Puntonan Sobresaliente di e Buki di Ester
E Palabra di Yehova Ta Bibo
Puntonan Sobresaliente di e Buki di Ester
EPLAN simplemente no por a faya. E masacre di e Hudiunan lo tawata cabal y eficiente. Riba un solo dia determina di antemano, tur Hudiu den e imperio cu a extende for di India te Etiopia, lo a ser destrui. Esei ta loke e persona cu a traha e complot a pensa. Pero e no a tene cuenta cu un detaye sumamente importante. E Dios di shelo por libra su pueblo scohi for di cualkier situacion di desesperacion. E buki biblico di Ester ta relata e liberacion ei.
Un Hudiu di edad cu yama Mardokeo a skirbi e buki di Ester. E buki ta abarca un periodo di mas o menos 18 aña durante e reinado di rei Asuero of Herhes I di Persia. E relato dramatico aki ta mustra con Yehova a salba su pueblo di e complotnan malicioso di nan enemigonan, apesar cu su sirbidonan tawata plama den un imperio inmenso. Awe, e conocemento ei en berdad ta fortalece e fe di Yehova su pueblo cu ta rindiendo sirbishi sagrado na dje den 235 pais. Ademas, entre e personahenan describi den e buki di Ester tin ehempelnan pa nos imita y otronan cu nos lo kier evita. En berdad, “e palabra di Dios ta bibo y activo.”—Hebreonan 4:12.
LAREINA MESTER INTERCEDE
Den e di tres aña di e reinado di rei Asuero (aña 493 prome cu nos era), rei ta tene un bankete real. Reina Vasti ta famoso pa su bunitesa. Pero e ta pone rei rabia hopi cu ne y rei ta kit’e for di su puesto como reina. E mucha mohe Hudiu Hadasa ta wordo scohi for di entre tur e bunita birgennan di e pais pa tuma Vasti su luga. Bou di guia di su primo Mardokeo, Hadasa no ta revela cu e ta un Hudiu y ta uza su nomber Perso, Ester.
Cu tempo, un homber arogante cu yama Haman ta ser eleva na e posicion di prome minister. Haman ta bira furioso pasobra Mardokeo ta nenga di ‘buig of duna homenahe na dje.’ Pues, Haman ta traha un complot pa destrui tur Hudiu den e Imperio di Persia. (Ester 3:2) Haman ta combence Asuero pa bai di acuerdo cu ne y ta logra laga rei saca un decreto pa efectua e masacre aki. Mardokeo ta bisti “paña di saco y shinishi.” (Ester 4:1) Awor Ester mester interveni. E ta invita rei y su prome minister na un bankete priva. Gustosamente nan ta asisti na e bankete, anto Ester ta pidi nan bin bek e siguiente dia pa un otro bankete. Haman ta contento. Sinembargo, e ta bira furioso pasobra Mardokeo ta nenga di honr’e. Haman ta traha un complot pa mata Mardokeo prome cu e bankete di e siguiente dia.
Contesta Riba Pregunta Biblico:
1:3-5—E bankete aki a dura 180 dia? E texto no ta bisa cu ta e bankete a dura dje largo ei sino cu mas bien rei a mustra e oficialnan e rikesanan y e splendor di su reino glorioso durante di 180 dia. Podise e rei a uza e evento largo aki pa show off cu e gloria di su reino afin di impresiona e noblenan y combence nan cu e por cumpli cu su plannan. Den tal caso, versiculo 3 y 5 lo por ta referi na e bankete di 7 dia cu a tuma luga na fin di e reunion di 180 dia.
1:8—Den ki manera ‘e bebemento tawata sosode conforme e lei y no tawatin obligacion’? Na e ocasion aki, rei Asuero a haci un excepcion relaciona cu loke aparentemente tawata un custumber Perso di urgi otro pa bebe un cierto cantidad na e tipo di reunionnan ei. Segun un buki di consulta: “Nan por a bebe cuanto cu nan a desea, sea hopi of tiki.”
1:10-12—Dicon reina Vasti a keda nenga di bin serca rei? Algun erudito ta sugeri cu e reina a nenga di obedece pasobra el a opta pa no degrada su mes dilanti di e huespetnan burachi di rei. Of por ta cu e reina, cu di aparencia tawata masha bunita, en realidad no tawata sumiso. Aunke Bijbel no ta bisa su motibo, e hombernan sabi di e tempo ei a pensa cu e asunto definitivamente tawatin di aber cu obediencia na su esposo y cu e mal ehempel di Vasti lo a influencia tur e esposanan den e provincianan di Persia.
2:14-17—Ester tawatin relacion sexual inmoral cu rei? E contesta ta no. E relato ta bisa cu mainta e otro mohenan cu nan a hiba pa rei tawata bolbe na e di dos cas bou di cuido di e eunuco di rei, “kende tawatin encargo di e concubinanan.” E mohenan cu a pasa anochi cu rei a bira pues su concubina of esposa secundario. Sinembargo, nan no a hiba Ester na e cas di e concubinanan despues cu el a bai serca rei. Ora cu a trece Ester dilanti di Asuero, “rei a stima Ester mas cu tur e mohenan, y Ester a haya mas gracia y cariño serca dje cu tur e otro birgennan.” (Ester 2:17) Con el a logra gana Asuero su “gracia y cariño”? E mesun manera cu el a logra gana aprobacion di otro hende. “E mucha mohe tawata agrada [Hegai] y a haya gracia den su bista.” (Ester 2:8, 9) Hegai a gust’e strictamente a base di loke el a observa, su aparencia y su bon cualidadnan. De echo, “Ester a haya gracia den bista di tur cu a mir’e.” (Ester 2:15) Asina tambe, rei a keda impresiona cu loke el a mira den Ester y pesei a bin stim’e.
3:2; 5:9—Dicon Mardokeo a nenga di buig pa Haman? No tawata contra e lei di Yehova pa e Israelitanan reconoce e posicion superior di un personahe halto door di buig p’e. Sinembargo, den caso di Haman, tawatin mas cos envolvi. Haman tawata un agagita, probablemente un Amalekita, y Yehova a marca Amalek pa ser extermina. (Deuteronomio 25:19) Den bista di Mardokeo, si el a buig pa Haman esei lo a demostra deslealtad na Yehova. Pesei el a nenga redondamente, declarando cu e ta un Hudiu.—Ester 3:3, 4.
Les pa Nos:
2:10, 20; 4:12-16. Ester a acepta instruccion y conseho for di un adorado maduro di Yehova. Lo ta sabi di nos parti pa ta “obediente na esnan cu ta hiba delantera den [nos] y sea sumiso.”—Hebreonan 13:17, NW.
2:11; 4:5. Nos no mester ‘busca nos interes personal so, ma busca tambe interes di otronan.’—Filipensenan 2:4.
2:15. Ester a demostra modestia y dominio propio door di no pidi mas hoya ni paña mas bunita fuera di loke Hegai a suministra. Ta “e persona scondi di e curason, cu e calidad incoruptibel di un spirito suave y keto”, a pone Ester gana rei su aprobacion.—1 Pedro 3:4.
2:21-23. Ester cu Mardokeo tawata bon ehempelnan di hende cu a “somete nan mes na e autoridadnan cu ta goberna.”—Romanonan 13:1.
3:4. Den algun situacion, kisas ta sabi pa keda keto tocante ken nos ta, mescos cu Ester a haci. Sinembargo, ora nos tin cu tuma un posicion relaciona cu cuestionnan importante, manera Yehova su soberania y nos integridad, nos no mester tin miedo di duna di conoce cu nos ta un Testigo di Yehova.
4:3. Ora nos ta confronta prueba, nos mester acudi na Yehova den oracion y pidie forsa y sabiduria.
4:6-8. Mardokeo a busca un solucion legal pa e menasa cu e complot di Haman a crea.—Filipensenan 1:7, NW.
4:14. Mardokeo su confiansa den Yehova tawata ehemplar.
4:16. Cu pleno confiansa den Yehova, Ester fielmente y cu curashi a enfrenta un situacion cu por a resulta den su morto. Ta masha importante pa nos siña confia den Yehova y no den nos mes.
5:6-8. Pa por a gana e fabor di Asuero, Ester a invit’e na un di dos bankete. Ester a actua cu prudencia, y nos tambe mester haci mescos.—Proverbionan 14:15.
CAMBIONAN DRASTICO UN TRAS DI OTRO
Segun cu susesonan ta desaroya, e situacion ta cambia drasticamente. Nan ta colga Haman na e horca cu el a traha pa su victima, Mardokeo, anto Mardokeo ta bira prome minister! Kico di e masacre plania pa destrui e Hudiunan? Esei tambe ta experencia un cambio dramatico.
Fiel Ester ta bolbe bai papia pa defende su pueblo. Poniendo su bida na peliger, e ta presenta dilanti di rei cu un suplica, afin di busca un manera pa preveni e masacre cu Haman a plania. Asuero sa kico tin cu wordo haci. Pesei ora cu finalmente e dia pa masacra e Hudiunan yega, ta esnan cu ta trata na haci nan daño ta ser mata y no e Hudiunan. Mardokeo ta decreta pa tene tur aña e Fiesta di Purim pa conmemora e gran liberacion aki. Mardokeo ta na di dos luga despues di rei Asuero, y ta ‘busca loke ta bon pa su pueblo y ta papia na bienestar di tur su hendenan.’—Ester 10:3.
Contesta Riba Pregunta Biblico:
7:4—Dicon un destruccion di e Hudiunan lo a causa ‘daño na rei’? Door di presenta cu tacto e posibilidad di bende e Hudiunan como esclabo, Ester a trece dilanti e asunto di daño cu rei lo sufri si destrui nan. E 10.000 pidanan di plata cu Haman a priminti tawata hopi menos entrada pa e caha di rei cu e rikesa cu lo por a haya si Haman a plania pa bende e Hudiunan como catibo. Si a efectua Haman su complot, esei lo a nifica cu rei lo a perde su reina tambe.
7:8—Dicon e oficialnan di palacio a tapa Haman su cara? Esaki probablemente tawata pa indica berguensa of calamidad inminente. Segun un buki di consulta, “e hendenan di antiguedad tin biaha tawata tapa cabes di personanan cu nan tawata a punto di ehecuta.”
8:17—Den ki manera “hopi hende for di e pueblonan di e tera a bira Hudiu”? Hopi di e Personan evidentemente a bira proselito Hudiu, es decir a comberti na hudaismo, pensando cu e contradecreto tawata un indicacion di Dios su aprobacion riba e Hudiunan. E mesun principio tin tras di cumplimento di un profecia cu nos ta haya den e buki di Zacarias. E profecia ta bisa: “Dies homber for di tur e nacionnan lo cohe bisti di un Hudiu tene, bisando: ‘Laga nos bai cu boso, pasobra nos a tende cu Dios ta cu boso.’”—Zacarias 8:23.
9:10, 15, 16—Apesar cu e decreto a autorisa e Hudiunan pa tuma botin, dicon nan no a haci esei? E echo cu nan a nenga di haci esei a mustra bon cla cu nan proposito tawata pa proteha nan mes, no enrikece nan mes.
Les pa Nos:
6:6-10. “Orguyo ta bin prome cu destruccion, y un spirito arogante prome cu caida.”—Proverbionan 16:18.
7:3, 4. Nos ta mustra curashi y identifica nos mes como Testigo di Yehova, maske esei lo por nifica cu nos ta haya persecucion?
8:3-6. Nos por y mester apela na autoridadnan gubernamental y tribunalnan hudicial pa haya proteccion contra enemigonan.
8:5. Ester a demostra tacto y no a menciona e responsabilidad cu rei tawatin den e decreto diseña pa destrui Ester su pueblo. Den mesun manera, nos tin cu demostra tacto ora nos ta duna testimonio na oficialnan halto.
9:22. Nos no mester lubida riba e pobernan entre nos.—Galationan 2:10.
Yehova Lo Percura “Alivio y Liberacion”
Mardokeo den un manera indirect ta menciona cu tawata Dios su proposito cu Ester a logra bira reina. Ora e Hudiunan ta ser menasa, nan ta yuna y haci oracion pa pidi yudansa. Lareina ta presenta dilanti di rei sin invitacion y cada biaha ta ser ricibi cu aprobacion. Precisamente riba e anochi crucial, rei no por pega soño. En berdad e buki di Ester ta mustra con Yehova ta maniobra susesonan na beneficio di su pueblo.
E relato excitante di Ester ta specialmente un animacion pa nos cu ta bibando den “e tempo di e fin.” (Daniel 12:4) “Den e ultimo dianan”, of den e ultimo parti di e tempo di fin, Gog di Magog—Satanas e Diabel—lo efectua un atake masal contra e pueblo di Yehova. Su meta lo ta nada menos cu exterminacion di adoradonan berdadero. Pero mescos cu den tempo di Ester, Yehova lo percura “alivio y liberacion” pa su adoradonan.—Ezekiel 38:16-23; Ester 4:14.
[Plachi na pagina 10]
Ester y Mardokeo dilanti di Asuero