Rekreo Sano Ku Ta Refreská

“Sea ku boso ta kome òf bebe òf kiko ku boso ta hasi, hasi tur pa e gloria di Dios.”—1 KORINTIONAN 10:31.

1, 2. Dikon nos por mira aktividatnan plasentero komo un “regalo di Dios,” pero ki spièrtamentu franko Beibel ta duna?

TA NATURAL ku nos ke partisipá den aktividatnan ku ta duna nos plaser. Yehova, nos Dios felis, ke pa nos gosa di bida, i e ta proveé kosnan na abundansia pa hasi esei posibel. (1 Timoteo 1:11, NW; 6:17) Rei sabí Salomon a skirbi: “Mi sa ku no tin nada mihó . . . ku regosihá . . . i tambe ku tur hende por kome i bebe i mira e bon ku tin den tur su trabou—esaki ta e regalo di Dios.”—Eklesiastés 3:12, 13.

² En bèrdat bo ta sinti bo refreská ora ku bo tuma un pousa pa reflekshoná riba bon trabou ku bo a logra, spesialmente si bo hasi esei den e dushi kompania di famia i amigunan. E alegria ei ku bo ta sinti, apropiadamente por ser mirá komo un “regalo di Dios.” Ta mas ku klaru ku e regalo abundante aki di e Kreadó no ke men ku nos mag di entregá nos mes pa loko na dibertishon. Beibel ta kondená buracheria, golosidat i inmoralidat, i ta spièrta ku e hendenan ku ta praktiká e kosnan ei “lo no heredá e reino di Dios.”—1 Korintionan 6:9, 10; Proverbionan 23:20, 21; 1 Pedro 4:1-4.

3. Kiko lo yuda nos keda spiritualmente alerta i tene e gran dia di Yehova na mente?

³ Den e último dianan trabahoso aki, mas ku nunka promé, kristiannan ta konfrontá e reto di biba na un manera prudente den un mundu korupto, sin adoptá su práktikanan. (Juan 17:15, 16) Manera Beibel a profetisá, e hendenan di e generashon djawe a bira ‘stimadó di plaser mas bien ku stimadó di Dios,’ te na e grado ku nan no ta “hasi kaso” di e evidensia ku e “tribulashon grandi” ta djis nan dilanti. (2 Timoteo 3:4, 5; Mateo 24:21, 37-39, NW) Hesus a spièrta su siguidónan: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso manera un trampa.” (Lukas 21:34, 35) Komo sirbidó di Dios, nos ta determiná pa hasi kaso di Hesus su spièrtamentu. Distinto for di e hendenan den e mundu malbado rònt di nos, nos ta hasi esfuerso pa keda spiritualmente alerta i pa tene e gran dia di Yehova na mente.—Sofonias 3:8; Lukas 21:36.

4. (a) Dikon ta difísil pa haña rekreo ku ta aseptabel? (b) Ki konseho nos ta haña na Efesionan 5:15 i 16 ku nos ke apliká?

 ⁴ No ta fásil pa keda liber di e práktikanan korupto di mundu, ya ku Diabel ta hasi nan masha deseabel i aksesibel. Ta spesialmente difísil ora nos ta buska entretenimentu òf rekreo. Mayoria kos ku mundu ta ofresé ta diseñá pa atraé deseo- òf “pashonnan karnal.” (1 Pedro 2:11) Entretenimentu perhudisial ta disponibel na lugánan públiko, pero e por penetrá tambe den e privasidat di nos kas pa medio di literatura, televishon, Internet i vidio. P’esei e Palabra di Dios ta duna e konseho sabí aki na kristiannan: “Mira bon kon boso ta kana, no manera hende bobo, ma manera hende sabí, hasiendo bon uso di boso tempu, pasobra e dianan ta malu.” (Efesionan 5:15, 16) Ta solamente si nos sigui e konseho ei estrechamente nos por hasi sigur ku entretenimentu perhudisial lo no hinka nos den tentashon, apsorbá tur nos tempu i atenshon, òf te asta destruí nos relashon ku Yehova, i hiba nos asina na destrukshon.—Santiago 1:14, 15.

5. Kiko ta loke mas ta refreská nos?

⁵ Kristiannan ta hiba un bida hopi okupá, p’esei ta di komprondé ku de bes en kuando nan ta sinti e nesesidat di gosa di un poko rekreo. De echo, Eklesiastés 3:4 ta bisa ku tin “un tempu pa hari” i “un tempu pa baila.” Pues anto, Beibel no ta konsiderá rekreo komo malgastamentu di tempu. Pero rekreo mester refreská nos, e no mester pone nos spiritualidat na peliger ni interferí ku aktividatnan spiritual. Kristiannan maduro sa di eksperensia ku tin mas felisidat den duna. Nan ta pone e hasimentu di Yehova su boluntat na promé lugá den nan bida i nan ta haña berdadero ‘sosiegu pa nan alma’ dor di aseptá Hesus su yugo suave.—Mateo 11:29, 30; Echonan 20:35.

Kon pa Skohe Rekreo Ku Ta Aseptabel

6, 7. Kiko por yuda bo disidí ki ora un rekreo ta aseptabel òf inaseptabel?

⁶ Kon nos por ta sigur ku un sierto forma di rekreo ta apropiá òf aseptabel pa un kristian? Mayornan ta perkurá guia pa nan yunan, i ansianonan ta yuda nos ora ku ta nesesario. Pero en realidat, lo no mester ta nesesario pa otro hende bisa nos ku un sierto buki, pelíkula, wega, baile òf kantika ta inaseptabel. Pablo a bisa ku “hende madurá . . . pa motibu di práktika, tin nan mente entrená pa diserní loke ta bon i loke ta malu.” (Hebreonan 5:14; 1 Korintionan 14:20) Beibel ta duna prinsipionan ku por guia bo. Bo konsenshi, entrená pa e Palabra di Dios, lo yuda bo si bo skuch’é.—1 Timoteo 1:19.

⁷ Hesus a bisa ku “na su fruta bo ta konosé e palu.” (Mateo 12:33) Si un aktividat di rekreo ta produsí fruta putrí, nos mester rechas’é. E fruta ei por ta un atrakshon na violensia, inmoralidat òf spiritismo. Tambe e ta inaseptabel si e ta pone bo bida òf salú na peliger, si e ta kousa difikultat ekonómiko òf desanimashon, òf si e ta pone otro hende trompeká. Apòstel Pablo a spièrta nos ku si nos heridá e konsenshi  di nos ruman, nos ta kometiendo un piká. Pablo a skirbi: “Dor di peka kontra e rumannan i dor di heridá nan konsenshi débil, boso ta peka kontra Kristu. P’esei, si kuminda ta hasi mi ruman trompeká, lo mi no kome karni nunka mas, pa mi no hasi mi ruman trompeká.”—1 Korintionan 8:12, 13.

8. Ki peligernan ta eksistí ora di usa weganan elektróniko i ora di wak pelíkula?

⁸ Negoshinan ta patapata di weganan elektróniko i pelíkula riba vidio òf DVD. Tin di nan kisas ta un pasatempu inosente i ta relahá bo, pero mas i mas bo ta haña entretenimentu ku ta kontené loke Beibel ta kondená. Un wega ku ta eksigí pa su hungadónan manka i mata hende òf aktua den un manera sumamente inmoral, sigur no ta djis un pasatempu inosente! Yehova ta odia hende “ku ta gusta violensia.” (Salmo 11:5; Proverbionan 3:31; Kolosensenan 3:5, 6) I si un wega ku bo ta hunga ta hasi bo agresivo òf golos pa kos, ta agotá bo emoshonalmente òf ta malgastá tempu balioso, e ora ei rekonosé e daño spiritual ku e ta kousa i hasi ahuste rápidamente.—Mateo 18:8, 9.

Kon pa Satisfasé Nos Nesesidat di Rekreo den Maneranan Sano

9, 10. Kiko kristiannan ku disernimentu por hasi pa satisfasé nan nesesidat di rekreo?

⁹ Tin biaha, kristiannan ta puntra: “Kiko ta rekreo aseptabel? Mayoria kos ku mundu ta ofresé ta bai kontra di normanan bíbliko.” Bo por tin sigur ku ta posibel pa haña rekreo ku ta satisfasé bo, pero bo tin ku hasi esfuerso. E ta rekerí pa bo plania bon di antemano, spesialmente komo mayor. Hopi kristian ta rekreá masha dushi den sírkulo di famia i entre e rumannan den kongregashon. Un kos plasentero i edifikante ta por ehèmpel un komementu relahá kaminda por papia di loke a sosodé durante dia òf di un tópiko bíbliko. Por organisá piknik, weganan apropiá, aktividat di kamper òf kaminatanan. Ku tal rekreo sano bo por pasa prèt i sinti bo refreská.

¹⁰ Un ansiano ku su kasá kendenan a lanta tres yu, a informá: “For di chikitu, nos yunan tabata enbolbí den skohe unda nos ta bai ku fakansi. Tabatin biaha ku nos a permití kada yu invitá un bon amigu òf amiga, lokual a hasi e fakansi mas dushi ainda. Tambe nos a para ketu na sierto eventonan importante den bida di nos yunan. Tempu-tempu nos tabata invitá famia i amigunan den kongregashon na nos kas. Nos tabatin barbekiú i a hunga wega. Tambe nos tabata bai keiru den serunan, sea ku outo òf na pia, usando okashonnan asina pa siña tokante e kreashon di Yehova.”

11, 12. (a) Kiko bo por hasi pa inkluí otro hende ora ku de bes en kuando bo ta traha plan pa rekreo? (b) Ki klase di get-together a resultá inolvidabel pa hopi ruman?

¹¹ Sea individualmente òf komo famia, ta posibel pa bo hasi areglo pa inkluí otro hende ora ku de bes en kuando bo ta traha plan pa rekreo? Tin rumannan, manera un biuda, un persona soltero òf un famia di un solo mayor, ku kisas tin mester di animashon. (Lukas 14:12-14) Kisas tambe lo bo por inkluí algun  persona ku resientemente a kuminsá asosiá ku e kongregashon, pero klaru teniendo kuidou pa bo no eksponé otro rumannan na ningun mal influensia. (2 Timoteo 2:20, 21) Si ta difísil pa rumannan enfermo sali fo’i kas, kisas por hasi areglo pa bin ku un kuminda pa kome serka nan na nan kas.—Hebreonan 13:1, 2.

¹² Hopi ruman tin rekuerdonan inolvidabel di sierto get-together kaminda invitadonan a kome un kuminda simpel, tende eksperensianan tokante kon otro rumannan den e grupo a bira kristian i a haña sa kiko a yuda nan keda fiel na Dios. Lo por bin ku tópikonan bíbliko pa papia riba dje, anto ta invitá tur presente, inkluso e muchanan, pa partisipá. Kòmbersashonnan asina por ta un interkambio di estímulo hopi probechoso, sin ku ningun hende tin ku sinti nan mes inkómodo òf inadekuá.

13. Kon Hesus i Pablo tabata un ehèmpel den mustra i aseptá hospitalidat?

¹³ Hesus a pone un bon ehèmpel den mustra i aseptá hospitalidat. Semper el a usa e okashonnan ei pa kompartí benefisionan spiritual. (Lukas 5:27-39; 10:42; 19:1-10; 24:28-32) Su promé disipelnan a imitá su ehèmpel. (Echonan 2:46, 47) Apòstel Pablo a skirbi: “Mi ta anhelá di mira boso, pa mi por kompartí algun don spiritual ku boso, pa boso por keda establesí—esta, pa mi por wòrdu enkurashá huntu ku boso, miéntras ku mi ta serka boso, kada un di nos dor di fe di e otro, tantu e fe di boso komo e fe di mi.” (Romanonan 1:11, 12) Di igual manera, ora nos tin get-together nos mester krea un ambiente kaminda por tin un interkambio di estímulo.—Romanonan 12:13; 15:1, 2.

Algun Rekordatorio i Spièrtamentu

14. Dikon no ta konsehabel pa tene reunionnan sosial grandi?

¹⁴ No ta konsehabel pa nos tene reunionnan sosial grandi, ya ku hopi bes ta difísil pa supervisá nan. Na un okashon ku no ta interferí ku aktividatnan spiritual, algun famia por disidí di gosa huntu dor di pone un piknik òf hunga un wega ku no ta muchu kompetitivo. Ora tin algun ansiano, sirbidó ministerial òf otro rumannan maduro presente na un reunion sosial, nan por ta un bon influensia i e okashon por refreská nos mas ainda.

15. Dikon ora bo invitá hende na un evento bo mester perkurá pa tin bon supervishon?

¹⁵ Rumannan ku ta organisá reunionnan sosial no mester pasa por haltu di e nesesidat di tin bon supervishon. Maske bo ta gusta mustra hospitalidat, kon lo bo sinti bo si bo haña sa ku debí na negligensia di bo parti, un invitado a trompeká dor di loke a pasa den bo kas? Lo bo sinti bo hopi malu tòg? Konsiderá e prinsipio ku Deuteronomio 22:8 ta trata. Hopi biaha e israelitanan a entretené invitado riba nan dak di kas ku tabata plat. P’esei e israelita ku a konstruí un kas nobo mester a traha un rant rònt di e dak plat ei. Dikon? “Pa bo no trese kulpa di sanger riba bo kas, si un hende kai for di dje.” Asina tambe, loke bo ta hasi pa protehá e hendenan ku bo invitá na un reunion sosial—sin imponé restrikshonnan irasonabel—mester ta ku nan bienestar físiko i spiritual na pechu.

16. Ki kuidou nos mester tene si nos ta sirbi alkohòl na un reunion sosial?

¹⁶ Si ta sirbi alkohòl na un reunion sosial,  mester hasi esaki ku hopi kuidou. Hopi anfitrion kristian ta disidí di sirbi bebida alkohóliko solamente si nan mes por supervisá kiko ta sirbi e invitadonan òf kuantu nan ta bebe. No mester permití nada ku lo por trompeká otro hende òf tenta un hende pa bebe di mas. (Efesionan 5:18, 19) Pa vários motibu, algun invitado mes por disidí di apstené di alkohòl. Hopi pais tin un edat legal mínimo ku ta permití pa bebe, i kristiannan lo obedesé e leinan di Cesar asta ora e reglanan aki ta parse demasiado estrikto.—Romanonan 13:5.

17. (a) Si ta bai toka muzik na un evento sosial, dikon ta importante pa e anfitrion ta masha selektivo? (b) Si tin bailamentu na un reunion sosial, kon nos mester reflehá modestia?

¹⁷ E anfitrion mester hasi sigur ku kualke muzik, bailamentu i otro entretenimentu ku lo tin ta na armonia ku prinsipionan kristian. Gustu musikal ta varia, i tin un variedat grandi di muzik disponibel. Sin embargo, gran parti di e muzik djawe ta fomentá un spiritu di rebelion, inmoralidat i violensia. P’esei nos mester ta selektivo. Muzik desente no nesesariamente mester ta muzik suave, pero tampoko e mester ta sensual òf vulgar ni demasiado duru. Tene kuidou pa bo no laga e skohementu di muzik na enkargo di un persona ku no ta mira ku ta nesesario pa tene e volúmen na un nivel moderá. Ta mas ku klaru tambe ku un baile ku ta enserá komportashon inmodesto, enfatisando movementunan erótiko di hep i pechu, lo no ta apropiá pa un kristian.—1 Timoteo 2:8-10.

18. Kon mayornan por protehá nan yunan dor di supervisá nan aktividat sosial?

¹⁸ Mayornan kristian mester buska pa sa ta kiko tin planiá pa kualke reunion sosial na kua nan yunan a ser invitá, i lo ta sabí pa den mayoria kaso nan kompañá nan yunan. Lamentablemente, algun mayor a permití nan yunan bai fiestanan kaminda no tabatin supervishon i kaminda vários di esnan presente a ser sedusí pa kometé inmoralidat òf partisipá den otro komportashon inapropiá. (Efesionan 6:1-4) Asta si hóbennan ta den e último añanan di nan adolesensia i nan a demostrá ku nan por komportá nan mes na un manera responsabel, tòg ta nesesario pa yuda nan “hui pa e pashonnan di hubentut.”—2 Timoteo 2:22.

19. Ki realidat por yuda nos enfoká riba loke nos mester “buska promé”?

¹⁹ Partisipá de bes en kuando den rekreo i entretenimentu ku ta sano i ku ta refreská bo, por hasi bida mas dushi. Yehova no ta nenga nos e plaser aki, pero siendo realista nos sa ku e aktividatnan aki riba nan mes no ta yuda nos montoná ningun tesoro spiritual den shelu. (Mateo 6:19-21) Hesus a yuda su disipelnan komprondé ku e kos importante den bida ta pa “buska promé e reino di Dios i Su hustisia,” no kiko nos ta bai kome òf bebe òf bisti, ‘kosnan ku e paganonan ta buska.’—Mateo 6:31-34.

20. Fiel sirbidónan di Yehova por spera ansiosamente riba ki kosnan bon for di Esun Magnífiko?

²⁰ Sí, sea ku nos ta ‘kome òf bebe òf kiko ku nos ta hasi,’ nos por hasi “tur pa e gloria di Dios,” i gradisí Esun Magnífiko ku a duna nos kosnan bon ku nos por disfrutá di dje ku moderashon. (1 Korintionan 10:31) Den su tera transformá den Paradeis ku ta djis nos dilanti, lo tin masha hopi okashon mes pa gosa plenamente di Yehova su generosidat, huntu ku e asosiashon sano di tur otro hende ku ta kumpli ku su rekisitonan hustu.—Salmo 145:16; Isaias 25:6; 2 Korintionan 7:1.

Bo Ta Kòrda?

• Dikon ta difísil pa kristiannan djawe haña rekreo sano?

• Kua ta algun forma di rekreo ku a duna famianan kristian satisfakshon?

• Ora bo ta disfrutá di rekreo sano, ki rekordatorio i spièrtamentu bo mester tene na mente?

[Preguntanan di Estudio]

[Plachi na página 18]

Skohe rekreo ku ta produsí bon fruta

[Plachinan na página 19]

Ki formanan di rekreo kristiannan ta rechasá?