Pag-aling-aling na Nakakarahay Asin Nakakaginhawa
Pag-aling-aling na Nakakarahay Asin Nakakaginhawa
“Kamo man nagkakakan o nag-iinom o ano pa man an ginigibo, gibohon an gabos na bagay sa ikakamuraway nin Dios.”—1 CORINTO 10:31.
1, 2. Taano an makawiwiling mga aktibidad ta puedeng mansayon bilang “balaog nin Dios,” pero anong prangkang patanid an itinatao kan Biblia?
NATURAL sanang magmawot na makikabtang sa mga aktibidad na nagtatao sa sato nin kawilihan. Gusto kan satong maogmang Dios, si Jehova, na magin maogma kita sa buhay, asin nagtatao sia nin abundang mga probisyon tanganing magin posible iyan. (1 Timoteo 1:11; 6:17) An madonong na si Hadeng Salomon nagsurat: “Namidbid ko na mayong orog karahay . . . kisa maggayagaya . . . asin siring man na an lambang tawo kumakan asin uminom nanggad patin makaheling nin karahayan para sa gabos niang kahigosan. Iyan an balaog nin Dios.”—Eclesiastes 3:12, 13.
2 Nakakaginhawa nanggad an siring na paggayagaya mantang minapondo nguna an saro tanganing horophoropon an marahay na nagibo nia, espesyalmente mantang nakikiasosyar sa pamilya o sa mga katood. Iyan tama sanang mansayon na “balaog nin Dios.” Siempre, an abundang marhay na probisyon kan Kaglalang dai nagtatao sa sato nin deretso na makikabtang sa daing kontrol na kaorogmahan. Kinokondenar kan Biblia an pagbuburat, kapasloan, asin inmoralidad, na nagpapatanid na an mga naggigibo kan siring na mga bagay “dai magmamana kan kahadean nin Dios.”—1 Corinto 6:9, 10; Talinhaga 23:20, 21; 1 Pedro 4:1-4.
3. Ano an makakatabang sa sato na magdanay na puka sa espirituwal asin papagdanayon na nasa isip an dakulang aldaw ni Jehova?
3 Sa delikadong huring mga aldaw na ini, orog kisa kasuarin man, an mga Kristiano napapaatubang sa kadepisilan na may pagmamaan na mamuhay sa sarong maraot na kinaban na dai inaarog an mga gibo kaiyan. (Juan 17:15, 16) Siring kan ihinula, an mga tawo sa presenteng henerasyon nagin “mga mamomoton sa kasingawan imbes na mga mamomoton sa Dios” sagkod sa punto na ‘dai sinda nagmamangno’ kan ebidensia na an “dakulang kahorasaan” haranihon na. (2 Timoteo 3:4, 5; Mateo 24:21, 37-39) Pinatanidan ni Jesus an saiyang mga parasunod: “Tawan nin atension an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod.” (Lucas 21:34, 35) Bilang mga lingkod nin Dios, determinado kitang maghimate sa patanid ni Jesus. Bakong arog kan mga nasa bakong diosnon na kinaban sa palibot niato, nagmamaigot kitang magdanay na puka sa espirituwal asin papagdanayon na nasa isip an dakulang aldaw ni Jehova.—Sofonias 3:8; Lucas 21:36.
4. (a) Taano ta depisil na makanompong nin akseptableng pag-aling-aling? (b) Anong hatol na yaon sa Efeso 5:15, 16 an gusto niatong iaplikar?
4 An paglikay sa maraot na mga gibo kan kinaban bakong pasil, huling ginibo iyan kan Diablo na kawiliwiling marhay asin madalion na makua. Nangorognang depisil iyan kun naghahanap kita nin aling-alingan. An kadaklan kan iinaalok kan kinaban dinisenyo na makaakit sa “mga mawot nin laman.” (1 Pedro 2:11) An nakakadanyar na aling-alingan makukua sa pampublikong mga lugar, alagad puede man iyan na makalaog sa pribadong harong paagi sa mga babasahon, TV, Internet, asin mga video. Kun siring, an Tataramon nin Dios madonong na naghahatol sa mga Kristiano: “Magmaan kamong marhay na an saindong paglakaw bakong siring sa mga mangmang kundi siring sa mga madonong, na tinutubos an angay na panahon para sa saindo man sana, huli ta an mga aldaw maraot.” (Efeso 5:15, 16) Solamente kun susunodon niato nin maingat an hatol na ini na makakasegurado kita na an nakakadanyar na aling-alingan dai makakatentar sa sato, dai makakaubos kan satong panahon, iyo, dai makakaraot pati sa satong relasyon ki Jehova, na masagkod sa satong pagkalaglag!—Santiago 1:14, 15.
5. Saen naggigikan an satong nakakalabi sa gabos na kaginhawahan?
5 Mantang an mga Kristiano sibot an pamumuhay, natural sana na kun beses namamatean ninda an pangangaipo na magkaigwa nin nagkapirang aktibidad sa pag-aling-aling. Sa katunayan, an Eclesiastes 3:4 nagsasabi na igwa nin “panahon nin pagngisi” asin “panahon nin pagtaroktarok.” Kaya dai ibinibilang kan Biblia na pagsayang nin panahon an pag-aling-aling. Alagad an pag-aling-aling maninigong magpaginhawa sa sato, bako na magsapeligro kan satong espirituwalidad o makaolang sa espirituwal na mga aktibidad. An maygurang na mga Kristiano nakakaaram base sa eksperyensia na an orog na kaogmahan naggigikan sa pagtatao. Ginigibo nindang pangenot sa saindang buhay an paggibo kan kabotan ni Jehova asin naeeksperyensiahan ninda an tunay na ‘kaginhawahan para sa saindang kalag’ sa pag-ako kan maboot na sakal ni Jesus.—Mateo 11:29, 30; Gibo 20:35.
Pagpili nin Akseptableng Pag-aling-aling
6, 7. Ano an makakatabang sa saindo sa pagdesisyon kun ano an aling-alingan na akseptable o bakong akseptable?
6 Paano kita makakasegurado na an sarong klase nin pag-aling-aling akseptable para sa sarong Kristiano? An mga magurang nagtatao nin paggiya sa saindang mga aki, asin an kamagurangan nagtatabang kun kinakaipuhan. Pero, an totoo, dai na kutana kaipuhan na sabihan kita kan iba na bakong akseptable an sarong libro, pelikula, kawat, bayle, o kanta. Si Pablo nagsabi na an “mga maygurang . . . huli sa paggamit napatuod an saindang kakayahan nin pagmansay na mamidbid an tama sagkod an sala.” (Hebreo 5:14; 1 Corinto 14:20) Sinasabi kan Biblia an naggigiyang mga prinsipyo. An saindong konsensia, na pinatuod kan Tataramon nin Dios, matabang sa saindo kun hihinanyogon nindo iyan.—1 Timoteo 1:19.
7 Si Jesus nagsabi na “sa bunga kaiyan an kahoy namimidbid.” (Mateo 12:33) Kun an pag-aling-aling nagpapaluwas nin maraot na mga bunga nin pagkaakit sa kadahasan, inmoralidad, o espiritismo, iyan maninigong haboan. Iyan bako man na akseptable kun iyan nagsasapeligro kan buhay o salud nin saro, kun iyan nagigin dahelan nin kasakitan sa pagbuhay o pagkadesganar, o kun nagigin dahelan iyan kan pagkasingkog nin iba. Si apostol Pablo nagpatanid sa sato na kun linulugadan niato an konsensia kan satong tugang, kita nagkakasala. Si Pablo nagsurat: “Kun kamo nagkakasala nin siring tumang sa saindong mga tugang asin linulugadan an saindang konsensia na maluya, kamo nagkakasala tumang ki Cristo. Kun siring, kun an kakanon nakakapasingkog sa sakong tugang, dai na ako noarin man makakan giraray nin karne, tanganing dai ako makapasingkog sa sakong tugang.”—1 Corinto 8:12, 13.
8. Anong mga peligro an yaon sa paggamit nin elektronikong mga kawat asin video?
8 Nagbabaha an elektronikong mga kawat asin video sa mga tindahan. An nagkapira kaini tibaad nakakatao nin pag-oroogma asin pagpaharohayahay na dai man nakakadanyar, alagad an siring na aling-alingan paorog nang paorog na nagtatampok nin mga bagay na kinokondenar kan Biblia. Segurado na bako nang pag-oroogma sana na dai nakakadanyar kun an kawat naghahagad sa mga parakawat na mambaldado asin mangadan o gumawe sa inmoral na marhay na paagi! Ikinakaongis ni Jehova an mga “namomoot sa kadahasan.” (Salmo 11:5; Talinhaga 3:31; Colosas 3:5, 6) Asin kun an pagkawat pinupukaw sa saindo an kahanaban o karingisan, nakakapanluya sa emosyon, o nagsasayang nin mahalagang panahon, kun siring rekonoseron nindo an espirituwal na danyos na ibinubunga kaiyan asin gumibo tolos kamo nin mga pagliliwat.—Mateo 18:8, 9.
Pagpanigo sa mga Pangangaipong Mag-aling-aling sa Nakakarahay na mga Paagi
9, 10. Ano an magigibo nin mga mapagrisa tanganing panigoan an saindang mga pangangaipong mag-aling-aling?
9 Kun beses, an mga Kristiano naghahapot: “Ano an akseptableng pag-aling-aling? Kadaklan kan iinaalok kan kinaban bakong kaoyon kan mga pamantayan kan Biblia.” Makakasierto kamo na may manonompongan na nakakakontentong pag-aling-aling, alagad iyan nangangaipo nin paghihingoa. Naghahagad iyan nin maingat na pagplano, nangorogna kan mga magurang. Dakol an nakakanompong nin nakakakontentong pagpaharohayahay sa laog kan pamilya asin sa kongregasyon. Nakakaogma asin nakakapakosog an pagkakan na dai naghihidali mientras na pinag-oolayan an mga pangyayari kan aldaw o an sarong topiko sa Biblia. Puedeng iareglo an mga piknik, angay na mga kawat, mga pagkamping, o mga pagbaklay. An siring na nakakarahay na pag-aling-aling puedeng magin nakakaogma asin nakakakontento.
10 An sarong magurang sa kongregasyon asin an saiyang agom na nagpadakula nin tolong aki nagbareta: “Poon sa pagkaaki, an samong mga aki kalabot sa pagpili kun saen kami mabakasyon. Kun beses, tinotogotan niamo an lambang aki na mag-imbitar nin sarong dayupot na amigo, kaya nagigin orog na nakakagayagaya an bakasyon. Ipinapaheling niamo an apresasyon sa makahulogan na mga pangyayari sa buhay kan samong mga aki. Sa panapanahon, iniimbitaran niamo sa samong harong an mga kapamilya asin mga amigo sa kongregasyon. Nagluluto asin nagkakarakanan kami sa luwas kan harong asin nagkakarawat. Nagduduman kami sa kabukidan asin naglalakawlakaw, na ginagamit an siring na mga okasyon tanganing makanood manongod sa mga linalang ni Jehova.”
11, 12. (a) Ano an magigibo nindo tanganing iayon an iba sa saindong mga plano para sa paminsanminsan na pag-aling-aling? (b) Anong klaseng pagtiripontipon an nagin memorable para sa dakol?
11 Puede daw kamong maghingoa bilang indibiduwal o bilang sarong pamilya na iayon an iba kun nagpaplano para sa paminsanminsan na pag-aling-aling? Posibleng nangangaipo nin pagparigon sa boot an nagkapira, siring baga sa sarong balong babae, saro na daing agom, o sarong pamilya na may nagsosolong magurang. (Lucas 14:12-14) Puede man nindong iiba an nagkapira na bago pa sanang nakikiasosyar, na nag-iingat, siempre, na dai isapeligro an iba sa ano man na nakakadanyar na impluwensia. (2 Timoteo 2:20, 21) Kun an mga maluya an hawak nadedepisilan na lumuwas, puede gayod na iareglo an pagdara nin pagkakan tanganing makaibanan sinda sa pagkakan sa saindang harong.—Hebreo 13:1, 2.
12 Nagin memorable para sa dakol an pagtiripontipon na dian an mga bisita simple sana an pagkakan asin nagdadangog nin mga eksperyensia kun paano an iba nagin Kristiano saka kun ano an nakatabang sa sainda na magdanay na maimbod sa Dios. Puedeng pag-orolayan an mga topiko sa Biblia, na iniimbitaran na makikabtang an gabos na presente, pati an mga aki. An siring na pag-orolay puedeng magin kapakipakinabang na mga pagparinigonan nin boot na mayo nin siisay man na napapasupog o nakakamate na kulang sinda sa kakayahan.
13. Paano itinao ni Jesus asin ni Pablo an halimbawa sa pagpaheling asin pag-ako nin pagkamapag-istimar?
13 Itinao ni Jesus an tamang halimbawa sa pagpaheling asin pag-ako nin pagkamapag-istimar. Sa gabos na panahon ginamit nia an siring na mga okasyon tanganing magtao nin espirituwal na mga bendisyon. (Lucas 5:27-39; 10:42; 19:1-10; 24:28-32) Inarog kan saiyang enot na mga disipulo an saiyang halimbawa. (Gibo 2:46, 47) Si apostol Pablo nagsurat: “Ako nagmamawot na maheling kamo, tanganing makatao ako sa saindo nin espirituwal na balaog tanganing kamo maparigon; o, mas marahay pa, tanganing magkaigwa nin pagparinigonan nin boot dian sa saindo, an lambang saro huli sa pagtubod nin iba, an saindo sagkod an sako man.” (Roma 1:11, 12) Kaagid kaiyan, an satong pagtiripontipon maninigong magin lugar para sa pagparinigonan nin boot.—Roma 12:13; 15:1, 2.
Nagkapirang Pagirumdom Asin Patanid
14. Taano ta bakong marahay an darakulang sosyal na okasyon?
14 Bakong marahay an pagkaigwa nin darakulang sosyal na okasyon, huli ta an pagdirehir sa mga iyan parateng depisil. Sa panahon na dai makakaolang sa espirituwal na mga aktibidad, an nagkapirang pamilya puedeng mag-orolay na iribang magpiknik o gibohon an kawat na daing gayo nagtatampok nin kompetisyon. Kun presente sa sarong sosyal na pagtiripontipon an nagkapira sa kamagurangan, ministeryal na mga lingkod, o ibang mga maygurang, nagtatao sinda nin marahay na impluwensia asin an okasyon nagigin orog pa nganing nakakaginhawa.
15. Taano ta maninigong iareglo kan kag-imbitar sa okasyon an tamang pagdirehir?
15 Sa sosyal na mga pagtiripontipon, an mga naggigibo kan mga areglo maninigong dai pagpalimanlimanan an pangangaipo para sa tamang pagdirehir. Mantang ikinakaogma nindo an pagpaheling nin pagkamapag-istimar, dai daw kamo makakamate nin grabeng pagbasol kun maaraman nindo na huli sa saindong kapabayaan, nasingkog an sarong bisita sa nangyari sa saindong harong? Estudyare an prinsipyo na tinotokar sa Deuteronomio 22:8. Hinahagad sa sarong Israelita na nagtogdok nin bagong harong na maggibo nin barandilya sa palibot kan patag na bubongan, na parateng ginagamit sa pag-istimar nin mga bisita. Taano? “Tanganing dai mo mabugtakan nin pagkakasala sa dugo an saimong harong huli ta tibaad may mahulog dian.” Sa kaagid na paagi, an saindong ginigibo—na dai man nagbubugtak nin bakong rasonableng mga restriksion—tanganing protehiran an saindong mga bisita sa sarong sosyal na pagtiripontipon maninigo na para sa saindang pisikal asin espirituwal na kapakanan.
16. Anong pag-iingat an maninigong gibohon kun nagseserbi nin inomon na de alkohol sa sarong sosyal na pagtiripontipon?
16 Kun nagseserbi nin inomon na de alkohol sa sarong sosyal na pagtiripontipon, maninigong gibohon ini na may dakulang pag-iingat. Dakol na Kristianong kag-imbitar an nagdesisyon na magserbi sana nin mga inomon na de alkohol kun personal nindang madidirehiran kun ano an iseserbi o makokonsumo kan saindang mga bisita. Dai maninigong itogot an ano man na puedeng ikasingkog nin iba o makatentar sa siisay man na magpalabilabi. (Efeso 5:18, 19) Huli sa manlaenlaen na dahelan, an nagkapirang bisita tibaad magdesisyon na lumikay sa inomon na de alkohol. Dakol na lugar an igwa nin pinakahababang edad sa pag-inom segun sa ley, asin an mga Kristiano magigin makinuyog sa mga ley ni Cesar dawa kun an mga reglamentong ini garo baga sobra kamapamogol.—Roma 13:5.
17. (a) Kun nagpapatugtog nin musika sa sarong sosyal na okasyon, taano ta mahalaga na an kag-imbitar magin mapamiling marhay? (b) Kun may baraylehan sa sarong pagtiripontipon, paano maninigong ipabanaag an kabinian?
17 Maninigong seguradohon kan kag-imbitar na an ano man na musika, bayle, o iba pang aling-alingan kaoyon kan Kristianong mga prinsipyo. Nagkakalaenlaen an hilig sa musika, asin kadakol kan manlaenlaen na musika. Minsan siring, pinapalakop kan kadaklan na musika ngonyan an espiritu nin pagrebelde, inmoralidad, asin kadahasan. Igwa nin pangangaipo para sa pagigin mapamili. An disenteng musika dai man kaipuhan na maluway, alagad dai man iyan maninigo na magin malaswa o bulgar, na maribokon asin nagtatagubtob. Magin maingat na dai nindo ipaniwala an pagpili nin musika sa sarong tawo na dai pa lubos na nakakasabot sa pangangaipong papagdanayon an tama sanang kosog. An bayle na kalabot an mga hirong bakong mabini, na nagdodoon nin erotikong mga paghiro kan piad asin daghan, malinaw na bakong angay para sa sarong Kristiano.—1 Timoteo 2:8-10.
18. Paano mapoprotehiran kan mga magurang an saindang mga aki paagi sa pagdirehir sa sosyal na aktibidad ninda?
18 Maninigong aramon kan Kristianong mga magurang kun ano an nakaplanong gibohon sa ano man na sosyal na pagtiripontipon na aatenderan kan saindang mga aki, asin madonong na ibanan sinda sa kadaklan na kamugtakan. Makamomondo, tinogotan kan nagkapirang magurang an saindang mga aki na mag-atender sa mga parti na mayo nin nagdidirehir asin an nagkapira sa nag-atender natentaran na gumibo nin inmoralidad o ibang paggawe na salang marhay. (Efeso 6:1-4) Dawa kun an mga hoben nasa huring mga taon na kan saindang pagkatinedyer asin ikinapaheling ninda na kaya nindang gumawe nin responsable, kaipuhan pa giraray na tabangan sinda na ‘dumulag sa mga mawot na konektado sa pagkahoben.’—2 Timoteo 2:22.
19. Anong katunayan an makakatabang sa sato na magkonsentrar sa maninigo niatong “hanapon nguna”?
19 Puedeng magin orog na nakakagayagaya an buhay sa paminsanminsan na pag-aling-aling na nakakarahay asin nakakaginhawa. Dai ipinapanguri sa sato ni Jehova an kawilihan na ini, alagad sa katotoohan naaaraman niato na an mismong mga aktibidad na iyan dai nakakatabang sa sato sa pagtipon nin ano man na espirituwal na kayamanan sa langit. (Mateo 6:19-21) Tinabangan ni Jesus an saiyang mga disipulo na masabotan na an ‘paghanap nguna kan kahadean asin katanosan nin Dios’ iyo an mahalagang bagay sa buhay, bakong an satong kinakakan o iniinom o isinusulot, “mga bagay na hinahanap na gayo kan mga nasyon.”—Mateo 6:31-34.
20. Anong marahay na mga bagay hale sa Kaharohalangkaweng Paratao an puedeng antisiparon kan maimbod na mga lingkod ni Jehova?
20 Iyo, baga man kita “nagkakakan o nag-iinom o ano pa man an ginigibo,” magigibo niato “an gabos na bagay sa ikakamuraway nin Dios,” na pinapasalamatan an Kaharohalangkaweng Paratao para sa marahay na mga bagay na nakakamtan niato nin tama sana. (1 Corinto 10:31) Sa saiyang Paraisong daga na haranihon na, magkakaigwa nin daing katapusan na mga okasyon tanganing lubos na ikaogma an pagigin buka kan palad ni Jehova, kaiba an nakakarahay na pakikiiba kan gabos na nakakaabot sa saiyang matanos na mga kahagadan.—Salmo 145:16; Isaias 25:6; 2 Corinto 7:1.
Nagigirumdoman daw Nindo?
• Taano ta depisil para sa mga Kristiano ngonyan na makanompong nin pag-aling-aling na nakakarahay?
• Ano an nagkapirang klase nin pag-aling-aling na nagin nakakakontento para sa Kristianong mga pamilya?
• Kun ginigibo an nakakarahay na pag-aling-aling, anong mga pagirumdom asin patanid an maninigong isaisip?
[Mga Hapot Para sa Pag-adal]
[Ritrato sa pahina 18]
Pilion an pag-aling-aling na nagpapaluwas nin marahay na mga bunga
[Mga Ritrato sa pahina 19]
Anong mga klase nin pag-aling-aling an hinahaboan nin mga Kristiano?