Unaj k-tsʼáaikba tu contra u Kʼaasilbaʼal, letiʼ túuneʼ bíin áalkabnak

«Tsʼaʼabaʼex yáanal u páajtalil Jajal Dios. Tokabaʼex tiʼ kʼaasilbaʼal, letiʼ xaneʼ bíin áalkabnakteʼex.» (SANTIAGO 4:7.)

1, 2. 1) ¿Bix le Kʼaasilbaʼal, jeʼex tu yeʼesil le baʼax yaʼalaj Isaíasoʼ? 2) ¿Baʼax kʼáatchiʼiloʼob ken k-núuke?

LE Kʼaasilbaʼaloʼ jach nojbaʼal u yuʼubkuba. Bey u yeʼesik le baʼax tu tsʼíibtaj le profeta Isaíasoʼ. Maas tiʼ cien jaʼaboʼob táanil tiʼ u yantal yaʼab kaajoʼob tu yáanal u kʼab Babiloniaeʼ, Isaíaseʼ tu yaʼaleʼ u kaajal Dioseʼ bíin u yaʼal tiʼ u reyil Babilonia: «Ka tukultik [...]: Bin in kaʼaj naʼakal tak j-kaʼan; bin in kaʼaj in tsʼáa in jalaʼach kʼáancheʼ tu yóokʼol u eekʼoʼob [Dios, wa tu yóokʼol le reyoʼob u taaloʼob tiʼ u paalal Davidoʼ]; [...] bíin béeychajken jeʼel bix le J-kaʼaniloʼ» (Isaías 14:3, 4, 12-15; Números 24:17). U reyil Babilonia kaʼacheʼ jach nojbaʼal u yuʼubkuba jeʼex u yuʼubikuba Satanás, «u [diosil] le yóokʼol kaabaʼ» (2 Corintoiloʼob 4:4). Baʼaleʼ, jeʼex jach subtsil úuchik u tsʼoʼokol tiʼ Babiloniaeʼ, bey xan bíin tsʼoʼokok tiʼ Satanás.

² Baʼaleʼ maʼiliʼ xuʼulsaʼak u Kʼaasilbaʼaleʼ, maʼ xaaneʼ jeʼel k-tuklikeʼ: ¿Unaj wa k-chʼaʼik saajkil tiʼ? ¿Baʼaxten ku beetik k-pʼektaʼal tumen le máakoʼoboʼ? ¿Bix jeʼel k-kanáantikba utiaʼal maʼ k-lúubul tu kʼabeʼ?

¿Unaj wa k-chʼaʼik saajkil tiʼ u Kʼaasilbaʼal?

3, 4. Le cristianoʼob kun binoʼob kaʼan bey xan le kun pʼáatloʼob way Luʼumeʼ, ¿baʼaxten maʼ tu chʼaʼikoʼob saajkil tiʼ u Kʼaasilbaʼal?

³ Le cristianoʼob kun binoʼob kaʼanoʼ, jach ku líikʼil u yóoloʼob yoʼolal le baʼax tu yaʼalaj Jesucristoaʼ: «Maʼ u yantaltech sajakil tiʼ baʼax bíin a mukʼyajte; tumen le kʼaasilbaʼaloʼ yaan u beetik u kʼaʼalal tsʼeʼetsʼek tiʼ teʼexeʼ tu yoʼolal u túuntaʼal a wóoleʼex tuláakalileʼex; bíin mukʼyajnakeʼex tu yáam diez kʼiinoʼob. Baʼaleʼ chúukaʼanchajak a wóol tak tu kʼiinil a kíimil, teen túuneʼ bíin in tsʼáatech u [coronai le kuxtaloʼ]» (Apocalipsis 2:10). Mix le cristianoʼob kun binoʼob kaʼan mix le kun pʼáatloʼob way Luʼum ku chʼaʼikoʼob saajkil tiʼ u Kʼaasilbaʼaloʼ. Baʼaleʼ leloʼ maʼ u kʼáat u yaʼal wa minaʼan saajkil tiʼobiʼ; baʼaxeʼ maʼ u kʼáat u beetoʼob baʼax maʼ utstutʼaan Diosiʼ yéetel tiaʼanoʼob naatsʼ tiʼ letiʼ, lelaʼ le tsʼáaiktiʼob u muukʼil utiaʼal u chúukpajal u yóoloʼob (Salmo 34:9; 36:7).

⁴ Teʼ yáax siglooʼ, u disipuloʼob Jesuseʼ, kex yaʼab baʼax tu muʼyajtoʼobeʼ, chúukpaj u yóoloʼob, maʼ tu chʼaʼajoʼob saajkil mix tiʼ le kíimloʼ. Maʼ tu chʼaʼajoʼob saajkil tiʼ le Kʼaasilbaʼaloʼ, tumen u yojloʼobeʼ Jéeobaeʼ maʼ ken u pʼat le máaxoʼob chúukaʼan u yóoloʼoboʼ. Jeʼex letiʼobeʼ, teʼ kʼiinoʼobaʼ le cristianoʼob kun binoʼob kaʼan bey xan le kun pʼáatloʼob way Luʼumeʼ, kex jach pʼektaʼanoʼobeʼ, u chʼaʼatukulmoʼob u chúukpajal u yóoloʼob tiʼ Dios. Baʼaleʼ le apóstol Pablooʼ tu yaʼaleʼ tiʼ le Kʼaasilbaʼaloʼ yaan u páajtalil u beetik u kíimil máak. Lelaʼ, ¿unaj wa u beetik k-chʼaʼik saajkil tiʼ?

5. ¿Baʼax ku kaʼansiktoʼon Hebreob 2:14, 15?

⁵ Pabloeʼ tu yaʼaleʼ Jesuseʼ táakpaj «tiʼ bakʼ yéetel tiʼ kʼiʼikʼ, utiaʼal ka páatak u xuʼulsik yéetel u kíimileʼ u Yuumtsil le kíimiloʼ, [wa u] kʼaasibaʼal. Beyoʼ tsʼoʼok u jáalkʼabtik tuláakal le máaxoʼob tu yoʼolal u sajakililoʼob tiʼ le kíimiloʼ kuxaʼanoʼob beyoʼob palitsileʼ» (Hebreob 2:14, 15). Satanás, «u Yuumtsil le kíimiloʼ», ook ichil Judas Iscariote; tu beetaj xan u kíimsaʼal Jesús tumen le judíoʼob yéetel le romanoʼoboʼ (Lucas 22:3; Juan 13:26, 27). Baʼaleʼ yoʼolal u kuxtal Jesús tu kʼubaj t-oʼolaloʼ tu jáalkʼabtoʼon tiʼ u kʼab Satanás yéetel ku béeykuntik ka yanaktoʼon kuxtal minaʼan u xuul (Juan 3:16).

6, 7. U Kʼaasilbaʼaleʼ, ¿jeʼel wa u páajtal u beetik u kíimil jeʼel máaxakeʼ? Tsole.

 ⁶ U Kʼaasilbaʼaleʼ, ¿jeʼel wa túun u páajtal u beetik u kíimil jeʼel máaxakeʼ? Káajak u beetik u kʼasaʼanil tak bejlaʼeʼ, Satanaseʼ, yéetel u tuusoʼobeʼ, tsʼoʼok u beetik u kíimil yaʼab máakoʼob, tumen ka kʼebanchaj Adaneʼ, tu máansaj le kʼeban yéetel le kíimil tiʼ tuláakal wíinikoʼoboʼ (Romailoʼob 5:12). Le wíinikoʼob beetik xan baʼax u kʼáat Satanasoʼ úuch joʼopʼok u chʼaʼapachtikoʼob máaxoʼob meyajtik Jéeoba, yéetel yaan kʼiineʼ yaan tak tiʼ letiʼob tsʼoʼok u kíimskoʼobiʼ, jeʼex tu beetiloʼob yéetel Jesuseʼ.

⁷ Baʼaleʼ le Kʼaasilbaʼaloʼ maʼ tu páajtal u beetik u kíimil jeʼel máaxak u kʼáateʼ. Jéeobaeʼ ku kanáantik máaxoʼob meyajtik, yéetel maʼ ken u chaʼa u xuʼulsaʼaloʼob tumen Satanás (Romailoʼob 14:8). Kex Jéeoba ku chaʼik ka beetaʼak loob yéetel ka kíimsaʼak jujuntúul tiʼ letiʼob yoʼolal máaxoʼob chʼaʼapachtikoʼoboʼ, le Bibliaoʼ ku yaʼalikeʼ Dioseʼ yaan u kaʼa kuxkíintik tuláakal le máaxoʼob tiaʼanoʼob tu tuukuloʼ. Le Kʼaasilbaʼaloʼ maʼ tu páajtal u beetik mix baʼal utiaʼal maʼ u kaʼa kuxkíintaʼaloʼob (Malaquías 3:16; Juan 5:28, 29; Beetaʼanoʼob [Hechos] 24:15).

Satanaseʼ, ¿baʼaxten ku beetik k-pʼektaʼal?

8. Satanaseʼ, ¿baʼaxten ku beetik u pʼektaʼal máaxoʼob meyajtik Jéeoba?

⁸ U Kʼaasilbaʼaleʼ ku beetik k-pʼektaʼal tumen u kʼáat ka xuʼuluk k-meyajtik Dios. Letiʼeʼ u kʼáat u náachkuntoʼon tiʼ Jéeoba, le k-Taata yaan teʼ kaʼanoʼ. Lelaʼ bey u yeʼesik le baʼax tu yaʼalaj Jéeoba teʼ tu jardinil Edenoʼ. Letiʼeʼ tu yaʼaleʼ yaan u yantal pʼektajil ichil le «koʼolel» yéetel le «kaanoʼ» bey xan ichil u chʼiʼibaloʼob (Génesis 3:14, 15). Le Bibliaoʼ ku yaʼalikeʼ u Kʼaasilbaʼaleʼ letiʼ «le úuchben kaan» tʼaanaj yéetel Evaoʼ, yéetel ku yaʼalikeʼ jach pʼujaʼan tumen u yojel maʼ yaʼab kʼiin pʼaatal tiʼiʼ (Apocalipsis 12:9, 12). Le pʼektajil yaan ichil u chʼiʼibal le koʼolel yéetel u chʼiʼibal le kaanoʼ maʼ xuʼulukiʼ, le oʼolal unaj k-páaʼtik ka pʼektaʼakoʼon (2 Timoteo 3:12). Techeʼ, ¿ka naʼatik wa baʼaxten ku beetik Satanás ka pʼektaʼakoʼon?

9, 10. ¿Baʼax ku yaʼalik Satanás tu yoʼolal Jéeoba, yéetel bix jeʼel k-eʼesik maʼ jaaj baʼax ku yaʼalikeʼ?

⁹ Le Kʼaasilbaʼaloʼ ku yaʼalikeʼ Jéeobaeʼ maʼ maʼalob bix u gobernariʼ; ku yaʼalik xaneʼ le wíinikoʼoboʼ maʼ yéetel u jaajil u yóol ku meyajkoʼob Diosiʼ. Satanaseʼ tu beetaj u sen muʼyaj Job. ¿Baʼaxten? Utiaʼal u yeʼesik maʼ chúukaʼan u yóol tiʼ Diosiʼ. Utiaʼal lelaʼ tu yóotaj u maas lúuʼs u yóol Job yoʼolal baʼax aʼalaʼab tiʼ tumen u yatan bey xan tumen óoxtúul máakoʼob ku yaʼalikubaʼob u amigoʼob. U libroi Jobeʼ ku yeʼesikeʼ, le Kʼaasilbaʼaloʼ tu yaʼalaj tiʼ Jéeoba ka u chaʼa u beetik u muʼyaj wíinikoʼob utiaʼal u yeʼesik mix utúul jeʼel u chúukpajal u yóol tiʼ Dioseʼ. Baʼaleʼ Jobeʼ chúukpaj u yóol tiʼ Dios, beyoʼ tu yeʼesaj maʼ jaaj baʼax tu yaʼalaj Satanasiʼ (Job 1:8–2:9; 16:2; 27:5; 31:6). Teʼ kʼiinoʼob xanaʼ, le Kʼaasilbaʼaloʼ ku beetik k-pʼektaʼal utiaʼal ka xuʼuluk k-meyajtik Dios yéetel utiaʼal u yeʼesik jaaj baʼax ku yaʼalik.

¹⁰ Utiaʼal u chúukpajal k-óoleʼ unaj k-kʼaʼajsikeʼ le Kʼaasilbaʼaloʼ ku beetik pʼektaʼal tumen u kʼáat ka xuʼuluk k-meyajtik Dios (Deuteronomio 31:6). Jéeobaeʼ letiʼ u Noj Jalaʼachil tuláakal baʼal, yéetel yaan u yáantkoʼon utiaʼal ka chúukpajak k-óol. Le oʼolaleʼ, mantatsʼ unaj k-ilik beetik baʼax u kʼáat utiaʼal k-kiʼimakkúuntik u yóol, beyoʼ yaan u yantal baʼax u yaʼal tiʼ Satanás, le máax aʼalik baʼal tiʼoʼ (Proverbios 27:11).

 «Tokoʼon tiʼ u Kʼaasilbaʼal»

11. ¿Baʼax táan k-kʼáatik tiʼ Dios ken k-aʼal «maʼ a beetik k-lúubul tiʼ baʼal kʼaas»?

¹¹ Utiaʼal u chúukpajal k-óol tiʼ Dioseʼ jach unaj k-natsʼikba tu yiknal ich payalchiʼ. Baʼax jach maʼalob ka k-kʼáateʼ letiʼe baʼax tu yaʼalaj Jesús tu payalchiʼi le padrenuestrooʼ: «Maʼ a beetik k-lúubul tiʼ baʼal kʼaas, baʼaleʼ tokoʼon tiʼ u Kʼaasilbaʼal» (Mateo 6:13, NM). Jéeobaeʼ maʼ tu beetik k-lúubul tiʼ baʼax kʼaas (Santiago 1:13). Baʼaxeʼ le Bibliaoʼ, yaan kʼiineʼ, ken u yaʼal Dios ku beetik wa baʼaxeʼ, u jaajileʼ u kʼáat u yaʼaleʼ chéen ku chaʼik u yúuchul (Rut 1:20, 21). Le oʼolaleʼ ken k-kʼáat tiʼ Dios le baʼax tu yaʼalaj Jesusoʼ, táan k-kʼáatik ka u yáantoʼon utiaʼal maʼ k-lúubul tiʼ baʼax kʼaas. Letiʼeʼ maʼ ken u pʼatoʼon, bey u yeʼesik le Bibliaoʼ: «[Dioseʼ] maʼ bíin [u] pʼat u túuntaʼal a wóoleʼex maas tiʼ le ku páajtal a mukʼyajtikeʼexoʼ. Baʼaleʼ le ken taalak le túuntaj óolaloʼ Jajal Dios túuneʼ bíin u tsʼáa xan bix jeʼel u páajtal a jóokʼoleʼexiʼ» (1 Corintoiloʼob 10:13).

12. ¿Baʼax táan k-kʼáatik tiʼ Jéeoba ken k-aʼal ka u «tokoʼon tiʼ u Kʼaasilbaʼal»?

¹² Jesuseʼ, ka tsʼoʼok u yaʼalik jeʼel u páajtal k-kʼáatik tiʼ Dios maʼ u beetik k-lúubul tiʼ baʼal kʼaaseʼ, tu yaʼalaj xan: «Tokoʼon tiʼ u Kʼaasilbaʼal». Yaan Bibliaʼob, jeʼex le Quiliʼich Biblia yéetel El Nuevo Testamento ich Maya, bey u sutkoʼobaʼ: «Tokoʼon tiʼ kʼaas». Baʼaleʼ teʼ Bibliaoʼ le tʼaan «tokoʼon», maases ku meyaj utiaʼal u yaʼalaʼal ka toʼokok máak tiʼ wa máax, yéetel u Evangelio Mateoeʼ ku yaʼalikeʼ le Kʼaasilbaʼaloʼ letiʼ le «j-túuntaj óol[oʼ]»; lelaʼ ku yeʼesikeʼ le Kʼaasilbaʼaloʼ jach tu jaajil yaan, maʼ chéen letiʼe kʼaas yaan ichil máakoʼ (Mateo 4:3, 11, LTN). Le oʼolaleʼ, jach unaj k-kʼáatik tiʼ Dios ka u kanáantoʼon tiʼ u Kʼaasilbaʼal, le máax táan u kaxtik k-lúubul tiʼ kʼebanoʼ (1 Tesalonicailoʼob 3:5). Ken k-kʼáat tiʼ k-Taata yaan teʼ kaʼan ka u «tokoʼon tiʼ u Kʼaasilbaʼal[oʼ]», táan k-kʼáatik tiʼeʼ ka u tsʼáatoʼon u nuʼuktaj yéetel ka u yáantoʼon utiaʼal maʼ k-tuʼusul tumen Satanás.

Maʼ unaj k-chaʼik tuʼusul tumen u Kʼaasilbaʼaliʼ

13, 14. Le corintoiloʼoboʼ, ¿baʼaxten unaj u chʼaʼikoʼob kaʼach óotsilil tiʼ le máak lúub tiʼ kʼeban tu yutskíintaj u kuxtaloʼ?

¹³ Pabloeʼ, le ka tu tsʼíibtaj tiʼ le sukuʼunoʼob yanoʼob Corinto unaj u saʼasik u siʼipil u yéet sukuʼuniloʼobeʼ, tu yaʼalaj: «Le máax tiʼ ka saʼatsikeʼex wa baʼaxeʼ, tak teen kin saʼatesik tiʼ. Tumen le baʼax in saʼatsmajeʼ wa yaan baʼax in saʼasmajeʼ tin saʼatsaj ta woʼolaleʼex tu táan Cristo, utiaʼal maʼ k-tuʼusul tumen Satanás, tumen [k-kʼaj óoltmaj] u kʼaakʼas tuukuloʼob» (2 Corintoiloʼob 2:10, 11). Le Kʼaasilbaʼaloʼ jejeláas bix jeʼel u tuskoʼoneʼ; baʼaleʼ ¿baʼaxten tu tsʼáaj Pablo le tsolnuʼukaʼ?

¹⁴ Pabloeʼ tsʼokaʼaniliʼ u yáax kʼeyik le  corintoiloʼoboʼ, tumen maʼ tu jóoʼsoʼob ichiloʼob utúul máak táan u beetik upʼéel baʼal jach kʼaas kaʼachiʼ. Satanaseʼ jach kiʼimakchaj wal u yóoleʼ, tumen le «kʼeban jach nojoch maʼ tu chaʼabal u beetaʼal mix ichil le máaxoʼob maʼ u kʼaj óoloʼob Jajal Diosoʼ», jach tu taasaj subtsilil tiʼ le sukuʼunoʼob yanoʼob Corintooʼ. Baʼaleʼ ku máan kʼiineʼ, le máakaʼ jóoʼsaʼabi (1 Corintoiloʼob 5:1-5, 11-13). Le máak túunaʼ ka máan kʼiineʼ tu yutskíintaj u kuxtal. Le corintoiloʼob túunoʼ wa maʼ tu saʼasikoʼob le máakaʼ yéetel wa maʼ tu kaʼa kʼamkoʼobeʼ, u kʼáat u yaʼaleʼ táan u kaʼa tuʼusloʼob tumen u Kʼaasilbaʼal. ¿Baʼaxten? Tumen yaan u yeʼeskoʼob chich u puksiʼikʼaloʼob jeʼex Satanasoʼ. Wa le máak tu yutskíintaj u kuxtal ku «saʼatal [...] tu yoʼolal yaʼabkach yaayaj óolal» yéetel ku kaʼa náachtal tiʼ le sukuʼunoʼoboʼ, le nuxiboʼoboʼ yaan kaʼach u kuchkoʼob kʼeban tu táan Jéeoba, le Dios jach ku chʼaʼik óotsililoʼ (2 Corintoiloʼob 2:7; Santiago 2:13; 3:1). Mix utúul cristiano u kʼáat u beetuba jeʼex Satanás, le máax jach upuliʼ maʼatech u chʼaʼik óotsililoʼ.

Le u nuʼukulil baʼateʼel ku tsʼáaik Diosoʼ ku kanáantkoʼon

15. ¿Baʼax baʼatelil yantoʼon, yéetel baʼax unaj k-beetik utiaʼal k-ganartik?

¹⁵ Utiaʼal k-toʼokol tiʼ le Kʼaasilbaʼaloʼ, unaj k-tsʼáaikba tu contra le kʼasaʼan angeloʼoboʼ. Utiaʼal k-ganartik le baʼateʼel yantoʼon tu contra le kʼasaʼan angeloʼob maas yaan u muukʼoʼob tiʼ toʼonoʼ unaj «búukint[ik] tuláakal le u nuʼukulil baʼateʼel ku tsʼáaik[toʼon] Jajal Diosoʼ» (Efesoiloʼob 6:11-18). Ken k-beet baʼax toj tu táan Dioseʼ bey ka k-búukint le baʼax «kanáantik u tseem le soldado» kaʼachoʼ (Efesoiloʼob 6:14). Saúl, u reyil u yúuchben kaajil Israeleʼ, maʼ tu yuʼubaj u tʼaan Diosiʼ, le oʼolal xuʼul u yáantaʼal tumen u kiliʼich muukʼ Dios (1 Samuel 15:22, 23). Baʼaleʼ wa k-toj kuxtal yéetel wa k-búukintik tuláakal le u nuʼukulil baʼateʼel ku tsʼáaik Jajal Diosoʼ, letiʼeʼ yaan u tsʼáaiktoʼon u kiliʼich muukʼ yéetel yaan u kanáantkoʼon tiʼ Satanás yéetel tiʼ u kʼasaʼan angeloʼob (Proverbios 18:10).

16. ¿Bix jeʼel k-kanáantikba tiʼ le kʼasaʼan angeloʼoboʼ?

¹⁶ Utiaʼal k-kanáantikba tiʼ le kʼasaʼan angeloʼoboʼ, unaj u suuktal k-xokik sáamsamal le Bibliaoʼ yéetel unaj k-ilik naʼatik tubeel; utiaʼal lelaʼ unaj u meyajtoʼon tuláakal le baʼax ku tsʼáaik «le palitsil chúukaʼan yóol yéetel yaan u naʼat[oʼ]» (Lucas 12:42). Beyoʼ yaan k-oksik ichil k-tuukul maʼalob baʼaloʼob, jeʼex u yaʼalik le apóstol Pabloaʼ: «Sukuʼuneʼex, tukulteʼex tuláakal baʼax jaaj, tuláakal baʼax ku náajmatik tsiikil, tuláakal baʼax toj, tuláakal baʼax sak, tuláakal baʼax ku lúubul utsil, tuláakal baʼax ku yúuchul tʼaan maʼalob tu yoʼolal, tukulteʼex le baʼax utsoʼ yéetel le baʼax ku náajmatik u kiʼ tʼantaʼaloʼ» (Filiposiloʼob 4:8).

17. ¿Baʼax jeʼel u yáantkoʼon utiaʼal k-kʼaʼaytik tubeel le maʼalob péektsiloʼ?

¹⁷ Jéeobaeʼ ku nuʼuktikoʼon tubeel utiaʼal k-kʼaʼaytik «u maʼalob péektsilil le jeetsʼeloʼ»; lelaʼ jeʼel u páajtal k-ketik yéetel le soldado u takmaj u xanab utiaʼal u bin baʼateloʼ (Efesoiloʼob 6:15). U suuktal k-táakpajal teʼ muchʼtáambaloʼ ku yáantkoʼon utiaʼal k-kʼaʼaytik tubeel le maʼalob  péektsiloʼ. ¿Máasaʼ jach ku taasiktoʼon kiʼimak óolal k-áantik uláakʼ máakoʼob u kanoʼob u jaajil tiʼ Dios yéetel ka xuʼuluk u creerkoʼob baʼaloʼob maʼ jaajtakiʼ? (Juan 8:32.) U Tʼaan Dios ku keʼetel yéetel upʼéel espadaeʼ ku kanáantkoʼon utiaʼal maʼ k-tuʼusul, yéetel ku yeʼesik maʼ jaaj baʼax ku creertik yaʼab máakoʼobiʼ (Efesoiloʼob 6:17; 2 Corintoiloʼob 10:4, 5). K-kanik tsol tubeel baʼax ku yaʼalik le Bibliaoʼ ku yáantkoʼon utiaʼal k-kaʼansik u jaajil yéetel ku kanáantikoʼon tiʼ u táabsajoʼob Satanás.

18. ¿Bix jeʼel «[k-]jeetsʼel pʼáataleʼex tu contra u táabsajiloʼob kʼaasilbaʼal»?

¹⁸ Pabloeʼ, le ka tu káajsaj u tʼaan tiʼ le u nuʼukulil baʼateʼel ku tsʼáaik Diosoʼ, tu yaʼalaj: «Muʼukʼankúunsabaʼex tiʼ Yuumtsil [...]. Búukinteʼex tuláakal le u nuʼukulil baʼateʼel ku tsʼáaikteʼex Jajal Diosoʼ, utiaʼal ka páatak a jeetsʼel pʼáataleʼex tu contra u táabsajiloʼob kʼaasilbaʼal» (Efesoiloʼob 6:10, 11). Le tʼaan ebreo ku suʼutul «a jeetsʼel pʼáataleʼex» yaan yil yéetel bix u toj waʼatal utúul soldado. Toʼoneʼ maʼ unaj k-chaʼik lúubsaʼal tumen u Kʼaasilbaʼaliʼ, kex jeʼel baʼalak ka u yil u beetik utiaʼal ka yanak talmiloʼob ichiloʼoneʼ, utiaʼal u kʼaskúuntik k-kaʼansajoʼob wa utiaʼal u náachkuntkoʼon tiʼ Dios. Kex yaʼab baʼaloʼob tsʼoʼok u beetik le Kʼaasilbaʼaloʼ maʼ béeyakiʼ, ¡yéetel mix bikʼin kun béeytal! *

Unaj k-tsʼáaikba tu contra u Kʼaasilbaʼal, letiʼ túuneʼ bíin áalkabnak

19. ¿Bix jeʼel k-kanáantikba tiʼ le Kʼaasilbaʼaloʼ?

¹⁹ Jeʼel u páajtal k-ganartik le baʼateʼel yantoʼon tu contra Satanás yéetel u kʼasaʼan angeloʼoboʼ. Maʼ unaj k-chʼaʼik saajkil tiʼ u Kʼaasilbaʼaliʼ, tumen le disipulo Santiagooʼ tu tsʼíibtaj: «Tsʼáabaʼex yáanal u páajtalil Jajal Dios. Tokabaʼex tiʼ kʼaasilbaʼal, letiʼ xaneʼ bíin áalkabnakteʼex» (Santiago 4:7). Upʼéel bix jeʼel k-kanáantikba tiʼ Satanás yéetel tiʼ u kʼasaʼan angeloʼobeʼ, letiʼe maʼ u yantal mix baʼal k-il yéetel le magia mix yéetel le espiritismooʼ. Le Bibliaoʼ ku yaʼalikeʼ máaxoʼob meyajtik Dioseʼ maʼ unaj u creerkoʼob wa yaan tomojchiʼobiʼ, mix unaj u tuklikoʼob wa le estrellaʼob yaan baʼax u yiloʼob yéetel u kuxtaloʼoboʼ mix xan unaj u jóoʼsaj suerteʼobiʼ. Wa jach tsʼaamaj k-óol meyajt Dioseʼ, maʼ unaj k-chʼaʼik saajkil u beetaʼaltoʼon upʼéel kʼaasiʼ (Números 23:23; Deuteronomio 18:10-12; Isaías 47:12-15; Beetaʼanoʼob 19:18-20).

20. ¿Bix k-tsʼáaikba tu contra le Kʼaasilbaʼaloʼ?

²⁰ Wa k-beetik baʼax ku yaʼalik le Biblia bey xan wa k-jach kanáantikba tiʼ u tuusoʼob Satanaseʼ, táan k-tsʼáaikba tu contra. Le yóokʼol kaabaʼ táan u beetik baʼax u kʼáat u Kʼaasilbaʼal, tumen letiʼ u dios (2 Corintoiloʼob 4:4). Le oʼolaleʼ, maʼ unaj k-nojbaʼalkúuntikbaiʼ, maʼ unaj k-tuukul chéen t-oʼolaliʼ, maʼ unaj k-lúubul tiʼ baʼax subtsil wa kʼaasiʼ, maʼ unaj k-sen pʼuʼujuliʼ, mix xan unaj k-bin chéen tu paach taakʼiniʼ, tumen lelaʼ tiʼ le Kʼaasilbaʼal u taaloʼ. K-ojleʼ Jesuseʼ le ka tu chʼaʼachiʼitaj le baʼax ku yaʼalik le Biblia utiaʼal maʼ u lúubul tiʼ u táabsajoʼob Satanasoʼ, Satanaseʼ náachchaj tiʼ (Mateo 4:4, 7, 10, 11). Toʼon xaneʼ, wa k-beetik baʼax ku yaʼaliktoʼon Dios yéetel wa k-kʼáatik u yáantaj ich payalchiʼeʼ, Satanaseʼ maʼ kun tsaʼayal t-éetel, yaan u yáalkab tiʼ toʼon (Efesoiloʼob 6:18). Yéetel u yáantaj Jéeoba bey xan yéetel u yáantaj u kiʼichkelem Hijoeʼ, mix máak jeʼel u páajtal u beetiktoʼon loob utiaʼal mantatsʼeʼ, ¡mix tak le Kʼaasilbaʼaloʼ! (Salmo 91:9-11.)

[Tsolajiloʼob]

¿Baʼax jeʼel a núukikeʼ?

• ¿Unaj wa k-chʼaʼik saajkil tiʼ Satanás?

• Satanaseʼ, ¿baʼaxten ku beetik k-pʼektaʼal?

• ¿Baʼax táan k-kʼáatik tiʼ Dios ken k-aʼal ka u «tokoʼon tiʼ u Kʼaasilbaʼal»?

• ¿Bix jeʼel k-ganartik le baʼateʼel yantoʼon tu contra le kʼasaʼan angeloʼoboʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 28]

U disipuloʼob Jesús teʼ yáax siglooʼ chúukpaj u yóoloʼob, maʼ tu chʼaʼajoʼob saajkil mix tiʼ le kíimloʼ

[U tsolajil le oochel teʼ táan juʼun 29]

Kex jeʼel baʼal ka u beet le Kʼaasilbaʼaloʼ, Jéeobaeʼ yaan u kaʼa kuxkíintik le máaxoʼob tiaʼanoʼob tu tuukuloʼ

[U tsolajil le oochel teʼ táan juʼun 30]

¿Ka kʼáatik wa tiʼ Dios ka u tokech tiʼ u Kʼaasilbaʼal?

[U tsolajil le oochel teʼ táan juʼun 30]

¿Baʼax jeʼel a núukikeʼ?

• ¿Unaj wa k-chʼaʼik saajkil tiʼ Satanás?

• Satanaseʼ, ¿baʼaxten ku beetik k-pʼektaʼal?

• ¿Baʼax táan k-kʼáatik tiʼ Dios ken k-aʼal ka u «tokoʼon tiʼ u Kʼaasilbaʼal»?

• ¿Bix jeʼel k-ganartik le baʼateʼel yantoʼon tu contra le kʼasaʼan angeloʼoboʼ?

[U tsolajil le oochel teʼ táan juʼun 31]

¿A búukintmaj wa «le u nuʼukulil baʼateʼel ku tsʼáaik» Jajal Diosoʼ?