Jumae Satan, Im Enaj Ko Jen Kwe!
Jumae Satan, Im Enaj Ko Jen Kwe!
“Inem komin kõtãik kom ñõn Anij; a komin jumae devil im e naj ko jen kom.”—JEMES 4:7.
1, 2. (a) Ta kadkad ko kadkadin Devil eo ej kwaloke ekkar ñan nan ko ilo Aiseia chapter 14? (b) Ta kajitõk ko jenaj uaki?
DEVIL eo ej joñok eo elaptata kin utiej buru. Nan ko an ri kanan eo an Anij Isaiah rar kalikar kin utiej buru eo an jitõb in. Elõñlok jen jibuki yiõ ko mokta jen an Babylon jutak einwõt ailiñ eo ekajurtata iaolepen lal, armij ro an Jehovah rar bõk eddo eo ñan kwalok nan in kejelã in nae “kiñ in Babilon”: “Im kwar ba ilo buruõm, ‘I naj wõnliñlok ñõn lõñ, I naj leliñlok aõ tron ilõñin iju ko an Anij [king ro jen menmenbwij eo an David]; . . . I naj mõke kõmõn iõ einwõt Eo e Utiejtata.’” (Aiseia 14:3, 4, 12-15; Bwinbwin 24:17) Utiej buru eo an “kiñ in Babilon” ear einlok wõt lemnak eo an Satan, “anij in lõl in.” (2 Dri Korint 4:4) Utiej buru eo an Satan enaj jako, einwõt aolep iroij ro an Babylon rar jako.
2 Bõtab, toan wõt an Devil eo bed, jemaroñ itoklimo kin kajitõk kein: Jej aikwij ke mijak Satan? Etke ej kamakit armij bwe ren matõrtõre Ri Christian ro? Ewi wãwen ad maroñ anjo ion Devil eo?
Jej Aikwij Ke Mijak Devil Eo?
3, 4. Etke Christian ri kabit ro im ro mõttair rejjab mijak Devil eo?
3 Nan kein an Jesus Christ rej men in kakajur ñan Christian ri kabit ro: “Kwon jab lelñoñ kin men ko kwo naj iñtan kaki: lo, devil e naj jolok jet iami na iloan prisõn bwe en melejoñ kom, im jorran e naj ibemi iomin joñoul ran. Kwon tiljek ñõn mij im I naj lewoj ñõn kwe belin eo belin mour.” (Reveles̃õn 2:10) Ri kabit ro im ro mõttair me kejatdikdik eo air ej ñan mour indio ion lal rej jimor jab mijak Devil eo. Beran rot in ejjab waloktok jen maroñ eo air make. Ej bed kinke rej mijak Anij im rej ‘ko ñõn lurin pein.’—Sam Ko 34:9; 36:7.
4 Ilo beran ri kalor ro mokta an Jesus Christ rar tiljek ñan mij meñe rar bõk eñtan jen elõñ melejoñ ko. Rar jab mijak kin ta eo Satan emaroñ kar kõmmane ñan ir, kinke rar jelã bwe Jehovah ejamin illok jen ro rej tiljek ñan e. Eindein, ilo ien kein ad ñe elõñ matõrtõr rej walok, Christian ri kabit ro im ri jerbal ro mõttair rar beek ñan air tiljek wõt ñan Anij. Bõtab, ri jilek Paul ear kalikar bwe kajur in mij ear bed ibben Devil eo. Men in ej ke kamijak kij?
5. Ta eo jej katak jen Dri Hibru 2:14, 15?
5 Paul ear ba bwe Jesus ear ‘bõk mõtõn kõniek im bõtõktõk’ “bwe kin mij [eo an, NW] En kokkure devil eo, kajur in mij iben; Im bwe En kõtlok ir otemjej ro r’ar ber im mour ien otemjej ilo kamokoko kin air lelñoñ kin mij.” (Dri Hibru 2:14, 15) Einwõt eo me “kajur in mij” ear bed ibben, Satan ear kajur ion Judas Iscariot inem ear kajerbal ri tel ro an Ri Jew ro im Ri Rom ro bwe ren mõn Jesus. (Luk 22:3; Jon 13:26, 27) Bõtab, kin an katok kin mour eo an ilo mij, Jesus ear kanemkwoj armij ro jen iumin pein Satan im kabellok juõn kejatdikdik bwe jen bõk mour indio.—Jon 3:16.
6, 7. Etke jemaroñ ba bwe kajur in mij ej bed ibben Devil eo?
6 Etke jemaroñ ba bwe kajur in mij ej bed ibben Devil eo? Eokwe, jen ien eo Satan ear jino jerbal ko an renana, nan in riap im tel ko an rar bõktok mij ion armij otemjej. Men in ear walok kinke Adam ear jerawiwi im ear bõktok jerawiwi im mij ion armij otemjej. (Dri Rom 5:12) Bareinwõt, ri karejar ro an Satan ion lal rar matõrtõre ri kabuñ ro an Jehovah, jet ien rar mõn ir ñan mij, einwõt rar kõmmane ñan Jesus Christ.
7 Mekarta, jen jab lemnak bwe Devil eo emaroñ kokkure jabdewõt armij ekõnan. Anij ej kejbãrok ro don im ejamin kõtlok bwe Satan en kokkure aolep ri kabuñ ro remol ion lal. (Dri Rom 14:8) Emol, Jehovah ej kõtlok bwe matõrtõr en jelet armij ro an, im ej kõtlok bwe jet ian ri karejar ro an ren mij kin melejoñ ko an Devil eo. Ak, Bible eo ej kwalok juõn kejatdikdik eaibujuij kin juõn ien jerkakbiji ñan ro rej bedwõt ilo “book” in kememej eo an Anij—im ejelok an Devil eo maroñ ñan bõpraik armij jen air jeblak jen mij!—Malachi 3:16; Jon 5:28, 29; Jerbal 24:15.
Etke Ewõr Matõrtõr jen Satan?
8. Etke Devil eo ej matõrtõre ri karejar ro an Anij?
8 Elañe jej ri karejar ro retiljek an Anij, ewõr juõn un elap unin an Devil eo matõrtõre kij. Mejenkajjik eo an ej ñan kamakit kij bwe jen illok jen tõmak eo ad. Ewõr juõn kõtan ebak ikõtad im Jemed ilañ, im Satan ekõnan kokkure kõtan in. Jejjab aikwij bwilõñ kake men in. Ilo Eden, Jehovah ear kanan bwe enaj wõr kijirãt ikõtan men ko rej kõkkar kin “kõra” eo an im “serpent” eo im ikõtan ine ko ineir. (Jenesis 3:14, 15) Bible eo ej kalikar bwe Devil eo ej “serpent e ridto” im ej kalikar bwe ekadu ien ibben im elap an illu. (Reveles̃õn 12:9, 12) Ñe kijirãt eo ikõtan ‘ine’ kein ruo ej wõnmanlok wõt, ro rej tiljek ñan Jehovah rej aikwij bojak ñan bõk matõrtõr. (2 Timote 3:12) Kwoj jelã ke kin lukkun un eo unin an Satan matõrtõre kij?
9, 10. Ta aitwerõk eo Devil eo ear bõkmantak, im ewi wãwen mwilin armij ej ekkejel ibben aitwerõk in?
9 Devil eo ear bõkmantak juõn aitwerõk kin wõn eo ej iroij bõtata ijoko otemjej ilañ im ion lal. Ekkejel ibben men in, ear aitwerõke tiljek eo an armij ro ñan Ri Kõmanman eo air. Satan ear bõktok matõrtõr ion armij eo etiljek Job. Etke? Bwe en kokkure tiljek eo an Job ñan Jehovah. Lio belen Job im “dri kainemõn [ro an] re nana” kar kajerbal ir ñan kõtõbrak karõk eo an Devil eo ilo ien eo. Ekkar ñan book in Job, Devil eo ear aitwerõke Anij, im ba bwe elañe Anij ear kõtlok bwe Satan en melejoñe armij ejelok juõn enaj tiljek ñan Anij. Ak Job ear jutak bin ilo tõmak, im ear kamol bwe Satan ear juõn ri riap. (Job 1:8–2:9; 16:2; 27:5; 31:6) Devil eo ej matõrtõre Ri Kennan ro an Jehovah rainin kinke ekõnan kokkure tõmak eo air im kamol bwe aitwerõk eo an ej mol wõt.
10 Ilo ad jelã bwe Devil eo ej matõrtõre kij kinke ekõnan kokkure tiljek eo ad ñan Anij, men in emaroñ kaberan im kakajur kij. (Duteronomi 31:6) Anij eo ad ej Iroij Ekajur Bõtata ilañ im ion lal, im enaj jibañ kij ñan debij ad tiljek ñan e. Inem jen kate kij ñan kamõnõnõik buruen Jehovah ilo ad debij wõt ad tiljek ñan e, bwe en maroñ kwalok juõn uak ñan eo ej kinaake, Satan Devil eo.—Jabõn Kennan Ko 27:11.
“Lomoren Kim Jen Eo Enana”
11. Ta melelen kajitõk in, “jab kadreloñ kim ilo kabo”?
11 Kinke ejjab bidodo ñan ad jutak bin einwõt juõn eo etiljek; jej aikwij kate wõt im jar jen buruõd. Nan ko ilo jar eo an Iroij elap an jibañ kij ñan kõmman men in. Jesus ear ba: “Im jab kadreloñ kim ilo kabo, a lomoren kim jen eo enana.” (Matu 6:13) Jehovah ejjab kabo kij ñan ad jerawiwi. (Jemes 1:13) Bõtab, jet ien Bible eo ej konono kin an kõmmani men ko, ak ilo mol, ej baj kõtlok wõt bwe ren walok. (Rut 1:20, 21) Inem, ñe jej jar einwõt Jesus, jej kajitõk ibben Jehovah bwe en jab kõtlok bwe jen bo ilo jerawiwi. Enaj eoroñ jar eo ad, kinke Bible eo ej kallimur: “Ejelok men in kabo e ar bõk kom, a eo armij rej maroñwe: a Anij e tiljek, im E jamin likit bwe ren kabo kom elap jen ami maroñ; a ilo men in kabo E naj kõmõn ial in ko, bwe komin maroñwe.”—1 Dri Korint 10:13.
12. Etke jej jar: “Lomoren kim jen eo enana”?
12 Elikin an kar konono kin kabo eo ilo jar eo an, ilo ekkar Jesus ear ba: “A lomoren kim jen eo enana.” Jet ukok in Bible ko rej ukõte nan kein an Jesus ilo Matu 6:13 ilo juõn wãwen ej melelen bwe jej jar bwe Anij en kejbãrok kij jen nana eo iload ak jen juõn jorrãn eo ej walok. Bõtab, ilo Bible eo, nan eo ‘lomoren’ ekkã an jerbal ñan armij, im Gospel eo an Matu ej jitõñlok ñan Devil eo einwõt “dri kabo” eo, juõn eo emour. (Matu 4:3, 11) Inem ej juõn men eaorõk bwe jen jar bwe Anij en lomoren kij jen “eo enana,” Satan Devil eo. Ej kajeoñ in kabo kij ñan ad jerawiwi nae Anij. (1 Dri Tessalonika 3:5) Ñe jej kajitõk, “Lomoren kim jen eo enana,” jej kajitõk ibben Jemed ilañ bwe en tel im jibañ kij bwe Devil eo en jab anjo iod.
Jab Kõtlok bwe Devil eo En Anjo Iod
13, 14. Etke Ri Korint ro rar aikwij ukõt lemnak eo air kin wãwen air ekajete juõn emaan eo ear lũñ ilo congregation eo?
13 Ke Paul ear rejañ Ri Christian ro ilo Korint bwe ren jolok bwid, ear je: “A jabrewõt eo komij jolok an nana, bar einwõt ña: bwe elañe I ar jolok jabrewõt nana, I ar jolok nana eo kin kom, einwõt iman mejen Kraist; Bwe Setan en jab joñwe kij: bwe je jab jaje kake marmir ko an.” (2 Dri Korint 2:10, 11) Devil eo emaroñ kabo kij ilo elõñ wãwen ko, ak etke Paul ear ba eindein?
14 Paul ear kauweik Ri Korint ro kinke rar kõtlok bwe juõn emaan eo ear mour in lũñ en bedwõt einwõt juõn uan congregation eo. Men in ear kamõnõnõik Satan, kinke ear katton congregation eo kin an kõtlok bwe “lũñ einwõt e jab iben dri pegan” en bed iloan. Tokelik, rar jolok ri nana eo jen congregation eo. (1 Dri Korint 5:1-5, 11-13) Tokelik emaan eo ear ukwelok. Elañe Ri Korint ro rar jab jolok bwid eo an im kajeblaktok leo, Devil eo enaj kar joñe ir ilo bar juõn wãwen. Ewi wãwen? Renaj kar lej im jab tiriamokake armij, einwõt Satan. Elañe leo ear “ buromõj elaplok” jen joñan im ebwer, enaj laplok an elder ro aikwij uak ñan Anij in tiriamo eo, Jehovah. (2 Dri Korint 2:7; Jemes 2:13; 3:1) Emol bwe, ejelok juõn Ri Christian emol ekõnan kajeoñe Satan ilo air kwalok lej im jab tiriamokake.
Kein Tarinae eo an Anij Ej Kejbãrok Kij
15. Ta tarinae eo jej bõk kunad ie, im ñan ad lo tõbrak ilo tarinae in ej wawa ion ta?
15 Elañe jekõnan ko jen Devil eo, jej aikwij bõk kunad ilo juõn tarinae ilo jitõb nae jitõb ro renana. Elañe jekõnan bõk anjo ioir menin ej wawa ion ad kõnak “aolepen ken tõrinae an Anij.” (Dri Epesõs 6:11-18) Kein tarinae in ekoba “binjen op in wãnik.” (Dri Epesõs 6:14) King Saul ilo Israel eo etto ear jab bokake Anij im ear luji jitõb kwojarjar eo. (1 Samuel 15:22, 23) Ak elañe jej jerbale wãnik im emwij ad kõnak aolepen kein tarinae eo ilo jitõb, jenaj bõk jitõb kwojarjar eo an Anij im kejbãrok eo jej aikwiji nae Satan im enjel ro an renana, demon ro.—Jabõn Kennan Ko 18:10.
16. Ewi wãwen jemaroñ wõnmanlok im bõk kejbãrok nae jitõb ro renana?
16 Ñan wõnmanlok im bõk kejbãrok jen jitõb ro renana, jej aikwij keini ad readi im katak kin Nan in Anij, im lukkun kortokjen book ko jen “dri kõmñe eo etiljek.” (Luk 12:42) Ilo wãwen in jenaj kobrak lolãtãt eo ad kin men ko lor jitõb, ekkar ñan nan in kakabilek eo an Paul: “Eliktata, ro jãtiõ, jabrewõt men ko remol, jabrewõt men ko re jime, jabrewõt men ko re wãnik, jabrewõt men ko rokwojarjar, jabrewõt men ko re olbo, jabrewõt men ko emõn air buñbuñ; elañe eor emõn, im elañe eor nebar, komin lemnok kin men kein.”—Dri Pilippai 4:8.
17. Ta eo enaj jibañ kij bwe jen bolemen einwõt ri kwalok ro kin news eo emõn?
17 Jehovah ej kamaroñ kij ñan “naballin [need] kin kapojõk in gospel in ainemõn.” (Dri Epesõs 6:15) Ñe jej ekkeini ad bõk kunad ilo kwelok ko, ej keboj kij ñan kwalok nan kin news eo emõn kin Ailiñ eo. Jej bõk elap lañliñ ñe jej jibañ ro jet ñan air katak kin mol eo im bõk anemkwoj ilo jitõb! (Jon 8:32) “Jãji an Jitõb, eo nan in Anij,” elap an aorõk ñan kejbãrok kij jen katak ko reriap im ñan “jolõllok jikin ko re kajur.” (Dri Epesõs 6:17; 2 Dri Korint 10:4, 5) Ñe jej kabel ilo ad kajerbal Nan eo an Anij, Bible eo, ej jibañ kij ñan katakin armij kin mol eo im ej kejbãrok kij jen kabo ko an Devil eo.
18. Ewi wãwen jemaroñ “jutõk mae etao ko an devil”?
18 Paul ear kabellok bwebwenato eo an kin kein tarinae eo ilo jitõb ilo an ba: “Eliktata, komin bin ilo Iroij, im ilo kajur in maroñ eo An. Komin kõnõk aolepen ken tõrinae an Anij, bwe komin maroñ in jutõk mae etao ko an devil.” (Dri Epesõs 6:10, 11) Nan in Greek eo ej melelen “jutak bin” ej ekkeijaklok ñan wãwen an juõn ri tarinae joorkatkat im bojak ñan tarinae. Jej jutak bin im bojak wõt ilo tarinae eo ilo jitõb, meñe Satan ej kajerbal elõñ wãwen ko retao ñan kokkure burukuk eo ad, katton katakin ko ad, ak kokkure tiljek eo ad ñan Anij. Ak jumae ko an Devil eo rejañin lo tõbrak—im rejamin loe ñan indio! *
Jumae Devil eo, im Enaj Ko Jen Yuk
19. Ta juõn ian wãwen ko jemaroñ jumae Devil eo?
19 Jemaroñ bõk anjo ilo tarinae in ad ilo jitõb nae Devil eo im jitõb ro renana iumin tel eo an. Ejelok unin ad aikwij mijak Satan, bwe ri kalor eo Jemes ear je: “Inem komin kõtãik kom ñõn Anij; a komin jumae devil im e naj ko jen kom.” (Jemes 4:7) Juõn wãwen ñan tarinaik Satan im jitõb ro an renana ej ilo ad jab itoklimo im bõk kunad ilo mantin kajitõbtõb, im anijnij im jab kobalok ibben ro rej bõk kunair ilo men kein. Bible eo ej kalikar bwe ri karejar ro an Jehovah rej jab bukõt jibañ jen ro rej lale iju ko, kõmman anijnij, marmir, im kamao ibben jitõb ro renana. Elañe jej kajur ilo jitõb, jejjab aikwij mijak juõn armij eo me emaroñ kõmman anijnij im madmõd nae kij.—Bwinbwin 23:23; Duteronomi 18:10-12; Aiseia 47:12-15; Jerbal 19:18-20.
20. Ewi wãwen ad maroñ jumae Devil eo?
20 Jej “jumae Devil” eo ilo ad bokake kien ko an Bible im katak ko remol im jutak bin nae e. Lal in ej emmakit ekkar ñan wãwen ko an Satan kinke ej anij eo an. (2 Dri Korint 4:4) Inem jej karmijeteik kadkad ko kadkadin lal in, ekoba utiej buru, kibbon, mour etton, kowadoñ, im arõk mweiuk. Jej jelã bwe Devil eo ear ko ke Jesus ear jumae e ilo an kajerbal Jeje ko ilo Bible ilo ien eo ear melejoñe ilo ene jemaden. (Matu 4:4, 7, 10, 11) Eindein, Satan enaj ‘ko jen kij’ elañe jej kõttãik kij ñan Jehovah kin aolepen buruõd im atartar ion ilo jar. (Dri Epesõs 6:18) Kin jibañ eo jen Jehovah Anij im Nejin eo ej jitenburu ibben, ejelok jabdewõt armij emaroñ kajorrãn kij ñan indio—ekoba Devil eo bareinwõt!—Sam Ko 91:9-11.
[Kamelele eo itulal]
^ Ñan kalaplok ad melele kin kein tarinae eo jen Anij, lale Imõniaroñroñ September 1, 2004 page 15-20.
Ta Uak Eo Am?
• Jej aikwij ke mijak Satan Devil eo?
• Etke Satan ej matõrtõre Ri Christian ro?
• Etke jej jar bwe jen ko jen “eo enana”?
• Ewi wãwen ad maroñ bõk anjo ilo tarinae eo ilo jitõb?
[Kajitõk ko ñan katak]
[Pija eo ilo peij 8]
Ri kalor ro reberan an Christ ilo jinoin rar tiljek ñan mij
[Pija eo ilo peij 9]
Devil eo ejjab maroñ bõpraik armij ro me Jehovah ej kememej ir ilo ien air jerkakbiji
[Pija eo ilo peij 10]
Kwoj jar ke bwe Anij en lomoren yuk jen “eo enana”?
[Pija eo ilo peij 11]
Kwoj kõnak ke aolepen “ken tõrinae an Anij”?