagiti adipen ni Jehova masapul a liklikanda ti agpaiwanwan kadagiti signo wenno makiraman iti astrolohia, panagpadles, ken espiritismo. No aktibo ken nabilegtayo iti naespirituan, saantay a pagamkan nga adda mangkulam kadatayo.―Numeros 23:23; Deuteronomio 18:10-12; Isaias 47:12-15; Aramid 19:18-20.

20. Kasanotayo a busoren ti Diablo?

²⁰ ‘Busorentayo ti Diablo’ babaen ti panangyaplikartayo kadagiti pagalagadan ken kinapudno iti Biblia ken babaen ti sititibker a panangsarangettayo ken ni Satanas. Ar-aramiden ti lubong ti pagayatan ni Satanas gapu ta isu ti diosda. (2 Corinto 4:4) Gapuna, ditay tultuladen dagiti kababalin ti lubong, kas iti kinatangsit, kinamanagimbubukodan, imoralidad, kinaranggas, ken materialismo. Ammotayo a nagtalaw ti Diablo idi isu ket sinaranget ni Jesus babaen ti panangusarna iti Kasuratan kabayatan ti pannakaipasangona iti sulisog idiay let-ang. (Mateo 4:4, 7, 10, 11) Umasping iti dayta, ‘pagtalawannatayo’ ni Satanas no naan-anay a natulnogtayo ken ni Jehova ken sikakararag nga agpannuraytayo kenkuana. (Efeso 6:18) Babaen ti tulong ni Jehova a Dios ken ti dungdungnguenna nga Anakna, awan ti asinoman a makayeg kadatayo iti permanente a pannakadangran―awan, uray pay ti Diablo!―Salmo 91:9-11.

[Footnote]

Ania ti Sungbatyo?

• Rumbeng kadi a pagbutngantayo ni Satanas a Diablo?

• Apay nga idadanes ni Satanas dagiti Kristiano?

• Apay nga ikararagtayo a maispaltayo manipud “iti daydiay nadangkes”?

• Kasanotayo nga agballigi iti naespirituan a pannakigubattayo?

[Salsaludsod]

[Ladawan iti panid 26]

Dagiti maingel a nagkauna a pasurot ni Kristo pinaneknekanda a matalekda agingga ken patay

[Ladawan iti panid 27]

Saan a malapdan ti Diablo ti panagungar dagidiay adda iti lagip ni Jehova

[Ladawan iti panid 28]

Ikarkararagyo kadi ti pannakaispal manipud “iti daydiay nadangkes”?

[Ladawan iti panid 29]

Nakasuot kadi kadakayo “ti naan-anay a kabal manipud iti Dios”?