Resisti Satanas, y Lo E Hui for di Nos!

“Somete boso na Dios. Resisti Diabel y e lo hui for di boso.”​—SANTIAGO 4:7.

1, 2. (a) Ki caracteristica di Diabel a keda revela den un declaracion cu tin para skirbi na Isaias capitulo 14? (b) Ki preguntanan nos lo trata?

DIABEL ta arogancia en persona. Su orguyo a wordo revela den palabranan cu Dios su profeta Isaias a skirbi. Mas cu un siglo prome cu Babilonia a bira e poder mundial dominante, Isaias a skirbi lo siguiente como si fuera ta e pueblo di Yehova tawata haci e declaracion aki contra e “rei di Babilonia”: “Bo a bisa den bo curason: ‘Lo mi subi na shelo; lo mi haci mi trono mas halto cu e streyanan di Dios [esta, e reinan di e liña di desendencia real di David] . . . Lo mi haci mi mes mescos cu e Haltisimo.’” (Isaias 14:3, 4, 12-15; Numbernan 24:17) E orguyo cu e “rei di Babilonia” a desplega tawata similar na e actitud di Satanas, “e dios di e mundo aki.” (2 Corintionan 4:4) Pero Satanas su arogancia lo termina den desaster, mescos cu e dinastia di Babilonia a yega na un fin bergonsoso.

² Sinembargo, tanten cu Diabel ta existi, tin algun pregunta cu podise ta precupa nos. Por ehempel: Nos mester tin miedo di Satanas? Dicon e ta instiga hende pa persigui cristiannan? Con nos por evita cu Diabel ta tuma bentaha riba nos?

Nos Mester Tin Miedo di Diabel?

3, 4. Dicon cristiannan ungi y nan compañeronan no tin miedo di Diabel?

³ Un cos cu a fortalece cristiannan ungi masha hopi ta e palabranan aki di Hesucristo: “No tene miedo di loke bo ta bai sufri. Mira, Diabel ta bai tira algun di boso den prizon, pa boso wordo poni na prueba, y boso lo sufri tribulacion dies dia largo. Sea fiel te na morto y lo mi duna bo e corona di bida.” (Revelacion 2:10) E unginan y nan compañeronan cu tin e speransa terenal no tin miedo di Diabel. E echo cu nan no tin miedo no ta pasobra di naturalesa nan tin curashi. Nan no tin miedo pasobra nan tin temor respetuoso pa Dios y ta ‘tuma refugio den e sombra di su halanan.’—Salmo 34:9; 36:7.

⁴ E disipelnan di Hesucristo den prome siglo no tawatin miedo y nan a keda fiel te na morto apesar di e cosnan cu nan a sufri. Nan no a entrega na miedo debi na loke Satanas e Diabel lo por a haci, pasobra nan tawata sa cu Yehova nunca lo a bandona personanan cu a duna prueba di ta leal na dje. Di igual manera, cristiannan ungi y nan compañeronan dedica ta determina pa no kibra nan integridad na Dios apesar di persecucion intenso cu ta tuma luga  awe. Sinembargo, apostel Pablo a indica cu Diabel lo por causa morto. Esei mester duna nos miedo?

5. Kico nos ta siña for di Hebreonan 2:14 y 15?

⁵ Pablo a bisa cu Hesus a “comparti den carni y sanger” asina cu “pa medio di [su] morto e por a destrui esun cu tawatin poder riba morto [of, “esun cu tin e medio pa causa morto”, NW], esta, Diabel, y por a libra esnan cu pa miedo di morto tawata someti na sclabitud henter nan bida.” (Hebreonan 2:14, 15) Satanas, como “esun cu tin e medio pa causa morto”, a tuma control di Hudas Iscariot y a uza e lidernan Hudiu y e Romanonan pa ehecuta Hesus. (Lucas 22:3; Huan 13:26, 27) Sinembargo, Hesus ta libra humanidad pecaminoso for di e gara di Satanas y ta haci posibel cu nos por haya bida eterno mediante su morto como un sacrificio.—Huan 3:16.

6, 7. Te na ki grado Satanas tin e medio pa causa morto?

⁶ Te na ki grado Diabel tin e medio pa causa morto? Wel, for di comienso di Satanas su carera di maldad, su guia y mentiranan a causa morto di hende. Ta asina pasobra Adam a peca y pues a pasa pica y morto pa e famia humano. (Romanonan 5:12) Ademas, Satanas su sirbidonan riba tera a persigui adoradonan di Yehova, tin biaha te mata nan, manera nan a haci den caso di Hesucristo.

⁷ No obstante, nos no mester pensa cu Diabel por causa morto di ken cu e kier. Dios ta proteha esnan cu ta pertenece na Dje y nunca lo e no permiti Satanas extermina tur adorado berdadero for di riba tera. (Romanonan 14:8) Ta berdad cu Yehova ta permiti persecucion bin riba henter su pueblo, y e ta permiti algun di nos muri a consecuencia di e atakenan di Diabel. Sinembargo, e Scritura ta ofrece nos e maraviyoso speransa di un resureccion pa esnan cu ta den Dios su “buki di memoria.” Anto Diabel no por haci absolutamente nada pa stroba e restauracion maraviyoso ei di bida!—Malakias 3:16; Huan 5:28, 29; Echonan 24:15.

Dicon Satanas Ta Persigui Nos?

8. Dicon Diabel ta trece persecucion riba e sirbidonan di Dios?

⁸ Si nos ta sirbidonan leal di Dios, tin un motibo basico dicon Diabel ta trece persecucion riba nos. Su meta ta pa pone nos actua contra di nos fe. Nos tin un relacion precioso cu nos Tata celestial, y Satanas kier destrui esei. Esaki no mester sorprende nos. Den Eden, Yehova a profetisa cu lo bai tin enemistad entre su “mohe” simbolico y e “colebra” y entre nan respectivo ‘simiñanan.’ (Genesis 3:14, 15) E Scritura ta identifica Diabel como “e colebra di antiguedad” y ta revela cu su tempo awor ta cortico y su furia ta grandi. (Revelacion 12:9, 12) Segun cu e enemistad entre e dos  ‘simiñanan’ ta sigui, e hendenan cu fielmente ta sirbi Yehova por spera cu nan lo ser persigui. (2 Timoteo 3:12) Abo ta conciente di e berdadero motibo tras di tal persecucion satanico?

9, 10. Diabel a lanta cua cuestion, y con e conducta di hende ta conecta cu esei?

⁹ Diabel a lanta e cuestion di soberania universal. Tambe el a lanta un otro cuestion cu ta conecta cu esei; el a cuestiona hende su integridad pa cu nan Creador. Satanas a trece persecucion riba e homber recto Job. Dicon? Afin di kibra Job su integridad na Yehova. Job su esposa y su tres ‘consoladonan miserabel’ a sirbi Diabel su proposito na e tempo ei. Manera e buki di Job ta mustra, Diabel a reta Dios, pretendiendo cu ningun hende lo no keda fiel na Dios si e permiti Satanas test e persona ei. Pero Job a tene duro na su integridad, y asina el a duna prueba cu Satanas ta un mentiroso. (Job 1:8–2:9; 16:2; 27:5; 31:6) Diabel ta persigui Testigonan di Yehova awe den un esfuerso pa kibra nan integridad y pa proba cu e tin rason.

¹⁰ Realmente, e echo cu nos sa cu Diabel ta trece persecucion riba nos pasobra desesperadamente e kier kibra nos integridad na Dios, por yuda nos tene curashi y ser fuerte. (Deuteronomio 31:6) Nos Dios ta e Soberano Universal, y lo e yuda nos mantene nos integridad. Laga nos semper purba haci Yehova su curason contento door di ta wardadonan di integridad, y asina e por contesta esun cu ta reproch’e sin fin, Satanas e Diabel.—Proverbionan 27:11.

“Libra Nos for di e Malbado”

11. Kico e peticion: “No hiba nos den tentacion”, kiermen?

¹¹ Ser un persona cu ta warda integridad no ta un asunto facil; e ta rekeri oracion sinsero. Vooral e palabranan di e oracion modelo ta hopi util. Den un parti di dje, Hesus a bisa: “No hiba nos den tentacion, ma libra nos for di e malbado.” (Mateo 6:13) Yehova no ta tenta nos pa comete pica. (Santiago 1:13) Sinembargo, e Scritura tin biaha ta bisa como si fuera ta Dios ta haci of causa algo, ora cu de echo, simplemente e ta permiti esei. (Rut 1:20, 21) Pues, door di resa manera Hesus a indica, nos ta pidiendo Yehova pa no laga nos cai den tentacion. Y lo e no haci esei, pasobra nos tin e garantia biblico aki: “Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.”—1 Corintionan 10:13.

12. Dicon nos ta pidi den oracion: “Libra nos for di e malbado”?

¹² Despues di a menciona tentacion den e oracion modelo, Hesus apropiadamente a bisa: “Libra nos for di e malbado.” Algun traduccion di Bijbel ta bisa: “Libra nos di e malo” (E Testament Nobo) of “Warda nos di malo.” (Testament Nobo di Nos Senjor Hesu-Cristo) Sinembargo, den e Scritura e expresion ‘libra for’ ta ser uza principalmente relaciona cu hende, y e Evangelio di Mateo ta referi na Diabel como “e Tentado”, un persona. (Mateo 4:3, 11) Pues ta importante pa pidi den oracion pa nos ser libra for di “e malbado”, Satanas e Diabel. E ta purba manipula nos pa nos comete pica contra Dios. (1 Tesalonicensenan 3:5) Ora nos ta haci e peticion: “Libra nos for di e malbado”, nos ta pidiendo nos Tata celestial pa guia nos y yuda nos pa Diabel no tuma bentaha riba nos.

 No Laga Diabel Tuma Bentaha Riba Bo

13, 14. Dicon e Corintionan tawatin cu cambia nan manera di trata un homber den e congregacion cu anteriormente tawata inmoral?

¹³ Ora cu Pablo a urgi cristiannan na Corinto pa nan ta dispuesto pa pordona, el a skirbi: “Ken cu boso pordona algo, mi tambe ta pordona; pasobra di berdad loke mi a pordona, si mi a pordona algo, mi a hacie pa boso motibo den e presencia di Cristo, pa Satanas no tuma bentaha riba nos; pasobra su trikinan no ta desconoci pa nos.” (2 Corintionan 2:10, 11) Diabel por tuma bentaha riba nos den varios manera, pero dicon Pablo a declara e palabranan cita aki?

¹⁴ Mas prome Pablo a scual e Corintionan pasobra nan a permiti un homber inmoral keda den e congregacion. Satanas lo mester tawata contento cu esei, ya cu reproche a bin riba e congregacion pasobra nan a tolera ‘inmoralidad cu no ta existi ni meimei di e paganonan.’ Cu tempo, e malechor a ser expulsa. (1 Corintionan 5:1-5, 11-13) Despues e homber a repenti. Si e Corintionan a nenga di pordona y restaura e homber ei, Diabel lo a tuma bentaha riba nan den un otro manera. Con asina? Nan lo tawata severo y sin misericordia, mescos cu Satanas mes. Si e homber arepenti mester a bira “desespera door di demasiado tristesa” y stop di sirbi Dios completamente, ta specialmente e ancianonan lo a carga un parti di e responsabilidad pa esaki dilanti di e Dios misericordioso, Yehova. (2 Corintionan 2:7; Santiago 2:13; 3:1) Claro cu ningun cristian berdadero lo kier imita Satanas door di ser cruel, severo y sin misericordia.

Proteha Door di e Armadura Cu Ta Bin di Dios

15. Ki guera nos ta bringa, y nos victoria ta depende di kico?

¹⁵ Pa nos por ser libra for di Diabel, nos tin cu bringa un guera spiritual contra e forsanan spiritual di maldad. Victoria contra tal spiritonan malbado poderoso ta depende di si nos tin “e armadura completo di Dios” bisti. (Efesionan 6:11-18) E armadura aki ta inclui “e corasa di husticia.” (Efesionan 6:14) Rei Saul di Israel di antiguedad a desobedece Dios y consecuentemente el a perde spirito santo. (1 Samuel 15:22, 23) Pero si nos ta practica husticia y tin e armadura spiritual completo bisti, nos lo tin Dios su spirito santo y e proteccion necesario contra Satanas y su angelnan malbado, e demoñonan.—Proverbionan 18:10.

16. Con nos por tin proteccion continuo contra e forsanan spiritual di maldad?

¹⁶ Pa nos por tin proteccion continuo contra e forsanan spiritual di maldad, nos tin cu, entre otro cosnan, lesa y studia e Palabra di Dios cu regularidad door di haci bon uzo di publicacionnan cu ‘e fiel mayordomo’ ta percura. (Lucas 12:42) Di e manera ei nos lo ta yenando nos mente cu asuntonan spiritual saludabel, na harmonia cu e conseho aki di Pablo: “Rumannan, tur loke ta berdadero, tur loke ta honorabel, tur loke ta husto, tur loke ta puro, tur loke ta bunita, tur loke ta di bon fama, si tin algun birtud y si tin algo digno di alabansa, laga esakinan ocupa boso mente.”—Filipensenan 4:8.

17. Kico lo yuda nos pa ta proclamadonan efectivo di e bon nobo?

¹⁷ Yehova ta haci posibel pa nos por tin nos  “pianan bisti cu e ekipo di e bon nobo di pas.” (Efesionan 6:15, NW) Participacion regular den reunionnan cristian ta ekipa nos pa proclama e bon nobo di e Reino di Dios. Ki un gran goso nos ta haya door di yuda otro hende siña e berdad di Dios y experencia libertad spiritual! (Huan 8:32) “E spada di e spirito, cual ta e Palabra di Dios”, ta indespensabel pa proteha nos mes contra siñansanan falso y pa “tumba cosnan fuertemente hancra.” (Efesionan 6:17; 2 Corintionan 10:4, 5, NW) Uzo habil di Dios su Palabra skirbi, Bijbel, ta yuda nos siña hende e berdad y ta proteha nos pa nos no cai pa e trikinan di Diabel.

18. Con nos por “para firme contra e trampanan di Diabel”?

¹⁸ Pablo a habri su consideracion di nos armadura spiritual bisando: “Sea fuerte den Señor, y den e forsa di su poder. Bisti e armadura completo di Dios, pa boso por para firme contra e trampanan di Diabel.” (Efesionan 6:10, 11) E palabra Griego traduci como “para firme” tin di aber cu un solda cu ta mantene su posicion. Nos ta keda para firme den e guera spiritual, aunke Satanas ta uza varios trampa den su esfuerso pa perturba nos unidad, corumpi nos siñansanan of kibra nos integridad na Dios. Pero te asina leu e atakenan di Diabel no tawatin exito, ni nan lo no tin exito nunca! *

Resisti Diabel, y E Lo Hui for di Nos

19. Cua ta un manera cu nos por tuma accion fuerte pa resisti Diabel?

¹⁹ Nos por tin exito den nos guera spiritual contra Diabel y e forsanan spiritual di maldad cu ta bou di su direccion. Nos no tin nodi tembla di miedo pa motibo di Satanas, pasobra disipel Santiago a skirbi: “Somete boso na Dios. Resisti Diabel y e lo hui for di boso.” (Santiago 4:7) Un manera cu nos por tuma accion fuerte pa resisti Satanas y e criaturanan spiritual di maldad cu ta coopera cu ne ta door di no tin nada di haci cu cosnan sobrenatural ni cu practicanan di magia ni cu bruheria ni cu e hendenan cu ta participa den nan. E Scritura ta mustra bon cla cu sirbidonan di Yehova mester rechasa buscamento di señal di algo cu ta bai pasa of participa den astrologia, adivinacion y spiritismo. Si nos ta keda ocupa cu actividadnan cristian y ta spiritualmente fuerte, nos no tin nodi tene miedo cu un hende lo haci bruha pa nos.—Numbernan 23:23; Deuteronomio 18:10-12; Isaias 47:12-15; Echonan 19:18-20.

20. Con nos por resisti Diabel?

²⁰ Nos ta “resisti Diabel” door di pega na norma- y berdadnan biblico y door di tuma un posicion firme contra dje. Mundo ta na harmonia cu Satanas pasobra e ta su dios. (2 Corintionan 4:4) Pesei nos ta rechasa e caracteristicanan di mundo, manera orguyo, egoismo, inmoralidad, violencia y materialismo. Nos sa cu Diabel a hui bai ora cu Hesus a resisti su atake door di uza e Scritura durante e tentacion den desierto. (Mateo 4:4, 7, 10, 11) Di igual manera, Satanas lo ‘hui for di nos’, totalmente derota, si nos ta completamente sumiso na Yehova y ta depende riba dje mediante oracion. (Efesionan 6:18) Cu e sosten di Yehova Dios y di su Yiu stima, ningun persona no por haci nos daño permanente; no, ni sikiera Diabel!—Salmo 91:9-11.

[Nota]

Kico Ta Bo Contesta?

• Nos mester tin miedo di Satanas e Diabel?

• Dicon Satanas ta trece persecucion riba cristiannan?

• Dicon nos ta pidi den oracion pa ser libra for di “e malbado”?

• Con nos por tin exito den bringa e guera spiritual?

[Preguntanan di Estudio]

[Plachi na pagina 26]

E siguidonan di Cristo den prome siglo no tawatin miedo y nan a keda fiel te na morto

[Plachi na pagina 27]

Diabel no por stroba e personanan cu ta den Yehova su memoria di ser resusita

[Plachi na pagina 28]

Bo ta pidi den oracion pa bo ser libra for di “e malbado”?

[Plachi na pagina 29]

Bo tin “e armadura completo di Dios” bisti?