Kia Totoko ki a Satani, ti Hola Kehe a Ia!
Kia Totoko ki a Satani, ti Hola Kehe a Ia!
“Kia omaoma ai a mutolu ke he Atua; kia totoko atu a mutolu ke he [T]iapolo,ti hola kehe ai a ia ia mutolu.”—IAKOPO 4:7.
1, 2. (a) Ko e heigoa e puhala he Tiapolo ne kitia ke he talahauaga ne fakamau ia Isaia veveheaga 14? (e) Ko e heigoa e tau hūhū ka fakatutala a tautolu ki ai?
KO E Tiapolo ko e fakatai kelea muitui he fakaikaluga. Ko e fakatokoluga haana kua kitia ke he tau kupu ne fakamau he perofeta he Atua ko Isaia. He molea e senetenari ato eke a Papelonia mo pule ne mua he lalolagi, ne fakamailoga e tau tagata ha Iehova ke taute e talahauaga totoko nei ke he “patuiki i Papelonia”: “Ko koe foki ne pehe hifo ke he hau a loto, To hake au ke he lagi, to fakatu e au haku a nofoaiki ki luga he tau fetu he Atua [ko e tau patuiki he laini fakapatuiki ha Tavita], . . . to eke au ke tuga hana ne Mua ue Atu.” (Isaia 14:3, 4, 12-15; Numera 24:17) Ko e fakatokoluga he “patuiki i Papelonia” kua tatai ke he agaaga ha Satani, ko e “atua he lalolagi nai.” (2 Korinito 4:4) Ka ko e fakaikaluga ha Satani to fakahiku ke he matematekelea, ke tuga e kautū ha Papelonia ne fakahiku ke moumou fakamā.
2 Ka e he ha ha ai e Tiapolo, kua lata ke manamanatu a tautolu hagaao ke he tau hūhū tuga anei: Lata kia a tautolu ke matakutaku ki a Satani? Ko e ha ne fakalagalaga e ia e tau tagata ke favale ke he tau Kerisiano? Maeke fēfē ia tautolu ke kalo mai neke fakavaia he Tiapolo?
Kua Lata kia a Tautoluke Matakutaku ke he Tiapolo?
3, 4. Ko e ha e tau Kerisiano fakauku mo e tau hoa ha lautolu ne nakai matakutaku ke he Tiapolo?
3 Kua fakamalolō lahi e tau kupu nei ha Iesu Keriso ke he tau Kerisiano fakauku: “Ua matakutaku a koe ke he tau mena ko e mamahi ai ha ne fai a koe. Kitiala, ko e tuku ne fai he [T]iapolo e falu a mutolu ke he fale puipui, kia kamatamata ai a mutolu; to po hogofulu foki ke matematekelea ai a mutolu. Kia fakamoli a koe ato hoko ke he mate, ti ta atu ai e au e foufou he moui kia koe.” (Fakakiteaga 2:10) Ko e tau tagata fakauku mo e tau hoa ha lautolu ne moua e amaamanakiaga ke he lalolagi kua nakai matakutaku ke he Tiapolo. Ko e nakai matakutaku nei kua nakai tupu mai he malolō pauaki. Kua pihia ai ha ko e matakutaku fakalilifu ha lautolu ke he Atua mo e he ‘fakamalu ki lalo he malu he hana a tau tapakau.’—Salamo 34:9; 36:7.
4 Ko e tau tutaki nakai matakutaku fakamua atu ha Iesu Keriso kua kitia ke tua fakamōli ke hoko ke he mate pete ko e tau mena ne matematekelea a lautolu ki ai. Ne nakai kaumahala a lautolu he matakutaku ke he mena ka taute e Satani ko e Tiapolo, ha kua iloa e lautolu to nakai tiaki e Iehova a lautolu ne fakakite e mahani fakamōli ki a Ia. Tatai foki, he fehagai mo e favaleaga velagia he vahā foou nei, ko e tau Kerisiano fakauku mo e tau hoa ne tukulele ha lautolu kua fakamalolō ke nakai moumou e fakamōli ha lautolu ke he Atua. Pete ia, ne fakakite he aposetolo ko Paulo kua maeke he Tiapolo ke fakatupu e mate. Kua lata kia he mena ia ke fakamatakutaku a tautolu?
5. Ko e heigoa ne ako e tautolu mai he Heperu 2:14, 15?
5 Ne talahau e Paulo ne moua e Iesu e “tino he tagata moui” “kia fakaoti ai e ia ke he hana matulei a ia ne toka ai e kautu ke mate ai, ko e [T]iapolo haia. Kia toka noa ai foki a lautolu oti kua fakatupatupa he matakutaku ke he mate ke he mouiaga katoa ha lautolu.” (Heperu 2:14, 15) Ko “ia ne toka ai e kautu ke mate,” ne pule a Satani ki a Iuta Isakariota mo e fakaaoga e tau takitaki Iutaia mo e tau Roma ke fakahala a Iesu. (Luka 22:3; Ioane 13:26, 27) Ka e, puhala he mate poa haana ne fakatokanoa e Iesu e tau tagata agahala mai he kuku ha Satani ati maeke ia tautolu ke moua e moui tukulagi.—Ioane 3:16.
6, 7. Kua hoko ki fe e maeke ha Satani ke fakatupu e mate?
6 Kua hoko ki fe e maeke he Tiapolo ke fakatupu e mate? E, tali mai he kamataaga he feua kelea ha Satani, kua fakatupu mōli he tau pikopiko mo e tau takitakiaga haana e mate ke he tau tagata. Kua pihia ai ha kua agahala a Atamu mo e fakamole atu e agahala mo e mate ke he magafaoa he tagata. (Roma 5:12) Lafi ki ai, ne favale e tau fekafekau ha Satani he lalolagi ke he tau tagata tapuaki ha Iehova, ke hoko he falu magaaho ke he mate, ti pihia foki a lautolu ki a Iesu Keriso.
7 Pete he pihia, kua nakai lata ia tautolu ke manatu kua maeke he Tiapolo ke fakatupu e mate he ha tagata ni ne manako a ia ke tamate. Kua puipui he Atua a lautolu i lalo Haana mo e to nakai fakaai a ia ke fakaatā a Satani ke tatafi kehe e tau tagata tapuaki mōli oti kana he lalolagi. (Roma 14:8) Mōli, kua fakaatā e Iehova e favale ke hohoko ke he tau tagata oti kana haana, mo e fakaatā e ia e mate ke hokotia ke he falu ia tautolu ha ko e fua he tau ekefakakelea he Tiapolo. Pete he pihia, kua foaki mai he tau Tohiaga Tapu e amaamanakiaga homo ue atu he liu tu mai ma lautolu i loto he “tohi ke fakamanatu” he Atua—ti to nakai maeke e Tiapolo ke taofi e liu fakafoou he moui!—Malaki 3:16; Ioane 5:28, 29; Gahua 24:15.
Ko e Ha ne Favale Mai a Satani?
8. Ko e ha ne tamai he Tiapolo e favaleaga ke he tau fekafekau he Atua?
8 Kaeke ko e tau fekafekau fakamōli he Atua a tautolu, kua fai matapatu kakano ne tamai ai he Tiapolo e favaleaga ki a tautolu. Ko e foliaga haana ke fakaohooho a tautolu ke fakahui e tua. Kua ha ha ia tautolu e fakafetuiaga uho mo e ha tautolu a Matua he lagi, ti kua manako a Satani ke moumou ai. Kua nakai lata a tautolu ke ofo he mena nei. I Etena, ne talahau tuai e Iehova to ha ha ai e faitaua ke he vahāloto he “fifine” fakatai mo e “gata” mo e vahāloto foki he ‘tau tega’ ha laua. (Kenese 3:14, 15) Ne fakakite he tau Tohiaga Tapu e Tiapolo ko e “gata tuai” mo e fakakite kua tote haana magaaho mo e ita lahi a ia. (Fakakiteaga 12:9, 12) He holo ki mua e faitaua he vahāloto he ‘tau tega’ ne ua, kua lata ke amanaki a lautolu ne fekafekau tua fakamōli ki a Iehova ke moua e favale. (2 Timoteo 3:12) Kua mataala nakai a koe ke he kakano mōli he favaleaga fakasatani pihia?
9, 10. Ko e heigoa e matakupu ne fakatupu he Tiapolo, mo e hagaaki fēfē ke he mahani he tau tagata?
9 Ne fakatupu he Tiapolo e matakupu ke he pule katoatoa he lagi mo e lalolagi. Hagaao ki ai, ne paleko e ia e mahani fakamōli he tau tagata ke he Tufuga ha lautolu. Ne tamai e Satani e favale ke he tagata hakohako ko Iopu. Ko e ha? Ke moumou aki e mahani fakamōli ha Iopu ki a Iehova. Ne taute he hoana ha Iopu mo e “tau tagata fakamafana fakahukia” tokotolu haana e finagalo he Tiapolo he magaaho ia. Tuga ne fakakite i loto he tohi ha Iopu, ne paleko he Tiapolo e Atua, he talahau to nakai fakatumau ha tagata ke tua fakamōli ki a Ia kaeke fakaatā a Satani ke kamatamata e tagata ia. Ka e taofi mau e Iopu e mahani fakamōli haana, ati fakakite a Satani ko e pikopiko. (Iopu 1:8–2:9; 16:2; 27:5; 31:6) Kua favale e Tiapolo ke he Tau Fakamoli a Iehova he vahā nei he lali ke moumou e mahani fakamōli ha lautolu mo e fakakite e paleko haana ke mōli.
10 He iloa kua tamai he Tiapolo e favale ki a tautolu ha kua ukufakina a ia ke moumou ha tautolu a mahani fakamōli ke he Atua ka lagomatai mōli a tautolu ke fakamalolō mo e fakamanavalahi. (Teutaronome 31:6) Ko e Atua ha tautolu ko e Pule Katoatoa he Lagi mo e Lalolagi, mo e to lagomatai e ia a tautolu ke fakatūmau e mahani fakamōli. Kia lali tumau a tautolu ke fakafiafia e loto ha Iehova he eke mo tau tagata mahani fakamōli, he foaki ki a ia e tali ke he fakafiufiu ne mua, ko Satani ko e Tiapolo.—Tau Fakatai 27:11.
‘Laveaki Mai a Mautolu ia Ia ne Mahani Kelea’
11. Ko e heigoa e kakano he ole, “Aua neke uta e koe a mautolu ke he kamatamata”?
11 Ke mahani fakamōli kua nakai ko e mena mukamuka; kua lata ke liogi fakamakamaka. Kua mahomo atu e lagomatai he tau kupu he liogi fakatai. Ke he falu vala, ne pehē a Iesu: “Aua neke uta e koe a mautolu ke he kamatamata, ka e laveaki mai a e koe a mautolu [“ia ia ne mahani kelea,” NW].” (Mataio 6:13) Kua nakai kamatamata e Iehova a tautolu ke agahala. (Iakopo 1:13) Ka e, vagahau e tau Tohiaga Tapu he falu magaaho ke he tau mena ne taute po ke fakatupu e ia, ka ko e mōli, kua fakaatā e ia ke tutupu. (Ruta 1:20, 21) He liogi, mogoia, ne tuga fakakite e Iesu kua ole a tautolu ki a Iehova ke nakai tiaki a tautolu ke he kamatamata. Mo e to nakai taute pihia e ia, ha kua fakamōli mai faka-Tohiaga Tapu: “Kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.”—1 Korinito 10:13.
12. Ko e ha ne liogi a tautolu: “Laveaki mai a e koe a mautolu [ia ia ne mahani kelea]”?
12 He mole e totoku e kamatamata i loto he liogi fakatai, ne talahau fakatonu e Iesu: “Laveaki mai a e koe a mautolu [ia ia ne mahani kelea].” Kua totou he falu fakaliliuaga he Tohi Tapu: “Laveaki mai a e koe a mautolu he mena kelea” (Revised Standard Version) po ke “Puipui mai a mautolu he mena kelea.” (Contemporary English Version) Pete ia, i loto he tau Tohiaga Tapu, ko e talahauaga “laveaki mai” kua matapatu e fakaaoga ke he tau tagata, mo e hagaaki e Evagelia ha Mataio ke he Tiapolo ‘ko e Kamatamata,’ ko e tagata. (Mataio 4:3, 11) Ti kua aoga ke liogi ke laveaki mai “ia ia ne mahani kelea,” ko Satani ko e Tiapolo. Ne lali a ia ke fakahēhē a tautolu ke agahala ke he Atua. (1 Tesalonia 3:5) He magaaho ka ole a tautolu, “Laveaki mai a e koe a mautolu [ia ia ne mahani kelea],” kua ole a tautolu ke he ha tautolu a Matua he lagi ke takitaki mo e lagomatai a tautolu neke fakavai he Tiapolo.
Aua Neke Fakavai he Tiapolo
13, 14. Ko e ha ne lata e tau Korinito ke hiki e puhala ne fakafehagai a lautolu mo e tagata he fakapotopotoaga ne mahani kelea fakamua?
13 He magaaho ne hataki e Paulo e tau Kerisiano i Korinito ke fakamagalo atu, ne tohia e ia: “Ko ia kua fakamagalo atu e mutolu ha mena ki ai, kua pihia foki au; ha ko e mena kaeke kua fakamagalo atu e au ha mena, ko e mena kua fakamagalo atu kua fakamagalo ni ha ko mutolu ki mua a Keriso; neke fakavai a tautolu e Satani; nukua nakai pouli a tautolu ke he hana tau lagatau.” (2 Korinito 2:10, 11) Kua maeke he Tiapolo ke fakavaia a tautolu ke he tau puhala kehekehe, ka ko e ha ne talahau e Paulo e tau kupu i luga?
14 Ne akonaki e Paulo e tau Korinito ha kua fakaatā e lautolu e tagata mahani kelea ke nofo mau he fakapotopotoaga. Ti liga fiafia lahi a Satani ke he mena nei, ha kua moua he fakapotopotoaga e akonakiaga he tokanoa e “feuaki pihia foki kua nakai talahaua ke he tau motu kehe.” Fakahiku, ne tuku ki tua e tagata ne hehē. (1 Korinito 5:1-5, 11-13) Ne tokihala e tagata he magaaho fakamui. Kaeke nakai mahalo e tau Korinito ke fakamagalo mo e liu talia e tagata ia, to fakavai he Tiapolo a lautolu ke he taha puhala foki. Puhala fe? To maō kikiha mo e nakai fakaalofa noa a lautolu, ke tuga ni a Satani. Kaeke e tagata tokihala ke “mahala a ia ke he momoko kua lahi ue atu” mo e tiaki katoatoa e tua, to lalago lahi ke he tau motua e falu matagahua nei ki mua he fakaalofa noa he Atua, ko Iehova. (2 Korinito 2:7; Iakopo 2:13; 3:1) E, kua nakai fai Kerisiano mōli ka manako ke fifitaki a Satani he mahani favale, maō kikiha, mo e nakai fakaalofa noa.
Puipui he Tapulu Tau Mai he Atua
15. Ko e heigoa e felakutaki ne tau a tautolu ki ai, mo e ko e heigoa ka falanaki e kautūaga ki ai?
15 Kaeke ke laveaki mai a tautolu he Tiapolo, kua lata ia tautolu ke tau he felakutaki fakaagaaga ke he tau kau agaaga kelea. Ke kautū mai he tau totokoaga pihia kua falanaki ke he tui e tautolu e “tau tapulu tau katoa he Atua.” (Efeso 6:11-18) Putoia ke he tapulu tau nei ko e “ufi kahokaho ko e tututonu haia.” (Efeso 6:14) Ne nakai omaoma e Patuiki ko Saulo i Isaraela i tuai ke he Atua mo e matematekelea he nakai ha ha ai e agaaga tapu. (1 Samuela 15:22, 23) Ka e ka fakagahua e tautolu e tututonu mo e tui katoa e tapulu tau fakaagaaga, to ha ha ia tautolu e agaaga tapu he Atua mo e puipui kua lata ke totoko ki a Satani mo e tau agelu kelea haana, ko e tau temoni.—Tau Fakatai 18:10.
16. Maeke fēfē ia tautolu ke puipui tumau mai he tau matakau agaaga kelea?
16 Ke puipui tumau mai he tau kau agaaga kelea, kua lata ia tautolu mai he falu mena foki, ke totou mo e fakaako tumau e Kupu he Atua, he fakaaoga fakamitaki e tau tohi ne foaki puhala he “fekafekau pule.” (Luka 12:42) To fakapuke ai e manamanatuaga ha tautolu aki e tau mena atihake fakaagaaga, ke felauaki mo e fakatonuaga a Paulo: “Ko e tau matakainaga na e, ko e kupu hanai kua toe; ko e tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai, kia manamanatu a mutolu ke he tau mena ia.”—Filipi 4:8.
17. Ko e heigoa ka lagomatai a tautolu ke lauia mitaki ko e tau tagata fakapuloa he tala mitaki?
17 Kua fakaatā e Iehova a tautolu ke “afi foki ha [ta]utolu a tau aloalohui ke he tauteaga he vagahau mitaki ke mafola ai.” (Efeso 6:15) Ko e fakalataha tumau ke he tau feleveiaaga Kerisiano ka tauteute a tautolu ke fakapuloa e tala mitaki he Kautū he Atua. Ko e fiafia ha ia ne moua e tautolu mai he lagomatai falu ke fakaako e kupu mōli he Atua mo e mailoga e tokanoaaga fakaagaaga! (Ioane 8:32) Ko e “pelu he [a]gaga ko e kupu he Atua haia,” kua aoga lahi ke puipui mai he tau fakaakoaga fakavai mo e “ke ulu ai e tau kolo.” (Efeso 6:17; 2 Korinito 10:4, 5) He fakaaoga fakailoilo e Kupu tohia he Atua, ko e Tohi Tapu, ka lagomatai a tautolu ke fakaako e kupu mōli mo e puipui a tautolu neke mahala ke he tau lagatau he Tiapolo.
18. Maeke fēfē ia tautolu ke ‘tutū mau ke totoko atu ke he tau lagatau he Tiapolo’?
18 Ne hafagi e Paulo e fakatūtalaaga haana ke he tapulu tau fakaagaaga ha tautolu he talahau: “Kia fakamalolo a mutolu ke he Iki ke he malolo he hana mana. Kia tapulu a mutolu ke he tau tapulu tau katoa he Atua, kia maeke ia mutolu ke [“tutū mau ke,” NW] totoko atu ke he tau lagatau he [T]iapolo.” (Efeso 6:10, 11) Ko e kupu Heleni ne fakaliliu “tutū mau” kua hagaao ke he kautau ne leoleo e tuaga haana. Kua tumau a tautolu ke he felakutaki fakaagaaga, pete he fakaaoga e Satani e tau lagatau kelea loga he lali a ia ke moumou e kaufakalataha ha tautolu, fakakeukeu e tau fakaakoaga, po ke moumou e mahani fakamōli ha tautolu ke he Atua. Ka ko e tau ekefakakelea he Tiapolo kua nakai la kautū ia—mo e to nakai fakaai! *
Totoko e Tiapolo, ti Hola Kehe a Ia
19. Ko e heigoa taha puhala ke fakamalolō he totoko atu ke he Tiapolo?
19 Maeke ia tautolu ke kautū ke he felakutaki fakaagaaga ha tautolu ke he Tiapolo mo e kau he tau agaaga kelea i lalo he takitakiaga haana. Kua nakai fai kakano ke vivivivi he matakutaku ki a Satani, ha kua tohia he tutaki ko Iakopo: “Kia omaoma ai a mutolu ke he Atua; kia totoko atu a mutolu ke he [T]iapolo, ti hola kehe ai a ia ia mutolu.” (Iakopo 4:7) Taha e puhala ke fakamalolō he totoko ki a Satani mo e tau mena momoui fakaagaaga kelea ne kau mo ia, he nakai putoia ke he lagatau taulatua po ke tau matagahua fakamana mo e mo lautolu ne putoia ki ai. Kua fakakite fakamaali he tau Tohiaga Tapu ko e tau fekafekau ha Iehova kua lata ke fakamamao mai he kumi e tau fakamailoga po ke fakalataha ke he kumikumiaga ke he pulagi likoliko, talahau tuai fakataulatua, po ke matutakiaga fakataulatua. Kaeke kua hakahakau mo e malolō fakaagaaga a tautolu, kua nakai lata ia tautolu ke matakutaku neke tuku he taha tagata e malaia ki a tautolu.—Numera 23:23; Teutaronome 18:10-12; Isaia 47:12-15; Gahua 19:18-20.
20. Maeke fēfē ia tautolu ke totoko ke he Tiapolo?
20 Kua “totoko atu a tautolu ke he [T]iapolo” he pipiki mau ke he tau tutuaga mo e tau kupu mōli he Tohi Tapu mo e he tutū mau ke totoko atu ki a ia. Kua felautatai e lalolagi mo Satani ha ko ia e atua he lalolagi. (2 Korinito 4:4) Kua fakaheu mogoia e tautolu e tau puhala he lalolagi, tuga e fakatokoluga, lotokai, mahani feuaki, favale, mo e velevelekoloa. Iloa e tautolu ne hola kehe e Tiapolo he totoko e Iesu e tau lagatau haana he fakaaoga e tau Tohiaga Tapu he magaaho ne kamatamata he tutakale. (Mataio 4:4, 7, 10, 11) Tatai foki, ko Satani to ‘hola kehe a ia ia tautolu’ he nakai kautū kaeke omaoma katoatoa a tautolu ki a Iehova mo e liogi mo e falanaki ki a Ia. (Efeso 6:18) Mo e lalago mai ha Iehova ko e Atua mo e Tama fakahelehele haana, to nakai maeke ha tagata ke ekefakakelea tukulagi a tautolu—ti nakai fakaai foki e Tiapolo!—Salamo 91:9-11.
[Matahui Tala]
^ para. 18 Ma e falu vala tala ke he tapulu tau fakaagaaga mai he Atua, kikite The Watchtower, Me 15, 1992, lau tohi 21-3.
Ko e Heigoa e Tali Haau?
• Lata kia a tautolu ke matakutaku ki a Satani ko e Tiapolo?
• Ko e ha ne tamai e Satani e favale ke he tau Kerisiano?
• Ko e ha ne liogi a tautolu ke laveaki mai “ia ia ne mahani kelea”?
• Maeke fēfē ia tautolu ke kautū he tau he felakutaki fakaagaaga?
[Tau Hūhū he Fakaakoaga]
[Fakatino he lau 12]
Ne tua fakamōli e tau tutaki fakamua atu he Keriso ke hohoko ke he mate
[Fakatino he lau 13]
Nakai maeke he Tiapolo ke taofi e fakaliu tu maiha lautolu ne ha ha he manamanatuaga a Iehova
[Fakatino he lau 14]
Liogi nakai a koe ke laveaki mai “ia ia ne mahani kelea”?
[Fakatino he lau 15]
Kua tui nakai e koe e “tautapulu tau katoa he Atua”?