Sumpaen si Satanas, tan Arawian To Kayo!

‘Ontulok kayo ed Dios; balet sumpaen yo so Diablo, tan sikato so onarawi ed sikayo.’​—SANTIAGO 4:7.

1, 2. (a) Anton kagagawa na Diablo so nipabitar diad panangiyabawag a nikurit diad Isaias kapitulo 14? (b) Antoran tepet so singbaten tayo?

 SAY Diablo so mauge-uges ya alimbawa na inkamapaatagey. Napatnagan so panagpaatagey to diad saray salitan inkurit na propeta na Dios a si Isaias. Masulok a sakey a siglo sakbay nin nagmaliw a manunan pakayari na mundo so Babilonia, saray totoo nen Jehova so nirepresenta lan mangiyaabawag ed sayan deklarasyon sumpad “ari na Babilonia”: “Ikuan mo ed pusom, Onkalab ak ed tawen. Ipaatagey ko so yurongan ko ed tagey na saray bibitewen na Dios [arari ed maarin linya nen David] . . . Gawaen ko so inkasiak a singa say Sankatageyan.” (Isaias 14:3, 4, 12-15; Numeros 24:17) Say panagpaatagey na “ari na Babilonia” so mipadpara ed awawey nen Satanas, “say dios na sayan panaon” odino sistema na bengabengatla. (2 Corinto 4:4) Balet mansumpal ed desyang so panagpaatagey nen Satanas, a singa met say dinastiya na Babilonia et nansumpal ed makapabaing ya anggaan.

² Anggaman ontan, lapud wala ni so Diablo, nayarin pampapagaan tayo irayan tepet: Nepeg tayo kasin takotan si Satanas? Akin a sasagyaten to so totoo a mamasegsegang ed saray Kristiano? Panon tayon napaliisan so panalonggaring ed sikatayo na Diablo?

Nepeg Tayo Kasin Takotan so Diablo?

3, 4. Akin ya ag-antakot ed Diablo iray matoor ya alanaan a Kristiano tan saray kaiba ra?

³ Makapabiskeg ed saray alanaan a Kristiano irayan salita nen Jesu-Kristo: “Agka ontakot na mogmo ed saray bengatla ya asingger la ya akoen mo: Nia, say diablo asingger lay pangiyan to ed arum ed sikayo ed panangipangawan, pian nasali kayo; tan wala so irap yo ed samploy agew. Mansiansia ka angga ed patey, tan siak iter ko ed sika so balanget na bilay.” (Apocalipsis 2:10) Saray alanaan tan saray kakaiba ra a walaay mangaraldalin ya ilalo so ag-antakot ed Diablo. Satan ya agda itatakot et agmakasengeg ed nisipor ya inkakpel. Abayuboan da itan lapud mapagalang a takot da ed Dios tan ‘manmamatalek ira ed silong na sirum na payapayak to.’​—Salmo 34:9; 36:7.

⁴ Saray makpel a babangatan nen Jesu-Kristo nensaman so apaneknekan a matoor anggad patey anggaman ed saray sinagmak da. Ag-ira tinmakot ed nagawaan nen Satanas a Diablo, lapud amta ra ya agbalot paulyanan nen Jehova iramay nanmatoor ed Sikato. Ontan met, diad pirmin panamasegsegang natan, saray alanaan a Kristiano tan saray dedikadon kakaiba ra so determinadon manmatoor ed Dios. Balet, impabitar nen apostol Pablo a nayarian na Diablo a pawalaen so sengegan  na ipapatey. Nepeg itayo kasin ontakot ed satan?

5. Anto so naaralan tayo ed Hebreos 2:14, 15?

⁵ Inkuan nen Pablo a si Jesus so ‘akinabang ed laman tan dala’ pian “lapud ipapatey bagbagen to so kawalaan na pakayari na ipapatey, salanti, say diablo; tan ilaban to ra ed amin lapu ed takot da ed ipapatey wala ran amin ed legan na bilay da ya impauleyan ed inkaaripen.” (Hebreos 2:14, 15) Bilang ‘walaan na pakayari na ipapatey,’ akontrol nen Satanas si Judas Iscariote insan inusar to iray Judion lider tan saray Romano pian pateyen si Jesus. (Lucas 22:3; Juan 13:26, 27) Balet, diad panamegley na masakripisyon impatey nen Jesus, imbulos to so makasalanan a katooan manlapud panangontrol nen Satanas tan ginawa ton posible ed sikatayo so pakawalaan na andi-anggaan a bilay.​—Juan 3:16.

6, 7. Anggad anton laknab so pakasarag nen Satanas a pansengegan na ipapatey?

⁶ Anggad anton laknab so pakasarag na Diablo a pansengegan na ipapatey? Bueno, manlapu la’d inggapo na marelmeng iran gawa nen Satanas, saray katilaan tan panangiwanwan to so nansengegan na impatey na totoo. Ontan so agawa lapud nankasalanan si Adan tan impasa to ed katooan so kasalanan tan ipapatey. (Roma 5:12) Niarum ni, saray aripen nen Satanas diad dalin so mamapasegsegang ed saray mandadayew ed si Jehova, a no maminsan et papateyen da ni ingen ira, a singa ginawa ra ed si Jesu-Kristo.

⁷ Anggaman kuan, agtayo nepeg a nonoten a nayarian na Diablo a pateyen so siopaman ya indibidual a labay ton pateyen. Sasalimbengan na Dios iray totoo To tan agton balot abuloyan si Satanas a mangupot ed amin a tuan mandadayew diad dalin. (Roma 14:8) Tua, aabuloyan nen Jehova a napasegsegang so amin a totoo to, tan aabuloyan to so ipapatey ya onsabi ed arum ed sikatayo bilang resulta na iyaataki na Diablo. Ingen, itatarya na Kasulatan so alay abig ya ilalo na kikioli parad saramay walad “libro a pakanodnonotan”​—tan anggapon balot so nagawaan na Diablo pian amperen itan a pangipawil ed bilay!​—Malaquias 3:16; Juan 5:28, 29; Gawa 24:15.

Akin a Papasegsegangen Itayo nen Satanas?

8. Akin a papasegsegangen na Diablo iray lingkor na Dios?

⁸ No matoor itayon lingkor na Dios, wala so manunan rason no akin a papasegsegangen itayo na Diablo. Say gagala to et pian ikompromiso tayo so pananisia tayo. Walaan itayo na mablin relasyon ed mangatatawen ya Ama tayo, tan satan so labay nen Satanas a deralen. Ag-itayo la nepeg a nasurprisa ed satan. Diad Eden, impasakbay nen Jehova a wala so gulaan ed baetan na simbolikon “bii” a kien to tan say “uleg” tan ed baetan na “saray ilalak [“bini,” NW]” da. (Genesis 3:14, 15) Impabidbir na Kasulatan so Diablo bilang say “daan ya uleg” tan imparungtal na satan ya antiktikey lay panaon to kanian pirmi so sanok to. (Apocalipsis 12:9, 12) Legan a mantutultuloy so gulaan ed  baetan na duaran “bini,” nailaloan na saramay matoor a manlilingkor ed si Jehova a napasegsegang ira. (2 Timoteo 3:12) Amta yo ta so peteg a rason no akin a papasegsegangen itayo nen Satanas?

9, 10. Anton isyu so pinalesa na Diablo, tan panon a misiglaotan ed satan so kondukta na totoo?

⁹ Pinalesa na Diablo so isyu na sankatalbaan ya inkasoberano. Mitunosan ed satan, sinuppiat to so katooran na totoo ed Manamalsa ra. Indapo nen Satanas so segsegang ed maptek a toon si Job. Akin? Ta pian buyaken to so integridad nen Job ed si Jehova. Say asawa nen Job tan say taloran ‘manamasegsegang a managligliwa’ to so kinmana a manumpal ed panlabayan na Diablo ed saman. Unong a nipatnag ed libro na Job, inangat na Diablo so Dios, ya ibabaga ton anggapo so toon makapanmatoor ed Sikato no abuloyan To si Satanas a manubok ed satan a too. Balet ta binembenan a malet nen Job so katooran to, kanian si Satanas so apaneknekan a matila. (Job 1:8–​2:9; 16:2; 27:5; 31:6) Papasegsegangen na Diablo iray Tasi nen Jehova natan ta pian nabuyak so katooran da tan napaneknekan a tua so iyaangat to.

¹⁰ Diad tua et natulongan itayon magmaliw a makpel tan mabiskeg diad pakaamtan papasegsegangen itayo na Diablo lapud sikato so desperadon mamuyak ed katooran tayo ed Dios. (Deuteronomio 31:6) Say Dios tayo so Soberano ed Uniberso, tan sikatayo so tulongan to pian napansiansia tayo so katooran tayo. Komon ta naynay tayon panggunaetan a paliketen so puso nen Jehova diad pagmaliw tayon manamemben-katooran, a mangiter itayo ed sikato na ebat ed baleg a managbalaw, si Satanas a Diablo.​—Uliran 27:11.

‘Ilaban Mo Kami ed Mauges’

11. Anto so kabaliksan na kerew ya, “Agmo kami ‘yabuloy ed tukso”?

¹¹ Aliwan mainomay so pamemben na katooran; mankaukolan itan na masimoon a panagpikasi. Nagkalalo lan makatulong iray salita ed panuliranan a pikakasi. Bilang kabiangan na satan, oniay imbaga nen Jesus: “Agmo kami ‘yabuloy ed tukso, ilaban mo kami ingen ed mauges.” (Mateo 6:13) Ag-itayo tutuksoen nen Jehova pian mankasalanan. (Santiago 1:13) Balet, no maminsan et sasaglawien na Kasulatan so nipaakar ed gagawaen to iran bengatla odino sikato so pansesengegan, anta diad tua et aabuloyan to lambengat iratan. (Rut 1:20, 21) Diad pampikasi tayo sirin unong ed satan ya impabitar nen Jesus, kekerewen tayo ed si Jehova ya agto itayo aabuloyan a napelag ed tukso. Tan petepeteg a dengelen to itayo lapud oniay panamaseguro na Kasulatan ed sikatayo: “Say Dios matoor, ta agto kayo paulyan a natukso na onlabas ed nayarian yo; noag ingen pati tukso, manggawa met na dalan a paliisan, ta pian nayarian yo ya itepel.”​—1 Corinto 10:13.

12. Akin ya ipikasi tayon, ‘Ilaban mo kami ed mauges a sakey’?

¹² Kayari ton sinalambit so nipaakar ed pananukso diad panuliranan a pikakasi, oniay matukoy ya imbaga nen Jesus: ‘Ilaban mo kami ed mauges a sakey.’ Oniay nabasa ed arum a patalos na Biblia: “Iyagel mo kami ed samay Mauges” (Maung a Balita) odino “Salimbengan mo kami manlapud kaugsan.” (Contemporary English Version) Balet, say balikas ya ‘iyagel manlapud’ so manunan inusar diad Kasulatan nipaakar ed totoo, tan say Ebanghelyo nen Mateo so espisipikon manutukoy ed Diablo bilang say “Mananukso,” sakey a persona. (Mateo 4:3, 11) Kanian importante ya ipikasi tayo so kilaban manlapud ‘mauges a sakey,’ si Satanas a Diablo. Sasalien to itayon anamoten pian mankasalanan tayo ed Dios. (1 Tesalonica 3:5) Sano ikerew tayo ya, ‘Ilaban mo kami ed mauges a sakey,’ kekerewen tayo ed mangatatawen ya Ama tayo ya iwanwan tan tulongan to itayo ta pian agtayo natalonggaringan na Diablo.

 Agpatatalonggaringan ed Diablo

13, 14. Akin a kinaukolan a manguman iray taga-Corinto diad pidedeneng da ed sakey a laki diad loob na kongregasyon ya akagawa na imoralidad?

¹³ Sanen pinaseseg nen Pablo iray Kristiano diad Corinto a magmaliw a manamerdona, oniay insulat to: “Samay pamerdonaan yo na bengatla, perdonaen ko met; ta say pinerdonak met ed bengatla, sikatoy pinerdonak dia ed kakanaan yo, sikatoy pinerdonak sirin ed arap nen Kristo. Pian si Satanas agkomon manalonggaring ed sikatayo ed bengatla; ta aliwa itayon andi kabat ed saray kasiliban to.” (2 Corinto 2:10, 11) Nayarian na Diablo a talonggaringan itayo diad nanduruman paraan, balet akin ya imbalikas nen Pablo so inaon a teksto?

¹⁴ Binaat nen Pablo iray taga-Corinto lapud inabuloyan da so sakey ya imoral a too a mansiansia ed loob na kongregasyon. Seguradon amaliket itan ed si Satanas, lapud apabanday so kongregasyon ed impangosenti ra ed ‘lawanan ya anggapo ni ed saray Gentil’ odino ed limog na nasyones. Diad saginonor, satan a nankasalanan so inekal ed kongregasyon. (1 Corinto 5:1-5, 11-13) Balet, agnambayag et sikatoy nagbabawi. No saray taga-Corinto et agmamerdona tan agmangipawil ed satan a too, sikara so natalonggaringan na Diablo diad sananey nin paraan. Panon? Sikara so magmaliw a maruksa tan andiay-panangasi, a singa si Satanas a mismo. No say nagbabawi lan laki et “nalener ed alabas ya ermen to” tan ontunda lan manlingkor ed Dios, mas ambelat so eebatan na saray mamatatken diad arap na mapangasin Dios a Jehova. (2 Corinto 2:7; Santiago 2:13; 3:1) Siempre, anggapo so tuan Kristiano a malabay a mangalig ed si Satanas diad pagmaliw a maruksa, makapasakit, tan andiay-panangasi.

Asalimbengan ed Kinlong a Nanlapud Dios

15. Anton pibabakal so pibibiangan tayo, tan anto so akadependian na pambiktorya tayo?

¹⁵ Ta pian sikatayo so niyagel manlapud Diablo, nepeg itayon mibakal ed espiritual sumpad saray puersa na marelmeng ya espiritu. Say pambiktorya sumpad saratan so akadepende ed pangisulong tayo ed “sankabukel a kinlong na Dios.” (Efeso 6:11-18) Sayan kinlong so mangilaktip ed “kinlong na kaptekan.” (Efeso 6:14) Si Arin Saul na kadaanan ya Israel so tinmunganga ed Dios tan naandi ed sikato so masanton espiritu. (1 Samuel 15:22, 23) Balet no agamilen tayo so inkatunong tan isulong tayo so kompleton espiritual a kinlong, niwala ed sikatayo so masanton espiritu na Dios tan say kakkaukolan tayon proteksion sumpad si Satanas tan ed saray marelmeng ya anghel to, saray demonyo.​—Uliran 18:10.

16. Panon itayon mantultuloy a nasalimbengan sumpad saray puersa na marelmeng ya espiritu?

¹⁶ Pian mantultuloy itayon nasalimbengan sumpad saray puersa na marelmeng ya espiritu, nakaukolan tayon gawaen iray bengatla a singa say regular a pambasa tan panaral ed Salitay Dios, ya usaren a maong iray publikasyon ya itatarya na “managpaga a napanmatalkan.” (Lucas 12:42) Diad ontan et papanoen tayo so kanonotan tayo na makagunggona iran bengatla ed espiritual, a mitunosan ed simbawa nen Pablo: “Agagi, ganagana ’ray bengatlan matua, ganagana ’ray bengatlan gagalangen, ganagana ’ray bengatlan matunong, ganagana ’ray bengatlan malinew, ganagana ’ray bengatlan nababalita a maong: no wala so antokaman a kasimpitan, no wala so antokaman a daydayewen, morekdek yo so sarayan bengatla.”​—Filipos 4:8.

17. Anto so ontulong ed sikatayo pian magmaliw itayon epektibon manangiyabawag na maong a balita?

 ¹⁷ Tutulongan itayo nen Jehova a nawalaan na ‘salisali ya asapinan na panangiparaan ed ebanghelyo na kareenan.’ (Efeso 6:15) Say regular a pibibiang ed Makristiano iran pantitipon so manginlong ed sikatayo a mangiyabawag ed maong a balita na Panarian na Dios. Agaylan makapaliket so pakatulong tayo ed arum pian naaralan da so katuaan na Dios tan naeksperiensya ra so espiritual a kawayangan! (Juan 8:32) ‘Say kampilan na espiritu, salanti, say salitay Dios,’ so kakkaukolan pian naprotektaan itayo manlapud palson bangabangat tan pian ‘nabagbag iray malet a fortalezas’ odino saray bengatla a niletneg lan maong. (Efeso 6:17; 2 Corinto 10:4, 5) Say marundunong a pangusar ed nisulat a Salita na Dios, say Biblia, so ontulong ed sikatayon mangibangat ed katuaan tan manalimbeng ed sikatayo manlapud saray kasiliban na Diablo.

18. Panon itayon “ontalindeg” sumpad saray panangalot na Diablo?

¹⁸ Inggapo nen Pablo so impaningbat to ed espiritual a kinlong tayo diad impangikuan ton: “Ombiskeg kayo komon ed Katawan, tan dia ed biskeg na pakayari to. Isulong yo so sankabukel a kinlong na Dios, pian nayarian yo so ontalindeg ya onsumpa ed saray pangalot na Diablo.” (Efeso 6:10, 11) Say Griegon salita a nipatalos ya “ontalindeg” so misiglaotan ed pansiansia na sakey a sundalo diad puesto to. Mansiansia itayon akatalindeg diad espiritual a pibabakal, anggaman uusaren nen Satanas so nanduruman masilib iran paraan to pian guloen so pankakasakey tayo, deralen iray bangat tayo, odino buyaken so katooran tayo ed Dios. Balet agni tinmalona iray panangataki na Diablo​—tan agbalot ontalona iratan! *

Sumpaen so Diablo, tan Arawian To Kayo

19. Anto so sakey a paraan pian makaopensa itayo sumpa ed Diablo?

¹⁹ Ontalona itayo diad espiritual a pibabakal tayo sumpad Diablo tan ed marelmeng iran puersa na espiritu ya iwawanwan to. Anggapo so rason pian takotan si Satanas, lapud oniay insulat nen babangatan a Santiago: “Ontulok kayo . . . ed Dios; balet onsumpa kayo ed Diablo, et sikato so onarawi ed sikayo.” (Santiago 4:7) Sakey a paraan pian makaopensa itayo sumpad si Satanas tan ed saray kamuyong ton marelmeng ya espiritun pinalsa et diad sigpot ya ipaliis ed okultismo odino saray panagmahiko tan ed saramay mangaagamil ed satan. Malinew ya ipapabitar na Kasulatan a saray lingkor nen Jehova so nepeg ya agmandepende ed saray signos odino mibiang ed astrolohiya, panagsalamangka, tan espiritismo. No aktibo tan mabiskeg itayo ed espiritual, agtayo nakaukolan so ontakot ya ompan walay mankantaritas ed sikatayo.​—Numeros 23:23; Deuteronomio 18:10-12; Isaias 47:12-15; Gawa 19:18-20.

20. Panon tayon nasumpa so Diablo?

²⁰ ‘Sumpaen tayo so Diablo’ diad itulok ed saray estandarte tan katuaan na Biblia tan diad malet ya italindeg sumpad sikato. Say mundo so mitunosan ed si Satanas lapud sikato so dios na satan. (2 Corinto 4:4) Kanian ipulisay tayo iray awawey na mundo, a singa say inkamapaatagey, inkasiblet, imoralidad, karawalan, tan materyalismo. Amta tayo ya inmarawi so Diablo sanen niresistian nen Jesus so panangataki to diad impangaon ed Kasulatan sanen sikatoy tutuksoen to diad kalawakan. (Mateo 4:4, 7, 10, 11) Ontan met, si Satanas so ‘onarawi ed sikatayo’ ya agmanbiktorya no sigpot itayon manpasakop ed si Jehova tan masimoon itayon manmatalek ed Sikato. (Efeso 6:18) Diad tulong nen Jehova a Dios tan say pinabli ton Anak, anggapo so permanentin makapasakit ed sikatayo​—anggapo, anggan say Diablo!​—Salmo 91:9-11.

[Saray paimano ed leksab]

Anto so Ebat Yo?

• Nepeg tayo kasin takotan si Satanas a Diablo?

• Akin a papasegsegangen nen Satanas iray Kristiano?

• Akin ya ipikasi tayo so kilaban manlapud ‘mauges a sakey’?

• Panon itayon ontalona diad espiritual a pibabakal tayo?

[Tepetepet Parad Panagaral]

[Litrato ed pahina 26]

Makpel a nanmatoor iray akadkaunan patumbok nen Kristo anggad ipapatey

[Litrato ed pahina 27]

Agnayarian na Diablo ya amperen so kioli na saramay walad pakanodnonotan nen Jehova

[Litrato ed pahina 28]

Kasin ipipikasi yo so kilaban manlapud ‘mauges a sakey’?

[Litrato ed pahina 29]

Kasin isusulong yo so ‘sankabukel a kinlong a nanlapud Dios’?