Momtok er a Satan, Me Lechiis!

“Misei e molemolem ra Dios. E momtok ra diabelong me le chiis er kemiu.”​—JAKOBUS 4:7.

1, 2. (a) Ngera el terechedel a Diabelong a mocholt el ngar er a Isaia er a 14 el bliongel? (b) Ngera el ker a bo dosaod er ngii?

 A DIABELONG a ngar er a uchei el olechotel a kldidairreng. A kldidiul a rengul a mlocholt er a tekingel a profet er a Dios el Isaia. A betok er a dart el rak er a uchei e a beluu er a Babilon a mlo oba dereder er a beluulechad, ma rechedal a Jehovah a mlo omtok er a “king er a Babilon” el mesubed er ngii el kmo: “Ke milengedecheduch er a rengum el kmo, ‘Ak ngosechekl el mor a eanged ma kingellek er omerreder a mo mengaiuechit a btechengel a Dios. . . . mak mo ua ngikel Olab a Bek el Klisiich.’ ” (Isaia 14:3, 4, 12-15; Ulecherangel 24:17) A kldidairreng er a “king er a Babilon” a mle ua rengul a Satan, el “chelid er tial belulechad.” (2 Korinth 4:4) Engdi a kldidiul a rengul a Satan a mo nguemed, el di ua omengederederel a Babilon el mlo nguemed.

² A lolemolem el ngar er ngii a Diabelong, e ngkired el melatk aika el ker el kmo: Ngkired el mo medakt er a Satan? Ngera me ngoldubech er a rechad el mo odechelakl er a Rekristiano? Kede mekerang e diak demecheblad er a Diabelong?

Kid Ngkired el Mo Medakt er a Diabelong?

3, 4. Ngera uchul ma rengellitel el Kristiano ma rekldemir a diak lemedakt er a Diabelong?

³ Aika el tekingel a Jesus a kmal melisiich er a rengellitel el Kristiano el kmo: “Lak medakd a ikel bo mcharm er ngii. Mesang, a diabelong a soal mesuk rar bebil er kemiu ra kelebus el kirel mengarm er kemiu, me ko mo metik ra ringel el truich el sils. Bo le blak a rengum el mo lmuut ra kodall, me bo kbeskau a krone ra klengar.” (Chocholt 2:10) A rengellitel ma rekldemir el omeltkir a mo kiei er a chutem a diak lemedakt er a Diabelong. Tia el blekeurreng er tir a dimlak lengar er a chelsir el mei. Tiang a ngar er ngii e le te meluu er a Dios, me tir a ‘metik osebecheklir er a eungel osebekel.’​—Psalm 34:9; 36:7.

⁴ Tirke el dimlak lemedakt el disciplo er a Jesus Kristus er a ngar er a mong a uluutekangel a betok el ongarm el mo er a kodellir. Te dimlak lemedakt aike el bo loruul a Satan el Diabelong el mo er tir, e le te mle medengei el kmo a Jehovah a diak lechititerir a reblak a rengrir el chedal. Me ngdirrek el uaisei er a chelechang, a rengellitel ma remla tuib a rengrir el sechelirir a outekangel a odechelakl e melemolem el di blak a rengrir el mo er a Dios. Engdi, a apostol el Paulus a ulechotii el kmo a Diabelong a sebechel el mo uchul a kodall. Me tia el tekoi ngomekdakt er kid?

5. Ngera kede suubii er a Hebru 2:14, 15?

⁵ A Paulus a dilu el kmo a Jesus a “chouklekedall a tech ma rasech” misei el “loeak a kodellel  lokngemedii ngikel oba klisichel a kodall, el diabelong, el mle kirel me le mengubet tirikel rokui el mle sibai ra chelsel a klengar er tir el dakd ra kodall a uchul.” (Hebru 2:14, 15) Me “ngikel oba klisichel a kodall,” el Satan a siliseb er a Judas Iskariot e sola e uluusbech er a remengeteklir a Rechijudea ma rechad er a Rom el mekodir a Jesus. (Lukas 22:3; Johanes 13:26, 27) Me sera letengetengii a klengar er ngii, e a Jesus a ngilebetii a klechad er a klisichel a Satan me ngmocha er ngii a techelled el mo nguu a diak a ulebengelel el klengar.​—Johanes 3:16.

6, 7. Ngua ngera klungel el klisiich a loba Satan el omekoad?

⁶ Ngua ngera klungel el klisiich a loba Diabelong el omekoad er a rechad? A Satan er sera lomuchel er a mekngit el blekerdelel, e a blulekngel ma ongetikaik er ngii a mlo uchul a kodellir a rechad. Tia mlo uaisei e le a Adam a rirebet er a klengit, misei e a klengit ma kodall a mloiuul el mo er a telungalek er a klechad. (Rom 5:12) Ma dirrek, a remesiungel a Satan el ngar er a chutem a oldechelakl er a remengull er a Jehovah, e a lebebil er a taem e te mekodeterir el di ua isel lerirellii el mo er a Jesus Kristus.

⁷ Me nguaisei, engdi diak el kired el omdasu el kmo a Diabelong a sebechel el mekodir a ngii di el chad el soal, e le Dios a omekerreu er a rechedal me ngdiak lebecherei a Satan me lokngemedeterir a rokui el mengull er ngii el ngar er a chutem. (Rom 14:8) Ngmera el tekoi, a Jehovah a mechei a odechelakl el mo er a rokui el chedal, e dirrek el kongei ma rebebil er kid a mad e le ngodechelakl er a Diabelong a uchul. Engdi, a Biblia a meskid a kmal ungil el omelatk er a okiis el kirir tirke el “milluches er a babier” er a Dios​—e a Diabelong a kmal diak el sebechel el rullii a ngii di el ngerang el okebir sel semecheklel a klengar!​—Malakai 3:16; Johanes 5:28, 29; Rellir 24:15.

Ngera Uchul ma Satan a Oldechelakl?

8. Ngera uchul ma Diabelong a oldechelakl er a remesiungel a Dios?

⁸ A lsekum e kid a blak a rengud el mesiungel a Dios, e ngngar er ngii a uchul e a Diabelong a oldechelakl er kid. A moktek er ngii a soal el melemall er a kloumerang er kid. Ngar er ngii a ungil el deleuill er kid ma Demad el ngar er a eanged, tiaikid el tekoi a soal a Satan el melemall er ngii. Tiang a diak el mechas a rengud er ngii. Ngar er a Eden, e a Jehovah a dilu el kmo, ngmo er ngii a klauketui er a delongelel ngike el okesiu el “redil” ma “bersoech” ma ‘ruldidellel a rsechir.’ (Genesis 3:14, 15) A Biblia meketeklii el kmo a Diabelong a ngike el “chuodel el bersoech” ma temel a kekedeb e ngii oba meringel el cheldechuderreng er ngii. (Chocholt 12:9, 12) Ma lolemolem a klauketui er a delongelel aika el eru el klengelakel, e tirke el blak a rengrir el mesiou er a Jehovah a modechelakl. (2 Timoteus 3:12) Kau ke medengelii sel kmal uchul ma Satan a oldechelakl er kid?

9, 10. Ngera el tekoi a luleker er ngii a Diabelong, e a omerellir a rechad ngmekerang e mo uldimukl er ngii?

 ⁹ A Diabelong a uleker el kirel a llemeltel a Dios el mengedereder er a eanged ma chutem. El obengkel tia el tekoi e ngdirrek el uleker el kirel a blakerreng er a rechad el mo er a Omebelir. A Satan a mlo oldechelakl er a melemalt el chad el Job. Ngera uchul? E le ngmle soal el melemall er a blakerreng er ngii el mo er a Jehovah. A bechil a Job me tirke el tedei el ‘oltobed ongelaod el di omekcharm’ er ngii a uleltaut er a moktek er a Diabelong er seikid el taem. El ngar er a babier er a Job, e a Diabelong a milelsemai er a Dios el kmo ngdiak a chad el sebechel el melemolem er a blakerreng er ngii el mo er a Dios a lsekum a Satan a mo omekcharm er ngii. Engdi Job a mle urrekodel er a blakerreng er ngii, el ochotii a Diabelong el kmo ngbulak. (Job 1:8–2:9; 16:2; 27:5; 31:6) A Diabelong a oldechelakl er a Resioning er a Jehovah er a chelechang el osiik a cheldechulel el melemall er a blakerreng er tir e mo oltaut er sel omelsemai er ngii.

¹⁰ A dodengei el kmo a Diabelong a oldechelakl er kid e le ngsoal el melemall er a blakerreng er kid el mo er a Dios a sebechel el ngosukid el mo bekeu e mesisiich. (Duteronomi 31:6) A Dios er kid a Kot el Ngar er a Bab el Merreder, me ngsebechel el ngosukid el melemolem el blak a rengud. Ma blakerreng er kid bo lodeuir a rengul a Jehovah me bo lsebechel el onger er ngike el oltuub er ngii el Satan el Diabelong.​—Osisechakl 27:11.

“E Mosobelemam er Ngikel Mekngit”

11. Ngera belkul a ongit el kmo, “lak momekesiuekl er kemam er a chomengarm”?

¹¹ Ngdiak lebeot el tekoi a bo doba blakerreng; ngkmal lousbech a nglunguuch. A klou el ngeso a denguu er a nglunguchel a Jesus. A Jesus a dilu el kmo: “E lak momekesiuekl er kemam er chomengarm, e mosobelemam era mekngit.” (Matteus 6:13) A Jehovah a diak longetikaik er kid el mo er a klengit. (Jakobus 1:13) A lebebil er a taem e a Biblia a melekoi el kmo ngmeruul a tekoi el mo er ngii, engdi tia diak el belkul a kmo ngdi mechei me ngngar er ngii. (Ruth 1:20, 21) Me sel doluluuch el ua isel rolel el lulechotii a Jesus, e kede olengit er a Jehovah me ngdiak lechitid me derebet er a klengit. Ngdiak bo lechitid e le a Biblia a oterekeklii el kmo: “A Dios a blak a rengul, me ngdiak di lak loltaut er kemiu ra ikel medeel er kemiu lomengarm e le merekong, ngdirrek el rullemiu el mo sebechiu el mtekengelii chomengarm, e kudmeklii a rolel a chiis.”​—1 Korinth 10:13.

12. Ngera uchul me kede meluluuch el kmo: “Mosobelemam er ngikel mekngit”?

¹² Uriul er a ldelii sel tekoi el kirel omekesiuekl el ngar er a nglunguchel, e a Jesus a kmo: “Mosebelemam er Ngikel Mekngit.” A bebil er a Biblia a oidii el kmo: “Mosobelemam er a mekngit,”ma lechub e “Momekerreu er kemam er a mekngit.” Ngar er a Biblia, e a tekoi el kmo ‘mosobelemam’ a leblechoel el ousbech er ngii el kirir a rechad. Ma Evangkelio er a Matteus a melekoi er a Diabelong el kmo “Ngikel Mengarm” el chad. (Matteus 4:3, 11) Me ngklou a ultutelel a doluluuch me losobelid er “ngikel mekngit,” el Satan el Diabelong. Ngmelasem el mengetikaik er kid el mo er a klengit el omtok er a Dios. (1 Thesalonika 3:5) Me sel dolengit el kmo, “Mosobelemam er ngikel mekngit,” e kede olengit er a Demad el ngar er a eanged me lomekrael er kid e lengesukid me lak demecheblad er a Diabelong.

 Lak Demecheblad er a Diabelong

13, 14. Ngera uchul ma rengar er a Korinth a mle kirir el ngodechii a omerellir el bedul ngike el mla er a chelsel a ongdibel er tir el mlo er a deleboes el omeruul?

¹³ A Paulus er a longelechel er a Rekristiano er a Korinth el mo ousubes, e ngmilluches el kmo: “Cho mousubes ra chad ra telemellel. e ngak ma kuusubes er ngii. Ma lsekum ak uluusubes er ngii​—a le ngarngii a kirek lousubes er ngii​—e ak uluusubes er ngii er medal a Kristus el kiriu, el kirel me lak de mecheblad ra Satan: e ngdiak lak dodenge ulekbetil.” (2 Korinth 2:10, 11) Ngera uchul ma Paulus a melekoi el kmo a Diabelong a sebechel el ousbech a betok el rolel el mengeblad er kid?

¹⁴ A Paulus a milellach er a rengar er a Korinth e le te milecherei a mekngit el chad me ngngar er a chelsel a ongdibel. A Satan a kmal mlo ungil a rengul er a otuub el mlo er a ongdibel e le te kilengei me lemedechel a “deleboes, el ngiil blekeradel a diak de betik er ngii ra chelsir ar Chisentail.” A uriul e ngmilsuld a ngklel ngike el mirruul a mekngit. (1 Korinth 5:1-5, 11-13) E ngike el chad a ulebult er a uriul. A lsekum a rengar er a Korinth a diak lousubes er ngike el chad e louetkeu er ngii, e a Diabelong a mo sebechel el melasem er tir er a kuk ta er a rolel. El mekerang? Te mo melebsochel e diak lechubechubechad el di ua Satan. E le “ngmekngit a lresors ra dmolech el klengiterreng” ngike el ulebult el chad, me ngdikea losiou er a Dios, e a remechuodel a kirir el mo mesaod er tir er a medal a chubechub el Dios, el Jehovah. (2 Korinth 2:7; Jakobus 2:13; 3:1) Nguaisei, a mera el Kristiano a diak el soal el oukerebai er a Satan el rasechebeab el chad e debsochel e diak lechubechubechad.

A Klekedall er a Mekemad el Mla er a Dios a Omekerreu

15. Ngera el klaumekemad a doumekemad er ngii, ma bo dekats e kede ultuil er a ngerang?

¹⁵ A lsekum kede mo suobel er a ulekbat er a Diabelong, e ngkmal kired el mo er a klaumekemad er a klereng el omtok er a remekngit el reng. A bo dekats er tir e ngkired el oubail er sel “cherrungel klekedall ra mekemad, el klekedellel a Dios,” (Efesus 6:11-18) E tia el klekedellel a mekemad a uldimukl er ngii a “ulumiu le ngarngii a tekerengel a llemalt.” (Efesus 6:14) A King el Saul er a Israel er a irechar a ulerrengesmengoit er a Dios a uchul me ngmlo diak a chedaol el reng el mo er ngii. (1 Samuel 15:22, 23) Ma lsekum kede meruul a llemalt e oubail er sel cherrungel el klekedall er a mekemad er a klereng, e kede mo oba chedaol el reng er a Dios ma ike el dousbech el mo omekerreu er kid er a Satan, ma remekngit el reng er ngii.​—Osisechakl 18:10.

16. Kede mekerang e melemolem el omekerreu er kid er a klisichir a remekngit el reng?

¹⁶ A domekerreu er kid er a klisichel a mekngit el reng, e ngkired el blechoel el menguiu e mesuub er a Tekingel a Dios e mo ungil el ousbech aike el babier el mla er “ngikel blak a rengul el mellomes a rengul tebechelel a blai,” ma lmuut el bebil el tekoi. (Lukas 12:42) A doruul el uaisei e kede sichedekl a ungil el tekoi er a klereng er a uldesued, el di ua sel uleklatk er a Paulus el kmo: “Rudam, bo msichedekl a ikal tekoi ra rengmiu, el rokui el klemerang, ma rokui el kuoll, ma rokui el melemalt, ma rokui el bliochel, ma rokui el kirel morngii a bltikerreng, ma rokui el ngarngii a chetengel, ma ngiidi le ngeral klungiaol, ma rokui el odengesall.”​—Filipi 4:8.

17. Ngera mo ngosukid el mo meduch el omerk er a ungil el chais?

 ¹⁷ A Jehovah a meskid a “choeacher er chochemiu longedmeklel a evangkelio ra budech.” (Efesus 6:15) A deblechoel el teloi er a miting er a ongdibel er a Rekristiano a mo ngosukid el omerk er a klumech er a Rengedel a Dios. Ngkol ua ngera el uchul a deurreng a dengesuterir a rebebil el mo mesuub el kirel a klemerang er a Dios e mo medengelii a ilmokl er a klereng! (Johanes 8:32) “Ma saider ra Reng, el ingii a tikingel a Dios” a dousbech er ngii el mo omekerreu er kid er a klsuul el osisechakl e le “ngbai ngarngii a klisichel er medal a Dios el toruud cheuatel.” (Efesus 6:17; 2 Korinth 10:4, 5) A bo demeduch el ousbech er a Tekingel a Dios, el Biblia, a ngosukid el olisechakl er a klemerang e omekerreu er kid er a ulekbat er a Diabelong.

18. Kede mekerang e mo “dechor el mtekengelii a ulekbat ra diabelong”?

¹⁸ A Paulus a ulemuchel er a omesodel el kirel a klekedall er a mekemad er a klereng er kid el kmo: “Mngara Rubak e bo misisiich loeak sel klisiich ra ngarbab el klisichel. Bilemiu ra cherrungel klekedall ra mekemad, el klekedellel a Dios, me bo lsebechiu el dechor el mtekengelii a ulekbat ra diabelong.” (Efesus 6:10, 11) Sel tekoi er a Griik el kmo “bo lsebechiu el dechor ” a melekoi el kirel a soldau el dechor er sel deruchellel. Ma lta e a Diabelong a ousbech a betok el rolel el melasem el melemall er a kltarreng er kid ma osisechekled ma blakerreng er kid, engdi kid a mesisiich el dechor el ngar er a klaumekemad er kid er a klereng. E le a ulekbat er a Diabelong a dimlak bo lungil er a ngar er a mong el me er a chelechang​—e dirrek el diak bo lungil er a ngar er a medad el klebesei! a

Momtok er a Diabelong, Me Lechiis

19. Ngera kuk ta er a rolel e kede omtok er a Diabelong?

¹⁹ Ngsebeched el mo mesisiich er a klaumekemad er a klereng e omtok er a Diabelong ma remekngit el reng el ngar er a cheungel a klisichel. Ngdiak a ungil el uchul e ngkired el mo medakt er a Satan, e le a disciplo el Jakobus a milluches el kmo: “Molemolem ra Dios. E momtok ra diabelong me le chiis er kemiu.” (Jakobus 4:7) A ta er a rolel a domtok er a Satan ma remekngit el reng el obengkel a dongeroid er kid er aike el urerir a rultuubladek ma rechad el meruul er ngii. A Biblia a oterekeklii el kmo a remesiungel a Jehovah a kmal kirir el oltngakl a tekoi el osiik a olangch ma omes a btuch ma omengelil ma ouuelai. Ma lsekum e kid a mechesang el meruul a urered er a klereng, e ngdiak el kired el medakt er a ngii di el chad el lekong meruul a tekoi er a olai el melemall er a kid.​—Ulecherangel 23:23; Duteronomi 18:10-12; Isaia 47:12-15; Rellir 19:18-20.

20. Kede mekerang e omtok er a Diabelong?

²⁰ Kede “omtok ra Diabelong” a lsekum e kede oltirakl a llechul a Biblia ma klemerang el tekoi e mo mesisiich el dechor el omtok er ngii. A beluulechad a ta uldesuel ngii ma Diabelong e le ngchelid er ngii. (2 Korinth 4:4) Sei a uchul, e kede oltngakl a terached er a beluulechad, el ua kldidairreng ma bechelechelingaol ma deleboes el omeruul ma uldikel ma ngibes er a kerruul. Kede medengei el kmo a Diabelong er a longarm er ngii er a ked, e ngmlo cheroid er ngii e le Jesus a uluusbech a Bades el omtok er ngii. (Matteus 4:4, 7, 10, 11) Me ngdirrek el uaisei, a Satan a mo ‘cheroid er kid’ a lsekum kede kongei el mo chederedall er a Jehovah e ultuil er Ngii el oeak a nglunguuch. (Efesus 6:18) E a doba ulengesuil a Jehovah el Dios ma betik er a rengul el Ngelekel, e ngdiak a ngii di el chad el mo sebechel el tomellid​—el mo lmuut er a Diabelong me ngdiak el sebechel!​—Psalm 91:9-​11.

[Footnote]

Ngerang a Nger er Kau?

• Ngkired el mo medakt er a Satan el Diabelong?

• Ngera uchul ma Satan a oldechelakl er a Rekristiano?

• Ngera me kede meluluuch me demosobel er “ngikel el mekngit”?

• Kede mekerang e mo mesisiich er sel klaumekemad er a klereng?

[Aike el Ker er a Suobel]

[Siasing er a 8 el llel]

A rediak lemedakt el chad el uleltirakl er a Kristus a mle blak a rengrir el mo er a kodall

[Siasing er a 9 el llel]

A Diabelong a diak el sebechel el olekebai er a okiis er tirke el ngar er a uldesuel a Jehovah

[Siasing er a 10 el llel]

Kau ke meluluuch me msobel er “ngikel el mekngit”?

[Siasing er a 11 el llel]

Kau ke oubail er a “cherrungel klekedall ra mekemad, el klekedellel a Dios”?